Category: अर्थतन्त्र

काठमाडौं । सरकारले पेट्रोलियम पदार्थको भाउ फेरी वृद्धि गरेको छ । डिजेल, पेट्रोल, मट्टितेल र आन्तरिक हवाई इन्धनको मूल्यमा प्रतिलिटरमा दुई रुपैयाँ बढाइएको नेपाल आयल निगमले सूचना जारी गरि जानकारी गराएको छ । अब काठमाडौं उपत्यकामा पेट्रोलको मूल्य प्रतिलिटर १२५, डिजेल तथा मट्टितेलको १०८ र हवाई इन्धन आन्तरिकतर्फको मूल्य प्रतिलिटरमा ८० रुपैयाँ पुगेको छ । सरकारले निषेधाज्ञाकै समयमा दोस्रो पटक मूल्य बढाएको हो । यसअघि जेठ २ गते मूल्य बढेको थियो ।

भारतीय आयल कर्पोरेसनबाट बढेर प्राप्त भएको नयाँ मूल्यका कारण निगमको घाटा चुलिएका कारण मूल्य समायोजन गरिएको निगमको भनाई छ । बढेको मूल्य आजै राति १२ बजेबाट लागू हुनेछ । मूल्य समायोजन पछि पछि निगमलाई पेट्रोलमा ५ रुपैयाँ ३२ पैसा, डिजेल तथा मट्टितेलमा ३ रुपैयाँ १७ पैसा र खाना पकाउने ग्यासमा २५८ रुपैयाँ ४६ पैसा प्रतिसिलिण्डर घाटा रहेको निगमले जनाएको छ ।

काठमाडौं । काठमाडौं उपत्यकाका आजबाट निषेधाज्ञा हल्का खुकुलो हुँदैछ । एक हप्तासम्म खाद्यान्न पसल समेत बन्द भएको काठमाडौंमा अब केही खुकुलो बनाइएको हो । उपत्यकामा जेठभर निषेधाज्ञा भने जारी रहने छ । काठमाडौं उपत्यकामा वैशाख १६ गतेदेखि निषेधाज्ञा लागू भएको हो ।

आजदेखि खाद्यान्न, किराना, तरकारी तथा फलफूल पसल, दूध डेरी, मासु पसल, ग्यास पसल बिहान ९ बजेसम्म खोल्न सकिन्छ । निर्माण सामग्री ढुवानीका गाडी राति ९ बजेदेखि बिहान ४ बजेसम्म चलाउन पाइन्छ । गाडी मर्मत गर्ने वर्कसपहरु राति ९ बजेदेखि बिहान ९ बजेसम्म खोल्न पाइनेछ ।

शैक्षिक संस्था, सार्वजनिक निजी गाडी तथा भोज, सभा समारोहजस्ता धेरै मानिस जम्मा हुने स्थल भने बन्द नै रहनेछन् । सरकारले तोकेका मापदण्ड पालना गरी कृषिको काम गर्न सकिनेछ । अत्यावश्यकबाहेक सरकारी कार्यालय, सार्वजनिक संस्थान र बीमा कार्यालयहरु बन्द रहने छन् ।

वाणिज्य बैंकहरुले प्रधान कार्यालयबाहेक उपत्यकामा तीनवटा शाखा कार्यालयमात्र खोल्न पाउने नियम छ । औषधि तथा खाद्यान्नजस्ता अत्यावश्यक वस्तु र सेवा खरिदमा बाहेक जेठ ३१ गतेसम्म कुनै पनि व्यक्ति घरबाट बाहिर निस्कन भने पाइने छैन ।

काठमाडौं । सरकारले बजेटमा घोषणा गरे अनुसार साल्ट ट्रेड्रिङ कर्पोरेसनले खाद्यान्न र खाना पकाउने ग्यास सस्तो मूल्यमा बिक्री गर्न शुरु गरेको छ । कम्पनीले आज मूल्यसूची सार्वजनिक गर्दै बजेटको कार्यान्वयन थालेको हो । सरकारले निषेधाज्ञाका समयमा सर्वसाधारणलाई २० प्रतिशत छुटमा खाद्यवस्तु उपलब्ध गराउने घोषणा गरेको थियो ।

साल्ट ट्रेडिङले आज आफूले बिक्री गर्ने खाद्य सामग्री र मूल्य सार्वजनिक गरेको छ । अब बजारमा प्रतिकिलो ९५ रुपैयाँ पर्ने चिनीको मूल्य ६३ रुपैयाँ २० पैसामा किन्न सकिने छ । खाना पकाउने ग्यासको भाउ ११ सय २० रुपैयाँ तोकिएको छ । पिठो प्रतिकिलो ४४ रुपैयाँ, नून प्रतिकिलो १६, भटमासको तेल प्रतिलिटर १८८ रुपैयाँमा किन्न सकिने छ ।

पाँच जनाको परिवारले एक महिनामा दुई किलो पिठो, दुई किलो चिनी, दुई किलो नून, एक लिटर भटमासको तेल र एक सिलिण्डर खाना पकाउने ग्यास मात्र किन्न पाउने छन् । साल्ट ट्रेडिङबाट छुट मूल्यमा सामान किन्न व्यक्तिले नागरिकताको प्रमाणपत्रको प्रतिलिपि र परिवारको सदस्यको नामसमेत पेश गर्नुपर्नेछ ।

काठमाडौं उपत्यकामा सर्वसाधारणले साल्ट ट्रेडिङको सतुंगल, कालीमाटी, कोटेश्वर, भक्तपुरबाट छुट मूल्यमा सामान पाउनेछन् । त्यस्तै काठमाडौंबाहिर बनेपा र धनगढीबाट खाद्य सामग्री छुट मूल्यमा बिक्री गर्ने साल्ट ट्रेडिङले जनाएको छ । खाना पकाउने ग्यास भने काठमाडौं उपत्यकामा मात्र बिक्री हुनेछ ।

काठमाडौं । सरकारले आगामी आर्थिक वर्षको बजेटमा एक बुँदा समेटेको छ । जसमा नेपालको ढुंगा, गिटी विदेश निकासी गरि त्यसबाट व्यापार घाटा कम गर्ने नीति लिइएको छ । यसका लागि निकासी हुन विन्दुसम्म रोपवे निर्माण गर्न चाहने निजी क्षेत्रलाई प्रोत्साहन गर्ने नीति समेत सरकारले लिएको छ । यो नीतिको व्यापक आलोचना शुरु भएको छ ।

आज नेकपाका वरिष्ठ नेता माधवकुमार नेपाल, नेपाली कांग्रेसका सभापति शेरबहादुर देउवादेखि माओवादी अध्यक्ष प्रचण्डसम्मले यो नीति तत्काल खारेज गर्न माग गरेका छन् । सरकारले नेपालको प्राकृतिक सम्पदाको दोहन गरेर विदेश निकासी गर्ने सरकारको नीतिले उसको राष्ट्रवाद समेत उदांगो भएको नेताहरुको प्रतिक्रिया छ ।

एमाले नेता माधव कुमार नेपालले चुरे दोहन गरि मुलुकको आधा जनसंख्यालाई भुक्षय, भोकमरी र डुवानमा पार्ने योजनासहित सरकारले यस्तो नीति ल्याएको आरोप लगाएका छन् । उनले यो निर्णय तत्काल सच्याउन समेत सरकारको ध्यानाकर्षण गराएका छन् ।

माओवादी केन्द्रका अध्यक्ष प्रचण्डले नेपालको ढुंगा, गिट्टी र वालुवा निकासी गर्ने सरकारको नीति राष्ट्र र जनविरोधी भएको बताएका छन् । जनता समाजवादी पार्टीका अध्यक्ष उपेन्द्र यादवले यो निर्णय राष्ट्रघाती भएको प्रतिक्रिया दिएका छन् ।

उता, अर्थ मन्त्रालयले आजै एक विज्ञप्ती निकाल्दै सरकार चुरेको संरक्षणमा गम्भीर रहेको भन्दै खानीबाट निकाल्ने ढुंगा, गिट्टी तथा वालुवामात्र निकासी हुने बताएको छ । यसका लागि वातावरणीय प्रभाव अध्ययन हुने भन्दै मन्त्रालयले नीतिको बचाउ समेत गरेको छ ।

काठमाडौं । शेयर बजारमा उछाल आएका छ । साताको कारोबारको चौथोदिन नेप्से ५५.७६ अकले बढेर २८२७.१३ विन्दुमा पुगेको हो ।

नेपाल स्टक एक्सचेन्जका अनुसार बुधबार २१४ कम्पनीको ११ अर्ब ३५ करोड १८ लाख १५ हजार ५५६ रुपैयाँको २ करोड २६ लाख १३ हजार २९ कित्ता शेयर किनबेच भएका छन् । अघिल्लो दिनको तुलनामा कारोबार रकम झन्डै साढे २ अर्बले बढेर सवा ११ अर्ब पुगेको छ ।

कारोबार भएका समूहमध्ये म्यूचुअल फण्ड बाहेक अन्य समूह बढेका छन् । निर्जीवन बीमा समूहको परिसूचक सबैभन्दा धेरै ४७९.१३ अंकले बढेको छ ।

आज नेपाल पुनर्बीमा कम्पनीको सर्वाधिक कारोबार भएको छ । यसको १ अर्ब ३७ करोड रुपैयाँ बढीको कारोबार भएको छ । कारोबार रकमकै आधारमा निर्धन उत्थान लघुवित्त ३३ करोड र सानिमा माइ हाइड्रोपावर ३२ करोडको कारोबार सहित शीर्ष तीन स्थानमा रहे ।

आज दुई कम्पनीको शेयरमूल्यमा १० प्रतिशत बढेको छ भने अन्य ११ कम्पनीको मुल्य पोजेटिभ सर्किट लेभलमा बढेको छ । आज शेयरमूल्यमा सर्किट लाग्ने कम्पनीहरुमा राष्ट्रिय बीमा कम्पनी, सनिमा माई हाइड्रोपावर कम्पनी रहेका छन् ।

यस्तै, मञ्जुश्री, पोखरा, समृद्धि, जानकी गुह्येश्वरी, आइसीएफसी फाइनान्स, श्री इन्भेष्टमेन्ट, लुम्बिनी विकास बैंक, नेपाल पुनर्बीमा र युनियन हाइड्रोपावरका सेयरधनीले करिब १० प्रतिशत को हाराहारीमा बढेको छ ।

त्यस्तै, आज राधी विद्युत कम्पनीका लगानीकर्ताले सर्वाधिक गुमाएका छन् भने कारोबारको आधारमा आज सबैभन्दा बढी कारोबार नेपाल पुनर्बीमा कम्पनी भएको छ ।

काठमाडौं । काठमाडौं उपत्यकामा अब केही खुकुलो प्रावधान राखेर निषेधाज्ञा भने लम्ब्याइने भएको छ । यस्तो प्रावधान २१ जेठबाट लागु हुने छ । यसबारे आज उपत्यकाका तीन वटै जिल्लाका प्रमुख जिल्ला अधिकारी बसेर निर्णय लिने छन् । अहिले अत्यावश्य वस्तुबाहेकको पसल बन्द गरिएकोमा अब खाद्यान्न बिक्री वितरण खुला हुने छ । पूर्वाधार निर्माणका काम समेत सहज बनाइने छ ।

किराना पसल र डिपार्टमेन्टल स्टोर बन्द गरिने छैन । तर, सार्वजनिक सवारी साधन भने बन्द हुनेछन् । निषेधाज्ञा भने एक साथा थप्ने तयारी छ । सरकारले प्रतिवन्ध मात्र लगाए पनि यस पटक धेरै मानिसमा परीक्षण गरेन ।

सोहीकारण उपत्यकासहितका घना वस्तीमा संक्रमण घट्न सकेको छैन । अहिले पनि दैनिक ६ हजार भन्दा बढी मानिसमा कोरोना पुष्टी भइरहेको छ । अब खुला हुने क्षेत्रमा स्वास्थ्य मापदण्ड भने पालना गर्नुपर्छ । निर्माण सामग्री रातीको समयमा ओसार्न दिने तयारी समेत छ ।

काठमाडौं । यस पटक सरकारले भारतसँग सरकारी तहबाटै रासायनिक मल खरिद गर्ने भएको छ । गत वर्ष निजी क्षेत्रलाई जिम्मा दिँदा समयमै मल आउन सकेन । सो कारण सरकारको व्यापक आलोचना भएको थियो । भारतबाट मल आउन नसकेपछि बंगलादेशबाट मगाउनु परेको थियो । सोमबार बसेको मन्त्रिपरिषद्को बैठकले भारतसँग जी टु जी सम्झौताबाट नेपाललाई चाहिने मल खरीदको प्रक्रिया अघि बढाउने निर्णय गरेको हो ।

सरकारले रासयनिक मल अभाव हुन नदिन यसै वर्ष भारतसँग सम्झौता गरेर मल ल्याउने निर्णय गरेको हो । यसले द्रुत प्रक्रियामा मल आउने अपेक्षा छ । सरकारले हरेक वर्ष करीव १० देखि १२ अर्ब रुपैयाँ मल खरीदका लागि छुट्याउने गर्छ ।

काठमाडौं । पछिल्लो समय लगातार दैनिक जस्तो नयाँ रेकर्ड बनाउँदै आएको शेयर बजार उच्च अंकको गिरावट आएको छ ।

पछिल्लो समय लगातार उकालो लाग्दै आएको बजारमा आज दोहोरो अंकको करेक्शन आएको हो । आज शेयर बजार मापक सूचक नेप्से ४५.७ अंकले घटेर २७८२.८६ विन्दुमा पुगेको छ ।

नेपाल स्टक एक्सचेन्जका अनुसार आइतबार २१८ कम्पनीको १३ अर्ब ९० करोड ९१ लाख १३ हजार २९१ रुपैयाँ बराबरको ३ करोड ८ लाख ८८ हजार ६९५ कित्ता शेयर किनबेच भएका छन् ।

आज कारोबारमा आएका १३ वटा समूहमध्ये १२ वटा समूहको परिसूचकमा हरियालीे छाएको छ भने २ समूहको सूचक राताम्मे भएको छ । निर्जीवन बीमा समूहको परिसूचक सबैभन्दा धेरै ३८०.८८ अंकले घटेको छ ।

आज राधी विद्युत् कम्पनीको सर्वाधिक कारोबार भएको छ । यसको ९० करोड ६९ लाख रुपैयाँ बढीको कारोबार भएको छ । कारोबार रकमकै आधारमा लुम्बिनी विकास बैंक ३९ करोड र एचआइडीसीएल ३२ करोडको कारोबार सहित शीर्ष तीन स्थानमा रहे ।

उच्च अंकले घटेको बजारमा पनि आज २ कम्पनीको सेयर मूल्य पोजेटिभ सर्किट लागेको छ । राधी विद्युत् कम्पनी र सेन्टर फाइनान्सका सेयरधनीले करिब १० प्रतिशत कमाएका छन् ।यस्तै, नारायणी विकास बैंकको सेयर मूल्य ७ प्रतिशतले बढेको छ ।

काठमाडौं । पछिल्लो समय लगातार दैनिक जस्तो नयाँ रेकर्ड बनाउँदै आएको शेयर बजारले आज फेरि नयाँ कीर्तिमान बनाएको छ ।

साताको कारोबारको पहिलोदिन एकैदिन सर्वाधिक कारोबार, सार्वाधिक कित्ता शेयर किनबेचको रेकर्ड बनाएको हो । नेप्से १२.५४ अकले बढेर २८२७.९३ विन्दुमा पुगेको छ ।

नेपाल स्टक एक्सचेन्जका अनुसार आइतबार २१९ कम्पनीको १७ अर्ब २ करोड ८४ लाख ३२ हजार २४४ रुपैयाँ बराबरको ४ करोड २६ लाख ३६ हजार ३८४ कित्ता शेयर किनबेच भएका छन् ।

यो कारोबार हालसम्मकै उच्च हो । यसअघि नेप्सेमा २०७७ जेठ १३ गते १४ अर्ब ७६ करोड ८८ लाख ८ हजार ४९२ रुपैयाँ करोबार भएर नयाँ रेकर्ड कायम भएको थियो ।

नेप्सेका अनुसार आज १८ कम्पनीको शेयरमूल्यमा उच्च बृद्धि भएको छ । त्यस्तै, आज बरुण हाइड्रोपावर कम्पनी र हिमालय उर्जा विकास कम्पनीका लगानीकर्ताले सर्वाधिक गुमाएका छन् भने कारोबारको आधारमा आज सबैभन्दा बढी कारोबार नेशनल हाइड्रोपावर कम्पनीको भएको छ ।

काठमाडौं । संसद विघटन गरि निर्वाचन घोषणा गरेको सरकारले लोकप्रिय कार्यक्रम ल्याएको छ । यसका लागि सरकारले चतुर्याइपूर्वक काम गरेको देखिन्छ । आलोचनाका डरले एकै पटक धेरै वृद्धि गरिएको छैन । तर, वृद्धि गर्न समेत छाडिएको छैन । सरकारले वृद्धभत्ता बढाएर मासिक ४ हजार रुपैयाँ पुर्याएको छ । यो ७० वर्ष भन्दा माथिका जेष्ठ नागरिकले प्राप्त गर्छन् ।

सरकारले सबै प्रकारका सामाजिक सुरक्षा भत्ता समेत ३३ प्रतिशत बढाउने निर्णय गरेको छ । अर्थमन्त्री विष्णु प्रसाद पौडेलको यो घोषणाबाट सरकारले एक साथ धेरै नागरिकको मन जित्न खोजेको देखिन्छ ।

यसबीचमा सरकारले कर्मचारीको तलवमा समान २ हजार रुपैयाँ मासिक वृद्धि गर्ने निर्णय गरेको छ । यो कम भएपनि सांकेतिक रुपमा सम्बोधन गरेको हो । सरकारले बजेटबाट प्रहरीको रासन भत्ता समेत १५ प्रतिशत बढाउने निर्णय गरेको छ । कर्मचारीको मनोवल बढाउन यस्तो निर्णय गरेको अर्थमन्त्री पौडेलले बताए ।

काठमाडौं । अर्थमन्त्री विष्णु पौडेलले आगामी आर्थिक वर्ष २०७८/ ७९ का लागि कुल १६ खर्ब ४७ अर्ब ५७ करोड रुपैयाँको बजेट सार्वजनिक गरेका छन्।

जसअनुसार संघको चालुगत खर्चका लागि ६ खर्ब ७८ अर्ब ६१ करोड रुपैयाँ विनियोजन हुने अनुमान छ। यो कुल बजेटको ४१. २ प्रतिशत हो।

त्यस्तै पुँजीगततर्फ ३ खर्ब ४७ अर्ब २६ करोड रुपैयाँ विनियोजन गरिएको छ। यो कुल बजेटको २२. ७ प्रतिशत हो। वित्तीय व्यवस्थापनतर्फ २ खर्ब ७ अर्ब ९७ करोड रुपैयाँ अर्थात १२.६ प्रतिशत विनियोजन गरिएको पौडेलले बताए।

काठमाडौं । सरकारले चालिस माइक्रोनभन्दा पातलो प्लाष्टिकको झोला उत्पादन तथा बिक्रीवितरण रोक लगाएको छ ।

आगामी आर्थिक वर्ष २०७८/७९ को बजेट प्रस्तुत गर्दै अर्थमन्त्री विष्णुप्रसाद पौडेलले साउन १ गतेदेखि चालिस माइक्रोनभन्दा पातलो प्लाष्टिकको झोला उत्पादन तथा बिक्रीवितरण रोक लगाउने बताए ।

पौडेलले हाल त्यस्ता प्लास्टिक उत्पादन गरिरहेका उद्योगलाई क्षमता विस्तार गरेर उद्योगको उपकरण परिवर्तन गरेमा त्यस्ता उद्योगलाई सहुलियत दिने बताए।

काठमाडौं । सरकारले चक्रपथ विस्तारमा आगामी वर्षका लागि रु. २ अर्ब ६४ करोड बजेट विनियोजन गरेको छ ।

आगामी आर्थिक वर्ष २०७८/७९ को बजेटमार्फत अर्थमन्त्री विष्णुप्रसाद पौडेलले यस्तो व्यवस्था गरेका हुन् ।

चक्रपथको एकान्तकुना, ग्वार्को र अर्को एक स्थानमा फ्लाइओभर बनाइने भएको छ । त्यस्तै कलंकी चक्रपथ सडक खण्डको विस्तारको कार्य थालिने र दुई वर्षमा सम्पन्न गरिने भएको छ ।

तीनकुने–जडिबुटी सुरुङ मार्गको निर्माण पनि आगामी आवमा थालिने पौडेलले बताए ।

काठमाडौं । सरकारले आगामी तीन वर्षभित्र याङग्री र लार्के नदीको पानी काठमाडौं ल्याउने योजना अघि सारेको छ । आगामी आर्थिक वर्ष २०७८।७९ को बजेटमार्फत सरकारले यस्तो व्यवस्था गरेको हो ।

आगामी आर्थिक वर्षको बजेट मार्फत अर्थमन्त्री विष्णु पौडेलले आगामी तीन वर्षभित्र याङग्री र लार्के नदिको ३४ करोड लिटर पानी दैनिक काठमाडौं आउने गरि कार्यक्रम तय गरिएको बताएका हुन् ।

त्यसका लागि ३ अर्ब ५१ करोड रुपैयाँ बजेट पनि विनियोजन गरिएको छ । सो आयोजनाको सुरुङ मार्ग निर्माणको काम आगामी आर्थिक वर्षभित्रै आरम्भ गरिनेछ ।
त्यस्तै, सरकारले उपत्यकाको एक लाख १० हजार घर धुरीमा मेलम्चीको पानी वितरण गर्ने योजना पनि बजेटमा समावेश गरेको छ ।

काठमाडौं । नेपालमा आगामी आर्थिक वर्ष २०७८\७९ को बजेट आज सार्वजनिक हुने भएको छ । १५ जेठमा बजेट ल्याउनै पर्ने बाध्यताका बीच संसद नभए पनि सरकारले अध्यादेशबाट बजेट ल्याउँदैछ । सरकारले ल्याउन लागेको पूर्ण बजेटको विपक्षी दलहरुले भने आलोचना गरिरहेका छन् । सरकारले चूनावी कार्यक्रम समेटेर लोकप्रिय कार्यक्रम ल्याउन सक्ने आंशका उनीहरुको छ ।

सोहीअनुसार वृद्धभत्ता बढाएर ५ हजार पुर्याउने घोषणा प्रधानमन्त्री केपी शर्मा ओलीले गरिसकेका छन् । बजेटबारे निर्णय गर्न ११ बजे मन्त्रिपरिषद् बस्दैछ । उक्त बैठकले अध्यादेश जारी गर्न राष्ट्रपति विद्यादेवि भण्डारी समक्ष सिफारिस गर्नेछ । बजेट प्रधानमन्त्री कार्यालयको हलबाट सार्वजनिक हुँदैछ ।

काठमाडौं । सरकारले आर्थिक वर्ष २०७७ /७८ को आर्थिक सर्वेक्षण सार्वजनक गरेको छ।

अर्थमन्त्री विष्णुप्रसाद पौडेलले आर्थिक सर्वेक्षण सार्वजनिक गर्दै चालु आर्थिक वर्षमा आर्थिक वृद्धिको लक्ष्य भेट्न मुस्किल भएको बताएका छन्।

विश्वव्यापी महामारीको रुपमा फैलिएको कोरोना महामारीका कारण अर्थतन्त्र कमजोर अवस्थामा पुगेको उनको भनाइ छ। अर्थमन्त्री पौडेलले आर्थिक वृद्धिदर चुनौतीपूर्ण रहेको बताएका छन्। आर्थिक वृद्धिको अनुमानलाई महामारीले समस्यातर्फ धकेलेको उनको भनाइ छ।

नेपालीको प्रतिव्यक्ति आय १ लाख १ हजार ४०८ पुग्ने अनुमान गरिएको छ । कुल राष्ट्रिय उत्पादनका नेपालीको प्रतिव्यक्ति आय ११ सय ९६ अमेरिकी डलर पुग्ने अनुमान गरिएको हो ।

अर्थमन्त्री पौडेलले आर्थिक सर्वेक्षण सार्वजनिक गर्दै प्रतिव्यक्ति आय ११ सय ९६ पुग्ने अनुमान गरेका हुन् ।

प्रतिव्यक्ती खर्चयोग्य आम्दानी ४.५ प्रतिशतले बढ्दै १४ सय ८६ डलर पुगेको बताएका छन् ।

काठमाडौं । काठमाडौं उपत्यकामा आजबाट थप एक साता निषेधाज्ञा लम्बिएको छ । सरकारले थप गरिएको निषेधाज्ञाको नियममा अझ कडाई गरेको छ । यस्तो कडाईलाई सरकारले भने विरोधका आवाज दवाउन सरकारले गरेको षडयन्त्र भनेको छ । किनकी नेपालमा संक्रमण कम हुँदै गएको सन्दर्भमा निषेधाज्ञा खुकुलो बनाउनु पर्नेमा अझ कडाई गरिएको भन्दै कांग्रेसले आपत्ति जनाएको हो ।

शुक्रबारबाट लागू भएको निषेधाज्ञामा किराना पसल खोल्न पाइने छैन । त्यावश्यक काम नपरी सडकमा हिँडडुल गर्न समेत रोक लगाइएको छ । मर्निङ वाक र इभिनिङ वाकमा निस्कने माथि समेत जरिवाना तिराउने तयारी सरकारको छ । पसलेहरुलाई एक पटक चेतावनी दिने र दोस्रो पटक पनि अटेरी गरि पसल संचालन गरेमा जरिवाना हुने भएको छ ।

किराना पसल र डिपार्टमेन्टल स्टोर बन्द भएका छन् । तर, बिहान ९ बजेसम्म दुध, फलफुल तथा मासु पसल भने संचालन हुनेछन् । औषीका पसल जुनसुकै बेला पनि खुला हुनेछन् । स्थानीय प्रशासनले खाद्य सामग्री खरिदका लागि वैकल्पिक व्यवस्था गरेको जनाएको छ । उपत्यका प्रशासनले नेपाल खाद्य व्यवस्था तथा व्यापार कम्पनी लिमिटेड र साल्ट ट्रेडिङ कर्पोरेसन लिमिटेडबाट अत्यावश्यक सामग्री मगाउन सक्ने गरी व्यवस्था गरेको हो ।

नागरिकले खाद्य सामग्री मगाए मोबाइल गाडीबाट घरमै लैजाने व्यवस्था मिलाइएको भनिएको छ । जसमा दुई कम्पनीले बिक्री गर्ने चामल, दाल, नेल, नुनलगायत सामग्री घरघरमै पुर्‍याउने व्यवस्था गरिएको हो ।

काठमाडौं । पछिल्लो समय लगातार दैनिक जस्तो नयाँ रेकर्ड बनाउँदै आएको शेयर बजारले फेरि नयाँ कीर्तिमान बनाएको छ ।

साताको कारोबारको अन्तिमदिन एकैदिन सर्वाधिक कारोबार, सार्वाधिक कित्ता शेयर किनबेचको रेकर्ड बनाएको हो ।

विहिबार नेप्से १.२० अकले घटेर २८१५.४० विन्दुमा पुगेको छ ।

नेपाल स्टक एक्सचेन्जका अनुसार विहिबार २१५ कम्पनीको १४ अर्ब ७६ करोड ८८ लाख ८ हजार ४९२ रुपैयाँ बराबरको ४ करोड १८ लाख १३ हजार ९९४ कित्ता शेयर किनबेच भएका छन् ।

यो कारोबार हालसम्मकै उच्च हो । यसअघि नेप्सेमा २०७७ जेठ १० गते सोमबार १३ अर्ब १७ करोड ५३ लाख बराबरको करोबार भएर नयाँ रेकर्ड कायम भएको थियो ।

नेप्सेका अनुसार आज २० कम्पनीको शेयरमूल्यमा उच्च बृद्धि भएको छ । आज शेयरमूल्यमा उच्च बृद्धि हुने कम्पनीहरुमा खानीखोला हाइड्रोपावर कम्पनी लिमिटेड, युनाइटेड मोदी हाइड्रोपावर, नेपाल हाइड्रो डेभलपर्श, कालिका पावर कम्पनी, रिडी हाइड्रोपावर डेभलपमेन्ट कम्पनी र जोशी हाइड्रोपावर डेभलपमेन्ट कम्पनी रहेका छन् ।

त्यस्तैगरि, आज अपि पावर कम्पनी, राधी विद्युत कम्पनी, दिव्यश्वर हाइड्रोपावर कम्पनी, शिव श्री हाइड्रोपावर कम्पनी, हिमाल दोलखा हाइड्रोपावर, सानीमामाई हाइड्रोपावर, पञ्चकन्यामाई हाइड्रोपावर, नेशनल हाइड्रोपावर कम्पनी, बुटवल पावर कम्पनी, अरुण काबेली पावर, घलेम्दी हाइड्रो लिमिटेड, युनिभर्सल पावर कम्पनी र आँखु खोला जलविद्युत कम्पनीको शेयरमूल्यमा उच्च बृद्धि आएको छ ।

त्यस्तै, आज मेरो मााइक्रोफाइनान्स वित्तिय संस्था र समता घरेलु लुवित्त वित्तिय संस्थाका लगानीकर्ताले सर्वाधिक गुमाएका छन् भने कारोबारको आधारमा आज सबैभन्दा बढी कारोबार अपि पावर कम्पनीको भएको छ ।