Category: अमेरिका

न्युयोर्क/अमेरिका
नेपाल अमेरिका पत्रकार संघ (नेजा) को आगामी मे महिनामा न्यूयोर्कमा हुन लागेको सातौं अधिवेशनको तयारीबारे पत्रकारहरुबीच छलफल गरिएको छ ।
नेजाले आइतबार न्यूयोर्कको ज्याक्सन हाइटमा आयोजना गरेको छलफलमा अमेरिकाको उत्तर पूर्वी क्षेत्रमा कार्यरत पत्रकारहरु सहभागी भएका थिए । नेजाको सातौं अधिवेशन तथा १४ औं साधारण सभा आगामी मे महिनाको २ र ३ गते हुँदैछ ।
भेलामा अधिवेशन कसरी सम्पन्न गर्ने, कस्ले के कस्तो जिम्मेवारी लिने, सहयोग संकलन कसरी गर्ने लगायतका विषयमा छलफल गरिएको थियो ।

न्यूयोर्कमा गरिएको पत्रकारको भेलाले अधिवेशन सफल पार्नका लागि कार्यविभाजन गर्दै बिभिन्न ९ वटा उपसमिति निर्माण गरेको छ । नेजाका सल्लाहकार तथा पूर्व अध्यक्ष आङछिरिङ शेर्पाको संयोजकत्वमा आर्थिक ब्यवस्थापन उपसमिति, कोषाध्यक्ष मच्छेदेवी गुरुङको संयोजकत्वमा दर्ता तथा रजिस्ट्रेसन उपसमिति, शैलेश श्रेष्ठको संयोजकत्वमा होटल तथा हल ब्यवस्थापन उपसमिति निर्माण गरिएको छ ।
त्यसैगरी बिष्णु पौडेलको संयोजकत्वमा यातायात ब्यवस्थापन उपसमिति, पिपलमणी सिग्देलको संयोजकत्वमा अतिथि सत्कार ब्यवस्थापन उपसमिति, अनुज थापाको संयोजकत्वमा प्रसार प्रचार तथा मसलन्द ब्यवस्थापन उपसमिति, योगेश डंगोलको संयोजकत्वमा हल सजावट, साउण्ड सिस्टम तथा सांस्कृतिक कार्यक्रम ब्यवस्थापन उपसमिति, दिवाकर बाक्चनको संयोजकत्वमा स्थानीय संघ/संस्था संयोजन उपसमिति र ङिमा पाख्रिनको संयोजकत्वमा भोजन ब्यवस्थापन उपसमिति निर्माण गरिएको छ । गत डिसेम्बरमा बसेको नेजाको सल्लाहकारहरु सहितको कार्यसमितिको बैठकले आगामी अधिवेशन न्यूयोर्कमा गर्ने निर्णय गरेको थियो ।
विश्व प्रेस स्वतन्त्रता दिवसको अवसरमा अधिवेशन सम्पन्न गरिने तय भएको छ । अधिवेशन सफल पार्नका लागि अमेरिकामा रहेका नेपाली समुदाय, ब्यवसायी, समाजसेबी, बिभिन्न संघ संस्थाका प्रतिनिधि सबैलाई सहयोग गरिदिन पनि नेजाले बिशेष आग्रह गरेको छ ।

भेलाले गठन गरेको विभिन्न उपसमितिहरु:

दर्ता तथा रजिस्ट्रेसन उपसमिति
संयोजक : मच्छेदवी गुरुङ
सदस्यः बद्री गौतम
सदस्यः बिष्णु पौडेल
सदस्य : अनिल अधिकारी
सदस्यः अनुज थापा

आर्थिक ब्यवस्थापन उपसमिति
संयोजकः आङछिरिङ शेर्पा
सदस्यः किरण मरहठ्ठा
सदस्यः मच्छेदेवी गुरुङ
सदस्यः कल्पना घिमिरे
सदस्यः ङिमा पाख्रिन
सदस्यः शैलेश श्रेष्ठ
सदस्यः बिष्णु पौडेल
सदस्यः मोहनसिंह लामा
सदस्यः बिष्णुहरी घिमिरे
सदस्यः दिवाकर बाक्चन
सदस्यः पिपलमणी सिग्देल
सदस्यः गोकुल श्रेष्ठ

होटल/हल ब्यवस्थापन उपसमिति
संयोजक: शैलेश श्रेष्ठ
सदस्यः आङछिरिङ शेर्पा
सदस्यः किरण मरहठ्ठा
सदस्यः मच्छेदेवी गुरुङ
सदस्यः दिवाकर बाक्चन
सदस्यः अनुज थापा
सदस्यः मनोज घिमिरे

यातायात ब्यवस्थापन उप समिति
संयोजक : बिष्णु पौडेल
सदस्यः लोकमणी राई
सदस्यः अनिल अधिकारी
सदस्यः गोकुल श्रेष्ठ
सदस्यः संजोक आचार्य

अतिथि सत्कार ब्यवस्थापन उपसमिति
संयोजकः पिपलमणी सिग्देल
सदस्यः ज्ञानप्रसाद बाँस्तोला
सदस्यः बिष्णुहरी घिमिरे
सदस्यः गीता पन्थ
सदस्यः तारा भट्टराई

प्रसार प्रचार तथा मसलन्द ब्यवस्थापन उपसमिति
संयोजकः अनुज थापा
सदस्यः ज्योती कुमार श्रेष्ठ
सदस्यः बद्री गौतम
सदस्यः दिनेश कार्की
सदस्यः अकुर लुइटेल
सदस्यः संजोक आचार्य
सदस्यः प्रभात भट्टराई

संस्कृतिक कार्यक्रम ब्यवस्थापन उपसमिति
संयोजक: योगेश डंगोल
सदस्यः कल्पना घिमिरे
सदस्यः ङिमा पाख्रिन
सदस्यः अनुज थापा
सदस्यः मनोज घिमिरे
सदस्यः लोकमणी राई

स्थानीय संघ/संस्था संयोजन उपसमिति
संयोजकः दिवाकर बाक्चन
सदस्यः आङछिरिङ शेर्पा
सदस्यः किरण मरहठ्ठा
सदस्यः मच्छेदेवी गुरुङ
सदस्यः कल्पना घिमिरे
सदस्य: दिनेश कार्की
सदस्यः शैलेश श्रेष्ठ
सदस्यः अकुर लुइटेल
सदस्यः बिष्णुहरी घिमिरे

भोजन ब्यवस्थापन उपसमिति
संयोजकः ङिमा पाख्रिन
सदस्यः कल्पना घिमिरे
सदस्यः योगेश डंगोल
सदस्यः गीता पन्थ
सदस्यः तारा भट्टराई

न्यूयोर्क/अमेरिका
भारतीय पक्षबाट भएको नेपाली भूमि अतिक्रमण बिरुद्ध संयुक्त राष्ट्रसंघ मुख्यालय न्युयोर्क अगाडि विरोध प्रदर्शन गरिएको छ । भारतले हालै सार्वजनिक गरेको नक्शामा नेपाली भूभागहरु समेटेको विरोधमा गरिएको प्रदर्शनमा न्युयोर्क र आसपासका राज्यबाट समेत नेपालीहरुको उपस्थीति थियो ।
राष्ट्रसंघ मुख्यालय अगाडि रहेको राल्फ पार्कमा आयोजित कार्यक्रममा सिमाविद् बुद्धिनारायण श्रेष्ठले नेपालका तर्फबाट लिपुलेक, लिम्पियाधुरा लगायत नेपाली भूभाग समेटेको नक्शा तुरुन्त सार्वजनिक गर्नुपर्ने बताए । संचारकर्मी प्रेम बानियाले भारतीय पक्षबाट भएको नेपाली सिमा अतिक्रमणबिरुद्ध विश्वभरका नेपालीहरुले आवाज उठाउनुपर्ने बताए । संचारकर्मी अनिल अधिकारीले भारतीय पक्षबाट नेपाली भूभाग अतिक्रमणविरुद्धको प्रदर्शनमा नेपालीहरुको सहभागिताले देशभक्ति प्रतिबिम्बित गरेको बताए । कार्यक्रममा गायिका सपना श्रीले राष्ट्रिय गीत गाएकी थिइन् भने गायक रामप्रसाद खनाल र कवयत्री शकुन ज्ञवालीको गीत र कविताले देशभक्तिपूर्ण माहौल श्रृजना गरेको थियो ।

कार्यक्रममा भारतीयपक्षबाट गरिएको सिमा अतिक्रमणको बिरुद्ध नाराबाजी गरिएको थियो । सहभागीहरुले भारतीय पक्षबाट आफ्नो नक्शामा समेटेको लिपुलेक, लिम्पियाधुरा र नेपालको नक्शासहितको टिसर्ट लगाएर बिभिन्न सन्देश बोकेका प्लेकार्ड बोकेका थिए ।
विरोध प्रदर्शनपछि संयुक्त राष्ट्रसंघका महासचिब एन्टोनियो गुटिरेजलाई प्रवक्तामार्फत ज्ञापनपत्र बुझाइएको थियो । भारतीय पक्षले सार्वजनिक गरेको नक्शामा नेपालको भूभाग समेटेकोमा त्यसलाई सच्याउने दिशामा सकारात्मक भूमिका खेल्न राष्ट्रसंघलाई आब्हान सहित ज्ञापनपत्र बुझाइएको हो । भारतले सार्वजनिक गरेको नक्शामा नेपाली भूभाग समेटेको सन्दर्भमा बुद्धिनारायण श्रेष्ठको बिष्लेषणसमेत ज्ञापनपत्रमा समेटिएको थियो । उक्त कार्यक्रम संचारकर्मीहरु प्रेम बानिया र अनिल अधिकारीको पहलमा गरिएको थियो ।

न्यूयोर्क/अमेरिका
नेपाल भारत सिमा विवादबारे नेपालीहरुले संयुक्त राष्ट्रसंघको मुख्यालय अगाडि बिरोध नेपालको भुमी फिर्ताको माग गर्दै संयुक्त राष्ट्रसंघ अगाडि बिरोध -याली गर्ने भएका छन् । आउँदो सोमबार जनवरी १३ तारिख न्यूयोर्कस्थित राष्ट्रसंघको मुख्यालय अघिल्तिर नेपालीहरुले बिरोध नेपालको भुमी फिर्ताको माग गर्दै संयुक्त राष्ट्रसंघ अगाडि बिरोध -याली गर्न लागेका हुन् ।

लिपुलेक, लिम्पियाधुरा, कालापानी भुमी फिर्ताको माग गर्दै बिरोध स्वरुप नेपालको भुमी फिर्ताको माग गर्दै संयुक्त राष्ट्रसंघ अगाडि बिरोध -याली आयोजना गर्न लागिएको जनाइएको छ । संचारकर्मी प्रेम बानियाले भने, यो प्रवासमा रहेका नेपालीहरुको संयुक्त आवाज हो, स्वतन्त्र प्रयास हो, हामीले हाम्रो भुमी फिर्ता माग्न यो कार्यक्रमको आयोजना गर्न लागेका हौं ।

कार्यक्रममा सहभागि भएर मातृभुमीका लागि एक हुन आव्हान गरिएको छ । सोमबार १३ तारिख ११ बजे राष्ट्रसंघको मुख्यालय अगाडिको राल्फ पार्कमा जम्मा हुने र सोही स्थानमा ब्यानर तथा प्ले कार्ड सहित बिरोध कार्यक्रम गरिने जनाइएको छ ।

साथै संयुक्त राष्ट्रसंघका महासचिव या उच्चपदस्थ अधिकारीलाई नेपाल भारत सिमा बारेमा लेखिएको ज्ञापन पत्र बुझाउने कार्यक्रम समेत तय गर्न लागिएको जनाइएको छ । साथै कवि, कलाकार, पत्रकार, समाजसेवीहरुले देशको सिमा बारेमा लेखिएको गित कविता समेत प्रस्तुत गर्ने कार्यक्रम रहेको छ ।

न्यूयोर्क/अमेरिका
अमेरिकाको न्यूयोर्कमा सडक दुर्घटनामा परि १० वर्षे बालक श्रृजल पन्थीको निधन भएको छ । मंगलबार बिहान ७ बजे न्युयोर्कको क्विन्सस्थित कोरोनामा बच्चालाई स्कूल पुर्याउन जाँदै गर्दा फोहोर बोक्ने ट्रकले छोरा र आमा मीना पन्थी दुबैलाई ठक्कर दिएको हो ।

कोरोनाको ५७ एभिन्यु र ९७ स्ट्रिटमा जेब्रा क्रसिङबाट बाटो कट्दै गर्दा ट्रकले ठक्कर दिएको जनाइएको छ । घटनापछि घाईतेलाई तत्काल अस्पताल लगिएको थियो । घटनास्थलको नजिकै रहेको एल्महर्ष्ट हस्पिटलमा उपचारका क्रममा बालकको निधन भएको हो । घाइते मीनाको खुट्टामा फ्याक्चर भएकाले आजै शल्यक्रिया गरिने जनाएको छ ।
लाईन्स क्लब नेप्लीज क्विन्सका अध्यक्ष पुरूषोत्तम पन्थीको परिवारमा पर्न गएको यो दुःखद् घटनाप्रति न्यूयोर्कको नेपाली समाज स्तब्ध भएको छ । पन्थि परिवारलाई भेट्न, सहानुभुति प्रदान गर्नका लागि न्युयोर्कका बिभिन्न समुदाय तथा संस्थाका प्रतिनिधि र सर्बसाधारण एल्महर्ष्ट हस्पिटलमा बिहानैदेखि जम्मा भएका थिए ।

न्यूयाेर्क
राष्ट्रपति डोनाल्ड ट्रम्पले अमेरिकी जनताको नजरमा प्रेरक व्यक्तिको सूचीमा पूर्व राष्ट्रपति बाराक ओबामालाई भेट्टाएका छन् । ट्रम्प यसपाली पहिलो पटक ओबामासँगै अमेरिकीको नजरको ‘मोष्ट एड्मायर्ड’ व्यक्तिको सूचीमा पहिलो स्थानमा उक्लिएका हुन् । ओबामा १२ बर्ष देखि यो सूचीको अग्रस्थानमा छन् । यति लामो समय लोकप्रिय व्यक्तिको रुपमा अग्रस्थानमा नम्बरमा रहने उनी पहिलो व्यक्ति हुन् ।

ग्यालप न्यूजले हरेक बर्षको अन्त्यमा अमेरिकीको नजरको प्रेरक व्यक्तिबारे सर्भेक्षण गर्ने गरेको छ । दोस्रो विश्वविद्धको अन्त्यसँगै सन् १९४६ मा यो सर्भे सुरु गरिएको थियो । त्यसयता साधारणतया जो व्यक्ति राष्ट्रपति निर्वाचित भयो उही नै सर्वाधिक प्रेरकको रुपमा मत पाउँदै आएको थियो । ट्रम्प भने आफ्नो कार्यकालको अन्तिम तिर नजिक पुग्दा मात्र यो सूचीको एक नम्बरमा पर्न सफल भएका हुन् ।

यसपाली ओबामा र ट्रम्पले समान १८ प्रतिशत मत पाएका छन् । गत बर्ष ओबामाले १९ प्रतिशत मत पाउँदा ट्रम्पलाई १३ प्रतिशतले मात्र आफ्नो प्रेरक व्यक्तिको रुपमा चयन गरेका थिए । सन् २०१६ मा ट्रम्प राष्ट्रपति निर्वाचित भएपछि गरिएको सर्भेक्षणमा १५ प्रतिशत मत पाएका थिए । उक्त बर्ष ओबामालाई २२ प्रतिशतले चुनेका थिए । सन् २०१२ मा दोस्रो कार्यकालका लागि राष्ट्रपति निर्वाचित भएपछि ओबामाले सर्वाधिक ३० प्रतिशत मत पाएका थिए । ओबामा सन् २००८ बाट अमेरिकीहरुको सर्वाधिक प्रेरक व्यक्ति रहँदै आएका थिए । सन् २००७ मा पनि उनले तात्कालिन राष्ट्रपति जर्ज डब्लु बुस बराबर मत पाएका थिए । केही मतको अन्तरले मात्र बुस अघि रहेको ग्यालपको तथ्यांकले देखाउँछ ।

ग्यालपले हरेक बर्ष डिसेम्बर सुरु देखि १५ सम्म सर्वाधिक प्रेरक व्यक्तिबारे सर्भेक्षण गर्ने गरेको छ । यसमा सहभागिलाई छनौट उत्तर दिइएको हुँदैन । सर्भेक्षणको उत्तरदाताले आफुलाई मन पर्ने जिवित व्यक्तिको नाम आफैँ लिन पाउँछन् । सोही कारण धेरैको मनमा सजिलै आउने हुँदा साधारणतया बहालवाला राष्ट्रपतिले नै सर्वाधिक मत पाउने गरेका हुन् । यसमा बहुमत भने आफ्ना लागि त्यस्तो व्यक्ति कोही नरहेको भन्नेकै हुने गरेको छ । यसपाली पनि २५ प्रतिशत सहभागिले आफ्ना लागि त्यस्तो प्रेरक जिवित व्यक्ति कोही नरहेको जवाफ दिएका थिए । गत बर्ष यो संख्या २६ प्रतिशत थियो । यसपालीको सर्भेक्षणमा एक हजार व्यक्तिबाट नमुना संकलन गरिएको जनाइएको छ । प्रतिशतका हिसावले ओबामा र ट्रम्प समान बिन्दुमा रहेपनि केही मतले ओबामाले उछिनेको ग्यालपले जनाएको छ ।

पछिल्लो समय अमेरिकामा डेमोक्र्याट र रिपब्लिकन धारमा देखिएको चरम विभाजन यसपालीको प्रेरक व्यक्ति छनौटमा पनि प्रतिबिम्बित भएको छ । कुल ४१ प्रतिशत डेमोक्र्याटले ओबामालाई आफ्नो प्रेरक व्यक्ति बताएका थिए । उनलाई १२ प्रतिशत स्वतन्त्रले पनि ‘एड्मायर्ड’ व्यक्तिको रुपमा छनौट गरेका छन् । उनलाई रुचाउने रिपब्लिकन भने तीन प्रतिशत मात्र छन् । ट्रम्पलाई ४५ प्रतिशत रिपब्लिकन, १० प्रतिशत स्वतन्त्र र दुई प्रतिशत डेमोक्र्याटले प्रेरक व्यक्तिको रुपमा लिएका छन् । रिपब्लिकन पार्टीभित्र पटक बढ्दै जाँदा ट्रम्प यो समर्थनको अवस्थामा पुगेका हुन् । केही समय अघिको एक सर्भेक्षणमा बहुमत रिपब्लिकनले ट्रम्पले प्रथम अमेरिकी राष्ट्रपति जर्ज वासिंटनभन्दा पनि उत्कृष्ट राष्ट्रपति बताएका थिए । ट्रम्प सार्वजनिक रुपमा एकपछि अर्को विवाद पार्टी भित्र भने उनको लोकप्रियता झनै चुलिएको हो । ओबामा र ट्रम्प बाहेक कसैले पनि दोहोरो अंकको समर्थन पाउन सकेका छैनन् । उनीहरु पछि दोस्रो नम्बरमा रहेका पूर्व राष्ट्रपति जिम्मी कार्टर, टेस्लाका सिइओ एलन मस्क र माइक्रोसफ्ट संस्थापक विल गेट्सले समान दुई प्रतिशत मत पाएका छन् ।

महिला तर्फ भने पूर्व ‘फष्ट लेडी’ मिचेल ओबामाको अग्रता कायम छ । उनले १० प्रतिशत मत पाएकी छिन् । गत बर्ष १५ प्रतिशत मत पाउँदै उनले हिलारी क्लिन्टनको लगातारको १६ बर्ष देखिको रेकर्ड ब्रेक गरेकी थिइन् । यसपाली दोस्रो स्थानमा रहेकी ट्रम्प पत्नी मलेनिया ट्रम्पले पाँच प्रतिशत मत पाएकी छिन् । मिचेल र मलेनिया पछि टेलिभिजन प्रस्तोता ओप्रा विनफ्रे, क्लिन्टन एवं जलवायु परिवर्तन विरुद्ध संघर्षरत किशोरी ग्रेटा थुनवर्गले समान तीन प्रतिशत समर्थन पाएका छन् ।

क्लिन्टन कुल २२ बर्ष अमेरिकीको सर्वाधिक प्रिय महिलाको रुपमा छनौट भएकी छिन् । पहिलो पटक पति विल क्लिन्टनले राष्ट्रपतिको कार्यभार सम्हालेपछि सन् १९९३ मा उनी ‘मोष्ट एड्मायर्ड वुमन’मा छनौट भएकी थिइन् । सन् १९९४ मा पनि अग्रस्थानमा उनी नै रहिन् । तर, त्यसपछिका दुई बर्ष भने मदर टेरेसाले उनलाई पछि पारिन् । १९९७ मा २००० सम्म क्लिन्टननै सूचीको पहिलो नम्बरमा आइन् । २००१ मा जर्ज डब्लु बुस राष्ट्रपति कार्यभार सम्हालेपछि भने उनकी पत्नी बारबराले क्लिन्टनलाई पछि पारिन् । तर, एक बर्षमै क्लिटन् फेरी सूचीको अग्रस्थानमा फर्किइन् । त्यसपछि सन् २०१७ सम्म लगातार उनीनै सर्वाधिक प्रेरक महिलाको रुपमा रहेकी थिइन् ।

कल्पना घिमिरे
न्यूयोर्क/अमेरिका
अमेरिकामा बसोबास गर्दै आएका नेपाली तथा दक्षिण एसियाली महिलाले बिभिन्न किसिमका हिंसा खेपिरहेको यथार्थ बाहिर आएको छ । गैर आवासीय नेपाली संघ राष्ट्रिय समन्वय परिषद (एनआरएन) न्यूयोर्क च्याप्टरले गत शनिबार आयोजना गरेको महिला सम्मेलनमा महिला र मानव अधिकारका क्षेत्रमा कार्यरत अधिकारकर्मीले अमेरिकामा रहेर पनि नेपाली महिलाहरु हिंसाको शिकार हुनुपरेको बताएका हुन् । कार्यक्रममा अमेरिकाको राष्ट्रिय जनगणना, इमिग्रेसन अफडेट, स्वास्थ्य, शिक्षा, लैङ्कि समानता, सामाजिक न्याय, क्षमता अबिबृद्धि तालिम लगायत विषयमा छलफल गरिएको थियो ।
श्रीमान तथा श्रीमती बिचमा कुरा नमिलेमा बिभिन्न हिंसाको शिकार बनाएर उल्टै जेल हाल्ने, नेपालमा श्रीमती छोराछोरी छोडेर यता आएका श्रीमानले अर्कै बिबाह गर्ने र परिवारको बिचल्ली बनाउने, महिला मात्र होइन पछिल्लो समय श्रीमती बिदेशिएका पुरुषहरु पनि पीडित भएको, कतिपयले परिवारलाई यहाँ ल्याएर छाडिदिएको, कुटपीट, घर निकाला, मानसिक तनाव जस्ता समस्या भोगिरहेको बताइएको छ ।
न्यूयोर्कको क्विन्समा कार्यरत संस्था अधिकारकी कार्यक्रम निर्देशक नर्बदा क्षेत्री भन्छिन्, ‘श्रीमती छोराछोरी छोडेर यता आएपछि श्रीमान बेपत्ता हुन्छन्, कतिले त मलाई नेपालदेखि इमेल पठाएर मेरो श्रीमान खोजिदिनुस भन्छन्’ कार्यक्रममा बोल्दै उनी भन्छिन्, यस्ता खालका समस्याले परिवार मात्र होइन बालबालिकाको भविश्यमा समेत असर पर्दै गएको छ ।’
साना तिना विषयलाई ठूलो बनाएर डिभोर्स गर्ने चलन नै बनिसकेको छ । नेपालमा छउन्जेल मायाप्रेम राम्रै भएकाहरु पनि यता आएसकेपछि श्रीमती मोटी भइ, नराम्री भइ केही जान्दिन भन्ने जस्ता साना तिना कुरालाई इस्यु बनाएर परिवार बिखण्डन गरिरहेका छन् । यस्ता विषयमा बहस गर्न पनि गाह्रो छ ।

कतिपय अवस्थामा महिलाले नै पुरुषलाई ठगिरहेको, हिंसाको शिकार बनाएको मुद्धाहरु पनि हेरिरहेको क्षेत्री बताउँछिन् ‘श्रीमान श्रीमती बिच कुरा नमिले छुट्टिएर बसे हुन्छ तर, बच्चाहरु माथि कसैले अन्याय नगरोस् ।’ अहिले न्यूयोर्कमा पैसाको कारोबारमा ठगिएका, काम अनुसारको पारिश्रमिक नपाएको, ढिकुटी लगायतको समस्या पनि बढ्दै गएको छ । सबै मिलेर ढिकुटी खेल्छन्, पैसा लिएर एउटा भागिदिन्छ । अन्य मान्छेसंग कानुनी हिसाबले लड्न सजिलो छ । सबैले चिनेको भएर नेपालीसंगै लड्न चै निकै गाह्रो हुन्छ । काम गरे अनुसारको तलब नपाएको एउटा मुद्धामा ३ सय अमेरिकी डलर दिने ठाउँमा एक नेपालीले अर्को नेपालीलाई २० हजार डलर तिर्नुप¥यो । गत वर्ष मात्रै हामीले ६९ मुद्धा हेरेर ४ सय थाउजेन्ड अमेरिकी डलर उठाइदिएका थियौं ।
एनआरएन न्यूयोर्क च्याप्टरका अध्यक्ष रामहरी अधिकारी भन्छन्, ‘महिलाले नै महिलाका समस्या बुझ्ने भएकाले हामीले एनआरएन लगायत न्यूयोर्ककमा सञ्चालित संघ संस्थाहरुमा महिला सहभागिता बढाउनु पर्ने विषय उठाइरहेका छौं । आगामी हुने एनआरएनको निर्वाचनमा उपाध्यक्ष पदमा महिला कोटा सुरक्षित राख्न पहल गरिरहेका छौं ।’
जर्सी सिटी मेयरकी सल्लाहकार तथा महिला अधिकारकर्मी विष्णुमाया परियार भन्छिन्, ‘पछिल्लो समय नेपाली समुदायमा डोमेस्टिक भ्वाइलेन्स र सेक्स्युअल एब्युजका घटना बिकराल भइसकको छ । यस्ता खालका मुद्धामा काम गर्दा निकै डर, त्रास र समस्या भोग्नु परिरहेको छ । पीडितलाई न्याय दिलाउन खोज्दा मेरो घर बिगारिस भनेर धम्क्याउनेहरु थुप्रै छन् ।’
श्रीमानले श्रीमती माथि कति सम्म हिंसा गरेको छ भने श्रीमतीलाई बिभिन्न खाले यातना दिएर पागल भनेर मेन्टल हस्पिटल भर्ना गरेर बालबच्चाबाट टाडा पारेको सम्म भेटियो । ती महिलालाई डाक्टरहरुले सोध्दा भाषाको समस्याले आफ्नो कुरो भन्न सकिनन् । हिन्दी बोल्ने दोभाषेले पनि ती महिलालाई आफ्नो कुरा बुझाउन नसकेपछि त्यो डाक्टरको बेबी सिटर नेपाली भएकोले नेपालीमा लेखेर डाक्टरलाई दिएको कागज बेबी सिटरले डाक्टरलाई पढेर सुनाएपछि मात्रै महिलाको समस्याबारे बुझेका थिए । यति सम्म भाषाको समस्या खेप्नुपरिरहेको छ । भाषाको समस्याले गर्दा पनि महिलाले थप हिंसा भोग्नु परेको पाइएको छ ।

न्यूयोर्कमा कार्यरत एटोर्नी एट ल शिब खनाल भन्छन्, लिगल स्टाटसको डरले पनि कतिपय महिलाहरु हिंसा सहेर बस्न वाध्य छन् । ‘पुलिसलाई भन्दा मलाई डिपोर्ट गर्ने हो कि भन्ने डरले सहन नसक्ने अवस्थामा आइपुग्दा पनि भन्न चाहादैनन् । तर, इमिग्रेसनको समस्या संग हिंसाको कुनै सम्बन्ध हुँदैन । जस्तो सुकै इमिग्रेसन स्टाटसमा भएका महिलाले पनि आफुलाई अफ्ठेरो परे पुलिस रिपोर्ट गर्न सक्छन्’ खनाल भन्छन् ।
एनआरएनए न्यूयोर्क च्याप्टरकी महिला संयोजक राज्य कर्माचार्याले महिलाको समस्याको पहिचान गरेर उनीहरुलाई न्याय दिलाउनका लागि बिभिन्न महिला अधिकारमा काम गर्ने संस्थासंग लिङ्क गराउने, भाषा कक्षा लगायत बिभिन्न तालिम दिलाउन पहल गर्ने बताइन् ।

काठमाडौं । सत्तारुढ नेपाल कम्युनिष्ट पार्टी (नेकपा)को स्थायी समिति बैठक राजधानीमा जारी रहेको छ ।

पछिल्लो एक सातायता जारी वैठकमा सबैभन्दा हटकेक अमेरिकी सहयोगको आयोजना मिलेनियम च्यालेञ्ज कर्पोरेशन (एमसीसी) रहेको छ ।

नेकपा भित्र यस सहयोगका सम्बन्धमा मत बाझिएको छ । कांग्रेस सरकारले अगाडी बढाएको यो परियोजना इण्डो प्यासेफिक स्वार्थसँग जोडिएका कारण सहयोग स्वीकार गर्न नहुने पक्षमा नेकपाका नेताहरु रहेका छन् ।

यसले गर्दा पार्टी भित्रै विवाद चुलिएको छ । आइतबारको बैठकमा अध्यक्षद्धय केपी शर्मा ओली र पुष्पकमल दाहाल ‘प्रचण्ड’को राजनीतिक प्रतिवेदन पारित गर्ने कार्यक्रम रहेको छ ।

महासचिव विष्णुप्रसाद पौडेलले प्रस्तुत गरेको विधान संशोधनको प्रस्ताव समेत आजै पारित हुने सम्भावना रहेको छ ।

शनिबारको बैठकपछि मिलेनियम च्यालेञ्ज कर्पोरेशन (एमसीसी) का विषयमा आइतबार निर्णय गर्ने गरी बैठक टुंगिएको थियो ।

यस विषयमा थप परामर्श आवश्यक रहेको भन्दै शनिबार कुनै निर्णय लिइएको थिएन् ।

अमेरिकाले एशिया प्रशान्त क्षेत्रमा भौतिक पूर्वाधार विकासका कार्यक्रमम ासहयोग गर्न यो कार्यक्रम अगाडी बढाएको छ ।

यस अन्तर्गत नेपालमा प्रसारण लाइन र सडक आयोजना सुधारमा करीब ६४ अर्ब उपलब्ध गराउने सम्झौता नेपाल सरकारसँग भइसकेको छ ।

श्रीलकांले हालै उक्त परियोजना अस्वीकृत गरेपछि नेपालमा यस आयोजनाको विरोध गर्नेहरुका लागि अझ तर्क पुगेको छ ।

न्यूयोर्क

अमेरिकी संसदको तल्लो सदनबाट राष्ट्रपति डोनाल्ड ट्रम्प बिरुद्धको महाभियोग पारित भएको छ । सदनमा बुधबार साँझ भएको मतदानमा महाभियोग पारित भएको हो ।

हाउस डेमोक्र्याटहरुले ट्रम्प विरुद्ध दुई बुँदे महाभियोग अघि बढाएको थिए । पहिलो बुँदाको रुपमा रहेको अधिकारको दुरुपयोग (एब्युज अफ पावर)मा २३० मत परेको थियो । दुई जना डेमोक्र्याट र सबै रिपब्लिकन सभासदले उक्त बुँदाको विपक्षमा मतदान गरेका छन् । महाभियोग पारित हुन हाउसको ११६ भोट आवश्यक थियो ।

महाभियोगको दोस्रो बुँदाको रुपमा रहेको संसदमाथिको अवरोध (अब्सट्रक्सन अफ कंग्रेस)को पक्षमा भने २२९ मत परेको थियो । तीनजना डेमोक्रेटिक सांसदले यो बुँदामा रिपब्लिकनलाई साथ दिए । डेमोक्रेटिक राष्ट्रपतिय प्रत्यासीकी रुपमा रहेकी हवाइकी सभासद तुलसी गाब्बर्डले भने मतदानमा भाग लिइनन् । मुलुकलाई थप दुई धारमा बिभाजित हुनबाट रोक्न उनले उक्त कदम चालेको बयान दिएकी छिन् ।

रिपब्लिकन पार्टी छोडेर स्वतन्त्र सभासदमा परिणत भएका जष्टिन अमासले भने महाभियोगका दुबै बुँदाको पक्षमा मतदान गरे ।

ट्रम्प अमेरिकी तल्लो सदनबाट महाभियोगमा पर्ने तेस्रो अमेरिकी राष्ट्रपति भएका छन् । यस अघि एन्ड्रु ज्याक्सन र विल क्लिन्टन तल्लो सदनबाट महाभियोगमा परेका थिए । उनीहरुको महाभियोगले सिनेट दुई तिहाइ मत नपाएका कारण पदमुक्त हुनबाट भने जोगिएका थिए । रिचर्ड निक्सनले भने फुल हाउसमा भोट हुन अगावै राजिनामा दिएर बाटो खोली दिएका थिए ।

ट्रम्प माथिको महाभियोगबारे अब संसदनमा  ‘ट्रायल’ चल्नेछ । ६७ जना सिनेटरले महाभियोगको पक्षमा मतदान गरे ट्रम्प महाभियोग लागेर पदच्युत हुने पहिलो राष्ट्रपति हुनेछन् । तर, हाउसमा अनुसन्धान हुँदा रिपब्लिकनहरुले एक मुखले उनको बचाउ गरेको कारण आफ्नै दलकै बहुमत रहेको सिनेटबाट उनी विरुद्धको महाभियोग पारित हुने सम्भावना भने न्यून छ । डेमोक्र्याटहरुमा राष्ट्रपति प्रति घृणा भाव रहेको कारण महाभियोग लगाएको रिपब्लिकनहरुले दावी गर्दै आएका छन् । तर विगतमा विपक्षी राष्ट्रपतिलाई जति नपराए पनि सितिमिती महाभियोग लगाउन विपक्ष तयार नहुने विश्लेषकहरुको मत छ ।

ट्रम्पले अमेरिकी संसदले युक्रेनका लागि पारित गरेको झण्डै ४०० मिलियन डलरको सैन्य सहायता रोकेर आफ्ना प्रतिद्वन्दी जो बाइडेन माथि अनुसन्धानको माग गरेको तथ्य बाहिरिएसँगै झन्डै तीन महिना अघि डेमोक्र्याटहरुले महाभियोग प्रकृया अघि बढाएका थिए ।