पर्वत । पर्वतमा मदिरा बिक्रिका लागि नयाँ मापदण्ड तोकिएको छ । अब १८ वर्ष नपुगेको किशोर किशोरीले मदिरा खरीद गर्न नपाउने भएको छन् ।
मदिराको अवैध कारोबार र यसको अधिक प्रयोगले यूवापुस्तामा आपराधिक गतिविधि बढ्दै गएपछि नयाँ मापदण्ड लागु गर्ने निर्णय भएको हो ।
मदिरा बिक्रि दिउँसोको समयमा समेत गर्न रोक लगाइएको छ । साँझ ५ बजेदेखि १० बजेको बीचमा मात्र मदिरा बिक्रि वितरण गर्न पाइने भएको छ ।
बुधबार जिल्ला प्रशासन कार्यालयमा जिल्लाका सरोकारवाला निकायको बैठक बसेर नयाँ नियम बनाएको हो ।
उद्योगी, व्यापारी, होटल व्यवसायी, मदिरा व्यवसायी, प्रमुख जिल्ला अधिकारी तथा सुरक्षा निकायका प्रमुखलगायतको बैठकले उक्त निर्णय गरेको हो ।
अब पर्वतमा १५ कात्तिक देखि १५ माघ सम्म रातको ९ बजेसम्म मात्र होटेल खुला रहनेछन् । १६ माघ देखि १४ कात्तिकसम्म १० बजे रातीसम्म मात्र होटल खुला राख्ने निर्णय भएको जिल्ला प्रशासन कार्यालय पर्वतले जानकारी दिएको छ ।
त्यसो त मदिराको गैरकानूनि बिक्रि र वितरणलाई पनि प्रशासनले कडाई गर्ने भएको छ । यसका लागि अनुगमन टोली नै खट्ने भएको छ ।
नेपालमा अन्तशूल्क नतिरेको मदिरा बिक्रि गर्न रोक लगाइएको छ ।
सबै होटेलले सीसीटीभी क्यामरा राखेर सुरक्षा प्रवन्ध कडा बनाउनु पर्ने भएको छ ।
पर्वतमा पछिल्लो समय होटेल व्यवसाय फस्टाउने क्रममा छ । पोखरा, म्याग्दीलगायत भेगको छिमेकी जिल्ला भएका कारण यहाँ पर्यटकीय गतिविधि बड्दै छन् ।
