Category: खेलकुद

काठमाडौं । १३ औं संस्करणको साफ च्याम्पियनशिप फुटबल प्रतियोगिताको खेल तालिका सार्वजनिक भएको छ । कुल ५ मुलुकले सहभागिता जनाउने प्रतियोगितामा नेपालले पहिलो खेल आयोजक तथा साविक विजेता माल्दिभ्ससँग खेल्ने छ । दक्षिण एसियाली फुटबल महासङ्घ (साफ) ले १३ औँ संस्करणमा पाँच देशलाई सहभागी बनाइ खेल तालिका सार्वजनिक गरेको हो । एक वर्ष अगाडी नै हुनुपर्ने प्रतियोगिता कोरोना महामारीका कारण पछाडी धकेलिएको हो ।

माल्दिभ्स, भारत, नेपाल, बङ्गलादेश र श्रीलङ्काले यो पटक खेल्ने भएका हुन् ।
यस संस्करणमा भुटान र पाकिस्तानले भाग लिएन । दक्षिण एसियाली मुलुक अफगानिस्ताले भने दुई वटा प्रतियोगिता पछि नै साफमा खेल्न छाडेको हो । पाकिस्तानको टीम फिफाको निलम्बनका परेका कारण सहभागी भएन । भुटानले भने कोरोना महामारीलाई कारण भनेको छ । प्रतियोगिता असोज १५ देखि २७ गतेसम्म आयोजना हुनेछ ।

तालिकाअनुसार नेपाल र माल्दिभ्सबीचको खेल असोज १५ गते मालेमा रहेको राष्ट्रिय फुटबल स्टेडियममा हुनेछ । नेपालले दोस्रो खेल श्रीलङ्कासँग असोज १७ गते, तेस्रो खेलमा भारतसँग असोज २२ र लिग चरणको अन्तिम खेलमा बङ्गलादेशसँग असोज २५ गते खेल्नेछ । प्रतियोगिताको लिग चरणको खेलपछि शीर्ष दुई टोली उपाधिका लागि असोज २७ मा भिड्ने छन् । साफ च्याम्पियनशिपका लागि नेपाल अहिले बन्द प्रशिक्षणमा छ । अब्दुल्लाह अलमुताइरीको प्रशिक्षणमा पोखरा रङ्गशालामा तयारी भइरहेको छ ।

काठमाडौं । फिफा वरीयतामा नेपाली फुटबल टोलीको वरियता सुधार भएको छ । फिफाले बिहीवार सार्वजनिक गरेको वरियतामा नेपाल एक सय ७१ औँ स्थानबाट एक सय ६८ औँ स्थानमा उक्लन सफल भएको छ । नेपालले यसअघि विश्व कप छनोट र एसिया कप छनोटका खेलमा संतोषजनक प्रदर्शन गरेको थियो । सोही आधारमा नेपालको वरीयतामा सुधार आएको छ ।

दक्षिण एसियाली देशमा नेपाल भन्दा माथि भारत र माल्दिभ्स रहेका छन् । नेपाल तेस्रो स्थानमा छ । विश्व वरीयताको शीर्ष स्थानमा बेल्जियम रहेको छ । ब्राजिल दोस्रो स्थानमा छ । फ्रान्स तेस्रो, इङ्ग्ल्यान्ड चौथो र इटली पाँचौँ स्थानमा छन् । अर्जेन्टिना छैटौँ, स्पेन सातौँ, पोर्चुगल आठौँ, मेक्सिको नवौँ र अमेरिका दशौँ स्थानमा रहेको वरियता फिफाले सार्वजनिक गरेको छ ।

पेरिस । अर्जेन्टाइन स्टार लियोनल मेसी अब फ्रेन्च लीग क्लव पिएससीमा आवद्ध भएका छन् । यससँगै पिएससी संसारकै शक्तिशाली क्लव बनेको छ । यो क्लवको अग्रपंक्तीमा अब मेसी, नेयमार र एम्बाप्पे रहने छन् । यसै सिजन रियल म्याड्रिडबाट बिदा भएका सर्जियो रामोस समेत यसै टीममा आवद्ध भएका छन् । अर्का अर्जेण्टाइन स्टार एन्जल डीमारिया समेत यसै टीममा रहेका छन् ।

समकालिन फुटबलका महान खेलाडी मानिने मेसी भने बार्सिलोनाबाट बिदा भएका हुन् । पिएसजीको राखेको प्रस्तावमा सोमबार सहमति जनाएका उनी दुई वर्षका लागि सो टोलीमा आवद्ध भएका छन् । आपसी सहमतिमा सम्झौता २०२४ सम्म लम्बिन सक्ने भएका छन् । उनी वार्षिक ३५ मिलियन यूरो पारिश्रमिक पाउने गरि पीएसजी भित्रिएको बताइएको छ । मेसी आजै फ्रान्स पुगेका छन् । उनलाई समर्थकले भब्य स्वागत गरेका छन् ।

२१ वर्ष स्पेनको बार्सिलोनाबाट खेलेका उनी लालिगाको नियम र क्लव आर्थिक समस्यामा परेका कारण बाहिरिनु परेको हो । त्यहाँ उनी सबैभन्दा बढी तलव खोन खेलाडी थिए । उनी १३ वर्षको उमेरमा बार्सिलोनामा आवद्ध भएका थिए । मेसी अहिले ३४ वर्षका भए । मेसी बार्सिलोनाका लागि सर्वाधिक ६७२ गोल गरि कीर्तिमानधारी ेखेलाडी बनेका छन् । बार्सिलोनामा उनले कुल ३५ उपाधि उचालेका छन् । जसमा १० ला लिगा र चार च्याम्पियन्स लिगका उपाधि समेत छन् ।

काठमाडौं । विश्वका चर्चित क्रिकिेटरहरुको जमघट केही समयपछि नेपालमा हुने छ । यसको तारतम्य मिलाएको हो एभरेस्ट प्रिमियर लिग (इपीएल)ले । यो प्रतियोगिता ९ असोजबाट सुरू हुनेछ । आयोजकले इपीएलको ट्रफी सोमबार सार्वजनिक गरेको छ । प्रतियोगिताको हंशराज हुलासचन्द एण्ड कम्पनीको उत्पादन बजाज पल्सरले मुख्य प्रायोजन गर्दैछ ।

इपिएलका प्रबन्ध निर्देशक आमिर अख्तर र मुख्य प्रायोजक हंशराज हुलासचन्द एण्ड कम्पनीका अध्यक्ष शेखर गोल्छाले संयुक्त रुपमा ट्रफी सार्वजनिक गरेका छन् । सो अवसरमा अख्तर र गोल्छाबीच मुख्य प्रयोजनका लागि सम्झौता समेत भयो । मुख्य प्रायोजन भएवापत बजाज पल्सरले लिगलाई २ करोड ५० लाख रुपैयाँ दिनेछ । यो नेपालमा आयोजना भएका खेलकुद प्रतियोगितामध्ये सबैभन्दा ठूलो प्रयोजन रकम हो ।

यसअघि ए डिभिजन फुटबल लिगमा कतार एअरवेजले १ लाख ५० हजार अमेरिकी डलर दिनु नै सर्बभन्दा ठूलो प्रयोजन थियो । ईपीएलको चौथो संस्करण विश्वका १५० देशमा प्रत्यक्ष प्रशारण हुने भएको छ । यो प्रतियोगितामा विश्वचर्चित खेलाडीहरु शाहिद अफ्रिदी, शोयब मलिक, कार्लोस ब्राथवेट जस्ता खेलाडी सहभागी हुने भएका छन् ।

प्रतियोगिता कीर्तिपुरको त्रिभुवन विश्व विद्यालयको क्रिकेट मैदानमा आयोजना हुनेछ । प्रतियोगिता १४ दिनसम्म चल्ने छ। प्रतियोगितामा विराटनगर वारियर्स, काठमाडौं किङ्स–११, पोखरा राइनोज, ललितपुर प्याट्रिओट्स, चितवन टाइगर्स र भैरहवा ग्लाडिएटर्सले उपाधीका लागि भिड्ने छन् ।

काठमाडौं । १३ औँ संस्करणको साफ च्याम्पियनसिप फुटबल माल्दिभ्समा हुने भएको छ । सोमबार बसेको साफको कार्यकारी समितिको बैठकले प्रतियोगिता आयोजनाको जिम्मा माल्दिभ्सलाई दिएको हो ।

प्रतियोगिता अक्टोबर १ देखि १३ सम्म हुनेछ । कोरोना महामारीका कारण बंगलादेशले साफ आयोजना गर्न नसक्ने बताएपछि नयाँ आयोजकका रूपमा माल्दिभ्सलाई छनोट गरिएको हो ।

प्रतियोगिता आयोजनाको जिम्मेवारी पाएको बंगलादेशले कोभिड–१९ का कारण साफ गर्न नसक्ने जानकारी दिएपछि नयाँ आयोजक राष्ट्र चयन गरिएको हो ।

प्रतियोगिताको आयोजनाका लागि नेपालले पनि दावेदारी पेस गरेको थियो । साफ च्याम्पियनसिप अक्टोबर १ देखि १३ सम्म आयोजना हुनेछ ।

१३ औं साफमा नेपाल, भारत, बंगलादेश, माल्दिभ्स र श्रीलंकाले खेल्ने पक्का भइसकेको छ । नेपालमा साफ आयोजना गर्न सरकारले ५ करोड दिने निर्णय गरिसकेको थियो ।

काठमाडौं । ‘गत वर्ष म बार्सिलोना छाड्न चाहन्थे, तर यो वर्ष म यही बस्न चाहन्छु,’ करीयरको २१ वर्ष बिताएको क्लव बार्सिलोनाबाट बिदाई हुने क्रममा अर्जेन्टाइन स्ट्राइकर मेसीले यसो भन्दै गर्दा उनको गहभरी आँसु आयो । बार्सिलोना छाडेको औपचारिक घोषणा गर्न आयोजना गरेको पत्रकार सम्मेलनमा उपस्थित हुनासाथ मेसी भावुक बने । उनको आँखाबाट अविरल आँसु बगिरह्यो ।

सम्बोधन सुरु गर्नुअगाडी नै उनको भावना छताछुल्ल भएको थियो । उनी १३ वर्षको उमेरमा बार्सिलोनामा आवद्ध भएका थिए । तर, अब उनी यो क्लवको हिस्सा रहेनन् । बार्सिलोना र मेसी एक अर्काको पर्यायवाची थिए । क्लव र मेसी बीच छिट्टै नयाँ सम्झौत हुने र पाँच वर्षका लागि मेसी बार्सिलोनामै रहने समाचारहरु सार्वजनिक भइरहेका बेला अचानक खेलाडी र क्लवबीचको वार्ता असफल भएको खबर बिहीबार सार्वजनिक भएको थियो ।

यो खबरले समर्थकमा भने ब्यापक निरासा उत्पन्न भएको छ । आर्थिक अवस्था र ला लिगाको मापदण्डका कारण हस्ताक्षर हुन नसकेको क्लबले जनाएको छ । मेसीका अनुसार उनी ५० प्रतिशतसम्म तलव कटौती गरेर भएपनि बार्सिलोनामै बस्न चाहन्थे । तर, क्लवले ७० प्रतिशतसम्म कटौतीको शर्त राख्यो । गत वर्ष क्लवसँग विवाद हँुदा उनले कानूनी लडाईमा जान सक्थे ।

तर, आफुले माया गर्ने क्लवविरुद्ध कानूनी लडाईमा नगएका उनलाई अन्ततः बार्सिलोनाबाट बाध्यतावशः निस्कनु परेको छ । बिदाई बारे आफ्नो धारणा राख्दै मेसीले भने ‘२१ वर्षपछि अब आफ्नो पत्नी र तीन क्याटलान –अर्जेन्टाइन सन्तानसहित जाँदै छु र मै सबै कुरा भन्न सक्दिनँ ।’ मेस्सीले बार्सिलोनाप्रति आफ्नो ठूलो सम्मान रहेको उल्लेख गरे । यो आफ्नो घर रहेको समेत उनको भनाई छ ।

अन्तर्राष्ट्रिय समाचारमाध्यमहरुका अनुसार संसारभरका धनी क्लवहरु अहिले मेसीलाई भित्राउन खोजिरहेका छन् । यसमा फ्रान्सको पेरिस सेन्ट जर्मेन सफल भएको समेत इएसपीएनले लेखेको छ । उक्त संचारमाध्यमका अनुसार सोमबार नै मेसीले सो क्लवका लागि मेडिकल जाँचसहितका प्रक्रिया पुरा गर्ने तयारी छ । यो क्लवमा नेयमारदेखि एम्बाप्पेसम्मका स्टार खेलाडी छन् ।

काठमाडौं। जापानको राजधानी टोकियोमा जारी ३२औँ ग्रीष्मकालीन ओलम्पिक आज सकिदै छ । जुलाइ २३ मा शुरु भएको खेलहरुको आज अन्तिमदिन हो ।

अन्तिम दिनसम्ममा पदक दौडमा चीनको अग्रता जारी रहेको छ। चीन ३८ स्वर्ण सहित पहिलो स्थानमा रहेको छ।

चीनले ३८ स्वर्ण, ३१ रजत र १८ काश्य जितेको छ । चीनलाई अमेरिका र जापानले पछ्याइरहेका छन्।

दोस्रो स्थानको अमेरिकाले ३६ स्वर्ण, ३९ रजत र ३३ काश्यसहित कुल १०८ पदक जितेको छ । तालिकको तेस्रो स्थानमा जापान रहेको छ । जापानले २७ स्वर्ण, १२ रजत र १७ काश्य गरि ५६ पदक जितेको छ ।

चौथो स्थानमा रहेको आरओसीले २० स्वर्ण, २६ रजत र २३ कांस्य पदक रहेको छ भने पाँचौँ स्थानमा रहेको बेलायतले २० स्वर्ण २२१ रजत र २२ कांस्य रहेको छ। त्यसैगरि अष्ट्रेलियाले १७ स्वर्ण, ७ रजत र २२ कांस्यसहित छैटौँ स्थानमा रहेको छ।

सातौं स्थानमा नेदरल्याण्ड्स १० स्वर्ण, १२ रजत र १२ कांस्य सहित रहेको छ। जर्मनी र इटली १०(१० स्वर्ण सहित क्रमशः आठौँ र नवौँ स्थानमा रहेका छन्। दशौँ स्थानमा ९ स्वर्णसहित फ्रान्स रहेको छ।

कुल पदकमा अमेरिका १०८ पदक रहेको छ भने पहिलो स्थानमा रहेको चीनको कुल ८७ पदक रहेको छ। ओलम्पिक पदक तालिकामा स्वर्णका आधारमा स्थान छुट्टयाईन्छ । कुल पदकलाई मान्यता दिइनुपर्ने आवाजहरू पनि बेला(बेलामा उठिइरहेका छन्।

दुई स्वर्ण पदकले अग्रता लिएको चीनका लागि केहि खेलहरू बाँकी रहेको अवस्थामा पहिलो हुने तनाव रहिरहने छ। अमेरिकाले महिला बास्केटबल र भलिबलको फाइनल खेल्न बाँकी रहेको छ भने दुई अमेरिकी बक्सरको फाइनल खेल बाँकी रहेको छ।

त्यसैगरि चीनको पनि एक महिला बक्सिङ फाइनल खेल रहेको छ भने रिदमिक जिमन्यास्टिकको फाइनल पनि रहेको छ। म्याराथन र साईक्लिङका खेलहरू पनि बाँकी रहेका छन्।

यसरी समग्रमा हेर्दा पदक तालिकामा पहिलो स्थानको होडबाजी अन्तिम दिनसम्म रहने छ।

काठमाडौं । नेपाली राष्ट्रिय क्रिकेट टोलीका पूर्वकप्तान पारस खड्काले मंगलबार अकस्मात अन्तर्राष्ट्रिय क्रिकेटबाट सन्यासको घोषणा गरे । यो घोषणालाई लिएर क्रिकेट समर्थक निरास बने । यसबारे विभिन्न अड्कल बाजी समेत भए । नेपाली क्रिकेटलाई विश्वकपसम्मको यात्रा, वानडे मान्यता दिलाउनेसहित दर्जनौं उपाधी हात पारेका राष्ट्रिय क्रिकेट टोलीका पूर्वकप्तान पारस खड्काले आज आफ्नो सन्यासबारे थप स्पष्ट पारेका छन् । उनले आफु क्रिकेटकै विभिन्न रुपमा रहने बताएका हुन् ।

अवसर भएमा भने राजनीतिमा समेत आउने सक्ने उनको भनाई छ । राजनीतिमा अवसर पाए त्यसबाट पनि पछि नहट्ने उनको भनाई छ । उनले भने, ‘म कुनै पार्टीसँग जोडिएर नेपाललाई कुनै न कुनै तरिकाले भ्यालु एड गर्न सकेँ भने म तयार हुनेछु।’

तर, पारस तत्काल भने क्रिकेटको व्यवस्थापनमा रहन चाहेको बताउँछन् । क्रिकेट व्यवस्थापनलाई सफल बनाउने उनको चाहना रहेको छ । उनले अगाडी भने, ‘अन्तर्राष्ट्रिय खेल जीवन सकिएपछि व्यवस्थापनमा आऊँला वा पदाधिकारीमा आऊँला, म मात्र भएर हुन्न, अहिलेको स्टक होल्डरहरूले पनि उत्तिकै जिम्मेवारी लिनुपर्नेछ ।’ एउटा खेलाडीका कारणले क्रिकेटमा परिवर्तन ल्याउन सम्भव भए पनि व्यवस्थापनमा यो सजिलो नहुने उनले बताए ।

काठमाडौं । नेपालका सर्वाधिक सफल कप्तान पारस खड्काले अन्तर्राष्ट्रिय क्रिकेटबाट राष्ट्रिय टीमबाट सन्यासको घोषणा गरेका छन् । उनले मंगलबार आफ्नो आधिकारिक सामाजिक संजालबाट यस्तो घोषणा गरेका हुन् । पारस १० वर्ष भन्दा बढी समय नेपाली राष्ट्रिय टोलीको कप्तान बनेका थिए । उनले २०७६ असोज २८ गते कप्तानबाट राजीनामा गरेका छन् । अकस्मात आएको उनको सन्यासले नेपाली समर्थकलाई भने निरास बनाएको छ । पारसले सन् २००४ मा मलेसियाविरुद्ध राष्ट्रिय टोलीबाट पहिलो पटक खेलेका थिए ।

सन् २००९ मा विनोद दासलाई प्रतिस्थापन गरी नेपाली टोलीको कप्तानी सम्हालेका थिए । १० वर्षको बीचमा नेपाली क्रिकेटलाई उनले निकै उचाईमा लगेका थिए । पारस नेपाली क्रिकेटमा अहिलेसम्मकै सर्वाधिक सफल कप्तान मानिन्छन् । नेपाललाई आईसीसी विश्व क्रिकेट लिग डिभिजन–५ देखि ट्वान्टी–२० विश्वकप र एकदवसीय अन्तार्रष्ट्रिय मान्यता दिलाउन पारसले खेलाडी र कप्तानको रूपमा उनले महत्वपूर्ण भूमिमा निभाएका छन् ।

यस्तो छ पारसले दिएको सन्देश
सम्पूर्ण नेपाली क्रिकेटका समर्थक र सरोकारवाला प्रति कृतज्ञता व्यक्त गर्दै अन्तर्राष्ट्रिय क्रिकेटबाट मैले संन्यास लिने निर्णय लिएको छु । नेपालका लागि खेल्नु मेरो जीवनको सर्वश्रेष्ठ उपलब्धि हो ।

२००२ मा १५ वर्ष हुँदा मैले सुरु गरेको क्रिकेट यात्रामा साथ, समर्थन, माया र हौसला दिने प्रशिक्षकहरू, साथी खेलाडीहरू, प्रशंसकहरू, सरोकारवालाहरू, मिडियाकर्मी, मेरो परिवार र साथीहरू प्रति म सदैव ऋणी रहनेछु

क्रिकेटरका रूपमा मैले आफ्नो मन, वचन र कर्मले कर्तव्यनिष्ठ भई देश र नेपाली क्रिकेट जगतको उत्थानका लागि सदैव आफ्नो भूमिका निर्वाह गरें । मेरो जीवनमा मैले देखेको सपना भनेकोनै नेपाली क्रिकेटको उन्नति हो तर यसका लागि सम्पूर्ण क्रिकेट समाज र सरोकारवालाहरूको संयुक्त प्रयासको आवश्यकता छ । इमानदारिताका साथ काम गर्ने हो भने हामीले नेपाली क्रिकेटलाई अवश्य पनि एउटा नयाँ उचाइमा पुर्‍याउनेछौं।

अन्तर्राष्ट्रिय क्रिकेटरका रूपमा मेरो यात्रा टुङ्गिएको छ तर नेपाली क्रिकेटका लागि मेरो सपना भने अझै पनि बामे सर्दै छन् ।

मैदान भित्रका यी दुई दशक, जीवन रहुन्जेल, मिठो यादका रूपमा मसँग रहनेछन् । हामी सबैले मिलेर नेपाली क्रिकेटलाई नयाँ उचाइमा पुर्‍याउनेछौं भन्ने विश्वास लिएको छु ।

काठमाडौं । राष्ट्रिय फुटबल टोलीका मुख्य प्रशिक्षक अब्दुल्लाह अल्मुताइरीले आफ्नो भनाई आलोचित बनेपछि माफी मागेका छन् । उनले केही दिन अगाडी राजिनामा घोषणा गरेका थिए । त्यसअगाडी उनले नेपालमा खेलाडी र पदाधिकारीमा राजनीतिक मानसिकता रहेको भन्दै आलोचना गरेका थिए । यो अभिव्यक्तिको आलोचना भएसँगै उनले सार्वजनिक रुपमा माफी मागेका हुन् ।

मुख्य प्रशिक्षकले आफ्नो जिम्मेवारी भन्दा बाहिर गएर बोल्नु अनुशासन उल्लंघन भएको अखिल नेपाल फुटबल संघ (एन्फा)का वरिष्ठ उपाध्यक्ष पंकज विक्रम नेम्वाङसहितले उनीमाथि कारवाही गर्न माग गरेका थिए । सोहीका कारण कोच अल्मुताइरीले नेम्वाङका कारण राजिनामा दिने भन्दै सामाजिक संजालमा समेत लेखेका थिए ।

प्रशिक्षक अल्मुताइरीले भने आफूले पछिल्लो तीन दशकमा नेपाल र अरु एसियाली देशको फुटबल कसरी विकास भएको छ भन्ने मात्र बताउन चाहेको समेत स्पष्ट पारेका छन् । उनले सामाजिक सञ्जाल फेसबुकबाट शुभेच्छुक र फुटबललाई माया गर्ने परिवारसँग छलफल गर्दा आफ्नो भनाइको गलत अर्थ लागेको महसुस भएको र त्यसप्रति क्षमा माग्ने बताएका हुन् ।

आफूले कोही कसैप्रति पनि गलत नियत नराखेको र नेपाली फुटबल टिमसँग जोडिन पाएकोमा खुसी रहेको पनि उल्लेख गरेका छन् । उनको प्रशिक्षणमा नेपालले साफ फुटबलको तयारी गरिरहेको छ ।

काठमाडौं । शहीद स्मारक ए डिभिजन लिगको पुरस्कार राशी बढेको छ । अब विजेताले ७५ लाख रुपैयाँ पुरस्कार पाउने भएको छ । यसअघि ए डिभिजन लिग विजेता क्लवको पुरस्कार राशी ५० लाख थियो । अखिल नेपाल फुटबल सङ्घ (एन्फा) ले आज आइतवार डिभिजन लिगको विजेताले ७५ लाख रुपैयाँ पाउने निर्णय गरेको हो । नयाँ सिजनको लिगको उपविजेताले ५० लाख प्राप्त गर्दा तेस्रो हुनेले २५ लाख रुपैयाँ पाउने एन्फाको भनाई छ ।

एन्फाले क्लबलाई तयारी खर्चका लागि २०, २० लाख रुपैयाँसमेत उपलब्ध गराउने छ । एन्फाले लिग सुरु हुने मिति भने सारेको छ । परिवर्तन गरिएको तालिकाअनुसार लिग आउँदो कात्तिक २९ गतेदेखि हुनेछ । ए डिभिजनका १४ क्लबसँग छलफल गर्दै लिगको नयाँ मिति तय गरिएको हो । यही छलफलबाट सहभागी क्लब लिग खेल्न सहमत भएको एन्फाको भनाई छ ।

यसअघि ललितपुरका चार क्लबले कोरोना महामारीलाई कारण दिएर असोज ३ गतेदेखि लिग खेल्न नसक्ने भन्दै ज्ञापन पत्र बुझाएका थिए । साथै, अक्टोबर पहिलो साता साफ च्याम्पियनशिपको आयोजनाको सम्भावना समेत रहेको छ ।

काठमाडौं । जापानमा राजधानी टोकियोमा जारी ३२ औं गृष्मकालिन ओलम्पिकमा नेपाली खेलाडीको प्रदर्शन औसतः मात्र रह्यो । शुक्रबार बिहान नेपाली एथ्लेटिक्स खेलाडी सरस्वती चौधरी मैदानमा उत्रिइन् । तर, उनी समेत प्रारम्भिक चरणबाटै बाहिरिएकी छन् । शुक्रबार बिहान भएको महिला १०० मिटर दौडको प्रारम्भिक चरणको हिटमा सरस्वती ९ खेलाडी मध्ये आठौं स्थानमा रहेर दौड पुरा गरिन् । उनले व्यक्तिगत समयमा समेत सुधार ल्याउन सकिनन् ।

साथै राष्ट्र्रिय कीर्तिमानबाट समेत टाढा रहिन् । उनले १२.९१ सेकेण्डमा १ सय मिटरको दूरी पार गरिन् । उनीको व्यक्तिगत सबैभन्दा बेस्ट समेत भने १२.५५ सेकेन्ड हो । प्रारम्भिक चरणमा कूल २७ खेलाडीले भाग लिए । जसबाट हरेक हिटको शीर्ष तीन र अर्को एक उत्कृष्ट समय हुने खेलाडी गरी १० जना महिला १०० मिटरको राउण्ड १ मा प्रवेश गरे ।

यससँगै ओलम्पिकमा सबै नेपाली खेलाडीको प्रदर्शन सकिएको छ । यो पटक ओलम्पिकमा नेपालबाट ५ खेलाडीले भाग लिएका थिए । सुटिङकी कल्पना परियार र पौडी खेलाडीद्वय एलेक्स शाह र गौरिका सिंहले राष्ट्रिय कीर्तिमान बनाए । जुडो खेलाडी सोनिया भट्ट र चौधरीको सहभागिता भने उल्लेखनीय रहन सकेन । ओलम्पिकको इतिहासमा नेपालले पदक जित्न सकेको छैन ।

काठमाडौं । टोकियो ओलम्पिकबाट सबैभन्दा बढी आशा गरिएकी गौरिका सिंहले औसत प्रदर्शन गरेकी छिन् ।

१ सय मिटर फ्रिस्टाइलको हिट वानमै परेकी गौरिकाले १ मिनेट ०.११ सेकेन्डमा निर्धारित दुरी पूरा गरेकी हुन् । उनी ४ खेलाडी सम्मिलित हिटमा तेस्रो भइन् । हिट-१ मा गौरिकाले नाइजेरिया, मोन्टेनेग्रो र ग्वामका खेलाडीसँग प्रतिस्पर्धा गरेकी थिइन्।

समग्रमा ५१ खेलाडी रहेको यस स्पर्धाबाट शीर्ष १६ खेलाडीले सेमिफाइनलमा स्थान बनाउनेछन् । गौरिकाको अर्को चरणमा पुग्ने सम्भावना समाप्त भइसकेको छ । उनले राष्ट्रिय कीर्तिमान भने बनाएकी छन् । उनले २०१९ मा बनाएको आफ्नै कीर्तिमान सुधारेकी हुन् ।

गौरिकाले सन् २०१९ मा दक्षिण कोरियामा भएको १८ औं फिना वर्ल्ड च्याम्पियनसिपमा १: ००.६२ को समय निकाल्दै राष्ट्रिय कीर्तिमान बनाएकी थिइन् । २०१९ मा नेपालमै भएको १३ औं दक्षिण एसियाली खेलकुदमा कीर्तिमानी चार स्वर्ण पदकसँगै २ रजत र ३ कांस्य जितेकी गौरिकाले रियो ओलम्पिक २०१६ मा पनि नेपालको प्रतिनिधित्व गरेकी थिइन् ।

पौडी खेलाडी अजेक्जेन्डर शाहले हिजो १ सय मिटर फ्रिस्टाइलमै राष्ट्रिय कीर्तिमान बनाएका थिए । हिट चरणमा शीर्ष स्थानमा रहे पनि उनको टाइमिङ अर्को चरणका लागि पर्याप्त भएन ।

शुटिङकी कल्पना परियार र जुडोकी सोनिया भट्टको खेल यसअघि नै सकिसकेको छ भने शुक्रबार एथलेटिक्सकी सरस्वती चौधरीको खेल हुन बाँकी छ । यसपल्ट ओलम्पिकमा नेपालबाट ४ खेलका ५ खेलाडी समावेश थिए ।

काठमाडौं । जापानमा भइरहेको टोकियो ओलम्पिक २०२० अन्तर्गत पौडीतर्फ नेपाली खेलाडी एलेकजान्डर (एलेक्स) शाहले राष्ट्रिय कीर्तिमान कायम गरेका छन् ।

पुरुष १ सय मिटर फ्रीस्टाइलमा आफ्नो हिट जित्ने क्रममा एलेक्सले निर्धारित दुरी ५३।४१ सेकेन्डमा पूरा गर्दै नयाँ कीर्तिमान कायम गरेका हुन् ।

उनले यसअघि आफ्नै नाममा रहेको ५५.३८ सेकेन्डको कीर्तिमान सुधार गरेका हुन् ।

एलेक्सको अर्को चरणमा पुग्ने सम्भावना भने समाप्त भइसकेको छ । अन्य हिटमा प्रतिस्पर्धा गर्ने खेलाडीले एलेक्सभन्दा राम्रो समय निकालेका छन् ।

हिट चरणबाट कम समयमा पूरा गर्ने शीर्ष १६ खेलाडीले सेमिफाइनलमा स्थान बनाउनेछन् । यस स्पर्धामा ७१ जनाले प्रतिस्पर्धा गर्दैछन् । एलेक्स समावेश पहिलो हिटमा ७ तथा अन्यमा ८-८ खेलाडी रहेका छन् ।

काठमाडौं । पाकिस्तानका विश्वचर्चित क्रिकेटर शाहीद अफ्रिदीले नेपालमा एभरेष्ट प्रिमियर लिग (ईपीएल) टी २० क्रिकेट प्रतियोगिता खेल्ने निश्चित भएको छ । उनी पाकिस्तानी राष्ट्रिय क्रिकेट टिमका पूर्वकप्तान हुन् । आगामी असोजमा काठमाडौंको कीर्तिपुरमा आयोजना हुने इपीएलमा उनी काठमाडौं किंग्स ११ को तर्फबाट मैदानमा उत्रने छन् । असोजमा चौथो संस्करणको एभरेष्ट प्रिमियर लिग आयोजना हुँदैछ ।

सोमबार एक कार्यक्रम आयोजना गर्दै टेलेहोल्डिङ्स प्रालिको स्वामित्वमा रहेको काठमाडौंले अफ्रिदीलाई ईपीएलमा ‘आइकोनिक इन्टरनेशनल प्लेअर’को रुपमा अनुबन्ध गरेको घोषणा गरेको हो । कार्यक्रममा शाहीद अफ्रिदी स्वयं भिडियोमार्फत प्रत्यक्षरुपमा जोडिएका थिए । उनले आफू नेपालमा क्रिकेट खेल्ने उत्साहित रहेको प्रतिक्रिया दिए । अफ्रिदीका अनुसार काठमाडौं उनको पहिलो भ्रमण हुनेछ । ४४ वर्षीय अफ्रिदी उनको समयका सबैभन्दा सफल र उत्कृष्ट अलराउण्डर मानिन्छन् । अफ्रिदीलाई टी २० शैली भित्राउने खेलाडीका रुपमा पनि चिनिन्छ ।

काठमाडौंका प्रमुख तथा टेलेहोल्डिङ्स प्रालिका डिरेक्टर रोहित गुप्ताले अन्य राम्रा विदेशी खेलाडी समेत अनुबन्धको तयारी रहेको बताएका छन् । काठमाडौंबाट नेपाली राष्ट्रिय टिमका लेगस्पीनर सन्दीप लामिछाने समेत खेल्ने छन् ।
असोज ९ गतेदेखि २३ सम्म कीर्तिपुरस्थित टीयू क्रिकेट मैदानमा हुने चौथो संस्करणको ईपीएलमा काठमाडौंसहित ६ फ्रेन्चाइजले प्रतिस्पर्धा गर्ने तालीका छ ।

टोकियो । ३२ औं गृष्मकालिन ओलम्पिकका खेलहरु जारी छन् । अहिलेसम्म पदक तालिकामा भने चीनको शूरुवाती अग्रता रहेको छ । ओलम्किपमा सधैजसो चीनले आफ्नो दवदवा राख्ने गरेको छ । यसपटक जापान र अमेरिकाले चीनलाई पच्छ्याइरहेका छन् । आइतबार बिहानसम्मको तालीका अनुसार चीनले तीन स्वर्ण र एक काश्यसहित चार पदक जितेको छ । चीन शीर्ष स्थानमा छ । दोस्रो स्थानमा जापान छ । उसको दुई स्वर्ण र एक रजत पदक रहेको छ ।

अमेरिकाले एक स्वर्ण, दुई रजत र दुई काश्य पदक जितेको छ। अमेरिका तेस्रो स्थानमा रहेको छ । कुल २०६ मुलुक सहभागी रहेको ओलम्पिकमा आइतबार बिहानसम्म ३१ वटा मुलुकले कुनै न कुनै पदक जितिसकेका छन् । अहिलेसम्म १५ स्वर्ण पदकको छिनोफानो भइसकेको छ । कुल १२ मुलुकले स्वर्ण जितिसकेका छन् । नेपालको छिमेकी मुलुक भारतले रजत पदकबाट पदकको खाता खोलेको छ ।

टोकियो । जापानको टोकियोमा जारी विश्वकै सबैभन्दा ठूलो खेल मेला सुटिङमा नेपाली खेलाडीको प्रतिस्पर्धा आजबाटै शुरु भएको छ । आज नेपाली सुटिङ खेलाडी कल्पना परियार पहिलो चरणबाटै बाहरिएिको छिन् । उनको टोकियो यात्राको उपलब्धी भने राष्ट्रिय कीर्तिमानको सुधार रह्यो । शनिबार सम्पन्न महिला १० मिटर एअर राइफल इभेन्टको छनोट चरणमा उनले ६१६.८ स्कोर गरिन । यो राष्ट्रिय कीर्तिमानमा भएको सुधार हो ।

कुल ५० खेलाडीमध्ये उनी ४६औं स्थानमा रहिन । राष्ट्रिय कीर्तिमान समेत उनकै नाममा छ । कल्पनाले १३औं दक्षिण एसियाली खेलकुद सागमा ६१४.५ स्कोर गरेकी थिइन् । यो छनोटबाट शीर्ष ८ स्थानमा रहेका खेलाडी मात्र फाइनलमा चरणमा प्रवेश गरे । आज नेपाली जुडो खेलाडी सोनिया भट्टले महिला ४८ केजीमा प्रतिस्पर्धा गर्दै तालीका छ ।

काठमाडौं । जापानको राजधानी टोकियोमा शुक्रवारबाट ३२ औँ गृष्मकालीन ओलिम्पिक्स सुरु भएको छ । एक भब्य कार्यक्रमका बीच आज सम्पन्न भएको उद्घाटनमा सहभागी मुलुकले मार्चपास गरेका छन् । नेपालका तर्फबाट खेलमा सहभागी पौडी खेलाडी गौरिका सिंह र एलेक्स शाहले उद्घाटन समारोहमा संयुक्त रूपमा नेपालको झन्डा बोकेका छन् । नेपालबाट चार खेलका पाँच खेलाडीसहित २६ सदस्यीय टोली अहिले जापान पुगेका छन् ।

नेपाली खेलाडीको शनिबारबाटै शुरु हुँदैछ । शनिवार शुटिङकी कल्पना परियारले १०० मिटर एयर राइफलमा प्रतिस्पर्धा गर्दैछिन् । जुडोकी सोनिया भट्टले ४८ केजी मुनिको तौल समूहमा खेल्ने तालिका छ । भट्टको विपक्षी खेलाडी रसियाकी डोल्गोभा इरिना रहेकी छिन् । जुलाई २७ मा पौडीका एलेक्स शाहले १०० मिटर फ्री स्टाइलमा र जुलाई २८ मा गौरिका सिंहले सोही इभेन्ट्समा खेल्ने भएका छन् ।

जुलाई ३० मा एथलेटिक्सकी सरस्वती चौधरीले १०० मिटर दौडमा भाग लिनेछिन्। नेपालबाट १२ जना खेलाडीहरूले वाइल्ड कार्डका लागि प्रयास गरेकोका थिए । त्यसबाट दुई जनाले मात्र पाउन सफल भएका थिए। कराँते, भारोत्तोलन, बक्सिङ, आर्चरी र तेक्वान्दोका खेलाडीहरूले वाइल्ड कार्ड पाउन सकेनन्। पाराओलिम्पिक्समा नेपालकी तेक्वान्दो खेलाडी पलेशा गोवर्द्धनले प्रतिस्पर्धा गर्नेछिन्।

टोकियो । ओलम्पिकलाई विश्व खेलकुदको कुम्भमेला मानिन्छ । ३२ औं ग्रीष्मकालीन ओलम्पिक खेलकुदको आयोजनाको जिम्मेवारी पाएको जापानले आज उद्घाटनमार्फत विश्वमा आफ्नो चमत्कार देखाउने अवसर पाएको छ । औपचारिक उद्घाटन आज हुनेछ । जापानको राजधानी टोकियोमा एक विशेष कार्यक्रमकाबीच टोकियो ओलम्पिक औपचारिक रुपमा सुरु हुनेछ ।

नेपाली समय अनुसार दिउँसो ४ बजेपछि उद्घाटन समारोह शुरु हुनेछ । यस दौरान सबै मुलुकको मार्च पास हुने छ । यहाँ नेपालको तर्फबाट पौडी खेलाडी गौरिका सिंह र एलेक्जेन्डर शाह (एलेक्स) ले नेपालको झण्डा बोक्ने भएका छन् । टोकियो ओलम्पिकमा भाग लिन संसारभरबाट खेलाडी, प्रशिक्षक र अफिसियल जापानमा छन् । यहाँ ११ हजार भन्दा बढी खेलाडीले सयौं पदकका लागि प्रतिस्पर्धा गर्नेछन् । नेपालबाट खेलाडीसहित २३ सदस्यीय टोली टोकियो पुगेको छ । यस पटक खेलहरु दर्शक बीना हुने छन् । खेलको प्रत्यक्ष प्रसाारण भने विभिन्न टेलिभिजन च्यानलले गर्नेछन् ।