काठमाडौं । सरकारले भिजिट भिसा लिएर खाडी मुलुकमा जान रोक लगाएको छ । गृह मन्त्रालयले भिटिज भिसामा खाडी मुलुक जान रोक लगाउने निर्णय गर्दै सूचना सार्वजनिक गरेको छ । बढ्दो कोरोना संक्रमणका कारण खाडी मुलुक र मलेसिया गई विचल्लीमा पर्ने नेपालीको संख्या बढेको भन्दै मन्त्रालयले भिटिज भिसामा भ्रमणमा जान रोक लगाएको हो । गृह प्रवक्ता फडिन्द्रमणि पोखरेलले यस्तो जानकारी गराएका हुन् ।
काठमाडौं । नेपालमा हवाई यात्रुलाई पुनः फेससिल्ड अनिवार्य गरिएको छ । शुक्रबार बसेको मन्त्रिपरिषद् बैठकले आन्तरिक हवाई यात्रालाई सुरक्षित बनाउने सन्दर्भमा सो निर्णय गरेको हो । हवाईजहाजमा चालक दल तथा सबै यात्रुलाई मास्क तथा फेससिल्ड अनिवार्य गर्ने निर्णय भएको हो । हवाईजहाज भित्र सेनिटाइजरको व्यवस्था समेत हवाई कम्पनीले मिलाउनु पर्नेछ ।
वायुसेवा कम्पनीले हरेक उडानपछि हवाई जहाज र ब्यागेजलाई निसंक्रमित गराउनु पर्ने समेत निर्णयमा उल्लेख छ । चेकइन, बोर्डिङ क्लेम गर्ने स्थान तथा प्रतिक्षालयमा भीडभाड हुन नदिने र जनस्वास्थ्यका मापदण्ड लागु गर्ने निर्णय समेत भएको छ । सम्बन्धित वायुसेवा सञ्चालकको खर्चमा यात्रुको एन्टिजेट परीक्षण गरी रिर्पोट नेगेटिभ आएमा मात्र यात्रा गराउने निर्णय समेत सरकारले गरेको छ ।
काठमाडौं । कोरोना भाइरसको महामारी फैलिएसँगै अतिआवश्यक काम नपरी विदेश भ्रमणमा नजान सरकारले नागरिकलाई आह्वान गरेको छ । अध्यागमन विभागले बुधबार ट्राभल एडभाइजरी जारी गर्दै यस्तो आह्वान गरेको हो । विभागको ट्राभल एडभाइजरीमा भनिएको छ, ‘नयाँ भेरियन्टको संक्रमणको जोखिम भएको मुलुकहरुमा नेपालबाट यात्रा गर्न योजना बनाएका व्यक्तिहरुले अति आवश्यक अवस्था बाहेक यात्रा नगर्न अनुरोध गरिन्छ ।’
गत सोमबारको गृहमन्त्रिस्तरीय निर्णय अनुसार विभागले बुधबार ट्राभल एडभाइजरी जारी गरेको छ । नेपाल सरकारले ओमिक्रोनको संक्रमण शुरुमै देखिएका दक्षिण अफ्रिका, बोत्सवाना, जिम्बाबे, नामिबिया, लेसोथो, इन्वाटिनी, मोजाम्बिक, मलावी र हङकङबाट सिधै नेपाल आउन वा ती मुलुकलाई ट्रान्जिट बनाएर नेपाल आउन १६ मंसिरबाटै रोक लगाएको थियो । रोकको निर्णयले निरन्तरता पाएको छ । तीन साता भित्र ती मुलुकको भ्रमण गरेका यात्रुले समेत नेपाल आउन पाउँदैनन् ।
यी दुई मुलुकबाहेकका देशबाट आउने विदेशी नागरिक (गैरआवासीय नेपालीसमेत)ले विदेशबाट ८ असोजमा जारी भएको नेपाल आगमन हुने र नेपालबाट प्रस्थान गर्ने यात्रुको यात्रा व्यवस्थापनसम्बन्धी आदेश २०७८ का प्रावधानका आधारमा नेपालको भ्रमणमा आउन सक्छन् । जस अनुसार खोपको मात्रा पूरा गरेका र पीसीआर नेगेटिभ भएका विदेशी नागरिकले नेपालमा अनअराइभल भिसा सुविधासहित प्रवेशको अनुमति पाउँछन् ।
अध्यागमन विभागका अनुसार पूर्ण खोप लगाएको १५ दिन पुगेको र बोर्डिङपास जारी हुनु भन्दा ७२ घण्टा भित्रको पीसीआर परीक्षण रिर्पोट नेगेटिभ भएका नेपाली नागरिक, कुटनीतिक वा अफिसियल पासपोर्ट बाहक वा आवासीय भिसा प्राप्त गरेका विदेशी नागरिकले कोभिड १९ सँग मिल्दोजुल्दो लक्षण नदेखिएको अवस्थामा घरमै १० दिन क्वारेन्टिन बस्ने गरी प्रवेश अनुमति दिइने भएको छ ।
पूर्ण खोपको मात्र पूरा नगरेका वा खोपको मात्रा पूरा गरेको १४ दिन नपुगेका नेपाली नागरिकले नेपाल प्रवेश विन्दुमा एन्टिजेट अनिवार्य परीक्षण गर्दा रिर्पोट पोजेटिभ देखिएकालाई संस्थागत आइसोलेसनमा पठाइने भएको छ । परीक्षण रिर्पोट नेगेटिभ आएकालाई भने १० दिन घरमै क्वारेन्टिन बस्ने गरी प्रवेशको अनुमति दिइने भएको छ ।
खोपको मात्रा पूरा नगरेका वा खोपको मात्रा पूरा गरेको १४ दिन नपुगेका कुटनीतिक वा अफिसियल पासपोर्ट बाहक वा आवासीय भिसा पाएका विदेशीले नेपाल प्रवेश विन्दुमा एन्टिजेन अनिवार्य परीक्षण गर्दा रिर्पोट पोजेटिभ आएमा संस्थागत आइसोलेसन वा सम्बन्धित कुटनीतिक नियोगको जिम्मेजारीमा होम आइसोलेसनमा पठाइने भएको छ । नेगेटिभ आएकालाई भने होम क्वारेन्टिन वा होटेल क्वारेन्टिनमा बस्ने गरी प्रवेश अनुमति दिइने भएको छ
काठमाडौं । त्रिभुवन अन्तर्राष्ट्रिय विमानस्थल नागरिक उड्डयन कार्यालयले अत्यावश्य काम नपरेसम्म विमानस्थलमा भिडभाड नगर्न आग्रह गरेको छ । हवाई यात्रु आवागमनको चाप र विमानस्थलमा स्थान सीमितताको कारण अति जरुरी बाहेक स्वागत तथा बिदाइमा नजान आह्वान गरेको हो । कार्यालयले विज्ञप्ति निकाल्दै जरुरी काम बाहेक यात्रुको स्वागत तथा बिदाइमा विमानस्थल नजान भनेको हो ।
विमानस्थलमा अनावश्यक भिडभाड नगर्न भन्दै हवाई यात्रामा स्वास्थ्यसम्बन्धी सम्पूर्ण मापदण्डको परिपालना गर्न समेत कार्यालयले भनेको छ । यस्तो मापदण्ड पालना गर्न सरोकारवालासँग समेत आह्वान गरिएको छ । कोभिड –१९ को जोखिमलाई दृष्टिगत गरी विमानस्थल कार्यालयबाट अति नै जरुरी अवस्थामा बाहेक पास समेत वितरण रोकेको छ ।
सरस्वती न्यौपाने, रसुवा
रसुवा र नुवाकोटको संगमस्थल बेत्रावति धाममा पौष शुक्ल औंशीको अवसर पारेर ३० हजार भन्दा बढी श्रद्धालूहरूले श्राद्ध गरेका छन । देशका विभिन्न स्थानहरु; जुम्ला, झापा, काठमाडौं, ललितपुर, भक्तपुर, धादिङ, नुवाकोट, रसुवा लगाएका टाढा/टाढाको मानिसहरू समेत यस पवित्र भुमिमा आफ्नो दिवङगतहरूको सम्झनामा पितृहरुको नाममा तर्पण दिएको स्थानीय समाजसेवी शशी डंगोलले बताएका छन् ।
चार-धाम मध्येको एकधाम वेत्रावति हिन्दु धर्मावलम्बीको पुराण अनुसार भगवान शिवले कालकुट विष पिई त्यसको राप शान्त पार्न भौतारिएर हिडेका अवस्थामा त्रिशूल प्रहार गर्दा उत्पन्न भएको त्रिशूली नदि र महादेवले नै बेतको लौरोले खोपेर उत्पति भएको वेत्रगंगास्थित फलाखु खोलाको संगमस्थल समेत भएकोले पवित्र भुमिका रूपमा परिचित छ ।
पुस १८ गते श्राद्व गर्न आएका एक श्रद्वालु शुन्दर श्रेष्ठ बताउनुहुन्छ। चारगया मध्ये एक गयाको रूपमा परिचित उतरगया एक पवित्रभुमी गोसाईकुण्ड, सलाखु, फलाखु, त्रिशूली गंगा मिसिएको ठाउँ सफा स्वास्थ आफ्नो दिवङगतहरूको सम्झनामा श्राद्व गरि पिण्ड सेलाउन पाउँदा स्वर्गमा बास हुने विश्वासले नै हाम्रो धर्म संस्कार,संस्कृति परम्परा ले गर्दा नै हामी मानिस मानिस भएर बाचेका छौ।
यस पवित्रभुमी उतरगयाधाममा २०४९ सालमा योगी नरहरीनाथले कोटी होम लगाएपछि झनै बेत्रावतिको धार्मिक महत्त्व बढेको हो ।
उतरगया क्षेत्रको ईतिहास
नेपाल र तिब्बतबीच १८४९ सालमा भएको ऐतिहासिक बेत्रावति सन्धि पनि यही ठाउँमा भएको तथ्य छ । सिगात्सेसम्म नेपाली गोर्खाली सेना चिनको छिङ महाराजाको ठुलो संख्यामा आएका सेनासंग पछि हट्न बाध्य भएका नेपाली गोर्खाली सेना र चिनियाँ सेनाको लडाइँ रसुवा र नुवाकोटको सिमाना वेत्रावतिमा भएपछि दुवैले ठुलो क्षति व्यहोरे पछि नेपाल- तिव्वत- चीनबीच सन १७९२ अक्टोबर ५ मा सन्धि गरेका थिए ।
धार्मिक आस्था बोकेको उतरगया
बेत्रावति सन्धिलाई विजय उत्सवको रूपमा मनाउन गोरू जुधाई परम्परा सुरू भएको धार्मिक मान्यता समेत रहेको छ । यस उतरगयाधाममा हरेक जात जातिले पितृकार्य गर्ने स्थल, पौषे औशीमा श्राद्व, गाईजात्रामा लाखे नाच, ठुलो एकादशीमा फुलको डोली ल्याउने र भजन किर्तन गरी नदी तार्ने, माघेसंक्रातिमा गोरू जुधाई गरिने, फागुमा सामुहिक होली, रामनवमी पर्व तथा कृष्ण जन्माष्टमीमा विषेश मेला लाग्ने गर्दछ ।
काठमाडौं । नेपालमा एक वर्षको अवधि (सन २०२१) १ लाख ५० हजार ९ सय ६२ जना पर्यटक भ्रमणमा आएका छन् । नेपाल पर्यटन बोर्डले सार्वजनिक गरेको यो तथ्यांक अनुसार नेपालमा भारतीय नागरिक पछि अमेरिकी नागरिक बढी आएका छन् । कोरोना अघि भारतिय र चिनियाँ नागरिकको बाहुल्यता थियो ।
सन् २०२१ मा यो संख्या सन् २०२० को तुलनामा ८० हजार कम पर्यटन नेपाल आएका छन् । सन् २०२० मा २ लाख ३० हजार ८५ जना पर्यटक नेपाल भ्रमणमा आएका थिए ।।कोरोना भाइरसको प्रभाव देखिनु अगाडी सन् २०१९ मा नेपालमा ११ लाख ९७ हजार १ सय ९१ जना पर्यटक आएका थिए ।
सन् २०२१ मा कुल ६४ हजार ६ सय ७३ जना भारतीय पर्यटक नेपाल आएको तथ्यांक छ । यो वर्ष दोस्रो स्थानमा अमेरिकी नागरिक छन् । अमेरिकाबाट कुल २२ हजार ८ सय ५३ जना पर्यटक नेपाल आएका छन् । यो कुल पर्यटक आगमनको १५.१४ प्रतिशत हिस्सा हो ।
तेस्रो स्थानमा रहेको बेलायातबाट ८ हजार ६ सय ८० जना नेपाल आए । चीनबाट ६ हजार १ सय ९६ र बंगलादेशबाट ५ हजार ४४ जना पर्यटक नेपाल आएका छन् ।
कुन मुलुकबाट कति पर्यटक आए ? (प्रमुख पाँच)
• भारत : ६४६७३
• अमेरिका : २२८५३
• बेलायत : ८६८०
• चीन : ६१९६
• बंगलादेश : ५०४४
काठमाडौं । नेपाल एयरलाइन्सले नयाँ जहाज किन रकम आवश्यक रहेको भन्दै् सरकारसँग १५ अर्ब रुपैयाँ लगानी माग गरेको छ । यस्तो लगानी पूँजीका रुपमा गर्न र नेपाल एयरलाइन्सलाई बचाउन निगमका कार्यकारी अध्यक्ष युवराज अधिकारीले आग्रह गरे । निगमले नयाँ जहाज खरिदको कार्ययोजना बनाइरहेको भन्दै उनले यसका लागि सरकारको साथ आवश्यक रहेको बताए ।
मंगलबार निगममा आयोजित कार्यक्रममा अधिकारीले केही दिनमै नयाँ जहाज खरिदबारे निर्णय गरिने जानकारी समेत गराए । रकम पुँजी वृद्धिका लागि प्राप्त होस् भन्ने चाहेको भन्दै यसले कर्मचारीको तलबमा नलगाई जहाज खरीदमा खर्च गर्ने उनको भनाई छ । उनका अनुसार निगमले जग्गाको उचित व्यवस्थापन, भएका जहाजको अधिकतम उपयोग र नयाँ जहाज खरीद गरि गन्तब्य बिस्तारको योजना बनाइरहेको छ ।
ज्यूरिच । कोभिडको नयाँ भेरियन्ट ओमिक्रोनले तिव्र फैलावट लिइरहेको समयमा क्रिसमस र न्यू इयरको रौनक समेत सँगै शुरु भएको छ । यस्तो बेला गरिने यात्रामा संक्रमण फैलावटमा सहयोग पुग्ने भन्दै जनस्वास्थ्यको रक्षार्थ आफ्ना केही छुट्टीका योजना रद्द गर्न सर्वसाधारणलाई विश्व स्वास्थ्य सङ्गठनले आग्रह गरेको छ। बीबीसीका अनुसार जीवन रद्द हुनुभन्दा एउटा कार्यक्रम रद्द गर्नु राम्रो हुने सुझाव विश्व स्वास्थ्य सङ्गठनका प्रमुख डा. टेड्रोस एड्हानोम गेहब्रेयससले दिएका हुन् । केही अवस्थामा यसको अर्थ कार्यक्रमहरू रद्द गर्नु वा पछि सार्नु हुने उनको भनाई छ ।
उनका अनुसार ओमिक्रोन डेल्टा भेरियन्टको तुलनामा निकै तीव्र गतिमा फैलिरहेको छ । फ्रान्स र जर्मनीसहित कैयौँ राष्ट्रले कडा नियम लागु गर्दै कोरोना फैलिन नदिन यात्रामा प्रतिबन्ध लागु गरेका बेला डा. गेहब्रेयससको पछिल्लो भनाइ आएको हो । उता, नेदरल्यान्ड्सले क्रिसमसका बेला कडा नियम सार्वजनिक गरेको छ। अमेरिकाले भने यस्तो प्रतिवन्धको तयारी समेत गरेको छैन ।
अमेरिकाका प्रमुख सङ्क्रामक रोग विशेषज्ञ डा. एन्थोनी फाउचीले क्रिसमसका बेला गरिने यात्राले कोभिडविरुद्ध खोपको पूर्ण मात्रा लगाएकाहरूमा समेत सङ्क्रमण सर्न सक्ने चेतावनी भने दिएका छन्। अमेरिकाको सेन्टर्स फर डिजिज कन्ट्रोल एन्ड प्रिभेन्सन र विदेश मन्त्रालयले अमेरिकीहरूलाई स्पेन, फिनल्यान्ड र लेबननसहित आठवटा देशमा यात्रा नगर्न सुझाव दिएका छन्।
काठमाडौं । नेपालमा चर्को आलोचनाका बीच अध्यागमन विभागले शुक्रबारको नियम तत्कालका लागि हटाएको छ । कोरोनाको पछिल्लो ओमिक्रोन भेरियन्टको जोखिम बढेको भन्दै अध्यागमन विभागले विभिन्न ६७ देशबाट आउने यात्रुका लागि सात दिन होटल क्वारेन्टिनमा बस्नुपर्ने नियम शुक्रबार सार्वजनिक गरेको थियो । शनिबार अर्को सूचना जारी गरि अर्को सूचना जारी नभएसम्मका लागि यो नियम स्थगित भएको जनाएको छ ।
यात्रा प्रतिवन्ध र ७ दिन होटलमा अनिवार्य क्वारेन्टाइन सम्बन्धी सूचना अर्को सूचना नभएसम्मका लागि स्थगित गरि यसअघिका नियम भने यथावत राखेको विभागले जनाएको छ । ‘सेप्टेम्बर २४ र डिसेम्बर २ मा प्रकाशित ट्राभल एडभाइजरीसँग सम्बन्धित अन्य सूचना भने यथावत रहेको समेत सूचनामा उल्लेख छ । यसअघिको प्रावधानमा खोप लगाएका र पिसिआर नेगेटिभ आएका यात्रुले क्वारेन्टिन बस्नु पर्दैन ।
काठमाडौं । सरकारले अमेरिका र बेलायतसहित विश्वका ६७ मुलुकबाट नेपाल आउँदा अनिवार्य क्वारेन्टिन बस्नु पर्ने नियम ल्याएको छ । तर, भारतबाट नेपालमा आउँदा भने खुलेआम आउन पाउने नियम छ । यसले मुलुक भित्र सहजै भाइरस भित्राउने भन्दै सरोकारवालाले चिन्ता व्यक्त गरेका छन् । पर्यटन व्यवसायी ध्रुव सिखडाले सरकारको यो नियमले नेपालमा कोरोना रोक्ने नभई पर्यटक मात्र रोकिने चिन्ता व्यक्त गर्छन् । कोरोना भाइरसको नयाँ भेरियन्ट तुलनात्मक रुपमा बढी संक्रामक पाइएको छ । तर, घातक भने नभएको पुष्टी भएको छ ।
आजसम्म बेलायतमा एक जनाको मृत्युको केश मात्र आएको रेकर्ड छ । तर, अर्कोतर्फ विकसित मुलुकका नागरिकले अधिकांशले खोप समेत लगाइसकेका छन् । यता, भारतमा भने ११ राज्यमा १ सय भन्दा बढी मानिसमा नयाँ भेरियन्ट पुष्टी भइसकेको छ । यसले छिट्टै उग्ररुप लिने चिन्ता भारतमा छ । तर, सरकारले भने तेस्रो मुलुकमा मात्र यात्रामा कडाई गरेको छ । यसले पर्यटक आगमनसहित नेपाली कामदार समेत प्रभावित हुने छन् ।
काठमाडौं । विश्वभर कोरोना भाइरसको नयाँ भेरियन्ट ओमिक्रोन फैलिएपछि सरकारले नेपाल आगमनमा कडाई गरेको छ । अध्यागमन विभागले शुक्रबार एक सूचना जारी गरि यस्तो नियम लागु भएको जनाएको छ । अफ्रिकी मुलुकबाट फैलिएको कोरोना भाइरसको ओमिक्रोन भेरिएन्ट तीव्र गतिमा फैलिन थालेको छ । सरकारले अमेरिका, बेलायत तथा यूरोपका अधिकांश मुलुकबाट आउने यात्रुले अनिवार्य क्वारेन्टिन बस्नु पर्ने नियम लगाएको हो ।
स्वास्थ्य संवेदनशीलतालाई ख्याल गर्दै अध्यागमन विभागले ओमिक्रोन फैलिएका ६७ मुलुकबाट नेपाल आउने यात्रुलाई सात दिन अनिवार्य क्वारेन्टिनमा बस्नुपर्ने बताएको हो । मन्त्रिपरिषद्को मंसिर १३ को निर्णय अनुसार जोखिमयुक्त मानिएका देशबाट नेपाल प्रवेश गर्ने यात्रुले सात दिन आफ्नै खर्चमा होटल क्वारेन्टिनमा बस्नुपर्ने भन्दै विभागले सूचना जारी गरेको छ ।
ती देशबाट आएका यात्रुले आरटी-पीसीआर विधिबाट परीक्षण गर्नुपर्ने छ । नतिजा नेगेटिभ आएपछि पनि ७ दिन होम क्वारेन्टिनमा बस्नुपर्नेछ । पोजेटिभ रिपोर्ट आएमा भने तोकिएको आइसोलेसन केन्द्र वा अस्पताल पठाइने विभागले शुक्रबार जारी गरेको सूचनामा उल्लेख छ ।
भरतपुर । बुद्ध एयरको जहाजको बायाँ इन्जिन फेल भएपछि भरतपुर विमानस्थलमा आपतकालिन अवतरण गर्नु परेको छ । भरतपुरबाट १९ यात्रु र तीन चालक दलका सदस्यसहित उडेको जहाजमा केही मिनेटमै समस्या आएको थियो । त्यसपछि सोही विमानस्थलमा अवतरण गरिएको थियो । आपतकालिन अवतरणका दौरान विमानस्थलमा आकस्मिक अवस्थाका लागि सबै बन्दोबस्त गरिएको थियो ।
नागरिक उड्डयन प्राधिकरण भरतपुरका अनुसार दिउँसो १ः१६ बजे उडेको जहाजमा तत्कालै समस्या आएको रिर्पोटिंग पाइलटले गरेका थिए । जहाजमा यात्रु र चालक दलका सबै सदस्य सकुसल छन् । बुद्ध एयरका अनुसार उनीहरुलाई अर्को जहाजबाट काठमाडौं ल्याइएको छ । जहाज धावनमार्गमा फसेपछि आज निकै बेर विमानस्थल समेत अवरुद्ध भएको छ ।
काठमाडौं । भारत सरकारले कोरोनाको ओमिक्रोन भेरियन्टलाई लक्षित गर्दै यात्रा प्रतिवन्ध बढाएको छ । नियमित अन्तरराष्ट्रीय व्यापारिक उडान र त्यसबाट आउने यात्रुलाई भारतमा प्रतिवन्ध लागेको छ । यस्तो प्रतिवन्ध अब ३१ जनवरी २०२२ सम्म लम्ब्याइएको छ । यसमा कार्गो उडान र अनुमति प्राप्त सबै प्रकारका उडान भने खुला हुने छन् ।
नेपाल र भारतबीच एयर बबल स्कीम अनुसार उडान भइरहेको छ । यो अनुमति प्राप्त उडान हो । तर, यस्तो उडानमा दुबै मुलुकका नागरिक र तेस्रो मुलुकका अनुमति प्राप्त नागरिकले मात्र उडान गर्न पाउँछन् । यो प्रावधानले दिल्ली ट्रान्जिट बनाई काठमाडौं आउन चाहने नेपाली यात्रुको यात्रा तालीका समेत प्रभावित बनेको छ । कोरोनाको नयाँ भेरियन्ट देखिनु अगाडी भारत सरकारले १५ डिसेम्बरबाट नियमित उडान खोल्ने निर्णय गरेको थियो ।
बागलुङ । नेपालको एक मात्र शिकार आरक्ष ढोरपाटनमा यो सिजनमा ९ नाउर तथा तीन वटा झारलको शिकार गरिएको छ । यो क्षेत्र नेपालको शिकार पर्यटनको एक मात्र गन्तब्य हो । ढोरपाटन शिकार आरक्षको विभिन्न ब्लकमा नौ नाउर र तीन झारलको शिकार गरिएको आरक्ष प्रशासनले जनाएको छ । नेपालका पाँच शिकार कम्पनीमार्फत शिकार गरिएको छ । शिकारमा पुगेका विदेशी शिकारीले यस पटक निर्धारित कोटाभन्दा कम शिकार गरेका हुन् ।
पहिलो शिकार यामको लागि राष्ट्रिय निकुञ्ज तथा वन्यजन्तु संरक्षण विभागले छ वटा झारल र १० वटा नाउरको कोटा निर्धारण गरेको थियो । यस पटक तीन वटा झारल र एक नाउरको शिकार हुन सकेनन् । एक झारल र एक नाउरको अनुमति प्राप्त गरे पनि अन्तिम समयमा रसियाली नागरिक इभिजिनी सिरोक्यो शिकारका लागि आएनन् । शिकार याममा नेपाल ट्राभल्स एक्सपिडिसनमार्फत फ्रान्सेली नागरिक मार्लियर आन्द्रेले सेन ब्लकमा एक नाउर, ओभिन एन्टोनी नोयलले सेनब्लकमा एक नाउरको शिकार गरे ।
हिमालयन सफारीमार्फत मेक्सिकन नागरिक फ्रान्सीको जोई भिजेकोनले सेन ब्लकमा एक नाउरको शिकार गरे । ट्याक एण्ड ट्राभल्सले दुई जना युक्रेनी नागरिकलाई शिकारमा लगेको थियो । सेरिया लरेन र नाटालियन लरेनले धुस्तुङ ब्लकमा दुई नाउर र एक झारलको शिकार गरे । ग्लोबल सफारीमार्फत दोगाडी ब्लकमा स्पेनिस नागरिक जोएक्वाईन बेन्जिमेनले एक नाउरको शिकार गरे । स्पेनिस नागरिक मुगलले पनि सोही ब्लकमा नाउरको शिकार गरे ।
चे रिब्लिकन नागरिक रोमनले सुनदह ब्लकमा एक झारल र एक नाउरको शिकार गरे । ढोरपाटनमा शिकार गरेपछि अधिकांश शिकारीले मासु खान्छन् । सिङ, खुर र छाला भने आफ्नो मुलुक लैजान्छन् । शिकार अनुमति प्राप्त कम्पनीले १५ दिनको अवधिमा आरक्षबाट खटिएका कर्मचारीको प्रत्यक्ष निगरानीमा शिकार गर्न पाउँछन् ।
काठमाडौं । नेपाल एयरलाइन्सले काठमाडौंबाट दुबईमा हुने उडान थप गरेको छ । अब यो सेक्टरमा सातामा कुल ९ उडान भएको छ । उडान संख्या थप गरेको उपलक्ष्यमा संस्कृति, पर्यटन तथा नागरिक उड्डयन मन्त्री प्रेम आलेले आज केक काटेका छन् । दुबईमा यसअघि हरेक दिन एक\एक वटा उडान भइरहेको थियो ।
आइतबारबाट थप दुई (आइतबार र बुधबार) उडान हुने भएको छ। नेपाल एयरलाइन्सका अनुसार आइतबार थपिएको उडानका दौरान यात्रुलाई शुभकामना र कर्मचारीलाई हौसला दिन पर्यटनमन्त्री आले विमानस्थल पुगेका थिए ।
वासिंटन डिसी । ओमिक्रोन नामक कोरोना भाइरसको नयाँ मेरियन्टबाट बच्न अमेरिकाले यात्रामा कडा नियमहरू लगाएको छ । बीबीसीका अनुसार राष्ट्रपति जो बाइडनले यस्तो नियम सार्वजनिक गरेका छन् । यद्दपी उनले लकडाउन भने नगरिने बताएका छन् । खोपसम्बन्धी यसअघिको निर्णयमा समेत परिवर्तन नहुने भएको छ । न्यू योर्क राज्यमा पाँच जना र मिनेसोटा र कोलोराडोमा अहिलेसम्म ओमिक्रोनको सङ्क्रमण एकएक जनामा पुष्टी भइसकेको छ ।
अमेरिकामा बुधवार क्यालिफोर्निया राज्यमा पहिलो ओमिक्रोन सङ्क्रमण देखिएको थियो । स्वास्थ्य अधिकारीहरूले ओमिक्रोन भेरियन्ट देखिएका मानिसमा अहिलेसम्म सामान्य खालका लक्षण मात्र देखिएको बताएका छन्। उक्त भेरिअन्ट अहिलेसम्म कम्तीमा २३ वटा देशमा देखिइसकेको छ। दक्षिण अफ्रिकामा कोरोनाभाइरस सङ्क्रमितको सङ्ख्यामा उल्लेख्य वृद्धि
अति उत्परिवर्तिन ओमिक्रोन बढी सङ्क्रामक छ वा खोपले काम नगर्ने जोखिम बढी छ भन्ने अझै स्पष्ट भइसकेको छैन।
बिहीवार सार्वजनिक गरिएको विवरण अनुसार अब सबै अन्तर्राष्ट्रिय यात्रुले अमेरिका जानुभन्दा २४ घन्टाअघि अनिवार्य रूपमा कोभिडको परीक्षण गरेको हुनुपर्छ। यो नियम पूर्ण मात्रा खोप लगाइसकेका मानिसको हकमा पनि लागु हुन्छ। विमान, रेल वा बसमा चढ्दा अनिवार्य रूपमा मास्क लगाउनुपर्ने नियम मार्च महिनासम्मका लागि लागु गरिएको छ। अमेरिकी सरकारले निजी बिमा कम्पनीको माध्यमबाट लाखौं मानिसलाई घरमै बसेर कोरोनाभाइरसको निस्शुल्क परीक्षण गर्ने व्यवस्था गर्न खोज्दैछ।
बिमा गरेका मानिसहरू बाहेकका हकमा भने स्वास्थ्य केन्द्र र ग्रामीण क्षेत्रमा रहेका क्लिनिकमार्फत् त्यस्तो सुविधा दिइनेछ। प्रशासनको योजना अन्तर्गत हिउँद महिनामा वयस्क मानिसहरूलाई बुस्टर खोप लगाउन प्रोत्साहन गरिने भन्ने समेत रहेको छ । चार करोडभन्दा बढी अमेरिकीहरूले बुस्टर खोप पाइसकेका छन्। तर बाइडनले भने १० करोड थप मानिस बुस्टरका लागि योग्य भएको तर उनीहरूले लिन बाँकी रहेको बताए ।
बालबालिका र किशोरकिशोरीमाझ खोप लगाउने दर बढाउने प्रयास स्वरुप देशैभरि सयौँ परिवार खोप क्लिनिकहरूको व्यवस्था गरिनेछ। अमेरिकासहित थुप्रै अन्य देशहरूले आठवटा दक्षिण अफ्रिकी देशहरूमाथि यात्रा प्रतिबन्ध लगाएका छन्।
काठमाडौं । नेपालमा एक महिनाको अवधिमा अमेरिकाबाट ३ हजार ७८२ जना पर्यटक नेपाल भ्रमणमा आएका छन् । कोरोना महामारीको प्रभाव कम भएको र नेपालमा यात्रा प्रतिबन्ध खुकुलो बन्दै जाँदा नोभेम्बरमा सन् २०२१ यताकै सबैभन्दा धेरै पर्यटक नेपाल आएका छन् । यसमध्ये अमेरिकाबाट मात्र ३ हजार ७८२ जना नेपाल भ्रमणमा आएको नेपाल पर्यटन बोडर्ढले जनाएको छ । नेपालमा सबैभन्दा बढी आगमन भने भारतीय पर्यटकको छ ।
त्यसपछि तेस्रो स्थानमा बेलायतबाट बढी पर्यटक नेपाल आएको तथ्यांक छ । नोभेम्बर २०२१ को एक महिनामा कुल २६ हजार १३५ जना विदेशी पर्यटक नेपाल आएका छन् । यसमा १० हजार ४२१ जना भारतीय छन् । बेलायतबाट २ हजार २६ जना पर्यटकले नेपाल भ्रमण गरेका छन् ।
बंगलादेशबाट १,३८२ र फ्रान्सबाट ८०८ जना नेपाल आएको बोर्डले जनाएको छ । यो वर्ष अप्रिलमा २२ हजार ४५० पर्यटक आएका थिए । ११ महिना (जनवरीदेखि नोभेम्बरसम्म)मा १ लाख २६ हजार २८३ पर्यटक नेपाल आएका छन् । नेपालमा सन् २०२१ को ११ औं महिनासम्म मात्र १ लाख २६ हजार २८३ जना पर्यटक नेपाल आएका छन् ।
काठमाडौं । हङकङसहित ९ मुलुकबाट आउने यात्रुलाई नेपाल सरकारले प्रतिवन्ध लगाएको छ । सरकारले दक्षिण अफ्रिका, हङकङसहित ९ देशबाट आउने नागरिकलाई नेपाल प्रवेशमा रोक लगाउने निर्णय गरेको हो । सोमबार बसेको मन्त्रिपरिषद बैठकले दक्षिण अफ्रिका, बोत्स्वाना, जिम्बाब्बे, नामिबिया, लेसोथो, इसबाटिनी, मोजाम्बिक, मलावी र हकङकबाट आउने यात्रु, ती देशलाई ट्रान्जिट बनाएर आउने र तीन हप्ताभित्र ती मुलुकको भ्रमण गरी आउनेहरुलाई नेपाल प्रवेशमा रोक लगाउने निर्णय गरेको हो ।
यो निर्णय शुक्रबारबाटै कार्यान्वयनमा आएको छ । तर, अहिले ती मुलुकबाट नेपालतर्फ आउँदै गर्दा बाटोमा रहेका यात्रुले भने अनिवार्य क्वारेन्टिनमा बस्नुपर्ने भएको छ ।
ती देशमा कोरोना भाइरसको नयाँ भेरियन्ट भेटिएकाले नेपाल प्रवेशमा कडाइ गरिएको हो । संक्रमणको जोखिम भएका मुलुकबाट आउने यात्रुलाई अन अराइभल भिसा समेत नदिने निर्णय भएको छ । यसअघि सरकारले अफ्रिकी मुलुकका नागरिकलाई मात्र नेपाल आउन रोक लगाएको थियो ।
काठमाडौं । भारतले डिसेम्बर १५ बाट खोल्ने भनेको अन्तर्राष्ट्रिय हवाई उडान पुनः स्थगित भएको छ । कोरोना भाइरसको नयाँ भेरियन्ट ओमिक्रोनको संक्रमण बढ्दै गएपछि भारतले यस्तो निर्णय गरेको हो । जसले गर्दा नेपाल एयरलाइन्सले भारतीय शहरमा गर्ने भनेको उडान समेत प्रभावित बनेको छ ।
भारतीय नागरिक उड्डयन महानिर्देशनालयले बुधबार एक परिपत्र जारी गर्दै ओमिक्रोनबाट उत्पन्न पछिल्लो अवस्थालाई नजिकबाट नियालिरहेको र भारतबाट वा यसतर्फ हुने अन्तर्राष्ट्रिय व्यावसायिक उडान शुरु गर्ने मितिबारे उपयुक्त समयमा जानकारी गराइने उल्लेख गरेको छ ।
काठमाडौं । नेपालमा सार्वजनिक यातायातमा भेहिकल ट्र्याकिङ सिस्टम जडान शुरु गरिएको छ । यातायात व्यवस्था विभागले परीक्षणस्वरूप १७ वटा बसमा यस्तो प्रणाली जडान गरिसकेको जनाएको छ । पहिलो चरणमा एक सयवटा सवारीमा निःशुल्क जडानको योजना विभागको छ । त्यसपछि सबै सार्वजनिक गाडीमा यो प्रणाली जडान गरिने भएको छ । विभागका अनुसार काठमाडौँ–पोखरा, काठमाडौँ–वीरगञ्ज, काठमाडौँ–जनकपुर रुटका सवारीमा जीपीएस सुरु गरिएको छ ।
जीपीएस लागूू गरिएपछि नियन्त्रण कक्षबाट देशभरका सार्वजनिक सवारी व्यवस्थापन र नियमन गर्न सहज हुने छ । विभागका अनुसार ८० प्रतिशत सवारी दुर्घटना उच्च गतिमा सवारी चलाएका कारण हुन्छन् । राजमार्गमा तोकिएभन्दा उच्च गतिमा दौडने प्रवृत्तिलाई जीपीएस सिस्टमले नियमन गर्ने हुँदा सवारी दुर्घटना कम हुने विभागको भनाई छ । जीपीएसमार्फत गाडीको रुट, गतिलगायतका जानकारी ट्राफिक प्रहरीलाई अनलाइनमै उपलब्ध हुनेछ ।
गाडीको गति र स्थानको जानकारी हुनेछ । साथै सार्वजनिक यातायातका विकृति र आपराधिक घटना नियन्त्रण गर्न समेत सहयोग हुने विभागले बताएको छ । विश्व बैङ्कको सहयोगमा पाइलट परियोजनाका रूपमा जीपीएस जडान गरिन लागेको हो । सार्वजनिक यातायातमा जीपीएस जडान गरिसकेपछि सरकारी गाडीहरूमा गरिने विभागको योजना छ ।
काठमाडौं । सरकारले कोरोनाको नयाँ भेरियन्ट देखिएको मुलुक दक्षिण अफ्रिकासहित सो महादेशबाट नेपाल आउन रोक लगाएको छ । दक्षिण अफ्रिकामा पहिलो पटक ओमिक्रोन नामक नयाँ भेरियन्ट देखिएको छ । यस्तो प्रतिवन्ध अर्को व्यवस्था नभएसम्मका लागि लगाइएको हो ।
गृहमन्त्रालयले अध्यागमन विभाग, त्रिभुवन विमानस्थल कार्यालय र सीमा क्षेत्रका स्थानीय प्रशासन कार्यालयलाई दक्षिण अफ्रिकी मुलुकका नागरिकहरुलाई प्रवेश गर्न नदिने व्यवस्था मिलाउन निर्देशन दिएको स्थानीय संचारमाध्यमले लेखेका छन् । ‘कूटनीतिक, अफिसियल र आपतकालीन कामबाहेक सबै अफ्रिकी देशका नागरिकलाई अर्को व्यवस्था नभएसम्म नेपाल प्रवेशमा रोक लगाउने निर्णय भएको हो ।
नागपुर । भारतको बैलौरबाट पटनका लागि उडेको जहाजको इन्जिनमा खराबी आएपछि आपतकालिन अवतरण गर्नु परेको छ । गो एयरको सो जहाजमा १३९ जना यात्रु रहेका थिए । भारतीय संचारमाध्यमहरुका अनुसार शनिवार बिहान सवा ११ बजे नागपुरमा सुरक्षित अवतरण गराइएको छ ।
समाचार एजेन्सी पीटीआईका अनुसार जहाज पाइलटले नागपुर एटीसीलाई जहाजको इन्जिनमा खराबी आएको सूचना दिएका थिए । त्यसपछि विमानस्थलले आपतकालिन अवतरणको व्यवस्था मिलाएको हो । विमानस्थलमा फुल स्केल इमर्जेन्सी घोषित गरिएको थियो । धावनमार्गको खुला बनाएर दमकल, डाक्टर, एम्बुलेन्सलाई तयारी अवस्थामा राखिएको थियो । पुलिस र अन्य फौज समेत तयारी अवस्थामा थिए ।
नयाँ दिल्ली । भारतले १५ डिसेम्बरबाट लागु हुने गरि अन्तर्राष्ट्रिय उडान सूचारु गरेको छ । नयाँ वर्ष र क्रिसमसलाई लक्षित गरि भारतले उडान खोल्ने निर्णय गरेको हो । अहिले एयर बबल स्किम अनुसार मात्र उडान भइरहेको छ । यस अनुसार एक अर्का मुलुक र अनुमति प्राप्त तेस्रो मुलुकका नागरिकले मात्र उडानको अनुमति पाएका थिए । उडान खुलेपछि भारत सबै मुलुकका नागरिकको आवागमनका लागि सहज हुने छ ।
यस सूचिमा नेपाल समेत छ । तर, विभिन्न १४ मुलुकका लागि भने उडान अझै खुलेको छैन । बेलायत, फ्रान्स, जर्मनी, नेदरल्याण्ड्स, फिनल्याण्ड, साउथ अफ्रीका, ब्राजील, चीन, मौरिसस, सिंगापुर, बंगलादेश, बोतस्वाना, जिम्बांवे र न्यूजिल्याण्डमा भने उडान हुने छैन । खासगरी कोरोना भाइरसको पछिल्लो फैलावट नभएका मुलुकमा भारतीय सरकारले उडान खोल्ने निर्णय लिएको हो । यूरोप र अफ्रिकामा भने कोरोना भाइरसको संक्रमण बढिरहेको छ ।
काठमाडौं । आन्तरिक गन्तब्यका विमानस्थलहरुमा बाक्लो हुस्सुका कारण हरेक दिन उडान प्रभावित बनेको छ । याअले उडान डिले तथा रद्द हुने क्रम समेत बढेको छ । बिहिवार बिहान विराटनगर, भरतपुर, भोजपुर, दाङ, राजविराज, सुर्खेत, धनगढीसहितका विमानस्थल अबेरसम्म खुलेनन । यो समस्या केही दिन देखि दोहोरिएको हो ।
आन्तरिक उडानहरु प्रभावित हुदा त्रिभुवन अन्तर्राष्ट्रिय विमानस्थलमा यात्रुको चाप बढेको छ । आन्तरिक उडान प्रभावित बनेपनी काठमाडौं विमानस्थलमा अन्तर्राष्ट्रिय उडान भने रोकिएको छैन । तराईमा बाक्लो हुस्सु र हिमाली भेगमा हिमपातका कारण यो सिजनमा हवाइ यातायात बढी प्रभावित हुने गरेको छ ।
काठमाडौं । अब कोरोना विरुद्धको खोप कार्ड देखाएर नेपाल र भारतमा आवतजावत गर्न सकिने भएको छ । नेपाल सरकारले भारतसँग कोभिड खोप प्रमाणपत्रको आधारमा आवतजावतलाई मान्यता दिने समझदारी गरेसँगै यस्तो बाटो खुलेको हो । मङ्गलबार स्वास्थ्य तथा जनसङ्ख्या मन्त्रालयमा आयोजित कार्यक्रममा खोप प्रमाणपत्रको आधारमा आवतजावतको मान्यता दिनेगरी समझदारी भएको छ ।
स्वास्थ्यमन्त्री विरोध खतिवडाको उपस्थितिमा स्वास्थ्य सचिव डा. रोशन पोखरेल र नेपालका लागि भारतीय राजदूत विनय मोहन क्वात्राले सम्झौता पत्रमा हस्ताक्षर गरेका छन् । यो सम्झौता भएसँगै अब नेपालमा लगाइएको खोपलाई भारतले मान्यता दिने र भारतमा खोप लगाएकालाई नेपालमा सहज हुने स्वास्थ्य सचिव डा। पोखरेलले बताए । उनका अनुसार सम्झौताले भारत जाने र भारतबाट नेपाल प्रवेश गर्नेलाई सहज हुने भएको छ । ‘खोपलाई दुवै देशले मान्यता दिने निर्णय गरेका हुन् ।
काठमाडौं । निजी क्षेत्रको वायुसेवा कम्पनी बुद्ध एयरले अब दुर्गम भेगमा समेत उडान बिस्तार गर्ने भएको छ । रामेछापको मन्थली, पश्चिमका लागि पोखरा र सुदूरपश्चिमका लागि नेपालगञ्जलाई हब बनाएर दुर्गममा उडान गर्ने योजना कम्पनीले सार्वजनिक गरेको हो । कम्पनीले २०२३ को प्रारम्भबाटै दुर्गम भेगमा उडानको योजना बनाइएको भन्दै आइतबार यस्तो जानकारी गराएको हो । सो प्रयोजनका लागि ट्विनअटर जहाज खरिद गर्ने समेत कम्पनीले जनाएको छ ।
शुरुआतमा चार वटा जहाज भित्र्याएर दुर्गम उडान शुरु गरिने भएको छ । त्यसपछि २०२४ मा दुई वटा जहाज थप्ने र सन् २०२६ भित्र आन्तरिक उडानमा मात्र जहाज संख्या ८ वटा पुर्याउने घोषणा समेत बुद्ध एयरले गरेको हो ।
दुबईमा जारी एयर शोमा ट्विनअटर जहाज निर्माता भाइकिङ एयर लिमिटेडका सेल्स एण्ड मार्केटिङ सिनियर एक्जुकेटिभ भाइस प्रेसिडेन्ट रोव माराच्रसँग बुद्ध एयरका प्रवन्ध निर्देशक बीरेन्द्रकुमार बस्नेतको भेटपछि बुद्ध एयरले दुर्गम भेगमा उडानको योजना सार्वजनिक गरेको हो । दुर्गमलाई सुगम, सहज र सबैको पहुँचमा लैजाने उद्देश्यसहित दुर्गममा उडान विस्तारको योजना रहेको समेत कम्पनीले जनाएको छ ।
काठमाडौं । पेट्रोलियम पदार्थ मूल्यवृद्धि भएको भन्दै फिर्ताको माग राखि आज नेत्रविक्रम चन्द ‘विप्लव’ नेतृत्वको नेकपाले नेपाल बन्द आयोजना गरेको छ । बन्दको प्रभाव देशभर देखिएको छ । खासगरी ग्रामिण भेगमा यातायात ठप्प जस्तै छ । शहरी इलाकामा समेत सार्वजनिक यातायात चलेका छैनन् । फाट्टफुट्ट निजी सवारी चल्नुबाहेक सडक सुनसान देखिएको छ । जसले गर्दा यात्रामा जानै पर्ने यात्रुले भने सास्ती भोगिरहेका छन् ।
लामो दूरीबाट यात्रा गरि काठमाडौं आएका यात्रु सडकमा पैदल हिँडेर घरसम्म पुग्नु पर्ने बाध्यतामा छन् । कलङ्की, नयाँ बसपार्क, बल्खु, कोटेश्वरजस्ता चेकमा सार्वजनिक गाडी कुरेका यात्रु अलपत्र बनेका छन् । बन्दको प्रभाव कम गराउन प्रहरी परिचालन भने बाक्लो देखिएको छ । उता, तनहुँमा बन्द गराउँदै हिँडेका विप्लव नेकपाका ११ जना कार्यकर्तालाई प्रहरीले नियन्त्रणमा लिएको छ । पोखरामा समेत यातायात प्रभावित भएको खबर छ ।
काठमाडौं । भैरहवामा निर्माणधिन भैरहवा अन्तर्राष्ट्रिय विमानस्थल निर्माणको अन्तिम चरणमा छ । यो विमानस्थलमा इजरायलले सिधा उडानको इच्छा व्यक्त गरेको छ । संस्कृति, पर्यटन तथा नागरिक उड्डयन मन्त्री प्रेमबहादुर आले र नेपालका लागि इजरायलका राजदूत हेनान गोदरबीच सोमबार भएको भेटवार्तामा इजरायल सरकारले यस्तो संकेत गरेको हो । भेटमा राजदूत गोदरले इजरायल–भैरहवा सिधा हवाई उडान गर्न इजरायल सरकार इच्छुक रहेको समेत जानकारी गराएको आलेको सचिवालयले जनाएको छ ।
भेटवार्तामा राजदूत गोदरले इजरायल र काठमाडौं बीच सिधा हवाई उडानका लागि इजरायल सरकारले पहल गर्ने आश्वासन समेत दिएका छन् । राजदूत गोदरले नेपालको आन्तरिक हवाई उडानमा विदेशी र नेपालीको असमान हवाई भाडादरका विषयमा चासो व्यक्त गरेका छन् । मन्त्री आलेले नेपाल र इजरायल बीच सिधा हवाई सम्पर्कका लागि आफूहरु तयार रहेको जानकारी राजदूत गोदरलाई गराएका थिए ।
उता, आगामी साताबाट इजरायल जाने नेपाली श्रमिकलाई नेपाल एयरलाइन्सको जहाजबाट लैजानेबारे समेत भेटमा छलफल भएको छ । पर्यटनमन्त्री आलेको सचिवालयका अनुसार भेटका क्रममा आगामी दुई साताभित्र कम्तिमा एक हजार नेपाली श्रमिक इजरायल जाने भन्दै त्यसका लागि नेपाल एयरलाइन्सको वाइडबडी जहाज भाडामा लिनेबारे छलफल भएको हो । भेटको क्रममा राजदूत गोदरले यस्तो इच्छा व्यक्त गरेको सचिवालयले जनाएको छ ।
भेटमा नेपालको आन्तरिक हवाई उडानमा विदेशी र नेपाली बीच रहेको असमान हवाई भाडादरका विषयमा समेत कुराकानी भएको छ । सो क्रममा मन्त्री आलेले भाडा घटाउन पहल गर्ने बताएका छन् । मन्त्री आलेले नेपालको विविध क्षेत्रमा इजरायले गर्दै आएको सहयोगप्रति धन्यवाद व्यक्त गर्दै आगामी दिनमा समेत सहयोगले निरन्तरता पाउने विश्वास समेत व्यक्त गरेका छन् ।
नेपाल सरकारले निजगढमा निर्माण गर्न लागेको दोस्रो अन्तर्राष्ट्रिय विमानस्थल निर्माणका लागि लगानीकर्ता जुटाइ दिन वा जीटूजीमार्फत काम गर्न समन्वय गरिदिन मन्त्री आलेले राजदूत गोदरसँग आग्रह गरेका छन् । यस विषयमा राजदूत गोदरले आवश्यक समन्वय र पहल गर्ने आश्वासन दिएका छन् ।
काठमाडौं । नेपालका लागि अमेरिकी, बेलायती र अष्ट्रेलियाका राजदुत मुगुमा रहेको रारा तालको भ्रमणमा निस्किएका छन् । काठमाडौंस्थित अमेरिकी दुतावासले आइतबार ट्वीट गर्दै यसबारे जानकारी गराएको हो । अमेरिकी राजदूत रेण्डी बेरी, बेलायती राजदुत निकोला पोलीट र अस्ट्रेलियनका राजदूत फिलिसिटी भोल्क रारा भ्रमणमा पुगेका छन् । कोरोना महामारीपछि रारामा विदेशी पाहुना पहिलो पटक रारा पुगेका छन् ।
यो टोली आइतबार काठमाडौंबाट नेपालगञ्ज हुँदै तारा एयरको जहाज चढेर रारा पुगेका छन् । जिल्लामा जलवायु परिर्वतनले पारेको प्रभावसम्बन्धी अध्ययन गर्न र मुगुमा संचालित गैरसरकारी संस्थामार्फत आफ्नो देशको परियोजना अवलोकन गर्न समेत राजदूतहरु त्यहाँ पुगेको बताइएको छ ।
दुतावासले जलवायु परिवर्तनले हिमाली क्षेत्रका बासिन्दा र जनजीवनमा पारेको प्रभावको अध्ययन गर्ने यो भ्रमण गरिएको बताएको छ । सोमबार रारा तालको किनारमा रारा निकुञ्जका कर्मचारी, होटल व्यवसायी, पत्रकार, नागरिक समाजसित जलवायु् परिर्वतनले पारेको असरबारे छलफल गर्ने कार्यक्रम छ । उनीहरु मंगलबार समेत मुगुमै रहने छन् ।
काठमाडौं । अब नेपाल एयरलाइन्सको सिधा उडान नहुने गन्तव्यहरुमा पनि नेपाल एयरलाइन्सकै टिकटबाट यात्रा गर्न पाइने भएको छ ।
नेपाल एयरलाइन्सले विभिन्न वायुसेवा कम्पनीसँग द्विपक्षीय सम्झौता गरेसँगै यात्रुले यस्तो सुविधा पाउने भएका हुन् । सम्झौतासँगै एक अर्का वायुसेवाका सेक्टरमा यात्रुले सहजै सेवा लिन सक्ने भएका छन् ।
सम्झौता अनुसार अब नेपाल एयरलाइन्सको टिकटबाट यूरोपका विभिन्न शहरदेखि अष्ट्रेलियाको सिड्नी, दक्षिण कोरियाको सिओल, कुवेत, बहराइनसम्म यात्रा गर्न सकिने छ ।
यो सम्झौतासँगै निगमलाई थप आय हुने र अन्तर्राष्ट्रिय बजारमा नेपाल एयरलाइन्सको साख बढ्ने अपेक्षा लिइएको छ । टिकटहरु निगमको केन्द्रीय कार्यालय र ट्राभल एजेन्सीबाट काट्न सकिने भएको छ ।