Category: फिचर

भरतपुर । चितवनको भरतपुर महानगरपालिकामा माओवादी केन्द्र र एमालेबीच कडा टक्कर देखिएको छ । कांग्रेसका बागी उम्मेदवारका कारण उनीमाथि दवाव भने छ । यस क्षेत्रमा अहिले रेणु दाहालले अग्रता लिएकी छिन् । उनले १०३ मत पाउँदा एमालेका विजय सुवेदीले ६८ मत पाएका छन् । कांग्रेसका बागी उम्मेदवारको पक्षमा १९ मत पर्दा १३ मत बदर भएको छ ।

काठमाडौं । काठमाडौं महानगरपालिकाको मेयरमा बालेनको अग्रता कायम छ । पछिल्लो मत परिणाम अनुसार बालेनले २१३ मतका साथ अग्रता लिइरहेका छन् । उनलाई कांग्रेस र एमालेले पच्छ्याइरहेका छन् । शरुवातमा बालेनसँग प्रतिस्पर्धामा गइरहेकी गठबन्धनकी उम्मेदवार सिर्जना सिंहलाई अहिले एमालेका केशव स्थापितले उछिनेका छन् ।

पछिल्लो मतगणना अनुसार स्थापितले १५९ भोट ल्याएका छन् । सिंहको १४८ मत आएको छ । काठमाडौंमा वडा नम्बर १ र वडा नम्बर ३२ को मतगणना जारी छ । ३२ नं वडा बालेको पकड भएको वडा हो । उनी यसै वडाका बासिन्दा हुन् ।

काठमाडौं । काठमाडौं महानगरपालिकाको मेयरमा स्वतन्त्र उम्मेदवार बालेन शाह र गठबन्धनकी उम्मेदवार सिर्जना सिंहबीच टक्कर हुने देखिएको छ । महानगरको वडा नं १ र ३२ को गणना भइरहेको छ । शूरुवाती ७५ मत गन्दा बालेनले २२ मत पाएका छन् । उनलाई सिर्जनाले १८ मतका साथ पच्छ्याइरहेकी छिन् ।

केशव स्थापितले मात्र १३ मत पाएका छन् । काठमाडौंमा एउटा मतपत्र गन्न २० मिनेट भन्दा लामो समय लागेपछि नतिजा समेत ढिला आउने भएको छ । काठमाडौं धेरै मतदाता भएको महानगर हो ।

काठमाडौं । प्रतिक्षित काठमाडौं महानगरपालिका र विराटनगर महानगरपालिकाको मतगणना करीव एकै समयमा शुरु भएको छ । काठमाडौंको मतगणना राष्ट्रिय सभागृहमा शुरु भएको हो । पहिलो चरणमा वडा नं १ र ३२ का बाकस खोलिएको छ । यहाँ केशव स्थापित, बालेन शाह र सिर्जना सिंहबीच कडा टक्कर हुने देखिएको छ ।

काठमाडौं । ललितपुर महानगरपालिकाको मतगणना ११ बजेबाट शुरु हुने भएको छ । सर्वदलीय बैठकले यस्तो निर्णय गरेको हो । उता, काठमाडौं महानगरपालिकाको मतगणनाको समय भने अझै अन्यौलमा छ । यसअघि बिहान ८ बजेबाट गर्ने भनिएको मतगणना स्वतन्त्र उम्मेदवारहरुको प्रतिनिधि कति जना राख्ने भन्ने विषयमा विवाद हुँदा रोकिएको छ ।

भरतपुरमा समेत अझै गणना शुरु भइसकेको छैन । बुटवल उपमहानगरपालिकामा गठबन्धनबाट कांग्रेसले अग्रता लिएको छ । सुर्खेतको वीरेन्द्रनगर उपमहानगरपालिकामा ११ बजेटबाट मात्र शुरु हुने छ ।

काठमाडौं । देशभर स्थानीय निर्वाचनपछि मतगणना जारी छ । पछिल्लो अपडेट अनुसार नेपाली कांग्रेसले सीटमा अग्रता लिएको छ । एमालेले पच्छ्याइरहेको छ । माओवादी केन्द्र तेस्रो स्थानमा रहेको छ । अन्य दलअरुको भने अझै उपस्थिति देखिएको छैन । एकिकृत समाजवादीले ३ स्थानमा अग्रत लिएको छ ।

यसअघि स्वतन्त्र विजेतासहित एमालेले अहिलेसम्म ३ स्थानीय तहमा विजयी हाँसिल गरि पहिलो स्थानमा छ । समाजवादीले दुई स्थानमा विजयी हाँसिल गरि दोस्रो स्थानमा छ । कांग्रेसले एक स्थानीय तहमा खाता खोलेको छ । अन्य पार्टीले भने अझै स्थानीय तहको प्रमुखमा खाता खोलिसकेका छैनन् ।

काठमाडौं । स्थानीय तह निर्वाचनको मतगणना  विभिन्न स्थानमा जारी छ । कतै भने अझै सुरु भइसकेको छैन ।  देशका कतिपय स्थानीय तहमा मतगणना रातिबाट नै सुरु भएको छ भने कतिपयमा शनिबार बिहानैदेखि सुरु भएको हो ।

शनिबार बिहान ७ बजेसम्मको अपडेट अनुसार देशभर कांग्रेसले अग्रता लिएको छ । कांग्रेसले गणना सुरु भएमध्येका ३९ स्थानीय तहका मेयर/अध्यक्षमा अग्रता लिएको छ ।
दोस्रोमा स्थानमा एमाले रहेको छ । एमालेले २१ स्थानमा अग्रता लिएको छ । तेस्रो स्थानमा माओवादी केन्द्र रहेको छ । उसले १७ स्थानमा अग्रता लिएको छ ।

एकीकृत समाजवादी, जसपा र अन्यले २-२ स्थानीय तहमा अग्रता लिएको देखिएको छ ।

काठमाडौं । ललितपुर महानगरपालिकाको मतगणना भोलि मात्रै सुरु हुने भएको छ । जिल्ला निर्वाचन कार्यालय कार्यालय ललितपुरका अनुसार शनिबार विहान मात्रै ललितपुर महानगरपालिकाको मतगणना सुरु गर्ने गरी मतपेटिका संकलन भइरहेको छ । शनिबार विहान ७ बजे मात्रै ललितपुरमा सर्वदलीय बैठक डाकिएको छ । त्यसपछि मतगणना शुरु हुने छ ।

सर्वदलीय-सर्वपक्षीय बैठकमा सहमति भएमा काठमाडौं महानगरपालिकामा भने मतगणना आजै रातिबाट हुनेछ । तर, सवा १० बजेसम्म बैठक बसेको छैन । सबै मतपेटिका आएपछि सर्वदलीय तथा सर्वपक्षीय बैठक पछि मात्र मतगणना हुने छ ।

काठमाडौं । शुक्रबार सम्पन्न स्थानीय तह निर्वाचनमा १४ जिल्लाका १७ स्थानीय तहका २८ मतदान स्थालका ४४ मतदान केन्द्रमा मतदान स्थगित भएको छ ।
निर्वाचन आयोगका अनुसार राजनीतिक दल तथा उम्मेदवारबीचमा भएको सानातिना विवाद झाँगिदै गई उग्र रुप लिएपछि मतदान स्थगित गरिएको हो ।

स्थगित भएको मतदान केन्द्रमा सम्बन्धित निर्वाचन अधिकृतसँग समन्वय गरेर छिटै मतदानको व्यवस्था गरिने प्रमुख निर्वाचन आयुक्त दिनेशकुमार थपलियाले जानकारी दिएका छन् । त्यहाँ मतदान भएपछि मात्र मतगणना सुरु हुनेछ । हिमाली र दुर्गम जिल्लामा शनिबारदेखि हेलिकप्टरको माध्यमबाट मतपेटिका ओसार्न सुरु गरिनेछ । त्यसपछि मात्र मतगणना थालिने भएको छ ।

काठमाडौं । देशका विभिन्न स्थानमा भएका हिंसात्मक घटनामा सुरक्षा कमजोरी मूख्य कारण रहेको निर्वाचन आयोगले बताएको छ । स्थानीय तह निर्वाचनमा राजनीतिक दलका कार्यकर्ता अराजक भएका कारण यस्तो परिस्थिति आएको आयोगको भनाई छ । देशभरका ७५३ पालिकाका २२ हजार बढी मतदान केन्द्रमा शुक्रबार एकसाथ मतदान भएको थियो । तर राजनीतिक दलका कार्यकर्ताबीच भएको झपडका कारण कम्तीमा २५ मतदान केन्द्रमा मतदान स्थगित भएको छ । २०७४ को स्थानीय तह निर्वाचनमा पनि २०–२५ स्थानमा विवाद भएको थियो । त्यसबेला पुलिङ सेन्टर बाहिर झडपका घटनाहरु भएका थिए ।

यो पटक कतिपय स्थानमा मतपत्र च्यातिएको छ भने कतिपय ठाउँमा मतपेटिका तोडफोड भएको छ । सुरक्षा कमजोरीका कारण राजनीतिक दलका कार्यकर्ता अराजक भएको निर्वाचन आयोगको निष्कर्ष छ । प्रमुख निर्वाचन आयुक्त दिनेश थपलियाले आम रुपमा शान्तिपूर्ण वातावरणमा सम्पन्न भएको बताए । कतिपय ठाउँमा उम्मेदवारहरुको विवाद, सामान्य विषयमा पनि विवाद झाँगिंदै जाँदा मतदान स्थलहरुमा झडप तथा तनाव भएको उनको भनाई छ ।

काठमाडौं । प्रधानमन्त्री शेर बहादुर देउवाले निर्वाचनमा भाग लिइ सम्पन्न गराएको भन्दै मतदातालाई धन्यवाद दिएका छन् । देशभर सम्पन्न स्थानीय तह निर्वाचनमा उत्साहपूर्वक सहभागि भएर निर्वाचनलाई सफलतापूर्वक सम्पन्न गराएकोमा प्रधानमन्त्रीले मतदातामा धन्यवाद व्यक्त गरेका हुन् ।

उनले निर्वाचनलाई सफलता पूर्वक सम्पन्न गर्न अहोरात्र खटिनु भएका निर्वाचन आयोग, राष्ट्र सेवक कर्मचारीहरु, सुरक्षा निकायहरु, राजनीतिक दलहरु, पत्रकारहरु, राष्ट्रिय तथा अन्तराष्ट्रिय पर्यवक्षक लगायत सबैलाई  धन्यवाद भनेका छन् ।

काठमाडौं । प्रधानमन्त्री शेरबहादुर देउवाले मतदान गरेका छन्। कांग्रेस सभापतिसमेत रहेका देउवाले गृहजिल्ला डडेल्धुराको गन्यापधुरा गाउँपालिकाको रूवाखोलास्थित असिग्राम मावि मतदान केन्द्र ‘ख’ बाट मतदान गरेका हुन्। नेपाल कम्युनिस्ट पार्टी (माओवादी केन्द्र) का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले भरतपुर महानगरपालिका–१४ स्थित नेपाल पुलिस स्कुल शान्तिपुरबाट मतदान गरेका छन्। नेकपा एमालेका अध्यक्ष केपी शर्मा ओलीले स्थानीय तह निर्वाचनमा भक्तपुरबाट मतदान गरेका छन् । उनले बालकोटमा रहेको महेन्द्र शान्ति मावि मतदान केन्द्रबाट मतदान गरेका हुन् ।
काठमाडौं महानगरपालिकाका मेयर उम्मेदवार बालेन शाहले ज्योतिष शास्त्र अनुसार साइत हेरेर भोट हालेका छन् । उनले हेरेको साइत अनुसार ११ बजेर ३ मिनेटमा भोट खसाएको बताए ।
भरतपुरको मेयरको उम्मेदवार रेणु दाहालले पनि पुलिस स्कुलबाट मतदान गरेकी छन्। नेपाली कांग्रेसका तर्फबाट काठमाडौं महानगरपालिकाकी मेयर उम्मेदवार सिर्जना सिंहले युवक मावि पक्नाजोलमा रहेको मतदान केन्द्र पुगेर मतदान गरेकी छन् । सिर्जनासँगै पुगेका उनका श्रीमान तथा कांग्रेस नेता प्रकाशमान सिंहले पनि मतदान गरेका छन्। नेपाली कांग्रेसका महामन्त्री विश्वप्रकाश शर्माले झापाको मेचीनगर नगरपालिका–९ को कवि शिरोमणि मतदान केन्द्रमा मतदान गरेका छन्। राष्ट्रिय प्रजातन्त्र पार्टीका अध्यक्ष राजेन्द्र लिङ्देनले मतदान गरेका छन्। झापाको हल्दीबारी गाउँपालिकाको कार्यालय केन्द्रबाबाट उनले मतदान गरेका हुन्।

राप्रपा नेपाल पार्टीका अध्यक्ष कमल थापाले हेटौंडा आएर मतदान गरेका छन्। उनले हेटौंडा उपमहानगरपालिका–६ मा रहेको वंश गोपाल माविमा रहेको मतदान स्थलबाट मतदान गरेका हुन् । नेकपा (माओवादी केन्द्र) का वरिष्ठ नेता नारायणकाजी श्रेष्ठले मतदान गरेका छन्। आज बिहान गोरखाको सिरानचोक गाउॅंपालिकाको जौबारीस्थित परोपकार आदर्श माविमा पुगेर श्रेष्ठले मतदान गरेका हुन्। नेकपा एकीकृत समाजवादीका सम्मानित नेता झलनाथ खनालले स्थानीय तह निर्वाचन सदस्य निर्वाचनमा मतदान गरेका छन्। इलामको सूर्योदय नगरपालिका– ९ स्थित रमफोकस्थित राष्ट्रिय आधारभूत विद्यालय मतदान केन्द्रबाट मतदान गरेका हुन्।

काठमाडौं । स्थानीय तहको निर्वाचनका दौरान देशभर मतदान जारी छ । तर, केही स्थानमा भने तनाव भइरहेको छ । बाराको सिम्रौनगढ नगरपालिका-२ बैरिया मतदान केन्द्रमा दुई समूहबीच झडप भएको छ । झड़पका कारण सो मतदान केन्द्रको मतदान अहिले रोकिएको छ । नेपाली कांग्रेस र लोकतान्त्रिक समाजवादी पार्टी (लोसपा) समर्थकबीच झडप भएको हो । मत हाल्न आएका मतदाताहरुलाई आफ्नो पक्षमा मतहाल्न प्रेरित गरेको विषयमा दुई पक्षबीच झडप भएको हो । रुकुम (पूर्व)को पुथाउत्तरगंगा गाउँपालिका वडा नम्बर २ पेल्मामा अझै मतदान सुरु हुन सकेको छैन । काभ्रेको चौंरीदेउराली गाउँपालिकास्थित एक मतदान केन्द्रमा तनावको स्थिति सिर्जना भएको छ । एक जनाको भोट परिवारभित्रकै अर्को व्यक्तिले हालेपछि विवाद सुरु भएको बताइएको छ । रामेछापको सुनापति र खाडाँदेवी गाउँपालिकाको मतदान केन्द्रमा झडप भएपछि स्थितिलाई नियन्त्रणमा लिन हवाई फायर गरिएको छ । सुनापतिको वडा नं. २ मा मतदान केन्द्र बाहिर एउटा पक्षले अर्को पक्षकालाई कुटपिट गरेपछितनाव सुरु भएको थियो । त्यसक्रममा स्थितिलाई नियन्त्रणमा लिन प्रहरीले हवाई फायर गरेको हो । मेलम्ची नगरपालिकाको ज्यामिरेमा रहेको स्वास्थ्य चौकीको बुथमा ठेलमठेल भएपछि नेपाली सेनाले स्थिति नियन्त्रणमा लिएको थियो । नेपाली सेनाले हतियार तेर्स्याएको तस्वीरमा देखिएको छ । दैलेखको ठाटीकाँध गाउँपालिकाको एक केन्द्रमा मतदानका क्रममा झडप भएको छ । ठाटीकाँध गाउँपालिका(६ को मालिका माध्यामिक विद्यालयको केन्द्रमा दुई पक्षबीच झप भएको हो । इच्छाइएका व्यक्तिको विषयमा विवाद हुँदा एमाले र नेपाल मजदुर किसान पार्टीका कार्यकर्ताबीच झडप भएको हो ।