Category: खेलकुद

काठमाडौं । अखिल नेपाल फुटबल संघ (एन्फा)ले ए डिभिजन लिग फुटबलको खेल तालीका सार्वजनिक गरेको छ । एन्फाका अनुसार हरेक दिन दुई खेल संचालन हुने छन् । प्रतियोगिता कात्तिक २९ बाट शुरु हुँदैछ । लिगको उद्घाटन खेलमा सातदोबाटो युथ क्लब र फ्रेन्ड्स क्लब खेल्ने छन् । उद्घाटन खेल त्रिपुरेश्वरस्थित दशरथ रङ्गशालामा साँझ ५ बजे शुरु हुनेछ ।

पहिलो चरणका अन्य खेल दशरथ रङ्गशाला र एन्फा दुवै मैदानमा आयोजना हुनेछन् । दैनिक दुइर्ए खेल हुनेछन् । त्यसमध्ये दिउँसो १२ बजेको खेल एन्फा कम्प्लेक्स र दिउँसो ३ बजेको खेल दशरथ रङ्गशालामा आयोजना हुनेछ । लिगको तेस्रो चरणपछिका खेल नयाँ मैदान च्यासलमा रहेको टेक्निकल सेन्टर र मनाङका केही खेल पोखरा रङ्गशालामा हुन सक्ने एन्फाको भनाई छ । एन्फाले अहिलेलाई सुरुवाती दुई चरणको मात्र खेल तालिका सार्वजनिक गरेको छ । त्यसपछिको तालिका सार्वजनिक भए पनि खेल स्थल भने तोकिएको छैन ।

फागुन १४ गतेसम्म सञ्चालन हुने लिगमा १४ टोलीले सहभागि छन् । दुई टोली रेलिगेशनमा घटुवा हुनेछन् । लिगमा कुल १३ चरण र ९१ खेल हुनेछ । लिग विजेता टोलीले ७५ लाख, उपविजेताले ५० लाख रुपैयाँ प्राप्त गर्नेछन् । प्रतियोगिताको उत्कृष्ट खेलाडीले गोल्डेन बल प्राप्त गर्नेछन् । सर्वाधिक गोलकर्ताले गोल्डेन बुट तथा उत्कृष्ट गोलरक्षकले गोल्डेन ग्लोभ्स प्राप्त गर्नेछन् । उदीयमान खेलाडीले नगद पुरस्कार पाउने छन् ।

१० कात्तिक, काठमाडौं । नेपाली राष्ट्रिय फुटबल टोलीका मुख्य प्रशिक्षक अब्दुल्लाह अलमुताइरी नयाँ सम्झौतासहित नेपाल आउने भएका छन् । कम्तीमा दुई वर्षको सम्झौता सहित नेपाल गर्कन तयार देखिएका छन् । उनले आफु नेपाल फर्कन लागेको बुधबार सामाजिक संजालमार्फत जानकारी गराएका छन् । अलमुताइरीले अखिल नेपाल फुटबल सङ्घ (एन्फा)सँग नयाँ सम्झौता गर्न सहमत भएका हुन् । एन्फाका अध्यक्ष कर्माछिरिङ शेर्पा र कतार फुटबल एसोसिएशन (क्यूएफए) पदाधिकारीसँगको भेटपछि उनी नेपाल आउन तयार भएका हुन् । उनले दुई वर्षको योजना सार्वजनिक गर्ने समेत जनाएका छन् । उनले नयाँ मिसनमा सफलताको कामना गर्दै लक्ष्य र आउँदो दुई वर्षको योजना छिट्टै प्रकाशित गर्ने उनको प्रतिवद्धता छ । नेपालमा उनी निकै लोकप्रिय छन् ।

काठमाडौं । जारी टि-२० विश्वकप क्रिकेटमा भारतलाई पाकिस्तानले नराम्ररी पराजित गरेको छ । कप्तान बाबर अजाम र विकेटकिपर माेहम्मद रिजवानको उत्कृष्ट ब्याटिङसङ्गै  पाकिस्तानले टी२० विश्वकपमा पहिलाे पटक भारतलाई हराएको हो । दुवै खेलाडीले अर्धशतक जोडे।  युएईमा भईरहेकाे आईसीसी टी२० विश्वकप अन्तर्गत सुपर १२ काे खेलमा पाकिस्तानले भारतलाई १०  विकेटले पराजित हरायो ।
टी२० विश्वकपमा भारतमाथि पाकिस्तानले इतिहासकै पहिलो जित निकाल्यो ।
भारतले दिएकाे १५२ रनकाे लक्ष्य पाकिस्तानले १७.५ ओभरमा विना क्षती पूरा गर्याे ।
रिजवानले ५५ बल खेल्दै ६ चाैका र ३ छक्का मद्दतमा अविजित ७८ रन बनाए । यस्तै कप्तान बाबरले ५२ बल खेल्दै ६ चाैका र २ छक्का मद्दतमा अविजित ६८ रन बनाए ।

त्यसअघि टस हारेर पहिले ब्याटिङ गरेकाे भारतले ७ विकेट गुमाएर १५१ रन बनाएकाे थियाे । भारतका कप्तान विराट काेहलीले ४९ बल खेल्दै ५ चाैका र १ छक्का मद्दतमा ५७ रन बनाए । ऋषभ पन्तले ३० बलमा ३९ रन जाेडे ।

काठमाडौं । फिफा बरियतामा नेपाल एक स्थान तल झरेको छ ।

विश्व फुटबलको सर्वोच्च संस्था फिफाले पछिल्लो समय सार्वजनिक गरेको बरियतामा नेपाल एक स्थान तल झर्दै १६९ औं स्थानमा पुगेको हो । अघिल्लो महिना नेपाल १६८ औं स्थानमा थियो ।

दक्षिण एसियाली देशमा भारत सबैभन्दा माथि १०६औं स्थानमा रहेको छ ।

त्यस्तै, अफगानिस्तान १५२ औं, माल्दिभ्स १५६, बङ्गलादेश १८७, भूटान १८६ पाकिस्तान १९७ औं र श्रीलङ्का २०४ औं स्थानमा रहेका छन् ।

एसियाली मुलुकहरूमा २२ औं स्थानमा इरान, २८ औं स्थानमा जापान ३४ अष्ट्रेलिया र ३५ औं स्थानमा दक्षिण कोरिया छन्।

नयाँ वरीयताको शीर्ष स्थानमा बेल्जियम यथावत रहेको छ ।

यस्तै ब्राजिल दोस्रो, तेस्रोमा फ्रान्स, चौथोमा इटाली र पाँचौ स्थानमा इंग्ल्यान्ड छन्। अर्जेन्टिना छैटौं, स्पेन सातौं, पोर्चुगल आठौं, मेक्सिको नवौं र डेनमार्क दशौं स्थानमा रहेका छन्।

काठमाडौं । साफ च्याम्पियनसिप २०२१ अन्तर्गत नेपाललाई भारतले हराएको छ । आइतबार राति माल्दिभ्सको राष्ट्रिय रंगशालामा भएको खेलमा नेपाल भारतसङ्ग १-० गोलले पराजित भएको हो । पहिलो हाफ गोलरहित बराबरीमा सकिएको खेलको ८२ मिनेटमा भारतले गोल गर्यो । सोही गोल निर्णायक बनेको छ । भारतका लागि कप्तान सुनील क्षेत्रीले गोल गरेका थिए। उनले सिक्स यार्ड बक्समा फारूख चौधरीले हेडमार्फत दिएको पास गोल गरेका थिए।
जारी साफमा भारतको यो पहिलो जित हो। यसअघि भारतलाई श्रीलंका र बंगलादेशले बराबरीमा रोकेका थिए।
नेपालको भने यो पहिलो हार हो। यसअघि नेपालले सुरुवाती दुई खेलमा जित हात पारेको थियो। नेपालले पहिलो खेलमा आयोजक माल्दिभ्स र दोस्रो खेलमा श्रीलंकालाई हराएको थियो। साफको अंक तालिकामा माल्दिभ्स ६ अंक जोड्दै शीर्ष स्थानमा छ। दोस्रो स्थानको नेपालको पनि ६ अंक नै छ। भारत ५ अंक जोडेर तेस्रो स्थानमा छ। चौथो स्थानको बंगलादेशको ४ अंक छ। १ अंक जोडेर पाँचौ स्थानमा रहेको श्रीलंका भने बाहिरिसकेको छ। 
अब समूह चरणको अन्तिम दिनको खेलमा नेपाल र बंगलादेश तथा भारत र माल्दिभ्सबीच खेल हुँदैछ। 

काठमाडौं । साफ साफ च्याम्पियनसिप फुटबल प्रतियोगितामा आज नेपाल र भारत भिड्दैछन् । नेपाली समयअनुसार राति पौने १० बजे माल्दिभ्सको मालेमा शुरु हुने खेललाई निकै महत्वका साथ हेरिएको छ । जारी साफमा नेपाल पूर्ण फर्ममा छ । खुई खेलमा चार गोल गरिसकेको नेपाल समूहको शीर्ष स्थानमा छ । उता, भारतले भने गोलको खडेरी तोढ्न संघर्ष गरिरहेको छ । दुई खेलमा दुई बराबरी खेलेको भारतलाई फाइनल पुग्न आज जित्नै पर्ने दवाव छ ।

नेपालले भने पहिलो खेलमा माल्दिभ्सलाई १–० ले र दोस्रो खेलमा श्रीलङ्कालाई ३–२ ले हराएको थियो । नेपालले कम्तिमा एक बराबरीको नतिजाबाट पनि फाइनल पक्का गर्नेछ । भारतसँगको खेलअघि बोल्दै नेपाली राष्ट्रिय टिमका मुख्य प्रशिक्षक अब्दुल्लाह अलमुताइरीले नेपाली राष्ट्रिय फुटबल टोलीले भारतीय टोलीसँग नडराउने उल्लेख गरेका थिए । भारत साफको सात पटकको विजेता हो ।

काठमाडौं । नेपालले दक्षिण एसियाको सबैभन्दा ठूलो प्रतियोगिता साफ च्याम्पियनशिपमा श्रीलंकामाथि ३-२ गोलको सानदार जित दर्ता गरेको छ । नेपालले २२ वर्षपछि साफमा पहिलो पटक श्रीलंकालाई हराएको हो । लागता दोस्रो जितसँगै जारी प्रतियोगितामा नेपाल अंक तालीकाको शीर्ष स्थानमा उक्लिएको छ । साथै नेपालले फाइनल प्रवेशको सम्भावना पनि बलियो बनाएको छ । अब भारत र बंगलादेशसँग खेल्न बाँकि रहेको नेपालले कम्तिमा एक खेलमा बराबरी गरे मात्र पनि फाइनल प्रवेश गर्ने सम्भावना छ ।

१३ औँ संस्करणसम्म आइपुग्दा दक्षिण एशियाली फुटबलको सबैभन्दा ठूलो प्रतियोगिता साफ च्याम्पियनशिपमा नेपाल अहिलेसम्म फाइनल भने पुग्न सकेको छैन । त्यसकारण यो पटक नेपाललाई इतिहास बनाउने मौका छ । माल्दिभ्सको मालेमा जारी प्रतियोगिताको पहिलो दिन बलियो टीम आयोजक माल्दिभ्समाथि नेपालले १-० अन्तरको जित निकालेको थियो ।

सोमवार राति रोमाञ्चक खेलमा भयो । साफमा एकै खेलमा सर्वाधिक गोल हुने खेल समेत बन्न पुग्यो । खेलको ३० औँ मिनेटमा सुमन लामाले डि बक्स भित्रबाट गरेको शक्तिशाली प्रहार विपक्षी गोलरक्षकलाई बीट गर्दै गोलमा परिण्त भएको थियो । दोस्रो हाफ शुरु हुनासाथ नेपालले अग्रता दोब्बर पार्यो । आयुष घलानले दायाँ छेउबाट गरेको क्रसमा नवयुग श्रेष्ठले हानेको फितलो प्रहार गोलकीपरले रोके ।

तर फर्केर आएको सोही बललाई अञ्जन विष्टले पोस्टमा छिराए । ५६ औँ मिनेटमा मर्विन ह्यामिल्टनले श्रीलङ्काका लागि पहिलो गोल गरे । खेल सकिन ४ मिनेट बाँकि रहेको समयमा आयुष घलानले सुन्दर गोल गर्दै नेपाललाई ३-१ को अग्रता दिलाए । खेलको इन्ज्युरी समयमा श्रीलङ्काले पेनाल्टी पायो र त्यसलाई डिलन डे सिल्भाले गोल गरेर खेल ३-२ को स्थितिमा ल्याए।

नेपालका कुवेती प्रशिक्षक अब्दुल्लाह अल्मुताइरीले बुनेको रणनीति मालेमा सफल देखिएको छ । साथमा विगतमा खेलाडीमा देखिएको गोलको फिनिसिंगमा उनले व्यापक सुधार गरेका छन् । यसमा युवा खेलाडीले भरपुर साथ दिएका छन् । नेपालले अब २४ असोजमा भारत र २७ असोजमा बंगलादेशको सामना गर्नेछ । भारत सबैभन्दा बलियो टीम हो ।

काठमाडौं । माल्दिभ्समा जारी साफ च्याम्पियनसिप २०२१ अन्तर्गत नेपालले आज श्रीलंकाको सामना गर्दैछ । मालेस्थित नेशनल फुटबल स्टेडियममा संचालन भइरहेको प्रतियोगितामा नेपालको खेल नेपाली समय अनुसार राति ९ः४५ मा शुरु हुनेछ । यसअघि पहिलो खेलमा घरेलु टोली माल्दिभ्सलाई १-० ले हराएको नेपाल उच्च मनोवलका साथ मैदान उत्रने छ । श्रीलंकाविरुद्ध जित निकाल्न सके नेपाललाई अर्को चरण पुग्न सहज हुने छ ।

श्रीलंका उद्घाटन खेलमा बंगलादेशसंग १-० ले नै पारजित भएको थियो । नेपालका प्रशिक्षक अबदुल्लाह अलमुताइरीले माल्दिभ्सविरुद्धको खेल बिर्सेर श्रीलंकाविरुद्ध खेल्नुपर्ने बताएका छन् । उनले श्रीलंकाविरुद्धको खेल पहिलो र फाइनल जस्तै भएको बताए । उनले श्रीलंकालाई सहज रुपमा नलिने उल्लेख गरेका छन् ।

काठमाडौं । शुक्रबारबाट शुरु भएको साफ चाम्पियनसिपमा नेपालले विजयी शुरुवात गरेको छ । नेपालले आयोजक माल्दिभ्सलाई उसकै घरेलु मैदानमा १-० गोल अन्तरले हराएको हो । नेपालले साफमा पहिलो पटक माल्दिभ्सलाई हराउन सक्यो । यो ऐतिहासिक जितको नायक बने मनिस डाँगी । उनले ८६ औं मिनेटमा गरेको एक मात्र गोल नै निर्णय बन्यो । ६९औं मिनेटमा नवयुग श्रेष्ठको स्थानमा उनी मैदान प्रवेश गरेका थिए ।

प्रशिक्षकको रणनीतिलाई सहि सावित गर्दै डाँगीले ८६औं मिनेटमा निर्णायक गोल गरे । खेलमा नेपालका कप्तान तथा गोलकिपर किरण कुमार लिम्बुले समेत उत्कृष्ट बचाउ गरे । पहिलो हाफमा माल्दिभ्सले राम्रो दवाव बनाएको थियो । तर, दोस्रो हाफमा नेपालमा खेलमा फर्कियो । माल्दिभ्स साविक विजेता समेत हो । जितसँगै नेपालले तीन अंक जोड्न सफल भयो । नेपालको दोस्रो खेल श्रीलंकासँग सोमबार छ ।

काठमाडौं । दक्षिण एसियाली मुलुकको सर्वाधिक ठूलो फुटबल प्रतियोगिता साफ च्याम्पियनसिप आजबाट शुरु हुँदैछ । १३ औं संस्करणको प्रतियोगिताको आयोजक माल्दिभ्स हो । मालेस्थित राष्ट्रिय फुटबल स्टेडियममा संचालन हुने प्रतियोगिताको उद्घाटन खेलमा नेपाल र माल्दिभ्स भिड्दैछन् । साफ च्याम्पियनसिपमा पाँच मुलुक उपाधीका लागि भिड्दैछन् ।

यस पटक आयोजक माल्दिभ्स, नेपाल, भारत, बङ्गलादेश र श्रीलङ्काको सहभागिता रहेको छ । लिगमा पाँच वटै टोलीले एक अर्काविरुद्ध खेल्नेछन् । लिग चरणको खेलपछि शीर्ष दुई टोलीले उपाधिका लागि असोज ३० मा प्रतिस्पर्धा गर्नेछन् । १३ औं साफको पहिलो दिन आजै दुई खेल हुने छन् । आज नेपाल र आयोजक माल्दिभ्ससँगै श्रीलङ्का र बङ्गलादेश भिड्ने छन् । नेपाल यो पटक राम्रो तयारीमा रहेका कारण उपाधी दावेदार टीम मानिएको छ । नेपालले अहिलेसम्म साफको उपाधी जित्न सकेको छैन ।

काठमाडौं । साफ च्याम्पियनसिपको लागि नेपाली टोलीको घोषणा भएको छ ।

मुख्य प्रशिक्षक अब्दुल्लाह अलमुताइरीले आउँदो शुक्रवारदेखि सुरु हुने साफ च्याम्पियनसिपको लागि किरण चेम्जोङको कप्तानीमा २३ सदस्यीय टोली घोषणा गरेका हुन् ।

कतारमा भइरहेको प्रशिक्षणपछि अलमुताइरीले विकेथ कुथु र राजन गुरुङलाई टिम बाहिर राखेका छन् ।

टिममा किरण चेम्जोङ (गोलरक्षक), दीप कार्की (गोलरक्षक), विशाल श्रेष्ठ (गोलरक्षक), आशिष लामा, अनन्त तामाङ, अन्जन विष्ट, आयुष घलान, विशाल राई, दिनेश राजवंशी, गौतम श्रेष्ठ, कमल थापा, मनिष डाँगी, नवयुग श्रेष्ठ, नितिन थापा, पुजन उपरकोटी, रोहित चन्द, सन्तोष तामाङ, सुजल श्रेष्ठ, सुमन अर्याल, सुमन लामा, सुनिल बल, सुरज ज्यु ठकुरी र तेज तामाङ रहेका छन् ।

साफ च्याम्पियनसिप अक्टोबर १ देखि १६ सम्म मालेमा हुँदैछ । नेपालसँगै भारत, माल्दिभ्स, श्रीलंका र बंगलादेशले राउण्ड रोबिन लिगमा प्रतिस्पर्धा गर्नेछन् । लिगको शीर्ष दुई टोलीले फाइनल खेल्नेछन् ।

दोहा । नेपाल र ओमानबीच आज अन्तर्राष्ट्रिय मैत्रपूर्ण फुटबल हुँदैछ । नेपाली समय अनुसार राति पौने १० बजे दोहामा हुने यो खेल नेपालले साफ फुटबलको तयारीमा रुपमा लिएको छ । नेपाली टोली अन्तराष्ट्रिय प्रशिक्षणका क्रममा अहिले दोहामा रहेको छ । साफ च्याम्पियनसिपको तयारीका क्रममा नेपाल र ओमान मैत्रीपूर्ण खेलमा भिड्न लागेका हुन् ।

यसअघि नेपालले काठमाडौंमा भारतसँग दुई मैत्रीपूर्ण खेल खेल्दै दोहा गएको हो । ती दुई खेलमध्ये एकमा बराबरी र एकमा हार बेहोरेको थियो । नेपाली टोली कतारबाटै साफका लागि माल्दिभ्स जाँदैछ । साफ च्याम्पियनसिप १५ असोजबाट शुरु हुने छ । साफ दक्षिण एसियाली भेगको सबैभन्दा ठूलो फुटबल प्रतियोगिता हो ।

काठमाडौं । शनिबारबाट शुरु भएको एभरेष्ट प्रिमियर लिग (ईपीएल)मा काठमाडौं किंग्स ११ ले विजयी शुरुवात गरेको छ । यो टीममा पाकिस्तानी स्टार क्रिकेटर साहिद अफ्रिदी समेत छन् । टीमलाई सन्दीप लामिछानेले नेतृत्व गरिरहेका छन् । काठमाडौंले साविक विजेता ललितपुरलाई ७ विकेटले हराएको हो । काठमाडौंका लागि बलर जितेन्द्र मुखिया, विकेटकिपर ब्याट्सम्यान रहमानुल्लाह गुर्बाज र अलराउण्डर रायल बर्लले आज उत्कृष्ट प्रदर्शन गरे । टस हारेर पहिले ब्याटिंग गरेको ललितपुरले १५८ रनको लक्ष्य काठमाडौंलाई दिएको थियो । काठमाडौंले १४.२ ओभरमा ३ विकेट गुमाएर लक्ष्य भेटायो ।

काठमाडौंका लागि जिम्बाब्बेका बर्लले अविजित ७३ रन जोडे । अफगानिस्तानका गुर्बाजले ५९ रन प्रहार गरे । राजु रिजाल १९ रनमा अविजित रहे । ललितपुरका पवन सर्राफले १ विकेट लिए । कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको ललितपुरले पवन सर्राफको अर्धशतक मद्दतमा निर्धारित २० ओभरमा ८ विकेट गुमाएर १५७ रन बनाएको हो । सर्राफले ६१ रन बनाए । पाकिस्तानी स्टार शाहिद अफ्रिदीले ४ ओभरमा ३२ रन खर्चिए तर, विकेट लिन सकेनन् । उनले आज ब्याटमा भने मौका पाएनन् ।

काठमाडौं । नेपालमा आजबाट चौथो संस्करणको एभरेस्ट प्रिमियर लिग (ईपीएल) टी २० क्रिकेट प्रतियोगिता शुरु हुँदैछ । कीर्तिपुरस्थित त्रिवि क्रिकेट मैदानमा हुने आजको उद्घाटन खेलमा साविक विजेता ललितपुर प्याट्रिओट्स र काठमाडौं किंग्स ११ भिड्ने छन् । खेल नेपाली समय अनुसार सवा १२ बजे शुरु हुनेछ। ललितपुरको कप्तानी कुशल भुर्तेल र काठमाडौंको कप्तानी सन्दीप लामिछानेले गर्दैछन् । प्रतियोगितामा चर्चित विदेशी खेलाडीहरुको समेत जमघट रहेको छ । इपिएल ९ देखि २३ गतेसम्म चल्नेछ ।

प्रतियोगितामा ६ फ्रेन्चाइज टीमले एकल राउन्ड रोविन नियमअनुसार प्रतिस्पर्धा गर्दैछन् । यस आधारमा लिगका शीर्ष चार टोली क्वालिफायर चरणमा छनोट हुनेछन् । पहिलो र दोस्रो स्थानबीचको विजेता सीधै फाइनलमा पुग्नेछ । यो खेलबाट पराजित भएको टोली र चौथो स्थानमा रहेको बीच खेलबाट विजेताले फाइनलमा स्थान बनाउनेछ । विजेताले ५० लाख र उपविजेताले १५ लाख नगद पाउने छ । यसपटकको इपिएलमा २४ जना विदेशी खेलाडी खेल्दैछन्।

काठमाडौं । एएफसी वुमेन्स एसियन कप छनोट प्रतियोगिताको समूह चरणको अन्तिम खेलमा आज नेपालले हङकङको सामना गर्दैछ । पहिलो खेलमा ९० मिनेटसम्म अग्रता बनाएर पनि अन्तिम दुई मिनेट सम्हालिन नसक्दा फिलिपिन्ससँग हारेको नेपाल आज बलियो टोली हङकङसँग अझै बढी दवावमा भने हुने छ । नेपाल र हङकङ ३२ वर्षपछि भिड्न लागेका हुन् ।

नेपालले १९८६ मा पहिलो पटक हङकङमा आयोजित एफसी वुमेन्स च्याम्पियनसिपमा पहिलो अन्तर्राष्ट्रिय फुटबल खेलेको थियो । त्यसबेला नेपाल हङकङसँग १–० ले हारेको थियो । आज उज्वेकिस्तानको तास्केन्दस्थित जेएआर रंगशालामा यी दुई टीमबीच प्रतिस्पर्धा हुन लागेको हो । नेपाली टिमलाई अहिले अस्ट्रेलियन प्रशिक्षक ग्यारी फिलिप्सले सम्हालिरेहका छन् ।

उनले २२ वर्षपछि महिला फुटबललाई एसियाकै सर्वोच्च प्रतियोगिता ‘एएफसी वुमेन्स एसियन कप’ छनोट गराउने लक्ष्य लिएका थिए । तर, पहिलो खेलपछि भने यो अभियानमा धक्का लागेको छ । हङकङ भने चौधपल्ट एसियन कप खेलिसकेको छ । सोहीकारण उसका लागि नेपाल सजिलो प्रतिस्पर्धी हुन सक्छ । हङकङ फिफा वरीयताको ७६ औं स्थान र नेपाल १०१ औं स्थानमा छन् ।

काठमाडौं । बलियो टोली ओमानविरुद्ध नेपालले सानदार जित निकालेको छ । आईसीसी विश्व कप क्रिकेट लिग–२ अन्तर्गत त्रिदेशीय एकदिवसीय शृङ्खलामा नेपालले ओमानलाई सात विकेटले हराएको हो । पहिलो खेलमा ओमानसँग ५ विकेटको हार बेहोरेको नेपालले आज त्यसको बदला समेत लिएको छ । नेपालले प्रतियोगितामा दुई जित र दुई हार बेहोर्यो ।

आइतबार साँझ अल अमिरात मैदानमा सम्पन्न खेलमा ओमानले पहिले ब्याटिंंग गर्दै मात्र एक सय २२ रन जोड्यो । यो लक्ष्य नेपालले १८ ओभर २ बलमा तीन विकेट मात्र गुमाएर पुरा गर्यो । नेपालका लागि कप्तान ज्ञानेन्द्र मल्लले अर्धशतक हाने । मल्लले ४६ बलमा अविजित ५२ रन जोडे । आसिफ शेख ४० रनको योगदान गरे ।

अल अमिरात क्रिकेट मैदानमा टस हारेर पहिले ब्याटिङ गरेको ओमानलाई ३७ ओभर १ बलमा समेट्ने क्रममा करण केसी र सन्दीप लामिछानेले चम्किएका थिए । उनीहरुले चार–चार विकेट लिए । शरद भेषवाकरले दुई विकेट लिए । जितसँगै नेपाल आठ खेलमा आठ अङ्कसहित चौथो स्थानमा उक्लियो ।

ओमान १३ खेलमा २० अङ्कसहित शीर्ष स्थानमा कायम छ । यो लीगमा कुल सात टोली छन् । एक टोलीले कुल ३६ खेल खेल्ने छ । लिग–२ को शीर्ष तीन स्थानमा रहने देश सन् २०२३ मा जुलाईमा जिम्बावेमा आयोजना हुने विश्व कप छनोटमा भाग लिन छनोट हुनेछन् ।