काठमाडौं । सातामा दुई दिन बिदा दिने सरकारको निर्णय नेपाल राजपत्रमा प्रकाशित भएको छ।
जेठ १ गतेदेखि शनिबार र आइतबार बिदा दिने निर्णय गृहमन्त्रालयले राजपत्रमा प्रकाशित गरेको हो ।
सरकारले शनिबार र आइतबार सार्वजनिक बिदा दिने निर्णय गरेको थियो।
जेठ १ देखि बिहान ९:३० बजेबाट अपरान्ह ५:३० बजेसम्म कार्यालय समय तोकिएको छ।
तर कात्तिक १६ देखि माघ १५ गतेसम्म भने कार्यालय समय बिहान ९स्३० देखि अपरान्ह ४स्३० बजेसम्म रहने उल्लेख छ।
काठमाडौं । साताको कारोबार तेस्रो दिन शेयर बजारमा हरियाली छाएको छ ।
मंगलवार शेयर बजार मापक सूचक (नेप्से) ४४.१६ अंकले बढेर २३१३.४७ विन्दुमा पुगेको हो ।
नेपाल स्टक एक्सचेन्जका अनुसार मंगलवार २२६ कम्पनीको १ अर्ब ३५ करोड ६६ लाख ८७ हजार ४६८ रुपैयाँ बराबरको ३३ लाख ३० हजार १५० कित्ता शेयर किनबेच भएका छन् ।
आज कारोबारमा आएका १३ समूहको परिसूचक हरियो भएको छ । आज बरुण हाइड्रोपावर कम्पनी, न्यादी ग्रुप पावर कम्पनी, जाल्पा सामुदायिक लघुवित्त वित्तीय संस्थाको शेयरमूल्य १० प्रतिशतले बढेको छ ।
युनिभर्सल पावर कम्पनी, दिव्यश्वरी हाइड्रोपावर र नेशनल हाइड्रोपावर कम्पनीको शेयरमूल्य शेयरमूल्यमा उच्च वृद्धि भएको हो । यी कम्पनीको शेयरमूल्य सर्किट लेभलमा बढेका छन् ।
नेप्सेका अनुसार एनआईबीएल समृद्धि फण्डका लगानीकर्ताहरुले सर्वाधिक गुमाएका छन् । यसको शेयरमूल्य करिब ५ प्रतिशतले घटेको छ । त्यस्तै, कारोबारको आधारमा आज सबैभन्दा बढी न्यादी ग्रुप पावर कम्पनीको भएको छ । यस कम्पनीको आज ९ करोड ९८ लाख भन्दा बढीको कारोबार भएको छ ।
काठमाडौं । निर्वाचन आयोगले राज्यको महत्वपूर्ण पदमा बसेर अवकाश पाएका ९ जना व्यक्तिहरुलाई ‘विशेष पर्यवेक्षक’ बनाएको छ । देशभर करिव ५ हजार राष्ट्रिय पर्यवेक्षक स्थानीय तह निर्वाचनको पर्यवेक्षणमा खटिने छन् । त्यसमध्ये ९ जनाले ‘विशेष पर्यवेक्षक’को मान्यता पाएका हुन् ।
निर्वाचन आयोगले पूर्वप्रधानन्यायाधीश कल्याण श्रेष्ठ र सुशीला कार्की, पूर्व प्रमुख निर्वाचन आयुक्त भोजराज पोखरेल र निलकण्ठ उप्रेती, पूर्वगभर्नर हिमालय शमशेर जबरा, पूर्व निर्वाचन आयुक्त इला शर्मा, मानव अधिकार आयोगका पूर्व सदस्य सुशील प्याकुरेल, पूर्वसचिव एवं लोकसेवा आयोगका पूर्व अध्यक्ष तीर्थमान शाक्य र पूर्वसचिव उदय नेपालीलाई विशेष पर्यवेक्षकको मान्यता दिएको जनाएको छ ।
निर्वाचनसम्बन्धी विषयमा विशेष अनुभव भएका पूर्व विशिष्ठ पदाधिकारीले यस्तो मान्यता पाएका हुन् । विशेष पर्यवेक्षकको भूमिका पाएकाहरुमध्ये अधिकांश आमनिर्वाचन पर्यवेक्षक समिति (जियोक) मा आवद्ध छन् । विभिन्न १० वटा संस्थाहरु मिलेर निर्वाचन अनुगमनका लागि जियोक नामक सञ्जाल स्थापना गरेका थिए ।
काठमाडौं । नेपालको उर्जा क्षेत्रमा जापानले सहयोग बढाउने प्रतिवद्धता व्यक्त गरेको छ । ऊर्जा, जलस्रोत तथा सिँचाइमन्त्री पम्फा भुसाल र नेपालका लागि जापानी राजदूत किकुता युताकाबीच भेटवार्ता भएको छ । मन्त्रालयमा भएको भेटवार्ताका क्रममा राजदूत किकुताले मन्त्री भुसाललाई जापानमा अप्रिल २३ र २४ तारिखमा भएको एसिया प्यासिफिक जल सम्मेलनमा भिडियो सन्देशमार्फत सहभागिता जनाएकोमा धन्यवाद ज्ञापन गरे ।
त्यस्तै किकुताले कुलेखानी जलविद्युतजस्ता आयोजनामा जापानको सहयोग रहेको स्मरण गर्दै नेपालको ऊर्जा क्षेत्र विकासका लागि थप सहयोग गर्ने प्रतिबद्धता जनाए । नेपालको दिगो विकास तथा आर्थिक वृद्धि स्तरोन्नतिका लागि जापानले आफ्नो नीतिमा पुनर्विचार गरेको उनले बताए । जापानले नेपालको ऊर्जा, मानव संशाधन विकास र विपत्ती तथा गरिबी न्यूनीकरणमा गर्ने सहयोगलाई निरन्तरता दिने उनले प्रतिबद्धता जनाए ।
पंजाब । भारतको पंजाबस्थित मोहालीमा रहेको प्रहरी गुप्तचर मूख्यालयमा सोमबार राती ग्रिनेड हमला भएको छ । सोमवार राती रकेटजस्तै बस्नुमा राखेर ग्रिनेड मूख्यालयमा झारिएको थियो । ग्रिनेड सानो भएका कारण त्यसको विष्फोटले ठूलो क्षति भने नभएको भारतीय संचारमाध्यमले जनाएका छन् । विष्फोटपछि भवनका सिसा फुटेका छन् ।
पंजाब पुलिसले ठूलो क्षति नभएको र मानवीय क्षति समेत नभएको जनाएको छ । यद्दपी पंजाबमा उच्च सुरक्षा सतर्कता अपनाइएको छ । घटना सोमबार राती पौने ८ बजेको हो । यसअघि मूख्यालयमा हमलाको सूचना समेत आएको बताइएको छ । पंजाबको बढी भिड हुने क्षेत्रमा हमलाको सूचना आएपछि प्रहरीले हाइ एलर्ट भने जारी राखेको थियो ।
पोखरा । कांग्रेसका बागी उम्मेदवार विमलबहादुर कार्कीले आफ्नो उम्मेदवारी फिर्ता लिएसँगै पोखरामा गठबन्धनलाई राहत पुगेको छ । उनले उम्मेदवारी फिर्ता लिएर गठबन्धनबाट मेयर पदमा उठेका नेकपा समाजवादीका धनराज आचार्य र उपमेयर पदमा नेपाली कांग्रेसकी उम्मेदवार कोपिला रानाभाटलाई समर्थन गर्ने बताएका छन् । उनले सोमबार प्रेस विज्ञप्ति निकाल्दै पार्टीले उम्मेदवारी फिर्ता गर्न दिएको निर्देशन मान्दै आफ्नो उम्मेदवारी निष्क्रिय भएको जनाएका हुन् ।
साथीभाइको सल्लाह र अग्रज नेताहरूको आग्रह मानेको उनले बताए । नेपाली कांग्रेस कास्कीले समेत उम्मेदवारी फिर्ता लिएको भन्दै नेता विमलबहादुर कार्कीलाई धन्यवाद दिएको छ । गठबन्धनको साझा उम्मेदवारलाई बागी उम्मेदवारकै कारण भोट काटिने चिन्ता हटेसँगै गठबन्धनलाई सहज भएको हो ।
कोलम्बो (एजेन्सी) । बढ्दो आर्थिक संकटका बीच श्रीलंका राजनीतिक द्धन्द्धमा समेत फसेको छ । सरकार समर्थक र विरोधिबीच भएको हिंसात्मक झडपमा एक सांसद सहित ५ जनाको मृत्यु भएको अन्तर्राष्ट्रिय संचारमाध्मले जनाएका छन् । समाचार संस्था एएफपीका अनुसार घटनामा परी कम्तीमा १५० जना घाइते छन्। सत्तारूढ दलका सांसद अमरकीर्थी अथुकोरालाले एउटा कारलाई रोक्ने क्रममा सोमबार गोली चलाएका थिए । त्यसक्रममा दुई जना गम्भीर घाइते भएका थिए ।
घाइतेमध्ये एक जनाको मृत्यु भएको प्रहरीले जनाएको छ। सांसद्ले ‘त्यसपछि आफ्नो रिभल्भरले आफ्नै ज्यान लिएको समेत समाचारमा उल्लेख छ । त्यसपछि प्रहरी, सरकार समर्थक र विरोधीबीच हिंसा भड्किएको हो । सो क्रममा ३ जनाको ज्यान गएको छ। श्रीलंकाका प्रधानमन्त्री महिन्दा राजपक्षले सरकार विरोधी प्रदर्शन तिब्र भइरहँदा राजीनामा दिएका छन्।
काठमाडौं । ३० वैशाखको निर्वाचनलाई लक्षित गरि आज रातिदेखि सबै अन्तर्राष्ट्रिय सीमा नाका बन्द गरिने भएको छ । सीमा नाका निर्वाचन सम्पन्न भएपछि मात्र खुला हुने छ । स्थानीय तह निर्वाचन सुरक्षाका लागि सरकारले मध्यरातिदेखि मतदान हुने दिनसम्म सीमाबाट हुने आवागमन बन्द गर्ने निर्णय गरेको हो । मतदानको दिनभन्दा अगाडिको ७२ घण्टालाई मौन अवधि मानिन्छ । मौन अवधिमा अन्तर्राष्ट्रिय सीमा नाका बन्द गर्ने र चुनाव प्रचार गर्न बन्देज लगाउने गरिन्छ ।
सीमावर्ती जिल्लाका प्रशासन कार्यालयहरुलाई आज मध्यरातिदेखि सीमा नाका बन्द गर्न भनिसकिएको गृह मन्त्रालयले जनाएको छ । गृहमन्त्रालयको निर्देशन अनुसार जिल्ला प्रशासन कार्यालयले सीमा नाका बन्द भएको सूचना जारी गर्नेछन् । नेपालका ४२ जिल्ला चीन र भारतसँग जोडिएका छन् । भारततर्फका सीमा नाका खुल्ला हुने भएकाले आवागमन रोक्न चुनौती हुने गरेको छ ।अन्तर्राष्ट्रिय हवाई उडानभने सूचारु हुनेछ ।
काठमाडौं । स्थानीय तह निर्वाचनका लागि आज राती १२ बजेबाट मौन अवधि शुरु हुने भएको छ । १२ बजेदेखि मतदानको दिन वैशाख ३० गते १२ बजेसम्म मौन अवधि मानिनेछ । यस अवधिमा निर्वाचनलाई प्रभावित पार्ने कुनै पनि कार्यमा संलग्न नहुन नपाइने निर्वाचन आयोगको भनाई छ । मौन अवधि सुरु भएपछि कुनै पनि दल, उम्मेदवार भएका व्यक्ति, नागरिक समाज, मतदाता तथा सञ्चार माध्यमहरुले समेत चुनाव प्रचार–प्रसार गर्न पाउँदैनन् । निर्वाचन आयोगले एसएमएस, फेसबुक, भाइबरजस्ता विद्युत्तीय माध्यम प्रयोग गरेर मत माग्न र निर्वाचन प्रचार गर्न समेत रोक लगाएको छ ।
सामाजिक सन्जालहरुबाट गरिएका प्रचार सामग्री हटाउन पनि राजनीतिक दलहरुलाई निर्देशन दिइएको छ । निर्वाचन सामग्री हटाए, नहटाएको तथा नयाँ प्रचार सामग्री राखे, नराखेको सम्बन्धमा निगरानी गर्ने जिम्मेवारी प्रहरी र सेनाको साइबर व्यूरोलाई दिइएको छ । आयोगले उम्मेदवार वा राजनीतिक दलको निर्वाचन चिह्न अंकित पहिरन टोपी, स्टिकर, लोगो, झोलाजस्ता सांकेतिक सामग्रीको प्रयोग गर्न वा प्रदर्शन गर्न पनि रोक लगाएको छ ।
निर्वाचन आयोगका अनुसार मौन अवधि सुरु हुनुभन्दा अगाडि मतदान केन्द्रको ३ सय मिटर वरपर राखिएका आ–आफ्ना निर्वाचन चिह्न तथा प्रचारप्रसारका सामग्री हटाउनु पर्नेछ । मौन अवधिमा सञ्चारमाध्यमहरुले पनि उम्मेदवार वा राजनीतिक दलको प्रचारप्रसार हुने गरी कुनै समाचार वा सूचना प्रकाशन प्रसारण गर्न नपाउने आयोगले जनाएको छ ।
कोलम्बो । श्रीलङ्काका प्रधानमन्त्री महिन्दा राजपक्षले व्यापक रूपमा सरकार विरोधी प्रदर्शन भइरहँदा राजीनामा दिएका छन्। राष्ट्रपति तथा आफ्ना भाइ गोटबय राजपक्षलाई पठाइएको पत्रमा ७६ वर्षीय प्रधानमन्त्रीले नयाँ सरकारका लागि बाटो खोल्न आफूले राजीनामा दिएको बताएका छन्। बीबीसीका अनुसार त्यस्तो नयाँ सरकारले गहिरिँदो आर्थिक सङ्कटबाट बाहिरिन देशलाई निर्देश गर्न सक्ने पनि उनले पत्रमा उल्लेख गरेका बताइएको छ। सरकार विरोधी प्रदर्शनकारी तथा राजपक्ष दाजुभाइका समर्थकबिच हिंसात्मक झडपहरू भएपछि कर्फ्यु लगाइए लगत्तै उनले राजीनामा दिएका हुन्।
प्रहरी र अस्पतालका अधिकारीहरूका अनुसार उक्त हिंसात्मक झडपमा सत्तारुढ पार्टीका एक जना सांसदसहित दुई जनाको ज्यान गएको छ भने करिब एक सय ४० जना घाइते भएका छन्। गम्भीर आर्थिक सङ्कटसँग गुज्रिरहेको श्रीलङ्कामा मानिसहरूले औषधिसहित अत्यावश्यक सामग्रीहरू प्राप्त गर्न सङ्घर्ष गरिरहेका छन्। त्यहाँ महँगी अत्यिधक बढेको छ र विद्युत् आपूर्तिमा कटौती भएको छ। दुई करोडभन्दा बढी जनसङ्ख्या भएको यस टापु राष्ट्रले, सन् १९४८ मा ब्रिटेनबाट स्वतन्त्र भएयता सबैभन्दा खराब आर्थिक सङ्कटको सामना गरिरहेको छ।
त्यहाँको सरकारले आपत्कालीन आर्थिक सहयोगको आह्वान गरिरहेको छ।गत अप्रिल महिनाको सुरुवातदेखि सरकारविरुद्ध प्रदर्शन जारी छ र प्रदर्शनकारीहरूले राष्ट्रपति राजपक्षको राजीनामा माग गरिरहेका छन्। त्यहाँ सङ्कटकाल लागू हुनुअघि राजधानी कोलम्बोमा प्रधानमन्त्री र राष्ट्रपतिको कार्यालय बाहिर भइरहेको प्रदर्शन हिंस्रक भएपछि प्रहरी परिचालन गरिएको थियो। सत्तारुढ दलका समर्थकहरूले सुरक्षा घेरा तोडेर सरकार विरोधी प्रदर्शनकारीमाथि प्रहार गरेपछि प्रहरीले अश्रुग्याँस र पानीको फोहोरा प्रहार गरेको थियो।
श्रीलङ्काको विदेशी मुद्रा सञ्चिति सङ्कुचित भएको छ र अब खाद्यान्न, औषधि र इन्धन लगायतका अत्यावश्यक वस्तुहरू किन्न पर्याप्त विदेशी मुद्रा छैन। सरकारले यस्तो परिस्थिति आउनुको कारण कोरोनाभाइरस महामारी भएको बताएको छ, जसका कारण त्यहाँको पर्यटन व्यवसाय ठप्प भयो। पर्यटन श्रीलङ्कामा विदेशी मुद्रा कमाउने ठूला माध्यमहरूमध्ये एक हो। तर धेरै विज्ञहरूले आर्थिक व्यवस्थापनको पाटोमा दोष देखाएका छन्।
पोखरा । नेकपा एमालेका अध्यक्ष केपी शर्मा ओलीले आफूले बोलेका कुरा बुझ्ने थौरै मात्र बुद्धिजीवि नेपालमा रहेको बताएका छन्। पोखरामा सोमबार आयोजित चुनावी सभालाई सम्बोधन गर्दै उनले एमालेका नीति बङ्ग्याएर प्रस्तुत गर्न खोजिएको आरोप लगाए । ‘एमालेका नीतिहरू बङ्ग्याएर प्रस्तुत गर्न खोजियो, मैले बोलेको त बुझ्ने बुद्धिजीवि थोरै मात्र छन् कि क्या हो नेपालमा भन्ने लाग्छ,’ उनले भने।
आफूले शास्त्रका कुरा गर्दा उखान टुक्का भन्ने गरिएको उनको आरोप छ । ‘मैले कहाँ शास्त्रका कुरा गर्छ, उसले उखान टुक्का भन्, कांग्रेसका नेताले भन्नु ठिकै हो बुझ्दैनन् उनीहरू,’ उनले भने ‘तर अरूले पनि कतिपय केही मानिस छन् बुद्धिजीवि उनीहरूले पनि मैले बोलेका कुरालाई उखान टुक्का भन्छन्।’
काठमाडौं । सरकारले स्थानीय तह निर्वाचन हुने दिन वैशाख ३० गते सार्वजनिक विदा दिएको छ । आइतबार बसेको मन्त्रिपरिषद बैठकले वैशाख ३० गते सार्वजनिक विदा दिने निर्णय गरेको गृह मन्त्रालयले जनाएको छ । त्यस दिन नेपाल राज्यभरिका सबै सरकारी कार्यालय र सार्वजनिक निकायमा विदा दिइएको हो । यस दिन सार्वजनिक यातायात चल्ने छैनन् । निजी सवारी साधनले पनि पास लिनु पर्ने गरि नियम बनाइएको छ ।
काठमाडौं । अन्तरा इन्टरनेश्नल प्रालि काठमाडौंका सञ्चालकसहित दुईजना विरुद्ध राजस्व अनुसन्धान विभागले मुद्दा दायर गरेको छ । नक्कली भ्याट बिलमार्फत राजस्व चुहावट गरेको आरोपमा प्रालिका सञ्चालक डोटीका गणेशबहादुर केसी र कम्पनीका लेखापरीक्षक श्यामसुन्दर यादव विरुद्ध १७ करोड ७ लाख ५५ हजार रुपैयाँ विगो मागदावी गर्दै उच्च अदालत पाटनमा मुद्दा दायर गरेको हो । विभागका अनुसार कम्पनीका आरोपितद्वयले राजस्व चुहावट गर्ने मनासायका साथ नक्कली तथा झुटा मूल्य अभिवृद्धि कर विजक जारी गरेको अनुसन्धानमा पाइएको थियो ।
आरोपितहरुले आयकर समेत छलेको विभागले जारी गरेको विज्ञप्तिमा उल्लेख छ । विभागले मूल्य अभिवृद्धि करतर्फ २ करोड ५० लाख ४५ हजार, आयकरतर्फ ६ करोड ३ लाख ३२ हजार गरी कुल विगो ८ करोड ५३ लाख ७७ हजार कायम गरेको छ । यस्तै विगोको शतप्रतिशत जरिवानासमेत गरेर कुल १७ करोड ७ लाख ५५ हजार १०८ रुपैयाँ माग दावी गरिएको विभागले जनाएको छ ।
काठमाडौं । जिम्बाब्वे ए विरुद्धको एक दिवसिय क्रिकेट सिरिज नेपालले जितेको छ । सोमबार सम्पन्न तेस्रो तथा अन्तिम खेलमा नेपालले पाहुना टोली जिम्बाब्वेमाथि ६ विकेटको सानदार जित निकाल्यो । नेपालले ब्याट र बल दुबैमा उत्कृष्ट प्रदर्शन गरेको थियो । खेल वर्षाका कारण केही बेर प्रंभावित भयो । सोहीकारण ३३ ओभरमा छोट्याइएको थियो । टस जितेको नेपालले जिम्बावेलाई ब्याटिङको निम्ता दियो । ३३ ओभर जिम्बाब्ेले २१४ रन जोड्न सक्यो । नेपालका तीव्र गतिका बलर किशोर महतोको ५ विकेट लिए ।
जिम्बावेले दिएको २१४ रनको लक्ष्य नेपालले भने ३०.१ ओभरमा ४ विकेट गुमाएर भेट्टाएको हो । नेपालले पहिलो पटक टेष्ट राष्ट्र अर्थात आईसीसीको पूर्ण सदस्य जिम्बावेको ‘ए’ टिमविरुद्ध एकदिवसीय श्रृंखला खेलेको हो । जसमा नतिजा २–१ ले नेपालको पक्षमा आयो । ब्याटिङतर्फ नेपालका ओपनर ब्याटर कुशल भुर्तेल र मध्यक्रमका ब्याट्सम्यान दीपेन्द्र सिंह ऐरीले शानदार प्रदर्शन गरे । कुशलले सर्वाधिक ८४ रन बनाउँदा दीपेन्द्रले अविजित ६० रन जोडे । नेपाल ठीक एक महिनापछि अमेरिकामा आईसीसी क्रिकेट विश्वकप लिग टू खेल्दैछ ।
काठमाडौं (बीबीसी) । वासिङ्टनले मस्कोमाथि थप प्रतिबन्धको घोषणा गरेकै बेला अमेरिकी राष्ट्रपति जो बाइडनकी पत्नी जील बाइडनले युक्रेनी समकक्षी ओलेना जेलेन्स्कासँग युक्रेनमा भेट गरेकी छन्। यो उनीहरूबीच भएको पहिलो भेटघाट हो र त्यो युक्रेनको सीमावर्ती शहर उज्होरेडको एक विद्यालयमा भएको थियो। गत फेब्रुअरी २४ मा युक्रेनमा रुसी आक्रमण सुरु भएयता जेलेन्स्का सार्वजनिक रूपमा देखा परेको यो पहिलोपटक हो।
युक्रेनमाथि रुसी आक्रमणको पछिल्लो प्रतिक्रियाका रूपमा अमेरिकाले रुस र बेलारुसका २६ सय नागरिकमाथि भिसा प्रतिबन्धसहित नयाँ रोकहरू लगाएको छ। अमेरिकाले तीनवटा रुसी टेलिभिजन स्टेसनमाथि पनि प्रतिबन्ध लगाएको छ। उसले रुसी वित्तिय संस्था ग्याजप्रमब्याङ्कका अधिकारीहरुमाथि पनि रोक लगाएको छ। यसैबीच औद्योगिक राष्ट्रहरूको समूह जी-सेभेनका नेताहरूले रुसी तेललाई चरणबद्ध रूपमा प्रतिबन्ध लगाउन आफूहरू प्रतिबद्ध भएको बताएका छन्।
अमेरिकी र युक्रेनी राष्ट्रपतिका पत्नीबीच हाल विस्थापितहरूका लागि अस्थायी आश्रयस्थलका रूपमा प्रयोग भइरहेको विद्यालयमा भेट भएको हो। त्यहाँ बाइडनपत्नीले आफूले संयुक्त राज्य अमेरिकाका जनता युक्रेनका जनतासँग उभिएको देखाउन चाहेको बताइन्। उनले हाल तेस्रो महिनामा चलिरहेको युद्ध क्रूर रहेको भन्दै त्यसलाई रोक्नुपर्नेमा जोड दिइन्।
जेलेन्स्काले युक्रेन युद्धमा रहेको बेला भ्रमण गर्नु एउटा साहसी कार्य भएको बताइन्। उनले युक्रेन र अमेरिकामा मनाइने ुमदर्स डे का दिन भएको भ्रमण निकै प्रतीकात्मक रहेको समेत बताएकी छन्। दुवै महिलाहरू उक्त विद्यालयमा बसेर हाल त्यहाँ राखिएका दर्जनौँ बालबालिकामध्ये केहीसँग खेलेका थिए।
धनगढी । नेपाली कांग्रेसका सभापति एवं प्रधानमन्त्री शेरबहादुर देउवा र नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ आइतबार धनगढी पुगेर यतै बास बसेका छन् । प्रधानमन्त्री देउवा धनगढी उपमहानगरपालिका ४ स्थित आफ्नै निवासमा बसेका छन् । नेकपा (माओवादी केन्द्र) का अध्यक्ष प्रचण्ड धनगढीको रुबस होटेलमा बसेका छन् । प्रधानमन्त्री देउवा र माओवादी केन्द्रका अध्यक्ष प्रचण्डले सोमबार धनगढीको रङ्गशालामा हुने सत्ता साझेदार दलको चुनावीसभालाई सम्बोधन गर्न धनगढी पुगेका हुन् ।
सोमबार हुने चुनावीसभापछि प्रधानमन्त्री देउवा डडेलधुरा जाने कार्यक्रम रहेको छ । माओवादी केन्द्रका अध्यक्ष दाहाल सोमबार नै कैलालीको हसुलिया, डोटी, र कञ्चनपुरको बेलौरीलगायत क्षेत्रमा हुने चुनावीसभालाई सम्बोधन गर्ने कार्यक्रम छ । स्थानीय तहको निर्वाचनमा गठबन्धनका उम्मेदवारलाई जिताउन नेताहरुको दौडधुप बढेको छ ।
काठमाडौं । अस्थायी रुपमा काठमाडौंमा आइरहेको मेलम्ची खानेपानी आयोजनाको पानी मनसुन शुरु भएपछि भने रोकिने भएको छ । मेलम्ची खानेपानी विकास समितिले वर्षा सुरू हुनुभन्दा पहिले मेलम्चीको पानी ल्याउन रोक्ने भएको छ। दुई साता पहिले अस्थायी संरचनाबाट पानी पुनः काठमाडौं ल्याउन थालिएको भए पनि वर्षाले आयोजनास्थलमा थप क्षति नपुगोस् भन्ने उद्देश्यले पानी नियमित ल्याउन नसकिने समितिको भनाई छ ।
राससका अनुसार अहिले दैनिक १७ करोड लिटर पानी काठमाडौं उपत्यकामा ल्याएर वितरण भइरहेको छ। गतवर्ष असारको पहिलो दिन नै बाढी र पहिरोले आयोजनामा क्षति पुगेकाले यो वर्ष सतर्क हुनुपर्ने अवस्था रहेको आयोजनाका सूचना अधिकारी राजेन्द्रप्रसाद पन्तले बताए। ‘सुरूङभित्रै बाढी नपसोस् भन्ने उद्देश्यले वर्षा सुरू हुनुअगावै बन्द गर्नुपर्ने छ’, उनले भने। काठमाडौं उपत्यकामा पुनः पानी आउन थालेपछि उपत्यकाबासी खुसी भएका छन्।
कतिपय स्थानमा नागरिकले पानी नआएको वा कम आएको गुनासो गरे पनि गत वर्षभन्दा वितरणसम्बन्धी गुनासो कम भएको जनाइएको छ। वर्षाको अवधिभर मेलम्चीको पानी ल्याउन नसकिँदा सुन्दरीजलमा बागमतीको पानी नै प्रशोधन गरेर ल्याउने विषयमा पनि छलफल भइरहेको समितिले जनाएको छ। गत ११ गते खानेपानीमन्त्री उमाकान्त चौधरीले काठमाडौं उपत्यका खानेपानी लिमिटेड, बानेश्वर शाखाको कार्यालयमा चाबी खोलेर पुनःवितरण सुरू गरेका थिए।
पहिलो दिन पाँच करोड लिटर पानी वितरण सुरू भएकामा क्रमशः आठ करोड हुँदै १७ करोड लिटर पानी वितरण गर्न थालिएको हो। गत वर्ष फागुनमा पहिलो पटक पानी पथान्तरण सुरू गरिएको थियो। उपत्यकामा तीन महिना पानी वितरण गरेर सुरूङको परीक्षणका लागि असार १ गतेबाट सुरूङ बन्द भएको थियो। सोही दिनमा आएको बाढीले यहाँका हेडवर्कलगायतका विभिन्न संरचनामा क्षति पुगे पनि मुख्य सुरूङमा धेरै क्षति पुगेको थिएन।
असारमा पटक-पटक बाढी आइरहँदा त्यहाँ रहेको निर्माण कम्पनीको संरचनामा समेत क्षति पुगेको थियो। वर्षा सकिएपछि पनि आयोजनास्थलको पहुँच सडक बगेकाले लामो समयसम्म मर्मत हुन सकेको थिएन। सडक अस्थायी मर्मतपछि आयोजना स्थलमा पुगेर त्यहाँका अवरोध हटाइएको थियो।
काठमाडौं । स्थानीय वायु र भारतको बिहार–पश्चिम बंगालमा बनेको न्यून चापीय प्रणालीको संयुक्त प्रभावका कारण नेपालमा वर्षा लम्बिएको छ । मौसमको यो प्रणाली निर्वाचनको दिनसम्म लम्बिन सक्ने अनुमान मौसम पूर्वानुमान महाशाखाले गरेको छ । सोमबार देशभर मौसममा बदली देखिएको छ। बिहान पहाडी भूभागमा आंशिक बदली हुनुका साथै दिउँसो देशभर बदली रहने महाशाखाको अनुमान छ । महाशाखाका अनुसार प्रदेश १, बागमती र गण्डकीका केही स्थान र बाँकी भूभागका एक–दुई स्थानमा मेघ गर्जन र चट्याङसहित हल्कादेखि मध्यम वर्षाको सम्भावना छ।
राति कर्णाली र सुदूरपश्चिमका पहाडी भूभागका एक–दुई स्थानमा मेघ गर्जन र चट्याङसहित हल्का वर्षाको आँकलन गरिएको छ। मंगलबार सुदूरपश्चिम, कर्णाली, लुम्बिनी र गण्डकीका केही स्थान र बाँकी भूभागका एक–दुई स्थानमा मेघ गर्जन र चट्याङसहित हल्कादेखि मध्यम वर्षाको सम्भावना छ। बुधबार प्रदेश १, बागमती र लुम्बिनीका केही स्थान र बाँकी प्रदेशका एक–दुई स्थानमा हल्कादेखि मध्यम वर्षाको सम्भावना छ।
जलवायुविद्हरुले स्थानीय तहको निर्वाचनका दिन मुलुकभर वर्षा हुने प्रक्षेपण गर्दै आवश्यक पूर्व तयारी गर्न सम्बन्धित सबैलाई सचेत गराएका छन्। बंगालको खाडीमा वैशाख २३ गतेदेखि उत्पन्न न्यून चापीय अवस्था आईतबारको दिन समुन्द्री आँधीको रुपमा विकसित हुँदै गएको र त्यसको असर नेपालमा पनि पर्ने भएकाले आवश्यक पूर्व तयारी गर्न विज्ञहरूले सुझाएका हुन्।
भरतपुर । चितवनको भरतपुरमा आइतबार एक युवकको धारिलो हतियार प्रहार गरी हत्या भएको छ । प्रहरीका अनुसार आइतबार साँझ ७ः३० बजे भरतपुर १२ निवासी अनिल परियारको भरतपुर ७ कृष्णपुरको फुटबल मैदान नजिक हत्या भएको हो ।
जिल्ला प्रहरी कार्यालय चितवनका प्रवक्ता डीएसपी नरहरि अधिकारीले संचारमाध्यमलाई बताए अनुसार उनलाई अज्ञात समूहले आक्रमण गरेको थियो । उनको चितवन मेडिकल कलेजमा उपचारका क्रममा मृत्यु भएको हो । घटनाको थप अनुसन्धान भइरहेको प्रहरीको भनाई छ । मृतक गत वर्ष मात्रै चितवन कारागारमा एक वर्ष कैद सजाय भोगेर रिहा भएका व्यक्ति हुन् ।
काठमाडौं (बीबीसी) । पूर्वी युक्रेनमा एउटा विद्यालयमा शनिवार रुसी बम खस्दा ६० जना भन्दा बढीको ज्यान गएको हुनसक्ने स्थानीय गभर्नरले जनाएका छन्।
लुहान्स्क क्षेत्रका गभर्नरले रुसी फौजहरूले पोपसाना नगरमा सबैकुरा ध्वस्त बनाइदिएको र युक्रेनी फौजहरू फिर्ता भएको बताए। डोनबास क्षेत्र कब्जा गर्ने आफ्नो प्रयास अन्तर्गत त्यहाँ रुसले निरन्तर गोलाबारी गरिरहेको थियो। गभर्नर सेरही हाइडाईका अनुसार रुसी गोलाबारीले नजिकैका अन्य दुई शहरमा विद्युत् आपूर्ति बन्द भएको छ।
उक्त विद्यालय भवनमा ९० जना भन्दा बढीले आश्रय लिइरहेको बताइएको छ। बम हमलापछि उक्त विद्यालयबाट ३० जनालाई उद्धार गरिएको भनिएको छ, जसमा सात जना गम्भीर अवस्थामा छन्। गभर्नर हाइडाइले शनिवार रुसले विद्यालय भवनमा बम खसालिदिएको बताए। बीबीसीले उक्त आरोपको पुष्टि गर्न सकेको छैन। यसबारे रुसले कुनै प्रतिक्रिया जनाएको छैन।
यसअघि रुस र युक्रेनले घेराबन्दीमा रहेको मारिऊपोल सहरस्थित एजोभस्टाल स्टिल उद्योगबाट महिला, बालबालिका र वृद्धवृद्धा सबैलाई अन्यत्र लैजाँदै गरिएको घोषणा गरेका थिए। संयुक्त राष्ट्रसङ्घ र रेडक्रसको समन्वयमा उक्त कार्य एक साताअघि सुरु भएको थियो। तर यी निकायहरूले भने यो पछिल्लो उद्धार गरिँदै गरेकोबारे पुष्टि गरेका छैनन्।
रुसको नियन्त्रणमा नरहेको सहरको अन्तिम भागमा पर्ने स्टिल उद्योगमा भारी बमबारी भइरहेको छ र युक्रेनी फौजहरू कठिन परिस्थिति हुँदाहुँदै पनि लडिरहेका छन्। सर्वसाधारणलाई अन्यत्र लैजाने काम संयुक्त राष्ट्रसंघ र रेडक्रसले गरिरहेका छन् । रुसले हप्तौँदेखि घेराबन्दीमा राखेको उक्त उद्योगमा एजोभ बटालियनबाट प्रतिरक्षकहरूले आत्मसमर्पण गरुन् भन्ने रुसले माग गर्दै आएको छ। उद्धार गरेर अन्यत्र लगिन लागेकाहरू अहिले कहाँ छन् भन्ने स्पष्ट छैन।
तर युक्रेनकी उपप्रधानमन्त्री इरिना भेरेश्चुकले मानवीय कारबाहीको यो हिस्सा अहिलेलाई सकिएको बताएकी छन्। विगतमा युक्रेनको नियन्त्रणमा रहेको भूभागमा उद्धार गरिएकालाई पुर्याउन थुप्रै दिन लागेको थियो। युक्रेनका राष्ट्रपति भोलोदिमिर जेलेन्स्कीले ३०० भन्दा बढी सर्वसाधारणलाई स्टिल उद्योगबाट उद्धार गरिएको बताएका छन्। जबकी रुसी रक्षा मन्त्रालयले भने तीन दिनको अवधिमा ५१ जनाको मात्रै उद्धार गरिएको जनाएको छ। जेलेन्स्कीले मारिऊपोलमा रहेका सेनालाई बाहिर ल्याउनका लागि कूटनीतिक प्रयासहरू जारी रहेको बताएका छन्।
एजोभस्टाल कम्प्लेक्सभित्र रहेका युक्रेनी लडाकुले सामाजिक सञ्जालमा जारी गरेको एउटा विज्ञप्तिमा आफूहरू र रुसीहरूले सर्वसाधारणलाई बाहिर पठाउन सेता झन्डा प्रयोग गरेको जनाएका थिए। त्यसले दुईपक्षबीच प्रगति भइरहेको र सम्झौताहरूले जीवन रक्षा गरिरहेको जस्तो भान दियो। यद्यपि युद्ध विरामको प्रतिबद्धता गरिएको भए पनि क्रेमलिन समर्थित फौजले पछिल्ला दिनहरूमा स्टील उद्योगमा कारबाही सघन बनाएको बताइएको छ।
यसअघिको संयुक्त राष्ट्र सङ्घ र रेड क्रसको कारबाहीका कारण भूमिगत बारुद र मोर्टार प्रहारका कारण फसिरहेका १०० जनाभन्दा बढी मानिसहरूलाई त्यहाँबाट मुक्त गर्न सकिएको थियो। अब नागरिकहरू मुक्त भएका छन्। त्यसैले युक्रेनी सरकारमाथि २,००० लडाकुहरू मुक्त गर्न दबाव बढेको छ। ती लडाकुहरूले मारिऊपोल शहरको रक्षार्थ कहिल्यै आत्मसमर्पण नगर्ने प्रतिज्ञा गरेका थिए। उनीहरूका परिवारले उनीहरूको मुक्ति सुरक्षित रुपमा गर्न आग्रह गर्दै आएका छन्।
काठमाडौं । स्थानीय तह निर्वाचन सुरक्षालाई लक्षित गरी काठमाडौंमा वैशाख २७ गतेदेखि ३० गते साँझसम्म मदिरा बिक्री वितरणमा रोक लगाइएको छ ।
जिल्ला प्रशासन कार्यालय काठमाडौंले आइतबार एक सूचना जारी गरी वैशाख २७ गते मंंगलबार राति १२ बजेदेखि मतदान कार्य सम्पन्न नभएसम्मका लागि मदिराजन्य पदार्थ बिक्री वितरण र सेवन नगर्न नगराउन आग्रह गरेको छ ।
३० वैशाखमा स्थानीय तहको निर्वाचनको दिन तोकिएको छ । प्रशासन कार्यालयले मतदानको दिन अत्यावश्यक सेवामा सञ्चालित र अनुमति लिएका सवारी साधानबाहेक अरुलाई विहान ६ बजेदेखि मतदान नसकिँदासम्म सञ्चालनमा रोक लगाएको जनाएको छ ।
काठमाडौं । संघीय संसदको बजेट अधिवेशन जेठ ३ गते दिउँसो ४ बजेका लागि आह्वान गरिएको छ । आइतबार दिउँसो बसेको मन्त्रिपरिषद बैठकले गरेको सिफारिसका आधारमा राष्ट्रपति विद्यादेवी भण्डारीले जेठ ३ गते दिउँसो ४ बजे बस्ने गरी प्रतिनिधिसभा र राष्ट्रियसभाको अधिवेशन आह्वान गरेकी हुन् ।
जेठ १५ गते सरकारले आगामी आर्थिक वर्षको बजेट पेश गर्ने संवैधानिक व्यवस्था छ । त्यसअघि हुने पूर्वबजेट छलफल, सरकारको नीति तथा कार्यक्रम प्रस्तुत र छलफलका लागि संसदको अधिवेशन आह्वान गरिएको हो ।
काठमाडौं । स्थानीय तहको निर्वाचनका दिन सबै आन्तरिक वायु सेवा कम्पनीहरुको नियमित उडान सेवा बन्द हुने भएको छ।
वायु सेवा सञ्चालक संघले आइतबार विज्ञप्ति जारी गर्दै शुक्रबार सेवा बन्द गर्ने निर्णय गरेको हो । संघका अनुसार मानवीय उद्धार, सहायता र सरकारको निर्देशनबाहेक अन्य उडान सबै बन्द हुनेछ ।
‘स्थानीय तह सदस्य निर्वाचन, २०७९ को मतदान हुने दिनको सवारी आवागमन व्यवस्थापन सम्बन्धी मापदण्ड, २०७९’ बमोजिम हवाई सेवा बन्द हुन लागेको हो। यद्यपि अन्तर्राष्ट्रिय उडान भने यथावत रहने विज्ञप्तिमा भनिएको छ ।
काठमाडौं । सरकारले निर्वाचनको सुरक्षामा खटिएको समयमा सुरक्षाकर्मीको मृत्यु भएमा निजको आश्रित परिवारलाई २० लाख रूपैयाँ आर्थिक सहायता उपलब्ध गराउने निर्णय गरेको छ।
गृहमन्त्री बालकृष्ण खाणको प्रस्तावमा आइतबार बिहान बसेको मन्त्रिपरिषद् बैठकले निर्वाचनको सुरक्षामा खटिने म्यादी प्रहरीसहितका सुरक्षाकर्मीको मृत्यु भएमा निजको आश्रित परिवारलाई २० लाख आर्थिक सहायता उपलब्ध गराउने निर्णय गरको हो।
‘निर्वाचन सुरक्षामा खटिएको समयमा सुरक्षाकर्मी (नेपाली सेना, नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान विभाग) तथा म्यादी प्रहरीको मृत्यु भमा निजको आश्रित परिवारलाई बीस लाख आर्थिक सहायता उपलब्ध गराउने,’ मन्त्रीपरिषद् बैठकको निर्णयमा भनिएको छ।
त्यस्तै बैठकले निर्वाचनको क्रममा घाइते भएका सुरक्षाकर्मी (नेपाली सेना, नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान विभाग) तथा म्यादी प्रहरीको उपचारमा लागेको खर्च पनि सरकारले व्यहोर्ने निर्णय गरेको छ ।
बैठकले हिमाली जिल्लामा खटिने म्यादी प्रहरीलाई प्रहरी जवान सरह जिल्लागत दररेट अनुसार रासनभत्ता उपलब्ध गराउने निर्णयसमेत गरेको छ ।
काठमाडौं । नेकपा एमालेका अध्यक्ष केपी शर्मा ओलीले निर्वाचन आयोगले पाँच दलीय गठबन्धनको ढाल बनेर काम गरेको आरोप लगाएका छन् ।
आइतबार काठमाडौंमा आयोजित पत्रकार सम्मेलनमा ओलीले गठबन्धनको बागी उम्मेदवारलाई रोक्नकै लागि एक दलको कार्यकर्ताले अर्को दलको प्रचार गर्न नपाइने प्रावधान ल्याएको बताएका हुन्।
उनले दलभित्रको अनुशासनको विषय सम्बन्धित दलको विषय हुने बताउँदै निर्वाचन आयोगले दलभित्रको अनुशासनको विषयमा चेतावनी दिन नमिल्ने बताए । ‘दलविरुद्ध लागेको अवस्थामा सम्बन्धित दलले नै कारवाही गर्छ, निर्वाचन आयोगले कारवाही गर्नुपर्ने आवश्यकता के हो ?’ ओलीले प्रश्न गरे । निर्वाचन आयोगले यस्तो नियम बनाउनुको कारण आम जनतालाई स्पष्ट पार्नुपर्ने उनको धारणा छ।
ओलीले गठबन्धनको नाममा एउटा पार्टीको नेतृत्वले नै अर्को पार्टीलाई भोट माग्दा भने निर्वाचन आयोग आँखामा कालो पट्टी बाँधेर बसेको बताए । काठमाडौंमै प्रचण्डले सिर्जना सिंहका लागि भोट मागेको प्रसँग जोड्दै उनले प्रचण्डलाई पनि कारवाही हुनुपर्ने बताए । ‘उहाँहरुलाई के हुन्छ कारवाही ? उहाँहरुले क–कसका झण्डा बोक्नुभएको छ ? उहाँहरुले क–कसको भोट माग्नुभएको छ ?’ उनले भने, ‘उहाँहरुप्रति चाहीँ निर्वाचन आयोग कालो चस्मामात्र होइन, कालो पट्टी नै बाँधरे बसेको छ।’
उनले काठमाडौंमा मात्र नभई सातै प्रदेश, जिल्ला र पालिकाहरुमा गठबन्धनको नाममा एक पार्टीले अर्को पार्टीका लागि भोट मागिएको बताए । ‘सातै प्रदेशमा आम सभा गरेर अर्काकै प्रचार गर्दै छन् त,निर्वाचन आयोगले देखेको छैन ? उनले प्रश्न गरे ।
काठमाडौं । नेकपा (एमाले) का अध्यक्ष केपी शर्मा ओलीले सत्तारूढ दल नेपाली कांग्रेस र नेकपा (माओवादी केन्द्र)ले देश र जनतालाई पिरोलेको आरोप लगाएका छन् ।
आइतबार ललितपुरको च्यासलस्थित पार्टी मुख्यालयमा आयोजित पत्रकार सम्मेलनमा उनले एमालेले ती दुई दलले जस्तो जनतालाई नपिरोल्ने बताए ।
“हामी आर्थिक वृद्धिका प्रमुख संवाहक क्षेत्रहरूमा सरकारी, सहकारी र निजी क्षेत्रको लगानी केन्द्रित गर्दछौँ । यी क्षेत्रमा सरकारी, सहकारी र निजी क्षेत्रलाई प्रमुखताका साथ लगानी बढाउन अनुकूल वातावरण बनाउँदछौँ ।
तीनखम्बे नीतिका आधारमा राष्ट्रिय अर्थतन्त्रलाई आत्मनिर्भर, गतिशील र प्रतिस्पर्धी बनाउनेछौँ । आन्तरिक र बाह्य लगानी प्रवद्र्धनमा जोड दिन निजी क्षेत्रको विकासलाई प्राथमिकता दिनेछौँ,” ओलीले भने, “म निजी क्षेत्रका उद्योगी, व्यवसायी तथा लगानीकर्ता साथीहरूलाई आश्वस्त पार्न चाहन्छु, हामी निजी क्षेत्रका समस्या समाधान गर्नेछौँ ।
निजी क्षेत्रका अवसरहरूलाई साकार पार्न मार्गप्रशस्त गर्नेछौँ । तपाईंहरूको अभिभावक हुनेछौँ । हामी नेकाँ र माकेले जस्तो देश र जनतालाई पिरोल्दैनौँ, विश्वासघात गर्दैनौँ ।”
सम्मेलनमा ओलीले भने, ‘हामीले चाह्यौं भने यो एक हप्तामा त ढल्छ, ढल्छ ।’
कसरी भन्ने प्रश्नमा उनेल भने, ‘केही भन्नै परेन नि ! विरालो किन्नु पर्दैन भन्ने तपाईंलाई थाहा छैन ? जसले ठूलो कचौरामा दूधभात दिन्छ, उस कहाँ जान्छ । त्यसको कुनै सवाल जवाफ छ ?’
माओवादीलाई कांग्रेसले भन्दा राम्रो प्रस्ताव गर्नुहुन्छ ? भन्ने प्रतिप्रश्नमा उनले भने, ‘विरालोको हकमा हाम्रो क्रयशक्ति कांग्रेसको भन्दा बढी छ ।’ अध्यक्ष ओलीले पाँच दलीय गठबन्धन देशको निम्ति अत्यन्तै हानिकारक भएको बताए ।
उनले भने, ‘यो वास्तवमा अपराधी गठबन्धन हो । यस्तो गठबन्धन कायम राख्ने अनि भोट दिएनौं भने धम्की दिने । यो अत्यन्तै गलत, हानिकारक कुरा हो । यो अराजनीतिक कुरा हो ।’
यस्तो छ एमाले अध्यक्ष ओलीको ६७ बुँदे अपील (पूर्णपाठ)
नेकपा (एमाले) को आम मतदातामा अपील
आदरणीय दिदीबहिनी तथा दाजुभाइहरू !
हार्दिक अभिवादन !
१. हामी सम्पूर्ण नेपालीहरू यही २०७९ साल वैशाख ३० गते शुक्रबारका दिन स्थानीय सरकार निर्माणका लागि जनप्रतिनिधिहरूको निर्वाचन सम्पन्न गर्न गइरहेका छौं । यो निर्वाचन स्थानीय तहको सरकार गठन गर्नका लागि जनादेश दिने संविधानप्रदत्त सार्वभौम मताधिकारको अभ्यास गर्ने महत्वपूर्ण अवसर हो । यस निर्वाचनका माध्यमबाट हामीले आफ्नो रोजाइका प्रतिनिधिहरू चयन गर्नेमात्र होइन, नेपाल र नेपालीको भावी गन्तव्यको मार्गचित्र समेत निर्धारण गर्नेछौं । म सबै आदरणीय मतदाताहरू समक्ष उत्साहपूर्वक मतदान गर्नुहुन हार्दिक आग्रह गर्दछु । निष्पक्ष, भयरहित र शान्तिपूर्ण वातावरणमा निर्वाचन सम्पन्न गर्न आवश्यक सहयोगका लागि सबैसँग अपिल गर्दछु ।
२. नेपाली जनसमुदायमाझबाट उदाएको जनताको राजनीतिक दल नेकपा (एमाले) सम्पूर्ण नेपाली दिदीबहिनी तथा दाजुभाइहरूको घर आँगनमा यहाँहरूको आशीर्वाद माग्न आएको छ । आगामी पाँच वर्षभित्र सबै गाउँ नगरलाई समग्र विकास, सुशासन, सामाजिक न्यायसहितको समतामूलक एवम् समृद्ध युगमा प्रवेश गराउने प्रतिज्ञाका साथ एमाले आम मतदाताहरू समक्ष प्रस्तुत भएको छ ।
३. आर्थिक विकासका क्षेत्रमा, आधुनिक भौतिक पूर्वाधार निर्माणका क्षेत्रमा, ग्रामीण तथा शहरी पूर्वाधार विकासका क्षेत्रमा र शिक्षा, स्वास्थ्य, खानेपानी तथा सरसफाइका क्षेत्रमा मात्र होइन,रोजगारी, सामाजिक सुरक्षा, संरक्षण तथा रूपान्तरणलगायतका क्षेत्रहरूमा समेत मानव जातिले सयौं वर्ष लगाएर हासिल गरेका उपलब्धिहरू नेपालमा एक दशकभित्रै हासिल गर्ने अठोट नेकपा (एमाले)ले लिएको छ । यो राष्ट्रिय अठोट पूरा गरिछाड्नका लागि भिजन, नीति र कार्यक्रमसहितको विस्तृत घोषणापत्र यहाँहरूसमक्ष हामीले प्रस्ताव गरिसकेका छौं ।
४. हाम्रा गाउँ नगरमा सताब्दीयौंदेखि ब्याप्त बेरोजगारी, गरिबी, विपन्नता, अभाव, कूप्रथा, कुसंस्कार, असमानता र कमजोर मनोबलको अन्त्य गर्ने सङ्कल्प नेकपा (एमाले)ले लिएको छ । नेकपा (एमाले) विकास, सुशासन र मानव सुखका दृष्टिले नेपाललाई विश्वकै सर्वश्रेष्ठ देश बनाउन चाहन्छ । हामीले देश र जनताको निरन्तर सेवालाई आफ्नो प्रमुख कर्तव्य ठान्दछौं । हाम्रा लागि नेपाल, नेपाली जनता र नेपालको अत्याधुनिक विकासभन्दा माथि केही छैन । एमाले यही आदर्शमा समर्पित थियो, छ र हुनेछ । त्यसैले हाम्रो मूल ध्येय ‘समृद्ध नेपाल, सुखी नेपाली’ हो । यो राष्ट्रिय ध्येयलाई साकार पार्नका निमित्त अवलम्बन गर्नुपर्ने नीति तथा कार्यक्रमहरूका बारेमा मैले विभिन्न अवसरमा यहाँहरू समक्ष आफ्ना धारणाहरू राख्दै आएको छु ।
आदरणीय दिदीबहिनी तथा दाजुभाइहरू !
५. राष्ट्रिय गन्तव्य तय गरेर सङ्कल्पसाथ अघि बढेमा मात्रै त्यसलाई साकार पार्न सकिन्छ । त्यसका लागि भिजन र त्यो भिजन बोक्ने व्यापक, सुदृढ, अनुशासित र गतिशील सङ्गठन चाहिन्छ । त्यस्तो सङ्गठनले मात्र गन्तव्य साकार पार्नका लागि शुरू भएको यात्रामा आउनसक्ने चुनौतीको डटेर सामना गर्न सक्दछ । राष्ट्रिय सङ्कल्पको कार्यान्वयन गर्न र कार्यान्वयनलाई निरन्तरता दिन देशमा एउटा भिजनरी र कृतसङ्कल्पित राष्ट्रिय शक्ति आवश्यक पर्दछ । त्यस्तो राष्ट्रिय शक्ति र त्यसरूपमा तीब्र गति एवम् उत्साहका साथ विकास गर्नसक्ने राजनीतिक दल नेकपा (एमाले) बाहेक अरू कुनै देखिंदैन ।
६. एमालेमा मात्रै राष्ट्रिय आँट, सङ्कल्प र आत्मविश्वास छ । हामी आम नेपाली जनतालाई यस उद्देश्यका लागि गोलबद्ध बनाउन सक्छौं, राष्ट्रिय परिवर्तन र रूपान्तरणको महाअभियानमा विश्वासका साथ अघि बढाउन सक्छौं । राष्ट्रिय हितहरूको पक्षपोषण गर्न, तिनको दृढ प्रतिरक्षा गर्न र गुमेका चिजहरू पुनः प्राप्त गर्नसक्ने सामथ्र्यवान्, भरपर्दो र जिम्मेवार राष्ट्रिय शक्ति एमाले नै हो ।
७. हामी नेपाललाई राष्ट्रिय स्वाभिमानसहितको दरिलो एवम् गर्बिलो राष्ट्र बनाउन चाहन्छौं, त्यो एमाले बिना सम्भव छैन । कुनै दल विशेषलाई पराजित गर्नु एमालेका लागि प्राथमिक चासोको विषय होइन, हाम्रो मुख्य ध्येय त नेपालको विकास गर्ने हो, नेपालीको इज्जत र प्रतिष्ठा बढाउने हो, नेपालको सार्वभौमसत्ता र अखण्डतालाई अक्षुण्ण राख्ने हो । नेकपा (एमाले)को यस महाअभियानलाई पूर्ण सफल बनाउन आम नेपाली दिदीबहिनी तथा दाजुभाइहरूबाट यस निर्वाचनमा अझ बढी साथ, समर्थन र सहयोग प्राप्त हुनेमा म विश्वस्त छु ।
८. नेकपा (एमाले) लोकतन्त्रको आधारभूत मूल्य मान्यता, बहुदलीय प्रतिस्पर्धात्मक राजनीतिक प्रणाली, आवधिक निर्वाचन, शक्ति पृथकीकरण, सन्तुलन र नियन्त्रण, स्वतन्त्र न्यायालय, मौलिक हक र मानव अधिकारप्रति प्रतिबद्ध छ । संविधानवादको अभ्यास गर्दा हामी सदासर्वदा नेपाली जनताको पक्षमा उभिने छौं ।
९. हामी नेपालको जातीय, भाषिक, धार्मिक, साँस्कृतिक तथा भौगोलिक विविधतालाई राष्ट्रिय सम्पदा ठान्दछौं, यसमा गौरव गर्दछौं, यसलाई आत्मसात गर्दछौं । त्यतिमात्र होइन, हामी नेपाली समाजमा समानता र सहिष्णुतामा आधारित सद्भावको विकास गर्दछौं, साम्प्रदायिक विद्वेष हटाउँदछौं । सामाजिक सद्भावलाई राष्ट्रिय एकतामा रूपान्तरण गर्दछौं । राष्ट्रिय एकतालाई मजबूत बनाउँदछौं, यसका आधारमा राष्ट्रिय शक्ति निर्माण गर्दछौं ।
१०. राष्ट्रिय एकतालाई कमजोर पार्ने, कुनै नाम वा बहानामा अखण्डतालाई अपमान गर्ने र देशभक्तिलाई होच्याउने कुरा नेकपा (एमाले) कुनै हालतमा स्वीकार्दैन । विविधतायुक्त नेपाली समाजमा सामाजिक सद्भाव, न्याय र समतामूलक व्यवहार कायम गरी राष्ट्रिय एकता मजबूत राख्ने क्षमता एमालेमा नै छ ।
११. अन्य राजनीतिक दलहरू अनिश्चयबाट ग्रसित र विवस भएको स्वयम् दलहरूले सार्वजनिक गरिरहेका छन् । एमालेमात्रै मजबूत राजनीतिक दल हो । नेकपा (एमाले) नेपालको सार्वभौसत्ता र अखण्डतालाई अक्षुण्ण राख्नका लागि, गणतन्त्र स्थापनाका लागि, परिपूर्ण लोकतन्त्रको निर्वाध अभ्यास र विकासका लागि, जनताको मौलिक अधिकार र आधारभूत स्वतन्त्रताको बहालीका लागि, नेपाली समाजको परिवर्तन र रूपान्तरणका लागि, नेपाली जनताको समृद्धिका लागि र नेपालको सम्मान तथा इज्जत निरन्तर बढाउनका लागि स्थापना भएको राजनीतिक दल हो । स्थापनाकालदेखि आजसम्म निरन्तर स्पष्टताका साथ यिनै आदर्शमा नेकपा (एमाले) अडिग छ, अटल छ ।
आदरणीय दिदीबहिनी तथा दाजुभाइहरू !
१२. नेपालको सार्वभौमसत्ता, अखण्डता र राष्ट्रिय एकताको सशक्त पहरेदारी गर्ने सामथ्र्य नेकपा (एमाले)मा मात्र छ भन्ने यथार्थ नेपालको नयाँ नक्सा प्रकाशन र संविधान संशोधनबाट सबैका सामुु थप स्पष्ट भइसकेको छ । राजनीतिक स्थिरता र स्थायित्वका लागि सर्वाधिक जनआधार भएको लोकप्रिय राजनीतिक दल नेकपा (एमाले) नै हो । नेकाँलागायतका केही दलहरुको अनिच्छाका बाबजुद स्थानीय स्वायत्त शासन ऐन– ०५५ तर्जुमा गर्न र स्थानीय तहलाई स्वायत्त अङ्गको रुपमा क्रियाशील गराउन संविधान निर्माणको समयमा नेतृत्व एमालेले नै गरेको थियो । स्थानीय तहलाई अधिकार सम्पन्न बनाई जनताको घर आँगनको सरकारको रुपमा स्थापित पनि यसैले गरेको हो ।
१३. विकास र सुशासनलाई तीब्र गतिमा अघि बढाउने भिजन, नीति र कार्यक्रम एमालेसँग मात्रै छ । एमालेको सरकार गठन नभई देश विकासको युगमा प्रवेश गर्नै नसक्ने ऐतिहासिक तथ्यहरूले समेत प्रष्ट पारिसकेका छन् ।
१४. व्यापक जनसमर्थन, जनविश्वास र जनताको अमूल्य मतबाट सरकारको नेतृत्व सम्हाल्ने जनादेश पाएको नेकपा (एमाले)को सरकारले उत्पादन र उत्पादकत्व बृद्धि, भौतिक पूर्वाधार निर्माण, व्यापक रोजगारी सिर्जना, शिक्षा र स्वास्थ्य सेवामा गुणात्मक सुधार, सामाजिक न्याय, सुशासन, अन्तर्राष्ट्रिय सम्बन्ध तथा नेपाल र नेपालीको सम्मान अभिबृद्धिका क्षेत्रमा स्पष्ट भिजन, योजना, कार्यक्रम, परियोजना र सुधारका अभियानहरूको कार्यान्वयन गरिरहेको थियो । स्थानीय तह, प्रदेश र संघबीच उचित समन्वय एवम् सहकार्य गर्दै संविधानको प्रभावकारी कार्यान्वयन गर्दै थियौं ।
१५. यसैबीचमा नेपाली काँग्रेसको षड्यन्त्रले चरम् उत्कर्ष लियो । काँग्रेसले सुशासन र विकासको मार्गमा तीब्र गतिमा अघि बढिरहेको देशलाई व्यवधान खडा गरेर यथास्थितिमा राख्न र पछाडि फर्काउनका लागि राष्ट्रियता, लोकतन्त्र र जनताप्रतिको कर्तव्यबोधमा कमजोर रहेका तत्वहरूलाई खोज्ने र त्यस्ताको साथ सहयोग लिएर राजनीति र देश हितका सन्दर्भमा उल्टो बाटो समात्यो । काँग्रेसले राजीतिक दलको आधारभूत मर्ममाथि प्रहार गर्यो । संसदीय मूल्य र मान्यतालाई नै कुल्चियो । संसद्ले सरकार निर्माण गर्ने संसदीय शासन प्रणालीको आदर्शको उपहास गर्यो । संसद्लाई राजनीतिक निर्णयको थलो हुन नदिई बन्धक बनायो । स्वतन्त्र न्यायपालिकामाथि आघात पुर्यायो ।
१६. संविधानको रक्षा गर्न, जनअधिकारको संरक्षण गर्न र देशलाई थप षड्यन्त्रको चक्रब्यूहबाट जोगाउन लोकतन्त्रप्रति प्रतिबद्ध नेकपा (एमाले) सरकारका सामु अन्य विकल्प थिएनन्, रहेनन् । फलस्वरूप, जनादेशका लागि जनतामाझ जाने निष्कर्षमा हामी पुग्यौं । तर अदालतको परमादेशले सरकार बदलियो । सार्वभौम नेपाली जनताको आफ्नो सरकार जनादेशबाट निर्माण गर्ने आधारभूत संवैधानिक अधिकारमाथि कुठाराघात भयो । विकास निर्माण, सुशासन, सामाजिक परिवर्तन र रूपान्तरणको युगान्तकारी विकास अभियान फेरि एकपटक अवरूद्ध हुनपुग्यो ।
१७. चरम् पदीय स्वार्थ, अहङ्कार, कुण्ठा र इष्र्या राखेर संविधानको आधारभूत मर्ममाथि गरिएको यो प्रहारलाई सार्वभौम नेपाली जनताकै आदेशबाट परास्त गर्न सकिन्छ भन्ने विश्वासका साथ हामी सार्वभौम नेपाली जनतासमक्ष आएका छौं ।
१८. संविधानको सफल कार्यान्वयका लागि, नेपाली जनताको सार्वभौम अधिकार र राष्ट्रिय अखण्डता एवम् एकताको रक्षाका लागि, ‘समृद्ध नेपाल, सुखी नेपाली’को महान् राष्ट्रिय आकाङ्क्षा साकार पार्नका लागि, संघ र प्रदेशको निर्वाचन सुनिश्चित गर्दै नेकपा (एमाले)को नेतृत्वमा सबै तहमा सरकार निर्माण गर्ने आधार तयार गर्नका लागि यही वैशाख ३० गते हुन गइरहेको स्थानीय तहको निर्वाचनमा सूर्य चिन्हमा मतदान गरी नेकपा (एमाले)का उम्मेदवारहरूलाई विजयी बनाइदिनुहुन आम नेपाली आदरणीय मतदाताहरूसमक्ष हार्दिक अपिल गर्दछु ।
आदरणीय दिदीबहिनी तथा दाजुभाइहरू !
१९. बहुदलीय शासन व्यवस्थाको स्थापनापश्चातको करिव ३२ वर्षको अवधिमा नेकपा (एमाले)ले करिब ७ वर्ष आफ्नै नेतृत्वको सरकार र करिव ३ वर्ष संयुक्त सरकारमा सहभागी भई जम्मा करिब १० वर्ष सरकारमा रहने अवसर पाएको छ भने नेपाली काँग्रेसले करिब २० वर्ष आफ्नै नेतृत्वको सरकार र करिब ७ वर्ष संयुक्त सरकारमा सहभागी भई करिब २७ वर्ष सरकारमा रहेको ईतिहास छ ।
२०. नेकपा (एमाले) करिब १० वर्ष सरकारमा रहँदा कृषि र औद्योगिक क्षेत्रको उत्पादन र उत्पादकत्व बृद्धि, भौतिक पूर्वाधार निर्माण, व्यापक रोजगारी सिर्जना, शिक्षा र स्वास्थ्य सेवामा गुणात्मक सुधार, सामाजिक न्याय, सुशासन, अन्तर्राष्ट्रिय सम्बन्ध तथा नेपाल र नेपालीको सम्मान अभिबृद्धिका क्षेत्रमा अभूतपूर्व र साहसिक सोच एवम् भिजन, योजना, कार्यक्रम, परियोजना र सुधारका अभियानहरूको कार्यान्वयन आत्मविश्वासका साथ आरम्भ गर्यो ।
२१. नेकपा (एमाले) सरकारमा रहँदा एक दशकसम्म औषत चार प्रतिशतमा रहेको आर्थिक बृद्धिदरलाई छ दशमलब पाँच प्रतिशतभन्दा माथि पु¥याउँदै आर्थिक बृद्धिदरलाई दोहोरो अङ्कमा पुर्याउने उच्च लक्ष्यका साथ विकास निर्माणका योजनाहरू कार्यान्वयन गर्दै थियो । उद्योग व्यवसाय संचालन गर्न आन्तरिक तथा बाह्य लगानीका लागि अनुकूल वातावरण विकसित हुँदै गएको थियो । सुख्खा बन्दरगाह, विशेष आर्थिक क्षेत्र र औद्योगिक ग्रामहरूको निर्माण अभियान थालेर मुलुकलाई औद्योगीकरणको मार्गमा तीब्र गतिमा अग्रसर गराइएको थियो ।
२२. कृषि उत्पादनमा देशलाई आत्मनिर्भर बनाउने, निर्यात बृद्धि गर्ने र कृषकलाई सम्पन्न बनाउने उच्च आकाङ्क्षाका साथ हामीले प्रधानमन्त्री कृषि आधुनिकीकरण परियोजना देशव्यापीरूपमा कार्यान्वयनमा ल्यायौं । देशलाई कृषि उत्पादनको सम्भाव्यताका आधारमा पकेट, ब्लक, जोन र सुपरजोनमा बर्गीकरण गरी परम्परागत निर्वाहमुखी कृषि प्रणालीलाई आधुनिक, व्यवसायिक र सम्मानित कृषि प्रणालीमा रूपान्तरण गर्ने अभियान थाल्यौं ।
२३. कृषि र उद्योग क्षेत्रको उत्पादन र उत्पादकत्व बृद्धि गरी आत्मनिर्भर अर्थतन्त्रको निर्माणमा राज्यका सबै सामथ्र्य परिचालन गरेका थियौं । आयात घट्दै थियो, निर्यात बढ्दै थियो, व्यापार घाटा न्यून हुँदै थियो, अर्थतन्त्र सबल बन्दै थियो, नेपाल दक्षिण एसियाको उदीयमान आर्थिक केन्द्रका रूपमा विकसित हुँदै थियो, हामीले नेपाललाई एसियन इकानोमीसँग आबद्ध गर्दै विश्व अर्थतन्त्रसँग बलियो सम्बन्ध बनाउँदै नेपालको सम्पन्नताको परिचय दिन आर्थिक हैसियत बढाउँदै थियौं ।
२४. राष्ट्रिय राजमार्गहरू र रणनीतिक राजमार्गहरूलाई कम्तिमा चार लेनमा विस्तार गर्ने, आधुनिक डिजाइनका सुरूङ मार्गहरू निर्माण गर्ने, सबै स्थानीय तहका सदरमुकाम र वडा केन्द्रसम्म पक्की सडक पु¥याउने, पूर्व–पश्चिम विद्युतीय रेलमार्ग एवम् उत्तर–दक्षिण रेलमार्ग निर्माण थाल्ने, सबै महानगरहरूमा मोनोरेल संचालन गर्नेलगायतका योजनाहरू क्रमशः आरम्भ गरी अत्याधुनिक सुरक्षित सडक, सुरूङ मार्ग र रेलमार्गको युगतर्फ देशलाई लग्दै थियौं ।
२५. कोशी, गण्डकी र कर्णालीमा क्रुज संचालनलाई प्रोत्साहन ग¥यौं । छिमेकी मित्रराष्ट्रहरू भारत र चीनसँग सामुन्द्रिक बन्दरगाह प्रयोगका लागि र आन्तरिक जलमार्ग (इनल्याण्ड वाटरवेज्)बाट समुन्द्रसम्म पहुँच प्राप्त गर्नका सम्झौता गर्नुका साथै समुन्द्रमा नेपालको राष्ट्रिय ध्वजावाहक पानीजहाज संचालन गरी भूपरिवेष्ठित नेपालको सामुन्द्रिक पहुँचको अधिकार उपभोग गर्न आवश्यक पूर्वाधार विकासमा हामी प्रयत्नशील थियौं ।
२६. स्पेशमा आफ्नै स्याटेलाइट स्थापनाको अधिकार सुरक्षित गरी सूचना तथा संचार प्रविधिमा असाधारण सुधार ल्याउने आयोजना प्रारम्भ गर्दै थियौं । नेपालको इतिहासमा पहिलो पटक न्यानो स्याटलाइट अन्तरीक्षमा प्रक्षेपण ग¥यौं । डिजिटल नेपालको विस्तृत कार्यक्रम कार्यान्वयनमा आइसकेको थियो । प्रधानमन्त्री तथा मन्त्रिपरिषद्को कार्यालयमा अत्याधुनिक सूचना तथा संचार प्रविधियुक्त विशेष कक्ष निर्माण गरी राष्ट्रिय महत्वका ठूला आयोजनाहरूको प्रत्यक्ष अनुगमन गर्न र प्रदेश तथा स्थानीय सरकारसँग प्रत्यक्ष अन्तक्र्रिया गर्ने प्रणाली कार्यान्वयनमा ल्याउन सफल भएका थियौं ।
२७. नेकपा (एमाले)को सरकारले देशलाई ऊर्जा संकटको स्थितिबाट लोडसेडिङ्ग मुक्त बनायो । हामी तीब्र गतिमा विद्युत उत्पादन गरी छिमेकी मित्रराष्ट्रहरू भारत, चीन र बङ्गलादेशतर्फ विद्युत निर्यात गर्न अन्तरदेशीय विद्युत प्रसारण लाइनहरू निर्माण गर्न शुरू गर्दै थियौं ।
२८. प्रधानमन्त्री रोजगार कार्यक्रम, सामाजिक सुरक्षा योजना, सबै बालबालिकालाई गुणात्मक शिक्षा, निरोगी नेपाल, स्वास्थ्य बीमा कार्यक्रम, सबै पालिकामा कम्तिमा १५ शैय्याको अस्पताल निर्माण, अस्पतालहरूको स्तरोन्नति, कडा रोगको निःशुल्क उपचार र आधारभूत औषधीहरू निःशुल्क उपलब्ध गराउने कार्यक्रम, बाल विकास कार्यक्रम, दिवा खाजा कार्यक्रम, आदिवासी, जनजाति, दलित र मानव विकास सूचकाङ्कमा पछि परेका परिवारका विद्यार्थीहरूलाई नर्सिङलगायतका प्राविधिक शिक्षा र उच्च शिक्षासमेत निःशुल्क उपलब्ध गराउने कार्यक्रम र छात्राहरूलाई स्यानिटरी प्याड निःशुल्क उपलब्ध गराउने कार्यक्रमहरू प्रभावकारी ढङ्गले कार्यान्वयनमा ल्याइएको थियो ।
२९. जनता आवास कार्यक्रम, जनताको तटबन्ध कार्यक्रम, फुसको छानालाई जस्तापाताले विस्थापन गर्ने कार्यक्रम, एकीकृत बस्ती विकास कार्यक्रम, तराई–मधेश समृद्धि कार्यक्रम, स्थानीय पूर्वाधार विकास कार्यक्रम, सघन सहरी कार्यक्रम, समृद्धिका लागि वन कार्यक्रम र अर्गानिक नेपाललगायतका बृहत् रूपान्तरणकारी योजना तथा कार्यक्रमहरू निर्धारित लक्ष्य र सम्पन्न हुने समय एवम् अपेक्षित परिणामसमेत तोकी कार्यान्वयनलाई तीब्रता दिइएको थियो ।
३० विनासकारी भूूकम्पपछि उद्धार, उपचार, राहत र पुनःस्थापनाको लागि ५०औं हजार स्वयंसेवक परिचालन गरी नेकपा (एमाले)ले यसको नेतृत्व ग¥यो । एक महिना सञ्चालित त्यो स्वयम्सेवामा २७ हजार २ सय ७६ अस्थायी निजी आवास तयार गरी हस्तान्तरण गरियो । हामीले २२ हजार भग्नावशेष सफा गर्यौं र १ हजार ३ सय अस्थायी विद्यालय भवन निर्माण गर्यौं ।
३१ भूूकम्पपछिको पुनर्निर्माणको समग्र योजना नेकपा (एमाले) नेतृत्वको सरकारले बनायो । आन्तरिक र बाह्य स्रोत परिचालन गरी तोकिएकै अवधिमा पुनर्निर्माणमा उदाहरणीय सफलता हासिल गर्यो । करिब ८ लाख पीडित परिवारलाई सुरक्षित आवास उपलब्ध गराइयो । अझ राम्रो, अझै बलियो पुनर्निर्माणको योजनासहित क्षतिग्रस्त हजारौं विद्यालय भवन, अस्पताल एवं स्वास्थ्य संस्थाहरु र सरकारी कार्यालयको पुनर्निर्माण गरियो । परम्परा झल्कने, आधुनिकता टल्कने किसिमले साँस्कृतिक सम्पदाको पुननिर्माण कार्य अघि बढाइयो ।
३२ तुइनबाट ज्यानको जोखिम उठाएर नदी तर्नुपर्ने दर्दनाक अवस्थालाई हटाउन सबै तुइनलाई सम्भाव्यताका आधारमा झोलुङ्गे तथा पक्की पुलले विस्थापन गर्ने कार्यक्रम सम्पन्न गरियो ।
३३ विपन्न बर्गलाई प्राथमिकता दिएर जीवनचक्रमा आधारित स्वास्थ्य सेवा उपलब्ध गराउने कार्य प्रारम्भ गरियो । असहाय, अनाथ बालबालिकालगायतका व्यक्तिहरूको उद्धार, उपचार तथा पुनःस्थापनाको कार्यक्रम संचालनमा ल्याई सडकलाई मगन्तेरहित बनाइयो । विकट स्थानका प्रसव पीडामा परेका गर्भवती महिलाहरूलाई हेलिकप्टरबाट उद्धार गरी सुविधा सम्पन्न अस्पतालबाट प्रसूती सेवा उपलब्ध गराउने कार्यक्रम संचालनमा ल्याइयो ।
३४. हामीले अचानक आइलागेको कोभिड महामारीको स्थानीय तह र प्रदेशको सहकार्यमा प्रभावकारी ढङ्गले सामना ग¥यौं । यसको जानकारी सार्वजनिक हुनासाथ उच्च स्वास्थ्य सतर्कता अपनायौं । त्यतिखेर चीनमा अध्ययनरत विद्यार्थीहरुलाई विमान चार्टर गरी उद्दार गर्यौं । कोभिडको नियन्त्रण, रोकथाम र उपचारका लागि आइसोलेशन, क्वारेन्टिन, औषधी र खोपको निःशुल्क प्रबन्ध गर्यौं । अग्रभागमा खट्ने चिकित्सक, नर्स र स्वास्थ्यकर्मीसहित अन्य जनशक्तिका लागि १८ अर्ब रुपियाँ बराबरको कोरोना बीमासमेत गर्यौं । दक्षिण एशियामा भारतपछिको पहिलो मुलुकको रुपमा निःशुल्क खोपको प्रबन्ध पनि हामीले नै ग¥यौं ।
३५. यसरी हाम्रा समग्र कामले राष्ट्रको विभिन्न पक्षमा मनोबललाई उच्च बनाउने काम ग¥यो । भूूकम्पले रंगशाला भत्किएको बेला, अभ्यास गर्ने स्थानको समेत अभाव रहेको बेला, मुलुकले प्रबन्ध गरेको सीमित सुविधाको भरमा पनि हाम्रा युवा खेलाडीहरुले उच्च मनोवल प्रदर्शित गरे । फलस्वरुप १२औं दक्षिण एशियाली खेलकुदमा ३ वटा मात्र स्वर्ण पदकमा सीमित हामी, १३औं दक्षिण एशियाली खेलकूदमा आइपुग्दा ५१ स्वर्ण पदकसहित दोस्रो बिजेता बन्न सफल भयौं । आधुनिक रंगशालाहरुको निर्माण तथा सुधार कार्यलाई तीब्र गतिमा अघि बढायौं ।
३६. राज्यका स्रोत गाउँ नगर तहसम्म सोझै हस्तान्तरण गरी स्थानीय विकास निर्माणको नायकत्व गाउँ नगर तहलाई नै दिने कार्यक्रमका साथै ज्येष्ठ नागरिक, एकल महिला, विधवाहरूलाई राज्यका तर्फबाट भत्ता उपलब्ध गराउने कार्यक्रमहरू कार्यान्वयनमा ल्याइयो ।
३७. नेपालको संविधानको प्रभावकारी कार्यान्वयन प्रारम्भ गरी संघीय लोकतान्त्रिक गणतन्त्रको लाभ आम नेपालीसमक्ष पु¥याउन आरम्भ गर्यौं । संविधान कार्यान्वयनका लागि आवश्यक सयौं कानूनहरूको तर्जूमा गर्नुका साथै संविधानसँग मेल नखाने सयौं कानूनहरू खारेज गर्यौं । मिलेमतोमा राजश्व माफी दिने कर फछ्र्यौटसम्बन्धी कानून खारेज गर्यौं । मानव सभ्यताको कलङ्क एवम् बर्बर हिंसाको रुपमा रहेको एसिड आक्रमणलाई निर्मूल पार्न आवश्यक कानूनी व्यवस्था गर्यौं । वित्तीय संघीयताको अभ्यास गर्दै स्थानीय तहलाई समानीकरण, सशर्त, समपूरक र विशेष अनुदान उपलब्ध गराउन शुरू गर्यौं ।
३८. छिमेकी मित्रराष्ट्रहरू, अन्य मित्रराष्ट्रहरू र बहुपक्षीय अन्तर्राष्ट्रिय संस्थाहरूसँग नेपालको सम्बन्धलाई अझ सौहाद्र बनाउँदै नेपालको सर्वाधिक हितमा विकसित गर्दै थियौं ।
३९. यसरी नेकपा (एमाले) करिब १० वर्ष सरकारमा रहँदा नेपालको इतिहासमा पहिलो पटक मुलुकको समग्र विकास निर्माण, सामाजिक सुरक्षा, परिवर्तन र रूपान्तरण, राष्ट्रिय सामथ्र्य र प्रतिष्ठाको अभिबृद्धिलगायतका क्षेत्रमा युगान्तकारी एवम् गौरवपूर्ण उपलब्धिहरू हासिल भएको थियो ।
४०. नेपाली काँग्रेस २७ वर्ष सरकारमा रहँदा संसद्मा आफ्नै सरकारको वार्षिक नीति तथा कार्यक्रम फेल गर्ने, आफ्नै सरकारविरूद्ध अविश्वास प्रस्ताव पेश गर्ने, बिना कारण अन्य दलका सरकारविरूद्ध अविश्वासको प्रस्ताव पेश गर्ने, सांसदलाई विदेशसमेत लगी बन्धक बनाउने, संविधानबमोजिम ताजा जनादेशमा जाने सरकारको निर्णयउपर मुद्दा मामिला गर्न पटक–पटक अदालत जाने, महाभियोगको डर, त्रास देखाई अदालतको स्वतन्त्रता हनन् गर्ने, संसद् भङ्ग गरी राजालाई सत्ता सुम्पिने, संसद्बाट निर्वाचित प्रधानमन्त्रीको पद त्याग गरी राजाबाट नियुक्त प्रधानमन्त्रीको पद खाने, देश–जनता–राजनीतिलाई चरम् अन्धकारमा धकेल्न सशस्त्र द्वन्द्वलाई मार्गप्रशस्त गर्ने, निजामती सेवा नै खल्बलिने गरी निजामती कर्मचारीलाई बर्खास्त गर्ने, राष्ट्र बैंकका गभर्नर निलम्बन गर्ने, प्रहरी संगठनमा प्रचलित ऐन नियमको दायरा उल्लंघन गर्दै नियुक्ती र बढुवा गरी सुरक्षा संगठनलाई तहसनहस पार्ने, आधारभूत वस्तु उत्पादन गर्ने सरकारी उद्योगहरूलाई निजीकरणको बहानामा कौडीको मूल्यमा बेची राष्ट्रिय सम्पत्ति दोहन गर्ने, कर फछ्र्यौटको बहानामा सरकारलाई तिर्नु÷बुझाउनुपर्ने एकीन भइसकेको राजश्व मिलेमतोमा छूट माफी गरी देश र जनताको सम्पत्ति÷राजश्व खाने, परिवारका सदस्य र नातेदारहरूको मिलेमतोमा योजना रचेर निर्धक्क भ्रष्टाचार गर्ने, प्रहरी प्रशासन र सम्पूर्ण राज्य संयन्त्रको दुरूपयोग गरी सत्ताभोग गर्नेलगायतका देश र जनताविरोधी कार्यहरू नेपाली काँग्रेसको सरकारले गरेको इतिहास छ ।
४१. काँग्रेस शासनकालमा आर्थिक बृद्धि, कृषि, उद्योग, व्यापार–व्यवसायको विकासलाई तीब्र गति दिन, बेरोजगारी, अभाव, गरीबी, विपन्नताको अन्त्य गरी देशलाई समृद्ध बनाउनका लागि देश र जनताकेन्द्रित कुनै सोंच, नीति र कार्यक्रम थिएनन्, छैनन्, हुँदैनन् पनि । काँग्रेसकालमा आधुनिक भौतिक पूर्वाधार विकासका कुनै योजना न शुरू भए, न त सम्पन्न नै भए । शिक्षा र स्वास्थ्य क्षेत्रमा राज्यको भूमिकालाई अत्यन्त कमजोर बनाइयो, सामाजिक सुरक्षा र लोककल्याणप्रति निरन्तर उदासिनता देखाइयो । महिला, दलित, अपाङ्ग, जनजाति, आदिवासी, मानव सूचकाङ्कमा पछिपरेका भौगोलिक क्षेत्र र वासिन्दाहरूको उत्थानका लागि कुनै कार्यक्रम आएनन्, घरबारविहीन सुकुम्बासीहरूका लागि कुनै सम्बोधन भएन, सुकुम्वासीलाई लालपूर्जा वितरण गर्ने अवस्थामा पुगेको सुकुम्बासी समस्या समाधान आयोग पटक–पटक खारेज गरियो । ज्येष्ठ नागरिक, एकल महिला, बालबालिकाहरूको हित र कल्याणमा कुनै ध्यान दिइएन, समाजमा व्याप्त कुरिती, कुप्रथाहरू हटाई सामाजिक परिवर्तन, रूपान्तरण र सशक्तीकरणका कुुनै कार्यक्रमहरू काँग्रेस सरकारमा रहँदा सोच्दा पनि सोचिएनन् ।
४२. नेपाली काँग्रेस देश र जनताको विकास तथा समृद्धिका लागि आफू नीति कार्यक्रम ल्याउँदैन, विकास निर्माण र जनहितका लागि स्रोत–साधन छैन, अहिले केही पनि गर्न सकिंदैन, गर्न पनि हुँदैन, अझ आधुनिक विकास निर्माणतर्फ त देशलाई लग्नै हुँदैन, यो काँग्रेस सरकारको विगतदेखिकै घोषित मान्यता हो । हालै जारी भएको काँग्रेसको घोषणा–पत्रले पनि यसको पुष्टि गर्दछ । अचम्म त के लाग्दछ भने नेकपा (एमाले)ले ल्याएका नीति, कार्यक्रम र आयोजनाहरूलाई काँग्रेस मजाक र गफ भन्दछ । देशको समृद्धि र जनताको सुखलाई काँग्रेस कोरा सपना र उल्टो विकास भन्छ । ठिकै पनि हो, उसका लागि त सुल्टो भनेको, परिवार, नातेदार, गूट र अवसरवादीको हित र सत्ताभोग नै हो । काँग्रेस देशलाई गरीबी, विपन्नता, अभाव, लघुताभास र अनिश्चयको दुष्चक्रमा राखेर जनतामाथि शासन गर्न चाहन्छ ।
४३. तर नेकपा (एमाले) विकासका चुनौतीलाई चुनौती दिएर विकास गर्छ । हरेक असम्भवलाई सम्भव बनाउँछ । आम नेपाली जनसमुदायको आवश्यकता पूरा गर्नेमात्र हैन, आकाँक्षा समेत पूरा गर्न चाहन्छ । नेपाललाई सर्वश्रेष्ठ देश र नेपाली समाजलाई समतामूलक एवम् उत्कृष्ट तथा नेपालीलाई सुखी बनाउने स्पष्ट योजनासहित काम गर्दछ । सामान्य विकासको कार्यमात्र गर्दैन, अत्याधुनिक, उत्कृष्ट विकासका लक्ष्यहरू हासिल गर्ने दृढतासहित कार्यान्वयनमा जान्छ । सबै नेपालीलाई विकसित देशका नागरिकले उपभोग गरेसरहको भौतिक तथा अन्य क्षेत्रका सेवा सुविधाहरू उपलब्ध गराउने अठोटका साथ योजना, कार्यक्रमहरू कार्यान्वयन गर्दछ ।
आदरणीय दिदीबहिनी तथा दाजुभाइहरू !
४४. हामी आर्थिक बृद्धिका प्रमुख संवाहक क्षेत्रहरूमा सरकारी, सहकारी र निजी क्षेत्रको लगानी केन्द्रित गर्दछौं । यी क्षेत्रमा सरकारी, सहकारी र निजी क्षेत्रलाई प्रमुखताका साथ लगानी बढाउन अनुकूल वातावरण बनाउँदछौं । तीनखम्बे नीतिका आधारमा राष्ट्रिय अर्थतन्त्रलाई आत्मनिर्भर, गतिशील र प्रतिस्पर्धी बनाउने छौं । आन्तरिक र बाह्य लगानी प्रवद्र्धनमा जोड दिन निजी क्षेत्रको विकासलाई प्राथमिकता दिनेछौं । म निजी क्षेत्रका उद्योगी, व्यवसायी तथा लगानीकर्ता साथीहरूलाई आश्वस्त पार्न चाहन्छु, हामी निजी क्षेत्रका समस्या समाधान गर्नेछौं । निजी क्षेत्रका अवसरहरूलाई साकार पार्न मार्गप्रशस्त गर्नेछौं, तपाइँहरूको अभिभावक हुनेछौं । हामी नेकाँ र माकेले जस्तो देश र जनतालाई पिरोल्दैनौं, विश्वासघात गर्दैनौं ।
४५. हामीले राज्यका सबै क्षेत्र, आयाम र सामथ्र्यको उच्चतम् सदुपयोग हुने वातावरण सुनिश्चित गर्नेछौं । लोकतान्त्रिक मूल्य मान्यतामा चल्ने राज्यलाई अनावश्यक र अनुचित ढङ्गले भूमिकाविहीन र निरीह बनाउने अभ्यासलाई हामी उपयुक्त ठान्दैनौं । नेकपा (एमाले) जनताको हितका लागि राज्यको भूमिका प्रभावकारी बनाउन चाहन्छ ।
४६. दक्ष श्रमिक, उचित काम, कामको सम्मान, उपयुक्त पारिश्रमिक, स्वरोजगार र सामाजिक संरक्षणसहितको श्रम व्यवस्थापनलाई नेकपा (एमाले)ले सर्वाधिक प्राथमिकतामा राख्नेछ ।
४७. जीवनको प्रारम्भदेखि उत्तरार्धसम्मका सबै चरणहरूमा नेपालीलाई राज्यका तर्फबाट सेवा, सुविधा, सहयोग र संरक्षण दिन शुरू गर्ने पहिलो सरकार नेकपा (एमाले)को सरकार नै हो । यसमा हामी गर्ब गर्दछौं । गर्भवती महिलाको हेरचाह, बालबालिकाहरूको स्याहार र शिक्षा, युवाका लागि अवसर, प्रोत्साहन र रोजगारी, एकल महिला, विपन्न, अपाङ्ग, अशक्त, बेसहारा र अलपत्र व्यक्तिहरूका लागि सामाजिक सुरक्षा, संरक्षण र सबलीकरण तथा ज्येष्ठ नागरिकहरूका लागि स्वास्थ्योपचार, सामाजिक सुरक्षा र सम्मानलगायतका लोककल्याणकारी कार्यक्रमहरू हामीले नै ल्याएका हौं । आगामी दिनहरूमा विगतका अनुभवको समेत आधारमा अझ उन्नतस्तरका सामाजिक सुरक्षाका कार्यक्रमहरू हामी ल्याउने छौं ।
४८. अन्य राजनीतिक दलहरूले नेपालको विकासका लागि जुन–जुन अवस्था र विषयलाई समस्या, अवरोध र चुनौती मानेका छन्, नेकपा (एमाले) ती अवस्था र विषयमा अवसरै–अवसर देख्दछ । नेपालको विकासका सम्बन्धमा व्याख्या गरिने कठिनाइलाई हामी पर्यटन क्षेत्रको विकासका माध्यमबाट स्रोतमा बदल्न चाहन्छौं । यसका लागि हामीसँग भिजन र कार्यक्रम छ । हामी पर्यटन क्षेत्रलाई नेपालको राष्ट्रिय ढुकुटीका रूपमा विकास गर्नेछौं ।
४९. हाम्रा पुरातात्विक, धार्मिक, साँस्कृतिक र ऐतिहासिक महत्वका रहस्यमय सम्पदाहरू, हाम्रा चमत्कारिक भौगोलिक बनौट र विविधताहरू, हाम्रा अद्वितीय पर्यावरण, प्रकृति र जैविक विविधताको दृश्यावलोकन गर्न, अनुभव गर्न र अध्ययन–खोज गर्न समेतका लागि संसारभरबाट पर्यटक ल्याउनेछौं । संसारको शिखर चुम्नमात्र होइन, गौतम बुद्धको शान्तिको दर्शन बुझ्न र अवलम्बन गर्नसमेत पर्यटक ल्याउने आकर्षक अभियानहरू हामी थाल्नेछौं ।
५०. नेकपा (एमाले)ले अवलम्बन गर्ने शिक्षा नीतिले सबै नेपालीलाई देशभक्त, भविष्यप्रति आशावान्, सभ्य, सुसंस्कृत, योग्य, प्रतिस्पर्धी, उद्यमशील, सिर्जनशील र आत्मविश्वासी नागरिक बनाउनेछ । हामी हाम्रा बालबालिकाहरूलाई उपयुक्त शिक्षा दिएर ज्ञान र गुणवत्ताले युक्त आदर्शवान्, सामथ्र्यवान् र मर्यादित नागरिक बनाउँछौं । हामीले राष्ट्रिय आवश्यकता र अन्तर्राष्ट्रिय अवसरका आधारमा विषय र क्षेत्रगत जनशक्ति विकास गर्नेछौं ।
५१. नेकपा (एमाले) आजको विकासमा मात्र रूचि राख्दैन, भावी सन्तती र धर्तीको भविष्यप्रति पनि एमाले उत्तिकै सचेत र जिम्मेवार छ । हामी वातावरण, इकोसिष्टम, प्राकृतिक स्रोत र मानवीय भावनाको रक्षा र सम्बद्र्धनप्रति अत्यन्तै सजग छौं । वातावरणीय एवम् पर्यावरणीय सुरक्षा र सन्तुलनको विषयमा जागरूक छौं ।
आदरणीय दिदीबहिनी तथा दाजुभाइहरू !
५२. अन्तर्राष्ट्रिय जगतमा नेपालको हित, स्वाभिमान, सम्मान र प्रतिष्ठा अभिबृद्धि गर्न नेकपा (एमाले)सँग सुविचारित, स्पष्ट र परिपक्व परराष्ट्र नीति छ । हामीले ठोस आकार दिएको वैदेशिक मामिला संचालन गर्ने नीति नै नेपालको सफल परराष्ट्र नीति हुनेमा कुनै द्विविधा छैन । हामी ‘सबैसँग छ मित्रता, छैन कसैसँग शत्रुता’ को नीति अवलम्बन गर्दछौं । नेकपा (एमाले) छिमेकी मित्रराष्ट्रहरूप्रति पूर्ण इमान्दार छ । हामी विश्वास र भरोसाको सम्बन्ध अझ बलियो बनाउन चाहन्छौं । नेपाली भूमि कसैका विरूद्ध प्रयोग हुन नदिने हाम्रो स्पष्ट अडान छ ।
५३. देश भूगोलमा सानो वा ठूलो हुनसक्छ, जनसंख्या धेरै वा थोरै हुनसक्छ, विकासको स्तरमा अघि–पछि हुनसक्छ, तर कुनै पनि राष्ट्रको सार्वभौमसत्ता सानो ठूलो हुँदैन । यही सार्वभौम र सर्वकालिक मान्यतालाई आत्मसात् गर्दै हामी सार्वभौम समानतामा विश्वास गर्दछौं, सार्वभौम समानताको नीति अवलम्बन गर्दछौं । वास्तविक अर्थ र मर्मका साथ आफ्नो देशको स्वाधिनता र स्वतन्त्रताको प्रयोग गर्दछौं । हामी पारस्परिक लाभ र सम्मानका आधारमा वैदेशिक मामिला संचालन गर्दछौं । कसैको आन्तरिक मामिलामा कुनै प्रकारको हस्तक्षेप हामीलाई अस्वीकार्य छ । कसैको पक्ष वा विरोधमा न्यायपूर्ण तटस्थतालाई हामी छोड्दैनौं ।
५४. हामी ठान्दछौं, राष्ट्रिय हितलाई केन्द्रमा राखेर नै सबै देशहरूले आ–आफ्ना वैदेशिक नीतिहरू संचालन गरेका हुन्छन् । यही मान्यताको मर्मअनुसार हामी राष्ट्रिय, क्षेत्रीय र अन्तर्राष्ट्रिय अधिकारहरूमा हाम्रो न्यायोचित हिस्साका लागि दाबी गर्दछौं र प्राप्त पनि गर्दछौं । यसो गरिरहँदा न्याय र अन्तर्राष्ट्रिय उत्तरदायित्व विर्सन नहुनेतर्फ हामी सजग छौं । हामी सङ्कीर्ण राष्ट्रवादमा होइन, यथार्थ, वास्तविक, न्यायोचित र फराकिलो राष्ट्रवादको पक्षमा छौं ।
५५. मानवताको उचाइमा उठेको हाम्रो विश्व मान्यता स्पष्टरूपमा विश्व शान्तिको पक्षमा छ, मानव जाति र धर्तीको सुरक्षाको पक्षमा छ । तनाव, अशान्ति र हिंसाको विरूद्धमा छ । हिंसाको माध्यम र निहुँहरूको विरूद्धमा छ ।
५६. कतै तनाव देखिए सम्वादद्वारा घटाइनु पर्दछ । द्वन्द्व र हिंसालाई त्यसमा हिंसा थपेर होइन शान्तिपूर्ण सम्वादका माध्यमबाट आवश्यक परे प्रभावकारी मध्यस्थताका माध्यमबाट सल्ट्याउनु पर्दछ भन्ने मान्यता हामी राख्दछौं । यसका लागि मुख्यतः संयुक्त राष्ट्रसंघ र अन्य द्विपक्षीय, त्रिपक्षीय, क्षेत्रीय, बहुपक्षीय, अन्तर्राष्ट्रिय संघ संस्था र मञ्चहरूको भूमिकालाई कर्मकाण्डी होइन प्रभावकारी बनाइनु पर्दछ । यसका निमित्त हामीले अविचलित ढङ्गले स्वतन्त्र, तटस्थ, असंलग्न र निष्पक्ष भूमिकामा आफूलाई प्रस्तुत गर्नुपर्दछ । यो नै हामीले ठोस आकार दिएको परराष्ट्र नीतिको अन्तर्वस्तु र मूल मर्म हो ।
५७. आदरणीय दिदीबहिनी तथा दाजुभाइहरू, नेपाली काँग्रेसको सुविधामा आधारित परराष्ट्र नीतिले नेपाल र नेपालीको हित एवम् भावनामा कुठाराघात गर्दछ, नेपाल र नेपालीको हितभन्दा अन्य विषयहरूलाई प्राथमिकता दिन्छ । तसर्थ, राष्ट्रिय हितको संरक्षण र प्रबद्र्धन गर्न तथा अन्तर्राष्ट्रिय जगतमा प्रतिष्ठा आर्जन गर्न र नेपाललाई सफल राष्ट्र बनाउन तीनै तहमा नेकपा (एमाले)को सरकार आवश्यक भएको छ ।
आदरणीय दिदीबहिनी तथा दाजुभाइहरू !
५८. राणा, राजा र काँग्रेसको सरकारले देशको विकास र जनताको सुख समृद्धिका लागि कुनै योजना अगाडि बढाएनन् । सरकार कहिल्यै आधुनिकता र उत्कृष्टतातर्फ केन्द्रित रहेन । नेपाल जस्तो धर्तीको स्वर्गलाई संसारकै उत्कृष्ट राष्ट्र बनाउने अवसरलाई साकार पार्न कहिल्यै ध्यान दिएनन् । बरू देशलाई संसारकै गरीब देश, विपन्न देश, अभावग्रस्त देश, असमानताको देश बनाइराखे । म आदरणीय आम मतादाताहरूसँग आग्रह गर्न चाहन्छु, इतिहास हेरौं, निष्पक्ष समीक्षा र मूल्याङ्कन गरौं । ऐतिहासिक परीक्षण र भविष्यको सम्भावनाका आधारमा यहाँहरूले नेकपा (एमाले)लाई विजयी बनाउन सूर्य चिन्हमा मतदान गर्नुहुनेछ भन्ने विश्वास मैले लिएको छु ।
५९. काँग्रेस एमालेसँग कहिल्यै सहकार्य गर्न चाहँदैन, यस्तो सोच्नु पनि अपराध ठान्दछ । उसले राणाशाहीसँग सहकार्य गरेको इतिहास छ । नेपाली काँग्रेसले निरङ्कुश राजतन्त्रसँग आफ्नो घाँटी जोडिएको सार्वजनिक घोषणा गरेको सर्वविदितै छ । काँग्रेसकै नीति र अकर्मण्यताका कारण सशस्त्र द्वन्द्वका लागि मार्गप्रशस्त भएको यथार्थ हो । काँग्रेसले नै जनताको सत्ता राजालाई बुझाएको धेरै भएको छैन । अहिले पनि दक्षिणपन्थी, वामपन्थी अतिवाद र अवसरवादीहरूसँग घाँटी जोडेर गठबन्धन सरकार चलाएकै छ । ऊ जनादेशमा विश्वास गर्दैन । सकेसम्म मुद्दा मामिला, छलकपट, षड्यन्त्र र मिलावटबाटै सत्ताभोग गर्न चाहन्छ । आफूलाई लोकतान्त्रिक शक्ति भन्दै लोकतन्त्रको चरम् उपहास गर्दा पनि उसलाई लज्जाबोध हुँदैन । ऊ जनतामाथि विश्वास गर्दैन ।
६०. तर हामी नेकपा (एमाले)का लागि जनताभन्दा ठूला अरू कोही छैनन् । जनताको सेवा नै हाम्रो मुख्य ध्येय हो । हाम्रो शक्तिको स्रोत नै जनताको शक्ति हो । तसर्थ, हामी जनताका बीचमा रहन चाहन्छौं । जनादेशबाट मात्र जनताको सेवा गर्ने अवसरका लागि प्रयत्नशील रहन्छौं । जनताको आदेश मान्छौं । यसपटक पनि जनताबाट जनताको सेवा गर्ने अवसर हामीलाई प्राप्त हुनेमा विश्वस्त छौं ।
६१. राजतन्त्रको अन्त्य र गणतन्त्रको उदयका लागि, संविधानसभाको निर्वाचन तथा संविधान लेखन र जारी गर्नका लागि तथा संघीय लोकतान्त्रिक गणतन्त्रात्मक संविधान कार्यान्वयन गर्नका लागि नेकपा (एमाले)ले साहसिक निर्णायक भूमिका खेलेको सर्वविदितै छ । यसक्रममा काँग्रेसको आन्तरिक घेराबन्दी मात्र होइन, नाकाबन्दीसम्म व्यहोर्नुप¥यो । तर, सार्वभौम नेपाली जनताको अभूतपूर्व साथ र समर्थनबाट राष्ट्रिय जिम्मेवारी पूरा गर्न तथा महान् शहीदहरूको बलिदानबाट प्राप्त उपलब्धिहरूलाई संस्थागत गर्न हामी सफल भयौं । राजनीतिक उपलब्धिहरूलाई दिगो बनाउँदै समग्र विकासलाई तीब्र गति दिन एमाले थप ऊर्जाका साथ अघि बढिरहेको बेलामा काँग्रेसले पुनः जनादेशमाथि प्रहार गरेको छ । नेपाली काँग्रेस फेरि एकपटक नेपाल र नेपालीको विकास, स्थिरता र स्थायित्वका लागि अवरोध बनेर उपस्थित भएको छ, यसलाई पन्छाउन जरूरी भएको छ ।
६२. म आम नेपाली मतदाता दिदीबहिनी तथा दाजुभाइहरूसँग हार्दिक आग्रह गर्न चाहन्छु, यहाँहरूको आशीर्वादका लागि अनुरोध गर्न चाहन्छु । अब कम्तिमा दुई अवधि (पाँच–पाँच वर्ष) को निर्वाचनमा स्थानीय तह, प्रदेश र संघीय संसद्मा नेकपा (एमाले)लाई अत्याधिक बहुमतले विजयी बनाई नेपालको विकास र नेपालीको सुखको चीर प्रतिक्षित आकाङ्क्षा पूरा गर्न र देशमा स्थिरता र स्थायित्व कायम गर्नका लागि आदरणीय मतदाताहरू समक्ष साथ, समर्थन र सहयोगका लागि हार्दिक आग्रह गर्दछु । गठबन्धन बनाउनका लागि जनताको मत चाहिँदैन, जनताको मत त नेपालको विकास र समृद्धिको सुनौलो युग ल्याउनका लागि चाहिन्छ । त्यो युग नेकपा (एमाले)ले शुरू गरिसकेको छ र अबको पाँच वर्षमा सम्पन्न गर्दछ । अर्को पाँच वर्षमा हामी प्राप्त उपलब्धिलाई दिगो बनाई थप उत्कृष्ट र नवीन बनाउने सुनिश्चित गर्दछौं ।
६३. काँग्रेसलाई मतदान गर्ने धारणा बनाउनुभएका मतदाताहरूलाई समेत म आग्रह गर्न चाहन्छु, यसपटक नेपालको विकासका लागि, तपाइँहरूको जीवनमा सुख समृद्धि ल्याउनका लागि र तपाइँहरूका सन्ततीको स्वर्णिम भविष्य सुनिश्चित गर्नका लागि आउनुहोस्, निर्धक्कका साथ सूर्य चिन्हमा मतदान गरौं ।
६४. नयाँ मतदाताहरूलाई म आग्रह गर्न चाहन्छु, हामी तपाइँहरूको जीवनस्तरलाई विकसित देशका नागरिकको भन्दा कम हुन दिने छैनौं । तपाइँहरूको क्षमता विकास गरी तपाइँहरूलाई अद्वितीय उपलब्धी हासिल गर्नसक्ने प्रतिस्पर्धी, क्षमतायुक्त, सम्मानित र आदर्शवान् नागरिक बनाउने भिजन र कार्यक्रम एमालेसँग छ । तसर्थ, आउनुहोस्, जीवनको पहिलो मतदान सूर्य चिन्हमा गरौं र विकासको नयाँ युगमा प्रवेश गरौं ।
आदरणीय दिदीबहिनी तथा दाजुभाइहरू !
६५. नेकपा (एमाले)ले स्थानीय तहलाई लोकतन्त्र, विकास, निर्माण र आर्थिक बृद्धिको बलियो आधारस्तम्भ बनाउन चाहेको छ, जनसेवा प्रवाहको केन्द्रका रूपमा विकास गर्ने लक्ष्य लिएको छ, सुशासनको नमूना बनाउने उद्देश्य राखेको छ । स्थानीय तहलाई राष्ट्रियता, सामाजिक सद्भाव र सरकारप्रतिको जनविश्वासको प्रबर्धकको रूपमा विकास गर्न एमाले प्रतिबद्ध छ । स्थानीय स्रोत–साधनको पहिचान, संरक्षण, विकास र उपयोगको प्रस्थानबिन्दु बनाउने अठोट एमालेले लिएको छ ।
६६. नेकपा (एमाले)ले स्थानीय तहलाई विकास र सामाजिक चेतना अभिबृद्धिको अभियन्ता बनाउनेछ । सबै पालिकालाई सामाजिक न्याय र समानताका लागि रूपान्तरणको संवाहकका रूपमा विकास गर्नेछ । नेकपा (एमाले)ले विकास, निर्माण र सेवा प्रवाहको कार्यान्वयनमा स्थानीय तहको नायकत्व विकास गर्नेछ । हामीले लोकतन्त्रलाई जीवन पद्धतीका रूपमा अवलम्बन गर्ने आधारस्तम्भको रूपमा स्थानीय तहलाई विकास गर्नेछौं ।
६७. म पुनः आम नेपाली दिदीबहिनी तथा दाजुभाइहरू समक्ष यही २०७९ साल वैशाख ३० गते हुनगइरहेको स्थानीय तहको निर्वाचनमा सूर्य चिन्हमा मतदान गरी नेकपा (एमाले)का उम्मेद्वारहरूलाई अत्याधिक मतले विजयी गराइदिनहुन अपिल गर्दछु ।
धन्यवाद !
केपी शर्मा ओली
अध्यक्ष, नेकपा (एमाले)
२५ बैशाख २०७९
भरतपुर । नेकपा एमालेले आइतबारचितवनको भरतपुर र रुपन्देहीको बुटवलमा चुनावी सभा गर्ने भएको छ । दुबै सभामा पार्टी अध्यक्ष केपी शर्मा ओलीलगायतका नेताहरुले सम्बोधन गर्नेछन् । चितवनमा क्याम्पाचौरमा दिउँसो १२ बजे सभा आयोजना गरिएको छ । सो सभालाई ओलीसहित एमाले उपाध्यक्ष सुरेन्द्र पाण्डे, रामबहादुर थापा ‘बादल’, राप्रपा उपाध्यक्ष विक्रम पाण्डेलगायतका नेताहरुले सम्बोधन गर्ने कार्यक्रम छ । भरतपुर महानगरपालिकामा एमाले र राप्रपाले तालमेल गरेका छन् । भरतपुरको मेयरमा एमालेका विजय सुवेदी र उपमेयरमा राप्रपाकी हिमला गुरुङको उमेदवारी छ ।
यसअघि पाँच दलीय गठबन्धनले वैशाख २२ गते भरतपुरमा चुनावी सभा आयोजना गरेको थियो । गठबन्धनले भरतपुरको मेयरमा माओवादी केन्द्रकी रेनु दाहाललाई र उपमेयरमा कांग्रेसका चित्रसेन अधिकारीलाई उम्मेदवार बनाएको छ । भरतपुरमा ओलीले कांग्रेस सभापति शेर बहादुर देउवा र माओवादी केन्द्रका अध्यक्ष प्रचण्डलाई जवाफ दिनेछन् । बुटवलमा हुने चुनावी सभालाई अध्यक्ष ओलीसँगै उपाध्यक्ष विष्णु पौडेल, सचिव छविलाल विश्वकर्मा लगायतका नेताहरुले सम्बोधन गर्नेछन् । बुटवलमा एमालेले बाबुराम भट्टराईलाई र सत्ता गठबन्धनले कांग्रेसका खेलराज पाण्डेलाई मेयर पदको उम्मेदवार बनाएका छन्
काठमाडौं । ३० वैशाखमा तोकिएको स्थानीय तह निर्वाचनमा मतदान अधिकृतले सिसाकलमले मतपत्रमा हस्ताक्षर गर्न नपाउने भएका छन् । मतपत्रमा मतदान अधिकृतले हस्ताक्षर गर्दा सिसाकलमबाहेक कालो, रातो, नीलो वा हरियोमध्ये कुनै पनि मसी भएको कलम वा डटपेन प्रयोग गर्न पाउने निर्वाचन आयोगले जनाएको छ। साकलमले हस्ताक्षर गर्दा छिट्टै मेटिन सक्ने खतरा रहेकाले सिसाकलमको प्रयोग नगर्न भनिएको हो ।
आयोगले सिसाकलमबाहेक कालो, रातो, नीलो वा हरियोमध्ये कुनै मसी भएको कलम–डटपेनले हस्ताक्षर गर्ने व्यवस्था मिलाउन सबै मुख्य निर्वाचन अधिकृत तथा निर्वाचन अधिकृतलाई निर्देशन पनि दिएको छ । सरकारले चुनावमा हरेक मतदान केन्द्रमा एक स्वास्थ्यकर्मी खटाउने समेत जनाएको छ । मतदानस्थलमा हुने भिडभाडका कारण कोभिड सङ्क्रमण बढ्ने जोखिम रहेकाले स्वास्थ्य मापदण्ड पालना गराउन स्वास्थ्यकर्मी परिचालन गर्न लागिएको हो ।
काबुल । तालिबान अधिकारीहरूले सार्वजनिक स्थानमा अनुहार पूरै ढाक्ने गरी बुर्का लगाउन अफगान महिलाहरूलाई उर्दी जारी गरेका छन् । अघिल्लो वर्ष सत्ता कब्जा गरेयता उनीहरूले लगाएको कठोर नियन्त्रणका रूपमा यसलाई हेरिएको छ। बीबीसीका अनुसार आफ्नो पहिलो शासनकालमा यस्तै व्यवस्था लागु गरेका उनीहरूले अघिल्लो वर्ष सत्ता हातमा लिएपछि बुर्का अनिवार्य गर्नेबारे कुनै आदेश दिएका थिएनन्। नैतिक आचरणमाथि नियमन गर्ने तालिबान मन्त्रालयले यो प्रतिबन्धलाई सुझाव भनेको छ।
तर यसको कार्यान्वयन नगर्ने महिलाका श्रीमान् वा पुरुष अभिभावकहरूलाई छोटो जेल सजाय सहितका कारबाही गर्ने चेतावनी दिइएको छ। तालिबानहरूले सत्ता हातमा लिएपछि कतिपय महिलाहरूले बुर्कासँग अफगान संस्कृतिको सम्बन्ध नभएको भन्दै प्रदर्शन गरेका थिए। तालिबानको पछिल्लो कदमलाई महिलाहरूको स्वतन्त्रतालाई थप कुण्ठित गर्ने उनीहरूको प्रयासका रूपमा हेरिएको छ।
मन्त्रालयले महिलाहरूलाई पुरुषबिना एक्लै लामो दूरीको यात्रा गर्न रोक लगाएको छ एवम् महिला र पुरुषलाई एकै समयमा पार्कमा जान रोक लगाएको छ। केरमानीका अनुसार कुनै महिलाले बुर्का नलगाएको अवस्थामा पहिलो चरणमा बुर्का नलगाउने महिलाको घर पहिचान गरी उनको परिवारका पुरुष सदस्यहरूलाई सुझाव दिइने छ। फेरि पनि उक्त निर्णय पालना नगरिएको खण्डमा पुरुष अभिभावकलाई मन्त्रालयमा बोलाउनेदेखि अदालतसम्म लगेर कारबाही गर्नेसम्म भनिएको छ।
काठमाडौं । कीर्तिमानी आरोही कामीरिता शेर्पाले २६ औं पटक सगरमाथाको आरोहण गरेका छन् । उनले गत वर्ष आफैले राखेको कीर्तिमान तोडेका छन् । उनी आइसफल डाक्टरको ११ सदस्यीय टोलीको नेतृत्व गर्दै शनिबार सगरमाथा शिखरमा पुगेका हुन् । आरोहणको व्यवस्थापन गरिरहेको सेभेन समिटले यसको पुष्टी गरेको छ ।
टोली शनिबारसाँझ ६ बजे चुचुरो पुगेको थियो । यो टोलीले आरोहणको सहजिकरणका लागि बाटो बनाउने र डोरी टाँग्ने काम पुरा गरेको छ । सोलुखुम्बुको थामेमा सन् १९७० मा जन्मेका कामी रिताको नाममा सन् २०१८ देखि सबैभन्दा धेरै पटक सगरमाथा आरोहण गरेको कीर्तिमान कायम छ । उनले मे १६ २०१८ मा २२ औं पटक सगरमाथा आरोहण गर्दै आप्पा शेर्पाको कीर्तिमान तोडेका थिए ।
कामीरितासँगै सगरमाथा पुगेका अन्य आरोहीमा सोना शेर्पा, निग्मा तासी शेर्पा । फुर्वा छिरिङ शेर्पा, तेञ्जिङ ग्याल्जेन शेर्पा, लाक्पा तेन्जी शेर्पा छन् । यस्तै फुर्वा कुसाङ शेर्पा, मिग्मा दाण्डु शेर्पा, पासतेञ्जी शेर्पा, तारेमान तामाङ र फुर्वा छोतार पनि कामीरितासँगै सगरमाथा चुचुरोमा पुगेका छन् ।