काठमाडौं । नेपालमा थप ३३९ जनामा कोरोना भाइरसको संक्रमण पुष्टि भएको छ ।
स्वास्थ्य तथा जनसंख्या मन्त्रालयको अनुसार विभिन्न प्रयोगशालामा गरिएको परीक्षणमा थप ३३९ जनामा कोरोना संक्रमण पुष्टि भएको हो ।
यो सँगै कोरोना संक्रमितको संख्या २ लाख ६९ हजार ७ सय ८९ पुगेको छ । स्वास्थ्य मन्त्रालयका अनुसार ४०१ जना कोरोनालाई जितेर अस्पतालबाट डिस्चार्ज भएका छन् ।
यो सँगै नेपालमा निको हुनेको संख्या २ लाख ६४ हजार ५ सय ३८ पुगेको मन्त्रालयले जनाएको छ । संक्रिय संक्रमितको संख्या ३ हजार २ सय ४० रहेको छ ।
काठमाडौं । नेपाल कम्युनिष्ट पार्टी (नेकपा) ओली पक्षले माघ २३ गते रत्नपार्कमा जनसभा गर्ने भएको छ । ओली समूहको वाग्मती प्रदेश कमिटीले पत्रकार सम्मेलन गर्दै सो जानकारी दिएको हो।
‘अराजकताको अन्त्य, भौगोलिक अखण्डता, संविधानको रक्षा गर्दै विकास र समृद्धि मार्फत राजनीतिक स्थायित्वको लागि ताजा जनादेश’ भन्ने मुल नाराका साथ रत्नपार्कमा जनसभा गर्न लागेको जनाएको छ ।
त्यस्तै, कमिटीले प्रचण्ड९माधव नेपाल समूहले अराजनीतिक क्रियाकलाप गरेको ठहर गरेको छ। पार्टी कार्यालय धुम्बाराहीमा बागमति प्रदेश संगठन कमिटीले पत्रकार सम्मेलन गरी दुई लाख जनता सहभागी गराउने बताएको छ ।
नेकपाले सकेसम्म सभास्थललाई फोहोर नबनाउन अपिल समेत गरेको छ । फोहोर भईहालेमा कार्यक्रमको समापनपछि स्वयमसेवकले त्यसलाई सफा गर्ने विज्ञप्तिमा जनाइएको छ ।
पुष्पकमल दाहाल प्रचण्ड–माधवकुमार नेपाल समूहले पनि २८ गते काठमाडौंमा वृहत विरोध प्रदर्शन लगायतका कार्यक्रम सार्वजनिक गरेको छ । संघर्ष समितिले सोमबार पत्रकार सम्मेलन गरी माघ १३ देखि २८ गतेसम्म आन्दोलनका कार्यक्रम सार्वजनिक गरेको हो ।
शक्ति प्रदर्शनमा नेकपाका दुई समूहबीच प्रतिस्पर्धा देखिएको छ । प्रधानमन्त्री ओलीले प्रचण्ड–माधव नेपाल समूहले काठमाडौंमा शुक्रबार गरेको शक्ति प्रर्दशनलाई साँघुरा गल्लीमा अलिअलि जम्मा गर्दैमा आमसभा हुँदैन भनेर व्यंग्य गरेका थिए ।
ओलीले रत्नपार्कमा ८ , १० हजार मान्छे देखेर भुइँमा खुट्टै नभएको आरोप लगाउँदै आमसभा कस्तो हुन्छ भन्ने कुरा आफूले माघ २३ गते देखाइदिने बताएका थिए । प्रचण्ड पक्षले सोमबार तेस्रो चरणको आन्दोलन घोषण गर्दै काठमाडौंमा २८ गतेको प्रदर्शनमा २५ हजार मान्छे उतार्ने बताएको छ ।
काठमाडौं । नेपाल कम्युनिष्ट पार्टी नेकपाका प्रचण्ड-नेपाल पक्षले थप आन्दोलनका कार्यक्रम घोषणा गरेका छन्।
सोमबार पेरिसडाँडामा पत्रकार सम्मेलन गर्दै प्रचण्ड-नेपाल पक्षले माघ १३ देखि २८ गतेसम्म विरोध कार्यक्रम सार्वजनिक गरेका छन्।
जसअनुसार माघ १३ गते सिठ्ठी जुलुस, माघ १४ देखि २१ गतेसम्म माइतीघर मण्डलमा धर्ना, माघ १६ गते शान्तिबाटिकामा भेला भएर लैनचौरसम्म प्रदर्शन गर्ने तयारी छ ।
त्यस्तै देशका विभिन्न सहरमा विरोध कार्यक्रम गर्न लागेको छ।
जसमा १५ गते बुटवलमा, १६ गते विराटनगर र १७ गते धनगढीमा कार्यक्रम गर्न र उक्त कार्यक्रमलाई अध्यक्षद्वयलगायतले सम्बोधन गर्ने, यस्तै माघ २२ गते काठमाडौंमा युवाहरूको वृहत र्याली गर्ने, २६ गते मसाल जुलुस गर्ने र माघ २८ मा काठमाडौंमा विरोध सभा गर्ने घोषणा गरिएको छ ।
काठमाडौं । निर्वाचन आयोगले सत्तारुढ नेपाल कम्युनिष्ट पार्टी (नेकपा)का दुई वटै समूहबाट भएका निर्णय अमान्य भएको बताएको छ । यसले नेकपा भित्र अन्यौल बढेको छ । अर्थातः अहिलेसम्म भएका कुनै पनि निर्णयबाट नेकपा विभाजन भएको छैन । आइतबार बसेको आयोगको बैठकले दुबैको दाबी नपुगेको निष्कर्ष निकालेको हो ।
दुबै समुहबाट भएका आफुखुसी निर्णयलाई अमान्य बताएसँगै अब प्रधानमन्त्री केपी शर्मा ओलीले रातारात थपेका ११ सय केन्द्रिय सदस्यको पद गएको छ । उता, अर्को खेमाबाट अध्यक्ष बनेका माधव कुमार नेपालको समेत पद मान्य भएन ।
कागजी रुपमा अहिले पनि ओली र प्रचण्ड नै नेकपाको अध्यक्ष हुनेछन् । दुबै समूहले विवरण संशोधन गर्न गरेको दाबी विधान सम्मत नदेखिएको तर्क आयोगले गरेको छ ।
संसद विघटन लगतै प्रचण्ड, माधव समूहले केपी शर्मा ओलीलाई पार्टी अध्यक्षबाट हटाएर माधवकुमार नेपाललाई अध्यक्ष बनाउने निर्णय गरेको थियो । ओली समूहले केन्द्रीय कमिटी बिस्तार गरेको हो ।
दुबै समूहले त्यही विवरणलाई बैधानिकता दिन आयोगलाई आग्रह गरेका थिए । तर आयोगले दुबै निर्णय विधान सम्वत नभएको बताएको हो ।
काठमाडौं । प्रदेश १ का मुख्यमन्त्री शेरधन राई विवाह बन्धनमा बाँधिएका छन् । उनको काठमाडौंमा आइतबार जाङ्मु शेर्पासँग विवाह भएको हो । काठमाडौंस्थित एक पार्टी प्यालेसमा भएको विवाह समारोहमा पर्यटन मन्त्री भानुभक्त ढकालसहित नेकपाका सिमित नेता र आफन्त मात्र सहभागी थिए ।
४९ वर्षिय राईले २३ वर्षकी बेहुलीसँग किराती समुदायको परम्परागत भेषभुषामा सजिएर विवाह गरेका हुन् । राई भोजपुरका हुन् । शेर्पाको घर संखुवासभा हो । काठमाडौंमा हुर्केबढेकी शेर्पाको आमाबाबु हाल अमेरिकामा बस्दै आएको बताइएको छ । उनी पेशाले मोडल हुन् । उनले मिस मंगोल २०१८ को उपाधि समेत जितेकी छन् । राई दम्पत्तिलाई आजै प्रधानमन्त्रीले भेटेर बधाई दिएका छन् ।
काठमाडौं । नेपालमा थप २७० जनामा कोरोना भाइरसको संक्रमण पुष्टि भएको छ ।
स्वास्थ्य तथा जनसंख्या मन्त्रालयको अनुसार विभिन्न प्रयोगशालामा गरिएको परीक्षणमा थप २७० जनामा कोरोना संक्रमण पुष्टि भएको हो ।
यो सँगै कोरोना संक्रमितको संख्या २ लाख ६९ हजार ४ सय ५० पुगेको छ । स्वास्थ्य मन्त्रालयका अनुसार ४०३ जना कोरोनालाई जितेर अस्पतालबाट डिस्चार्ज भएका छन् ।
यो सँगै नेपालमा निको हुनेको संख्या २ लाख ६४ हजार १ सय ३७ पुगेको मन्त्रालयले जनाएको छ । संक्रिय संक्रमितको संख्या ३ हजार ३ सय १२ रहेको छ ।
काठमाडौं । नेपालमा कोरोना भाइरसको संक्रमणबाट थप ७ जनाको मृत्यु भएको छ ।
स्वास्थ्य तथा जनसंख्या मन्त्रालयको अनुसार पछिल्लो २४ घण्टाको अवधिमा देशभर ७ जना संक्रमितको मृत्यु भएको हो ।
यो सहित कोरोनाका कारण मृत्यु हुनेको संख्या २ हजार १ पुगेको छ ।
काठमाडौ । काठमाडौ जिल्लाको उत्तर पुर्बी चुचुरोमा बिगत पाँच बर्ष अगाडि ‘झन्डा पार्क’ नामाकरण गरि ठडाइएको नेपालको झन्डा अज्ञात व्यक्तिले ढालेर क्षती पुर्याएका छन् । पार्कमा रहेको झण्डा भाच्नुको साथै वरपर मदिराका सिसी फुटाएको अवस्थमा भेटिएका छन् । फोहोर बव्यवस्थापन गर्न राखिएको डस्टविन समेत हराएको स्थानिय यज्ञडोल जगडोल युवा क्लबका अध्यक्ष सञ्जय पौडेलले जानकारी दिए ।
झन्डा पार्कमा पुगेको क्षतिबारे स्थानिय क्लबका अध्यक्ष सञ्जय पौडेल भन्छन् ‘प्रत्येक दिन हजारौ मानिस झण्डा पार्कको चुचुरो मा आउने गर्छन् ।
यस अगाडि पनि त्यहा आउने मानिसहरु मदिरा खाएर हो हल्ला गर्ने स्थानियलाई हातपात गर्ने जस्ता काम गरेपछी हामीले पटक पटक वडा अध्यक्ष लगायतका स्थानिय जन प्रतिनिधिलाई सि सि क्यामरालगायत पुर्वाधार जडान गर्न अनुरोध गरेको उहाहरुले ध्यान नै दिनु भएन ।
अहिले झण्डा नै भांच्ने काम भयो । झन्डा पार्कमा हरेक दिन हजारौको संख्यामा मानिस घुमफिरका लागि पुग्ने गर्छन् । गोकर्णस्थित प्रहरी कार्यालयका प्रहरी सहायक निरिक्षक ज्ञान कुमार कट्टेलले घटनाबारे जानकारी आए लगत्तै एक टोलि खटाएर अनुसन्धान थालिएको जानकारी दिए ।
उनले भने, ‘मैले धेरै कुरा बुझ्न त पाएको छैन, तर त्यो त्यती धेरै ठुलो कुरो होईन । हामी हेर्छौ र के गर्नु पर्ने गर्छौ ।’ झण्डा पार्क तत्कालिन कपन गाविस वडा नम्बर ७ जगडोल डाँडामा पर्छ ।
सिन्धुली । सिन्धुलीमा एक व्यक्तिले बन्चरो प्रहार गरी श्रीमतीको हत्या गरेका छन् । प्रहरीका अनुसार सिन्धुली, हरिहरपुरगढी गाउँपालिकाका १ चिसापानीका ४० वर्षीय शेर बहादुर बुजुले ३६ वर्षीया श्रीमती राममाया घलानलाई बन्चरोको पासोले टाउकोमा प्रहार गरी हत्या गरेका छन् ।
हत्यापछि उनी फरार रहेको र खोजी कार्य जारी रहेको प्रहरीले जनाएको छ । शुक्रबार श्रीमानको बन्चरो प्रहारबाट गम्भीर घाइते भएकी घलानको जिल्ला अस्पताल हेटौडा मकवानपुरमा उपचारको क्रममा शनिबार ज्यान गएको हो ।
काठमाडौं । केही दिन अगाडी प्रचण्डले नेतृत्व गरेको जनयुद्धलाई कुहिएको संज्ञा दिएका प्रधानमन्त्री केपी शर्मा ओलीले शनिबार भने जनयुद्ध र त्यसमा सहभागी भएका योद्धाको खुलेर प्रसंशा गर्न भ्याएका छन् । जनमुक्ति सेना नेपाल र बहिगर्मित बाल सेनाको नेतृत्वसँग शनिबार भेट गर्दै उनले जनयुद्धमा लडेका लडाकुको प्रसंशा गरेका हुन् ।
उनले जनयुद्धको अवधिमा गरेको योगदान, त्यागको सम्मान गर्ने बताउँदै उनीहरुका सबै माग पुरा गर्ने आश्वासन समेत दिएका छन् । राजनीतिक रुपमा समस्याको वास्तविक समाधान गर्ने र विगतमा जस्तो धोका नदिने बताएपछि पूर्व लडाकुका संगठनले ओलीलाई साथ दिने समेत भएका छन् ।
यसअघि शुक्रबारको सभामा आफ्ना लडाकुलाई प्रधानमन्त्रीले हेर्ने सम्बन्धमा कटाक्ष गरेका थिए । प्रधानमन्त्री ओलीले आन्दोलनका घाइतेहरुको उपचार खर्च व्यहोर्ने निर्णय भइसकेको बताएका थिए । सहिद परिवारलाई एक घर एक रोजगारीको आश्वासन समेत उनले दिएका छन् ।
वेपत्ताको अवस्था सार्वजनिक, संक्रमणकालीन न्यायका बाँकी काम छिटो टुंग्याउनुपर्नेलगायत मागमा पनि प्रधानमन्त्री ओली सकारात्मक देखिएको प्रधानमन्त्रीका प्रेस सल्लाहकार सूर्य थापाले जानकारी गराएका छन् ।
काठमाडौं । नेकपा प्रचण्ड–माधव समूहको स्थायी कमिटी बैठक आजका लागि बोलाइएको छ । सरकारले ५ पुसमा संसद विघटन गरेपछि प्रधानमन्त्री केपी शर्मा ओलीसँग अलग भएको यो समुहले शुक्रबार काठमाडौंमा विशाल सभा आयोजना गरेको थियो । त्यसपछि आगामी कार्यक्रम तय गर्न आजको बैठक बोलाइएको हो ।
यसबीचमा नेताहरुले जनता समाजवादी पार्टी र नेपाली कांग्रेसका नेताहरुसँग समेत भेट गरिसकेका छन् । प्रचण्ड र माधव कुमार नेपाल समुह संयुक्त आन्दोलनमा जाने र त्यसका लागि सर्वदलीय मोर्चा बनाउनु पर्ने पक्षमा छन् । अन्य पार्टीमा भने दई धार रहेको छ । एउटा धार निर्वाचनमा जाने रहेको छ भने अर्को धार आन्दोलनको पक्षमा देखिएको छ ।
आइतबार साढे १२ बजे बैठक भएको छ । यसअघि शनिबार समेत उपलब्ध स्थायी कमिटी सदस्यबीचमा केन्द्रीय कार्यालय पेरिसडाँडामा पार्टीको ९ गतेको विरोध सभाको समीक्षा र आगामी कार्यक्रमबारे छलफल भएको थियो ।
आइतबार थप एजेण्डासहित स्थायी कमिटीको औपचारिक बैठक बस्ने भएको हो । आजको बैठकमा प्रधानमन्त्री केपी शर्मा ओलीलाई सोधिएको तीन दिने स्पष्टीकरण, पार्टीको महासचिव चयन, प्रदेश सरकारको अवस्था लगायतका विषयमा पनि छलफल हुने भएको छ ।
सिन्धुपाल्चोक । गृहजिल्ला सिन्धुपाल्चोक पुगेका युवा तथा खेलकुदमन्त्री दावा तामाङलाई स्थानीयले अवरोध गरेका छन् । उनलाई चार घण्टासम्म स्थानीयले कालो झण्डा देखाउँदै बाटो अवरुद्ध गरी विरोध गरेका हुन् ।
प्रधानमन्त्री केपी शर्मा ओलीले संसद विघटन गरेपछि बिस्तार गरेको मन्त्रिपरिषद् बिस्तारमा उनी मन्त्री बनेका थिए । तामाङ कार्यकर्ता भेलालाई सम्बोधन गर्न भन्दै गृहजिल्ला सिन्धुपाल्चोक पुगेका थिए ।
प्रहरीका अनुसार इन्द्रावती गाउँपालिका ४ टाकुरेमा स्थानीयले बीच बाटोमै रुख ढालेर कालो झण्डा देखाइएको थियो । स्थानीयको अवरोध पछि मन्त्री तामाङ ४ घण्टासम्म मेलम्ची बजारमा रोकिएका थिए।
प्रहरीले स्थानीयले ढालेका रुख पन्छाउने तथा नाराबाजी गरिरहेका स्थानीयलाई लखेटेपछि मात्र मन्त्री कार्यक्रमस्थल पुग्न पाएका हुन् ।
गृह जिल्ला सिन्धुपाल्चोकमा नेकपा अध्यक्षद्धय पुष्पकमल दाहाल प्रचण्ड र माधवकुमार नेपालको पकड रहेको तर उनले प्रधानमन्त्रीलाई साथ दिँदै मन्त्री खान पुगेपछि उनको क्षेत्रमै व्यापक असन्तुष्टी रहेको छ । त्यसो त उनी निर्वाचनमा प्रदेश सांसदमै पराजित अनुहार हुन् ।
काठमाडौं । नेपालमा थप २३२ जनामा कोरोना भाइरसको संक्रमण पुष्टि भएको छ। स्वास्थ्य तथा जनसंख्या मन्त्रालयले सार्वजनिक गरेको विवरण अनुसार पछिल्लो २४ घण्टामा ३ हजार ५ सय ४१ जनामा पिसिआर गरिएको थियो । जसबाट २३२ जनामा कोरोना पुष्टि भएको छ । मन्त्रालयका अनुसार अहिले सम्म संक्रमित हुनेको कुल संख्या दुई लाख ६९ हजार १८० पुगेको छ।
पछिल्लो २४ घण्टामा ३८६ जना निको भएर फर्किएका छन्। योसहित कोरोनाबाट निको हुनेको कुल संख्या दुई लाख ६३ हजार ७३४ पुगेको छ। नेपालमा संक्रमणबाट थप ८ जनाको मृत्यु भएको छ । यससँगै नेपालमा कोरोनाबाट ज्यान गुमाउनेको संखया १ हजार ९९४ पुगेको छ।
काठमाडौं । आजबाट नेपालमा शहीद सप्ताह शुरु भएको छ । प्रजातन्त्र स्थापना एवम् पुनःस्थापना तथा नागरिक स्वतन्त्रताका लागि जीवन आहुति दिने शहीदलाई सम्झना गर्दै शहीद सप्ताह मनाउने गरिन्छ ।
सप्ताहको आज पहिलो दिन आज शुक्रराज शास्त्रीलाई फाँसी दिइएको टेकु खरिबोटमा श्रद्धाञ्जलीसभा आयोजना हुने भएको छ । १३ गते बिहान आठ बजे सिफलमा धर्मभक्त माथेमा फाँसी दिइएको स्थान र १५ गते बिहान आठ बजे गङ्गालाल श्रेष्ठ र दशरथ चन्दलाई गोली हानिएको स्थान शोभा भगवतीमा श्रद्धाञ्जलीसभा आयोजना गरिने भएको छ ।
काठमाण्डौ महानगरपालिकाका अनुसार अन्तिम दिन माघ १६ मा शान्तिबाटिकामा भेला भएर नेपाल प्रहरी र सशस्त्र प्रहरीको ब्यान्ड, मार्चपास र शहीदहरुको तस्बिर राखिएको बग्गीसहितको प्रभातफेरी शहीद उद्यान लैनचौरमा पुगेर श्रद्धाञ्जलीसभामा परिणत गरिने भएको छ ।
उक्त दिन लैनचौरमा प्रधानमन्त्री केपी शर्मा ओली, मन्त्री, सरकारका उच्चपदस्थ अधिकारी, जनप्रतिनिधिलगायत सहभागी हुने बताइएको छ । २०१२ सालदेखि काठमाडौं नगरको संयोजकत्वमा शहीद सप्ताह मनाउन शुरु गरिएको हो ।
प्रजातन्त्रको लडाईमा तत्कालिन राणा शासकले १९९७ साल माघ १० गते शुक्रराज शास्त्रीलाई टेकुमा, माघ १३ मा धर्मभक्त माथेमालाई सिफलमा र माघ १५ मा गङ्गालाल श्रेष्ठ र दशरथ चन्दलाई शोभाभगवतीमा मृत्युदण्ड दिएका हुन् ।
नवलपुर । नवलपुर (बर्दघाट सुस्तापूर्व) को कावासोतीमा मोटरसाइकल दुर्घटनामा परी दुई जनाको मृत्यु भएको छ । कावासोती नगरपालिका वडा नम्बर ८ मा भित्री सडकमा गएराति भएको दुर्घटनामा दुई जनाको मृत्यु भएको प्रहरीले जनाएको छ ।
मोटरसाइकल दुर्घटनामा कावासोती नगरपालिका वडा नम्बर ३, बस्ने २४ वर्षीय हेमराज थापा र कावासोती ८, बस्ने २६ वर्षीय सुनिल जैसवालको मृत्यु भएको जिल्ला प्रहरी कार्यालय नवलपरासी पूर्व नवलपुरले जनाएको छ । मोटरसाइकल अनियन्त्रित भई सालको रुखमा ठक्कर खाएको बताइएको छ ।
काठमाडौं । शुक्रबार नेकपाको शक्ति प्रदर्शन लगत्तै अध्यक्ष प्रचण्ड र जनता समाजवादी पार्टीका नेता बाबुराम भट्टराईबीच भेटवार्ता भएको छ । यो भेटवार्तामा उपराष्ट्रपति नन्दबहादुर पुनले सहजिकरण गरेका छन् । तीन नेताबीच उपराष्ट्रपति निवास लैनचौरमा करीव एक घण्टा भेटवार्ता भएको हो ।
भेटमा सरकारको कदमाट उत्पन्न भएको राजनीतिक परिस्थिति र अब लिने रणनीतिबारे छलफल भएको बताइएको छ । यद्दपी नेताहरुल भेटबारे औपचारिक विषय भने सार्वजनिक गरेका छैनन् ।
तीन नेता अहिले फरक फरक मोर्चामा भएपनि विगतका सहयात्री हुन् । सोहीकारण असहज परिस्थितिमा उनीहरुबीचको एकताले मुलुकलाई समेत पार लगउने काम विगतमा भएका थिए । प्रचण्ड जनयुद्वका नेतृत्वकर्ता हुन् ।
बाबुराम भट्टराईको व्यक्तित्वले जनयुद्धलाई उचाईमा पुर्याउने काम गरेको थियो । जनयुद्धमा कुशल सैन्य नेतृत्व भने नन्दबहादुर पुनले गरेका थिए । शुक्रबारको भेटलाई अर्थपूर्ण रुपमा हेरिएको छ ।
केपी ओलीले आफ्नो सत्ता बचाउन अझै प्रतिगामी र असंवैधानिक कदम लिन सक्ने आंशका भइरहेका समयमा शीर्ष नेताहरुबीच भेटवार्ता भएको हो । सरकारले अहिले आफु माथि देखाउन कीर्ते काम गरिरहेको छ ।
यसअघि संसद विघटनको निर्णय राजपत्रमा नभएको विषय अदालतमा उठेपछि रातारात छाप्दै सरकारले अर्को कीर्ते काम गरेको खुलासा भएको छ ।
काठमाडौं । आज काठमाडौंको ट्राफिक दिनभरजसो अस्तव्यस्त रह्यो । मानिसहरुले सास्ती भोगे । तर, सरकारको असंवैधानिक कदमका विरुद्धमा देखिएको जनलहरले भने प्रचण्ड नेपाल समुहको नेकपाका नेताहरु भने उत्साहित थिए ।
किनकी प्रतिनिधिसभा विघटनविरुद्ध नेकपा प्रचण्ड माधव समूहले काठमाडौंमा आह्वान गरेको शक्ति प्रदर्शनमा सम्भवतः जनआन्दोलनको सफलताताकाकै झल्को दिने गरी मानिस उपस्थित भए । त्यसो त नेकपाले काठमाडौं आसपासका जिल्लाबाट मानिसहरुलाई गाडीमा राखेर समेत ल्याएको थियो ।
तर, काठमाडौंमा अपेक्षित मानिस उतार्दै नेकपाले प्रधानमन्त्रीको ढोकामा भने ढकढकाउने काम गरेको छ । सभालाई सम्बोधन गर्दै प्रचण्ड र माधव कुमार नेपाल दुबैले आजको उपस्थिति जनताको तागत भएको उल्लेख गरे । अध्यक्ष माधवकुमार नेपालले यस उपस्थितिलाई जनआन्दोलनको संज्ञा दिन भ्याए ।
उनले यसलाई कास्टिङ मात्र भएको समेत उल्लेख गरे । अर्का अध्यक्ष पुष्पकमल दाहाल प्रचण्डले आफूले दोस्रो जनआन्दोलनपछि यताकै विशाल प्रदर्शन देखेको उल्लेख गरे । यस्तो आन्दोलन पछिल्लो १२, १४ वर्षयताकै ठूलो भएको उनको भनाई छ ।
आजको सभाका लागि काठमाडौंमा विभिन्न स्थानबाट जुलुस निकालिएको थियो । जुलुसलाई शीर्ष नेताले नेतृत्व गरेका थिए । धेरै मानिस भएका कारण जुलुस कै जाम भएको थियो ।
पुतलीसडक, भद्रकाली, सहिदगेट, सुन्धारा हुँदै भृकुटीमण्डपमा पुग्ने तय भएको जुलुस अन्ततः जामका कारण मानिस जहाँ थिए, त्यही बस्नु पर्ने अवस्था आएको थियो । त्यसपछि भृकुटीमण्डप अगाडी टुडीखेलको पर्खालसँगै विशाल मञ्च बनाएर सभा सम्पन्न भएको छ ।
नेपालमा थप ३०२ जनामा मा कोरोना संक्रमण, ४८० निको भए, ७ को मृत्यु
काठमाडौं । नेपालमा पछिल्लो २४ घण्टामा थप ३०२ जनामा कोरोना संक्रमण पुष्टि भएको छ।
शुक्रबार स्वास्थ्य तथा जनसंख्या मन्त्रालयले दिएको जानकारी अनुसार ३ हजार ५४५ पीसीआर परीक्षण गर्दा ३०२ जनामा कोरोना पुष्टि भएको हो।
योसँगै नेपालमा कोरोना संक्रमितको संख्या २ लाख ६८ हजार ९४८ पुगेको छ भने आज सक्रिय संक्रमितको संख्या ३ हजार ६१४ रहेको छ।
त्यस्तै पछिल्लो २४ घण्टामा ४८० जना कोरोना संक्रमित निको भएका छन्। योसँगै निको हुनेको संख्या २ लाख ६३ हजार ३४८ पुगेको छ।
त्यस्तै पछिल्लो २४ घण्टामा ७ कोरोना संक्रमितको निधन भएसँगै अहिलेसम्म निधन हुनेको संख्या १ हजार ९८६ पुगेको छ।
कुन जिल्लामा कति थपिए
प्रदेश १ को इलाममा १, झापामा १, भोजपुरमा २ र मोरङमा ३ जनामा कोरोना पुष्टि भएको छ। प्रदेश २ को पर्सामा १, बारामा ३ र सिरहामा ३ जनामा कोरोना भेटिएको छ।
बागमती प्रदेशको काठमाडौंमा मात्र ९० जनामा कोरोना पुष्टि भएको छ। काभ्रेमा १, चितवनमा ४२, धादिङमा १, नुवाकोटमा २, भक्तपुरमा ९, मकवानपुरमा ४, रामेछापमा १, ललितपुरमा १३ र सिन्धुपाल्चोकमा ३ जनामा कोरोना भेटिएको मन्त्रालयले जनाएको छ।
गत २४ घण्टामा गरिएको परीक्षणमा गण्डकी प्रदेशको कास्कीमा ४४, गोरखामा १, तनहुँमा २, नवलपरासीमा पूर्वमा ८, पर्वतमा ५, म्याग्दीमा २, लमजुङमा २ र वागलुङमा ४ जनामा कोरोना पुष्टि भएको छ।
लुम्बिनी प्रदेशको कपिलवस्तुमा १, गुल्मीमा ३, दाङमा १, पाल्पामा २, प्यूठानमा १, बाँकेमा १८ र रुपन्देहीमा १० जनामा कोरोना पाइएको छ।
गत २४ घण्टामा कर्णाली प्रदेशको डोल्पा र सुर्खेतमा १÷१ जनामा कोरोना भेटिएको छ। सुदूरपश्चिम प्रदेशको कञ्चनपुरमा १५ जनामा मात्र कोरोना भेटिएको मन्त्रालयले जनाएको छ।
काठमाडौं । नेपाल कम्युनिष्ट पार्टी (नेकपा) प्रचण्ड–माधव समूहका अध्यक्ष पुष्पकमल दाहाल प्रचण्डले तीन वर्षमा पनि प्रधानमन्त्री केपी शर्मा ओलीलाई सुधार्न नसकिएको बताएका छन् ।
शुक्रबार काठमाडौंमा भएको प्रर्दशनपछि सभालाई सम्बोधन गर्दै अध्यक्ष प्रचण्डले प्रधानमन्त्री अोलीलाई सम्झाई–बुझाई गर्दा पनि उनको प्रवृत्तिलाई ठिक गर्न सकिएको बताएका छन् ।
‘सत्ता प्राप्तपछि सहमतिअनुसार एउटा पनि काम नगर्ने लक्षण देखिएको थियो । हामीले त्यसका विरुद्ध बहस गरेका थियौ । आज के भन्न चाहन्छु भने हामीले यो तीन वर्षमा केपीलाई तह लगाउन सकेनौं । केपीलाई सम्झाई–बुझाई गरेर उदारतापूर्व उहाँका कतिपय कुरा मान्दा देश अगाडि जाने हो कि भनेर सोच्यौं । त्यो तरिकाले केपी ओली प्रवृत्तिलाई ठिक गर्न सकिने रहेनछ’, उनले भने ।
उनले जनयुद्ध र जनआन्दोलनमार्फत गौरवपूर्ण परिवर्तन हासिल गरेको बताउँदै राजा महाराजाको श्रीपेच झिकेर लात्तले हान्न सके पनि देशलाई प्रगतितर्फ लैजाने सपना तीन वर्षमा पुुरा गर्न नसकेको बताएका छन् ।
‘हामीले जनयुद्ध र जनआन्दोलनमार्फत गौरवपूर्ण परिवर्तन हासिल गरेका थियौं । राजा महाराजाको श्रीपेच झिकेर लात्तले हान्न सक्छन् भन्ने प्रमाणित गरेका थियौं । तर देशलाई प्रगतितर्फ लैजाने सपना तीन वर्षमा पुुरा गर्न सकेनौं,’ उनले भने, ‘सुरुदेखि केपीको गलत प्रवृत्तिका विरुद्ध संघर्ष गर्नुपथ्र्यो, सकिएन । म आज आत्मालोचित हुन चाहन्छु । तर हाम्रो कमजोरीलाई, उदारतालाई कमजोरी ठान्ने जुन दुस्साहस उनले गरे, त्यसले हामी तपाईहरुको अगाडि आउन वाध्य भयौं ।’
उनले प्रधानमन्त्री अोलीले गरेको संसद विघटनका विरुद्धमा जनता जागेको बताएका छन् । उनले प्रतिगमनविरुद्ध सबै जनता खडा भइसकेको बताए ।
‘संसद विघटनविरुद्ध अब जनता जागिसके, सुत्नेवाला छैनन् । प्रतिगमनविरूद्ध सबै जनता खडा भइसकेका छन्,’ उनले भने ।
काठमाडौं । बैंकिंग क्षेत्रमा सरकारी जागिर खाने गरी अध्ययन गरिरहेका विद्यार्थीलाई खुसीको खबर छ । आज कृषि विकास बैंक लिमिटेडले खुला तथा समावेशी प्रतियोगितात्मक परीक्षाबाट पदपूर्ति गर्ने गरी एक साथ ३२६ जनाका लागि जागिर खुलाएको छ ।
बैंकले वरिष्ठ शाखा प्रमुख, शाखा प्रमुख, वरिष्ठ लेखा अधिकृत, वरिष्ठ ईञ्जिनियरसहितका पदमा अधिकृत र विभिन्न पदमा सहायक पदमा कर्मचारी भर्ना गर्न लागेको हो । आज प्रकाशित दरखास्त आह्वान अनुसार परिक्षार्थीले अनलाइनबाट समेत दरखास्त दिन सक्ने भएका छन् । माघ ९ गतेदेखि २९ गतेसम्म दरखास्त दिन सकिने गरी आह्वान गरिएको छ ।
काठमाडौं । सप्तरी र तनहुँमा भएका दुई छुट्टाछुट्टै सवारी दुर्घटनामा दुई जनाको मृत्यु भएको छ । पाँच जना घाइते छन् । प्रहरीका अनुसार सप्तरी, कञ्चनरूप नगरपालिकामा–११ ठेलिया टोलको नहरस्थित भित्री सडकखण्डमा प्रदेश–०२–०१–००१ त ००३२ नम्बरको ट्याक्टर दुर्घटनामा स्थानीय १८ वर्षीय रामआशिष रामको ज्यान गएको छ ।
दुर्घटना बिहीबार साँझ भएको हो । ट्याक्टरमा सवार स्थानीय १६ वर्षीय कृष्ण साह, ट्याक्टर चालक १७ वर्षीय विशाल राम, १७ वर्षीय सुनिलकुमार राम र अग्निसाइर कृष्णसवरण गाउँपालिका–२ मटिगढाका २१ वर्षीय मदन साह घाइते छन् ।
उनीहरुको सप्तरी, रूपनीस्थित युनिक अस्पतालमा उपचार जारी छ । यता, तनहुँको आँबुखैरेनी गाउँपालिका–२ ल्युतपाखामा ग १ त ३७७० नम्बरको ट्याक्टर दुर्घटनामा एक जनाको ज्यान गएको छ ।
छिम्केश्वरीबाट आँबुखैरेनीतर्फ आउँदै गरेको ट्याक्टर अनियन्त्रित भई पल्टिँदा ट्याक्टरमा सवार आँबुखैरेनी गाउँपालिका–२ अदुवाखर्कका ३६ वर्षीय केशव दर्लामीको ज्यान गएको हो । दुर्घटनामा आँबुखैरेनी गाउँपालिका–३ का लीलाबहादुर यादी घाइते रहेको प्रहरीले जनाएको छ ।
काठमाडौं । सवारी लाइसेन्स लिनका लागि आवेदनमा रहेको कोटा प्रणाली हटेको छ । अब दैनिक जति पनि संख्यामा आवेदन स्वीकार गरिने भएको छ । यसअघि अधिकतम ५ हजारको संख्यामा मात्र आवेदन लिने गरिएको थियो । यातायात व्यवस्था विभागले लाइसेन्सको अनलाइन आवेदन दिन समेत सास्ती भएपछि कोटा प्रणाली हटाएको बताएको छ ।
प्रणालीमा सुधार गरि यस्तो व्यवस्थापन मिलाइएको विभागको भनाई छ । यसअघि हरेक दिन लाइसेन्स वितरण गर्ने कार्यालयहरुले आफ्नो क्षमताअनुसार निश्चित कोटा तोक्ने गरेका थिए । त्यसअनुसार अनलाइन फारम भर्न मिल्ने व्यवस्था गरिएको थियो ।
अनलाइन आवेदनको प्रणाली खुल्नासाथ एकैपटक हजारौं सेवाग्राहीले यातायात व्यवस्था विभागको वेबसाइट खोल्दा प्रणालीमा समस्या भई नखुल्ने र काम नै नहुने अवस्था थियो । अहिले पनि नेपालमा लाखौं सवारी चालक लाइसेन्सको प्रक्रियामा छन् । अहिले सहजै सवारी उपलब्ध हुने तर लाइसेन्स लिन कडा परीक्षा पास गर्नुपर्ने अवस्था रहेको छ ।
काठमाडौं । संसद विघटनको विरुद्धमा नेकपा (प्रचण्ड–माधव) समूहले आज काठमाडौंमा शक्ति प्रदर्शन गर्ने कार्यक्रम छ । काठमाडौंमा एक लाखभन्दा बढी कार्यकर्ता उतारेर शक्ति प्रदर्शनको तयारी भइरहेको नेताहरुले बताएका छन् । सरकारको सिफारिसमा ५ पुसमा राष्ट्रपति विद्यादेवी भण्डारीले संसद विघटन गरेकी छिन् ।
प्रचण्ड–माधव समूहले शुक्रबार बिहान ११ बजे काठमाडौं र ललितपुरका बिभिन्न ९ स्थानबाट जुलुस निकाल्ने कार्यक्रम छ । पौने ११ बजे आ–आफ्नो आर्कमा जम्मा भइसक्न आयोजक कमिटीले नेता तथा कार्यकर्तालाई निर्देशन दिएको छ ।
माइतीघर, डिल्लीबजार, लैनचौर, त्रिपुरेश्वर, कुपण्डोल, प्रदर्शनीमार्ग, त्रिचन्द्र कलेज, शान्तिबाटिका लगायतका स्थानबाट जुलुस निस्किने भएको छ । उच्च तहका नेताले जुलुसको नेतृत्व गर्ने भएका छन् ।
बिभिन्न स्थानबाट निस्किने जुलुस रत्नपार्कमा जम्मा भइ मूल जुलुसमा परिणत हुनेछ । सो मूल जुलुस रत्नपार्क, बागबजार, पुतलीसडक, प्रदर्शनीमार्ग, भद्रकाली, सहिदगेट, सुन्धारा, भोटाहिटी, पुरानो बसपार्क हुँदै भृकुटीमण्डपमा पुगेर सभामा परिणत हुने भएको छ ।
जुलुसमा सहभागीहरुलाई पार्टीले तोकेका नारामात्र लगाउन निर्देशन दिइएको छ । यसअघि केही अराजक नारा लागेपछि त्यसको आलोचना भएको थियो । सभालाई शीर्ष नेताहरुले सम्बोधन गर्नेछन् ।
काठमाडौं । प्रतिनिधिसभा विघटनविरुद्धको रिटमाथिको सुनुवाई बिहीबार ‘हेर्दाहेर्दै’ मा टुंगिएको छ ।
रिटका सम्बन्धमा शुक्रबार पुनः सुनुवाइ हुनेछ । बिहीबार रिट निवेदक समृत खरेल, सुलभ खरेल, ज्ञानेन्द्रराज आरणले बहस गरेका थिए ।
यसैगरी वरिष्ठ अधिवक्ता प्रा। गुणनिधि न्यौपाने, अधिवक्ता ठगेन्द्र गिरी, ओमप्रकाश अर्यालले पनि बिहीबार बहस गरेका थिए ।
संसद विघटनविरुद्ध सर्वोच्चमा परेको १३ वटा रिटमाथिको सुनुवाई जारी छ ।सर्वोच्च अदालतले संसद विघटनबारे राजपत्रमा प्रकाशित सूचना माग गरेको छ ।
बिहीबार भएको बहसका क्रममा अधिवक्ता ओमप्रकाश अर्याल र टीकाराम भट्टराईले संसद विघटन गरेपछि राजपत्रमा प्रकाशित भएको आफूले थाहा नपाएको बताएपछि प्रधानन्यायाधीश चोलेन्द्र शमशेर जबराले संसद विघटनबारे राजपत्रमा प्रकाशित सूचना माग गरेका हुन् ।
काठमाडौं । नेपालमा थप ३३६ जनामा कोरोना भाइरसको संक्रमण पुष्टि भएको छ।
स्वास्थ्य तथा जनसंख्या मन्त्रालयको अनुसार विभिन्न प्रयोगशालामा गरिएको परीक्षणमा थप ३३६ जनामा कोरोना संक्रमण पुष्टि भएको हो ।
योसँगै कोरोना संक्रमितको संख्या २ लाख ६८ हजार ६ सय ४६ पुगेको छ । स्वास्थ्य मन्त्रालयका अनुसार २२६ जना कोरोनालाई जितेर अस्पतालबाट डिस्चार्ज भएका छन् ।
यो सँगै नेपालमा निको हुनेको संख्या २ लाख ६२ हजार ८ सय ६८ पुगेको मन्त्रालयले जनाएको छ। जसमध्ये ३ हजार ७ जना ९९ सक्रिय संक्रमित छन्।
काठमाडौं । नेपाल कम्युनिस्ट पार्टी (नेकपा) केपी ओली समूहका महासचिव विष्णु पौडेलले सरकारले निर्वाचनका लागि आवश्यक पर्ने बजेटको व्यवस्था गर्न तयार रहेको बताएका छन् ।
बिहीबार ओली निकट प्रेस संगठन नेपालको भेलालाई सम्बोधन गर्दै निर्वाचन आयोग, सुरक्षा निकाय र सबै राजनीतिक दलहरु निर्वाचनका लागि तयार रहेको बजेटले नरोकिने बताएका हुन् ।
‘नेपाली समाज नयाँ निर्वाचनतर्फ गइसकेको छ। प्रतिनिधिसभा विघटनको मुद्दा सर्वोच्च अदालतको संवैधानिक इजलासमा विचाराधीन छ’, उनले भने, ‘तर अब प्रतिनिधिसभा पुन:स्थापनाको कुनै सम्भावना छैन र हुनै सक्दैन। संविधानको धारा ७६ को ७ र धारा ८५ ले पाँच वर्षअघि नै प्रतिनिधिसभा विघटन हुने व्यवस्था गरेको छ।’
उनले वैशाखमा निर्वाचन भएरै छाढ्ने दावी गरे। ‘आगामी वैशाखको १७ र २७ गते निर्वाचन भएरै छाड्छ, हामी ताजा जनादेशका आधारमा नयाँ जनप्रतिनिधि संस्थाको निर्माण गरेर छाड्छौँ।
मुलुकलाई अगाडि लैजान्छौँ’, ‘सरकारले निर्वाचनका लागि आवश्यक पर्ने बजेटको व्यवस्था गर्न तयार छ भने निर्वाचन हुँदैन कसरी ?, निर्वाचन रोक्छ कसले’ उनले भने।
प्रतिनिधिसभाका बहुमत सदस्यको साथमा संसद विघटन गरिएकाले पौडेलले बताए । ‘संसद अनुशासित हुन सकेन भनेर ताजा जनादेशका लागि जान संसद विघटन गरिएको छ । तोकिएको समयमा निर्वाचनमा हुन्छ । निर्वाचन आयोगले तोकिएको समयमा निर्वाचन सम्मान गर्न सक्षम रहेको छ ।
राजनीतिक दलले निर्वाचनमा जानका लागि अदालतको निर्णयको प्रतिक्षा गरिरहेको अवस्था छ । निर्वाचन हुन सक्दैन भनेर भ्रम सिर्जना गर्न खोजिएको छ । ओली नेतृत्वको नेपाल कम्युनिस्ट पार्टीले बहुमतसहित देश सबैभन्दा ठूलो दल भन्ने उनको दाबी छ ।
काठमाडौं । भारतले नेपालका लागि १० लाख डोज कोरोना भाइरसको खोप हस्तान्तरण गरेको छ । नेपालका लागि भारतीय राजदूत विनय मोहन क्वात्राले नेपाललाई बिहीबार त्रिभुवन अन्तराष्ट्रिय विमानस्थलमा पुगेर हस्तान्तरण गरेका हुन् ।
स्वास्थ्य तथा जनसंख्या मन्त्रालयले उक्त खोप जोखिम क्षेत्रमा काम गर्नेहरुलाई लगाइने बताएको छ । मन्त्रालयले जोखिम क्षेत्रमा खटिने चिकित्सक, सफाई कर्मचारी, सुरक्षाकर्मीलगायतलाई उक्त खोप लगाउने बताएको छ ।
भारतीय खोप निर्माता कम्पनी सेरम इन्स्टिच्युटले ज्वरो आएका, रक्तस्राव गडबडी, एलर्जी भएका, गर्भवती महिला, रगत पातलो बनाउने औषधि सेवन गरिरहेका मानिसहरुले खोप लगाउन नहुने बताएको छ ।
यस्ता समस्या भएका मानिसहरुमा प्रतिरक्षा प्रणाली कमजोर हुने सेरमले बताएको छ । त्यस्तै पहिलो चरणको खोप लगाउँदै एलर्जी भएमा दोस्रो चरणको खोप नलगाउन पनि सेरमले आग्रह गरेको छ ।
हालसम्म कोरोनाका खोपले मानिसहरुलाई पूर्णरुपमा सुरक्षित राख्ने वा नराख्ने कुनै ग्यारेण्टी छैन् । किनकी खोप निर्माता कम्पनीहरु हालसम्म पनि क्लिनिकल परीक्षणमा रहेकाले खोप लगाउने मानिसले ‘आफू कुन प्रकृतिको रोगसँग लडिरहेको छु’ त्यो एकिन गर्नुपर्ने जनस्वास्थ्य विज्ञहरुले बताएका छन् ।
काठमाडौं । संसद विघटन गरी निर्वाचनमा जाने सरकारको निर्णयको विरोधमा आज नेपाली कांग्रेसले देशभर प्रदर्शन गर्दैछ । आज वडास्तरमा प्रदर्शनको कार्यक्रम राखिएको छ । देशभर रहेका ६७४३ वडामा आज विरोध प्रदर्शन हुने नेपाली कांग्रेसले जानकारी दिएको छ ।
संसद विघटनको कदमलाई असंवैधानिक र अलोकतान्त्रिक ठहर गरेको कांग्रेसका नेताहरु भने निर्वाचनमा जान इच्छुक देखिएका छन् । विरोध कार्यक्रमका दौरान सभापति देउवा पक्षधर नेताले भने निर्वाचनको माहौल बनाउन कार्यकर्तालाई निर्देशन दिने गरेका छन् ।
नेपाली कांग्रेसले पुस १३ गते १६५ निर्वाचन क्षेत्रमा, पुस २५ गते ३३० प्रदेशसभा निर्वाचन क्षेत्रमा तथा माघ ३ गते ७५३ पालिकाहरुमा विरोध प्रदर्शन गरेको छ । वडा स्तरीय प्रदर्शनमा घरघरबाट सहभागिता जनाएर प्रभावकारी रुपले सफल बनाउन सभापति शेरबहादुर देउवाले आह्वान गरेका छन् ।
सर्लाही । सर्लाहीमा यात्रुबाहक बस दुर्घटनामा २ जनाको मृत्यु भएको छ । जिल्लाको हरिवन नगरपालिका–४ मा भएको दुर्घटनामा अन्य १७ जना घाइते भएको प्रहरीले जनाएको छ ।
दाङबाट झापाको काँकडभिट्टा जाँदै गरेको ना ५ ख ४४८८ नम्बरको बस बिहीबार बिहान चार बजे दुर्घटनामा परेको हो ।
दुर्घटनामा दुई जना महिलाको मृत्यु भएको र उनीहरुको सनाखत भइनसकेको प्रहरीको भनाई छ । दुर्घटनाबार थप अनुसन्धान भइरहेको प्रहरीले जनाएको छ ।
वासिंटन डिसी । अमेरिकी राष्ट्रपति जो बाइडेनले आजको दिन लोकतन्त्रको दिन भएको बताएको छन् । अमेरिकाको ४६ औं राष्ट्रपतिका रुपमा सपथ ग्रहणपछि पहिलो सम्बोधन गर्दै उनले भने, ‘यो अमेरिकाको दिन हो, यो लोकतन्त्रको दिन हो, यो इतिहास र आशा तथा अपेक्षाको दिन हो ।’
उनले केही दिन अगाडी भएको हिंसात्मक घटनाको समेत सम्झना गरे । अमेरिका पटक पटक परीक्षाबाट पास हुँदै अगाडी बढेको भन्दै उनले आज केवल एक उमेदवारको जीतको खुसी मात्र नमनाई लोकतन्त्रको खुसीयाली मनाइएको उल्लेख गरे ।
यसअघि निवर्तमान राष्ट्रपति डोनाल्ड ट्रम्पले निर्वाचनको नतिजा नमान्ने भन्दै आफ्ना समर्थकलाई उचालिरहेका थिए । उनी सपथ ग्रहणमा समेत सहभागी भएनन् ।