Category: खेलकुद

काठमाडौं । श्रीलंकन मुलका क्यानेडियन नागरिक पुबुदु दसानायके दोस्रो पटक नेपाली राष्ट्रिय क्रिकेट टिमको प्रशिक्षक बनेका छन् । नेपाल क्रिकेट संघ क्यानको बोर्ड बैठकले शनिबार पुबुदुलाई प्रशिक्षकमा नियुक्त गरेको हो । पुबुदु यसअघि सन् २०११ देखि २०१५ सम्म नेपालको प्रशिक्षक थिए । पुबुदुकै प्रशिक्षणमा नेपालले २०१४ को टी-२० विश्वकप खेलेको छ ।

गत सेप्टेम्बरमा डेभ वाटमोरले राजीनामा दिएपछि प्रशिक्षकविहीन रहेको नेपाली क्रिकेट टिमले करीब तीन महिनापछि नयाँ मुख्य प्रशिक्षक पाएको हो । क्यानले मुख्य प्रशिक्षक पदका लागि दरखास्त आह्वान गरेकोमा ६० जनाले आवेदन दिएका थिए । जसमध्ये १५ जना सर्टलिस्ट गरेको क्यानले अन्तिम चरणमा पाँच जनाको अन्तर्वार्ता लिएको थियो । अब नेपालले २०२२ फेब्रुअरीमा टी-२० विश्वकपको ग्लोबल छनोट खेल्दैछ ।

काठमाडौं । सन् २०२२ अक्टोबर\नोभेम्बरमा अस्ट्रेलियामा आयोजना हुने आइसिसी टी-२० विश्वकपको छनोटमा नेपाल तुलनात्मक रुपमा सजिलो समूहमा परेको छ । विश्व छनोटको समूह विभाजनमा नेपाल समूह ए मा परेको छ। समूह ए मा नेपालसहित आयरल्यान्ड, ओमान, बहराइन, क्यानडा, जर्मनी, फिलिपिन्स र युएई छन् ।

यो समूहका खेल आगामी १५ देखि २५ फेब्रुअरीमा ओमानमा हुनेछ। यो प्रतियोगिताको समूहबाट शीर्ष दुई टिम विश्वकप खेल्न छनोट हुने छन् । समूह बी मा भने आयोजक जिम्बावेसहित हङकङ, नेदरल्यान्ड्स, युगान्डा, पपुवा न्युगिनी, जर्सी, सिंगापुर र अमेरिका छन्। यो समूह अर्को समुहको तुलनामा बलिया टीमहरु रहेका छन् । विश्वकपमा कुल १६ टिमबीच प्रतिस्पर्धा हुनेछ ।

१२ टिमको भने विश्वकप सहभागिता निश्चित भइसकेको छ । सन् २०२१ को टी-२० विश्वकपको सुपर १२ मा पुगेका अफगानिस्तान, बंगलादेश, इंग्ल्यान्ड, भारत, नामिबिया, न्युजिल्यान्ड, पाकिस्तान, स्कटल्यान्ड, दक्षिण अफ्रिका, श्रीलंका र वेस्ट इन्डिजले सन् २०२२ को टी-२० विश्वकपमा सिधै पुगेका हुन् । अस्ट्रेलिया भने आयोजकको हैसियतमा विश्वकपमा छनोट भएको छ ।

काठमाडौं । शहिद स्मारक ‘ए’ डिभिजन लिग खेलाइरहेका नौ जना फिफा रेफ्रीले बिहीबार सामूहिक राजीनामा दिएका छन् । रेफ्रीहरुले अखिल नेपाल फुटबल संघ (एन्फा)लाई राजिनामा बुझाएका हुन् । एन्फाले लिग चलिरहेको समयमा रेफ्रीको ‘फिटनेश लेभल टेस्ट’ माग गरेको थियो । यसको विरोध गरिरहेका रेफ्रीहरुले सामूहिक राजीनामा गरेका छन् ।

राजीनामा बुझाउनेमा फिफा रेफ्री नविन्द्र महर्जन, प्रकाशनाथ श्रेष्ठ र प्रज्वल क्षेत्री तथा फिफा असिस्टेन्ट रेफ्रीहरु नानीराम थापा, विक्रम चौधरी, किशन यादव, युनाल मल्ल, माधव खत्री र सहदेव श्रेष्ठ छन् । रेफ्रीहरुले फिटनेश टेस्ट गर्ने भए लिग रोकेर फिटनेशका लागि समय दिनुपर्ने माग गरेका थिए ।

एन्फाले भने हरेक तीन महिनामा रेफ्रीको ‘फिटनेश लेभल टेस्ट’ गरिनु पर्ने फिफाको निर्देशन अनुसार नै रेफ्रीको ‘फिटनेश लेभल टेस्ट’ माग गरेको बताएको छ । शहिद स्मारक ‘ए’ डिभिजन लिग अन्तर्गत शुक्रबारदेखि दशरथ रंगशालामा तेस्रो चरणका खेल सुरु हुँदैछन् । रेफ्रीकै कारण शुक्रबारको खेल भने रोकिने छैन ।

पेरिस । संसारका उत्कृष्ट फुटबल खेलाडीबाट सर्वोकृष्ट एक जनालाई प्रदान गरिने प्रतिष्ठित बालोन डि’ओर अवार्ड अर्जेन्टिनाका स्टार फुटबलर लिओनल मेसीले जितेका छन् । उनले यो अवार्ड कीर्तिमानी सातौ पटक जिते । यस्तो रेकर्ड बनाउने उनी एक्ला खेलाडी हुन् । बार्सिलोनाबाट पेरिस सेन्ट जर्मेन गई व्यवसायी फुटबल खेलिरहेका मेसीले बार्यन म्युनिख तथा पोल्याण्डका रोबर्ट लेभान्डोस्की, चेल्सी तथा इटलीका जोर्जिन्हो र रियल मड्डिड तथा फ्रान्सका करिम बेन्जिमालाई उछिनेका हुन् ।

३४ वर्षका मेस्सीले यो वर्ष अर्जेन्टिनालाई कोपा अमेरिकाको उपाधि जिताउन महत्वपूर्ण भूमिका खेलेका थिए । यस वर्ष उनले कुल ४० गोल गरेका थिए । अवार्डका लागि विश्वभरका १८० पत्रकारले मतदान गर्छन् । सन् २०२० मा कोरोनाका कारण अवार्ड वितरण गरिएन । मेसिले २००९, २०१०, २०११, २०१२, १०१५, २०१९ र २०२१ गरी सात पटक यो अवार्ड जिते ।

यूएई । टी २० विश्वकप क्रिकेटको ग्लोबल छनोटमा नेपाल असफल भएको छ । लीग चरणको अन्तिम खेलमा आइतवार यूएईसँग नेपाल ४८ रनले हार्यो । यससँगै नेपालको ग्लोबल क्वालिफायरको ढोका बन्द भएको छ । यूएईमा सञ्चालन भइरहेको प्रतियोगिताको अन्तिम तथा निर्णायक मानिएको खेलमा नेपाललाई १० बल बाँकी रहँदै जित्नुपर्ने बाध्यता थियो। त्यसो भएमा मात्र नेपाल रन रेटले अगाडी जाने सम्भावना थियो ।

यूएई लीग तालिकाको शीर्ष स्थानमा रहेर विश्वकपको ग्लोबल क्वालिफायरमा पुगेको छ । टी(२० विश्वकपको एशियाली क्षेत्रीय छनोटमा नेपालले पाँच खेलमध्ये दुईमा हार र तीन खेलमा जित निकाल्न सक्यो । ग्लोबल क्वालिफायरमा छानिएको यूएईले भने सबै पाँच खेल जित्न सफल रह्यो । यूएईले पहिलो ब्याटिङ गर्दै पाँच विकेटको क्षतिमा १२७ रनको योगफल बनाएको थियो । जवाफी ब्याटिंगमा उत्रिएको नेपाल १९.४ ओभरमा ७९ रनमा अलआउट भयो ।

यूएई । आईसीसी महिला टी(२० विश्वकप एसिया छनोट अन्तर्गत अन्तिम खेलमा नेपाल र घरेलु टोली यूएईबीच आज प्रतिस्पर्धा हुँदैछ । शीर्ष स्थानमा रहेने एक मात्र टोली ग्लोबल क्वालिफायरमा पुग्छ । यूएईलाई हराउन सक्ने नेपालको सम्भावना कायम रहने छ । युएई लगातार चार खेलबाट ८ अंकसहित पहिलो स्थानमा छ । नेपालले एक खेल हारका कारण ६ अंकसहित दोस्रो स्थानमा छ ।

नेपालले शीर्ष स्थानमा रहन यूएईलाई राम्रो नतिजामा हराउनुपर्छ । नेपाल र यूएईबीचको खेल दुबईस्थित आईसीसी एकेडेमी ग्राउन्डमा नेपाली समय अनुसार बिहान ११ः१५ बजे सुरु हुनेछ । नेपालले यूएईलाई हराउन नसक्दा भने छनोट चरणबाटै बाहिरिने छ ।

काठमाडौं । सन् २०२२ मा कतारमा आयोजना हुने फिफा विश्वकपमा युरोपेली क्षेत्रको छनोटको प्लेअफमा इटली र पोर्चुगल एकै टीममा परेका छन् । शुक्रबार भएको समूह विभाजनमा युरो विजेता इटाली र पोर्चुगल एकै समूहमा परेसँगै विश्वकपमा एउटा मात्र टीम पुग्ने निश्चित भएको हो ।

प्लेअफको समूह सी मा इटालीले पहिलो खेल नर्थ म्यासेडोनियाविरुद्ध खेल्नेछ । पोर्चुगलले टर्कीसँग खेल्नेछ । दुई खेलको विजेता टिम यस समूहको फाइनलमा खेल्नेछन् । विजेता विश्वकपमा छनोट हुनेछ । प्लेअफमा १२ टिमलाई तीन समूहमा विभाजन गरि खेल खेलाइंदैछ ।

काठमाडौं । आइसीसी महिला टी-२० विश्वकप एसिया क्षेत्र छनोट अन्तर्गत पहिलो खेलमा नेपाललाई हङकङले ६ विकेटले हराएको छ । हङकङका लागि मारिको हिलले शानदार ब्याटिङ गरेपछि नेपाल पराजित भएको हो । उनले ४२ बलमा ४४ रन जोड्दै जितको आधार तयार पारिन् । नेपालले टस हारेर ३ विकेटको क्षतिमा १०४ रन मात्र बनाएको थियो । जवाफमा हङकङले १८ औँ ‍ओभरमा लक्ष्य भेटायो । नेपाल हङकङ भन्दा बलियो टोली भएपनि पराजित भएको हो ।

पहिलो हारसँगै नेपालको विश्वकप यात्रा कठिन बन्ने देखिएको छ । किनकी यो प्रतियोगिताको शीर्ष स्थानमा रहने टोलीले मात्र ग्लोबल क्वालिफायरमा भाग लिन पाउँछ । एसिया क्षेत्र छनोटमा नेपाल सहित भुटान, हङकङ, कुवेत, मलेसिया र यूएई सहभागी छन्। नेपाल आगामी सबै खेलमा विजय भई हङकङ हारेको अवस्थामा मात्र नेपालको सम्भावना रहन्छ ।

काठमाडौं । आईसीसी महिला टी–२० विश्व कप एसिया छनोट अन्तर्गत नेपालले हङकङको सामना गर्दैछ । खेल दुबईको आईसीसी क्रिकेट एकेडेमीमा हुनेछ । नेपाली समय अनुसार बिहान सवा ११ बजे शुरु हुने खेलमा नेपाल स्पष्ट जितका लागि मैदान उत्रने छ । यसअघि नेपालले कतारसँग टी-२० सिरिज खेलेको थियो । तीन खेलको सिरिज हात पारेको नेपाल पूर्ण आत्मविश्वासका साथ मैदान उत्रने छ ।

टी–२० विश्व कप एसिया छनोटमा नेपालले हङकङसहित आयोजक यूएई, भुटान, मलेसिया र कुवेतसँग खेल्ने छ । राउण्ड रोबिन प्रणालीमा हुने प्रतियोगिताको विजेता विश्व कपको ग्लोबल छनोटमा पुग्ने छ । नेपालको अन्य खेल मंगलबार भुटानसँग, बिहीवार कुवेतसँग, शुक्रवार मलेसियासँग र आइतवार यूएईसँग रहेको छ ।

माले । नेपाली राष्ट्रिय टोलीका कप्तान किरणकुमार लिम्बूले माल्दिभ्सबाट व्यवसायिक फुटबल खेल्ने भएका छन् । यसअघि उनले भारतीय क्लव पन्जाव एफसीमा आवद्ध भई फुटबल खेल्दै आएका थिए । किरणले यो सिजन भने किरण माल्दिभ्सको एक डिभिजन क्लब माजिया एससीबाट खेल्ने भएका हुन् । उनी स्वयमले फोटो सार्वजनिक गर्दै यसबारे जानकारी गराएका छन् ।

उनले क्लवका लागि शतप्रतिशत नतिजा दिलाउने प्रतिवद्धता समेत जनाएका छन् । उनी शुक्रबार माल्दिभ्स पुगेका थिए । माजिया सन् २०१९\२० र २०२०\२१ सिजनको च्याम्पियन क्लव समेत हो । गत सिजन किरण भारतयि लीगको उत्कृष्ट गोलकिपर बनेका थिए । राष्ट्रिय टिममा समेत उनले उत्कृष्ट प्रदर्शन गर्दै आएका छन् ।

काठमाडौं । नेपालमा आजबाट ‘सहिद स्मारक ए डिभिजन लिग २०७८’ शुरु हुँदैछ । यो लिग नेपालको सबैभन्दा ठूलो घरेलु लिग हो । आज उद्घाटन खेलमा फ्रेण्ड्स क्लब कुपण्डोल र नवप्रवेशी सातदोबाटो युथ क्लबबीच प्रतिस्पर्धा हुँदैछ । पहिलो पटक ए डिभिजन लिगको खेल फ्लडलाइटमा हुनेछ । त्रिपुरेश्वरस्थित दशरथ रंगशालमा अपराह्न ४ः४५ मा शुरु हुने खेल रात्रिकालिन हुन लागेको हो ।

एन्फाले फुटबल कल्चर विकास गर्ने लक्ष्यसहित यस पटक विकेन्डमा लिगका खेल गराउने भएको छ । दर्शकलाई आकर्षित गर्नका लागि टिकट दर पनि एक सय मात्र राखिएको छ । भिआईपीतर्फ भने ५०० टिकट मूल्य राखिएको छ । लिग विजेताले नगद ७५ लाख पाउनेछन् । उपविजेताले ५० लाख र तेस्रोले २५ लाख प्राप्त गर्नेछ । लिगमा १४ क्लब प्रतिस्पर्धामा छन् । पुछारमा रहने दुई टीम रेलिगेसनमा पर्नेछन् ।

काठमाडौं । सहिद स्मारक ‘ए’ डिभिजन लिगको मूख्य प्रायोजक कतार एयरवेज बनेको छ । अखिल नेपाल फुटबल संघ (एन्फा) र कतार एयरवेजबीच मूख्य प्रायोजकको सम्झौता भएको हो । पछिल्लो सिजन समेत लिगको प्रायोजक कतार एयरवेज नै थियो । यस पटक मूख्य प्रायोजक बनेवापत कतारले एन्फालाई १ लाख ५० हजार डलर प्रदान गर्नेछ ।

एन्फा कम्प्लेक्स सातदोबाटोमा बुधबार आयोजित कार्यक्रममा संघका अध्यक्ष कर्माछिरिङ शेर्पा र कतार एयरवेजका कन्ट्री म्यानेजर मोहम्मद अल इमानबीच सम्झौतापत्रमा हस्ताक्षर भयो ।

कतार एयरवेज विश्व खेलकुदको विकास र विस्तारको पक्षमा रहेको भन्दै उनले नेपाली फुटबलमा पनि निरन्तर सहयोग रहने बताए । कतार एयरवेज बायर्न म्युनिक र पेरिस सेन्ट जर्मेन (पीएसजी) जस्ता विश्वस्तरीय क्लवको समेत मुख्य प्रायोजक हो । ‘ए’ डिभिजन लि शुक्रबारबाट सुरु हुनेछ ।

दोहा । नेपाली महिला क्रिकेट टीमले ऐतिहासिक सिरिज जितेको छ । कतारलाई लगातार दुई खेलमा हराएको नेपाली महिला राष्ट्रिय क्रिकेट टोलीले पहिलो पटक टी २० अन्तर्राष्ट्रिय शृङ्खला जितेको हो । नेपालले कतारलाई दोस्रो खेलमा बुधबार ६१ रनले हरायो । मंगलबार नेपालले कतारमाथि ११९ रनको फराकिलो जित निकालेको थियो । लगातार दोस्रो जितसहित नेपालले तीन खेलको शृङ्खलामा कब्जा जमाएको हो ।

नेपाल र कतारबीच अन्तिम खेल बिहीवार हुँदैछ । महिला क्रिकेट टोली पहिलो पटक सिरिज खेल्न मैदानमा उत्रिएको हो । जहाँ पहिलो यात्रामै सफलता मिलेको छ । बुधबार नेपालले टस जितेर दोहास्थित वेस्ट इन्ड पार्क क्रिकेट स्टेडियममा पहिले ब्याटिङ रोजेको थियो।

कप्तान रुबिना क्षेत्रीको ५० रनको अर्धशतकीय पालीको सहयोगमा नेपालले १२९ रन बनायो । ओपनर कविता कुँवरले ३१ रन बनाइन् । जबाफमा कतारले सबै विकेट गुमाउँदा मात्र ६८ रन बनायो । नेपालका लागि सरस्वती कुमारीले सर्वाधिक ४ विकेट झारिन् ।

दोहा । नेपालले पहिलो टी२० अन्तर्राष्ट्रिय सिरिजमा सानदार शुरुवात गरेको छ । मंगलबार सम्पन्न खेलमा कतारमाथि ११९ रनको फराकिलो अन्तरको जित निकाल्दै नेपालले तीन खेलको सिरिजमा १–० को अग्रता बनाएको छ । दोहामा टस हारेर पहिले ब्याटिङ गरेको नेपालले इन्दु वर्माको कीर्तिमानी अर्धशतकीय पालिको सहयोगमा १४६ रन जोड्यो ।

जवाफी ब्याटिङमा उत्रिएको कतार ११.५ ओभरमा मात्र २७ रन बनाउँदा अलआउट भयो । कप्तान रुविना क्षेत्रीले मात्र एक रनमा तीन विकेट तथा कविता कुँवरले छ रनमा र सीता राना मगरले तीन रन खर्चेर दुई, दुई विकेट लिएका छन् । करुणा भण्डारीले दुई ओभरमा दुई रन मात्र खर्चेर एक ब्याटरलाई आउट गरिन् । कतारका लागि खाडिया इम्तियाज र एन्जेलिन मारेले आठआठ रन जोडे । नेपालको पालिमा भने इन्दुले ४७ बलमा ५५ रन बनाइन् ।

दुबई । न्यूजिल्याण्डलाई पराजित गर्दै अष्ट्रेलियाले पहिलो पटक आईसीसी टी-२० विश्वकपको उपाधि उचालेको छ । आइतबार राती सम्पन्न फाइनलमा न्यूजिल्याण्डमाथि ८ विकेटको प्रभावशाली जित निकाल्दै अष्ट्रेलियाले उपाधी कब्जा गरेको हो । अष्ट्रेलिया ओडीआई विश्वकपमा सबैभन्दा सफल टीम हो । उसले ५ वटा उपाधी उचालेको छ ।

तर, टी२० मा भने उसको यो पहिलो उपाधी हो । सन् २०१० मा फाइनल खेलेको अष्ट्रेलिया इंग्ल्याण्डसँग हारेको थियो । पहिलो पटक टी २० विश्वकपको फाइनल पुगेको न्यूजिल्याण्ड भने उपविजेतामै सिमित बन्यो । यसअघि सन् २०१५ मा वान डे विश्वकपको फाइनल खेलेको न्यूजिल्याण्ड अष्ट्रेलियासँगै हारेको थियो । युएईको दुबईमा मिचेल मार्श र डेभिड वार्नले शानदार ब्याटिङ गरे ।

त्यसअघि न्यजिल्याण्डका केन विलयम्सले ८५ रन बनाउँदै टीमलाई ठूलो स्कोर खडा गरेका थिए । तर, उनको प्रदर्शन हारसँगै छाँयामा पर्यो । न्यूजिल्याण्डले दिएको १७३ रनको अष्ट्रेलियाले १८.५ ओभरमा मात्र २ विकेट गुमाएर भेटायो । अष्ट्रेलियाको जितमा मिचेल मार्श र डेभिड वार्नरले अर्धशतक प्रहार गरे । मार्सले अविजित ७७ रन बनाउदा वार्नले ५३ रन जोडे ।

ग्लेन म्याक्सवेलले अविजित २८ रन बनाए । न्यूजिल्याण्डका लागि ट्रेण्ट बोल्टले ४ ओभरमा १५ रन खर्चेर २ विकेट लिए । टस हारेर पहिले ब्याटिङ गरेको न्यूजिल्याण्डले कप्तान केन विलियम्सको शानदार ब्याटिङ मद्दतमा ४ विकेट गुमाएर १७२ रन बनायो । विलयम्सनले ४८ बल खेल्दै १० चौकार ३ छक्का मद्दतमा ८५ रन बनाएका थिए ।

पेरिस । आगामी वर्ष कतारमा आयोजना हुने विश्वकप फुटबलमा साविक विजेता फ्रान्स र फिफा नम्बर वान टीम बेल्जियम यूरोपबाट छनोट हुन सफल भएका छन् । केयलिन एमबापेको ह्याट्रिकको मद्दतमा फ्रान्सले काजाकिस्तानमाथि ८–० को फराकिलो जित निकाल्दै कतारको टीकट काट्न सफल भएको हो । जितसँगै युरोपेली विश्वकप छनोटको समूह डी मा फ्रान्स शीर्ष स्थानमा उक्लिएको छ ।

उता, फिफा वरियतामा विश्व नम्बर १ मा रहेको बेल्जियम समेत कतार विश्वकपमा छनोट भएको छ । शनिबार इस्टोनियालाई ३–१ ले पराजित गरेको बेल्जियमले समेत कतार जाने निश्चित गरेको हो । फ्रान्स र बेलिजयमसँगै कतार विश्वकप खेल्ने ६ टोलीको टुंगो लागेको छ । कतार आयोजकको हैसियतमा खेल्ने छ । दक्षिण अमेरिकी टीमबाट ब्राजिलले विश्वकप खेल्ने निश्चित गरिसकेको छ ।

काठमाडौं । नेपाली फूटबल टीमका मूख्य प्रशिक्षक मोहम्मद अलमुताइरी शनिबार बेलुका काठमाडौं आइपुगेका छन् । उनलाई एन्फाका पदाधिकारीले विमानस्थलमा स्वागत गरेका छन् । अलमुताइरी दोस्रो पटक नेपाल आएका हुन् । साफ खेलपछि नेपाल नआउने प्रतिक्रिया दिएका उनले अहिले भने नेपाल फर्कँदा खुशी लागेको प्रतिक्रिया दिए । पछिल्लो तीन, चार महीना गाह्रो भएको स्वीकार गर्दै अलमुताइरीले एन्फा र कतार पुटबल एसोसिएसनको आग्रहमा आफु नेपाल आएको बताए ।

पैसा भन्दा पनि महत्वपूर्ण कुरा नेपालीले फुटबल मन पराउनु भएको उनको प्रतिक्रिया छ । अलमुताइरीले साफ कपपछि राम्रो प्रतिक्रिया आएको र अब फुटबलमा केही गर्न सक्छ भन्ने भएको विश्वास जागेको समेत बताए । तर, उनले धेरै अपेक्षा नगर्न समेत सुझाव दिए ।

नेपालले विश्वकप मै छनोट गर्न सक्छ भन्ने सम्मको अपेक्षा नगर्न उनले आग्रह गरेका हुन् । नेपालको लक्ष्य अर्को साफ कप भएको भन्दै अब एसिया क्वालिफायरमा ध्यान दिने बताए । नेपाल सन् २०२७ मा एसिया कपमा पुग्ने उनको विश्वास छ । अलमुताइरी तीन वर्षको सम्झौता गर्न सहमत भएपछि नेपाल आएका हुन् ।