Category: विश्व

टोकियो । जापानका पूर्वप्रधानमन्त्री शिन्जो आबेमाथि गोली प्रहार भएको छ। उनी जापानका लाोकप्रिय नेता हुन् । उनको अवस्था निकै गम्भीर भएको बीबीसीले लेखेको छ । नारा सहरमा आयोजित एउटा कार्यक्रममा सहभागी भएको बेला उनीमाथि गोली प्रहार भएको हो । जापानको समाचारसंस्था एनएचकेका अनुसार भाषण गरिरहेका शिन्जो आबेलाई पछाडिबाट गोली हानिएको थियो। गोली लागेपछि उनी ढलेका थिए। उनको शरीर रक्ताम्मे देखिएको थियो। समाचार विवरणहरूका अनुसार उनलाई आक्रमण गर्ने व्यक्तिलाई प्रहरीले हिरासतमा लिएको छ। जापानमा हाते बन्दुक प्रतिबन्धित छ।

त्यहाँ यस प्रकारको घटनालाई एकदमै दुर्लभ मानिन्छ। टोक्योका पूर्वगभर्नर योइची मासुजोएले ट्वीट गर्दै आबे मुटु र श्वासप्रश्वास नचलेको अवस्थामा भएको बताएका छन्। शिन्जो आबे जापानमा सर्वाधिक समय प्रधानमन्त्री बनेका नेता हुन्। स्वास्थ्यको कारण देखाउँदै उनले सन् २०२० मा पदत्याग गरेका थिए। पछि उनले आफू पेटको रोगबाट पीडित भएको बताए। योशिहिदे सुगा उनको उत्तराधिकारी बने। त्यसपछि फुमिओ किशिदा जापानको प्रधानमन्त्री बने।

लण्डन । बेलायतका अर्थमन्त्री ऋषि सुनक र स्वास्थ्यमन्त्री साजिद जावेदले प्रधानमन्त्रीको कार्यशैलीमाथि प्रश्न उठाउँदै पदबाट राजीनामा गरेका छन् । बोरिस जोन्सन नेतृत्वको सरकार जनअपेक्षा अनुरुप नचलेको भन्दै उनीहरुले राजीनामा दिएका हुन् । अर्थमन्त्री सुनकले राजीनामाको घोषणा गर्दै भनेका छन्, ‘सरकार गम्भीरताका साथ र ठीक ढंगले चलोस् भन्ने जनताको अपेक्षा एकदम ठिक छ । मलाई लाग्छ यो कुराका लागि हामीले संघर्ष गर्नुपर्छ । त्यसैले मैले राजीनामा दिने निर्णय लिएँ ।’

उनले आफ्नो देशले निकै ठूलो चुनौतीको सामना गरिरहेको पनि बताएका छन् । सुनकसँगै बेलायतका स्वास्थ्यमन्त्रीले पनि राजीनामा दिएका छन् । स्वास्थ्यमन्त्री साजिद जावेदले प्रधानमन्त्री जोन्सनमा राष्ट्रिय हित अनुकूल सरकार चलाउने क्षमता नभएको आरोप लगाएका छन् । यो सरकारले अब राष्ट्रिय हित र जनअपेक्षा अनुसार काम गर्न नसक्ने दाबी गर्दै उनले भनेका छन्, ‘प्रधानमन्त्री बोरिस जोन्सनले राष्ट्रिय हित अनुकूल सरकार चलाउँछन् भन्ने जनविश्वास गुमाइसकेका छन् ।’ बोरिसले हालै संसद विश्वासको मत लिएका थिए ।

काठमाडौं । इटलीले ७० वर्षयताकै सबैभन्दा खराब खडेरीको सामना गरिरहेको छ । त्यहाँको सरकारले पो नदी वरपरका पाँच उत्तरी क्षेत्रमा आपत्काल घोषणा गरेको छ। कोल्डिरेट्टी कृषि युनियनका अनुसार खडेरीले इटलीको ३० प्रतिशतभन्दा बढी कृषि उत्पादन नष्ट हुने खतरा भएको समेत अन्तर्राष्ट्रिय सञ्चारमाध्यमले जनाएका छन् । एमिलिया(रोमान्या, फ्रियूली भेनेत्सा जोलिया, लोम्बार्डि, पिडमन्ट र भेनेटो क्षेत्रलाई पानीको अभाव सम्बोधन गर्न आपत्कालीन कोषमा तीन करोड ८० लाख डलर रकम दिइनेछ।

बीबीसीका अनुसार कतिपय नगरपालिकाले यसअघि नै नगरवासीले व्यक्तिगत रूपमा कति पिउने पानी पाउनेछन् भनेर मात्रा तोकिसकेका छन्। इटलीको सरकारले भनेको छ, ‘सङ्कटकालको उद्देश्य भनेको वर्तमान अवस्थालाई असाधारण साधन र शक्तिका साथ व्यवस्थापन गर्ने भन्ने हो।’ उसले स्थितिमा सुधार नभए थप कदम चाल्नसक्ने जनाएको छ। असामान्य रूपमा गर्मी मौसम र हिउँद तथा वसन्त ऋतुमा कम वर्षा हुँदा उत्तरी इटलीमा पानीको अभाव जटिल बनेको छ। त्यसले जलवायु परिवर्तनका प्रभावका डरलाई थप बढाएको छ।

प्रधानमन्त्री मारियो ड्रागीले आइतवार डोलोमिटस हिमनदीमा आएको भयानक पहिरो पनि निःसन्देह रूपमा जलवायु परिवर्तनसँग जोडिएको बताए। उक्त घटनामा सातजनाको मृत्यु भएको थियो भने १३ जना अझै बेपत्ता छन्। पो इटलीको सबैभन्दा लामो नदी हो। उक्त नदी ६५० किलोमिटर लामो छ र पूर्वतिर बग्छ। पो उपत्यकाका कृषकहरूले अहिले नुनिलो समुद्री पानी नदीमा पसेर आएको र त्यसले बाली नष्ट भएको बताएका छन्।

सिड्नी । अस्ट्रेलियाको सबैभन्दा ठूलो सहर सिड्नीमा बाढीका कारण ५० हजार मानिसलाई सुरक्षित स्थानमा सर्न सूचित गरिएको छ। सिड्नीको केही भागमा चार दिनमा झन्डै आठ महिनामा हुने वर्षा भएको बीबीसीले लेखेको छ । बाढीका कारण त्यहाँ सडक अवरुद्ध भएको छ भने केही घरहरू पानीमा डुबेका छन्। आपूर्ति बन्द हुँदा हजारौँ मानिसले बिजुली प्रयोग गर्न पाएका छैनन्। ला निना मौसमी प्रणालीका कारण ठूलो वर्षा भएपछि आएको बाढीका कारण यो वर्ष २० जनाभन्दा बढीको मृत्यु भइसकेको छ।

तीमध्ये अधिकांश मानिस न्यू साउथ वेल्सका छन्। ग्रेटर सिड्नी भनिने तीन ठूला सहर भएको भूभागमा अहिलेको आपत्कालीन अवस्थामा १०० वटाभन्दा बढी स्थानान्तरणको निर्देशन जारी गरिएको छ। थुप्रै ठूला नदीमा बाढी आएपछि अन्य ५० क्षेत्रमा बसोबास गर्ने मानिसलाई पनि स्थानान्तरणका लागि तयारी अवस्थामा रहन सूचित गरिएको छ। चरम मौसमका कारण निकट क्षेत्रहरू हन्टर र इलावारा पनि प्रभावित भएका छन्। न्यू साउथ वेल्सका केही क्षेत्रमा चार दिनमा ८०० मिलिमिटर वर्षा भएको छ। मौसम हेर्ने निकायका अनुसार उक्त परिमाण ग्रेटर लन्डनमा एक वर्षमा हुने औसत वर्षाभन्दा झन्डै एकतिहाई बढी हो।

सिड्नीमा मङ्गलवारबाट मुसलधारे वर्षा सुरु हुने अपेक्षा गरिएको छ। साथै आँधीबेहरीको पनि पूर्वानुमान गरिएको छ। आँधी आउँदा रूख ढल्ने र विद्युत् आपूर्ति बिग्रिने सम्भावना हुन्छ। अधिकारीहरूले स्थानीयवासीलाई जोखिम भएका ठाउँ छाड्ने दिइएको सुझावप्रति ध्यान दिन आग्रह गरेका छन्। जोखिम भएका स्थल छोड्ने आदेश दिइएका मानिसलाई अन्यन्त्र जान सघाउन उद्धारकर्ताहरूलाई दुई दिनअघि नै बोलाइएको थियो।

कोपनहेगन । डेनमार्कको सबैभन्दा ठूलो सपिङ मल मध्ये एकमा एक जना बन्दुकधारीले तीन जनाको हत्या गरेका छन्। अन्य घाइते भएको र उनीहरूमध्ये तीन जनाको अवस्था गम्भीर रहेको प्रहरीले जनाएको छ। बीबीसीका अनुसार दक्षिण कोपनहेगनस्थित फिल्ड्स मलमा आम मानिसमा आतङ्क फैलाउने आक्रमण गरेको आरोपमा २२ वर्षीय व्यक्तिलाई पक्राउ गरी अभियोग लगाइएको छ। प्रहरी प्रमुख सोरेन थोमसेनले आक्रमणको कारण स्पष्ट नभएको र उनले उक्त कार्यलाई आतङ्कवाद सम्बन्धी कार्य होइन भन्न नसकिने बताए।

प्रधानमन्त्री मेट फ्रेड्रिकसेनले डेनमार्कले क्रूर आक्रमण भोगेको बताए। मृतकका आफन्तलाई समवेदना सन्देशसहित उनले सम्पूर्ण डेनिशहरूलाई यस कठिन घडीमा एकअर्कालाई साथ र सहयोग प्रदान गर्न प्रोत्साहित गर्न चाहेको बताइन्।
‘हाम्रो सुन्दर र सामान्यतया सुरक्षित राजधानी केही बेरमै परिवर्तन भयो’ उनले भनिन्। डेनमार्कको राज परिवारले पीडितहरू, उनीहरूका आफन्तजन र उक्त घटनाबाट प्रभावित सबैप्रति आफ्नो गहिरो सहानुभूति व्यक्त गरेको छ।

‘हामीलाई त्रासदीबारे पूर्ण रूपमा थाहा छैन तर मानिसहरूले ज्यान गुमाएको स्पष्ट छ र अझ बढी घाइते भएका छन्, रानी मार्गरेट, युवराज फ्रेड्रिक र युवराज मेरीको संयुक्त वक्तव्यमा लेखिएको छ। आक्रमणका शङ्कास्पदलाई पक्राउ गर्दा उनको हातमा राइफल र गोलाबारी रहेको प्रहरीले जनाएको छ। सन्दिग्धसँग सोमवार न्यायाधीशले सोधपुछको गर्ने बताइएको छ।

प्रहरीका अनुसार उनीसँग अन्य आक्रमणकारीहरू संलग्न रहेको कुनै सङ्केत भेटिएको छैन र पसल सञ्चालकहरूलाई उनीहरूसँग हुन सक्ने कुनै पनि भिडिओ फुटेज सुरक्षित गर्न आग्रह गरिएको छ। फिल्ड्स मलमा १४० भन्दा बढी पसल र रेस्टुराँहरू छन्। थुप्रै तलाको यस मल कोपनहेगनको बाहिरी भागमा छ र यो सहरको केन्द्रसँग जोडिने सबवे लाइन नजिकै रहेको छ। गोली चल्दा किनमेल गर्न आएका मानिसहरूले भोगेको आतङ्कबारे प्रत्यक्षदर्शीहरू बोलेका छन्।

काठमाडौं । रुस र पूर्वी युक्रेनमा रहेका पृथकतावादी फौजले युक्रेनको लिसेचान्स्क सहर कब्जामा लिएको रुसको रक्षा मन्त्रालयले दाबी गरेको छ। रुसी रक्षामन्त्रीले राष्ट्रपति पुटिनलाई युक्रेनको पूरै लुहान्स्क क्षेत्रलाई मुक्त पारेको बताएका हुन्। तर युक्रेनको रक्षा मन्त्रालयका प्रवक्ताले बीबीसीसँग कुरा गर्दै लिसेचान्स्क रुसी फौजको पूर्ण नियन्त्रणमा नरहेको बताएका छन्। त्यसअघि रुस र युक्रेन दुवैले पूर्वी युक्रेनको लिसेचान्स्क सहर आफ्नो कब्जामा रहेको दाबी गरेका थिए।

आफ्नो फौजले निरन्तरको रुसी आक्रमणको सामना गरिरहे पनि सहर कब्जामा नगएको दाबी युक्रेनले गरेको छ। रुसले समर्थन गरेका पृथकतावादीहरूले आफूहरू सफलतापूर्वक सहर प्रवेश गरेको र केन्द्र भागसम्म पुगेको बताएका थिए। रुसी सञ्चारमाध्यमले आफ्ना फौज वा पृथकतावादीहरू सडकमा परेड खेलिरहेका जस्तो देखिने दृश्यहरू प्रसारण गरेका छन्। रुसी समाचार स्रोतले सहरमा ध्वस्त अवस्थामा रहेको प्रशासनिक भवनमा सोभियत झण्डा गाडिएको दाबी गर्दै भिडिओहरू ट्वीट गरे पनि त्यसको स्वतन्त्र पुष्टि हुन सकेको छैन।

डोन्बास औद्योगिक क्षेत्रमा रहेको यो सहर युक्रेनले लुहान्स्कमा अन्तिमसम्म आफ्नो नियन्त्रणमा राखेको स्थान हो। रुसले नजिकैको सहर सेभेरोडोनेट्स्क गत महिना मात्रै आफ्नो नियन्त्रणमा लिएको थियो। लुहान्स्क क्षेत्रका गभर्नर सर्ही हैदाले लिसेचान्स्क सबैतिरबाट रुसी फौजबाट घेरिएको र उनीहरू अघि बढिरहेको बताएका छन्। रक्षासम्बन्धी ब्लगर रोब लीले चेचेन रुसी फौजहरू सहरमा देखिएको तस्बिरहरू सार्वजनिक गरेका छन्।

नेटोको सदस्यता लिन अघि बढेको युक्रेनलाई निःशस्त्र बनाउने र नाजीमुक्त बनाउने दाबी गर्दै रुसले फेब्रुअरी २४ मा युक्रेनमाथि आक्रमण थालेयता हजारौँ गैरसैनिक र सुरक्षाकर्मीहरू मारिएका वा घाइते भएका छन्। युक्रेनमा एक करोड २० लाख मानिसहरू घर छोड्न बाध्य भएको छन्। रुसी आक्रमणको प्रतिक्रिया स्वरूप पश्चिमा देशहरूले युक्रेनलाई अस्त्र सहयोग गरेका छन्। उनीहरूले आणविक महाशक्ति र विश्व बजारमा ऊर्जाको प्रमुख आपूर्तिकर्तामध्ये एक रुसमाथि अभूतपूर्व प्रतिबन्ध पनि लगाएका छन्।

निरन्तरको आक्रमणका कारण उत्तरी खार्किभमा रेलमार्ग र विद्युत् प्रसारण लाइनहरूमा क्षति पुगेको छ। बन्दरगाह रहेको सहर ओडेसा जाने प्रमुख मार्गमा रहेको दक्षिणी सहर मिकोलिएभमा पनि कैयौँ विस्फोट भएका विवरणहरू आएका छन्। रुसको रक्षा मन्त्रालयले आफ्नो वायुसेनाले पाँच युक्रेनी कमान्ड पोस्ट र कैयौँ गोला बारुदका भण्डार ध्वस्त बनाइदिएको दाबी गरे पनि स्वतन्त्र पुष्टि हुन सकेको छैन। ओसेडा नजिकैको एक आवासमा २० जना मानिसहरू मारिने गरी क्षेप्यास्त्र आक्रमण गरेको आरोप लागेपछि रुसले पनि यस्तो दाबी गरेको हो।
बीबीसी

मनिला । फिलिपिन्सका निवर्तमान राष्ट्रपति रोड्रिगो डुटेर्टेको उत्तराधिकारीका रूपमा बिहीवार फर्डिनान्ड मार्कोस जुनियरले शपथ लिने भएका छन् । धेरैको चासो रहेको निर्वाचनमा बोङबोङ उपनामले चिनिने मार्कोसले प्रतिद्वन्द्वी लेनी रोब्रेडोलाई ६० प्रतिशत मत ल्याइ पराजित गरेका हुन् । उनको जीतले मार्कोस राजनीतिक वंशको रोचक पुनरागमनको सङ्केत गर्छ जुन सन् १९८६ मा भएको आम विद्रोह पछि पदच्युत भएको थियो। निवर्तमान राष्ट्रपतिकी छोरी सारा डुटेर्टेले उपराष्ट्रपतिको शपथ लिने छिन्।

मार्कोस जुनियरले स्थानीय समय अनुसार दिउँसो १२ बजे मनिलास्थित राष्ट्रिय सङ्ग्रहालयमा शपथ लिनेछन्। कार्यक्रममा सयौँ स्वदेशी तथा विदेशी प्रतिष्ठित व्यक्तित्वहरू सहभागी हुनेछन्। समारोहका निम्ति फिलिपिन्सको राजधानीमा करिब १५ हजार सुरक्षाकर्मी तैनाथ गरिने छन्। त्यहाँको सर्वोच्च अदालतले मार्कोस जुनियरको पुनः निर्वाचन विरुद्धको बाँकी चुनौतीहरू खारेज गरेको केही दिन पछि उनी विजयी भएका हुन्। मार्कोस जुनियरको चुनावी जीत मार्कोस परिवारका सदस्यहरूले आफ्नो राजनीतिक ख्याति पुनः प्राप्त गर्नका लागि दशकौँसम्म जारी राखेको सङ्घर्षको परिणामको रूपमा हेरिएको छ।

उनका बुबा फर्डिनान्डले सन् १९६५ देखि १९८६ सम्म देशको नेतृत्व गरेका थिए। उनले मार्शल कानुन लागू गरे र उनको नेतृत्व अवधिमा देशभरि व्यापक मानवअधिकार हनन भयो र भ्रष्टाचार बढ्यो। सन् १९९६ मा जन विद्रोह गर्न लाखौँ मानिसहरू सडकमा उत्रिए पछि उनको शासन अन्त्य भयो। लगत्तै त्यतिबेला २८ वर्षीय बोङबोङ सहित मार्कोस परिवारले देश छोडेर हवाई गए। लामो समय राजनीति गरेका उनी सन् १९९१ मा फिलिपिन्स फर्केका थिए। त्यति बेला देखि उनी आफ्नो बुबाले राष्ट्रपतिको रूपमा बिताएको समयलाई विकास र समृद्धिको सुनौलो अवधिको रूपमा चित्रण गर्न तल्लीन छन्।

मार्कोस जुनियरको सामाजिक सञ्जाल अभियानले उनको लोकप्रियतालाई ह्वात्तै बढायो। विशेष गरी तानाशाहलाई प्रत्यक्ष रूपमा अनुभव गर्न नपाएका युवा जमातहरू माझ उनी चर्चित बने। आलोचकहरूले भने उनको सामाजिक सञ्जाल अभियान अन्तर्गत गलत जानकारीहरूको प्रवाह भएको र उनको बुवाको शासनकालमा भएको अत्याचारबारे तथ्य लुकाइएको आरोप लगाएका छन्। यद्यपि, उनले ती आरोपहरूको खण्डन गरे। उनको चुनावी अभियान भर सारा डुटेर्टे पनि सँगै रहिन् जसले दुई सम्भ्रान्त परिवारहरू उत्तरी फिलिपिन्सको मार्कोस र दक्षिणी मिन्डानाओ टापुका डुटेर्टेसको राजनीतिक शक्ति संयोजन गर्दै व्यापक बनाएको छ।

तर ६४ वर्षीय यी नेताले महामारीको असरबाट अझै बाहिर ननिस्किएको देशमा बढ्दो मुद्रास्फीति दर र ऋणका कारण प्रभावित अर्थतन्त्रको उत्तराधिकार सम्हाल्दै छन्। आलोचकहरूले उनले रोजगारी बढाउने र मूल्य वृद्धिलाई सम्बोधन गर्ने प्रतिज्ञाहरू गरे पनि वास्तविक नीति सुधारका लागि कम छलफल गरेको बताएका छन्। केहीले मार्कोस जुनियरले डुटेर्टेको कार्यकालमा लागूपदार्थ नीति विरुद्धको रक्तपातपूर्ण युद्ध र प्रेस स्वतन्त्रतामा कडाइका कारण स्थापित देशको छवि पुनर्स्थापना गरिदिउन् भन्ने चाहेका छन्।

यद्यपि, राष्ट्रपतिको शपथ कार्यक्रमभन्दा एक दिन अघि फिलिपिन्सको एक नियामक निकायले आफू खोजमूलक समाचार माध्यम र्‍यापलर बन्द गर्ने निर्णयमा दृढ रहेको जनायो। र्‍यापलर ती सञ्चार माध्यममध्ये एक हो जसले रोड्रिगो डुटेर्टेको सरकारको आलोचना गर्दै आएको छ।
बीबीसी

काठमाडौं । युक्रेनी फौजलाई पूर्वी शहर सेभेरोडोनेट्स्कबाट पछाडि हट्ने आदेश दिइएको त्यस क्षेत्रका मुख्य अधिकारीहरूले बताएका छन्। रुसी फौजले लुहान्स्क क्षेत्रलाई पूर्ण नियन्त्रणमा लिन खोजिरहँदा उक्त रणनीतिक महत्त्वको शहरमा हप्तौँदेखि बमबारी र लडाइँ भएका छन्। यस युक्रेनी फिर्ती किन पनि महत्त्वपूर्ण छ भने यससँगै अब लिसिचान्स्क शहरबाहेक लुहान्स्कको सबै भाग रुसी नियन्त्रणमा पुग्नेछ। रुसी फौजले पछिल्ला दिनमा सेभेरोडोनेत्स्कलाई लगभग घेरा हालिसकेका थिए र उनीहरूको निशानामा त्यसछेउको लिसिचान्स्क शहर समेत छ। लुहान्स्क क्षेत्रका प्रमुख सेर्हेई हाइडाईले युक्रेनी टेलिभिजनमा बोल्दै ‘महिनौँदेखि लगातार बमबारी भइरहेको ठाउँमा अडिग हुनुको कुनै अर्थ नरहेको’बताएका छन्।

गभर्नर हाइडाईले भने, ‘उनीहरूलाई नयाँ ठाउँमा आड लिन र त्यहाँबाट लडाइँ जारी राख्न निर्देशन दिइएको छ।’ राष्ट्रपति पुटिनको खास प्राथमिकतामा रहेको लुहान्स्क पूर्वी युक्रेनमा मुख्य रूपमा रुसी भाषा बोलिने क्षेत्र हो। डोनेट्स्कसँग लुहान्स्क मिल्दा त्यस पूरै भेगलाई डोनबास भनिन्छ जुन एउटा ठूलो औद्योगिक क्षेत्र पनि हो। सन् २०१४ यता त्यो रुसी साथ पाएको पृथकतावादी अभियानको केन्द्रमा छ। भ्लादिमिर पुटिनले गलत रूपले डोनबासमा रुसी भाषीहरूलाई नरसंहार गर्ने गरिएको दाबी गर्ने गर्छन्। त्यसैलाई उनले युक्रेन अतिक्रमणपछाडिको एउटा मुख्य कारण बताउने गरेका छन्।

त्यसैगरी युक्रेनले समेत मस्कोलाई आफ्ना नागरिकहरूमाथि जथाभावी बमबारी र गोलाबारी गरेर नरसंहार मच्चाएको आरोप लगाएको छ। गभर्नर हाइडाईले यतिखेर सेभेरोडोनेट्स्क शहरको पूर्वाधार पूर्ण रूपले ध्वस्त भएको बताउँदै ९० प्रतिशत घरमा बमबारी भएको र तीमध्ये ८० प्रतिशतमा गम्भीर क्षति पुगेको बताएका छन्। युद्ध सुरु हुनुअघि उक्त शहरको जनसङ्ख्या झण्डै १ लाख थियो। त्यहाँ अझै सयौँ मानिसहरू एउटा विशाल रासायनिक कारखानामा आश्रय लिइरहेका छन्।

बीबीसी

काठमाडौं । अफगानिस्तानमा बुधबार राती आएको भूकम्पमा ठूलो हताहती भएको छ । अधिकारीहरुका अनुसार १ हजार भन्दा बढी मानिसको मृतयु भएको पुष्टी भइसकेको छ । तालिवानका नेता हिब्तुल्लाह अखुन्दजादले अहिलेसम्म १ हजार ५०० बढी घाइतेलाई उपचारका लागि अस्पतालहरुमा भर्ना गरिएको जानकारी गराएका छन् । उद्धारकर्ताहरुले भत्किएका घरमा पुरिएकाहरुको खोजी जारी राखेका छन् । विकट पहाडी क्षेत्रमा भएको क्षतिको विवरण आउन अझै बाँकी रहेकाले मृतकको संख्या अझै बढ्ने अनुमान गरिएको छ ।

भूकम्पबाट सबैभन्दा बढी प्रभावित पूर्वी प्रान्त पक्तिकामा ठाउँ ठाँउमा पहिरो गएका र भत्किएका घरहरुको तस्वीर र दृष्यहरु आइरहेका छन् । अफगानिस्तानको खोस्त सहरभन्दा करिब ४४ किलोमिटर टाढा केन्द्रविन्दु भएर ६.१ म्याग्निच्युटको भूकम्प गएको थियो । त्यसको धक्का पाकिस्तान र भारतमा समेत महसुस भएको थियो । अन्तर्राष्ट्रिय सञ्चार माध्यमका अनुसार यो पछिल्लो २ दशकमा अफगानिस्तानमा गएको खतरनाक भूकम्प हो । तालिवानले शासन गरिरहेको अफगानिस्तानमा खाद्य संकट छ । यो भूकम्पपछि थप संकटको खतरा बढेको छ ।

इश्लामावाद । पाकिस्तान र अफगानिस्तानमा शक्तिशाली भूकम्प गएको छ । अमेरिकी भूगर्भ सर्वेक्षण (यूएसजीएस)को मापन अनुसार बुधबार बिहान अफगानिस्तान र पाकिस्तानका केही भागमा गएको भूकम्पको तीव्रता ६.१ रेक्टरस्केल मापन गरिएको छ । दक्षिणपूर्वी अफगानिस्तानको खोस्ट सहरबाट करिब ४४ किलोमिटर टाढा रहेको क्षेत्रमा भूकम्प गएको यूएसजीएसले जनाएको छ। भूकम्पको गहिराइ ५१ किलोमिटर छ ।

भूकम्पले गरेको क्षतिको विवरण सार्वजनिक हुन बाँकी छ । पाकिस्तानी सञ्चारमाध्यमका अनुसार भूकम्प इस्लामबाद र देशका अन्य भागमा महशुस गरिएको थियो । पाकिस्तानको लाहोर, मुल्तान, क्वेटा र अन्य धेरै क्षेत्रमा पनि भूकम्पको धक्का महसुस गरिएको प्राप्त विवरणमा जनाइएको छ । भूकम्प भारतका केही भूभागमा महशुस गरिएको युरोपेली मेडिटेरेनियन सिस्मोलोजिकल सेन्टर (ईएमएससी) उल्लेख गरेको छ ।