Category: समाचार

महोत्तरी । महोत्तरीमा मंगलबार घरबाट घाँस काट्न निस्किएका ७ जना किशोरी वेपत्ता भएका छन् । स्थानीय संचारमाध्यमहरुका अनुसार भंगहा नगरपालिका वडा नम्बर ८ स्थित धर्मपुर टोलका ७ जना किशोरी एकै पटक वेपत्ता भएका छन् । उनीहरूको उमेर १० वर्षदेखि १८ वर्षको बीचमा रहेको छ ।

परिवारलाई उदृत गर्दै संचारमाध्यमले जनाए अनुसार वेपत्ता हुनेमा ११ वर्षीया अर्चना पासवान, १२ वर्षीया सीमा पासवान, १२ वर्षीया रञ्जना पासवान, १३ वर्षीया ज्योति पासवान, १३ वर्षीया रिया पासवान, १७ वर्षीया नगीना पासवान र २० वर्षीया अस्मिता पासवान छन्।

मंगलबार ४ बजेतिर घाँस काट्न निस्केका उनीहरु राती अबेरसम्म घर नफर्केपछि परिवारले सोधखोज थालेका थिए ।

प्रहरीले खबर पाएलगत्तै खोजी थालेको बताएको छ । किशोरीहरु यसअघि पनि यसरी नै सामुहिक रुपमा घाँस काट्न जाने गरेका थिए । सधै समयमा घर आउने उनीहरु नआएपछि परिवारमा भने चिन्ता बढेको छ ।

काठमाडौं । नेकपा विभाजन गर्ने सर्वोच्च अदालतको फैसलाविरुद्ध पुनरावलोकन प्रस्ताव दर्ता गर्न सर्वोच्च अदालत पुगेका माओवादी केन्द्रका अध्यक्ष प्रचण्डले आजबाट दौडधुप बढाएका छन् । उनले आज नेपाली कांग्रेसका सभापति शेरबहादुर देउवा र जनता समाजवादी पार्टीका अध्यक्ष बाबुराम भट्टराईलाई भेटेका छन् ।

सरकारलाई दिएको समर्थन फिर्ता लिएर फाइनल लडाईको तयारी गरिरहेका प्रचण्डले त्यसमा स्पष्ट निर्णय लिन कांग्रेस सभापति देउवालाई आग्रह गरेको बताइएको छ । कांग्रेस अनिर्णित बन्दा माओवादी केन्द्रले समेत निर्णय लिन सकेको छैन । यस अवस्थामा लामो समय संक्रमण लम्ब्याउन नहुने निष्कर्षमा प्रचण्ड पुगेका छन् ।

उनी आज देउवालाई भेट्न बुढानीलकण्ठ पुगेका हुन् । भेटमा प्रचण्डले मिलेर सरकार बनाउने वा नबनाउने भन्नेबारे स्पष्ट निर्णय लिन आग्रह गरेका हुन् । देउवाले बुधबार जनता समाजवादी पार्टी (जसपा)का नेतासँग छलफलको तयारी गरेका छन् । माओवादी केन्द्रले कांग्रेसको नेतृत्व स्वीकार गर्ने यस अघि नै बताएपछि देउवा भने नेतृत्व लिन तयार देखिएका छैनन् । कांग्रेस भित्र समेत नेतृत्व लिनुपर्ने माग हावी छ । उता, जसपा भित्र भने दुई मत रहेको छ ।

काठमाडौं । नेपालमा थप १६७ जनामा कोरोना भाइरसको संक्रमण पुष्टि भएको छ ।

स्वास्थ्य तथा जनसंख्या मन्त्रालयको अनुसार विभिन्न प्रयोगशालामा ३१४० जनाको पीसीआर परीक्षण गर्दा १६७ जनामा संक्रमण पुष्टि भएको हो।

यससँगै हालसम्म संक्रमण पुष्टि हुनेको संख्या २ लाख ७७ हजार १४७ पुगेको छ। स्वास्थ्य मन्त्रालयका अनुसार ११५ जना कोरोनालाई जितेर अस्पतालबाट डिस्चार्ज भएका छन् ।

यो सँगै नेपालमा निको हुनेको संख्या २ लाख ७२ हजार ७२७ जना पुगेको मन्त्रालयले जनाएको छ । संक्रिय संक्रमितको संख्या १ हजार ३ सय ९० रहेको छ । पछिल्लो २४ घण्टामा मृत्यु हुनेको संख्या ३ जना रहेको छ । त्यो सहित नेपालमा कोरोनाबाट मृत्यु हुनेको संख्या ३०३० पुगेको छ ।

काठमाडौं । नेपालमा थप १४१ जनामा कोरोना भाइरसको संक्रमण पुष्टि भएको छ ।

स्वास्थ्य तथा जनसंख्या मन्त्रालयको अनुसार विभिन्न प्रयोगशालामा ३ हजार एक सय २२ जना गरिएको परीक्षणमा थप १४१ जनामा कोरोना संक्रमण पुष्टि भएको हो ।

यो सँगै कोरोना संक्रमितको संख्या २ लाख ७६ हजार ९ जना ८० पुगेको छ । स्वास्थ्य मन्त्रालयका अनुसार ८४ जना कोरोनालाई जितेर अस्पतालबाट डिस्चार्ज भएका छन् ।

यो सँगै नेपालमा निको हुनेको संख्या २ लाख ७२ हजार ६१२ जना पुगेको मन्त्रालयले जनाएको छ । संक्रिय संक्रमितको संख्या १३ सय ४१ रहेको छ । पछिल्लो २४ घण्टामा मृत्यु हुनेको संख्या शून्य रहेको छ ।

काठमाडौं । नेकपा एमालेका अध्यक्ष केपी शर्मा ओलीले नेता माधव नेपाल र भीम रावललाई ६ महिनाका लागि निलम्बन गरेका छन्। नेपाल र रावललाई सोधेको स्पष्टीकरण चित्तबुझ्दो नभएको भन्दै ओलीले उनीहरूलाई निलम्बन गरेका हुन् ।

प्रधानमन्त्री समेत रहेका एमाले अध्यक्ष ओलीले दुवै जनालाई पार्टीका सबै जिम्मेवारीहरू तथा पार्टी सदस्यताबाटै पार्टी विधान २०४९ को धारा ४९ ख अनुसार ६ महिनाका लागि निलम्बन जनाएका छन् ।

एमालेले पार्टी उपमहासचिव घनश्याम भुसाल र स्थायी समिति सदस्य सुरेन्द्र पाण्डेलाई पुनः स्पष्टीकरण सोध्ने निर्णय समेत गरेको छ ।

यसैबीच सच्चिएर आएमा निलम्बनको अवधि घटाउन सकिनेसमेत ओलीले पत्रमा उल्लेख गरेका छन्।

यद्यपी उनले सच्चीने मौकालाई पार्टीको कमजोरी नठान्नसमेत ओलीले चेतावनी दिएका छन्।

नेपाल र रावल कार्वाहीमा परेको पत्र पाएलगत्तै माओवादी केन्द्रका अध्यक्ष पुष्पकमल दाहाल भेट्न कोटेश्वर पुगेका थिए । उनिहरुले दुई घण्टा कोटेश्वरमा छलफल गरेका थिए ।

काठमाडौं । शिक्षा, विज्ञान तथा प्रविधि मन्त्रालयले देशभरका शिक्षण संस्था चार दिन बन्द गर्ने निर्णय गरेको छ ।

मन्त्री कृष्णगोपाल श्रेष्ठको अध्यक्षतामा मन्त्रालयमा बसेको आकस्मिक बैठकले वायु प्रदूषणबाट बालबालिकाको स्वास्थ्यमा असर नपरोस् भनेर सम्पूर्ण शिक्षण संस्था बन्द गर्ने निर्णय गरेको हो ।

निर्णय अनुसार मंगलबारदेखि शुक्रबारसम्म सबै शिक्षण संस्था बन्द गर्ने हुनेछ । केही दिनदेखि तुवाँलोको कारण काठमाडौँ लगायतका स्थानमा वायु प्रदुषण बढ्दै जाँदा यहाँको जनजीवन प्रभावित बनेको छ ।

जनस्वास्थ्यका लागि हानिकारक हुने भएकाले केही दिन स्कुल-कलेज बन्द गरेर विद्यार्थीहरुको स्वास्थलाई सुरक्षित राख्न यस्तो निर्णय गरिएको शिक्षा मन्त्रालयले जनाएको छ ।

बागलुङ । होली खेल्ने क्रममा बागलुङमा हिंसात्मक झडप भएको छ । युवाहरुको दुई समुहबीच भएको झडपमा दुई जनाको मृत्यु भएको पुष्टी प्रहरीले गरेको छ । अझै १० जना हराएका कारण हताहती बढ्न सक्ने आंशका गरिएको छ ।

जिल्लाको बडिगाड गाउँपालिका १० दर्लिङ र प्युठान जिल्लाको सिमानामा लागेको होली मेलामा युवाबीच झडप भएको नेपालको राष्ट्रिय समाचार समितिले जनाएको छ । दर्लिङको बल्देधुरीमा दुई युवा समूहबीच झडप भएको वडा नं. ९ का अध्यक्ष कृष्णबहादुर खत्रीले बताएका छन् ।

गुल्मी, बागलुङ र प्युठानको सिमाना बल्देधुरीमा होली मनाउन गएका युवाबीच झडप हुँदा दुईको मृत्यु भएको र केही युवा घाइते भएको हुनसक्ने उनले बताए । मृत्यु हुनेमा वर्ष ३६ का प्रकाश कुँवर र ३४ वर्षका दीपक दमाइ रहेका छन् ।

उनीहरुको शव बल्देधुरी भीरबाट ५०० मिटर तल खसेको अवस्थामा भेटिएको प्रहरीले जनाएको छ । घटनास्थल मानव बस्तीभन्दा केही टाढा रहेको र त्यहाँ प्रहरी तथा जनप्रतिनिधि पुग्न समय लागेकाले घटनाको विवरण आउन समय लागेको हो ।

आइतबार दिउँसो बडिगाड१० बल्देधुरीमा तीन जिल्लाका करिब ६०० जना उपस्थित भएका थिए । स्थानीयवासीका अनुसार झडपपछि बागलुङकै निसीखोला गाउँपालिका७ र बडिगाड १० का केही युवा बेपत्ता भएको आशङ्का छ ।

महोत्तरी । महोत्तरीको पिपरा गाउँपालिका, सहोर्वाका ६६ वर्षीय मुसाफिर झा र उनकी श्रीमती ६० वर्षीया गीतादेवी झाको अपहरणपछि भएको हत्याको अभियोगमा थप तीन जना पक्राउ परेका छन् । करीव एक महिनादेखि वेपत्ता झा दम्पत्तिको गत बिहीबार मात्र शव फेला परेको थियो ।

खाल्डो खनेर गाडेको अवस्थामा प्रहरीले शव फेला पारेको थियो । प्रहरीले स्थानीय तारादेवी झा र उनका दुई छोरा कैलास र विकास झालाई पक्राउ गरि सार्वजनिक गरेको छ । पक्राउ परेका कैलासको घरमा झा दम्पतीको जलेको कपडा, शव लुकाएको र जलाएको वाकस, जलेका दाउरालगायत सामग्री फेला परेको थियो।

पक्राउ परेकाका सम्बन्धमा थप अनुसन्धान भइरहेको जनाइएको छ । अहिलेसम्म भेटिएको प्रमाणका आधारमा उनीहरू झा दम्पती हत्यामा संलग्न देखिएको पुष्टी भएको प्रहरीले जनाएको छ । झा दम्पत्ति फागुन १० गते रातिदेखि वेपत्ता थिए । उनीहरुको शव पिपरा गाउँपालिका वडा नम्बर २ अतरारमा भेटिएको हो ।

प्रहरीले घटनामा संलग्न रहेको आरोपमा ४ जनालाई भने यसअघि नै पक्राउ गरि सार्वजनिक गरिसकेको छ । पक्राउ पर्नेमा पिपरा गाउँपालिका ५, सहोडवाका ५२ वर्षिय रामबाबु यादव, उनकै २६ वर्षिय छोरा सुरेन्द्र यादव, कान्छो छोरो राजेन्द्र यादव र भारत मधुवनी जिल्ला मधवापुरका हरेन्द्र ठाकुर छन् ।

काठमाडौं । आजबाट काठमाडौँ उपत्काका घरमा मेलम्चीको पानी वितरण शुरु भएको छ । पहिलो चरणमा उपत्यकाका सीमित ठाउँमा भएपनि परीक्षणका रुपमा पानी पठाउन लागिएको हो ।

काठमाडौँ उपत्यका खानेपानी लिमिटेडका अनुसार पहिलो चरणमा पुरानो महाँकाल, मीनभवन, अनामनगर र खुमलटार क्षेत्रमा पानी आउने भएको छ । यसअघि रहेका पोखरीमा पानी भरेर सोही पोखरीमार्फत पानी वितरण गर्न लागिएको हो ।

यससँगै मेलम्चीको पानी पिउने राजधानीबासीको ३ दशक लामो प्रतिक्षा समेत पुरा भएको छ । पहिलो चरणमा चार ठाउँमा गएपछि सुन्दरीजलबाट पानी दोस्रो चरणमा बालाजु पोखरीमा पठाइने भएको छ । पहिलो चरणमा दैनिक चार करोड लिटर पानी वितरण गर्ने तयारी छ ।

उपत्यकामा पाइपको अवस्था हेरेर दैनिक साढे आठ करोड लिटर पानी आउनेछ । अहिले एउटा प्रशोधन केन्द्र मात्रै परीक्षण भएकाले त्यसको क्षमताअनुसार पहिलो चरणमा साढे आठ करोडसम्म पानी आउने बताइएको छ । अर्को प्रशोधन केन्द्रको परीक्षण गरेपछि थप साढे आठ करोड लिटर पनि ल्याउन सकिने छ ।

दुवै प्रशोधन केन्द्रमा दैनिक साढे आठ करोड लिटर गरेर क्षमताअनुसार दैनिक १७ करोड लिटर पानी उपत्यकामा वितरण गर्न सकिने बताइएको छ । विसं २०५६ मा मेलम्ची खानेपानी विकास समितिको गठन भएको थियो । आयोजना निर्माणका लागि एशियाली विकास बैंकले सन् २००१ मा सम्झौता गरेको थियो ।

यस्तो छ पानी आउने तालिका

खानेपानी लिमिटेडले जारी गरेको तालिकाअनुसार राति १२ बजेदेखि २ बजेसम्म महांकालचौरमा रहेको ट्यांकी भरिने छ भने सो पानी राति २ बजेदेखि ९ बजेसम्म न्युरोड र क्षेत्रपाटी क्षेत्रमा वितरण गरिनेछ ।

यस्तै बिहान ९ बजेदेखि दिउँसो ३ बजेसम्म कुटुबहाल, सिफल, कालोपुल, मालीगाउँ र विशाल नगर क्षेत्रमा वितरण हुनेछ । मध्यान्ह १२ बजेदेखि साँझ ७ बजेसम्म भने देवकोटा सडक, बत्तीस पुतली, जय बागेश्वरी, चाबहिल क्षेत्रमा मेलम्चीको पानी आउनेछ ।

यस्तै साँझ ७ बजेदेखि ८ बजेसम्म पुनः महांकालचौरीको ट्यांकी भरिनेछ भने त्यसपछि राति ८ बजेदेखि १२ बजेसम्म मैतीदेवी, घट्टेकुलो र डिल्लीबजार क्षेत्रमा पानी आउनेछ ।

यस्तै दोस्रो दिन राति १२ बजेदेखि २ बजेसम्म महांकालचौरमा रहेको ट्यांकी भरेर २ देखि बिहान ८ बजेसम्म इनबहाल, ज्याठा, भोटाहिटी, कमलाक्षी र नक्साल क्षेत्रमा मेलम्चीको पानी आउनेछ ।

त्यसपछि फेरि ८ बजेदेखि १० बजेसम्म ट्यांकी भरेर १० देखि ४ बजेसम्म बानेश्वर, सिनामंगल, मिलनचोक र संगम चोक क्षेत्रमा पानी आउनेछ । यस्तै बिहान १० बजेदेखि ४ बजेसम्म नै जय बागेश्वरी, मित्र पार्क, चावहिल, रातोपुल, कालीमाटी डोलमा पानी आउनेछ ।

यस्तै अपरान्ह ४ बजेदेखि ५ बजेसम्म ट्यांकीमा पानी भरेर फेरि साँझ ५ देखि मध्यराति १२ बजेसम्म चारखाल, डिल्लीबजार, कमलादी, बागबजार, त्रिपुरेश्वर क्षेत्रमा पानी आउनेछ ।

पानी आउने दिनको पहिलो दिनमा आइतबार र दोस्रो दिनमा सोमबार मान्दा त्यसको एक दिन बिराएर धारमा पानी आउनेगरी तालिका बनाइएको छ ।

काठमाडौं । दिवंगत नेपाली कांग्रेसका नेता नवीन्द्रराज जोशीको आज अन्त्येष्टि भएको छ । मस्तिष्कघातका कारण उनको शुक्रबार राति नर्भिक अस्पतालमा निधन भएको हो । उनको शनिबार पशुपति आर्यघाटमा अन्त्येष्टि गरिएको हो । स्वर्गीय जोशीको पार्थिव शरीरमा दाजु राजुराज जोशी र भतिजा सौरभ जोशीले दागवत्ती दिए ।

अन्त्येष्टिपूर्व नेता जोशीको शव श्रद्धाञ्जली दिन निवास याख्याटोल र कांग्रेस केन्द्रीय कार्यालय सानेपामा राखिएको थियो । सानेपामा जोशीको पार्थिव शरीरलाई कांग्रेस सभापति शेरबहादुर देउवाले पार्टीको झण्डा ओढाए ।

उनलाई श्रद्धाञ्जली दिन सभामुख अग्निप्रसाद सापकोटा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ नेकपा एमालेका नेता एवं पूर्वप्रधानमन्त्री माधवकुमार नेपाल, अर्थमन्त्री विष्णुप्रसाद पौडेल, परराष्ट्रमन्त्री प्रदीपकुमार ज्ञवाली, एमाले नेता सुवासचन्द्र नेम्वाङ, माओवादी केन्द्रका नेता नारायणकाजी श्रेष्ठसहित शीर्ष नेतृत्व कांग्रेसको पार्टी कार्यालय सानेपामा पुगेका थिए ।

जोशीको जन्म २०१९ साल असार ३ मा काठमाडौंमा भएको हो । उनी नेपाल विद्यार्थी संघको पूर्वमहामन्त्री, काठमाडौं महानगरपालिकाको पूर्वउपमेयर, २०६४ र २०७० सालमा काठमाडौं क्षेत्र नम्बर ८ बाट संविधानसभाको निर्वाचनमा निर्वाचित सांसद थिए ।

२०७३ सालमा उद्योगमन्त्री बनेका जोशी नेपाली कांग्रेसको १२ औं र १३औं महाधिवेशनमा निर्वाचित केन्द्रीय सदस्य बनेका थिए । जोशीका श्रीमती र एक छोरी रहेको राससले जनाएको छ ।

काठमाडौं । पूर्वमन्त्री तथा कांग्रेसका केन्द्रिय सदस्य नवीन्द्रराज जोशीको निधनपछि आज नेपाली कांग्रेसले केन्द्रीय कार्यसमितिको आकस्मिक बैठक बोलाएको छ । बैठक बिहान साढे ११ बजे केन्द्रीय कार्यालय बिपी स्मृति भवन, सानेपामा बोलाइएको हो ।

शुक्रबार राति केन्द्रीय सदस्य नवीन्द्रराज जोशीको निधन भएको थियो । कांग्रेसले राति नै बैठकबारे सूचना सर्कुलर गरेको थियो । नेता जोशीको पार्थिव शरीर आज मध्याह्न १२ बजेदेखि २ बजेसम्म पार्टी केन्द्रीय कार्यालयमा राखिने भएको छ । त्यहाँ नेताहरु पुगेर उनीप्रति अन्तिम श्रद्धाञ्जली व्यक्त गर्ने भएका छन् ।

काठमाडौं । नेपाली कांग्रेसका नेता नवीन्द्रराज जोशीको शुक्रबार दुखदः निधन भएको छ । मस्तिष्कघात भएका उनको काठमाडौंको नर्भिक अस्पतालमा उपचारका क्रममा शुक्रबार राति ८ः२४ मा निधन भएको नर्भिक अस्पतालले पुष्टी गरेको छ । शुक्रबार बिहानदेखि उनको मुटुले समेत काम गर्न छाडेको अस्पतालले जनाएको छ । उपचारका सबै प्रयास जारी राखिएकै अवस्थामा उउनको निधन भएको अस्पतालको भनाई छ ।

उनलाई फागुन १४ मा घरमै स्वास्थ्य समस्या देखिएपछि जोशीलाई वीर अस्पताल लगिएको थियो । वीरले उनलाई नर्भिकमा रेफर गरेको हो । उनको भेन्टिलेटरको सहायतामा उपचार जारी थियो । पूर्वमन्त्री र पूर्वसांसद समेत हुन् । राजनीतिमा उनको छवि एक इमानदार नेताका रुपमा रहेको थियो ।

काठमाडौं । काठमाडौँमा वायु प्रदूषणका कारण स्वास्थ्य जोखिम बढेको छ । स्वास्थ्य मन्त्रालयले घरबाहिर ननिस्कन आग्रह गर्दै सचेत रहन आह्वान समेत गरेको छ । शुक्रबार विज्ञप्ति जारी गर्दै मन्त्रालयले घरबाहिर खुल्ला स्थानमा नबस्न भनेको छ । मर्निङवाकमा नजान र घर बाहिर गएर शारीरिक व्यायाम समेत नगर्न मन्त्रालयले आग्रह गरेको छ ।

मन्त्रालयले बालबालिका, दीर्घ रोगी र ज्येष्ठ नागरिकको विशेष ख्याल गर्न पनि आग्रह गरेको छ। फोहोरमैलाको उचित व्यवस्थापन गर्न र जथाभावी नजलाउन पनि मन्त्रालयले भनेको छ । घर बाहिर निस्कनै परे अनिवार्य मास्क प्रयोग गर्न समेत मन्त्रालयले आग्रह गरेको छ ।

कोभिड १९ को लागि तोकिएका जनस्वास्थ्यका मापदण्ड समेत पालना गर्न सरकारले आग्रह गरेको छ । धुलो उड्ने ‍खालका पेशा, व्‍यावसाय र निर्माण कार्यहरु केही दिनलाई रोक्‍न र अत्यावश्‍यक नभई सवारी साधन समेत नचलाउन सरकारले आग्रह गरेको छ ।

काठमाडौं । काठमाडौंं उपत्यकाको आकाशमा वायु प्रदूषण ह्वात्तै बढेको छ । शुक्रबार काठमाडौंको आकाशमा तुवालोसँगै धुवाँ भरिँदा प्रदुषण बढेको मौसम विज्ञान विभाग, मौसम पूर्वानुमान महाशाखाले जानकारी दिएको छ ।

वायुमण्डलमा धुलोसँगै धुवा पनि मिसिएका कारण आँखा पोल्ने समस्या समेत देखा परेको छ ।

देशका विभिन्न स्थानमा डढेलो लागेका कारण वायुमण्डलमा धुँवा मिसिएर तुवाँलो बनेको हुनसक्ने महाशाखाका मौसमविद् राजु प्रधानाङ्गले जानकारी दिए ।

वायु प्रदूषणका कारण काठमाडौंको हावा घातक भएकाले अत्यावश्यक बाहेकका काममा घरबाहिर ननिस्कन र मास्कको अनिवार्य प्रयोग गर्न विभागले सचेत गराएको छ ।

काठमाडौं । नेपालमा थप १५६ जनामा कोरोना भाइरसको संक्रमण पुष्टि भएको छ ।

स्वास्थ्य तथा जनसंख्या मन्त्रालयको अनुसार विभिन्न प्रयोगशालामा ४ हजार ४१६ जनाको पीसीआर परीक्षण गर्दा १५६ जनामा संक्रमण पुष्टि भएको हो।

प्रदेश १ मा ५ जना, वाग्मतीमा १०६ जना, गण्डकीमा २९ जना, लुम्बिनीमा ११ जना, कर्णालीमा दुईजना र सुदूरपश्चिममा ३ जनामा संक्रमण देखिएको छ।

यससँगै हालसम्म संक्रमण पुष्टि हुनेको संख्या २ लाख ७६ हजार ६६५ पुगेको छ।

स्वास्थ्य मन्त्रालयका अनुसार ७० जना कोरोनालाई जितेर अस्पतालबाट डिस्चार्ज भएका छन् ।

यो सँगै नेपालमा निको हुनेको संख्या २ लाख ७२ हजार ३४२ जना पुगेको मन्त्रालयले जनाएको छ । संक्रिय संक्रमितको संख्या १ हजार १ सय ९९ रहेको छ । पछिल्लो २४ घण्टामा मृत्यु हुनेको संख्या ४ जना रहेको छ । त्यो सहित नेपालमा कोरोनाबाट मृत्यु हुनेको संख्या ३०२४ पुगेको छ ।

काठमाडौं । कोरोना संक्रमण जोखिमको रोकथाम तथा नियन्त्रणका लागि सार्वजनिक यातायात क्षेत्रमा फेरि कडाइ गरिने भएको छ।

सार्वजनिक यातायात क्षेत्रमा आजैदेखि लागू हुनेगरी अनिवार्य मास्क लगाउने, सिट क्षमता अनुसार यात्रुहरु राख्ने, भौतिक दुरीलाई व्यवस्थित गर्ने निर्णय भएको प्रमुख जिल्ला अधिकारी कालीप्रसाद पराजुलीले बताए ।

त्यस्तै बसपार्कमा साबुनपानीको व्यवस्था गरी हात धुने व्यवस्था गर्ने, माइकिङ गर्ने, चनचेतना फैलाउने र अनुगमनलाई प्रभावकारी बनाउने निर्णय भएको छलफल भएको बताए ।

भारतमा कोरोनाको संक्रमण दर बढ्दै गएको र नेपालमा पनि बढ्दै जाने देखिएकाले पूर्व सावधानी अपनाउन आग्रह गरिएको छ ।

कोभिड संक्रमणको दोस्रो लहर आउनसक्ने सम्भावना देखिएपछि जिल्ला प्रशासन कार्यालय काठमाडौंले संक्रमणको रोकथाम तथा नियन्त्रणका लागि विभिन्न निकायसँग छलफल गरिरहेको छ ।

शुक्रबारको बैठकमा सार्वजनिक यातायातमा मास्क नलगाई यात्रा गर्ने यात्रुलाई कारबाही गर्ने निर्णय भएको पनि जिल्ला प्रशासन कार्यालय काठमाडौंले बताएको छ ।

काठमाडौं । प्रदेश १ मन्त्रिपरिषद्मा ४ मन्त्री र दूई राज्यमन्त्रीले सपथ लिएका छन् । सरकारका नवनियुक्त मन्त्रीहरुलाई प्रदेश प्रमुख सोमनाथ अधिकारीले शपथ गराएका हुन् । ग

मुख्यमन्त्री शेरधन राईले आर्थिक मामिला तथा योजनामन्त्री टंक आङबोहाङ र सामाजिक विकासमन्त्री उषाकला राईलाई नियुक्त गरेका छन् ।
यस्तै, भूमि व्यवस्था कृषि तथा सहकारी राज्यमन्त्री राम रानालाई मन्त्री र कृषि राज्यमन्त्री कला घलेलाई मन्त्री बनाइएको छ ।

यस्तै, भौतिक पूर्वाधार राज्यमन्त्री अम्बिरबाबु गुरुङ र वन तथा राजकुमार ओझा नियुक्त भएका छन् । ६ जनाले नै आजै सपथ लिएका हुन् ।