Category: विश्व

काठमाडौं । स्पेनका राजा फिलिप छैटौंलाई बाढीग्रस्त क्षेत्र भ्यालेन्सिया क्षेत्रको भ्रमणको क्रममा रुष्ट बाढी पीडितले दुर्व्यवहार गरेकोखबर सार्वजनिक भएको छ ।
बीबीसीका अनुसार बाढीबाट नराम्ररी प्रभावित उक्त क्षेत्रको भ्रमणमा पुगेका राजा फिलिपलाई रुष्ट भिडले ‘हत्यारा’ र ‘लाच पचाएको’ भन्दै माटो फ्याँकेका छन् । बाढी प्रभावित क्षेत्रमा आउन राजाले ढिला गरेको पनि प्रदर्शनकारीले बताएका छन् ।

क्रोधित बाढी पीडितहरूले राजा फिलिपलाई यस्तो त्रासदी रोक्न केही गरेका थियौ कि थिएनौ भनेर प्रश्न गरेका छन् । स्पेनमा सोमबार आएको बाढीमा परी दुई सयभन्दा बढीको ज्यान गएको छ भने कैयौं अझै बेपत्ता छन् । दुखको यस घडीमा जनता एक अर्काको साथमा उभिएका छन् र पीडितलाई सहयोग गर्न अगाडि बढिरहेका छन् ।

आपतकालीन सेवाका कर्मचारीहरूले कार पार्किङ र सुरुङमा फसेका मानिस र शवहरूको खोजी गर्न निरन्तर काम गरिरहेका छन्। यसैबीच स्पेनका नेताहरूले बाढी प्रभावित क्षेत्र भ्रमण गर्ने राजाको निर्णय गलत रहेको टिप्पणी गरेका छन् । भ्यालेन्सियाका संसद सदस्य जुआन बोर्डेराले राजा फिलिपको बाढी प्रभावित भ्यालेन्सियाको भ्रमण ‘धेरै नराम्रो निर्णय’ भएको बताएका हुन् ।

‘जनता आक्रोशित हुनु स्वाभाविक हो, उनको भ्रमण किन महत्वपूर्ण छ भन्ने कुरा जनताले नबुझ्नु पनि अस्वभाविक होइन,’ उनले भने । भ्यालेन्सियाको प्रान्तीय सरकारले पनि भारी वर्षा र बाढीपछिको अवस्थालाई लिएर गम्भीर आलोचनाको सामना गरिरहेको छ । अहिलेसम्म सरकारले बेपत्ताको तथ्यांक पनि भन्न सकिरहेको छैन । स्पेनका एक मन्त्रीले मृतकको संख्या धेरै नै बढ्न सक्ने बताएका छन् ।

काठमाडौं । फ्रिडम नेटवर्कको ‘इम्प्युनिटी रिपोर्ट २०२४’ ले वर्ष २०२४ लाई पाकिस्तानका लागि सबैभन्दा घातक वर्षहरूमध्ये एक बताएको छ । यस वर्ष सरकारले पत्रकारहरूलाई बचाउन कम प्रयास गरेको थियो । मिडिया अनुगमन संस्था फ्रिडम नेटवर्कको ‘इम्प्युनिटी रिपोर्ट २०२४’ अनुसार युट्युबरसहित छ मिडियाकर्मीको मृत्यु र ५७ वटा उल्लङ्घन दर्ता गरिएका छन् । रिपोर्टअनुसार सन् २०२३ अक्टोबरदेखि सन् २०२४ अगस्टसम्म पत्रकार र डिजिटल मिडियाकर्मीका गरी पाँच वटा हत्या भएका छन् । पत्रकारहरूमाथि ११ वटा हत्या प्रयास गरिएकाले यो रिपोर्ट चिन्ताजक थियो ।

“सिन्धु संरक्षण विधेयक र सङ्घीय संरक्षण ऐन जारी गरिएको भए पनि दुवै सङ्घीय र सिन्धु सरकार यी कानून लागू गर्न असफल रहँदा यसले पत्रकारहरूलाई असुरक्षित बनाएको छ”, फ्रिडम नेटवर्कका कार्यकारी निर्देशक इक्बाल खत्तकले भने, “पत्रकार संरक्षणका विशेष कानुनहरू लागू गर्ने राजनीतिक इच्छाशक्ति र संसाधनहरूको अभावले पाकिस्तानमा पत्रकारहरूका लागि स्थिति खतरनाक बनेको छ ।”

सिन्धु सबैभन्दा बढी उल्लङ्घनहरूको सूचीमा रहेको रिपोर्टले देखाएको छ । सिन्धुमा ५७ मध्ये २१ वटा मुद्दा र तीन वटा हत्या दर्ता भएका छन् । त्यसपछि पञ्जाब र इस्लामाबाद आउँछन् । पञ्जाबमा १३ र इस्लामाबादमा १२ मुद्दा दर्ता भएका छन् । खैबर पख्तुनख्वामा सात र बलुचिस्तानमा दुई मुद्दा छन् ।

टेलिभिजन पत्रकारहरूले ३० वटा उल्लङ्घनका मुद्दा भोगेका छन् । यसमा ५३ प्रतिशत पत्रकार समावेश छन् । प्रिन्ट मिडियाले ३५ प्रतिशत र डिजिटल मिडियाले १० प्रतिशत मुद्दा भोग्नुपरेको छ । रेडियो पत्रकारहरूले उल्लङ्घनहरूविरुद्ध दुई प्रतिशत मुद्दा भोगेका छन् ।प्रतिवेदनले महिला पत्रकारहरूविरुद्ध उल्लङ्घनहरू पनि निर्धारण गरेको छ ।

पाकिस्तानमा मिडिया स्वतन्त्रतालाई संरक्षण गर्न दण्ड मुक्तिको सामना गर्नु आवश्यक रहेको रिपोर्टले जोड दिएको छ । हरेक महिना औसतमा छ वटा पत्रकार विरुद्धका उल्लङ्घन रिपोर्ट हुन्छन् । सङ्घीय सरकारले पत्रकार सुरक्षाका लागि गरेका झुटा प्रतिबद्धताहरूपछि असफल हुनु चिन्ताजनक छ । रासस

काठमाडौं । युक्रेनमा रूसको विजय नभएसम्म उत्तर कोरिया रुसको साथमा रहने विदेश मन्त्री चो सोन हुईले शुक्रबार मस्कोमा घोषणा गरेका छन् । यसअघि नै अमेरिकाले आगामी दिनमा युक्रेन द्वन्द्वमा हजारौं उत्तर कोरियाली सेना सहभागी हुन सक्ने चेतावनी दिएको छ। अमेरिका र दक्षिण कोरियाले दश हजार उत्तर कोरियाली सैनिकहरू रूसमा प्रशिक्षण लिइरहेको उनीहरु र रूसको पक्षमा लडाइँमा सहभागी हुने बताउँदै आएका छन्।

वासिङ्टन र सियोलले उत्तर कोरियालाई आफ्नो सेना फिर्ता लिन चेतावनी दिएका छन् भने केही सेना कुर्स्क सीमा क्षेत्रमा पुगेको अमेरिकी गुप्तचरले जनाएको छ। “विजयसम्म सधैँ रुसी सेनासँग दृढतापूर्वक उभिने विदेश मन्त्री चो सोन हुईले रूसी समकक्षी सर्गेइ लाभ्रोभसँगको वार्तापछि मस्कोमा घोषणा गरेका हुन् । उनले उत्तर कोरियालाई राष्ट्रपति भ्लादिमिर पुटिनको “बुद्धिमानी नेतृत्व“ मा कुनै शङ्का नभएको र प्योङयाङसँग आपसी सहयोग सम्झौतामा हस्ताक्षर गरेको बताउँदै सम्बन्ध सक्षम बनाएको उल्लेख गरेका छन् । उनले उत्तर कोरियाले आणविक हतियारको विकास जारी राख्ने वाचा गरेका छन् ।प्योङयाङले सैन्य सहयोगको बदलामा रूसबाट आणविक प्रविधि चाहेको आशङ्का गरिएको छ।

रूसी विदेशमन्त्री लाभ्रोभले दुई देशका “सेना र विशेष सेवाहरू“ बीचको “घनिष्ठ सम्बन्ध“ को प्रशंसा गरेका छन् । युक्रेनमा उत्तर कोरियाको सहयोगका लागि रूस आभारी“ रहेको बताएका छन् । सन् २०२२ फेब्रुअरीमा सुरु भएको रूस युक्रेन आक्रमणले पश्चिमसँगको सम्बन्ध तोडेको छ भने उत्तर कोरिया र इरान रूसको समर्थकका रूपमा देखापरेका छन्। लाभ्रोभले पुटिनको जुलाईको प्योङयाङ भ्रमणले सम्बन्धको “नयाँ चरण“ सुरु गरेको बताएका छन् ।

काठमाडौं । स्पेनमा दशकौँयता आएको भीषण बाढीमा मृत्यु हुनेको सङ्ख्या १५० नाघेको छ। विषम मौषमी अवस्थाबीच उद्धारकर्मीहरू हराइरहेका कैयौँ मानिसहरूको खोजीमा जुटेका छन्। बेपत्ता हुनेहरूको सङ्ख्या अझै प्रस्ट छैन। बिहीवार १,२०० जना उद्धारकर्मीहरू ड्रोन सहित खटिए पनि देशको केही भागमा जारी वर्षाका कारण उनीहरूको काम प्रभावित भएको थियो।

“अहिलेको सबैभन्दा प्रमुख कुरा सकेसम्म धेरै मानिसहरूको ज्यान बचाउने हो,” बाढी प्रभावित क्षेत्रमा पुगेका प्रधानमन्त्री पेड्रो सान्चेजले पीडितहरूसँग भने। ज्यान गुमाउने अधिकांश भ्यालेन्सीया क्षेत्रका छन् जहाँ केही घण्टामै एक वर्षमा पर्ने परिमाणको पानी परेको थियो। उक्त सहरमा मात्रै १५५ जनाको मृत्यु भएको तथ्याङ्क छ।

मङ्गलवारको मुसलधारे वर्षापछि आएको बाढीले बाँध भत्काउनुका साथै पुल र भवनहरू बगाएको थियो भने मानिसहरू ज्यान जोगाउन घरका छत र रूखहरू चढ्न बाध्य भएका थिए। बाढीले ल्याएको माटो, भग्नावशेष र बगाएका कारहरूका कारण सडकहरू पनि अवरुद्ध छन्। धेरै मानिसहरू विद्युत् विना बसिरहेका छन्। सरकारले देशमा तीन दिने शोकको घोषणा गरेको छ। अझै पनि धेरै मानिसहरू हराइरहेकाले यो प्राकृतिक विपद्‌मा परेर ज्यान गुमाउनेको सङ्ख्या बढ्न सक्ने पनि सरकारले बताएको छ।

पूर्वी भ्यालेन्सीया प्रान्त र त्यहाँभन्दा बाहिरका ठाउँहरूमा भीषण वर्षाले दशकौँयताको सबैभन्दा खराब विपद् निम्त्याएको हो। सन् १९७३ यता बाढीका कारणले स्पेनमा यति धेरै सङ्ख्यामा मानिसको ज्यान गएको यो पहिलो पटक हो। त्यसबेला देशको दक्षिण पूर्वी क्षेत्रमा गएको अहिलेसम्मकै सर्वाधिक खराब बाढीमा कम्तिमा १५० जनाको मृत्यु भएको थियो।

बुधवार राष्ट्रका नाममा सम्बोधन गर्दै प्रधानमन्त्री सान्चेजले नागरिकहरूलाई सावधानी अपनाउन अनुरोध गरे र पूर्ण रूपमा पुनर्स्थापनाको वाचा गरे। उनले भने, “पूरै स्पेन तपाईँहरूसँगै रोइरहेको छ‘ हामी तपाईँहरूलाई यसै छाडिदिने छैनौँ।”

स्पेनको सरकारी मौसम एजेन्सीका अनुसार भ्यालेन्सीया नजिकैको एउटा नगर चीभामा एक वर्ष बराबरको पानी जम्मा ८ घण्टामै परेको थियो। स्पेनको सेना र आपत्तकालीन उद्धारकर्ताहरूले बुधवार बिहान मानिसहरूलाई घर र कारको छतहरूबाट उद्धार गरेको थियो। ज्यान जोगाएका मानिसहरूले मंगलवार रातिको बाढीको आतङ्कको चर्चा गरेका थिए। अकस्मात चोक र सडक नदीमा परिणत भएको थियो। धेरै सवारी चालकहरूले बाढीले त्यस्तो स्वरूप लिने अनुमान नै गर्न सकेका थिएनन्।

भ्यालेन्सीया नजिकैकाका गिलेर्मो सेरानो पेरेजले राजमार्गमा ‘सुनामी’ जस्तै गरी पानी छिरेको बताए। २१ वर्षका उनी र उनका अभिभावक कार छाडेर ज्यान जोगाउन रुखमा चढ्न बाध्य भएका थिए। अर्का प्रत्यक्षदर्शीले मोटरवेमा सवारी चलाइरहेका व्यक्तिहरूले आफूतिर तीव्र गतिमा पानी आइरहेको देखेपछि हाते साङ्लो बनाएर भागेको सम्झना गरे। प्याट्रिसिया रोड्रिगेजले एल पाइस समाचारपत्रलाई भनिन्, “कोही पनि चिप्लिएनन्। किनभने कोही लडेको भए, पानीको वेगले उनीहरूलाई बगाएर लैजान्थ्यो।”

ला टोरेका एकजना बासिन्दाले बीबीसीसँग कुरा गर्दै उनका कतिपय साथीहरूले घर गुमाएको र मंगलवार राति ‘कार पानीमा तैरिरहेको’ र पानीको वेगले ‘पर्खालहरू भत्काएको’ जनाए। भ्यालेन्सीयाबाहिरको एउटा नगर होर्नो डी एलसिडोका मेयरले बीबीसीको न्यूजआवरलाई केही मिनेटभित्रै पानीको तह एक मिटरभन्दा बढीले बढेको बताए। “पानीको वेग ज्यादै तीव्र थियो त्यही भएर हामीले आपत्कालीन सेवाका मानिसहरूलाई बोलायौँ जसले घाँटीसम्म पानीमा डुबिरहेका केही व्यक्तिहरूको उद्धार गरे,” कोनसुएलो टाराजोनले भने।

स्पेनमा धेरै घटनाहरूमा विपद् उद्धारसँग सम्बन्धीत चेतावनी दिइदाँसमेत समयमा नै कदम चाल्न अधिकारीहरू असफल हुने गरेका आरोप लागेका छन्। यसको कारण मानिसहरू सुरक्षित स्थानमा पुग्न नसकेको कुरा यसपटक पनि उठिरहेको छ। विपद्को समयमा परिचालित हुने गरेको नागरिक सुरक्षा एजेन्सीले स्थानीय समय अनुसार २०स्१५ सम्म चेतावनी जारि गरेको थिएन। तर त्यो बेलासम्म चीभा र अन्य कैयौँ शहरहरूमा दुई घण्टा देखि बाढी पसिरहेको थियो।

उद्धारका लागि स्पेनले १ हजार फौज परिचालन गरेको भएपनि सडक, विद्यूत र सञ्चारमा देखिएको अवरोधका कारण धेरै जना प्रभावित रहेका ठाउँसम्म पुग्न विफल भएका थिए। युरोपेली सङ्घकी प्रमुख उर्जुला फोन डेर लाइअनले उद्धारमा सघाउन कोपरनिकस भूउपग्रह प्रणालीलाई सक्रिय तुल्याइएको बताएकी छन्। अरू छिमेकी देशहरूले पनि सहयता पठाउने जनाएका छन्।

स्पेनकी रक्षामन्त्री मार्गरिटा रोब्लेसले बुधवारको बाढी ‘अभूतपूर्व घटना’ रहेको बताएकी छन्। उक्त वर्षा देशको मध्यपूर्वतर्फ सहज देखिएको थियो तर मौसम अधिकारीहरूले वर्षा उत्तरपूर्वको क्याटोलिनातर्फ अघि बढेको जनाएका छन्। मानिसहरूलाई सुरक्षित स्थानमा आश्रय लिन भन्दै मौसमसम्बन्धी चेतावनी पनि दिइएको छ। बाढीका लागि विभिन्न कारणहरू जिम्मेवार हुन्छन्। तर जलवायु परिवर्तनका कारण वायुमण्डलमा तापक्रम बढ्दा भीषण वर्षाको सम्भवना बढी हुन्छ।

बीबीसीबाट सभार

काठमाडौं । भारतीय वायुसेवा कम्पनीका विमानमा बम रहेको भन्दै गलत सूचना दिएको आरोपमा भारतीय प्रहरीले एक जनालाई पक्राउ गरेको छ । न्यूज १८ इण्डियाका अनुसार नागपुर प्रहरीले भारतको महाराष्ट्र प्रदेशका ३५ वर्षीय जगदिश उन्केलाई पक्राउ गरेको छ । नागपुर प्रहरीको स्पेशल ब्रान्चले बमको झुटो खबर दिंदै आएका इमेल उनीसम्म ट्रेस भएको बताएको छ । पक्राउ परेका जगदिशले २०२३ जुलाई ५ मा ‘आतंकवाद एक तुफानी राक्षस’ नामक किताब समेत लेखेका थिए ।
पुस्तकबारे व्याख्या गर्दै उनले यसमा आतंकवादलाई जरैदेखि सक्ने उपायबारे लेखेको बताएका थिए । हिन्दी भाषामा लेखिएको उनको पुस्तक अंग्रेजीमा पनि अनुवाद भएको छ । भारतीय सञ्चारमाध्यमहरुका अनुसार, महाराष्ट्र प्रहरीका डीसीपी स्वेता खेड्करको नेतृत्वमा भएको अनुसन्धान उन्केसम्म पुगेको थियो । उनी यसअघि पनि २०२१ मा पक्राउ परेका थिए । उनले किन बम रहेको भन्दै आतंक सिर्जना गरे भन्ने हालसम्म खुलेको छैन ।

प्रहरीका अनुसार, उनले प्रधानमन्त्री कार्यालय, रेलवे मन्त्रीको कार्यालय, महाराष्ट्रका मुख्यमन्त्री लगायतलाई पनि इमेल पठाएको भेटिएको छ । नेपालमा पनि सोमबार एयर इण्डियाको जहाजमा बम रहेको भन्दै सूचना आएपछि केही घन्टा विमानस्थल अस्तव्यस्त बनेको थियो । त्यसअघि भिस्टारा एयरवेजको विमानमा पनि बम रहेको हल्ला फैलिएको थियो । ७ दिनअघि पनि दिल्लीबाट काठमाडौं आएको भारतीय वायुसेवा कम्पनी भिस्टारा एयरवेजको जहाजमा बम राखिएको भन्दै हल्ला फैलिएको थियो । तर, दुवैपटक शंकास्पद वस्तु फेला परेन ।

काठमाडौं । उत्तर कोरियाली फौजहरू रुसमा परिचालित रहेका र उनीहरू युक्रेनी फौजको बलियो पकड रहेको कुर्क्स सीमाक्षेत्रमा कार्यरत रहेका उत्तर एट्लान्टिक सन्धि सङ्गठन नेटोले पहिलो पटक बताएको छ। सोमवार दक्षिण कोरियाका सुरक्षाकर्मी तथा रक्षा अधिकारीहरूसँग एउटा बैठक गरेपछि नेटोका महासचिव मार्क रुटले हप्तौँको गुप्तचार रिपोर्टहरूपछि आफूले उत्तर कोरियाली फौजहरू परिचालित रहेका पुष्टि गर्न सक्ने बताएका हुन्। नेटोका नवनियुक्त प्रमुखले उत्तर कोरियाली फौज परिचालनले “ठूलो उक्साहट” र युक्रेनमा रुसी युद्ध “खतरनाक रूपमा विस्तार” भएको भन्ने दर्शाएको टिप्पणी गरे।

प्योङ्गयाङले आफ्नो साझेदारलाई सघाउनका निम्ति हजारौँको सङ्ख्यामा फौज पठाउन लागेका विवरणबीच गत साता रुसी राष्ट्रपति भ्लादिमिर पुटिनले रुसमा उत्तर कोरियाली फौज पुगेको अस्वीकार गरेका थिए। “यो हाम्रो सार्वभौम निर्णय हो,” एउटा पत्रकार सम्मेलनका क्रममा प्रश्न पन्छाउँदै पुटिनले भने।
“हामी त्यसको प्रयोग गर्छौँ अथवा गर्दैनौँ, कहाँ, कहिले अथवा हामी अभ्यास, प्रशिक्षण वा केही अनुभव आदानप्रदान गर्छौँ। यो हाम्रो सरोकारको विषय हो,” उनले थपे। कति सङ्ख्यामा उत्तर कोरियाली सैनिकहरू रुस पठाइएका छन् भन्ने कुरा स्पष्ट भएको छैन।

दक्षिण कोरियाली गुप्तचर निकायका अनुसार यसै महिनाको शुरूतिर कम्तीमा १,५०० उत्तर कोरियाली सैनिक रुस पुगिसकेका छन्। तर नेटोले प्योङ्गयाङका फौजहरू रुसमा कार्यरत रहेका औपचारिक रूपमा स्वीकारेको यो पहिलोचोटि हो। युक्रेनविरुद्ध प्रयोगका निम्ति उत्तर कोरियाले यसअघि नै बलिस्टिक क्षेप्यास्त्र तथा लाखौँ राउन्ड गोलीहरू रुस पठाइसकेको रुटले बताएका छन्।

त्यसको बदलामा पुटिनले उत्तर कोरियालाई सैन्य प्रविधिहरू र अन्तर्राष्ट्रिय प्रतिबन्धहरू झेल्नका लागि अरू सहयोगहरू पठाउन सहमति जनाएको रुटले उल्लेख गरे। मस्को र प्योङयाङबीचको गहिरो सम्बन्ध “इन्डो(प्यासिफिक र यूरो(एट्लान्टिक क्षेत्रको शान्ति तथा सुरक्षाका निम्ति खतरा भएको” समेत उनले बताए। कुर्क्स क्षेत्रमा उत्तर कोरियाली फौजहरूको तैनाथीले पश्चिमा देशका राजधानीहरूमा चिन्ता निम्त्याउन सक्ने रुटले चेतावनी दिए।

रुसलाई आश्चर्यमा पार्ने गरी उसको पश्चिमी क्षेत्रमा पहिलो पटक युक्रेनी फौजहरू पुगेपछि दुई महिनायता त्यहाँ मस्को र किएभबीच लडाइँ जारी छ। युक्रेनलाई अगाडि बढ्न नदिने प्रयास स्वरूप रुसले सो क्षेत्रमा हजारौँको सङ्ख्यामा फौजहरू पठाएको बताइएको छ। कुर्क्समा उत्तर कोरियाली फौजहरूको आगमनले किएभका फौजहरूमाथि थप दबाव सिर्जना गर्न सक्ने विज्ञहरू बताउँछन्। गत शुक्रवार युक्रेनी राष्ट्रपति भोलोदिमिर जेलेन्स्कीले पनि ती फौजहरू केही दिनभित्रै युद्धमैदानमा परिचालित हुन सक्ने सूचना आफ्नो सरकारसँग रहेको बताएका थिए।

पश्चिमा नेताहरूले त्यस्तो कदमले द्वन्द्व थप चर्काउन सक्ने चेतावनी हप्तौँदेखि दिँदै आएका छन्। सन् २०२२ को फेब्रुअरीमा युक्रेनमाथि अतिक्रमण गरेपछि आफू एक्लिँदै गएको पाएको मस्कोले उत्तर कोरियासँग सम्बन्ध अझ गाढा बनाउँदै गएको छ।
बीबीसी

काठमाडौं । बोलिभियाका पूर्व राष्ट्रपति इभो मोरालेसले आइतबार आफ्नो कारमा गोली प्रहार गरिएको बताएका छन् । केन्द्रीय शहर कोचाबाम्बामा रेडियो अन्तर्वार्ताका लागि यात्रा गर्दा बन्दुकधारीले आफ्नो कारमा गोली प्रहार गरेको र चालक घाइते भएको उनले बताए । “म आइपुगेको कारमा १४ वटा गोली लागेका प्वाल छन्” मोरालेसले भने, “यो योजनाबद्ध थियो । इभोलाई मार्ने विचार थियो ।”

अन्तर्वार्ता गर्ने रेडियो स्टेशन कौसाचुन कोकाले मोरालेस सवार भएको गोली लागेको पिकअप ट्रकको भिडियो सार्वजनिक गरेको छ । विन्डशिल्डमा तीन गोली लागेका प्वाल थिए र चालकको टाउकोमा रगत देखिन्थ्यो। मोरालेसले वर्तमान राष्ट्रपति लुइस आर्सेलाई आक्रमणको दोष दिए । लुइस आर्से मोरालेसका पूर्व सहयोगी र मन्त्रिपरिषद् सदस्य थिए । दुवैबिच सम्बन्ध बिग्रिएको छ।

“लुचोले बोलिभियालाई नष्ट गरेका छन् र अब उनी इभोलाई मारेर हाम्रो प्रक्रियालाई समाप्त गर्न चाहन्छन्” मोरालेसले राष्ट्रपतिको उपनाम प्रयोग गर्दै आफ्नै राष्ट्रपति पद पुनः प्राप्त गर्ने प्रयासका बारेमा भने । अहिले ६५ वर्ष पुग्नुभएका मोरालेस पूर्व कोका उत्पादक र २००६ देखि २०१९ सम्म राष्ट्रपति थिए ।

चौथो कार्यकालका लागि संविधान छल्ने प्रयास नगर्दासम्म उनी बोलिभियामा अत्यन्त लोकप्रिय थिए । धाँधलीको आरोप लागेको चुनावपछि सेनाको समर्थन गुमाएपछि उनलाई राजीनामा दिन बाध्य पारियो । उनी मेक्सिको भागेका थिए । उनी सन् २०२० मा राजनीतिक पुनर्जीवनको खोजीमा बोलिभिया फर्किएका थिए ।

काठमाडौं । मध्य सुडानको एउटा गाउँमा अर्धसैनिक र्यापिड सपोर्ट फोर्स (आरएसएफ) ले शुक्रबार गरेको आक्रमणमा ५० भन्दा बढी व्यक्तिको मृत्यु हुनुका साथै दुई सय भन्दा बढी घाइते भएका गैरसरकारी समूहहरुले जनाएका छन् । गेजिरा राज्यको राजधानी वड मदनीमा रहेको प्रतिरोध समितिले भनेको छ, “शुक्रबार बिहान, आरएसएफले अल कमलिन क्षेत्रको अलसेरिहा गाउँमा भारी गोलाबारी र बमबारी गरेका छन् ।” समितिले भनेको छ, “अलसेरिहा गाउँका ५३ भन्दा बढी सर्वसाधारण मारिएका छन भने २०० भन्दा बढी अन्य घाइते भएका छन् । घाइतेमध्ये केहीको अवस्था गम्भीर छ ।”

शुक्रबार बिहानैदेखि आरएसएफ लडाकूले गेजिरा राज्यको उत्तरमा रहेको अल कमलिन इलाकाको अलसेरिहा गाउँमा आक्रमण गरेको थियो । लडाकूहरुले हतियार र तोपमार्फत् अग्लो भवनबाट निहत्था नागरिकहरुमा गोली हान्न थालेको एक गैर(सरकारी समूहले जनाएको छ । सुडानको विदेश मन्त्रालयले शुक्रबार एक विज्ञप्तिमार्फत गेजिरा राज्यका गाउँ र शहरविरुद्ध आरएसएफको प्रतिशोधात्मक अभियानको निन्दा गरेको छ ।

आरएसएफले जनजाति र क्षेत्रीय आधार इलाकाहरूमा अभियानह सञ्चालन गरिरहेको मन्त्रालयले जनाएको छ । सन् २०२३ मध्य अप्रिलदेखि सुडानमा सशस्त्र सेना र आरएसएफ बीचको द्वन्द्वले सुडानमा व्यापक आर्थिक तथा भौतिक क्षति पुगेको छ । सशस्त्र द्वन्द्वका कारण यहाँ हालसम्म २४ हजार ८५० भन्दा बढीको ज्यान गएको छ । रासससिन्ह्वा

काठमाडौं । चिनियाँ राष्ट्रपति सी जिनपिङ र भारतका प्रधानमन्त्री नरेन्द्र मोदीबीच रुसको कजानमा भेटवार्ता भएको छ । ब्रिक्स सम्मेलनका क्रममा दुई देशका नेताहरुबीच द्वीपक्षीय भेटवार्ता भएको हो । दुई नेताबीच करिव ५० मिनेट कुराकानी भएको थियो । चिनियाँ राष्ट्रपति सी जिनपिङसँग भएको तस्वीर एक्समा पोष्ट गर्दै भारतीय प्रधानमन्त्री मोदीले लेखेका छन्, ‘‘दुई देशका नागरिकका साथै क्षेत्रीय र विश्व शान्तिका साथै स्थिरताका लागि भारत र चीनको सम्बन्ध महत्वपूर्ण छ । आपसी विश्वास, आदर र संवेदनशीलताले नै दुबै देशको द्वीपक्षीय सम्बन्धको बाटो देखाउने छ ।’

भारतीय विदेश मन्त्रालयका अनुसार भेटमा दुबै नेताले एलएसी अर्थात दशगजा क्षेत्रबाट सैनिक हटाउने र २०२० मा सुरु भएको विवाद समाधान गर्ने सहमतिको स्वागत गरेका छन् । मोदीले दुबै देशको बीचमा रहेको विवाद र मतभेद हल गर्नुपर्नेमा जोड दिएका छन् । साथै सीमा विवादमा दुबै देशबीच विशेष प्रतिनिधिबारे समेत सहमति भएको छ, जसले सीमामा शान्ति कायम गर्न र पारस्परिक रुपमा स्वीकार्य समाधानको खोजी गर्ने छन् । दुई देशका विदेश मन्त्रीस्तरीय सम्बन्धलाई पुनः अगाडि बढाउन पनि सम्वाद सुरु गरिनेछ ।

चिनियाँ विदेश मन्त्रालयले पनि दुबै देशको आपसी सम्पर्क र सहयोग बढाउने र असहमति तथा मतभेदलाई समझदारीका साथ सुल्झाउन दुई नेताले जोड दिएको बताएको छ ।

काठमाडौं । बेलायती राजा चार्ल्स तृतीय माथि नसोचेको व्यवहार भएको छ । राजा चार्ल्सले सोमबार बिहान अस्ट्रेलियाको संसद्लाई सम्बोधन गर्ने कार्यक्रम थियो ।
११ मिनेट लामो सम्बोधन सक्ने बित्तिकै माथिल्लो सदन सिनेटकी एक सदस्यले चार्ल्स अस्ट्रेलियाको राजा नभएको भन्दै चिच्चाएकी छिन् । ‘दिस इज नट योर ल्यान्ड । यू आर नट माइ किङ । भिक्टोरिया राज्यबाट निर्वाचित सिनेट सदस्य लिडिया थोर्पले चार्ल्सलाई भनिन् ।

अस्ट्रेलियाको राजधानी क्यानबेरास्थित संसद् भवनमा भएको समारोहमा करिब एक मिनेट आफ्ना असन्तुष्टि पोख्दै चिच्याएपछि आदिवासी सांसदलाई सुरक्षाकर्मीले संसद् भवनबाहिर निकालेका थिए । त्यसअघि राजा चार्ल्स र रानी क्यामिलालाई स्वागत गर्ने आदिवासी अगुवा आन्टी भायोलेट सेरिडनले भने थोर्पको विरोध अपमानजनक भएको बताइन् । थोर्पलाई सुरक्षाकर्मीले भवनबाहिर निकालेलगत्तै स्थिति सामान्य बन्यो र शाही दम्पतीले आफूहरूलाई स्वागत गर्न बाहिर पर्खिरहेका सयौं मानिसलाई भेट्न अगाडि बढे ।

अस्ट्रेलिया राष्ट्रमण्डलको एक देश हो र त्यहाँ राजाले राष्ट्रप्रमुखको भूमिका निर्वाह गर्छन् । तर अस्ट्रेलियामा हालै राजालाई भूमिकाबाट हटाउनेबारे बहस सुरू भएको छ । भिक्टोरिया राज्यबाट स्वतन्त्र रूपमा सिनेटरमा निर्वाचित थोर्पले अस्ट्रेलिया सरकार र यसका आदिवासीबीचको सन्धिको वकालत गर्नेहरूमध्ये एक हुन् ।
चार्ल्सलाई विरोध जनाएपछि थोर्पले बीबीसीसँग आफूले राजालाई स्पष्ट सन्देश दिन चाहेको प्रतिक्रिया दिएकी छन् ।

‘सार्वभौम हुनका लागि तपाईं कुनै भूमिको हुनुपर्छ,’ उनले भनिन्, ‘यो उनको देश होइन ।’ राजाले आदिवासीसँग शान्ति सन्धिबारे छलफल गर्न संसदलाई निर्देशन दिनुपर्ने थोर्पको भनाइ छ । ‘हामीले त्यसको नेतृत्व गर्न सक्छौं, हामी त्यो गर्न सक्छौं, हामी राम्रो देश बन्न सक्छौं । तर सामूहिक हत्या र सामूहिक नरसंहारका लागि जिम्मेवार रहेका उपनिवेशकर्ताका पुस्तासँग हामी झुक्न सक्दैनौं,’ थोर्पले भनेकी छन् ।

बिग्रँदो स्वास्थ्य, सम्पत्ति र शिक्षाका कारण अस्ट्रेलियामा आदिवासी र अन्य नागरिकबीचको असमानता कसरी सम्बोधन गर्ने भन्नेबारेमा लामो समयदेखि बहस जारी छ । गत वर्ष ‘भ्वाइस’ भनेर चिनिने आदिवासी जनजातिलाई बृहत्तर राजनीतिक अधिकार र मान्यता दिने सम्बन्धमा भएको जनमतसंग्रह अस्वीकृत भएको थियो ।

ग्रीन्सको सदस्यका रूपमा संसद्‌मा निर्वाचित भएकी थोर्पले भ्वाइसको समर्थनका लागि पार्टी छाडेकी थिइन् । उनले विगतमा पनि आदिवासीको पक्षमा बाह्य दुनियाको ध्यान आकर्षित गर्ने विरोध प्रदर्शनहरू गरेकी थिइन् ।

काठमाडौं । चीन र भारतले लाइन अफ एक्युअल कन्ट्रोल (एलएसी) अर्थात दशगजा क्षेत्रमा हुने सैनिक गस्तीबारे नयाँ सम्झौता गरेका छन् । यसबाट सीमामा रहेका दुई देशका सैनिक पछाडि हट्ने र सन् २०२० को विवाद समाधान हुने अपेक्षा छ । सोमबार पत्रकार सम्मेलन गरेर भारतीय विदेश सचिव विक्रम मिस्रीले दिएको जानकारीअनुसार पछिल्लो केही सातादेखि भारत र चीनको बीचमा राजनीतिक र सैन्यस्तरमा कुराकानी भइरहेको थियो । उनले अगाडि भनेका छन्, ‘दुबै देश एलएसीमा सैनिक गस्तीलाई लिएर एउटा सम्झौतामा पुगेका छन् ।’

२०२० मा पूर्वी लद्दाखमा चीन र भारतका सैनिकहरुबीच हिंसात्मक झपड भएको थियो । यसमा २० भारतीय सैनिक मारिए, केही चिनियाँ सैनिकको पनि मृत्यु भयो । यो घटनापछि दुबै देशको सीमामा तनाव छ । यो घटनापछि दशजगाको जुन इलाकासम्म भारतीय सैनिकले गस्ती गर्थ्यो, त्यहाँ पुग्न चीनले रोकेको भारतीय दाबी छ । अब भारत २०२० को अवस्थामा फर्किने विदेशमन्त्री एस जयशंकरले बताएका छन् ।

भारतका सामरिक विशेषज्ञ ब्रम्हा चेलानी भने भारत र चीनको बीचमा सन्य गतिविधि अन्त्य गर्ने कुनै घोषणा नभएको बताउँछन् । बीबीसी हिन्दीका अनुसार उनले भनेका छन्, ‘ब्रिक्स समिटमा मोदी र सी जिनपिङको बैठकलाई सहज बनाउन दुबै देश गस्तीबारे एउटा सहमतिमा पुगेका हुन् ।’ब्रिक्स समिट २२–२३ अक्टोबरमा रुसमा हुनेछ । सम्मेलनका क्रममा चीनका राष्ट्रपति सी, भारतीय प्रधानमन्त्री नरेन्द्र मोदीबीच द्वीपक्षीय भेट हुनसक्ने छ । भारतीय विदेश सचिव मिस्रीले भने भेटवार्ताको पुष्टि गरेका छैनन् ।

काठमाडौं । लेबनानी हिजबुल्लाह समूहले इजरायलविरूद्ध आइतबार दिनभरिमा १०० भन्दा बढी क्षेप्यास्त्र प्रहार गरेको इजरायली सुरक्षा बल (आइडिएफ) ले जनाएको छ । उत्तरी इजरायलमा भएका हवाई आक्रमणका दुई शृङ्खलाका कारण लागेको डढेलो निभाउन अग्निनियन्त्रकहरूले काम गरिरहेका छन्। यसअघि इजरायली सेनाले लेबनानको दक्षिणी बेरुतमा रहेको हिजबुल्लाहको गुप्तचर मुख्यालयमा गरेको आक्रमणमा तीन जना ‘प्रमुख’ अधिकारीको मृत्यु भएको अलजजिराले जनाएको छ ।

इजरायली सेनाले उक्त आक्रमणमा हेजबुल्लाहका प्रमुख व्यक्तित्वहरु एहाग अब्बास सलामेह, रचा अब्बास इचा र अहमद अली हसिनको मृत्यु भएको जनाएको छ । लेबनानको राजधानीमा रहेको भूमिगत हतियार कारखानामा भएको कारबाहीमा उनीहरूको मृत्यु भएको इजरायली सेनाले जनाएको छ । यसैबीच इजरायलले हिजबुल्लाहले इजरायली नागरिकमाथि आतङ्क मच्चाइरहेको र आईडीएफले ३७८ दिनसम्म निरन्तर आक्रमण गरिरहेको जनाएको छ । एजेन्सी

काठमाडौं । उत्तरी गाजा क्षेत्रमा इजरायलले गरेको पछिल्लो आक्रमणबाट ७३ जनजाको मृत्यु भएको हमासका अधिकारीहरुले बताएका छन् । हमासका अधिकारीहरुका अनुसार उत्तरी गाजाको बेत लाहिया क्षेत्रमा इजरायलले शनिबार मध्यराति बम आक्रमण गरेको थियो ।

सो आक्रमणबाट महिला र बालबालिकासहित ७३ जनाको मृत्यु भएको हमासलाई उद्धृत गर्दै बीबीसीले जनाएको छ । अधिकारीहरुका अनुसार आक्रमणबाट कयौं घाइते भएका छन् भने केही व्यक्तिहरु भत्किएका संरचनामा च्यापिएका छन् ।

बीबीसीका अनुसार इजरायलले यस आक्रमणबारे सार्वजनिक समाचारबारे जाँच गरिरहेको जनाएको छ । इजरायली सेनाका अनुसार हमासले बढाइचढाइ गरेर मिडिया रिपोर्ट सार्वजनिक गर्ने गरेको छ, जुन आफूहरुको रिपोर्टसँग मिल्दैन । यसैबीच स्वास्थ्य अधिकारीहरुले उत्तरी गाजाको बेत लाहिया क्षेत्रमा इजरायलले आक्रमण गरेपछि इन्टरनेट र सञ्चार सेवा पनि पूर्णरुपमा अवरुद्ध भएको छ । यसबाट खोज तथा उद्धारको काम प्रभावित भएको छ ।

हमासको आधिकारिक मिडियाका अनुसार इजरायलले घना वस्ती भएको स्थानलाई लक्षित गरी बम आक्रमण गरेको थियो । प्यालेस्टिनी समाचार एजेन्सी वफाका अनुसार इजरायलको आक्रमणबाट एउटा पूरै आवासीय क्षेत्र नष्ट भएको छ ।

काठमाडौं । इजरायली प्रधानमन्त्री बेन्जामिन नेतान्याहुको निजी निवासलाई निशाना बनाइ शनिबार लेबनानबाट ड्रोन हमलामा भएको इजरायलको प्रधानमन्त्रीको कार्यालयले एक विज्ञप्ति मार्फत जनाएको छ । विज्ञप्तिमा नेतन्याहु र उहाँकी पत्नी सारा हमलाको समयमा घरमा नभएको तथा घटनामा कुनै चोटपटकको रिपोर्ट नभएको उल्लेख गरिएको छ । टाइम्स अफ इजरायलको रिपोर्ट अनुसार शनिबार बिहान लेबनानबाट उडाइएका अन्य दुई ड्रोनहरू इजरायलको हवाई सुरक्षा द्वारा खसालेका थिए ।

इजरायल र हमासबिच चलिरहेको द्वन्द्वको बिचमा, इजरायली प्रधानमन्त्री बेन्जामिन नेतान्याहुले शुक्रबार गाजाका जनतालाई सम्बोधन गर्दै भने, “यदि हमासले हतियार छोड्न र बन्धकहरूलाई फिर्ता गर्न सहमत भएमा युद्ध भोलि समाप्त हुन सक्छ ।”

इजरायलले हमास प्रमुख र अक्टोबर ७ मा भएको आक्रमणका मास्टरमाइन्ड याह्या सिन्वारको हत्या भएको पुष्टि गरेको केही घण्टापछि उनले यस्तो टिप्पणी गरेका हुन् । इजरायली रक्षा बलले बिहीबार सिन्वार र अन्य दुई आतङ्ककारी इजरायलले मारेको खुलासा गरेको छ । नेतान्याहुले हमासले हाल गाजामा १०१ जनालाई बन्धक बनाएको खुलासा गरेका छन् । जसमा इजरायलसहित २३ वटा विभिन्न देशका नागरिक छन् । एजेन्सी