Category: विश्व

न्युयोर्क      

ईटाली अर्को हप्तादेखि खुल्दै –

कुनै समय कोरोना महामारीको एपिसेन्टर बनेको ईटाली आगामी हप्ता मे १८ तारिखदेखि खुल्ने तरखरमा छ । अब ईटालीमा रेस्टुरेन्ट, बार, ब्युटी पार्लरहरु १८ तारिखदेखि खुल्ने छन् । ईटालीमा मंगलवारसम्म २ लाख १९ हजार ८ सय १४ संक्रमित र ३० हजार ७ सय ३९ को मृत्‍यु   भएको छ ।  

रसियाले कोरोना संक्रमित संख्यामा बेलायत र स्पेनलाई जित्यो –

पछिल्लो २४ घण्टामा १० हजार ८ सय ९९ जना संक्रमित भेटिए पछि रसियाले संक्रमितको संख्यामा बेलायतलाई जितेको छ ।  रसिया अहिले बेलायत र स्पेन भन्दा माथि पुगेर कोरोना संक्रमणमा विश्वमा दोश्रो भएको छ । जोन हप्किन्स युभर्सिटीको ताजा आँकडा अनुसार रसियामा २ लाख ३२ हजार २ सय ४३ संक्रमित पुगेका छन्  भने २ हजार १ सय १६ को कोभिड -१९ ले मृत्‍यु भएको छ ।  

युनाइटेड किङ्डममा मृतकको संख्या  ४० हजार नाघ्यो-

युकेस्थित नेशनल स्ट्यटिक्सको कार्यालयका अनुसार  बेलायत र वेल्सको संयुक्त मृतक संख्या ३५ हजार ४४ जना पुगेको छ ।  स्कट्ल्यान्ड  र उत्तरी आयरल्याण्डमा समेत गरेर युनाइटेड किङ्डममा मृतकको संख्या ४० हजार ४ सय ९६ पुगेको छ ।  

स्पेनमा बिदेशबाट जाने सबैलाई दुई हप्ता क्वेरन्टाईनमा राखिने घोषणा  –

मे १५ तारिख शुक्रबारदेखि बिदेशबाट स्पेन भित्रिने हरेक मानिस क्वेरन्टाईनमा बस्नै पर्ने बाध्यकारी ब्यबस्था स्पेन सरकारले घोषणा गरेको छ । स्पेन जाने हरेक मानिस २ हप्ता आफ्नै घर भित्र क्वेरन्टिनमा बस्नु पर्ने छ भने ग्रोसरी लगायतको लागि बिशेष ब्यबस्था गरिने जनाईएको छ । 

दक्षिण कोरियामा नाईट क्लब जानेहरुलाई डिजिटल माध्यमबाट खोजी गरिदै –

पहिलो चरणमा कोरोना संक्रमणलाई सफलता पूर्वक नियन्त्रणमा लिएको दक्षिण कोरियामा पुन: कोरोना संक्रमण बल्झिए पछि सरकारले नाईट क्लब जानेहरुलाई फोन डाटा, क्रेडिट कार्ड, स्टेटमेन्ट र सि सि टि भि फुटेज मार्फत क्लब जानेहरु खोज्न थालेको छ । पछिल्लो समय १०० जना एक्कै पल्ट नाईट क्लब जानेहरु संक्रमित भेटिए पछि सरकारले यो माध्यमबाट सम्भाबित संक्रमित खोज्न थालेको हो ।  

विश्व स्वास्थ संगठनको अति नै सचेत रहन आग्रह –

एसिया र युरोपका कतिपय मुलुक पुन: सुचारु गर्ने तयारीमा भएको अवस्थामा कोरोनाको दोश्रो पटकको छालदेखि बच्न्न विश्व स्वास्थ सँगठनले सम्बन्धित देशहरुलाई अति नै सचेत भएर देश पुन: सुचारु गर्न अनुरोध गरेको छ ।  

भारतमा दशकौं पछि पहिलो पटक प्रदुषणमा कमी –

कोरोना महामारीले लामो समय देश लकडाउन गरेको कारण भारतको बातावरणमा दशकौं पछि पहिलो पटक कार्बन डाईअक्साईड उत्सर्जनमा ब्यापक कमी आएको जनाईएको छ ।

अमेरिकी राष्ट्रपति र उप-रास्ट्रपतिलाई केही समय एक अर्काबाट टाढा राखिदै –

ह्वाईट हाऊसस्थित दुई कर्मचारीमा कोरोना संक्रमण देखिए पछि केही समयको लागि राष्ट्रपति र उपरास्ट्रपतिलाई एक अर्काको नजिक जान नदिने ट्रम्प प्रशासनको कर्मचारीले संचार माध्यमलाई बाताएका छन्  । एउटै कोठामा पनि राष्ट्रपति र उपरास्ट्रपतिलाई सामाजिक दुरी कायम गरेर राखिने जनाईएको छ ।

यससँगै; हालसम्म विश्वमा कुल ४२ लाख १५ हजार ५ सय १४ मानिसमा संक्रमण देखिएको छ भने २ लाख ८७ हजार ८ सय ९ को मृत्‍यु भइसकेको छ ।

प्राप्त पछिल्लो जानकारी अनुसार अमेरिकामा १३ लाख ५१ हजार २ सय ४८ जना संक्रमित  र ८० हजार ९ सयको मृत्‍यु भएको छ ।

न्युयोर्क

राष्ट्रपति डोनाल्ड ट्रम्प सोमबार व्हाईट हाऊसमा आयोजित कोरोना भाईरस प्रेस ब्रिफिङबाट पत्रकारसँग जंगिएर निस्किए । कोरोना भाईरस सम्बन्धि प्रेस ब्रिफिङको अन्तिम समयमा राष्ट्रपति ट्रम्पले वाईजा जियाङ नामकी एक पत्रकारको प्रश्न लिएका थिए । ती महिला पत्रकारले ट्रम्पलाई सोधेकी थिईन्; “किन तिमी भाईरस परिक्षणको कुरा आउने बित्तिकै जहिले पनि विश्वका अरु देशहरु भन्दा अमेरिकाले एकदमै धेरै मानिसमा परिक्षण गरेको भनेर विश्वब्यापी प्रतिस्पर्धा जस्तो गर्दछौ ? जबकी अमेरिकामा यति धेरै मानिसको मृत्‍यु भएको छ ?”

ती पत्रकारको प्रश्नको जवाफमा राष्ट्रपति ट्रम्पले; “हो नि ! संसारभर मान्छेहरुको मृत्‍यु भएको छ । यदि तिम्रो यही प्रश्न हो भने चाईनालाई सोध” । भनेका  थिए । जियाङ मङोलियन अनुहारकी चीनमा जन्मिएकी पत्रकार हुन । त्यस लगत्तै राष्ट्रपति ट्रम्पले थपे – “त्यो प्रश्न मलाई सोध्न्ने होईन ।  चीनलाई सोध ल ! यदि चीनलाई सोध्यौ भने तिमीले अस्वाभाविक उत्तर पाउँछौ” ।  

त्यसपछि ट्रम्पले सिएनएनकी अर्की महिला पत्रकार केट्लन कोलिन्सलाई प्रश्न सोध्ने पालो दिए । प्रश्न सोध्ने पालो पाएकी कोलिन्स एकै छिन् रोकिएकी थिइन् । त्यतिकैमा जियाङले फेरी सोधिन् “तिमीले बिशेष गरेर मलाई नै त्यसो किन भनेको” ? त्यस पछि राष्ट्रपति ट्रम्पले रिसाएर भनें “न्यास्टी…कोईसन” । उनले कुनै उत्तर दिएनन् । 

आफ्नो पालोमा पत्रकार जियाङलाई पुन: प्रश्न राख्ने मौका दिएको भनेर सिएनएन कि केट्लन कोलिन्सको प्रश्न ट्रम्पले पुन: लिन मानेनन् । त्यतिकैमा ‘नेक्स्ट प्लिज’ भन्दै अर्को तिर औंला देखाएका उनले; ‘नेक्स्ट प्लिज’ त  भने तर अर्को पत्रकार कसैलाई पनि प्रश्न सोध्ने मौका दिएनन् । उनी त्यतिकै रिसाएर रोज गार्डनबाट बहिरिए ।

सोमबार आयोजित राष्ट्रपति ट्रम्पको प्रेस ब्रिफिङ कोरोना भाईरस परिक्षण गर्ने किट र अमेरिकामा अर्थतन्त्र खुला गर्ने बिषयमा केन्द्रित थियो ।

प्रभात भट्टराई/अमेरिका

संसार पहिलो विश्वयुद्धको कहालीबाट बाहिर निस्किने तरखर मात्र गर्दै थियो, सबैलाई एक अदृश्य शत्रुले घेर्यो । चार बर्ष चलेको विश्वयुद्धभन्दा डेढ बर्षसम्म फैलिएको उक्त महामारीमा करोड बढिले ज्यान गुमाए । सन् १९१८ मा सुरु भएको स्पेनिस फ्लू  (इन्फ्लुएन्जा) पेन्डामिक यति कहालीलाग्दो सरुवा रोग भइ दियो कि पाँच करोड हाराहारीले यसको संक्रमणबाट ज्यान गुमाए । जबकी पहिलो विश्वयुद्धमा मारिनेको संख्या संसारभर चार करोड हाराहारी मात्र थियो ।

एचवानएनवान भाइरसको कारण फैलिएको स्पेनिश फ्लू महामारी कोभिड १९  (कोरोना भाइरस)को प्रकोपसँगै एक पटक फेरि जनस्वास्थ्य विज्ञ र जानकारहरुको मानसपटलमा बल्झिएको छ । सन् १९१८ को वसन्तमा पहिलो पटक अमेरिकी सैन्य अधिकारको शरिरमा देखिएको स्पेनिश फ्लुको प्रसार यसरी भयो कि विश्वभरका ५० करोड व्यक्ति यो रोकको संक्रमणमा परे । त्यसबेलाको विश्व जनसंख्याको यो एक तिहाई हिस्सा थियो । संक्रमितमध्ये १० प्रतिशतले ज्यान गुमाएका थिए । अमेरिकामा यो भाइरसका कारण छ लाख ७५ हजारको ज्यान गयो । युरोपका १४ देशमा मात्र २३ लाख बढिको मृत्यु भएको थियो ।

पहिलो पटक अमेरिकी सैनिकमा देखिएको भएपनि यो भाइरस कहाँबाट सुरु भयो भन्ने यकिन अहिलेसम्म हुन सकेको छैन । संक्रमणबाट ज्यान गुमाउनेमा अधिकांश पाँच बर्ष मुनिका, २० देखि ४० बर्षका र ६५ बर्ष माथिका थिए । २० देखि ४० बर्ष उमेर समुहका स्वस्थ व्यक्तिहरुको उच्च मृत्युदर भने संक्रमणको सबैभन्दा अनौठो विशेषताको रुपमा रहेको थियो । संक्रमणका लागि कुनै भ्याक्सिन पत्ता लागेको थिएन भने एन्टी बायोटिक औषधी पनि उपलब्ध थिएन । आइसोलेसन, क्वारेन्टाइन, स्वस्थवर्धक खाना, सेनिटाइजर  प्रयोग जस्ता रोकथामका गैर चिकित्सकीय उपाय पनि सिमित थिए ।

सन् १९१७ को अप्रिलमा अमेरिकी पौने चार लाख सैनिक सहित पहिलो विश्वयुद्धमा होमियो । १९१८ को मार्चमा ‘फ्लू’ संक्रमणसँगो मिल्दोजुल्दो विशेषताको रोग अमेरिकी आर्मीहरुमा देखिन थाल्यो । कान्सास स्थित क्याम्प फनस्टोनमा सातामै १०० सैनिक जवान घाइते भए ।  छ महिना भित्र उक्त संक्रमण अमेरिका सहित युरो र एसियाका बिभिन्न देशमा देखिन थाल्यो ।

सन् १९१८ को अक्टुबरमा मात्र एक लाख ९५ हजार अमेरिकीले भाइरस संक्रमणबाट ज्यान गुमाए । त्यसपछि अमेरिकामा व्यवसायीक नर्सहरुको अत्यधिक खाँचो हुन पुग्यो । ठूलो संख्यामा नर्सहरु युद्ध मैदानमा घाइते सैनिकको उपचारमा खटिएका कारण नियमित अस्पतालमा उनीहरुको अभाव भएको थियो । अत्यधिक अभाव पछि नर्सलाई सहायता गर्न तयार हुनेले साताको १५ देखि २५ डलरसम्म कमाइ हुने विज्ञापन अस्पतालहरुले गरेका थिए । पेन्डामिकबाट अत्यधिक प्रभावित फिलाडेल्फियामा शबदाहगृहको पालो पर्खाइमा ५०० बढि लास पुगि सकेका थिए । कैयन् शब साताभन्दा बढि समय लाइनमा थिए । क्लोड स्टोरेजहरुलाई अल्पकालका लागि शबगृहमा रुपान्तरण गरिएको थियो भने एक उत्पादकले २०० सय  ‘प्याकिङ क्रेट’ कफीन बनाउन अनुदान दिएका थिए । सिकागो लगायत कैयन् शहरले मुभि थिएटर,  रात्रीकालिन स्कुलहरु बन्द गरेर सर्वसाधारणलाई भिडभाड नगर्न अनुरोध गरेका थिए । सान फ्रान्सिस्को स्थित बोर्ड अफ हेल्थले सार्वजनिक सेवामा रहेका सबैलाई मास्क लगाउन अनिवार्य गरेको थियो भने आम नागरिकलाई पनि मास्क लगाउन अनुरोध गरेको थियो ।

सेप्टेम्बर २०१८ मा बोस्टन स्थित अमेरिकी सेनाको तालिम केन्द्र क्याम्प डेभेन्समा दोस्रो चरणको संक्रमण फैलियो । त्यही चरणको संक्रमण अमेरिकाका लागि सर्वाधिक घातक बन्यो । सबैभन्दा धेरैको जीवन यही चरणमा गयो । न्यूयोर्क सिटी स्थित बोर्ड अफ हेल्थले संक्रमणलाई महामारीको संज्ञा दिँदै रोगीहरुलाई घरमै आइसोलेसनमा बस्न अनुरोध गर्यो । सेप्टेम्बर अन्त्यसम्ममा क्याम्प डेभेन्समा मात्र १४ हजार संक्रमित पुगि सकेका थिए भने ७५७ ले ज्यान गुमाएका थिए ।

नोभेम्बर १९१८ मा विश्वयुद्ध अन्त्यको घोषणा भएसँगै सैनिकहरुले युद्धस्थलबाट स्वतन्त्रता पाए । युटाह स्थित साल्ट लेक सिटीका अधिकारीले दुई हजार घरका अगाडि र पछाडि ढोकामा क्वारेन्टाइन संकेत राखेर फ्लु संक्रमितलाई बसोबासको व्यवस्था मिलाएका थिए । त्यसरी क्वारेन्टाइनमा घरमा बस्नेमा धेरै युद्धबाट फर्किएका सैनिकहरु नै थिए ।

जनवरी १९१९ मा तेस्रो चरणको संक्रमण फैलियो । यो प्रसार त्यस बर्षको ‘समर’सम्म चलेको थियो । जनवरीको पहिलो पाँच दिनमा सान फ्रान्सिस्कोमा १८ सय संक्रमित फेला परि सकेका थिए भने १०१ ले ज्यान गुमाएका थिए । सान एन्टोनियोका सर्वसाधारणले धेरै नयाँ केशको रिपोर्टिङ नभएको गुनासो गरेका थिए भने न्यूयोर्कमा पनि केही दिन भित्रै ७०० संक्रमित र ६७ ले ज्यान गुमाएका थिए । अन्तत: त्यही समरबाट यो संक्रमण अन्त्य भयो ।

सन् १९१९ को अप्रिलमा विश्वभरका नेता पहिलो विश्वयुद्ध अन्त्य र शान्ति सम्झौताको घोषणा गर्न फ्रान्सको पेरिस स्थित भर्सेल्स दरवारमा भेला भएका थिए । त्यहाँ अमेरिकी राष्ट्रपति उड्रो विल्सन बेहोस भए । केही इतिहासकारहरुले उनी भाइरस संक्रमणका कारण कमजोर बनि सकेको हुँदा बेहोस भएको उल्लेख गरेका छन् । तर , अमेरिकी राष्ट्रपतिलाई यो भाइरस लागे नलागेको भने अहिलेसम्म पुष्टि हुन सकेको छैन ।

अहिले विश्व स्पेनिश फ्लू जस्तै कोभिड १९ संक्रमणसँग जुधि रहेको छ । त्यसबेला जस्तै अहिलेसम्म यसको पनि औषधि पत्ता लागेको छैन । विश्वभरमा ४१ लाख बढि संक्रमित भइ सकेका छन् भने झन्डै तीन लाखको ज्यान गइ सकेको छ । गत डिसेम्बरमा चीनबाट सुरु भएको यो संक्रमण अहिले विश्वका प्रायः सबै मुलुकमा पुगि सकेको छ । संक्रमणबाट अमेरिकामा सबैभन्दा धेरै ७९ हजारले ज्यान गुमाएका छन् भने १३ लाख बढिलाई यो रोगले च्यापि सकेको छ । शुक्रबार मात्र ह्वाइट हाउसमा कार्यरत तीन कर्मचारीलाई यो संक्रमण लागेको पुष्टि भएको छ । औषधि पत्ता नलागे पनि स्वास्थ्य क्षेत्रमा भएको नयाँ अनुसन्धान र सूचना प्रविधीको विकासका कारण स्नेनिश फ्लुको तुलनामा कोभिड १९ को तीब्र प्रसार रोक्न सरकार र जनस्वास्थ्य अधिकारीहरु सफल भइरहेका छन् । तर, त्यसबापत विश्वले ठूलो आर्थिक मूल्य चुकाउनु परेको छ ।

स्पेनिश फ्लू संक्रमण पछि तीन दिन भित्र लक्षण देखिन्थ्यो भने कोभिड १९ लाई पाँच देखि छ दिन लाग्छ । यसरी कोभिड संक्रमितले बिना लक्षण अरुलाई रोग सार्ने संभावना बढि रहेको छ ।

एजेन्सीको सहयोगमा

तस्वीर: एजेन्सी

न्युयोर्क      

अमेरिकामा महामारी सुरु भए यता दशलाख भन्दा धेरै मानिस कोरोना पोजेटिभ भै सकेका छन् । तर विश्वकै शक्तिशाली सैन्य शक्ती अमेरिकी सेनाले भने कोरोना पोजेटिभ देखिएका र कोरोनालाई जितेर सामान्य जीवनमा फर्किएकालाई अमेरिकी सेनामा  प्रबेश नदिने प्रस्ताव अगाडि ल्याएको छ । यु एस मेलिटरी एन्ट्रान्स प्रोसेसिङ कमाण्डद्वारा जारी नयाँ निर्देशिकाका अनुसार अमेरिकी सेनाको लागि नयाँ दरखास्त वाला कोही पनि ब्यक्तीमा कोरोना संक्रमणको पूर्व रेकर्ड भएमा ति ब्यक्ती अमेरिकी सेनाको लागि स्वत: अयोग्य हुने छन् । नयाँ निर्देशिकाले थप प्रष्ट पार्दै भनेको छ; “अमेरिकी सेना प्रबेश अन्तर्गत लिइने स्वास्थ परिक्षण र अन्तर्वार्ताका क्रममा गरिने चिकित्सक परिक्षण वा प्रयोगशाला परिक्षण मार्फत कोभिड -१९ को हिस्ट्री देखिएमा त्यस्ता दरखास्तवाला व्यक्ती स्थाईरुपमा अमेरिकी सेनाका लागि आयोग्य हुने छन्” ।  

मिलिटरी टाइम्सका अनुसार कोरोना संक्रमण  जस्तै मिल्दो जुल्दो लक्षण भएका अन्य भाइरसबाट हुने सरुवा रोगहरुलाई नयाँ नियमले छुट्याएको छ । कोरोनासँग समानान्तर लक्षण हुने अन्य भाईरस संक्रमण भएका मानिस सेनाका लागि योग्य भए पनि कोरोना संक्रमितलाई भने अमेरिकी सेनामा बार बन्देज लगाइने भएको हो । नयाँ निर्देशिकालाई सेना मुख्यालय पेन्टागनले अन्तरिम निर्देशिकाले भनेको न्युजविकले लेखेको छ ।  मेलिटरी एन्ट्रान्स प्रोसेसिङ कमाण्डद्वारा कोरोना संक्रमितहरुलाई सेनामा बन्देज लगाउने भनिएको जारी नयाँ निर्देशिका पछि कोभिड संक्रमितलाई सेनामा अयोग्य ठहर्याउनुको कारणको बिषयमा पहिलो पटक समाचार लेखेको मेलिटरी टाईम्सलाई पेन्टागन प्रबक्ता जेसिका मेक्स्वेलले प्रतिकृया दिन अस्विकार गरेको जनाएको छ ।

न्युयोर्क

न्युयोर्क राज्यमा कोरोनाका कारण पछिल्ला समय अस्पताल भर्ना हुन आउनेहरु मध्येको ठुलो हिस्सा ‘स्टे एट होम अर्डर’ अन्तर्गत घरमा नै बस्नेहरु देखिएको अनौठो तथ्यांक बाहिर आएको छ । काममा नगएर अधिकांश घरमा बस्नेहरु नै संक्रमित भएर अस्पताल भर्ना हुन पुगेको तथ्यांक बाहिर आएसंगै के वास्तवमा “स्टे एट होम अर्डर” ले काम गरेको छ ? भन्ने प्रश्न पक्कै उब्जाएको छ ।  

गत हप्ता न्युयोर्कमा अस्पताल भर्ना भएका एक हजार कोरोनाका बिरामी मध्ये ६६ प्रतिशत बिरामी लामो समयदेखि काममा नगएर घरमा नै बस्दै आएकाहरु छन् भने १८ प्रतिशत नर्सिङ होम (बृद्धा आश्रम) मा बस्दै आएकाहरु छन् । अस्पताल भर्ना हुन पुगेका ती ६६ प्रतिशत बिरामी काममा नगएर घर बसेको तर समय समयमा ग्रोसरी गर्न वा अन्य अत्यावश्यक सामाग्री लिन स्टोर वा अन्यत्र  जाने गरेको पाईएको न्युयोर्क राज्यका गभर्नर एन्ड्रु कुमोले बताएका हुन् । कुमोले बुधाबार नयाँ तथ्यांक सार्वजनिक गर्दै भनें; ती बिरामीहरु जो घर बसेको समयमा पनि संक्रमित हुन पुगे उनीहरु स्वयमको व्यबहारले संक्रमित भएको पाईयो जुन व्यबहारलाई हालको “लक डाउन” ले नियन्त्रण गर्न सक्दैन भन्ने प्रस्ट भयो” ।  

बुधबार दिउसोसम्म न्युयोर्कमा १९ हजार ८ सय ७७ को मृत्‍यु भै सकेको छ भने ३ लाख २१ हजार संक्रमित भएका छन् । सिंगो अमेरिकामा भने ७२ हजार भन्दा धेरैको मृत्‍यु र १२ लाखमाथि संक्रमित भै सकेको जोन हप्किन्सको तथ्यांकमा जनाइएको छ । पछिल्ला केही दिनको तथ्यांकले न्युयोर्कमा संक्रमित र मृतकको संख्यामा केही गिरावट आएपनि बाँकी अमेरिकामा भने त्यो संख्या उकालो लाग्दै गरेको देखिएको छ । 

अघिल्लो हप्ता न्युयोर्कमा अस्पताल भर्ना हुने ८० प्रतिशतले मार्चमा जारी गरिएको ‘स्टे होम अर्डर’ देखि कुनै पनि सार्वजनिक सवारी समेत प्रयोग नगरेको देखिएको छ । उपचारको लागि भर्ना भएकाहरु मध्ये ७३ प्रतिशत मानिस ५१ बर्ष माथिको रहेको र त्यो समुह मध्येबाट पनि सिकिस्त बिरामी भने ६१ देखि ७० बर्ष उमेर समुहका रहेको छन् ।अस्पताल भर्ना हुने मध्ये ९६ प्रतिशत बिरामी पहिल्यैदेखि कुनै न कुनै रोगसँग लडि रहेकाहरु भएको बताइएको छ ।  

गभर्नर कुमोले बुधबार नियमित ब्रिफिङका क्रममा थप चर्चा गर्दै भनें; “लकडाउन गरेको यति लामो समय भै सक्दा पनि किन यति धेरै मानिस संक्रमित भईरहेका छन् ? भनेर न्युयोर्कस्थित अस्प्तालहरुले गत हप्ता गरेको एक सर्बेक्षणबाट मानिसको ब्यक्तिगत व्यबहारबाट नै संक्रमित भै रहेको र अहिलेको स्टे होम अर्डरले पूर्णरुपमा काम नगरेको तथ्य फेला परेको छ” ।  

• को धेरै संक्रमित ? 

न्युयोर्क सहरको पाँचै बोरोमा देखिएका कोरोना संक्रमित मध्ये सबैभन्दा धेरै २५ प्रतिशत अस्वेत जातीहरु छन् भने दोश्रो नम्बरमा २४ प्रतिशत स्वेत जातीका छन् ।  २० प्रतिशत हिस्प्यानिक अथवा ल्याटिनो छन् ।  नयुयोर्कमा सबैभन्दा कम एसियनहरु ८ प्रतिशत मात्र संक्रमित छन् । बाँकी २२ प्रतिशत मिश्रित जातीहरु छन् ।

न्युयोर्क राज्य मे १५ तारिख सम्मका लागि बन्द छ ।  मे १५ पछाडि पहिलो नम्बरमा उत्पादन र निर्माण ब्यवसाय सम्बन्धि कामहरु खुल्ने छन् । दोश्रो चरणमा प्रोफेसनल कामहरु खुल्ने छन् भने तेश्रो चरणमा मात्र रेस्टुरेन्ट ब्यवसाय खुल्ने छन् । अन्तिम चरणमा मात्र शैक्षिक र मनोरञ्जनात्मक क्षेत्रहरु खोलिने छन् ।  

प्रस्तुति : बिजय राम पौडेल