Category: समाचार

काठमाडौं । नेपालमा पछिल्लो २४ घण्टामा थप ६ सय ३८ जनामा कोरोना संक्रमण पुष्टि भएको छ।

स्वास्थ्य तथा जनसंख्या मन्त्रालयका प्रवक्ता डा. जागेश्‍वर गौतमको अनुसार २४ घण्टामा पिसिआर विधिबाट गरिएको १० हजार ४ सय ६२ नमुना परिक्षणमा ६ सय ३८ जनामा कोरोना संक्रमण पुष्टि भएको हो ।

योसँगै नेपालमा कोरोना संक्रमितको संख्या २३ हजार ९६८ पुगेको छ ।

पछिल्लो २४ घण्टामा १ सय ७१ जना उपचारपछि निको भएर डिस्चार्ज भएका छन्। यो सहित डिस्चार्ज हुनेको संख्या १६ हजार ६ सय ६४ पुगेको छ।

कुल संक्रमितमध्ये ८२ जनाको मृत्यु भएको छ।

काठमाडौं । प्रहरीले गोंगबुमा विभत्स हत्या भएको अवस्थामा फेला परेका दाङका कृष्णबहादुर बोहराको हत्या आरोपी सार्वजनिक गरेको छ ।

काठमाडौं महानगरीय प्रहरी परिसरमा हत्या आरोप लागेका चितवनकी कल्पना मुडभरी(पौडेल) र उनकी छोरीलाई प्रहरीले सार्वजनिक गरेको हो। कल्पनाकी छोरीले शव व्यवस्थापन सहयोग गरेको खुलेको छ।

काठमाडौं प्रहरी प्रमुख एसएसपी श्याम ज्ञवालीले मंगलबार आयोजित पत्रकार सम्मेलनमा दिएको जानकारी अनुसार बोहराले सामाजिक सञ्जालमा फेक आइडी बनाएर बदनाम गराउन खोजेपछि हत्या गरिएको प्रारम्भिक अनुसन्धानमा खुलेको छ ।

शनिवार बोहरा कल्पनाको गोंगबुमा रहेको डेरामा पुगेका थिए। कल्पना डेरामा पुगेपछि दही, चिउरा र मासु खुवाएको देखिएको प्रहरीले जनाएको छ ।

दहीमा स्लिपिङ ट्याब्लेट खुवाएर सुताएको र लगत्तै सलले घाँटी बाँधेर काटेको देखिएको प्रहरीले जनाएको छ।

घटनास्थलबाट प्रहरीले दशीको रुपमा घारिलो हतियार, हिर्काउन प्रयोग भएको ह्याम्मर, रगत लतपतिएको पन्जा, घाँटी कस्न प्रयोग भएको कालो सल, सुटकेशको ह्याण्डल, नाम्लोमा प्रयोग भएको डोरीको टुक्रा, स्लिपिङ ट्याबलेटका खोल र मोबाइल सेट बरामद गरेको छ ।

चितवन घर भएकी कल्पना काठमाडौंमा छोरी र छोरासँगै बस्दै आएकी थिइन्।

आइतबार बिहान टोखा नगरपालिका १० गोंगबु नवज्योति मार्गमा सुटकेसभित्र टाउको बिनाको मानिसको शव फेला पारेको थियो । सोही स्थानमा केही पर टाउको लगायत शरीरको अन्य भाग झोलामै फेला परेको थियो ।

प्रहरीले सोमबार मात्रै मृतकको सनाखत गरेको थियो । मृतक रोल्पा रून्तीगढी गाउँपालिका ७ घर भइ हाल गोंगबुस्थित एक होटलमा बस्दै आएका ४५ वर्षीय कृष्ण बहादुर बोहोरा भएको खुलेपछि प्रहरीलाई अनुसन्धानमा सहजता भएको थियो ।

जनकपुरधाम । सोमबार राती धनुषामा एक जनाको कोरोना भाइरसको संक्रमणका कारण ज्यान गएको छ । यससँगै अब नेपालमा कोरोना भाइरसका कारण ज्यान गुमाउनेको संख्या ८० पुगेको हो । जनकपुरधाम प्रादेशिक अस्पतालको आइसोलेसनमा उपचाररत विदेह नगरपालिका वडा नम्बर ८ का ६० वर्षीय पुरुषको कोरोना लागेर ज्यान गएको हो ।

अस्पतालका अनुसार उनी १८ दिनदेखि आईसीयूमा उपचारार्थ थिए । क्षयरोग र निमोनियाको समस्याबाट ग्रसित रहेका उनको ट्राभल हिस्ट्री भने नखुलेको अस्पतालको भनाई छ । उनको शव सेनाले व्यवस्थापन गर्नेछ । उनको निधनसँगै धनुषामा कोरोनाबाट ज्यान गुमाउनेको संख्या तीन पुगेको छ । देशभर भने ८० पुगेको हो । नेपालमा साउनयता संक्रमण र मृत्युदर दुबै बढेको छ ।

डोटी । डोटीमा एक घर भत्किदा एकै परिवारका चार जनाको ज्यान गएको छ । आदर्श गाउँपालिका–१ बाँझककानी खलगडामा घर भत्किँदा भएको दुर्घटनामा एकै परिवारका चार जनाको ज्यान गएको प्रहरीले जानकारी दिएको छ । पाँच जना घाइते छन् । गतराती करिब एक बजे स्थानीय ३२ वर्षीय लोगे विकको घर भत्किँदा दुर्घटना भएको हो ।

उनकी श्रीमती विष्ना विक, १२ वर्षीय छोरा पारस, छोरीहरु आठ वर्षीया सिर्जना र चार वर्षीया जेनिसाको ज्यान गएको प्रहरीले बताएको हो । घटनामा लोगे, उनकी आमा ताना लुहार र एक छोरी घाइते भएको प्रहरीको भनाई छ । घरमा पाहुना आएकी लोगेकी सासु आमा र साला समेत घाइते रहेको बताइएको छ । घाइतेको स्थानीय स्वास्थ्य संस्थामा प्राथमिक उपचारपछि थप उपचार गर्न सदरमुकाम लैजान लागिएको स्थानीय प्रशासनले जनाएको छ । अहिले उद्धारको काम जारी छ । घटनास्थलमा प्रहरी र स्थानीय उद्धारमा जुटेका छन् ।

काठमाडौं । आइतबार बिहान गोंगबुमा टाउको र खुट्टा काटेर भएको विभत्स हत्याको अनुसन्धानको निष्कर्षतर्फ प्रहरी पुगेको छ । स्रोतका अनुसार कृष्णबहादुर बोहोराको हत्या भएको घरको कोठामा बस्ने एक महिलालाई प्रहरीले चितवनबाट सोमबार पक्राउ गरेको छ । अब प्रहरी यो अनुसन्धानको निष्कर्षतर्फ उन्मुख भएको बताइएको छ ।

किनकी प्रहरीले हत्या भएको कोठाबाट कृष्णबहादुरको नागरिकता र एटीएम कार्डसमेत बरामद भएको छ । कोठाको बाथरुममा रगतसमेत फेला परेका कारण उनको हत्या सोही कोठामा भएको खुलेको हो । आइतबार सुटकेशभित्र टाउको र खुट्टाविनाको शव भेटिएको थियो । कुकुरको सहयोगमा प्रहरीले त्यसको तीन सय मिटर पर टाउको र खुट्टा भेटेको थियो । तर मृतकको पहिचान नभएपछि फोटो सार्वजनिक गरेको थियो । त्यसपछि उनी कृष्णबहादुर बोहोरा भएको खुलेको थियो ।

प्रहरीले अपराध भएको घरमा बस्दै आएकी कल्पना शाहीलाई चितवनमा पक्राउ गरेको हो । स्रोतका अनुसार चितवनको टाढीबाट पक्राउ परेकी उनलाई काठमाडौं ल्याइदैछ । एक गेष्ट हाउसमा बस्दै आएका उनले गेष्ट हाउसका साहुलाई आफु दुई दिन नआउने भन्दै बिदा भएको प्रहरीले जनाएको छ । प्रहरीले औपचारिक रुपमा भने विस्तृत अध्ययनपछि सार्वजनिक गर्ने बताउँदै आएको छ ।

काठमाडौं । प्रमुख विपक्षी नेपाली कांग्रेसले कोरोना संक्रमणको नियन्त्रणमा सरकार असफल भएको निष्कर्ष निकालेको छ । अब सरकारको भर परेर सुरक्षित नहुने भन्दै कांग्रेसले नागरिक स्वयमः सुरक्षित रहनु पर्ने सुझाव समेत कांग्रेसले दिएको छ ।

कांग्रेसको कोभिड–१९ सम्बन्धी अनुगमन समितिका संयोजक एवं सहमहामन्त्री डा. प्रकाशशरण महतले सरकार तथा मन्त्री निकट र टाढाका आधारमा कर्मचारी राख्ने प्रवृत्तिका कारण मन्त्रालयको काम प्रभावकारी नभएको र काम समेत फितलो बनेको उनको भनाई छ । सरकारले बनाएको उच्चस्तरीय संयोजन समिति समेत पूर्ण रुपमा असफल भएको उनको भनाई छ ।

स्वास्थ्य सामाग्री खरिदमा भ्रटाचार गरेको र असफल भइसकेको नेतृत्वलाई राखिराख्न नहुने तर्क कांग्रेसको छ । महामारीसँग लड्न सशक्त, डेडिकेटेड र इमान्दार नेतृत्व चाहिएको महतले बताए । वर्तमान संकटबाट सरकारले पार लगाउला र सुरक्षित रहौंला भन्ने अवस्था नरहेको भन्दै उनले आफूलाई सुरक्षित राख्ने तरिका खोज्दै आफ्ना साथीभाइ र घरगाउँलाई सुरक्षित राख्नु पर्ने सुझाव कांग्रेसको रहेको छ ।

महतले अनिवार्य मास्क लगाउन, एकअर्कामा भौतिक दुरी कायम राख्न, पटकपटक साबुन पानीले हात धुन वा स्यानिटाइजर प्रयोग गर्न र अत्यावश्यक काम पर्दा बाहेक सार्वजनिक स्थानमा नजान सबैलाई आग्रह गरे । अब नेपालले पूर्णलकडाउन थेग्न नसक्ने कांग्रेसको भनाई छ । जहाँ संक्रमण देखिन्छ, त्यो क्षेत्रमा परीक्षण र सिल गर्ने विधि उपयुक्त रहेको पार्टीको निष्कर्ष रहेको छ ।

काठमाडौं । नेपालमा कोरोना भाइरसका संक्रमणको कारण थप चार जनाको मृत्यु भएको छ ।

स्वास्थ्य तथा जनसंख्या मन्त्रालयका प्रवक्त्ता डा. जागेश्वर गौतमको अनुसार मृत्यु हुनेमा बाँकेकी ७० वर्षीय महिला, पर्साकी ४५ वर्षीय महिला, काठमाडौं कलंकी ट्याङ्लाफाँट निवासी ६४ पुरुष, काठमाडौंका ७६ वर्षिया पुरुष रहेका छन् ।

ललितपुरको भैँसेपाटीस्थित मेडिसिटी अस्पतालमा उपचाररत कोरोना संक्रमित पुरूषको मृत्यु भएको छ। कलंकी ट्याङ्लाफाँट निवासी ६४ वर्षीय पुरुषको सोमबार बिहान मृत्यु भएको हो।

निमोनिया र मधुमेहको रोगी रहेका पुरूष साउन १५ गते अस्पताल भर्ना भएका थिए। कोरोनाको आशंकामा उनको साउन १९ गते स्वाब संकलन गरी परीक्षण गरिएको थियो।

साउन २१ गते आएको रिपोर्टमा उनमा कोरोना पोजेटिभ पुष्टि भएको थियो।

त्यस्तै, काठमाडौं महानगरपालिका मध्यबानेश्वर बस्‍ने ७६ वर्षीय पुरुषको साउन २६ गते बिहान १०:१५ बजे निधन भएको छ । उनको मेडिकेयर अस्पतालमा निधन भएको हो ।

बाँकेक कोहलपुर नगरपालिका -२ बस्‍ने ७० वर्षीया महिलाको नेपालगन्ज मेडिकल कलेजमा उपचारका क्रममा साउन २५ गते ३:१० बजे निधन भएको छ ।

स्वास्थ्यमा समस्या देखिएपछि ती महिला कोहलपुर मेडिकल कलेजमा केही दिनअघि भर्ना भएकी थिइन्। अस्पताल भर्ना भएपछि महिलाको स्वाब परीक्षण गर्दा कोरोना पोजेटिभ देखिएको थियो।

त्यसैगरी पर्साको बेदियानी गाउँपालिका-१५ बस्‍ने ४५ वर्षीया महिलाको साउन २५ गते नारायणी कोभिड अस्थायी अस्पतालमा निधन भएको छ ।

मृत्युपछि गरिएको स्वाब परीक्षणमा उनमा कोरोना पोजेटिभ देखिएको थियो। श्वासप्रश्वासमा समस्या भएपछि कोभिड अस्पताल भर्ना गरिएको महिलालाई भेन्टिलेटरमा राखेर उपचार गरिएको थियो।

योसंगै नेपालमा कोरोना भाइरसका कारण मृत्यु हुनेको संख्या ७९ पुगेको छ ।

काठमाडौ । नेपालमा पछिल्लो २४ घण्टामा थप ३ सय ३८ जनामा कोरोना संक्रमण पुष्टि भएको छ।

स्वास्थ्य तथा जनसंख्या मन्त्रालयका प्रवक्ता डा. जागेश्‍वर गौतमको अनुसार २४ घण्टामा पिसिआर विधिबाट गरिएको ८ हजार ४ सय ३२ नमुना परिक्षणमा ३ सय ३८ जनामा कोरोना संक्रमण पुष्टि भएको हो ।

योसँगै नेपालमा कोरोना संक्रमितको संख्या २३ हजार ३१० पुगेको छ ।

पछिल्लो २४ घण्टामा १४० जना उपचारपछि निको भएर डिस्चार्ज भएका छन्। यो सहित डिस्चार्ज हुनेको संख्या १६ हजार ४९३ पुगेको छ।

कुल संक्रमितमध्ये ७९ जनाको मृत्यु भएको छ।

काठमाडौं । नेपालमा पछिल्लो २४ घण्टामा थप ३ सय ८० जनामा कोरोना संक्रमण पुष्टि भएको छ।

स्वास्थ्य तथा जनसंख्या मन्त्रालयका प्रवक्ता डा. जागेश्‍वर गौतमको अनुसार २४ घण्टामा पिसिआर विधिबाट गरिएको ८ हजार ८ सय १५ नमुना परिक्षणमा ३ सय ८० जनामा कोरोना संक्रमण पुष्टि भएको हो ।

योसँगै नेपालमा कोरोना संक्रमितको संख्या २२ हजार ९७२ पुगेको छ ।

पछिल्लो २४ घण्टामा ४० जना उपचारपछि निको भएर डिस्चार्ज भएका छन्। यो सहित डिस्चार्ज हुनेको संख्या १६ हजार ३५३ पुगेको छ।

कुल संक्रमितमध्ये ७३ जनाको मृत्यु भएको छ।

काठमाडौं । स्वास्थ्य तथा जनसंख्या मन्त्रालयका चारजना कर्मचारीलाई कोरोना संक्रमण देखिएको छ ।

शुक्रबार मन्त्रालयका ८४ जनाको स्वाब संकलन गरिएको र तीमध्ये चार जनामा पीसीआर पोजेटिभ देखिएको मन्त्रालय स्रोतले जानकारी दिएको छ ।

स्रोतको अनुसार कार्यालय सहयोगी र चालकहरूमा कोरोना देखिएको भन्ने प्रारम्भिक विवरण आएपछि थप विवरण आउन बाँकी नै रहेको छ ।

उनीहरूको सम्पर्कमा आएका व्यक्तिहरुको कन्ट्याक्ट् ट्रेसिङ सुरु भएको छ ।

काठमाडौं । नेपालमा पछिल्लो २४ घण्टामा थप ३ सय ७८जनामा कोरोना संक्रमण पुष्टि भएको छ।

स्वास्थ्य तथा जनसंख्या मन्त्रालयका प्रवक्ता डा. जागेश्‍वर गौतमको अनुसार २४ घण्टामा पिसिआर विधिबाट गरिएको ७ हजार ७ सय ८८ नमुना परिक्षणमा ३ सय ७८ जनामा कोरोना संक्रमण पुष्टि भएको हो ।

योसँगै नेपालमा कोरोना संक्रमितको संख्या २२ हजार ५९२ पुगेको छ ।

पछिल्लो २४ घण्टामा ४ सय ९९ जना उपचारपछि निको भएर डिस्चार्ज भएका छन्। यो सहित डिस्चार्ज हुनेको संख्या १६ हजार ३१३ पुगेको छ।

कुल संक्रमितमध्ये ७३ जनाको मृत्यु भएको छ।

बुटवल । रुपन्देहीमा कार दुर्घटना भएको छ । दुर्घटनामा कम्तिमा तीन जनाको ज्यान गएको छ । एक जना घाइते छन् । लु २ च ६७५६ नम्बरको कार रोहिणी गाउँपालिका ४ मा दुर्घटना हुँदा चालक रुपन्देहीको ओमसतिया गाउँपालिका–४ बालापुरका २६ वर्षीय देवेन्द्र चौधरीसहित तीन जनाको ज्यान गएको प्रहरीले जानकारी दिएको छ । मृतक अन्यको सनाखत भइसकेको छैन ।

दुर्घटनामा चार जना घाइते थिए । त्यसमध्ये तीन जनाको ज्यान गएको हो । दुर्घटनामा भैरहवाका ३० वर्षीय अनिल यादव घाइते रहेको प्रहरीको भनाई छ । परासीबाट भैरहवातर्फ जाँदै गरेको कार रोहिणी गाउँपालिका ४ छिपागडस्थित हुलाकी सडकबाट १० मिटर तल खसेको भेटिएको छ । दुर्घटनापछि सबैलाई उपचारको लागि भिम अस्पताल भैरहवा पुर्याइएको थियो । प्रहरीले तिब्र गतिमा रहेका कारण दुर्घटनाको आंका गरेको छ ।

काठमाडौं । स्थानीय प्रशासनले काठमाडौं उपत्यकाका तीनवटै जिल्ला प्रशासन कार्यालयमा अत्यावश्यक बाहेकका सेवा बन्द गरेका छन् । यसलाई सरकारले सटडाउन भनेको छ । काठमाडौं, भक्तपुर र ललितपुरका प्रमुख जिल्ला अधिकारीहरुको शुक्रबार बसेको बैठकले २५ गते आइतबारदेखि भदौ ८ गतेसम्म नियमित सेवा बन्द गर्ने निर्णय गरेको छ ।

जिल्ला प्रशासन कार्यलयका अनुसार यसलाई सटडाउन भनिएको हो । यसले निजी क्षेत्रलाई कुनै प्रभाव भने पार्ने छैन । निजी क्षेत्रबारे कुनै निर्णय लिनु परेमा भने उपप्रधानमन्त्रीको अध्यक्षमा रहेको उच्चस्तरीय समितिबाटै निर्णय हुनेछ । त्यसलाई मन्त्रिपरिषद्ले समेत अनुमोदन गर्नुपर्छ । तर, काठमाडौंमा कोरोना भाइरसको संक्रमण बढेपछि कार्यालयमा हुने भिडभाडले जोखिम अझ बढाउने भन्दै जिल्ला प्रशासन कार्यालयबाट प्रवाह हुने नियमित सेवा बन्द गरिएको हो ।

तर, अत्यावश्यक सेवाका काम भने जारी रहने भएको छ । बैठकको निर्णयअनुसार प्रशासन कार्यालयबाट प्राप्त हुने नयाँ नेपाली नागरिकता र प्रतिलिपि नागरिकता वितरण, हातहतियार दर्ता तथा नवीकरण, संघसंस्था दर्ता पत्रपत्रिका दर्ताका साथै नवीकरण, निजी सुरक्षा कम्पनी दर्ता नवीकरण, राहदानी वितरण र नाबालिग परिचयपत्र वितरण सेवा बन्द भएको छ ।

आम नागरिकका दैनिकीसँग जोडिने धेरै विषय जिल्ला प्रशासन कार्यालयमा आएर जोडिन्छ । तर, शान्ति सुरक्षा सम्बन्धी सेवा, ठाडो निवेदन र उजुरी सम्बन्धी, मुद्दा सम्बन्धी कार्य, अत्यावश्यक कामको लागि सवारी पास सम्बन्धी कार्य र विपद् व्यवस्थापन सम्बन्धी कार्य भने नियमित सञ्चालनमा रहने छ । अर्कोतर्फ काठमाडौं उपत्यकामा कोरोना धेरै देखिएका ठाउँ भने सिल हुनेछन् । लकडाउनमा सबै क्षेत्रलाई एकै साथ बन्द गरिन्छ ।

तर, सटडाउनमा निश्चित क्षेत्र सील गर्ने र त्यहाँ कोरोना रोकथामका उपायमा केन्द्रित भई काम गरिन्छ । सरकारले अब देशव्यापी लकडाउन नहुने स्पष्ट पारेको छ । तर, जोखिमपूर्ण क्षेत्रमा स्थानीय प्रशासनले निषेधाज्ञा जारी गर्न सक्नेछन् ।

काभ्रे । विदेशबाट फर्किएर क्वारेन्टिनमा बसिरहेकी एक युवतीले काभ्रेमा आत्महत्या गरेकी छिन् । क्वारेन्टाइन स्थलमै उनले आत्महत्या गरेकी हुन् । शुक्रबार काभ्रेको बेथानचोक गाउँपालिका–४ स्थायी घर भएकी २१ वर्षिय युवती गाउँपालिकाकै क्वारेन्टाइनमा बसेकी थिइन् । उनी झुन्डिएको अवस्थामा फेला परेकी थिइन् ।

काभ्रे प्रहरीका अनुसार साउन १६ मा दुबईबाट नेपाल आएर क्वारेन्टाइनमा बसेकी युवतीले गाउँपालिकाको स्वास्थ्य चौकीमा रहेको क्वारेन्टाइनमा आत्महत्या गरेकी हुन् । क्वारेन्टिनमै युवतीले आत्महत्या गरेपछि गाउँले भने आक्रोसित बनेका छन् ।

उनीहरुले प्रहरी र स्वास्थ्यकर्मीमाथि समेत आक्रमण गरेका छन् । क्वारेन्टाइन व्यवस्थापनको लापरबाहीले यस्तो घटना भएको उनीहरुको दावि छ । युवतीका आफन्त तथा गाउँलेले प्रहरी र स्वास्थ्यकर्मीमाथि आक्रमण गरेका हुन् । आफन्तको आक्रमणबाट एक प्रहरी र दुई स्वास्थ्यकर्मी घाइते भएको प्रहरीले जनाएको छ ।