Category: फिचर

काठमाडौं । वायुसेवा सञ्चालक संघ नेपालले हवाई क्षेत्रमा रहेका दीर्घकालीन समस्या समाधानको माग राख्दै बुधबारदेखि नियमित उडान रोक्ने घोषणा गरेको छ ।

संघले मंगलबार पत्रकार सम्मेलनमार्फत ५ बुँदे माग अघि सार्दै उक्त माग सम्बोधन नभएसम्म उडान रोक्ने घोषणा गरेको हो ।

संस्कृति पर्यटन तथा नागरिक उड्डयन मन्त्रालय र नेपाल नागरिक उड्डयन प्राधिकरणबाट भएका एकपक्षीय, स्वेच्छाचारी र अव्यवहारिक निर्णय फिर्ता तथा सुधारको माग गर्दै वायुसेवा सञ्चालकहरुले उद्धार र नियमित उडानहरू बन्द गर्ने निर्णय गरेका हुन्।

विमानस्थल सेवा शुल्क नियमावली २०७८ मा यात्रु सेवा शुल्क ल्यान्डिङ, पार्किङ, नेभिगेसन लगायतका सम्पूर्ण शुल्क वृद्धि फिर्ता लिई पूर्ववत कायम गर्न संघले माग गरेको छ ।

यस्तै त्रिभुवन अन्तर्राष्ट्रिय विमानस्थलमा हेलिकप्टर सञ्चालनका लागि दीर्घकालीन हेलिप्याड, मर्मत सम्भारका लागि ह्याङर लगायतका भौतिक पूर्वाधारहरुका लागि स्थान उपलब्ध गराउनुपर्ने माग संघको छ ।

त्यसैगरी असार ५ गतेको नागरिक उड्डयन प्राधिकरणको बाहिर आएको अपरेटिङ वेससम्बन्धी प्रावधानहरु विमानसेवा कम्पनीहरुको हकमा खारेज गर्नुपर्ने, हालसम्म भइरहेकै व्यवस्थाअनुसार त्रिभुवनलगायत विमानस्थलहरुबाट बिना अवरोध सेना यथावत् सञ्चालन गर्न पाउनुपर्ने माग संघले राखेको छ।

नियामक निकाय र सेवा प्रदायक संस्था नागरिक उड्डयन प्राधिकरण एकै निकायबाट भई रहेको कारण युरोपियन एभियसन सेफ्टी एजेन्सीबाट नेपाललाई हवाई सुरक्षा सूचीमा राखिएबाट देशको सम्पूर्ण पर्यटन क्षेत्र नै तहस नहस भइरहेकाले नेपाललाई युरोपियन हवाई सुरक्षाको सूचीबाट हटाउनका लागि नेपाल सरकार र प्राधिकरणबाट यथाशिघ्र पहल गरिनुपर्ने संघको माग छ।

काठमाडौं । शेयर बजार दोहोरो अंकले बढेको छ । केही दिनदेखि ओरालो लागेको बजारमा मंगलबार दोहोरो अंकको सुधार आएको हो ।

मंलगबार बजार मापक सूचक नेप्से ३७.४९ अंकले बढेर १९२२.३० विन्दुमा पुगेको हो ।

नेपाल स्टक एक्सचेन्जका अनुसार आज २३१ कम्पनीको १ अर्ब २५ करोड ३७ लाख ५७ हजार ७१४ रुपैयाँ बराबरको ३७ लाख ६५ हजार ५१६ कित्ता शेयर किनबेच भएका छन् ।

कारोबारमा आएका १३ वटा समूहको परिसूचकमा हरियाली छाएको छ । विकास बैंक समूह सबैभन्दा धेरै ३.८९ प्रतिशतले बढेको छ । त्यस्तै, म्युचुअल फण्ड र फाइनान्स समूह पनि ३ प्रतिशतले बढेको छ ।

अघिल्लो दिनको तुलनामा कारोबार रकम घटेको छ । सोमवार १ अर्ब ७५ करोड ६ लाख १७१ रुपैयाँ बराबरको कारोबार भएको थियो ।

आज ३ कम्पनीको शेयर मूल्यमा पोजेटिभ सर्किट लागेको छ । आँधिखोला लघुवित्त, सीवाइसी लघुवित्त र सप्तकोशी डेभलपमेन्ट बैंकको सेयर मूल्य करिब १० प्रतिशतले बढेको छ ।

त्यसैगरी, सामुदायिक लघुवित्त ८.९८, रिभर फल्स पावर ८.८८, शिवश्री हाइड्रोपावर ८.३४, हिमाल दोलखा हाइड्रोपावर, राष्ट्रिय बीमा कम्पनीको प्रमोटर सेयर र इिफिन्टी लघुवित्तको शेयर मूल्य ७ प्रतिशतभन्दा धेरैले बढेको छ ।

आज नेपाल टेलिकमको सर्वाधिक कारोबार भएको छ । यसको पौने १२ करोड रुपैयाँ बढीकोे शेयर किनबेच भएको छ । त्यसैगरी, नबिल बैंक ४ करोड र अरुण भ्याली हाइड्रोपावर ३ करोडको कारोबार हुँदै शीर्ष तीनमा रहे ।

काठमाडौं । सरकारले खाना पकाउने ग्यासमा उच्च घाटा बेहोरिरहेको छ । जसका कारण अन्य पेट्रोलियम पदार्थको मूल्य बढाउँदा समेत नेपाल आयल निगमलाई उच्च घाटा छ । उद्योग, वाणिज्य तथा आपूर्ति मन्त्रालयले पुनः एक पटक ग्यासमा दोहोरो मूल्य लागु गर्ने विषय बहसमा ल्याएको छ । मन्त्रालयका सचिव गणेश प्रसाद पाण्डेयले अर्थमन्त्रालयले सरकारले यस्तो जानकारी गराएका हुन् । उनका अनुसार सरकारको नीति पेट्रोलियम पदार्थमा घाटा नबेहोर्ने रहेको छ । सोहीकारण निगमले मूल्य बढाएको हो ।

नेपाल आयल निगमले भारतीय आयल कर्पोरेसनलाई २२ अर्ब रूपैयाँ बुझाउन बाँकी छ । आइओसीले असार २ गते पठाएको मूल्यका आधारमा निगमले आइतबार राति १२ बजेबाट लागू हुने गरी पेट्रोल लिटरमा २१ रूपैयाँ र डिजेल तथा मट्टीतेल लिटरमा २७ रूपैयाँ बढाएको थियो। खाना पकाउने ग्यासमा मूल्य बढेको छैन । ग्यासमा तत्काल मूल्य नबढ्ने तर दोहोरो मूल्य लागु गर्ने तयारीमा सरकार जुटेको उनले जानकारी दिए ।

आयल निगमको ६० प्रतिशत घाटा एलपी ग्यासमा भएको भन्दै नेपाल गुणस्तर तथा नापतौल विभागका महानिर्देशकको संयोजकत्वमा विज्ञ सदस्य सहितको समिति गठन भएको छ। समितिले द्रुत गतिमा अध्ययन गरिरहेको छ । त्यसको प्रतिवेदन आएपछि ग्यासको दोहोरो मूल्य कायम हुनेछ । यसअघि पनि सरकारले पहिला रातो र हरियो सिलिन्डरको लागु गर्ने बताएका थिए । त्यसपछि व्यावसायिक प्रयोजनका लागि लागत मूल्य र घरायसी प्रयोजनमा सहुलियत लागू हुने भएको छ । एलपी ग्यासको भाउ भने एक हजार ८ सय रूपैयाँ छ।

काठमाडौं । हवाइ सेवाप्रदायकहरुले भाडा बढाएका छन्। नेपाल आयल निगमले हवाई इन्धनमा प्रतिलिटर १९ रुपैयाँ बढाएसँगै हवाई भाडा बढाउने निर्णय गरेका हुन्।

संघका अनुसार सबैभन्दा बढी ५५५ रुपैयाँ र न्यूनतम १७० रुपैयाँले भाडा बढेको छ।

काठमाडौं–धनगढी पुग्न अधिकतम १६ हजार ८०५ रुपैयाँ लाग्ने भएको छ । यो रुटमा एकै पटक ८४० रुपैयाँ भाडा बढेको हो ।

काठमाडौं– विराटनगर ४५५, काठमाडौं–जनकपुर २४५, काठमाडौं–भरतपुर २००, काठमाडौं–पोखरा ३००, काठमाडौं–भैरहवा ३९५, काठमाडौं–नेपालगञ्ज ६३०, काठमाडौं–तुम्लिङटार ३५० र काठमाडौं–सिमरा रुटमा १७० रुपैयाँ भाडा बढेको छ ।

नेपाल आयल निगमले हवाई इन्धनको मूल्य प्रतिलिटर १९ रुपैयाँ वृद्धि गरी १८५ रुपैयाँ पुर्‍याएको छ ।

काठमाडौं । सरकारले लामो दूरीका सार्वजनिक गाडीमा बढाएको भाडा दर सार्वजनिक गरेको छ ।

सरकारले विभिन्न आधार बनाएर अन्तर प्रदेश चल्ने देशभरका रुटमा लागू हुने गरी सार्वजनिक यातायातको नयाँ भाडादर सार्वजनिक गरेको हो ।

विभागले दुई वा सोभन्दा बढी प्रदेश भई सञ्चालन हुने (राष्ट्रिय स्तरका सार्वजनिक यातातात रुटमा सञ्चालन हुने) सार्वजनिक यात्रुबाहक सवारी साधनको भाडादर ५.३० प्रतिशतले वृद्धि गरेको छ ।

पहाडी बाटोमा चल्ने मालबाहक सवारीको हकमा ६.९४ प्रतिशत र तराईको बाटोमा चल्ने मालबाहक सवारीमा ७.७ प्रतिशत मूल्य बढेको विभागले जनाएको छ ।

इन्धनको मूल्य थपघटका आधारमा एकै पटक ५ प्रतिशतले बढेमा वा घटेमा भाडा समायोजना गर्ने नीति रहेको समेत विभागले जनाएको छ । विभागका अनुसार बढेको भाडा ४ जेठबाटै लागु हुने भएको छ ।

बढेको भाडा दर दुई वा दुईभन्दा धेरै प्रदेश भएर चल्ने लामो दुरीका गाडीमा लागू हुनेछ । प्रदेशभित्र चल्ने गाडीको भाडा प्रदेश सरकारले नै तोक्ने अधिकार पाएको छ ।

स्थानीय रुटमा सञ्चालन हुने यातायातको भाडा भने यथावत रहने विभागले जनाएको छ ।

काठमाडौं । नेपाली शेयर बजार निरन्तर घट्दो क्रममा रहेको छ । बजेटपछि लगातार नेप्से परिसूचक घट्न थालेपछि लगानीकर्तामा निराशा छाएको छ।

लगानीकर्ता अन्योलमा देखिएका छन् । साना लगानीकर्ता बजारमा त्यति खुल्ल सकेका छैनन्।

बजार निरन्तर घट्न थालेपछि लगानी नै डुब्ने चिन्तामा उनीहरु रहेको देखिन्छ। सरकारले आगामी आर्थिक वर्ष २०७९/८० को बजेट ल्याएपछि बढ्ने आशा गरेको शेयर बजार लगातार ओरालो लागेको लाग्दै आएको छ ।

लगानीकर्ताले बजारप्रति विश्वस्त हुने आधार नभेट्दा बजार ओरालो गतिमा नै देखिएको छ।

अहिले उनीहरू मौद्रिक नीतिको पर्खाइमा देखिन्छन्। मौद्रिक नीतिमार्फत पनि शेयर धितोमा झनै कडाइ गर्ने संकेत देखिएकाले विश्वस्त हुने आधार भने भेटिएको छैन् ।

साताको कारोबारको दोस्रोदिन सोमवार नेप्से ४९.३१ अंकले घटेर १८८४.८१ विन्दुमा आइपुगेको छ ।

यसदिन २३० कम्पनीको १ अर्ब ७५ करोड ६ लाख १७१ रुपैयाँ बराबरको ६१ लाख ८६ हजार ९४१कित्ता शेयर किनबेच भएको छ । अघिल्लो दिनको तुलनामा कारोबार रकम बढेको छ ।

आइतवार १ अर्ब १३ करोड ४० लाख ९१ हजार २१२ रुपैयाँ बराबरको बराबरको कारोबार भएको थियो ।

आज कारोबारमा आएका १३ उपसमूहहरूमध्ये सबैको मूल्य घटेको छ। तीमध्ये पनि सबैभन्दा धेरै हाइड्रोपावरको ४.२८ प्रतिशत र विकास बैंकको ४.१३ प्रतिशतले घटेको छ।

कारोबार रकमको आधारमा आज सबैभन्दा धेरै प्रभु बैंकको संस्थापक शेयरको ११ करोड ८३ लाख २० हजार रुपैयाँको कारोबार भएको छ।

यसपछि एनटिसीको १० करोड ९२ लाख २६ हजार रुपैयाँ, हिमालयन डिस्टिलरीको ५ करोड ७३ लाख ५५ हजार रुपैयाँ, एनआइसी एसिया बैंकको ४ करोड ३५ लाख ७३ हजार रुपैयाँ र नबिल बैंकको ४ करोड ७ लाख ४४ हजार रुपैयाँको कारोबार भएको छ।

दुुइ कम्पनीको शेयरमूल्यमा उच्च वृद्धि भएको छ ।

आज आँधिखोला लघुवित्त वित्तीय संस्थाको शेयरमूल्य १० प्रतिशतले बढेर प्रतिकित्ता ७२१.९० रुपैयाँ पुगेको छ भने सिवाइसी लघुवित्तको शेयरमूल्य ९.९८ प्रतिशतले बढेर प्रतिकित्ता ५००.३० रुपैयाँ पुगेको छ ।

नेप्सेका अनुसार तेह्रथुुम पावर कम्पनीका लगानीकर्ताहरुले सर्वाधिक गुमाएका छन् ।

काठमाडौं । नेपाल आयल निगमले पेट्रोलियम पदार्थमा उच्चदरमा मूल्य बढाएको छ । निगम सञ्चालक समितिको बैठकले डिजेल तथा मट्टीतेलमा प्रतिलिटर २७ रुपैयाँले र पेट्रोलमा प्रतिलिटर २१ रुपैयाँले मूल्य वृद्धि गरेको हो । बढेको मूल्य गत राति १२ बजेदेखि नै लागु भएको छ ।

अब एक लिटर पेट्रोलको मूल्य १९९ रुपैयाँ र एक लिटर डिजेल तथा मट्टीतेलको मूल्य १९२ रुपैयाँ पुगेको छ । निगमले हवाई इन्धनमा आन्तरिक तर्फ १९ रुपैयाँले बढाएर १८५ रुपैयाँ प्रतिलिटर पुर्याएको छ । हवाई इन्धनको बाह्यतर्फ १०० अमेरिकी डलरले मूल्यवृद्धि गरिएको छ । खाना पकाउने ग्याँसको मूल्य भने यसपटक नबढाइएको नेपाल आयल निगमले जनाएको छ ।

काठमाडौं । काठमाडौं महानगरपालिकाले काठमाडौं उपत्यकामा मेट्रो स्थापानाको सम्भाव्यता अध्ययन गर्न सरकारी तथा अन्य निकयहरुसँग सहकार्य गर्ने घोषणा गरेको छ । आइतबार काठमाडौं महानगरपालिकाका मेयर बालेन्द्र साहले आर्थिक वर्ष २०७९÷०८० को नीति तथा कार्यक्रम सार्वजनिक गरेका छन् । जसमा मेट्रो रेल अध्ययन गर्ने र यसका लागि संघीय सरकारसँग पहल र सहकार्य गर्ने योजना छ ।

यसअघि उनी स्वयमःले तत्काल काठमाडौंमा मेट्रो योजना सम्भव नरहेको बताएका थिए । यद्दपी काठमाडौंमा मेट्रोल रेल चलाउन रेल विभाग र लगानी बोर्डबाट भने सम्भाव्यता अध्ययन भइरहेको छ । यस पटक बालेनको परीक्षा समेत यो घोषणामा हुने छ । किनकी बालेन आफै पनि पूर्वाधार इन्जिनियर हुन् ।