Category: डायस्पोरा

काठमाडौं । कतारका विभिन्न जेलमा रहेका १७ जना नेपालीलाई आममाफी मिलेको छ ।

कोरोना भाइरसको सन्त्रासकाबीच कैदीहरुको स्वास्थ्य र मानवीय अवस्थालाई ध्यानमा राखी कतारका राजाबाट कैदीहरुलाई आममाफी दिने निर्णय भएको नेपाली दूतावासले जनाएको छ ।

राजाको यस निर्णयबाट १७ जना नेपाली लाभान्वित भएका हुन् । दूतावासका अनुसार कतारको बन्दी गृहमा रहेका १७ जना नेपाली नागरिक रिहा हुने पक्का भएको छ ।

कतारको जेलमा १३ जना लागू औषध कारोबार, २ जना चोरी, १ जना मादक पदार्थ कारोबार र अर्का १ जना ठगीको कसुरमा सजाय भुक्तान गरिरहेका व्यक्ति छुट्न लागेका हुन् ।

कतारमा कोरोनाबाट संक्रमितहरुको संख्या ७ हजार ७ सय ६४ पुगेको छ । बिहीबार एकै दिन ६ सय २३ जनामा कोरोना भाइरस संक्रमण देखिएको छ ।

यहा १० जनाले ज्यान गुमाइसकेका छन् । कतारमा लाखौं नेपाली कामदार रहेका छन ।

काठमाडौं । विश्वभर फैलिएको कोरोना भाइरसले २८ जना गैरआवासीय नेपालीको मृत्यु भएको छ । गैरआवासीय नेपाली संघले उपलब्ध गराएको तथ्यांक अनुसार शनिबार साँझसम्म उक्त संख्यामा एनआरएनको मृत्यु भएको हो ।

एनआरएनका अध्यक्ष कुमार पन्तको अध्यक्षतामा गठित कोभिड –१९ उच्चस्तरीय समिति, स्वास्थ्य उपसमितिले संकलन गरेको तथ्यांकअनुसार बेलायतमा १७, अमेरिकामा ८, संयुक्त अरब इमिरेट्समा दुई र आयरल्याण्डमा एक जनाको ज्यान गएको छ ।

स्वास्थ्य उपसमितिका संयोजक डा सञ्जीव सापकोटाका अनुसार, नेपालबाहेक विश्वभर एक हजार १६६ गैरआवासीय नेपाली अहिले कोरोनाबाट संक्रमित छन् ।

विश्वभर छरिएका गैरआवासीय नेपाली विज्ञ चिकित्सकको समूहले तयार पारेको आकडानुसार २१ देशमा रहेका नेपाली कोभिड –१९ बाट संक्रमित छन् ।

नेपालमा १९ हजार ५५४ जनामा परीक्षण गरिएकामा ३१ जनामा कोरोना संक्रमण देखिएको छ । तीन जना कोरोनामुक्त भई घर फर्किसकेका छन् ।

संक्रमित हुने विदेशमा बसेका नेपालीमा अमेरिकामा करिब सात सय, बेलायतमा दुई सय, संयुक्त युएईमा ७१, आयरल्याण्ड र पोर्तुगलमा २२–२२, कुवेतमा २१, अष्ट्रेलियामा ११, स्पेनमा १०, स्विट्जरल्याण्डमा पाँच, जर्मनी, बेल्जियम र साउदी अरबमा चारचार, क्यानडा र मलेसियामा तीनतीन, माल्टामा दुई तथा फ्रान्स, जापान, म्यान्मा र हङकङमा एकएक जना छन् ।

विदेशस्थित विभिन्न अस्पतालमा कार्यरत नेपाली चिकित्सक र कूटनीतिक नियोग, एनआरएनका शाखा तथा स्थानीय संघसंस्थाद्वारा प्राप्त सूचनालाई मुख्य आधारलाई मानेर सो आँकडा तयार पारिएको स्वास्थ्य उपसमितिले जनाएको छ ।

विदेशमा कोरोना भाइरसबाट मृत्यु भएकाहरुको परिवारको सहयोगार्थ एनआरएनले आफ्ना शाखाहरुलाई परिचालन गरेको जनाइएको छ ।

एनआरएनका अध्यक्ष पन्तका अनुसार बिहीबार साँझसम्म दुई दर्जनभन्दा बढी देशमा १० हजारभन्दा बढी कोरोना पीडितका लागि राहत वितरण गरिएको छ ।

यसैबीच एनआरएन कोभिड १९ उच्चस्तरीय समितिको बैठक आज बस्ने भएको छ । संघका महासचिब डा हेमराज शर्माका अनुसार बैठकले कोरोना पीडितका लागि राहत वितरणको नयाँ नीति तय गर्ने छ ।

लण्डन । कोरोना भाइरसको संक्रमणबाट बेलायतमा मात्र १६ जना नेपालीको मृत्यु भएको छ ।

लन्डनस्थित नेपाली दूतावासका अनुसार शुक्रबारसम्म १६ जना नेपालीको मृत्यु भएको पुष्टी भएको छ । कोरोनाका कारण ज्यान गुमाउनेमा धेरैजसो पूर्वगोर्खा सैनिक र दीर्घरोगी रहेका छन् ।

बेलायतमा १५ जना नेपाली भने कोरोनाको संक्रमणलाई जित्दै निको भइसकेका छन् । अहिले विभिन्न अस्पतालमा ७ जनाको उपचार भइरहेको छ ।

कोरोनाको संक्रमणको आशंकामा करीव ४० जना नेपाली भने आइसोलेनमा घरमै रहेको दूतावासले जनाएको छ ।

दूतावासले संकटको बेला सबैलाई सतर्क रहन र अत्यावश्यक काम बाहेक अरु बेला घरैमा बसेर संक्रमण नियन्त्रणमा सघाउन आह्वान गरेको छ ।

काठमाडौं । बहराइनमा थप २७ जना नेपालीमा कोरोना भाइरस (कोभिड–१९) को संक्रमण पुष्टी भएको छ ।

अब यस मुलुकमा कोरोना भाइरसबाट संक्रमित नेपालीको संख्या ४९ पुगेको बहराइनस्थित नेपाली दूतावासले जनाएको छ । दूतावासका अनुसार शुक्रबार २७ जना नेपालीमा संक्रमण पुष्टि भएको हो ।

बहराइनमा अहिलेसम्म ९९० जनामा संक्रमण देखिएको छ । उनीहरु मध्ये ७ जनाको मृत्यु भइसकेको छ । तीन जनाको अवस्था गम्भीर छ । ७ सय ३ जना भने निको भइसकेका छन् ।

दूतावासका अनुसार बहराइनमा ५ जनाभन्दा बढी मानिस भेला हुन रोक लगाएको भन्दै नियमको पालना गर्न दूतावासले नेपाली नागरिकलाई सचेत गराएको छ ।

यसका साथै बहराइनमा गैरकानूनी रुपमा बसेका सबै नागरिकले सन् २०२० भित्रै बैधानिक कागजपत्र देखाएर बैधानिक हुन समेत सक्ने जानकारी दूतावासले जनाएको छ ।

बहराइनमा क्वारेन्टाइनसम्बन्धी नियमको उल्लंघन गरेमा तीन महिनासम्म जेल सजायसमेत हुने भन्दै सचेत रहन दूतावासले आह्वान गरेको हो ।

काठमाडौं । कुवेतमा रहेका सबै विदेशी नागरिकको भिषा अवधि तीन महिना थपिने भएको छ ।

मार्च १ देखि ३१ मेसम्मका लागि कुवेतको आवासीय भिसा स्वतः थप गर्ने निर्णय कुवेत सरकारले गरेको कुवेतस्थित नेपाली दूतावासले जानकारी दिएको छ ।

यो नियम कुवेतमा रहेका तथा आवासीय भिसा सकिएका सबैमा लागु हुने भएको छ । प्रवेश भिसामा कुवेत गएर कुवेतको आवासीय भिसा सकिएकाको हकमा पनि यो नियम लागू हुने भएको छ ।

कुवेतमा ठूलो संख्यामा नेपाली कामदार रहेका छन् । लकडाउनका कारण भिषा सकिएको भए अब त्यसको अवधी तीन महिना थपिदा यो नियमबाट नेपाली पनि लाभान्वित हुने भएका छन् ।

काठमाडौं । सर्वोच्च अदालतले विदेशमा संकटमा रहेका नेपालीलाई उद्दार गरी घर फिर्तिको वातावरण बनाउन सरकारलाई आदेश दिएको छ ।

खासगरी सीमावर्ती क्षेत्रमा हजारौं नेपाली नागरिक घर आउने सरकारको आदेश कुरेर बसेका छन् ।

प्रवासी नेपालीलाई क्वारेन्टाइनमा राख्ने शर्तसहित घर फर्किन दिने व्यवस्था मिलाउन सर्वोच्चले सरकारका नाममा अन्तरिम आदेश दिएको हो ।

अधिवक्ता सोमप्रसाद लुइँटेलले दायर गरेको रिटमा बिहीबार सुनुवाइ गर्दै न्यायाधीश सपना मल्ल प्रधानको एकल इजलासले विदेशमा रहेका नेपालीलाई विना भेदभाव उद्दार गर्न अन्तरिम आदेश गरेको हो ।

सर्वोच्चले केही देशले वैदेशिक रोजगारीमा रहेका नेपालीलाई फिर्ता लैजान दबाब दिइरहेको र कतिपय नेपालीले सरकारसँग गुहार समेत मागिरहेको विषयलाई राज्यले टुलुटुलु हेरेर बस्न नमिल्ने भन्दै सचेत गराएको छ ।

अदालतले कोरोनाको महामारी फैलिएका मुलुकमा वैदेशिक रोजगारीमा रहेका नेपाली नागरिकको त्यहाँको नेपाली राजदूताबास वा श्रम सहचारीमार्फत संक्रमित नेपालीको स्वास्थ्य स्थिति प्रतिवेदन तत्काल तयार गर्न समेत निर्देशन दिएको छ ।

कुवेत । धेरै नेपाली कामदार रहेको कुवेतमा कोरोनाबाट नेपाली नागरिक संक्रमित हुने क्रम बढेको छ । बुधबारको तथ्यांक अनुसार कुवेतमा बसिरहेका १४ जना नेपालीमा कोरानाको संक्रमण भएको छ ।

कुवेतको स्वास्थ्य मन्त्रालयले बुधबार सार्वजनिक गरेको तथ्यांकमा यस्तो देखिएको हो । सङ्क्रमित सबैको स्वास्थ्य अवस्था स्थिर रहेको छ ।

कुवेतले सबै संक्रमितलाई समान व्यवहार गरी उपचार भने गरिरहेको छ । कुवेतले आफ्ना नागरिकसरह नै आप्रबासी कामदारलाई समेत उपचार गरिरहेको नेपाली दूतावासले जनाएको छ ।

सङ्क्रमित नेपालीको स्वास्थ्य बारे कुवेती स्वास्थ्य मन्त्रालयसँग दूतावासले नियमित समन्वय गरिरहेको समेत बताइएको छ ।

कुवेतमा अहिलेसम्म १४ सय ५ जनामा कोरोना सङ्क्रमण भएको छ । २ सय ६ जना भने उपचारपछि निको भइसकेका छन् ।

११ सय ९६ जनाको अस्पतालमा उपचार जारी छ । यस मुलुकमा तीन जनाको कोरोनाका कारण ज्यान गएको तथ्यांक रहेको छ ।

काठमाडौं । कोरोना भाइरसको संक्रमण र त्यसको नियन्त्रणका लागि चालिएको कदम लकडाउन । यसले अन्ततः समाज र व्यक्तिका धेरै पाटोमा असर पार्न थालेको छ ।

मानिसहरुले जोहो गरेर राखेको खाद्यान्न सकिन लागेको छ । धेरै मानिसका योजना र सपना चकनाचुर पारिदिएको छ । यो त सामान्य समस्या भयो ।

अहिले कतिपयलाई आफन्त गुमाउनुको पिडामा मृत शरीर समेत देख्न नपाउने अवस्था लकडाउनका कारण सिर्जना भएको छ ।

सरकारी तथ्यांक अनुसार गैरआवासीय नेपालीबाहेक विदेशमा कामको सिलसिलामा गएर मृत्यु भएका ६५ जना नेपालीको शव नेपाल आउन नपाएर अलपत्र परेका छन् ।

त्यो शवलाई न परिवारले उतै अन्तिम संस्कारको अनुमति दिन सक्छन् । किनकी आफन्तको एक झलक हेर्ने मन सबैलाई हुन्छ ।

न त लकडाउनले बन्द भएको जिन्दगीले यात्रा नै सहज बनाएको छ । विश्वव्यापी कोरोना महामारीका कारण नेपाल पनि यसबाट अछुतो छैन ।

अन्तर्राष्ट्रिय हवाई उडानमा प्रतिबन्ध । यस्तो बेला नेपाल फर्कन रोइकराइ गरिरहेका श्रमिक त जसो तसो बाच्लान, प्राय त्याग गरिसकेका नेपालीको समेत मृत शरीर नेपाल आउन नपाएर रोकिएको हो ।

नेपाल सरकार पनि लकडाउनमा मृत शरीर नेपाल ल्याउनु भन्दा जहा छन् त्यही अन्तेष्टी गर्न परिवारहरुलाई आग्रह गरिरहेको छ ।

नेपालमा दैनिक औसतः दुई जना नेपालीका मृत शरीर भित्रने गरेको छ । अर्थातः हरेक साल ६ सय देखि ८ सयसम्म नेपाली नागरिकले विदेशमा ज्यान गुमाउने गरेका छन् ।

वैदेशिक रोजगार बोर्डको तथ्यांक अनुसार अहिले साउदी अरबमा २५ जना नेपालीका शव नेपाल ल्याउन सकिएको छैन ।

मलेसियामा १२ देखि १५ जना, यूएईमा ११ जना कतारमा ८ जना र कुवेतमा ६ जना नेपालीको शव रहेको छ । सेसेल्स र दक्षिण कोरियामा पनि एक–एक जना नेपालीको शव रहेको छ ।

लण्डन । कोरोना भाइरसले विश्वभर करीव एक दर्जन नेपालीको ज्यान गइसकेको छ । यसमा एक नेपाली बेलायतमा थप भएका छन् ।

बेलायतमा शनिबार पूर्वगोरखा सैनिकको मृत्यु भएको हो । स्जाङजा वालिङ घर भई अहिले बेलायतको स्वीन्डन सहरमा बस्दै आएका ८६ वर्षीय यामबहादुर मल्लको उपचारका क्रममा निधन भएको पुष्टी भएको छ ।

उनी ग्रेट वेष्टर्न अस्पताल उपचार्थ भर्ना भएका थिए । मृतक मल्ल सन् २००४ देखि बेलायतमा थिए । उनी छोराबुहारीसगँ बस्दै आएको बताइएको छ ।

चार दिनअघि रुघाखोकी र पखालाबाट ग्रस्त भई अस्पतालमा भर्ना भएका उनलाई शनिबार अस्पतालले मृत घोषणा गरेको हो ।

बेलायतमा पछिल्ला दिनमा कोरोनाको संक्रमण तिब्र रुपमा बढिरहेको छ । यूरोपमा स्पेन र इटलीमा केही थामिएको संक्रमण फ्रान्स र बेलायतमा त्रिब रुपमा बढिरहेको छ ।

मेलवर्न । अष्ट्रेलियामा कोरोना भाइरस ९कोभिड—१९० बाट संक्रमित नेपाली निको भएका छन् । अष्ट्रेलियामा कूल ८ जना नेपालीमा कोरोनाको संक्रमण देखिएको थियो ।

दुई साता अगाडि सिड्नीका ४ र मेलबर्नका ३ नेपालीमा कोरोना देखिएको थियो । त्यसअगाडी तासमेनियामा एक जना नेपालीमा संक्रमण देखिएको थियो । कोरोना संक्रमणमा पर्ने ८ मध्ये ६ जना विद्यार्थी हुन् ।

संक्रमणपछि उनीहरुलाई आइसोलेसन राखेर उपचार गरिएको थियो । अष्ट्रेलियास्थित नेपाली दूतावासका अनुसार उनीहरु सबै ८ जना निको भएर सामान्य जीवनमा फर्किसकेका छन् ।

सबै निको भएका कारण अहिले अष्ट्रेलियामा कोरोना संक्रमित नेपाली नरहेको दूतावसले जनाएको छ ।

अष्ट्रेलियामा करीव १ लाख २० हजार नेपाली रहेको अनुमान छ । त्यसमध्ये ७० हजार विद्यार्थी हुन्।

आंशिक काम गरेर कलेज शुल्क तिर्नुपर्ने नेपाली विद्यार्थी कोरोनाका कारण भने समस्यामा परेका छन् । अहिले अष्ट्रेलियामा स्टोर र मेडिकल बाहेकका सबै क्षेत्र बन्द भएका कारण नेपालीको रोजिरोटी गुमेको छ ।

काठमाडौं । तुलनात्मक रुपमा नेपाल भित्र कोरोनाको संक्रमण नियन्त्रण मै छ । संसारभर करीव ८० हजार मानिसको ज्यान जाँदा नेपाल भित्र मात्र ९ जनामा संक्रमण देखिएको छ ।

संक्रमितको अवस्था पनि सामान्य छ । तर, नेपाल बाहिर संक्रमण भएका नेपालीलाई भने यस भाइरसले पनि नराम्रोसँग सताएको छ ।

नेपालको सरकारी समाचार एजेन्सी राष्ट्रिय समाचार समितिका अनुसार विदेशमा अहिलेसम्म ८ जना नेपालीको कोरोना भाइरसकै कारण मृत्यु भइसकेको छ ।

अमेरिकामा पाँच, बेलायतमा दुई र संयुक्त अरब इमिरेट्स (युएई)मा एक नेपालीको ज्यान गएको संस्थाले जनाएको छ ।

विदेशमा १ सय भन्दा बढी नेपाली यस भाइरसको संक्रमणमा परेका छन् ।

नेपालीको प्रमुख श्रम गन्तव्य मुलुक साउदी अरेबियामा हालसम्म चार नेपालीमा कोरोनाको सङ्क्रमण पुष्टि भएको छ । बहराइन, पोर्चुगल, स्पेन, यूएईमा बढी नेपाली प्रभावित भएका छन् ।

काठमाडौं । अस्ट्रेलिया सरकारले ६ महिनालाई समेत खान पुग्ने अवस्था नभए घर फर्कन आप्रवासी विद्यार्थीहरुलाई आग्रह गरिसकेको छ । यस आग्रहपछि अष्ट्रेलियामा रहेको नेपाली विद्यार्थी समेत प्रभावित हुने पक्का छ ।

किनकी यहाँ पुग्ने अधिकांश विद्यार्थी आफै कमाएर आफै पढ्ने हुन् । अष्ट्रेलियाले संकटमा पहिलो प्राथमिकतामा आफ्नो मुलुकका नागरिक रहने भन्दै यस्तो आग्रह गरेको हो ।

यससँगै नेपाल सरकारले नि त्यहाँ रहेका नेपालीका अवस्था बुझ्न शुरु गरेको छ ।

शिक्षा, विज्ञान तथा प्रविधिमन्त्री गिरिराजमणि पोखरेलले त्यहाँ अध्ययनरत नेपाली विद्यार्थीको वास्तविक अवस्था बुझ्न शिक्षा सचिव महेशप्रसाद दाहाललाई निर्देशन दिएका छन्।

उनले अस्ट्रेलियामा रहेका विद्यार्थीका बारेमा परराष्ट्र मन्त्रालय र अस्ट्रेलियामा रहेको नेपाली दूतावाससँग समन्वय गरी विद्यार्थीको यथार्थ जानकारी लिन शिक्षा निर्देशन दिएका हुन् ।

अस्ट्रेलियामा करीव ५८ हजारको संख्यामा नेपाली विद्यार्थीको रहेको अनुमान छ । कोरोना भाइरसको संकट विश्वव्यापी बनेसँगै अहिले हरेक मुलुक समस्यामा परेका छन् । त्यसमा पनि विकसित मुलुकको अवस्था अझै जर्जर बन्दै गएको छ ।

काठमाडौं । प्रधानमन्त्री केपी शर्मा ओलीले कामको सिलसिलामा बहराइन पुगेका नेपालीबारे चासो व्यक्त गरेका छन् । कोरोना भाइरस कोभिड १९ को महामारीका कारण प्रभावित भएका नेपालीका सन्दर्भमा प्रधानमन्त्रीले चासो राखेका हुन् ।

प्रधानमन्त्रीले बहराइनका समकक्षीसँग शनिबार टेलिफोन गरी त्यहाँ रहेका नेपालीहरुको बारेमा चासो व्यक्त गरेको जानकारी गराएका छन् ।

प्रधानमन्त्री ओलीले आधिकारिक ट्वीटर ह्याण्डल मार्फत् यस विषयको जानकारी दिएका छन् ।

बहराइनका समकक्षीबाट त्यहाँ रहेका नेपालीहरुको सुरक्षा र सहयोग गर्ने प्रतिबद्धता प्राप्त भएको प्रधानमन्त्रीको भनाई छ ।

कोभिड १९ का सन्दर्भमा नेपाली श्रमिक बढी रहेका मुलुकका सरकार प्रमुखसँग कुराकानी गर्न थालेको समेत प्रधानमन्त्रीले उल्लेख गरेका छन् ।

यसले निरन्तरता पाउने उनको भनाई छ । बहराइनमा एक पटक ९ जना नेपालीमा कोरोनाको संक्रमण देखिएको छ ।

उनीहरु एकै क्याम्पमा बसेको बताइएको छ । सोहीकारण प्रधानमन्त्रीले आफ्ना नागरिकबारे चासो राखेका हुन् ।