Category: फिचर

एजेन्सी
३१ जेठ, काठमाडौं । यस वर्षको पहिलो टाइफुन, टाइफुन वुटिप नजिकिँदै गर्दा दक्षिण चीनको हाइनान प्रान्तमा दशौँ हजार मानिसहरूलाई सुरक्षित स्थानमा सारिएको छ । बिहीबार बिहानसम्ममा यस प्रान्तले निर्माण स्थलहरू, तल्लो बाढी प्रभावित क्षेत्रहरू र आकस्मिक बाढीको जोखिममा रहेका क्षेत्रहरूबाट कुल १६ हजार पाँच सय ६१ मानिसलाई खाली गराएको थियो । प्रान्तका सबै ३० हजार सात सय २१ माछा मार्ने जहाज या त बन्दरगाहमा फर्केका थिए वा अन्यत्र शरण लिएका थिए । जहाजहरूमा काम गरिरहेका ४० हजारभन्दा बढी मानिसलाई किनारबाट निकालिएको थियो ।

टाइफुन वुटिप बलियो हुँदै जाँदा प्रान्तीय मौसम विज्ञान सेवाले स्थानीय समयानुसार शुक्रबार ११ बजेसम्म तेस्रो स्तरको टाइफुन चेतावनी कायम राखेको छ ।
शुक्रबार १० बजेसम्म आँधीको केन्द्र लेडोङ ली स्वायत्त काउन्टी नजिकैको तटीय पानीमा अवस्थित थियो । यसको केन्द्र नजिकै अधिकतम निरन्तर हावा २८ मिटर प्रतिसेकेन्ड पुगेको थियो । आठ बजेसम्म प्रान्तका धेरै भागमा वर्षा हुने अपेक्षा गरिएको छ ।

दिउँसोको मौसम पूर्वानुमान अनुसार टाइफुन वुटिप पाँचदेखि १० किलोमिटर प्रतिघण्टाको गतिमा उत्तरतर्फ बढ्ने अपेक्षा गरिएको छ । तीव्रतामा थोरै परिवर्तन भएको छ । वुटिपले शुक्रबार लेडोङ काउन्टी र डोङफाङ सहरको बीचको तटमा २५ देखि २८ मिटर प्रतिसेकेन्डको हावालाई समेट्ने गम्भीर उष्णकटिबन्धीय आँधीको रूपमा अवतरण गर्ने सम्भावना रहेको छ ।

एजेन्सी
३१ जेठ, काठमाडौं । भारतको अहमदाबाद शहरको आवासीय क्षेत्रमा बिहीबार दुर्घटनाग्रस्त विमानको शुक्रबार ‘ब्ल्याक बक्स रेकर्डर’ भेटिएको छ । अहमदावादबाट बेलायतको लण्डनतर्फ जाँदै गरेको एयर इन्डियाको बोइङ ७८७–८ ड्रिमलाइनर विमान बिहीबार मध्याह्न करिब १०० मिटर (३३० फिट) को उचाइमा रहँदा दुर्घटनाग्रस्त भएको थियो । विमानमा चालक दलकासदस्यसहित २४२ जना यात्रु सवार थिए ।

एक व्यक्ति चमत्कारिक रुपमा दुर्घटनाग्रस्त विमानमा बाँच्न सफल भएका थिए । “सुरुमा मलाई पनि म मर्न लागेको जस्तो लागेको थियो, तर पछि मैले आँखा खोलेँ र थाहा पाएँ कि म अझै जीवित छु,” बेलायती नागरिक विश्वासकुमार रमेशले अस्पतालको शैयाबाट राष्ट्रिय प्रसारक डीडी न्यूजसँग बताए ।

प्रहरी उपप्रमुख कानन देसाईले अहिलेसम्म २६५ जनाको शव गणना गरिएको र विमान दुर्घटना भएको घटनास्थलमा कम्तीमा २४ जना गैर यात्रीको मृत्यु भएको जानकारी दिए । मृतकहरूको औपचारिक सङ्ख्या मृत शरीरको डिएनए परीक्षणपछि मात्र घोषणा गर्न सकिने प्रशासनले जनाएको छ ।

एजेन्सी
३० जेठ, काठमाडौं । उत्तरपश्चिमी प्रजातान्त्रिक गणतन्त्र कङ्गोको एक तालमा शोक व्यक्त गर्न मानिसहरूलाई लिएर गएको एक यात्रुवाहक डुङ्गा डुब्दा कम्तीमा ४० जनाको मृत्यु हुनुका साथै अन्य केही बेपत्ता भएका अधिकारीहरूले शुक्रबार बताएका छन् । उत्तरी इक्वेटुर प्रान्तको तुम्बा तालमा बुधबार भएको उक्त दुर्घटनामा तीनवटा ठूला डुङ्गाहरू रहेका प्रान्तीय गृहमन्त्री क्रिस्पिन एमपुटु मोलियाले जानकारी दिए ।

“हामीले अहिलेसम्म दर्जनौं जीवित व्यक्तिलाई उद्धार गर्नुका साथै ४० वटा शव फेला पारेका छौँ । अझै पनि कैयौँको सङ्ख्यामा मानिसहरू हराइरहेका छन्,” उहाँले एएफपीसँग भने । यसैबीच, उद्धारमा संलग्न स्थानीय बासिन्दा डियु मर्सी अकुलाले मृत्यु हुनेको सङ्ख्या ५४ पुगेको बताए । उनले भने, “हिजो हामीले ५२ वटा शव फेला पारेका थियौँ, आज बिहान थप दुई जना मृत शरीर शव फेला परेका छन् ।” उक्त डुङ्गाले इकोको–बोङिन्डा गाउँमा अन्त्येष्टिका लागि एक महिलाको शव र २०० भन्दा बढी मलामी बोकेको थियो । प्रत्यक्षदर्शीहरूले अधिकारीहरूलाई डुङ्गाले एक्कासी ठूलो छालको सामना गर्नुपरेको र यसलाई चालकले थेग्न नसक्दा दुर्घटना भएको बताए ।

दुर्घटनाबारे अनुसन्धान सुरु गरिएको उनीहरूले बताए । एमपुटुका अनुसार डुङ्गामा रहेका यात्रुको सूची थिएन, जसले गर्दा डुङ्गामा ओभरलोड थियो कि थिएन भन्न कठिन भएको छ । प्राकृतिक स्रोतसाधनले भरिपूर्ण तर दशकौँदेखिको द्वन्द्वको चपेटामा परेको अफ्रिकी मुलुक प्रजातान्त्रिक गणतन्त्र कङ्गोमा ताल र नदीमा बारम्बार डुङ्गा दुर्घटनाको पीडा व्यहोर्नेगरेको छ । यात्री सूचीको अनुपस्थितिले प्रायः खोजी र उद्धार कार्यलाई जटिल बनाउँदछ र मृत्युको सही सङ्ख्या पुष्टि गर्न असम्भव बनाउँछ।

३० जेठ, काठमाडौं । इजरायली आक्रमण पछि भारतले ईरानमा रहेका आफ्ना नागरिकलाई लक्षित गर्दै एडभाइजरी जारी गरेको छ । तेहरानस्थित भारतीय दूतावासले यस्तो एडभाइजरी जारी गरेको हो । दूतावासले एक्स अकाउन्टमा इरानको वर्तमान स्थितिमा सबै भारतीय नागरिकलाई सतर्क रहन भनिएको छ । नागरिकलाई अनावश्यक गतिविधिमा भाग लिनबाट बच्न र स्थानीय सुरक्षा सल्लाहकारका आदेशहरु मान्न समेत भनिएको छ ।

इजरायलको आक्रमणबाट ईरान रिभोलुशनरी गार्ड प्रमुख हुसेन सलामीको मृत्यु भएको छ । परमाणु ऊर्जा संगठनका पूर्वप्रमुख फिरेदून अब्बासी र इस्लामिक आज़ाद विश्वविद्यालयका अध्यक्ष मोहम्मद मेहदी तेहरानचीको समेत ज्यान गएको पुष्टी भइसकेको छ । इजरायलले ईरानको परमाणु र सैन्य इलाकालाई केन्द्र बनाएर आक्रमण गरेको बताएको छ ।

३० जेठ, काठमाडौं । इजरायलले इरानको परमाणु कार्यक्रमहरूमा हमला गरेको इजरायली डिफेन्स फोर्सले बताएको छ । इरानको राजधानी तेहरानका विभिन्न स्थानमा विस्फोटका आवाज सुनिएका छन्। इजरायली प्रधानमन्त्री बेन्जमिन नेतन्याहुले उक्त हमला अपरेशन राइजिङ लाइअन नाम दिइएको सैन्य कार्वाही को एक भाग भएको भन्दै इरान इजरायलको अस्तित्वको लागि खतरा भएको बताएका छन्।

उनले आवश्यकता रहेसम्म आक्रमण जारी राख्ने बताउँदै इजरायलले हमलाले इरानको परमाणु प्रशोधन कार्यक्रमको मुटुमा नै प्रहार गरेको बताएका छन् । इजरायलले जबाफी हमलाको अपेक्षा गर्दै देशमा संकटकालको घोषणा गरेको छ। इरानको रिभोलुशनरी गार्डस्‌को मुख्यालयमा इजरेली हमला भएको इरानी सरकारी सञ्चार माध्यमले जनाएको छ। स्थानीय मिडियाले पनि त्यहाँ आगो लागेको र धुवाँ आइरहेको जनाएका छन्।

इजरायली हमलामा इरानको रिभोलुशनरी गार्डस्‌का प्रमुख होसेन सलामी मारिएको पनि इरानी सरकारी सञ्चार माध्यमले जनाएको छ। इस्लामिक रिभोलुशनरी गार्डस् इरानको सशस्त्र सेनाको एक भाग हो र त्यो देशको सबैभन्दा शक्तिशाली संगठनहरू मध्येमा पर्दछ। इजरेली हमलामा मारिएका केही वरिष्ठ नेताहरू मध्येमा उनी पनि एक छन्। परमाणु उर्जा संगठनका भूतपूर्व प्रमुख फेरेडुन अब्बासी पनि मारिएको बताइएको छ। इजरायली डिफेन्स फोर्सेज् (आईडिएफ)ले आफूले इरानले हमला गर्नुभन्दा अगावै, लक्षित एवं संयोजित आक्रमण गरेको बताएको छ।

इरानी सरकारी सञ्चार माध्यमले इजरायलले तेहरान तथा अन्य सहरहरूका आवासीय क्षेत्रहरूमा हमला गरेको जनाएको छ। इरानको सरकारी टिभीलाई उद्धृत गर्दै रोएटर्सले उक्त हमलामा बालबालिकाहरूको पनि ज्यान गएको जनाएको छ। इरानमा स्थानीय समय बिहान ४ बजे लगत्तै राजधानी तेहरानमा विस्फोटका आवाजहरू सुनिएका थिए। त्यसको केही क्षणमा इजरेली रक्षामन्त्रीले आफूहरूले इरानमा हमला गरेको पुष्टि गर्दै अब निकट भविष्यमा इरानले जवाफी हमला गर्ने अपेक्षाका साथ देशमा सङ्कटकाल लगाएको बताए।

इजरायलमा मानिसहरू – जेरुसलेमस्थित बीबीसी संवाददातासमेत – लाई बिहानै हवाई हमलाको चेतावनी ुएअर रेड साइरनको आवाजले बिउँझायो अनि मानिसहरूको फोनमा आपत्कालीन सन्देशहरू प्रवाह भए। एकजना इजरेली सैन्य अधिकारीले ुइरानको परमाणु कार्यक्रम तथा अन्य सैन्य निसानाहरूुमा कैयन् प्रहार गरिएको बताए। इरानसँग ुकेही दिनभित्रैु परमाणु बम बनाउन सकिने गरी पर्याप्त परमाणु सामग्री रहेको उनले बीबीसीलाई बताए।

उडान अनुगमन गर्ने फ्लाइटरेडार२४ का अनुसार तेहरानको मुख्य अन्तर्राष्ट्रिय विमानस्थलमा सबै उडानहरू स्थगन गरिएका छन् भने इजरेलको तेल अभिभतर्फका उडानहरू अन्यत्रै मोडिएका छन्। अमेरिकाले इजरेली कारबाहीहरूमा आफू सामेल नभएको बताएको छ। सो क्षेत्रमा रहेका अमेरिकी फौजको सुरक्षा आफ्नो उच्च प्राथमिकता भएको उसले बताएको छ।

इरानी सरकारी टेलिभिजनका अनुसार इजरेली हमलाका दौरान आवासीय क्षेत्रमा प्रहार भएको छ अनि बालबालिका पनि मारिएका छन्। तेहरानस्थित रिभोल्युशनरी गार्ड्सको मुख्यालयमा पनि प्रहार भएको उसले जनाएको छ। एकजना इजरेली सुरक्षा सूत्रले वरिष्ठ इरानी परमाणु वैज्ञानिकहरू समेत मारिएको सम्भावना रहेको बताए।

बीबीसीबाट

३० जेठ, काठमाडौं । भारतको गुजरात राज्यको मुख्य शहर अहमदाबादबाट २४२ जना यात्रु लिएर बेलायतको ग्याटविक विमानस्थलतर्फ जाँदै गरेको बोइङ ७८७–८ ड्रिमलाइनर बिहीबार दिउसो उडेको केही समयपछि अहमदाबाद शहरस्थित एक बस्तीमा खसेको थियो । एयर इन्डियाको उडान नम्बर १७१ ले ‘मे डे’ कल जारी गर्दै सङ्कटको सङ्केत गरेको थियो । नागरिक उड्डयन महानिर्देशनालयले विमान स्थानीय समयअनुसार दिउँसो १ः४० बजे दुर्घटनाग्रस्त भएको जनाएको छ ।

एएफपीले तत्काल पुष्टि गर्न नसकेको सामाजिक सञ्जालमा पोस्ट गरिएका केही भिडियोमा एउटा विमानले आफ्नो अगाडीको भाग माथि उठाएर उचाई लिँदै गर्दा एक्कासी उचाइ गुमाएको र त्यो भवनमा ठोक्किनुअघि आगोको गोलामा परिणत भएको देखिएको थियो । विमानमा १६९ भारतीय, ५३ बेलायती, सात पोर्चुगाली र एक क्यानेडियाली नागरिक रहेको एयर इन्डियाले जनाएको छ । विमानमा दुई जना पाइलटसहित १० जना चालक दलका सदस्य पनि थिए ।

करिब ८० लाख मानिसको बसोबास रहेको अहमदाबादको भीडभाड युक्त आवासीय क्षेत्रमा रहेको चिकित्सक र उनीहरूका परिवारको भवनमा विमान ठोक्किएको थियो । अस्पताल र ‘घोडा शिविर’को बीचमा दुर्घटना भएको स्थानमा एएफपीका एक पत्रकारले शवहरू निकाल्दै गरेको र अग्निनियन्त्रकहरूले भग्नावशेष निभाउने प्रयास गरिरहेको देखेका थिए ।

नाम नबताउने शर्तमा एक स्थानीयले भने, “हामीले भवनका मानिसहरूलाई दोस्रो र तेस्रो तल्लाबाट हामफालेर आफूलाई बचाउने प्रयास गरेको हामफालेको देख्यौँ। विमानमा आगो लागेको थियो।” “जब हामी घटनास्थलमा पुग्यौं, त्यहाँ धेरै शवहरू थिए र अग्निनियन्त्रकहरूले आगो निभाइरहेका थिए,” अर्का स्थानीय पुनम पटनीले एएफपीसँग भने ।

कृष्ण नाम गरेका एक चिकित्सकका अनुसार “जहाजको नाक र अगाडिको पाङ्ग्रा क्यान्टिन भवनमा खसेको थियो जहाँ विद्यार्थीहरूले खाजा खाइरहेका थिए। उनले आफूले १५ देखि २० वटा जलेको शव देखेको र आफू र उनका सहकर्मीले करिब १५ जना विद्यार्थीको उद्धार गरेको बताए । शहरका एक प्रहरी आयुक्तले सुरुमा एएफपीलाई त्यहाँ कोही पनि जीवित नभएको बताए पनि गुजरात राज्यका स्वास्थ्य अधिकारीले पछि त्यहाँ एक जनालाई जीवितै उद्धार गरेकोे बताए ।

गुजरात राज्यको स्वास्थ्य विभागका प्रमुख सचिव धनञ्जय द्विवेदीले एएफपीसँग भने, “हो, एक जना बाँचेको पुष्टि भएको छ।” सेनाको सहयोगमा उद्धार टोलीले अहिलेसम्म २०४ जनाको शव फेला पारेको छ, जसमा विमान र दुर्घटना आसपासका क्षेत्रका मानिस पनि हताहत भएका भेटिएका छन् ।
शहरका प्रहरी आयुक्तले एएफपीलाई बताएअनुसार विमान आवासीय क्षेत्रमा दुर्घटनाग्रस्त भएकाले हताहत हुनेको सङ्ख्या थप बढ्ने अपेक्षा गरिएको छ ।

भारतको उड्डयन मन्त्रालयले सबै उड्डयन र आपतकालीन प्रतिक्रिया एजेन्सीहरूलाई ‘छिटो र समन्वयात्मक कार्य गर्न’ तैनाथ गरेको छ। अर्को सूचना जारी नभएसम्मका लागि सबै उडान स्थगित गरिएको छ । एयरलाइन्सका अध्यक्ष नटराजन चन्द्रशेखरनले आपतकालीन केन्द्र सक्रिय गरिएको र जानकारी लिन चाहने परिवारका लागि सहयोगी टोली गठन गरिएको जानकारी दिए ।

अमेरिकी विमान निर्माता कम्पनी बोइङले घटनाबारे थप जानकारी सङ्कलनका लागि काम गरिरहेको र एयर इन्डियालाई सहयोग गर्न तयार रहेको बताएको छन् । बेलायत र अमेरिकाले आफ्ना भारतीय समकक्षीलाई सहयोग गर्न हवाई दुर्घटना अनुसन्धान टोली पठाउने बताएका छन् । ७८७ ड्रिमलाइनर दुर्घटनाग्रस्त भएको यो पहिलो पटक भएको घटनासँग सम्बन्धित एक स्रोतले जनाएको छ ।

एक ईन्धन–कुशल, वाइड–बडी, हल्का विमान बोइङ ७८७ ड्रिमलाइनरले ३३० व्यक्तिहरूलाई ओसारपसार गर्न सक्छ र यो लामो दूरीका विमानहरूको लागि अमेरिकी कम्पनीको एक गौरवपूर्ण उत्पादन हो । विमान दुर्घटनापूति दुःख व्यक्त गर्दै एयर इन्डियाको लगानीकर्ता टाटा समूहले प्रत्येक मृतकका परिवारलाई एक करोड भारु (एक लाख १७ हजार अमेरिकी डलर) आर्थिक सहयोग गर्ने घोषणा गरेको छ ।

एजेन्सी
२९ जेठ, अहमदावादमा भएको विमा दुर्घटनामा परी घाइते बनेका एक व्यक्तिलाई उद्धार गरी उपचारका लागि पठाइएको प्रहरीले जनाएको छ । अहमदाबादका प्रहरी आयुक्त जीएस मलिकले एयर इन्डियाको विमान उडेको केही बेरमै नजिकैको चिकित्सकहरूको होस्टलमा ठोक्किएर दुर्घटना भएको र उक्त घटनामा एक जना जीवित फेला परेको पुष्टि गरेका छन् । बिहीबार दिउँसो लण्डनका लागि उडेको बोइङ ७८७–८ ड्रिमलाइनर विमान सरदार वल्लभभाई पटेल अन्तर्राष्ट्रिय विमानस्थलबाट उडेको केही बेरमै १ः३० बजे दुर्घटनाग्रस्त भएको थियो ।

एएनआईसँग फोनमा कुरा गर्दै मलिकले भने, “प्रहरीले सिट ११ ए मा एक जना जीवित व्यक्ति फेला पारेको छ। उहाँको अस्पतालमा उपचार भइरहेको छ ।”
उनले भने, “मृत्यु हुनेको सङ्ख्याबारे केही भन्न सकिने अवस्था छैन । आवासीय क्षेत्रमा विमान दुर्घटना भएकाले मृत्यु हुनेको सङ्ख्या बढ्न सक्छ।” दुर्घटनापछि केन्द्रीय ‘रिजर्भ पुलिस फोर्स ९सिआरपिएफ०’ ले उद्धार र राहत कार्यमा सहयोग गर्न करिब १५० सुरक्षाकर्मी परिचालन गरेको छ ।

सीआरपीएफले जारी गरेको विज्ञप्तिमा भनिएको छ, “¥यापिड एक्सन फोर्स (आरएएफ) को १०० बटालियनका जवानका साथै गान्धीनगरस्थित सीआरपीएफको ‘ग्रुप सेन्टर’का जवानलाई दुर्घटनास्थलमा पठाइएको छ । गुजरात सरकारले पनि गान्धीनगरका ९० जना कर्मचारी सम्मिलित तीन वटा राष्ट्रिय विपद् प्रतिकार्य बल ९एनडीआरएफ० टोलीलाई उद्धार कार्यमा सहयोग गर्न परिचालन गरेको छ।

२९ जेठ, काठमाडौं । अहमदावादमा भएको विमान दुर्घटनाप्रति भारतीय राष्ट्रपति, प्रधानमन्त्री, विपक्षी दलका नेतालगायत अधिकारीले दुःख व्यक्त गरेका छन् ।
बिहीबार लण्डन जाँदै गरेको भारतीय यात्रुबाहक विमान भारतको अहमदाबाद शहरको एक आवासीय क्षेत्रमा दुर्घटना हुँदा त्यसमा सवार सबै २४२ जनाको मृत्यु भएको विश्वास गरिएको छ । राष्ट्रपति द्रोपदी मुर्मूले राष्ट्रपति मुर्मूले गुजरातको अहमदाबादमा भएको विमान दुर्घटनाप्रति गहिरो दुःख व्यक्त गर्दै यो हृदयविदारक विपत्ति भएको बताइन् । राष्ट्रपति मुर्मूले ट्वीटरमा लेखेकी छिन्, “अहमदाबादमा भएको विमान दुर्घटनाको खबरले म निकै दुःखी छु । यो हृदयविदारक विपत्ति हो ।”

उनले अगाडी भनेकी छिन्, “दुःखको यस घडीमा दुर्घटनाबाट प्रार्थना प्रभावित सबैमा समवेदना । अवर्णनीय दुःखको यस घडीमा राष्ट्र पीडित परिवारजन र उनीहरूका आफन्तको साथमा उभिनेछ ।” भारतका प्रधानमन्त्री नरेन्द्र मोदीले सामाजिक सञ्जाल एक्समा लेख्दै भनेका छन्, “अहमदाबादको यो दुःखद घटनाले हामीलाई स्तब्ध तुल्याउनुका साथै दुःखी पनि बनाएको छ। यो शब्दमा व्यक्त नै गर्न नसकिने गरी हृदयविदारक घटना हो। “यो दुःखको घडी हो र यसबाट प्रभावित सबैमा मेरो सहानुभूति छ। म प्रभावितहरूलाई सघाउन लागि परेका मन्त्री तथा अधिकारीहरूसँग सम्पर्कमा रहेको छु।”

त्यसैगरी, कांग्रेस संसदीय दलकी अध्यक्ष सोनिया गान्धी, काङ्ग्रेस सांसद तथा लोकसभामा प्रतिपक्षका नेता राहुल गान्धीले लण्डनका लागि उडेका एयर इन्डियाको विमान दुर्घटनाप्रति दुःख व्यक्त गरेका छन् । अध्यक्ष गान्धीले भनेकी छिन्, “अहमदाबादमा भएको विमान दुर्घटनाबाट म स्तब्ध र दुःखी छु । यात्रु र चालक दलका सदस्यका परिवारप्रति मेरो समवेदना छ । दृश्यहरू अत्यन्त्यै हृदयविदारक छन्। सिङ्गो देश शोकले आक्रान्त छ र प्रार्थना गरिरहेको छ।”

राहुल गान्धीले काङ्ग्रेस कार्यकर्ताहरूलाई उद्धार र राहत कार्यमा सहयोग गर्न आग्रह गरेका छन् । गान्धीले भनेका छन्, “यो अविश्वसनीय कठिन प्रशासनद्वारा तत्काल उद्धार र राहत प्रयासहरू गर्नु महत्त्वपूर्ण हुनेछ।” दुर्घटनाप्रति शोक व्यक्त गर्दै देशका अन्य दल, तिनीहरूका नेता, कलाकार तथा उद्यमीहरूले पनि सामाजिक सञ्जालमार्फत् शोक व्यक्त गर्दै राहतका लागि कुनै कसुर बाँकी नराख्न सरकारसमक्ष आग्रह गरेका छन् ।

काठमाडौं । २४२ यात्रु बोकेको एयर इन्डियाको जहाज दुर्घटनामा परेको छ । बिहिवार गुजरातको अहमदावादबाट लन्डन उडेको सो जहाज दुर्घटनामा परेको हो । जहाज बस्तीमा खसेका कारण थप क्षति हुने अनुमान छ ।

यतिबेला उद्दारको काम जारी रहेको छ । अहिलेसम्म कसैलाई पनि जिवित उद्दार गरिएको छैन । जहाज टेकअफ गर्नासाथ भुइमा झरेको भिडियो क्लिप्सहरु सार्वजनिक भएका छन् ।