Category: समाचार

काठमाडौं । अर्थमन्त्री जनार्दन शर्मा प्रभाकरले धरान उपमहानगरपालिकाको खानेपानीको समस्या समाधानका लागि आवश्यक सहयोग गर्न संघीय सरकार प्रतिबद्द रहेको बताएका छन् ।

धरान उपमहानगरपालिकाका मेयर हर्क साम्पाङ्गसंग मंगलबार अर्थ मन्त्रालयमा भएको भेटमा मन्त्री शर्माले आवश्यक प्राविधिक तयारी सकिएपछि खानेपानी आयोजना सम्पन्न गर्न आवश्यक पर्ने बजेट जुटाउन संघीय सरकारले धरान महानगरपालिकालाई सहयोग गर्ने बताएका हुन् ।

उप-महानगरका मेयर हर्क साम्पाङ्गले मंगलबार अर्थमन्त्री जनार्दन शर्मालाई भेटी खानेपानीकाे समस्या समाधानका लागि गुहारेपछि मन्त्रालयले सहयाेग गर्ने प्रतिबद्धता जनाएकाे छ ।

साम्पाङसँगकाे भेटमा अर्थमन्त्री शर्माले मन्त्रालयले प्राविधिक तयारी सकिएपछि खानेपानी आयोजना सम्पन्न गर्न आवश्यक बजेटकाे जाेहाे गर्न उप-महानगरलाई सहयोग गर्ने आश्वसन दिए ।

मन्त्री शर्माले मेयर साम्पाङ्ग र उनकाे टीमले धरानका जनताको खानेपानी समस्या समाधानका लागि गरिरहेकाे जनपरिचालनले देशभरमा राम्राे सन्देश दिएकाे बताए । ‘तपाईंले अहिले खानेपानीको समस्या समाधानका लागि गरिरहेको जनपरिचालन निक्कै उदाहरणीय छ । अरु स्थानीय सरकारले पनि यसकाे अनुशरण गर्न सक्छन्’, उनले भने ।

भेटमा मेयर साम्पाङ्गले धरानमा खानेपानीको मुख्य समस्या रहेको र यसलाई समाधान गर्न संघीय सरकारको सहयोग आवश्यक परेकाे बताए । उनले संघीय सरकार स्थानीय तहकाे अविभावक भएकाले पनि समस्या परेकाे बेलामा प्राविधिक तथा वित्तीय स्राेत जुटाउन सहयाेग गरिदिनु पर्नेमा जाेड दिए ।

काठमाडौं । पछिल्लो २४ घण्टामा नेपालमा थप ८४८ जनामा कोरोना भाइरस संक्रमण पुष्टी भएको छ।

स्वास्थ्य तथा जनसंख्या मन्त्रालयका अनुसार २७२२ जनाको पीसीआर परीक्षण गर्दा ३९९ जना र २८९७ जनाको एन्टिजेन परीक्षण गर्दा ४४९ जनामा संक्रमण देखिएको हो ।

योसँगै नेपालमा कोरोना संक्रमितको संख्या ९ लाख ९३ हजार ८५८ जना पुगेको छ ।

पछिल्लो २४ घण्टामा ५२६ जना संक्रमण मुक्त भएका छन् । यो सहित संक्रमण मुक्त हुनेको संख्या ९ लाख ७६ हजार ६०९ पुगेको छ । सक्रिय संक्रमितको संख्या ५२५९ रहेको छ ।

पछिल्लो २४ घण्टामा मृत्यु हुनेको संख्या १ रहेको छ । नेपालमा कोरोना मृत्यु हुनेको संख्या ११ हजार ९९० पुगेको छ ।

काठमाडौं । सत्तारूढ गठबन्धनका शीर्ष नेताले नागरिकतासम्बन्धी विधेयक जस्ताको त्यस्तै अघि बढाउने निर्णय गरेका छन् ।

मंगलबार प्रधानमन्त्रीको सरकारी निवास बालुवाटारमा बसेको वैठकले संसदमा छलफलका लागि पेश भएको उक्त विधेयकलाई हुबहु राष्ट्रपतिकहाँ पठाउने निर्णय गरेको हो ।

संसद्बाट बहुमतले पारित गरेर राष्ट्रपति विद्यादेवी भण्डारीसमक्ष प्रमाणीकरणका लागि पठाइएको उक्त विधेयकमा पुनर्विचार आवश्यक रहेको भन्दै प्रतिनिधिसभामै फिर्ता पठाइएको छ ।

दोस्रो पटक शीतल निवास पठाएको विधेयक राष्ट्रपतिले संसदमा फिर्ता पठाउन पाउने छैनन्।

संविधानमा राष्ट्रपतिले एक पटक मात्रै विधेयक संसद फिर्ता पठाउन सक्ने व्यवस्था छ।

काठमाडौं । प्रतिनिधिसभाको मंगलबारको बैठकले ‘सार्वजनिक ऋण व्यवस्थापन विधेयक, २०७९’ लाई बहुमतले पारित गरेको छ।

अर्थमन्त्री जनार्दन शर्माले सो विधेयक पारित गरियोस् भन्ने प्रस्ताव गरेका थिए। त्यसअघि सभामुख अग्निप्रसाद सापकोटाले अर्थ समितिको प्रतिवेदन र सार्वजनिक ऋण व्यवस्थापन विधेयक, २०७६ को विभिन्न दफालाई निर्णयार्थ प्रस्तुत गरेका थिए।

त्यसभन्दा पहिले बैठकमा प्रतिनिधिसभाका सचिव गोपालनाथ योगीले राष्ट्रपतिबाट पुनः विचारका लागि नागरिकता विधेयक सन्देशसहित फिर्ता भएकोसम्बन्धी राष्ट्रपति कार्यालयको पत्रको जानकारी गराएका थिए। यस्तै, प्रधानमन्त्री तथा मन्त्रिपरिषद्को कार्यालयबाट प्राप्त कार्यभारसम्बन्धी पत्रको जानकारी गराइएको थियो।

काठमाडौं । नेकपा माओवादी केन्द्रले वामदेव गौतम र डा. बाबुराम भट्टराईलाई माओवादीको चुनाव चिह्न ‘हँसिया हथौडा’बाट निर्वाचनमा प्रतिस्पर्धा गर्न दिने स्वीकृत गरेको छ ।

माओवादी केन्द्रको आज बसेको स्थायी कमिटीको बैठकले डा. बाबुराम भट्टराई नेतृत्वको नेपाल समाजवादी र वामदेव गौतम नेतृत्वको नेकपा एकता राष्ट्रिय अभियानलाई दलको चुनाव चिह्न दिने निर्णय गरेको हो ।

‘राष्ट्रिय एकता अभियानका वामदेव गौतम र बाबुराम भट्टराईले हाम्रो नेकपा माओवादी केन्द्रको चुनाव चिह्नबाट आगामी संसदीय चुनाव लड्ने चाहना व्यक्त गर्नुभयो। त्यसको स्वागत गर्छौ। उहाँहरूका बाँकी नेताहरूलाई पनि चुनाव चिह्नबाट लड्न स्वीकृत गरेका छौं‘, बैठकपछि माओवादी केन्द्रको प्रवक्ता कृष्णबहादुर महराले भने।

आउँदो मंसिर ४ गते हुने प्रतिनिधिसभा र प्रदेशसभा सदस्य निर्वाचनको दल दर्ताको समय आज सकिँदै छ । एकल चुनाव चिह्नका लागि दल दर्ता गर्दा नै निवेदन दिनुपर्ने भएकाले नेताहरू निर्वाचन आयोग जाँदै छन् ।

काठमाडौं । बञ्चरेडाँडा ल्यान्डफिल साइटमा फेरि फोहर फाल्न सुरु भएको छ ।

बञ्चरेडाँडामा फोहोर व्यवस्थापनमा स्थानीयले गरेको अवरोध हटाउन प्रहरीले बल प्रयोग गरेको हो ।

फोहर बोकेर गएको गाडीलाई दिउँसो त्यहाँका स्थानीयवासीले रोके पनि अहिले सुरक्षाकर्मीको उपस्थितिमा फोहर फाल्ने काम चलिरहेको छ ।

काठमाडौंबाट गएका र नुवाकोटकै गरी दुई सय जनाभन्दा धेरै सुरक्षाकर्मीले अहिले बञ्चरेडाँडा ल्यान्डफिल साइटमा सुरक्षा दिइरहेका छन् ।

दिउँसो स्थानीयवासीको अवरोध खुलाउन पुगेका प्रहरी र उनीहरूबीच सामान्य झडपसेमत भएको थियो ।

गएराति सहरी विकास मन्त्रालयले स्थानीयका सबै मागहरू कार्यान्वयनमा ल्याउन मन्त्रिपरिषद्मा पेस गर्ने निर्णय गरेसँगै भदौ १ गतेदेखि गर्ने भनिएको आन्दोलन स्थगित गरिएको थियो ।

त्यसलगत्तै आज बिहानै फोहोर बोकेका गाडी ल्यान्डफिल साइटतर्फ गएका थिए ।

तर, सत्तारूढ दलका स्थानीय नेता कार्यकर्ताहरूले आन्दोलन जारी राखेका थिए ।

काठमाडौं । पछिल्लो २४ घण्टामा नेपालमा थप ८८८ जनामा कोरोना भाइरस संक्रमण पुष्टी भएको छ।

स्वास्थ्य तथा जनसंख्या मन्त्रालयका अनुसार ३१५५ जनाको पीसीआर परीक्षण गर्दा ४२७ जना र २५८२ जनाको एन्टिजेन परीक्षण गर्दा ४६१ जनामा संक्रमण देखिएको हो ।

योसँगै नेपालमा कोरोना संक्रमितको संख्या ९ लाख ९३ हजार ४५९ जना पुगेको छ ।

पछिल्लो २४ घण्टामा ४७४ जना संक्रमण मुक्त भएका छन् । यो सहित संक्रमण मुक्त हुनेको संख्या ९ लाख ७६ हजार ८३ पुगेको छ । सक्रिय संक्रमितको संख्या ५३८७ रहेको छ ।

पछिल्लो २४ घण्टामा मृत्यु हुनेको संख्या १ रहेको छ । नेपालमा कोरोना मृत्यु हुनेको संख्या ११ हजार ९८९ पुगेको छ ।

काठमाडौं । प्रधानमन्त्री एवं कांग्रेस सभापति शेरबहादुर देउवाले मंसिर ४ गते हुने प्रदेश तथा प्रतिनिधिसभा निर्वाचनमा कांग्रेसलाई पहिलो पार्टी बनाउनेतिर जोड दिन नेताकार्यकर्तालाई आग्रह गरेका छन् ।

कांग्रेसबाट स्थानीय तहमा निर्वाचित जनप्रतिनिधिका लागि सोमबार ललितपुरको सानेपास्थित हेरिटेज गार्डेनमा आयोजित अभिमुखीकरण कार्यक्रमको उद्घाटन गर्दै उनले यस्तो बताएका हुन् ।

मैले विशिष्ट परिस्थितिमा सरकारको नेतृत्व गरेको हुँ। कोभिड नियन्त्रण गर्ने, लोकतान्त्रिक मूल्यमान्यता स्थापित गर्ने र एमसीसी अनुमोदन गर्ने जिम्मेवारी थियो। त्यो पूरा गरेको छु’ उनले भने। कांग्रेसकै नेतृत्वमा स्थानीय तह निर्वाचन सफलतापूर्वक सम्पन्न भएको देउवाले बताए।

अबको ध्यान मंसिर ४ गतेका लागि केन्द्रित भएको बताउँदै देउवाले सबैले सोहीतर्फ ध्यान केन्द्रित गर्नुपर्ने बताए। ‘अघिल्लो पटक हामीले विपक्षी गठबन्धनका कारण जित्न सकेनौं। यसपटक हाम्रो गठबन्धनको सरकार छ। हामीले गठबन्धन गरेरै जाने हो। पार्टीभित्र मजबुत एकता कायम गरेर चुनावमा जाऔं,’ देउवाले भने।

देउवाले आफूले पार्टीभित्र सहमतिमै निर्णय गरेको दाबीसमेत गरे। आगामी दिनमा पनि पार्टीमा कसैलाई काखापाखा नगरिने उनको भनाइ छ। ‘मैले पार्टीभित्र सहमतिमा निर्णय गर्ने गरेको छु। आगामी दिनमा पनि कसैलाई काखापाखा हुन दिन्नँ। कतिपय ठाउँमा गठबन्धन भएर पनि हामी हार्नुपरेको छ। स्थानीय तहले जनताको मन जित्नुपर्छ। जनताभन्दा ठूलो कोही छैन,’ उनले भने।

जनता देशका मालिक भएको देउवाको भनाइ थियो। जनताको मन जित्नेगरी काम गर्न समेत उनले पार्टीबाट निर्वाचित प्रतिनिधिलाई निर्देशन दिएका छन्।

‘२०७४ सालमा एक्लै चुनाव लड्नुपर्ने अवस्था थियो। गठबन्धनले गर्दा हामी पराजित भयौं। यसपटक गठबन्धनका कारण हामी सरकारमा छौं,’ प्रधानमन्त्री देउवाले भने, ‘स्थानीय तहको निर्वाचन गठबन्धनकै कारण राम्रो भयो।’ उनले गठबन्धन भएपछि सजिलै निर्वाचन जितिन्छ भन्ने भ्रमबाट मुक्त हुन नेताकार्यकर्तालाई आग्रह गरे।

उनले जनताभन्दा ठुलो अरु कोही नहुने नभएकाले सबैले जनभावनाअनुरूप काम गर्नुपर्नेमा जोड दिए।’जनताभन्दा ठुलो कोही छैन। जनता यो देशको मालिक हो।

त्यसैले सर्वभौमसत्ता सम्पन्न जनता भनेको हो। त्यसैले पार्टीका साथीहरुले जनताको दिल जित्नु आवश्यक छ,’ देउवाले भने, ‘यस्तो अवस्थामा मात्र जनताले कांग्रेसलाई साथ दिनेछन्। आउँदा दिनमा जनताको दिल जित्नु छ। साथीहरु सबै यस कार्यमा लाग्न आग्रह गर्दछु।’

काठमाडौं । चुनावी रणनीति बनाउन नेकपा माओवादी केन्द्रको स्थायी कमिटी बैठक आज बस्दै छ । बैठक दिउँसो १ बजे पार्टी कार्यालय पेरिसडाँडामा बस्ने छ ।
बैठकमा डा. बाबुराम भट्टराई नेतृत्वको नेपाल समाजवादी पार्टी (नेसपा)सँगको सहकार्य, आसन्न निर्वाचनको रणनीति लगायतका विषयमा छलफल हुने तयारी छ ।

डा. भट्टराईले आगामी प्रतिनिधि सभा र प्रदेश सभा निर्वाचनमा माओवादी केन्द्रको चुनाव चिह्न लिएर प्रतिस्पर्धा गर्न माओवादी अध्यक्ष पुष्पकमल दाहाल प्रचण्डसँग सहमति जनाएका छन् । सो मौखिक सहमतिलाई लिखित रुपमा औपचारिकता दिने तयारीसमेत भइरहेको छ । आज साँझसम्म लिखित सहमति गर्ने तयारीका साथ गृहकार्य भइरहेको छ ।

काठमाडौं । पछिल्लो २४ घण्टामा नेपालमा थप ४५५ जनामा कोरोना भाइरस संक्रमण पुष्टी भएको छ।

स्वास्थ्य तथा जनसंख्या मन्त्रालयका अनुसार २३०८ जनाको पीसीआर परीक्षण गर्दा ३०५ जना र २५२१ जनाको एन्टिजेन परीक्षण गर्दा १५० जनामा संक्रमण देखिएको हो ।

योसँगै नेपालमा कोरोना संक्रमितको संख्या ९ लाख ९३ हजार ३२ जना पुगेको छ ।

पछिल्लो २४ घण्टामा ३०२ जना संक्रमण मुक्त भएका छन् । यो सहित संक्रमण मुक्त हुनेको संख्या ९ लाख ७५ हजार ६०९पुगेको छ । सक्रिय संक्रमितको संख्या ५७७५ रहेको छ ।

पछिल्लो २४ घण्टामा मृत्यु हुनेको संख्या २ रहेको छ । नेपालमा कोरोना मृत्यु हुनेको संख्या ११ हजार ९८८ पुगेको छ ।

काठमाडौं । नेकपा एमालेका सचिव योगेश भट्टराईले वर्तमान सरकारको भरपरे काठमाडौंका मेयर बालेन साह असफल हुने टिप्पणी गरेका छन् ।

आइतबार प्रतिनिधि सभा बैठकको शून्य समयमा बोल्दै सांसद भट्टराईले फोहोर व्यवस्थापनको ठोस प्रस्तावसहित एमालेको मुख्यालय आउन आग्रह गरेका हुन् ।

त्यस्तै, सांसद भट्टराईले देउवा सरकारसँग फोहोर व्यवस्थापन गर्ने हुत्ती नरहेकोले ध्यानाकर्षण पनि नगर्ने बताएका छन्।

‘काठमाडौंको फोहोर १४ दिनसम्म नउठेको इतिहास थियो। यो पटक ७१ दिन भयो। प्रधानमन्त्रीले कुनै पहल गर्नु भएको छैन, सम्बन्धित मन्त्री बेखबर छन्।

काठमाडौंको फोहोरले झाडापखाला, हैजा निम्त्याएको छ,’ सांसद भट्टराईले भने, ‘यो सरकारले कुनै पहल कदमी गर्न सक्दैन। यो सरकारको हुत्ती पनी छैन। त्यसैले म यो सरकारलाई ध्यानाकार्षण पनि गर्दिनँ।’

काठमाडौं । राष्ट्रिय प्रजातन्त्र पार्टी (राप्रपा)ले विदेशमा रहेका नेपालीलाई निर्वाचनमा भाट हाल्ने गरी स्वदेश फर्कन आह्वान गरेको छ । पार्टीका अध्यक्ष राजेन्द्र लिङ्देनले विदेशमा रहेका नेपालीहरूलाई चुनावका बेला नेपाल आउन आग्रह गरेका हुन् । नेपालमा मंसिर ४ मा प्रतिनिधि सभा र प्रदेश सभा सदस्य निर्वाचन हुँदैछ। लिङ्देन झापा ३ बाट उम्मेदवार हुने तयारीमा छन् । लिङ्देनले पार्टीको केन्द्रीय प्रवास विभागको आयोजनामा शनिबार भएको कार्यक्रममा विदेशमा रहेकालाई नेपाल आउन आग्रह गरेका हुन्।

‘समसामयिक राजनीति, प्रवासको संगठन विस्तार र आसन्न निर्वाचनमा प्रवासको भूमिका’ विषयक भर्चुअल अन्तर्क्रियामा बोल्दै अध्यक्ष लिङ्देनले पार्टीका पक्षमा जनमत बढाउन आग्रह गरे । ‘प्रवासमा रहेका साथीहरूले पार्टीका पक्षमा जनमत बनाउन, सामाजिक सञ्जालको भरपूर सदुपयोग गर्न, आक्रामक ढंगबाट संगठन विस्तार गर्न, निर्वाचनको बेला संगठित रुपमै स्वदेश आउने तालिका बनाउन र प्रभावकारी रुपले चुनावी अभियानमा होमिनुपर्छ,’ प्रवास विभागका प्रमुख आनन्द अधिकारीको अध्यक्षतामा भएको अन्तर्क्रियामा लिङ्देनले भने। विभिन्न २७ देशमा रहेका पार्टी आवद्ध प्रतिनिधिहरुसँग लिङ्देनले अन्तर्क्रिया गरेका थिए ।