नयाँ दिल्ली । नेपाल भारत संयुक्त आयोगको बैठक शुक्रबार सम्पन्न भएको छ । सीमा विवाद, प्रवूद्ध समूहको प्रतिवेदनलगायतका नेपालको उच्च प्राथमिकतमा रहेका विषय यो बैठकमा औपचारिक प्रवेश नै नभएको पाइएको छ ।
वैठकलगत्तै सार्वजनिक कार्यक्रममा परराष्ट्रमन्त्री प्रदीपकुमार ज्ञवालीले सीमा विवादबारे कुराकानी भएको र दुवै पक्ष वार्ता प्रक्रिया सुरु गर्न इच्छुक रहेको बताएका थिए । तर, वैठकपछि जारी विज्ञप्तिमा भने यसबारेमा कुनै उल्लेख छैन ।
भारतीय विदेशमन्त्री एस जयशंकरसँग भएको भेटमा भने ज्ञवालीले यी विषय उठाएका हुन् । तर नेपाल भारत–संयुक्त आयोगको वैठकपछि आयोजक मुलुक भारतले जारी गरेको विज्ञप्तिमा सीमा विवादको विषयमा छलफल भएको बारे भने उल्लेख छैन ।
बैठकमा सीमा व्यवस्थापनको विषयमा कुरा भएको छ । सन् २०१४ मा काठमाडौंमा भएको आयोगको वैठकमा किटेर नै सुस्ता र कालापानीको किटेरै छलफल भएको थियो ।
यस पटकको वार्तामा भारत यसअघिझैं प्रवुद्ध समूहको प्रतिवेदन ग्रहण गर्न तयार भएन । परराष्ट्रमन्त्रीको भ्रमणको समयमा कोभिड–१९ खोप ल्याउने विषयमा कुराकानी भएको समेत बताइएको छ । वार्तामा नेपालले भारतलाई सकेसम्म छिटो खोप प्रदान गर्न आग्रह गरेको छ ।
