Author: Vishwanews.com

काठमाडौं । बाँकेमा नेपाली कांग्रेसको जागरण अभियानमा नेकपा कार्यक्रताले आक्रमण गरेका छन् ।

बाँकेको सीतापुरमा प्रतिपक्षी नेपाली कांग्रेसको कार्यक्रममा सत्तारुढ दलका कार्यकर्ताले आक्रमण गरेको नेपाली कांग्रेस बाँकेले जानकारी दिएको छ ।

घटनामा बाँके कांग्रेसका सभापति किरण कोइरालाको हात भाँच्चिएको बताइएको छ । अन्य कार्यक्रतासमेत घाइते भएका छन् । नेपाली कांग्रेसले विपि जयन्तीको अवसर पारेर देशव्यापी जागरण अभियान शुरु गरेको थियो ।

राष्ट्रिय जागरण अभियानका दौरान खजुरा गाउँपालिका–२ सितापुरस्थित नेपाल रेडक्रसको हलमा भइरहेको कार्यक्रममा नेकपा कार्यक्रताले आक्रमण गरेको बताइएको छ ।

उक्त कार्यक्रममा केही स्थानीय युवा कांग्रेसमा प्रवेश समेत गरेका थिए । सोही विषयलाई लिएर स्थानीय नेकपाका कार्यक्रताले आक्रमण गरेको बताइएको छ ।

नेकपाको क्षेत्रमा कोही पनि कांग्रेस प्रवेश गर्न पाउँदैन भन्दै युवाहरुले कार्यक्रम विथाल्ने र तोडफोड गरेको बाँके कांग्रेसले बताएको छ ।

कांग्रेसले घटनाको सत्य तथ्य पत्ता लगाएर कारवाही गर्न समेत आग्रह गरेको छ । पार्टीले उक्त घटनाको भत्सर्ना पनि गरेको छ ।

काठमाडौं । सरकारले ७० वर्षभन्दा माथिका ज्येष्ठ नागरिकलाई आन्तरिक उडानको हवाई भाडामा छुट दिन गरेको घोषणा कार्यान्वयनका सम्बन्धमा अध्ययन गर्न समिति गठन गरेको छ ।

पूर्वसचिव सूरेशमान श्रेष्ठको अध्यक्षतामा गठन भएको यस समितिले आन्तरिक उडानका सन्दर्भमा उठेका समग्र विषयमा अध्ययन गरी सरकारलाई सुझाव दिने जिम्मेवारी पाएको छ ।

खासगरी ७० वर्षभन्दा माथिका जेष्ठ नागरिकको हवाई भाडामा ५० प्रतिशत छूट, हवाई भाडामा विदेशी र नेपालीलाई रहेको विभेद, नेपालमा हपाई इन्धन महंगो हुँदा वायुसेवा कम्पनीलाई परेको मर्काका विषयमा पनि सुझाव दिन समिति गठन गरिएको संस्कृति, पर्यटन तथा नागरिक उड्डयन मन्त्रालयले जानकारी दिएको छ ।

समितिले सरोकारवाला निकायसँग छलफल गरी कार्यान्वयनको आधारसहित सुझाव दिने छ ।

समितिमा अर्थ मन्त्रालयका सहसचिव, उद्योग मन्त्रालयका सहसचिव, नेपाल नागरिक उड्डयन प्राधिकरणका निर्देशक, नेपाल वायुसेवा निगमका निर्देशकस्तरका प्रतिनिधि, लेखा विज्ञ सौरभ रिजाल र वायुसेवा संचालक संघ नेपालका प्रतिनिधिलाई सदस्य तोकिएको छ ।

पर्यटन मन्त्रालय, हवाई उद्योग व्यवस्थापन महाशाखा प्रमुख तथा सहसचिव सदस्य सचिव रहने गरी समिति बनाइएको हो । समितिले ३० दिनको समयावधि पाएकोछ ।

काठमाडौं । नेपाली राजनीतिका शीर्षपुरुष विपि कोइरालाको आज जन्मजयन्ती, नेपाली कांग्रेसले देशभर विभिन्न कार्यक्रम गरी मनाउँदैछ ।

खासगरी जागरण अभियानको थालनी गर्ने बताएको कांग्रेसले विपीको १ सय ६औं जन्मजयन्तीका दिन १०६ वटा रुख रोपेर अभियान थाल्ने भएको छ ।

सबै प्रदेशमा यो अभियान शुरु हुने भएको छ । दोस्रो चरणको जागरण अभियानको दौरान रुख रोपेर शुरुवात गर्न लागिएको कांग्रेसले बताएको छ ।

देशभर विभिन्न स्थानमा ३४ हजार ९ सय ८० वटा बिरुवा रोप्ने योजना कांग्रेसको छ । उपचिर्वाचन पनि नजिकिएको मौकामा कांग्रेसले देशभर जागरण अभियान चलाउन लागेको हो ।

प्रदेशसभा निर्वाचन क्षेत्रमा कार्यक्रम केन्द्रित गरिएको छ । १५ दिन सम्म चल्ने यस अभियानको अन्तिम दिन ७ असोजमा ७७ जिल्लामा एकसाथ प्रदर्शनको आयोजना गरिएको छ ।

कांग्रेसले आगामी मंसिरमा हुने उपनिर्वाचनलाई समेत प्राथमिकता दिएको बताएको छ ।

पार्टीको गिरेको साँख जोगाउनु र नेकपाले सत्तामा रहेका बेला पाएको आलोचनालाई उपयोग गर्ने दाउ हेरिरहेको छ । आगामी १४ मंसिरमा देशभरका विभिन्न ५० क्षेत्रमा उपनिर्वाचन हुँदैछ ।

काठमाडौं । नेपालमा नयाँ संविधान जारी भएर निर्वाचनपछि कम्यूनिष्ट नेतृत्वमा सरकार गठन भएको डेढ वर्ष पुरा भइसकेको छ ।

यसबीचमा चीन सरकारको तर्फबाट नेपालमा पहिलो पटक उच्चस्तरीय भ्रमण हुन लागेको छ । चिनियाँ विदेशमन्त्री वाङ यी तीनदिने नेपाल भ्रमणको सिलसिलामा आज नेपाल आउँदैछन् ।

पाकिस्तानमा एक सम्मेलन पुरा गरी उनी नेपाल आउन लागेका हुन् । नेपालमा उनी तीन दिन सम्म रहँदा उच्च स्तरीय भेटवार्ताको कार्यक्रम रहेको परराष्ट्र मन्त्रालयले जानकारी गराएसकेको छ ।

उनको नेपाल भ्रमण चिनियाँ राष्ट्रपति सी जिनफिङको निकट भविश्यमा हुने नेपाल भ्रमणको तयारीका रुपमा दुबै मुलुकले उपयोग गर्दैछन् ।

परराष्ट्रमन्त्री प्रदीप ज्ञवालीको औपचारिक निमन्त्रणामा उनी नेपाल आउन लागेका हुन् । मन्त्रालयका अनुसार चीनबाट १९ सदस्यीय टोली नेपाल आउन लागेको छ ।

विदेशमन्त्री वाङले आइतबार नै राष्ट्रपति विद्यादेवी भण्डारी र प्रधानमन्त्री केपी शर्मा ओलीसँग भेट गर्ने कार्यक्रम रहेको मन्त्रालयले जारी गरेको तालीकामा उल्लेख छ ।

भेटमा द्धिपक्षीय विविध विषयले प्राथमिकता पाउने भएका छन् । सोमबार समकक्षी प्रदीप ज्ञवालीसँग औपचारिक द्धिपक्षीय भेटवार्ता गर्ने कार्यक्रम तय गरिएको छ ।

सोही दिन मन्त्री ज्ञवालीले विदेशमन्त्रीको स्वागतमा रात्री भोज समेत आयोजना गर्नेछन् । विदेशी मन्त्री वाङ दोस्रो पटक नेपाल आउन लागेका हुन् । उनी सन् २०१४ मा नेपाल आएका थिए ।