Category: विश्व

काठमाडौं\एजेन्सी । कोलम्बियाका राष्ट्रपति इवान ड्यूक चढेको हेलिकोप्टरमा बन्दुकबाट आक्रमण भएको छ । अन्तर्राष्ट्रिय संचारमाध्यमहरुका अनुसार भेनेजुएलासँगको सीमाना नजिक उडिरहेको समयमा उनी सवार हेलिकोप्टरलाई लक्षित गरि गोली चलाइएको छ । हेलिकोप्टरमा राष्ट्रपति ड्यूकसहित रक्षामन्त्री, आन्तरिक मामला मन्त्रीसमेत सँगै थिए ।

राष्ट्रपतिका प्रवक्ताले घटनामा मानवीय क्षति भने नभएको जानकारी गराएका छन् । राष्ट्रपति इवान ड्यूकले घटनाको निन्दा गरेका छन् । उनले आफु आतंकवादी हमलाबाट नडराउने समेत प्रतिक्रिया दिएको समाचारमा उल्लेख छ । कोलम्बिया यस्ता हमलाको सामना गर्न निकै शक्तिशाली रहेको उनको भनाई छ । उनले घटनाबारे जाँचको आदेश दिएको समेत बताइएको छ ।

हेलिकोप्टर जमिनभन्दा थोरै मात्र माथि थियो । सवार मानिसहरुले हेलिकोप्टरको इन्जिनमा कुनै वस्तु ठोक्किएको जस्तै महसुश गरेको समाचारमा उल्लेख छ । जुन क्षेत्रमा राष्ट्रपतिमाथि हमला भयो, त्यहाँ बामपन्थी विद्रोही समूहहरु सक्रिय रहेको बताइएको छ ।

काठमाडौं\एजेन्सी । चीनको एक मार्सल आर्ट्स स्कुलमा आगलागी भएको छ । घटनामा कम्तीमा १८ जनाको मृत्यु भएको छ । १६ जना घाइते भएको स्थानीय सञ्चार माध्यमहरूलाई उदृत गर्दै बीबीसीले जनाएको छ । हताहत हुनेमा अधिकांश सातदेखि १६ वर्षका बालबालिका छन् । उनीहरू खअनान प्रान्तको झङ्सीङ्ग मार्सल आर्ट्स सेन्टरका आवासीय विद्यार्थी थिए।

शुक्रवार बिहानै भएको आगलागीलाई केही क्षणमै नियन्त्रणको प्रयास भएपनि ठूलो मानवीय क्षति भएको हो । घटनाको कारणबारे खुलिसकेको छैन । झङ्छेङ्ग काउन्टी सरकारले आफ्नो आधिकारिक वीच्याट च्यानलमा दिएको संक्षिप्त विज्ञप्तिमा उक्त मार्सल आर्ट्स सेन्टरका एक अधिकारीलाई पक्राउ समेत गरिएको छ । शुक्रवार बिहान ३ बजे आगलागी हुँदा आवासीय विद्यालयमा ३४ जना विद्यार्थी थिए। घाइते विद्यार्थीहरूलाई तत्काल अस्पताल पुर्याइएको छ ।

काठमाडौं\एजेन्सी । उत्तरपूर्वी इथियोपियाको टिग्रे भन्ने क्षेत्रमा रहेको एउटा बजारमा सरकारी फौजले गरेको हवाई हमलामा कम्तिमा ६० जना मारिएका छन् । बीबीसीका अनुसार आक्रमणमा दर्जनौँ मानिस घाइते छन् । प्रत्यक्षदर्शीलाई उदृत गर्दै बीबीसीले लेखे अनुसार इथियोपियाको हवाई फौजले उक्त क्षेत्रको राजधानी मिकाइलीबाट २५ किलोमिटर टाढा अवस्थित टोगोगा बजारमा आक्रमण गरेको हो ।

इथियोपियाको सेनाले गैर सैनिकहरूलाई निशाना नबनाएको बताउँदै आफ्नो हमलाले आतङ्कवादीलाई निष्क्रिय बनाउने उद्देश्य राखेको दावि गरेको
। तर, मारिनेमा सर्वसाधारण रहेका छन् । टिग्रेको विद्रोही सेनाले भने आफूहरूले प्रगति गरिरहेको दावि गर्छन् । संयुक्त राष्ट्रसङ्घले इथियोपियाको सरकारलाई हवाई हमलाका विवरणबारे अनुसन्धान गर्न आग्रह गरेको छ ।

करिब आठ महिनाअघि द्वन्द्व सुरु भएयता यो मुलुकमा हजारौँ व्यक्तिले ज्यान गुमाएका छन् । लाखौँ विस्थापित भइसकेका छन् । काइलीको एउटा प्रमुख अस्पतालका चिकित्सकले कम्तीमा ६० जना मारिएको र ४० जनाभन्दा बढी घाइते भएको आंकडा दिएका हुन् ।

नयाँ दिल्ली । भारतले आजबाट १८ वर्षभन्दा माथिका सबै नागरिकलाई कोरोना विरुद्धको खोप वितरण थालेको छ । यसअघि उमेर समूह छुट्याएर प्राथमिकताका आधारमा कोरोना खोप वितरण गरिएको थियो । महाअभियान नाम दिएर भारतले आजबाट भने १८ वर्षदेखि माथिका सबै नागरिकलाई खोप दिन थालेको भारतीय संचारमाध्यमले जनाएका छन् । भारतमा सबै नागरिकले खोप भने निःशुल्क पाउने छन् ।

नयाँ नीति अनुसार यो खोप अभियानको सबै खर्च केन्द्र सरकारले जुटाउने छ । खोप उत्पादक कम्पनीले उत्पादन गरेको खोपमध्ये ७५ प्रतिशत केन्द्र सरकारले खरिद गर्ने भएको छ । ती खोप राज्यलाई बाँडिने छ । भारतले सन् २०२१ भित्र १८ वर्षमाथिका सबै नागरिकलाई खोप दिने लक्ष्यसहित महाअभियान थालेको बताएको छ ।

काठमाडौं\एजेन्सी । चीनले आफ्नो जनसंख्यामा १ अर्ब भन्दा माथिको संख्यामा कोरोना खोप लगाएको छ । चीन कोरोना खोप निर्माता मुलुक समेत हो । चिनियाँ नेशनल हेल्थ कमिसनका अनुसार शनिबारसम्म चीनमा उक्त संख्यामा कोरोना खोप वितरण भएको हो । विश्वभर कोरोना खोपको २ अर्ब ५० करोड डोजभन्दा बढी खोप वितरण भएको छ । यस आधारमा विश्वभर दिइएको कोरोना खोपमध्ये करिब ४० प्रतिशत चीनले मात्र खपत गरेको देखिएको छ ।

चीन संसारमा सबैभन्दा धेरै मानिसमा कोरोना खोप दिने मुलुक हो । चीनपछि अमेरिकाले ३१ करोड डोज कोरोना खोप दिइसकेको छ । चीनले खोपको संख्या सार्वजनिक गरेपनि कति मानिसले खोप पाए भन्ने भने खुलाएको छैन । चीनमा सन् २०२० को डिसेम्बरबाट कोरोना खोप लगाउन थालिएको हो । चीनले अहिले दैनिक एक करोडभन्दा धेरै डोज कोरोना खोप बाँडिरहेको छ ।

नयाँ दिल्ली । भारतमा अबको तीन महिनापछि कोरोना भाइरसको तेस्रो लहर शुरु हुने आंकलन गरिएको छ । समाचार एजेंसी रोयटर्सका स्वास्थ्य विशेषज्ञले गरेको एक सर्वेक्षण अनुसार भारतमा अक्टोवरबाट कोभिडको संक्रमणको तेस्रो लहर शुरु हुने जोखिम देखिएको छ । तर, आगामी संक्रमण अहिलेको तुलनामा भने निकै नियन्त्रित हुनेछ । यद्दपी कोरोना संकटका कारण थप एक साल मानिसहरुले विभिन्न प्रकारका प्रतिवन्धहरुको भने सामना गर्नुपर्नेछ ।

जुन पहिलो साता यो सर्वेक्षण गरिएको हो । रोयटर्सका अनुसार सर्वेमा कोरोनाको खोप लगाइएका कारण जोखिम कम हुने देखिएको छ । अक्टोवरबाट शुरु भएको महामारी सन् २०२२ को फेब्रुअरीसम्म लम्बिने छ । यसले थप एक वर्ष जोखिमै रहने भएको हो । भारतमा आउने लहरको असर नेपालमा समेत पर्नेछ । नेपाल भने अझै दोस्रो लहरबाट कसरी बच्ने भन्नेमै अलमलमै छ ।

बार्सिलोना । स्पेनले अनिवार्य मास्कको नीतिमा परिवर्तन गरेको छ । त्यहाँका प्रधानमन्त्री पेड्रो सान्चेजले जुन २६ बाट घरबाहिर निस्किँदा मास्क अनिवार्य रहेको नीति हटाउने घोषणा गरेका छन् । शुक्रबार बार्सिलोनामा इकोनोमिक फोरमद्धारा आयोजित कार्यक्रमबाट उनले यस्तो घोषणा गरेका हुन् । यसले स्पेनले कोरोनालाई जितेको संकेतका रुपमा हेरिएको छ ।

स्पेनको जनसंख्या ४ करोड ७० लाख छ । उनका अनुसार आगामी बिहीबार मन्त्रिपरिषद् बैठकबाट सो घोषणा गरिने छ । सरकारको यो निर्णयपछि सामाजिक दूरी कायम राख्न सम्भव हुने खुल्ला ठाउाँ निस्कदा मास्क नलगाउँदा समेत हुने छ । सार्वजनिक यातायात, घर भित्र र व्यापारिक केन््रदहरुमा भने मास्क लगाउनु पर्ने छ । थप नियमबारे विस्तृतमा जानकारी गराउने उनको भनाई छ ।

तेहरान । ईरानमा नयाँ राष्ट्रपतिको छनोटका लागि आज प्रत्यक्ष निर्वाचना हुँदैछ । नयाँ राष्ट्रपतिको अन्तिम दौडमा कुल कुल चार उमेदवार छन् । उनीहरुमध्ये एक जनाले राष्ट्रपति हसन रूहानीलाई विस्थापित गर्नेछन् । प्रारम्भिक पूर्वानुमानहरुमा रूढ़िवादी शिया मौलवी तथा सर्वोच्च अदालतका मूख्यन्यायाधिश इब्राहिम राईसीको जित्ने सम्भावना बढी छ ।

राइसीलाई ईरानका केन्द्रिय बैंकका पूर्वगभर्नर अब्दुलनासेर हेमातीले चूनौति दिन सक्ने बताइएको छ । कतिपय असुन्तुष्ट समूहहरुले यहाँ चूनाव वरिष्कार गरेका छन् । अन्तर्राष्ट्रिय संचारमाध्यमहरुका अनुसार राइसीलाई निर्वाचनमा सहज हुने छ । अमेरिकासँगको परमाणु सम्झौता रद्द भएसँगै इरान अहिले आर्थिक संकटसँग जुधिरहेको छ । यस अवस्थामा सरकारसँग धेरै समुह असन्तुष्ट रहेका छन् ।

वर्तमान राष्ट्रपति हसन रूहानीको छवि नरम नेताका रुपमा रहेको छ । तर, उनले दुई कार्यकाल पुरा गरिसकेका छन् । अब उनी राष्ट्रपति बन्न सक्दैनन् । यो चुनामा करीव ६ सय जनाले राष्ट्रपतिमा उठ्न नाम टिपाएका थिए । जसमा ४० जना महिला थिए । गार्डियन काउन्सिलले गत महिला ७ पुरुषलाई मात्र योग्य ठानी नाम तय गरेको थियो । इरानमा करीव ६ करोड मानिस मतदानका लागि योग्य छन् । इरानमा करीव ८ करोड जनसंख्या रहेको छ ।

नयाँ दिल्ली । भारतमा कोरोना महामारीको ग्राफ उल्लेख्य घट्ने क्रममा रहेको छ । पछिल्लो २४ घण्टामा यहाँ ७० दिन यताकै सबैभन्दा कम संक्रमण पुष्टी भएको खबर भारतीय संचारमाध्यमले छापेका छन् । पछिल्लो २४ घण्टामा यहाँ ८४३३२ जनामा कोरोना पुष्टी भएको छ । स्वास्थ्य मन्त्रालयको तथ्यांक अनुसार यो अवधिमा ४००२ जनाको कोरोनाका कारण ज्यान गएको छ । यो अवधिमा १२१३११ जनाले भने कोरोना जित्न सफल भएका छन् ।

१ अप्रिलमा ८३ हजार मानिसमा कोरोना पुष्टी भएको थियो । त्यसपछि लगातार बढेको संक्रमण ७० दिनपछि पहिले कै स्थानमा आएको हो । भारले अहिलेसम्म २५ करोड मानिसमा कोरोना खोप लगाइसकेको छ । पछिल्लो २४ घण्टामा ३३ लाख भन्दा बढी मानिसलाई खोप लगाइएको छ । कोरोना एक्टिव केसको हिसावले भारत संसारको तेस्रो स्थानमा छ । कुल संक्रमितको संख्याका हिसावले समेत भारत दोस्रो स्थानमा छ । अमेरिका र ब्राजील भारत भन्दा अगाडी छन् ।

कानपुर । भारतको भारत उत्तर प्रदेश राज्यको कानपुरमा भएको भयानक सडक दुर्घटनामा कम्तिमा १७ जना मारिएका छन् । कानपुर–इलाहाबाद सडकखण्डमा बस र अटो एक आपसमा ठोक्किएर भएको दुर्घटनामा ठूलो मानवीय क्षति भएको भारतीय संचारमाध्यमले जनाएका छन् ।

मंगलबार साँझ भएको यो दुर्घटनामा थप ६ जना गम्भीर घाइते रहेको समाचारमा उल्लेख छ । घटनाप्रति भारतीय प्रधानमन्त्री नरेन्द्र मोदीले दुख व्यक्त गरेका छन् । उत्तर प्रदेशका मुख्यमन्त्री योगी आदित्यनाथले पिडितका परिवारलाई प्रतिपरिवार दुई लाख क्षतिपूर्ति दिने घोषणा गरेका छन् । प्रहरीका अनुसार तीव्र गतिमा रहेको बस कानपुरको सचेन्दी भन्ने ठाउँमा अटोसँग ठोक्किएको थियो ।

त्यसपछि बस पल्टिएको हो । यो बस लखनउबाट नयाँदिल्लीका लागि छुटेको थियो । शताव्दी ट्राभल्सको बस मंगलबार साँझ मजदुरहरु सवार अटोसँग ठोक्किएको हो । दुर्घटनामा मृत्यु भएकाहरुमध्ये धेरैजसो बिस्कुट फ्याक्ट्रीमा काम गर्ने मजदुर छन् । सबैजनाको घटनास्थलमै मृत्यु भएका कारण समेत दुर्घटना भयानक भएको समाचारमा उल्लेख छ ।

काठमाडौं । चीनले तीन वर्षमाथिका सबै बालबालिकामा कोरोना विरुद्धको खोप लगाउने भएको छ । चीनको स्वास्थ्य विभागले चिनियाँ खोप उत्पादक कम्पनी सिनोभ्याकको खोप तीन वर्षमाथिका बालबालिकामा समेत लगाउन सकिने गरि अनुमति प्रदान गरेको हो ।

अन्तर्राष्ट्रिय संचारमाध्यमहरुका अनुसार चीनले यसअघि १८ वर्ष भन्दा माथिकाले मात्र खोप लगाउन सक्ने अनुमति पाएका थिए । तीन वर्षमाथि उमेर समूहलाई कोरोना विरुद्धको खोप दिन अनुमति दिने चीन पहिलो देश बनेको छ ।प्रयोगमा आएका कोरोना भाइरसविरुद्धको १५ वटा खोपमध्ये सिनोभ्याकको खोपले पहिलोपटक कम उमेरका लागि अनुमति पाएको छ ।

यो खोपलाई गत साता मात्र विश्व स्वास्थ्य सङ्गठनले आपतकालीन अनुमति प्रदान गरेको थियो । तीन वर्षदेखि १७ वर्षसम्मका बालबालिकामा दुई चरणमा गरिएको परीक्षणमा सिनोभ्याकको खोप १८ वर्षभन्दा माथिकालाई जत्तिकै प्रभावकारी देखिएको निष्कर्ष निस्केको चिनियाँ अधिकारीले बताएका छन् ।

कोरोना भाइरसको तेस्रो लहरले बालबालिका बढी प्रभावित हुने चेतावनी वैज्ञानिकहरुले दिएका छन् । चीनले अहिले दैनिक साढे एक करोड मानिसमा खोप दिइरहेको छ ।

पुणे । भारतको महाराष्ट्र राज्यस्थित पुणेमा एक केमिकल फ्याट्रीमा भिषण आगलागी भएको छ । यस दुर्घटनामा कम्तिमा १८ जना मजदुरको ज्यान गएको छ । कैयौं मानिस घाइते भएका छ । अहिले उद्धारको काम जारी रहेको भारतीय संचारमाध्यमले जनाएका छन् । उद्योग पुणेको घोटावडे फाटा क्षेत्रमा अवस्थित रहेको छ । सोमवार साँझ चार बजेबाट आगो लागेको थियो ।

त्यसबेला उद्योगमा ३७ जना कामदार काम गरिरहेका थिए । फायर ब्रिगेड विभाग अनुसार कैयौं मजदूर अझै वेपत्त छन् । उनीहरुको खोजी जारी रहेको छ । फसेका मजदुरको उद्धारका लागि पर्खाल तोड्ने काम भइरहेको समाचारमा जनाइएको छ । आगो लाग्नुको कारण भने खुलेको छैन ।

सिन्ध । पाकिस्तानमा दुई रेल एक आपसमा ठोक्किएर भएको दुर्घटनामा कम्तिमा २५ जना मारिएका छन् । यो दुर्घटना पाकिस्तानको सिन्ध प्रान्तमा भएको हो । यहाँको डहरकीमा सर सैयद एक्सप्रेस र मिल्लत एक्सप्रेसका रेल एक आपसमा ठक्कर खाँदा कम्तिमा २५ जना मारिएको खबर समाचार एजेन्सीले प्रसारण गरेका छन् ।

कैयौं व्यक्ति घाइते रहेका र उद्धारको काम पनि भइरहेका कारण मृतकको संख्या बढ्न सक्ने आशंका छ । रेडियो पाकिस्तानका अनुसार दुर्घटना सोमवार बिहान भएको हो । गम्भिर प्रकृतिका घाइतेलाई अस्पताल पठाइएको छ । फसेका यात्रुको बचाउको काम जारी छ । रेलवे विभागका अनुसार मिल्लत एक्सप्रेस कराचीबाट सरगोधा जाँदै थियो । सर सैयद एक्सप्रेस रावलपिंडीबाट कराचीका लागि छूटेको थियो ।

काठमाडौं\एजेन्सी । नाइजिरियाको आतंकवादी समूह बोको हरामका नेता अबुबकार सेकाउ मारिएको खबर सार्वजनिक भएको छ । उनले आफ्नो ज्यान आफैँ लिएको एउटा विपक्षी लडाकू समूहले एउटा अडिओ रेकर्डिङमार्फत दावि गरेको छ । बीबीसीका अनुसार समाचार संस्थाहरूले प्राप्त गरेको उक्त अडिओ रेकर्डिङमा दुईवटा समूहबीचको लडाइँपछि सेकाउले आफैँलाई विस्फोटन गराएको हुन् ।

यस्तो दावि इस्लामिक स्टेट वेस्ट अफ्रिका प्रोभिन्स (आइएसडब्लुएपी)ले गरेको हो । त्यसो त सेकाउबारे पटक पटक यस्ता खबर आउने गरेका छन् । अघिल्लो महिना मात्रै उनी मारिएको खबर आएको थियो । बोको हराम वा नाइजिरियाको सरकार कसैले पनि उनको मृत्युको आधिकारिक पुष्टि भने गरिसकेको छैन । मिति उल्लेख नगरिएको अडिओ रेकर्डिङमा आइएसडब्लूएपीका नेता अबु मुसाब अल बरनावीले सेकाउले ‘आफैँलाई विस्फोटन गराएर आफ्नो ज्यान लिएको’ बताएका छन्।

अघिल्लो महिना भएको भिडन्तमा सेकाउको मृत्यु भएको खबरहरू आएपछि नाइजिरीयाली सेनाले आफूले उक्त विषयमा अनुसन्धान गर्ने प्रतिक्रिया दिएको छ । उत्तर पूर्वी नाइजिरियाको साम्बिसास्थित जंगलमा रहेका बोको हरामका अखडामा भएको हमलामा उनी मारिएको बताइएको छ ।

सन् २००९ मा बोको हरामका संस्थापक आफ्ना पिता मोहमद युसुफलाई सुरक्षाकमीले मारेपछि उनी नेतृत्वमा आएक हुन् । उनको नेतृत्वमा उत्तर पूर्वी नाइजिरियामा जारी द्वन्द्वमा ४० हजारभन्दा बढीले ज्यान गुमाइसकेका छन् । २० लाखभन्दा बढी विस्थापित छन्।

काठमाडौं\एजेन्सी । बुर्किना फासोमा आतकंवादीको आक्रमणमा परी कम्तिमा एक सय जना मारिएको छन् । बीबीसीले समाचार एजेन्सी रोयटर्सलाई उदृत गर्दै जनाए अनुसार देशमो उत्तरी भागमा रहेको एउटा गाउँमा हतियारधारिहरूले आक्रमण गरेका छन् । यो घटना शुक्रबार रातीको हो । घटनामा कम्तिमा एक सय जना मारिएको राष्ट्रपति रोक कबोरेले जानकारी गराएका छन् ।

शुक्रवार राति सोल्हान गाउँमा छापा मारिएको र त्यहाँ घर तथा बजारमा आगजनी गरिएको उनको भनाई छ । हालसम्म आक्रमणको जिम्मा कसैले पनि लिएको छैन। तर पछिल्ला दिनहरूमा त्यहाँ इस्लामी समूहहरूको हमला बढेको छ । खासगरी नाइजेर र मालीसँग जोडिएका क्षेत्रमा त्यस्ता घटना बढेको समाचारमा उल्लेख छ ।

बुर्किना फासोले आफ्ना छिमेकी राष्ट्रहरूमा जस्तै गहिरिँदै गएको सुरक्षा सङ्कटको सामना गरिरहेको छ। उक्त क्षेत्रमा शस्त्र समूहहरूले छापा मार्ने र अपहरण गर्ने जस्ता गतिविधि गर्दै आएका छन्। फ्रान्सेली फौजले माली, चाड, मोरीटेनीया, नीजेर र बुर्कीना फासोका सैनिकलाई अतिवादीहरूसँग लड्न सहयोग गरिरहेको समेत बीबीसीले जनाएको छ ।

नयाँ दिल्ली र भारतको राजधानी नयाँ दिल्लीले कोरोना भाइरसको उच्च संक्रमण दरलाई नियन्त्रणमा लिन सफल भएको छ । यससँगै अब लकडाउन खुकुलो बनाउने तयारी दिल्ली सरकारले गरेको छ । भारतीय संचारमाध्यमहरुका अनुसार पछिल्लो साता सङ्क्रमण दर ०.६८ प्रतिशत मात्र देखिएको छ । दिल्लीमा शुक्रबार ५२३ व्यक्तिमा मात्र संक्रमण देखियो । दिल्ली २ करोड भन्दा बढी जनसंख्या भएको घना शहर हो ।

यहाँ शुक्रबार ५० सङ्क्रमितको मात्र मृत्यु भएको पुष्टि गरिएको छ। दिल्लीका मुख्यमन्त्री अरविन्द केजरीवालले दैनिक कोभिड–१९ सङ्क्रमण दरमा गिरावट आएपछि नयाँ दिल्ली र वरपरका क्षेत्रमा आउँदो हप्तादेखि लकडाउनलाई थप खुकुलो पार्ने घोषणाको तयारी गरिरहेका छन् ।

आगामी दिनमा कोभिड–१९ सङ्क्रमणका कारण बन्द बजारलाई केही खुकुलो पार्ने र कोरोनाभाइरसको तेस्रो लहरलाई सामना गर्न आवश्यक तयारीबारे पनि सरकारी संयन्त्र तथा नागरिकलाई निर्देशन दिने तयारी समेत उनले गरेका छन् । सरकारले जून ७ देखि बजार र अन्य गतिविधि संचालन गर्न दिने तयारी गरेको छ ।

सरकारले गत हप्ता उत्पादन तथा निर्माण क्षेत्रको प्रतिबन्धलाई अन्त्य गर्दै स्वास्थ्य सावधानीका साथ नियमित काममा फर्कन अनुमति दिएको थियो । दिल्लीमा अप्रिल १९ देखि लकडाउन जारी छ ।