काठमाडौं । नयाँ अर्थमन्त्रीलाई सेयर बजारले हरियो झन्डा देखाएर स्वागत गरेको छ । अर्थमन्त्री जनार्दन शर्माले कार्यभार सम्हालेको पहिलो दिन बुधबार सेयर बजारमा ठूलो उत्साह नदेखिए पनि झिनो अंकले बढेर बन्द भएको हो ।
सूचकसँगै कारोबार रकममा भने सुधार आउन सकेन । यसअघिका दिनहरुमा जस्तै साढे ५ अर्ब हाराहारीमा कारोबार भएको छ ।
आज सेयर बजार मापक सूचक नेप्से १.०१ अंकले बढेर २८७२.०५ विन्दुमा पुगेको छ । आज २१४ कम्पनीको ५ अर्ब ६५ करोड ४५ लाख ७६ हजार २०५ रुपैयाँ बराबरको ४ करोड ४७ लाख ३६ हजार ५३० कित्ता सेयर किनबेच भएका छन् ।
कारोबारमा आएका १३ वटा समूहमध्ये ५ समूहको परिसूचकमा हरियाली छाएको छ भने ८ साूहको परिसूचक राताम्मे भएका छन् । हाइड्रोपावर समूह सबैभन्दा धेरै २.७१ प्रतिशतले बढेको छ भने फाइनान्स समूह पनि १.४८ प्रतिशतले बढेको छ ।
आज कारोबारमा आएका २१४ कम्पनीमध्ये ९७ कम्पनीको सेयर मूल्य बढेको छ भने १०१ कम्पनीको मूल्यमा गिरावट आएको छ । १६ कम्पनीको मूल्य स्थिर रहेको छ ।
आज गोर्खा फाइनान्सको सर्वाधिक कारोबार भएको छ । यसको झन्डै साढे २९ करोड रुपैयाँको कारोबार भएको छ । कारोबार रकमकै आधारमा छिमेक लघुवित्त २२ करोड र हिमालयन डिस्ट्रलरीको साढे १९ करोड बढीको कारोबार सहित शीर्ष तीन स्थानमा रहे ।
बढ्दो बजारमा आज हिमालयन पार्टनर पावर कम्पनीको सेयर मूल्य सबैभन्दा धेरै ८.१० प्रतिशतले बढेको छ भने नेपाल फाइनान्स र कालिका पावरको ७ प्रतिशतभन्दा धेरैले बढेको छ ।
यसैगरी, रसुवागढी, साञ्जेन हाइड्रोपावर, ङादी पावर, मल्टिप्रपोज फाइनान्स, सिनर्जी पावर र रैराङ हाइड्रोपावरको सेयर मूल्य १० प्रतिशभन्दा धेरैले बढेको छ । यस्तै, हिमाल दोलखा, रिडी, सिंगटी हाइड्रोपावर, युनिभर्सल पावर, सेन्टर फाइनान्स र माउन्टेन हाइड्रोको सेयर मूल्य ४ प्रतिशभन्दा धेरैले बढेको छ ।
यसैगरी, एनआइसी एशिया बैंक डिबेञ्चर, कृषि विकास बैंक डिबेञ्चर, सिद्धार्थ बैंक डिबेञ्चर, रिलायन्स फाइनान्स, नेपाल बंगलादेश बैंक, छ्याङ्दी हाइड्रोपावर, जानकी फाइनान्सको सेयर मूल्य ५ प्रतिशभन्दा धेरैले बढेको छ ।
बढ्दो बजारमा आज नबिल ब्यालेन्स फण्डको सेयर मूल्य सबैभन्दा धेरै २.८३ प्रतिशतले घटेको छ ।
