Category: समाचार

काठमाडौं । राष्ट्रपतिमा निर्वाचित डोनल्ड ट्रम्पले अमेरिकाको ४७ औँ राष्ट्रपतिका रूपमा औपचारिक रूपमा सोमवार शपथ लिँदैछन् । त्यसपछि उनी ह्वाइट हाउस सर्ने छन्। औपचारिक शपथ लिने कार्यक्रमका साथै साङ्गीतिक प्रदर्शनी, सेलिब्रिटीहरूको परेड र साँझमा औपचारिक बल डान्स पनि राखिएको छ ।

ट्रम्पपछि उपराष्ट्रपति जेडी भान्सले पनि शपथ लिने छन् र उनीहरूको नयाँ प्रशासनिक कार्यकाल औपचारिक रूपमा सुरु हुने छ। ट्रम्पले अमेरिकाको राष्ट्रपतिको भूमिका औपचारिक रूपमा सुरु गर्ने यस दिनका बारे थाहा पाउनुपर्ने कुराहरू यस्ता छन्। यस दिनको औपचारिक कार्यक्रमले पुरानो राष्ट्रपतिको कार्यकाल अन्त्य र नयाँ राष्ट्रपतिको प्रशासनको थालनी भएको जनाउँछ।

यो वाशिङ्टन डीसीमा सरकारका नेताहरूबीच सत्ताको हस्तान्तरण हुने सबैभन्दा माथिल्लो स्तरको समारोह हो। यो कार्यक्रमको मुख्य हिस्सामा राष्ट्रपति निर्वाचित व्यक्तिले शपथ लिँदा यो वाक्य वाचन गर्नुपर्छ, म यो कुराको गम्भीरतापूर्वक शपथ लिन्छु कि म संयुक्त राज्य अमेरिकाको राष्ट्रपतिको पदलाई निष्ठापूर्वक निर्वाह गर्ने छु र आफ्नो पूर्ण क्षमताअनुसार अमेरिकाको संविधानको संरक्षण, बचाउ र रक्षा गर्ने छु।

ट्रम्पले गत नोभेम्बरमै चुनाव जिते पनि यो माथिको वाक्य वाचन गरेपछि मात्रै उनी औपचारिक रूपमा ४७औँ राष्ट्रपति बन्ने छन्। भान्सले पनि उपराष्ट्रपतिको पद सम्हाल्नुअघि शपथ लिने छन्। शपथ लिने दिन हुने कार्यक्रममा साङ्गीतिक प्रदर्शनीहरू, भाषण, परेड र उत्सव मनाउन विशेष किसिमको नृत्य समेत हुने छ। भाषणका क्रममा ट्रम्पले आफ्नो निर्वाचन क्षेत्रलाई सम्बोधन गर्ने छन् र आउँदो चार वर्षका आफ्ना लक्ष्यहरू तय गर्ने छन्।

ट्रम्पले दोस्रो पटक गर्न लागेको शपथ कार्यक्रम वाशिङ्टन डीसीमा रहेको ऐतिहासिक सेन्ट जोन्स गिर्जाघरमा हुनेछ र त्यसपछि विशेष चियापान कार्यक्रम हुने छ। यूएस क्यापिटलको वेस्ट लनमा हुने मुख्य कार्यक्रम १४स्३० जीएमटीमा हुने छ र त्यसमा कार्यक्रमको सुरुवाती भाषण र साङ्गितीक प्रदर्शनीहरू हुने छ। त्यसपछि ट्रम्प र भान्सको शपथ र उद्घाटन भाषण हुने छ। ट्रम्प त्यसपछि सिनेट चेम्बर नजिकै रहेको कक्षमा जान्छन् र आफ्नो नयाँ प्रशासन सुरु गर्न मुख्य कागजातहरूमा हस्ताक्षर गर्छन्।

कङ्ग्रेसनल कमिटीले त्यसपछि दिउँसोको भोजनको कार्यक्रम आयोजना गर्ने छ र त्यसमा ट्रम्प पनि सहभागी हुने छन्। क्यापिटलबाट जाने परेड पेनसिल्भेनिया एभेन्यु हुँदै ह्वाइट हाउससम्म पुग्छ र त्यसपछि सुरु हुनेछ। साँझ भने ट्रम्प सहरभरि हुने तीनवटा परेडमा उपस्थित हुनेछन् । उनले ती तीनवटै कार्यक्रममा सम्बोधन गर्ने अपेक्षा गरिएको छ। यी विभिन्न कार्यक्रमहरू उपस्थित भएर हेर्नका लागि धेरै माग हुन्छ र टिकटहरूको व्यापक खोजी हुन्छ।

कङ्ग्रेसका सांसदहरूले उक्त कार्यक्रममा भाग लिन केही सङ्ख्यामा टिकटहरू प्राप्त गर्छन् जुन उनीहरूले आफ्ना क्षेत्रका मतदाताहरूलाई वितरण गर्न सक्छन्। यी टिकटहरू निःशुल्क हुन्छन् तर पाउन भने चुनौतीपूर्ण हुन्छ। अमेरिकीहरूले टिकटका लागि आफ्ना सांसदसँग प्रत्यक्ष माग गर्न सक्छन्। यदि व्यक्तिगत रूपमा उपस्थित हुन नसके टाढैबाट हेर्न सकिने थुप्रै उपायहरू छन्। ह्वाइट हाउसले कार्यक्रम प्रत्यक्ष प्रशारण गर्ने छ।

बीबीसीले आफ्नो च्यानलमा पनि प्रत्यक्ष प्रसारण गर्ने छ। तपाईँले हाम्रो वेबसाइटमा पनि हेर्न सक्नुहुन्छ र लाइभ पेजमा हामी पछिल्ला विवरणहरू, विश्लेषण र मुख्य क्षणहरू हुने बित्तिकै ताजा खबरहरू राख्नेछौँ। स्थानीय र सङ्घीय अधिकारीहरूले करिब २,००,००० मानिसहरू वाशिङ्टन डीसीमा उपस्थित हुने ठानेका छन्। त्यसरी उपस्थित हुनेमा उनका समर्थक र प्रदर्शन गर्नेहरू दुवै हुन सक्छन्।

थुप्रै अमेरिकी सिनेटर र सांसदहरू, लगायत आउँदो प्रशासनका अतिथिहरू पनि त्यहाँ उपस्थित हुने छन्। ट्रम्प, भान्स र उनीहरूका परिवार, बाहिरिँदै गरेका राष्ट्रपति र उपराष्ट्रपतिहरू उपस्थित हुने छन्। यसको अर्थ हामीले राष्ट्रपति बाइडन र उनी पत्नी जिल बाइडन अनि उपराष्ट्रपति कमला ह्यारिस र उनका श्रीमान्लाई पनि त्यहाँ देख्नेछौँ।

पूर्व राष्ट्रपतिहरू र उनीहरूका श्रीमतीहरू पनि उक्त समारोहमा प्राय उपस्थित हुने गर्छन्। यो वर्ष जर्ज र लउरा बुशले पनि उपस्थिति जनाउने ठानिएको छ मिसेल ओबामाले भने उपस्थिति नजनाउने ठानिएको छ। उक्त समारोहमा पूर्व अमेरिकन आइडल विजेता तथा गायिका केरी अन्डरवूडले अमेरिका द ब्यूटिफूल गीत गाउने कार्यक्रम तय गरिएको छ।

म मेरो देशलाई माया गर्छु र समारोहमा गाउन भनिएको कुरालाई मैले सम्मानको रूपमा लिएकी छु। यो ऐतिहासिक कार्यक्रमको म सानो हिस्सा हुन पाउनेछु, सोमवारको विज्ञप्तिमा न्डरवूडले भनिन्। अमेरिकी डिस्को समूह द भिलेज पिपलले पनि ट्रम्प उपस्थित हुने साङ्गीतिक कार्यक्रममा प्रस्तुति दिने घोषणा गरेको छ। चुनावी अभियानका बेला ट्रम्पले आफ्ना र्‍यालीहरूमा उक्त समूहका वाइएमसीए र माचो म्यान गीतहरू बजाएका थिए।

BBC nepali sewa

काठमाडौं । अमेरिकाको राष्ट्रपतिमा निर्वाचित डोनाल्ड जे ट्रम्पको राष्ट्रपतिको पदभार ग्रहण गर्ने दिन आइपुगेको छ । उनको यस कार्यक्रमको चर्चा निकै चुलिएको छ । यो समारोह ऐतिहासिक पुनरागमनको सङ्केत गर्दै भव्य रूपमा आयोजना हुने भएको अमेरिकी सञ्चारमाध्यमले लेखेका छन् । शपथग्रहण समारोह चार दिनसम्म अर्थात् शनिबार सुरु भएर मङ्गलबार सम्पन्न हुने छ ।

शपथग्रहण समारोह समितिले सो समारोहका लागि भनेर हालसम्मकै सर्वाधिक उच्च रकम अर्थात् १७ करोड अमेरिकी डलर सङ्कलन गरिसकेको छ । समारोहका लागि दस लाख डलर वा सोभन्दा बढी चन्दा दिने दाताहरू राष्ट्रपति तथा नवगठित मन्त्रीपरिषद्का सदस्यहरूसँगै चियापान तथा भोजमा सामेल हुने छन् तर पनि स्थानाभावका कारण सबै जनाले यो अवसर पाउँछन् भन्ने निश्चित भने छैन ।

राष्ट्रपतिको शपथग्रहण भने जनवरी २० तारिख सोमबार १२ बजे हुने छ तर यसअघि नै शनिबार भर्जिनियास्थित गल्फ क्लबबाट यो समारोहको औपचारिक कार्यक्रम सुरु हुने बताइएको छ । विभिन्न समाचारपत्रले दिएको जानकारी अनुसार शनिबार मन्त्रीपरिषद्को रिसेप्सन, उपराष्ट्रपतिको रात्रिभोज र आतसबाजी हुने छ । त्यसै गरी आइतबार वीरगति प्राप्त सैनिकहरूको समाधिस्थल आर्लिङ्गट्रनमा गएर उनीहरूप्रति श्रद्धा र माल्यार्पण र राष्ट्रपति ट्रम्पले विजय जुलुस र रात्रिभोजमा सरिक हुने विशिष्ट महानुभावलाई सम्बोधन गर्नुहुने कार्यक्रम छ ।

जनवरी २० तारिख बिहान राष्ट्रपति ट्रम्प सेन्ट्र जोन्स चर्चमा उपस्थित हुनेछन् । त्यसपछि वर्तमान राष्ट्रपति जो बाइडेन र नवनिर्वाचित राष्ट्रपति ट्रम्पबिच भेटघाट र सत्ता हस्तान्तरण हुने छ र १२ बजे ट्रम्पको शपथग्रहण हुने छ । त्यसपछि ट्रम्पले अमेरिकाको ४७ औँ राष्ट्रपतिका रूपमा कार्यभार सम्हाल्नेछन् । त्यसपछि ह्वाइट हाउसबाट राष्ट्रपति वाइडेन र उपराष्ट्रपति कमला ह्यारिसको बिदाइ हुने छ ।

त्यसपछि राष्ट्रपति ट्रम्पले राष्ट्र«पतिको कार्यकक्षमा राष्ट्रपतिको हैसियतले केही नियुक्ति, सीमा र अध्यागमनलाई सम्बोधन गर्न कार्यकारी शक्ति प्रयोग गर्ने भन्नेबारे केही कार्यकारी आदेश र केही महत्वपूर्ण कागजातमा हस्ताक्षर हुने जनाइएको छ । समाचारपत्रहरूका अनुसार ट्रम्पले सोही दिन २५ वटा कार्यकारी आदेशमा हस्ताक्षर गर्नेछन् । ट्रम्पले टाइटल ४२ को पुनस्र्थापना र अध्यागमन र राष्ट्रियता ऐन २८७ जीको प्रयोग गर्न सक्नेसमेत जनाइएको छ ।

सोही दिन दुवै सदनले संयुक्त रूपमा आयोजना गर्ने दिवा भोजमा राष्ट्रपतिलगायत विशिष्ट पदाधिकारी उपस्थित हुनेछन् । त्यसपछि ट्रम्पले राष्ट्रपति भवननजिकै पेन्सिल्भेनिया एभेन्युमा आयोजना हुने सैनिक कवाज र राष्ट्रपतीय परेडको अवलोकन गर्नेछन् । सोही दिन ओभल अफिसमा हस्ताक्षर समारोह हुने छ ।

सोही दिन अतिथि, विशिष्ट अतिथि, मन्त्रीपरिषद्का सदस्य, पाहुना, चन्दादातालगायत पूर्वराष्ट्रपतिहरू एवं समाजका लब्ध प्रतिष्ठित व्यक्ति सम्मिलित तीन वटा भोज आयोजना हुने छ । सो भोजमा राष्ट्रिय तथा अन्तर्राष्ट्रिय कलाकारको नाचगान, मनोरञ्जनलगायतका विभिन्न कार्यक्रम आयोजना हुने छ । शपथग्रहणको अन्तिम दिन मङ्गलबार राष्ट्रिय प्रार्थना सभा सँगसँगै कार्यक्रम अन्त्य हुने छ ।

काठमाडौं । अमेरिकाका नवनिर्वाचित राष्ट्रपति डोनाल्ड ट्रम्पले पदभार ग्रहण गरेपछि चीन भ्रमण गर्न इच्छुक रहेको आफ्ना सल्लाहकारहरुलाई बताएका छन् । ट्रम्पले आफ्नो कार्यकालको पहिलो १०० दिनमा चीन भ्रमण गर्ने इच्छा व्यक्त गरेका छन् । तर यस विषयमा अहिलेसम्म कुनै निर्णय नभएको स्रोतलाई उद्धृत गर्दै द वाल स्ट्रीट जर्नलको समाचारमा उल्लेख छ ।

ट्रम्पले सोमबार दोस्रो कार्यकालका लागि शपथ लिनेछन् । उनले पहिलो चार वर्षे कार्यकालको एक वर्ष नपुग्दै सन् २०१७ मा बेइजिङको भ्रमण गरेका थिए । चिनियाँ विदेश मन्त्रालयका प्रवक्ताले अमेरिकी पक्षको निमन्त्रणामा चिनियाँ राष्ट्रपति सी चिनफिङका विशेष प्रतिनिधि उपराष्ट्रपति हान झेङ जनवरी २० मा वासिङ्टन डीसीमा हुने ट्रम्पको उद्घाटन समारोहमा सहभागी हुने घोषणा गरेका छन् । शुक्रबार सीले ट्रम्पसँग फोनवार्ता गरेका थिए ।