Author: Vishwanews.com

काठमाडौं । श्री एयरलाइन्सले छैठौं जहाज काठमाडौं ल्याइपुर्याएको छ । क्यानडामा बनेको बम्बाडियर जहाज भारतको अहमदावाद हुँदै काठमाडौं आएको हो ।

बिहीबार काठमाडौं अवतरण गरेको जहाज बुधबार नै काठमाडौं आउने कार्यक्रम रहेपनि प्रतिकूल मौसमका कारण पटनातर्फ लगिएको कम्पनीका प्रवन्धक अनिल मानन्धरले जानकारी दिएका छन् ।

उनका अनुसार ८० सीट क्षमता रहेको यस जहाजले तीन वटा थप गन्तब्य बिस्तारमा सहयोग पुग्ने छ ।

यससहित अब श्री एयरलाइन्सले कूल १० गन्तब्यमा उडान गर्न सक्ने भएको छ ।

यसैबीच, नेपाल एयरलाइन्सले जापानका लागि पहिलो उडान सफल भएको बताएको छ । नेपाल एयरलाइन्सको जहाज बिहीबार राती साढे २ बजे काठमाडौंबाट उडेको थियो ।

उक्त जहाज ११ बजे जापान पुगेको थियो । त्यसको एक घण्टा पछि जापानबाट उडेको उक्त जहाज साँझ ६ बजे काठमाडौं आइपुगेको हो । पहिलो उडानमा कम्पनीले १ सय ४६ यात्रु बोकेर जापान जान सफल भएको छ ।

यता, यति एयरलाइन्सले १५ भदौबाट भरतपुर पोखरा रुटमा उडान शुरु गर्ने भएको छ । क्षेत्रिय उडानलाई प्रवद्र्धन गर्ने सिलसिलामा उक्त उडान शुरु गर्न लागिएको कम्पनीले जनाएको छ ।

काठमाडौं । नेपाल एयरलाइन्सले पहिलो पटक नेपालबाट जापानमा सिधा उडान शुरु गरेको छ ।

बिहीबार बिहान २ः३० बजे निगमको जहाज जापानका लागि उड्दैछ । उडानको सम्पूर्ण तयारी पुरा भइसकेको नेपाल वायुसेवा निगमको भनाई छ ।

करीव १ सय २५ भन्दा बढी यात्रु बोकेर निगमको जहाज जापानका लागि उड्ने निगमले जानकारी दिएको छ ।

निगमका अनुसार त्रिभुवन विमानस्थलबाट करीव साढे ६ घण्टाको उडानपछि जहाज जापानको ओशाकास्थित कान्साई विमानस्थलमा पुग्ने छ ।

यस उडानको नेतृत्व गरी नेपालबाट संस्कृति, पर्यटन तथा नागरिक उड्डयन राज्यमन्त्री धनबहादुर बुढा जापान जाँदैछन् ।

यसबाहेक मन्त्रालयका सहसचिव, निगम संचलक समितिका पदाधिकारीसमेत यस उडानबाट जापान जाने भएका छन् । निगमले यो उडानमा वाइडबडी जहाज ए ३३०–२०० जहाज उडाउँदैछ ।

यो वाइडबडीको पहिलो लामो दूरीको गन्तब्य समेत हो । नेपाल एयरलाइन्सले यसअघि काठमाडौं-सांघाई-ओसाका रुटमा उडान गरेको भएपनि सिधा उडान भने पहिलो पटक हुन लागेको हो ।

ओसाकामा निगमले ३० अक्टोवर १९९४ देखि उडान थालेको थियो । त्यो उडान १२ अप्रिल २००७ सम्म कायम रहेर रद्द भएको थियो । अब काठमाडौंबाट मंगलबार, बिहीबार र शनिबार गरी सातामा तीन उडान हुने भएको छ ।

काठमाडौं । आन्तरिक उडानमा जेष्ठ नागरिकले ५० प्रतिशत छूट पाउने भएका छन् । संस्कृति, पर्यटन तथा नागरिक उड्डयन मन्त्री योगेश भट्टराईले उक्त घोषणा गरेका हुन् ।

सोमबार मन्त्री भट्टराईले १४१ बुँदे कार्ययोजना सार्वजनिक गर्दै तीन महिनापछि जेष्ठ नागरिकलाई ५० प्रतिशत हवाई भाडा छूट दिने घोषणा गरे ।

आन्तरिक उडानमा ७० प्रतिशत भन्दा माथि उमेर पुगेका नागरिकले ५० प्रतिशत भाडा छूट पाउने मन्त्री भट्टराईले उल्लेख गरे ।

वायुसेवा कम्पनीहरुसँगको छलफलमा यो योजना कार्यान्वयनमा ल्याइने उनको भनाइ रहेको छ ।

सरकारले अन्तर प्रदेश उडानलाई प्राथमिकता दिएर काठमाडौंको उडान चाप घटाउने योजना समेत सार्वजनिक गरेको छ ।

प्रदेशका राजधानी जोडिने गरी निजी वायुसेवा कम्पनी र नेपाल वायुसेवा निगमसँग छलफल गरी अन्तर प्रदेश हवाई सेवा सञ्चालनको योजना रहेको भट्टराइको कार्ययोजनामा उल्लेख गरिएको छ ।

काठमाडौंबाट साना जहाजलाई कम गरी ठूला जहाजलाई प्रोत्साहन दिने योजना रहेको छ । काठमाडौंमा ७० सीट र सोभन्दा माथिका जहाजको उडानमा प्रोत्साहन गर्ने नीति सरकारले लिने भएको छ ।

यस अवधिमा सरकारले ठूला विमानस्थल आयोजनालाई अगाडी बढाउने उल्लेख गरेको छ ।

त्रिभुवन विमानस्थलमा अब सम्माननीयहरुलाई मात्र गाडसहित जान दिने निर्णय मन्त्रालयले गरेको छ । १५ दिन भित्रै यसको कार्यानवयन हुने भएको छ ।

काठमाडौं । श्रम, रोजगार तथा सामाजिक सुरक्षा मन्त्री गोकर्ण विष्टले आतिथ्य सेवाका उद्यमीलाई कर्मचारीलाई खुसी राख्न आग्रह गरेका छन् ।

खुसी कर्मचारीले सेवा दिएमात्र धेरै ग्राहक आउने र व्यवसाय फस्टाउने भन्दै उनीहरुको सेवा सुविधालाई बोझका रुपमा नलिन आग्रह गरेका छन् ।

आइतबार राजधानीमा आयोजित एक कार्यक्रममा मन्त्री विष्टले श्रम सम्बन्धमा निकै सुधार भएको भन्दै अब आफ्नो कर्मचारीबाट बढी भन्दा बढी फाइदा लिन उद्यमीलाई सुझाव दिए ।

त्यसका लागि ऐनले तोकेको सेवा सुविधा दिएर खुसी राख्न समेत आग्रह गरे । ऐनले नेपालमा श्रमिकको न्यूनतम ज्याला १३ हजार ५ सय तोकेको छ । तर, यही ज्याला पनि धेरै भएको भन्दै उद्यमीहरुले गुनासो गरिरहेका छन् ।

नेपालमा एक जना मजदुरको दैनिकी चलाउन कम्तिमा २२ हजार रुपैयाँ आवश्यक रहेको विभिन्न अध्ययनले देखाएको भन्दै मन्त्री विष्टले न्यूनतम ज्यालामा सम्झौता नगर्न सचेत गराएका हुन् ।

कार्यक्रममा होटेल संचालकहरुले सामाजिक सुरक्षा कार्यक्रम अनिवार्य गर्दा अन्यौल भएको भन्दै यसका प्रावधानलाई खुकुलो बनाउन आग्रह गरेका थिए ।
सरकारले १ साउनबाट सामाजिक सुरक्षा योजना अनिवार्य गरेको छ । अहिलेसम्म ४ हजार प्रतिस्ठान र ४० हजार मजदुर यस योजनामा समोवश भइसकेको श्रम मन्त्रालयले जानकारी दिएको छ ।