Author: Vishwanews.com

काठमाडौं । दक्षिण कोरियामा भएको जहाज दुर्घटनामा ज्यान गुमाउनेको सङ्ख्या १७९ पुगेको छ । समाचार एजेन्सीहरुका अनुसार आइतबार बिहानै भएको जहाज दुर्घटनामा २ जनाको जिवितै उद्वार गरिएको थियो । जहाजमा १८१ यात्रु सवार थिए । उनीहरु बाहेक अन्य सबैको ज्यान गएको समाचारमा उल्लेख छ । थाइल्यान्डको बैंककबाट जेजु एयरको जहाज मुआन अन्तर्राष्ट्रिय विमानस्थलमा अवतरणका क्रममा दुर्घटनामा परेको हो । दुर्घटनाको कारण खुलेको छैन ।

काठमाडौं । दक्षिण कोरियाको मुआन अन्तर्राष्ट्रिय विमानस्थलमा करिब १८१ जना सवार एक विमान दुर्घटना भएको छ । अवतरणका दौरान धावनमार्गमा चिप्लिएर विमान दुर्घटना भएको हो । त्यसपछि विमानमा आगो लागेको थियो । समाचार एजेन्सी योनहापले यो दुर्घटनामा अहिलेसम्म २८ जनाको मृत्यु भएको पुष्टि भएको जनाएको छ ।

सो विमानमा १७५ जना यात्री र चालक दलका ६ सदस्य थिए । विमानमा दुई जना थाइल्याण्डका र अरु सबै दक्षिण कोरियाका नागरिकहरु थिए । थाइल्याण्डको राजधानी बैंककबाट फर्किएको जेजु एयरको विमान स्थानीय समय अनुसार ९ बजेर ७ मिनेटमा दुर्घटनामा परेको हो ।

दुर्घटनास्थलबाट दुई जनालाई जीवितै उद्धार गरिएको रोयटर्सले जनाएको छ । दुर्घटनास्थल दक्षिण कोरियाको राजधानी सियोलबाट २८८ किलोमिटर दक्षिण पश्चिम क्षेत्रमा पर्दछ ।

काठमाडौं । मोरक्कोमा डुंगा पल्टिँदा कम्तीमा ६९ जनाको मृत्यु भएको छ । पश्चिमी अफ्रिकाबाट स्पेन गइरहेको डुंगा मोरक्कोमा पल्टिएको हो । बीबीसीका अनुसार मृत्यु हुनेमा कम्तीमा २५ जना नागरिक मालीका रहेका छन् । डुंगामा करिब ८० जना यात्री रहेको र ११ जना बाँच्न सफल भएको समाचारमा उल्लेख छ । दुर्घटना पछिल्लो साताको भए पनि मालीले भर्खर पुष्टि गरेको बीबीसीले जनाएको छ ।

मालीमा लामो समय हिंसात्मक द्वन्द्व चर्किएपछि २०२० र २०२१ मा सेनाले सत्ता हातमा लिएको थियो । सैनिक सरकारले सन् २०२४ आम चुनाव गराउने वाचा गरे पनि अहिलेसम्म हुन सकेको छैन । देशको अवस्था हेरेर मालीका अधिकांश नागरिक युरोप जानका लागि डुंगामा जोखिमपूर्ण यात्रा तय गर्न खोजिरहेका छन् ।

काठमाडौं । सिरियाका अपदस्थ नेता बशर अल असदप्रति बफादार समूहको आक्रमणमा परेर त्यहाँको विद्रोही(नियन्त्रित नयाँ प्रशासनको आन्तरिक मामिला मन्त्रालयका १४ सुरक्षाकर्मी मारिएका र अन्य १० अन्य घाइते भएका नयाँ प्रशासनका अधिकारीहरूले बताएका छन्। ती अलवाइत समूहका समर्थकहरू पूर्वनेता असदले मान्ने गरेको धार्मिक समूहका सदस्यहरू हुन्। यूके मुख्यालय रहेको एउटा अधिकारवादी समूह सिरिअन अब्जर्भेटरी फर ह्यूमन राइट्सका अनुसार कुख्यात सैदनाय जेलसँग सम्बन्धित एक जना पूर्वअधिकारीलाई सुरक्षा फौजले टार्टुस सहरमा पक्राउ गर्ने प्रयास गरेपछि यो घटना भएको हो।

अलवाइत समूहको धार्मिक स्थलमा आक्रमण भएको एउटा भिडिओ सार्वजनिक भएपछि अन्य कैयौँ स्थानमा पनि प्रदर्शन भएका छन्। सिरियाको विद्रोही-नियन्त्रित सरकारका अधिकारीहरूले लडाइँ भूमध्यसागरको तटमा रहेको टार्टुस बन्दरगाहनजिकै मङ्गलवार भएको जनाएका छन्। दमास्कसनजिकैको कुख्यात सैदनाय जेलमा भएका गतिविधिसँग जोडिएको एक पूर्वअधिकारीलाई पक्राउ गर्ने प्रयास गरेका सुरक्षाकर्मीलाई एम्बुसमा परिएको विवरणहरूमा जनाइएको छ।

दुई हप्ता मात्रै अघि राष्ट्रपति असदले सत्ता गुमाएका थिए। इस्लामवादी हायत तहरिर अल–शाम (एचटीएस) नेतृत्वको विद्रोही समूहले सिरियामा सत्ता चलाइरहेको छ। यूके मुख्यालय भएको सिरिअन अब्जर्भेटरी फर ह्यूमन राइट्सका अनुसार तीन जना विद्रोही पनि उक्त झडपमा मारिएका थिए। उसका अनुसार त्यसपछि सुरक्षाकर्मीहरूले थप सहयोग मागेका थिए। विद्रोहीहरूले सिरियाको उत्तरपूर्वबाट सुरु गरेको लडाइँ देशभर विस्तार भएको थियो। त्यसले असद परिवारको ५० वर्षको सत्ता अन्त्य गराएको थियो।

त्यसपछि असद र उनको परिवार रुसमा भाग्न बाध्य भएका थिए। एचटीएसले सिरियाका विभिन्न धार्मिक र जातीय अल्पसङ्ख्यक समुदायको अधिकार र स्वतन्त्रता रक्षा गर्ने वाचा गरेको छ। उक्त सङ्गठनलाई संयुक्त राष्ट्रसङ्घ, संयुक्त राज्य अमेरिका, युरोपेली सङ्घ र यूकेसहितका देशले आतङ्कवादी सङ्गठन सूचीमा राखेका छन्। मङ्गलवार एउट क्रिसमस ट्री जलाइएपछि देशभर प्रदर्शनहरू भएका थिए। त्यसपछि अल्पसङ्ख्यकको सुरक्षा गर्न नयाँ सरकारमाथि दबाव परेको थियो।

सामाजिक सञ्जालमा पोस्ट गरिएको एउटा भिडिओमा मध्य सिरियाको एउटा इसाईबहुल नगरको एउटा मुख्य चोकमा क्रिसमस ट्री जलिरहेको देखिएको थियो। भिडओ फुटेजमा मास्क लगाएका व्यक्तिहरूले सिरियाका इसाईहरूले क्रिसमस ईभ मनाउने तयारी गरेको अघिल्लो रात क्रिसमस ट्री पहिचान नखुलेको तरल पदार्थ छर्किरहेको देखाइएको थियो। उनीहरूले आगो निभाउन खोजेका वा त्यसलाई थप बाल्न खोजेका थिए भन्ने स्पष्ट भएको छैन। एचटीएसले उक्त घटनालाई लिएर विदेशी फौजका सदस्यहरूलाई पक्राउ गरिएको जनाएको थियो।
बीबीसीबाट साभार

काठमाडौं । भारतका पूर्वप्रधानमन्त्री डा. मनमोहन सिंहको निधन भएको छ । सन् २००४ देखि २०१४ सम्म भारतको प्रधानमन्त्रीको पद सम्हालेका सिंह ९२ वर्षका थिए । कांग्रेसका दिग्गज नेतासमेत रहेका सिंहको बिहीबार राति दिल्लीको एम्स अस्पतालमा उपचारको क्रममा निधन भएको हो। अस्पतालले केहीअघि एक मेडिकल बुलेटिन जारी गर्दै राति नौ बजेर ५१ मिनेटमा सिंहको निधन भएको पुष्टि गरेको छ ।

मेडिकल बुलेटिनमा भनिएको छ, ‘गहिरो शोकको साथ हामी भारतका पूर्वप्रधानमन्त्री डा. मनमोहन सिंहको ९२ वर्षको उमेरमा निधन भएको जानकारी गराउँदछौं । उहाँ उमेरसँग सम्बन्धित स्वास्थ्य अवस्थाको लागि उपचार गरिरहनुभएको थियो र बिहीबार घरमा अचानक बेहोस हुनुभएको थियो । बेलुकी आठ बजेर ६ मिनेटमा नयाँ दिल्लीको एम्समा मेडिकल इमर्जेन्सीमा ल्याइएकोमा सबै प्रयासका बाबजुद राति नौ बजेर ५१ मिनेटमा मृत घोषणा गरियो ।’ सिंहलाई भारतीय अर्थतन्त्रको विकासमा बलियो जग बसाएको भन्दै सुदृढ आर्थिक परिवर्तनको श्रेय दिने गरिन्छ ।

काठमाडौं । अफ्रिकी मुलुक मोजाम्बिकमा हिंस्रह प्रदर्शन जारी छ । सो क्रममा कम्तिमा १५ सय मानिस जेलबाट फरार भएको समाचार माध्यमहरुले जनाएका छन् । यस मुलुकमा चुनावी नतिजाबाट असन्तुष्टी जनाएसँगै प्रदर्शन जारी छ । प्रदर्शन हिंस्रक बन्दै गएको छ ।

अहिलेसम्म ३३ जनाको मृत्यु भइसकेको समेत समाचारमा जनाइएको छ । मोजाम्बिक प्रहरीका अनुसार १५ भन्दा धेरै घाइते छन् । १५० भन्दा धेरै मानिसलाई गिरफ्तार गरिएको छ । सोमबार अदालतको एक आदेशपछि यहाँ प्रदर्शन सुरु भएको हो । जसमा सत्तारुढ दलको जितको पक्षमा फैसला आएको हो ।