काठमाडौं । संखुवासभाको मादी नगरपालिका–१ उम्लिङ खोलागाउँमा भएको ६ जनाको सामुहिक हत्याकाण्डमा संलग्न थप ४ जना पक्राउ परेका छन् ।
जिल्ला प्रहरी कार्यालय संखुवासभाले हत्यामा संलग्न थप चारजनालाई आज पत्रकार सम्मेलन मार्फत सार्वजनिक गरेको हो।
तेजबहादुर कार्कीसहित हत्या भएका ६ जनाको धार्मिक परम्परा अनुसार शनिबार काजकिरिया सकिए लगत्तै प्रहरीले लोकबहादुरका बुबा रणबहादुर कार्की, भाइ नरेश कार्की, काका खड्गबहादुर कार्की र उनका छोरा हस्तबहादुर कार्कीलाई पक्राउ गरेको हो ।
प्रहरीले लोकबहादुरका भाई नरेश कार्कीलाई भने घटनामा संलग्नता रहेको आशंकामा यसअघि नै पक्राउ गरी अनुसन्धान गरिरहेको जनाएको छ ।
प्रहरीले प्रक्राउ गरेका खड्गबहादुरकै घरमा घटनाको अनुसन्धानका लागि ‘कमाण्ड पोष्ट’ राखेको थियो ।
सोही कमाण्ड पोष्टबाट प्रहरीले ४९ जनाको प्रहरी टोलीलाई घटनास्थलको सुरक्षा र अनुसन्धानका लागि खटाएको थियो । गाउँमा घरहरू थोरै भएका कारण प्रहरी टोली खड्गबहादुरकै घरमा गोठ सफा गरेर बसेका थिए ।
२१ भदौमा संखुवासभाको मादी नगरपालिका–१ मादीको उम्लिङ खोला गाउँमा ६ जनाको सामूहिक हत्या भएको थियो ।
५२ वर्षीय तेजबहादुर कार्की, उनकी ८४ वर्षीया आमा पार्वती, ५२ वर्षीया श्रीमती कमला, बुहारी ३२ वर्षीया रञ्जना, नाति ११ वर्षीय दीपेन र नातिनी सात वर्षीया गोमाको हत्या भएको थियो ।
प्रहरीले सार्वजनिक गरेको हत्याकाण्डको थप अनुसन्धान सम्बन्धी विवरण
मिति २०७८।५।२१ गते बिहान अन्दाजी ५: २० बजे जिल्ला सङ्खुवासभा, मादी नगरपालिका वडा नं १ खोला गाउँका वर्ष ९० को बौद्ध बहादुर कार्कीको श्रीमती वर्ष ८४ की पार्वता भन्ने पार्वती कार्की, छोरा वर्ष ५५ तेज कुमार कार्की, छोरा बुहारी वर्ष ५४ की कमला भन्ने मनमाया कार्की, नातिनी बुहारी वर्ष ३२ की रञ्जना कार्की, पनाति वर्ष ८ को दिपेन कार्की र पनातिनी वर्ष ५ की गोमा कार्की गरी एकै परिवारका ६ सदस्यहरूको टाउको तथा शरीरको विभिन्न भागहरूमा दाउराको चिर्पट तथा धारिलो हतियार प्रहार गरी हत्या भएको र उक्त घटनामा निज बौद्ध बहादुर कार्की सकुशल अवस्थामा घरमा फेला परेको।
घटनामा संलग्न अभियुक्त रण बहादुर कार्कीको छोरा वर्ष २५ को लोक बहादुर कार्कीलाई मिति २०७८।५।२७ गते पत्रकार सम्मेलन मार्फत सार्वजनिक गरिएको ।
घटनाको थप अनुसन्धान गर्न सङ्घीय प्रहरी कार्यालयका प्रहरी उपरीक्षक भीम दाहालको कमान्डमा जिप्रका सङ्खुवासभाको प्रनाउ लालध्वज सुवेदी, ईप्रका चैनपुरका प्रनि र प्रदेश प्रहरी कार्यालयका प्रनि सहितको संयुक्त अनुसन्धान समूह निरन्तर रूपमा थप अनुसन्धानमा जुटेकोमा थप तथ्यहरू र घटनाको मुख्य योजनाकार सहित मादी नगरपालिका वडा नंम्वर १ उम्लिङ खोला गाउँ बस्ने ४ जनालाई नियन्त्रणमा लिई कारबाही प्रक्रिया अगाडि बढाएको ।
पक्राउ परेका अभियुक्तहरू
१.लाल बहादुर कार्कीको छोरा वर्ष ४७ को खड्ग बहादुर कार्की , मुख्य योजनाकार
२. खड्ग बहादुर कार्कीको छोरा वर्ष २८ को हस्त बहादुर कार्की
३. लाल बहादुर कार्कीको छोरा वर्ष ४९ को रण बहादुर कार्की
४. रण बहादुर कार्कीको छोरा वर्ष १७ को नरेश कार्की
अनुसन्धानबाट खुलेका थप तथ्य
- अभियुक्त लोक बहादुर कार्कीको घरमा घटनाको अघिल्लो रात राति ८ बजे मुख्य योजनाकार खड्ग बहादुर कार्की सहित हस्त बहादुर कार्की, लोक बहादुर कार्की र नरेश कार्की समेत बसेर योजना बनाएको।
- योजना अनुसार घटनाको दिन २१ गते बिहान मृतक तेज कुमार कार्की खेताला बोलाउन लोक बहादुरको घरमा आउने र सोही अवसरमा मौका छोपी तेज कुमार र कमला कार्कीको हत्या गर्ने अन्यले थाहा पाए भने उनीहरूको पनि हत्या गर्ने साथै अनुकूल मिलेमा तेज कुमारको घरमा भएको धनमाल समेत लाने योजना रहेको।
- घटनाको दिन मृतकको पिप्लेस्थित खेतमा अभियुक्तहरू खड्ग बहादुर कार्की, हस्त बहादुर कार्की, लोक बहादुर कार्की र नरेश नरेश कार्की समेत खेताला जाने कुरा पहिला नै निश्चित भएको ।
- योजना अनुसार मृतक तेज कुमार कार्की बिहान आउने निश्चित गर्न खड्ग बहादुर कार्की बिहान ५ बजे तेज कुमार कार्कीको घरमा गई ‘लोक बहादुर अल्छी छ घरमै गएर खेताला निश्चित गर्नु’ भनी तेज कुमार कार्कीलाई लोक बहादुर कार्कीको घर तर्फ जान अभिप्रेरित गरी घर तर्फ फर्केको ।
- तेज कुमार लोक बहादुर कार्कीको घर तिर जाँदै गरेको देखेपछि खड्ग बहादुर र हस्त बहादुर निजको घर पछाडि चिर्पट बोकेर तयारी हालतमा बसेको ।
- मृतक तेज कुमार कार्की बिहान ५ बजे उठी लोक बहादुरको घरमा खेताला निश्चित गई सुती रहेको लोक बहादुर लाई ‘अल्छी अझैसम्म उठेको छैनस्’ भन्दै कराए पछि लोक बहादुर उठेको, लोक बहादुरको भाइ नरेश कार्की र बाबु रणबहादुर कार्की समेत घरमै रहेको।
- घरबाट फर्कने क्रममा योजना अनुसार लोक बहादुरले भाइ नरेशलाई इसारा गरी आफूले दाउराको चिर्पट र अलैचि काट्ने चक्कु बोकी पछिपछि गई घर पछाडिको गोगनेको रूख नजिक तेज कुमारको टाउकोमा प्रहार गरी लडाएको र खड्ग बहादुर र हस्त बहादुर दाउराको चिर्पट लिई आई तेज कुमार माथि प्रहार गरेको र हस्त बहादुरले चक्कुले पेटमा प्रहार गरी डिलबाट लडाई बाटोमा झारी हत्या गरी घोप्टो पारेको।
- घटनाको वेला मृतकले ‘लोकेले मार्यो, मलाई नमार’ भन्दै गरेको हार गुहार सुने पछि ‘मेरो श्रीमानलाई नमार’ भन्दै तेज बहादुरको श्रीमती र बुहारी आएकोमा लोक बहादुरले कमला कार्कीलाई प्रहार गरेको, कमलाको घाटीमा हस्त बहादुरले छुरा प्रहार गरेको र बुहारी रञ्जना नरेशले ठेली खोल्सामा झारेको र खडक बहादुर, लोक बहादुर र हस्त बहादुर मिली हत्या गरेको।
- मृतक रञ्जनाको लास रण बहादुर र नरेश समेतले कमलाको लास भएको स्थान सम्म पुर्याउन सहयोग गरेको।
-उक्त घटनाकोवेला नाबालकहरू दिपेन र गोमा समेत घर नजिकको बाटोमा आएकोदेखि हस्त बहादुर र लोक बहादुरले बाटो छेकी मुख थुनी लोक बहादुरले चिर्पटले हिर्काई घाटी बटारी हत्या गरेको।
-तत् पश्चात् पाँचै जना अभियुक्तहरू मृतकको घर तर्फ गएको र घरमा मृतक ८४ वर्षीय पार्वती कार्की मकै नङ्ग्याइ रहेको अवस्थामा हस्त बहादुरले समाती घर पछाडिको गोठ नजिक लगी लोक बहादुरले टाउको भित्तामा ठोक्काई घाटी बटारी हत्या गरेको र सबै जना घटनामा प्रयोग गरेको चिर्पट र छुरी वोकि लोक बहादुरको घरमा गई लागेको रगत पखाली छुरी बुईकलमा लुकाएको, चिर्पटहरू अगेनामा डढाएको, रगत लागेको कपडाहरू समेत लुकाएको।
-खड्ग बहादुर र निजको छोरा हस्त बहादुर घरतर्फ गएको। फर्कने क्रममा रञ्जनाको ओप्पो मोबाइल नरेशले लिएर आई स्विच अफ गरी घरमुनिको ओडारमा लगी लुकाएकोमा अनुसन्धानको क्रममा फेला परेको ।
-पुनः खड्ग बहादुर र निजको छोरा हस्त बहादुर लोक बहादुरको घरमा गई सबै जना मिली कसैले सोधेमा घटनाको बारेमा कुनै पनि कुरा नसुनेको र थाहा नपाएको भनी भन्ने यदि प्रहरी आई पत्ता लगाएमा लोक बहादुरले मानसिक औषधी पनि खाने कारण निजले जिम्मा लिने भन्ने सल्लाह गरी फर्केको।
-घटनामा संलग्न चारै जनालाई नियन्त्रणमा लिई अनुसन्धान भई रहेको र अनुसन्धानको क्रममा सबै अभियुक्तहरूले घटना स्वीकार गरेको र घटनामा प्रयोग भएको छुरी, कपडा र हराएको मोबाइल समेत बरामद गरी थप अनुसन्धान भई रहेको।
घटना घटनुका कारण
-अभियुक्तहरू मध्ये खड्ग बहादुर नियमित रूपमा रक्सी खाने र घरमा श्रीमती र परिवारका सदस्यहरूलाई कुटपिट गाली गलौच गर्ने र तेज कुमारले ‘तँ जँड्याहा किन यसो गर्छस्’ भनी गाली गर्ने र खड्ग बहादुरले पनि ‘तँलाई के मतलब तँलाई मार्छु’ भन्दै झगडा गर्ने गरेको।
-लोक बहादुरलाई ‘तँ पागल, अल्छी, केही काम गर्न सक्दैनस्’ भन्ने नरेशलाई ‘तँ डुँडे काम नलाग्ने भईस’ भन्ने र रण बहादुरलाई समेत ‘तँ लठेब्रो केही गर्ने सक्दैनस्’ भन्ने गरेको, जहिले पनि हेप्ने र आफू सम्पन्न भएको फुर्ति दिने गरेको भनी मनमा ईख पालेको र घटनाको दिने अभियुक्तहरू समेत मृतकको खेतमा खेताला जानु पर्ने कारण सोही मौका छोपी योजना बनाइ हत्या गरेको।
