Author: Vishwanews.com

उत्तराखण्ड । भारतको उत्तराखण्डमा फेरि हिमताल फुटेको खबर भारतीय संचारमाध्यमले छापेका छन् । तर, संचार सम्पर्क स्थापित हुन नसकेका कारण क्षतिको विवरण नआएको उत्तराखण्ड प्रहरीले जनाएको छ । भारत–चीन सीमा क्षेत्र नजिक चमोलीको जोशीमठ भन्ने स्थानमा शुक्रबार हिमताल फुटेको संचारमाध्यमले जनाएका छन् ।

सो क्षेत्रमा सञ्चार सम्पर्क विच्छेद भएको छ । प्रहरी अधिकारीहरुले शनिबार साँझसम्ममा पूरा विवरण आउनसक्ने बताएका छन् । सो क्षेत्रमा मानव बसोबास कम भएकाले मानवीय क्षतिको सम्भावना भएको हुन सक्ने अनुमान छ ।
बोर्डर रोड अर्गनाइजेसनका अनुसार यस क्षेत्रमा भारतीय कामदारले सडक निर्माणको काम गरिरहेको भए पनि मानवीय क्षति नभएको बताएको छ ।

जोशीमठ–मलारी सडकखण्ड हिउँले ढाकिएका कारण मानिसहरु फसेको अनुमान छ । उत्तराखण्डमै केही समय अगाडी हिमताल फुटेर अलनन्दा नदीमा आएको बाढीमा परी ५० जनाको मृत्यु भएको थियो । कैयौं अझै बेपत्ता छन् ।

नयाँ दिल्ली । भारतीय प्रधानमन्त्री नरेन्द्र मोदी अघिल्लो सातासम्म चुनावी र्यालीमा भारतको समृद्धिका लागि ठूल्ठूला काम भएको भन्दै भाषणबाजी गरिरहेका थिए । त्यसको एक साता भित्रै राजधानी दिल्लीसहित कैंयौ क्षेत्रबाट यस्तो समाचार आएका छन्, जहाँ अक्सिजनको अभावले कोरोना भाइरसका संक्रमितले अकालमा ज्यान गुमाउन पुगेका छन् ।

यसले मोदी समृद्धिको फर्दाफास भएको भन्दै भारतमा व्यापक आलोचना शुरु भएको छ । कोरोनाभाइरसको सङ्क्रमण बढ्दै जाँदा भारतमा निर्वाचन आयोगले अहिले भने चुनावी र्‍याली र सभा आयोजनामा प्रतिवन्ध लगाइदिएको छ । पछिल्ला हप्ताहरूमा कोरोनाभाइरसको सङ्क्रमण ह्वात्तै बढ्नुमा कतिपय राज्यहरूमा भइरहेका भिडभाडपूर्ण चुनावी अभियानलाई समेत जिम्मेवार ठानिएको बीबीसीले जनाएको छ ।

भारतका राज्यहरूमा यो वर्ष शृङ्खलावद्ध चुनाव हुँदैछन्। महामारीबाट गम्भीर रूपमा प्रभावित राजधानी दिल्लीका छवटा अस्पतालमा अक्सिजन पूर्ण रूपमा सकिएको चिकित्सकहरूले जनाएका छन्। अन्य अस्पतालहरूमा केही घन्टाको निम्ति मात्रै अक्सिजन बाँकी रहेको बताइएको छ।

अक्सिजनको अभावमा कैयौँ बिरामीहरूले ज्यान गुमाएको बीबीसीले लेखेको छ । अक्सिजन आपूर्ति प्रभावित हुँदा लुटपाट हुन थालेको खबर आएका छन् । उता, भारतको सर्वोच्च अदालतले सरकारलाई अक्सिजन तथा अत्यावश्यक औषधिको चरम अभावलाई सम्बोधन गर्न राष्ट्रिय योजना बनाउन निर्देशन दिएको छ।

क्वेटा । पाकिस्तानमा एक होटेलमा बम विष्फोट गराइदा कम्तिमा चार जनाको मृत्यु भएको छ । ११ जना घाइते भएका छन् । पाकिस्तानको क्वेटा शहरमा होटलमा बम विष्फोट गराइएको हो । बीबीसीले लेखे अनुसार क्वेटा शहरमा अवस्थित चर्चित होटल सेरेनाको पार्किङ क्षेत्रमा विष्फोट गराइएको छ । यो होटेलउच्च सरकारी अधिकारीको बढी आउजाउ हुने होटलका रुपमा चिनिन्छ ।

पाकिस्तानका गृहमन्त्री शेख राशिद अहमदले एक टेलिभिजनलाई दिएको प्रतिक्रियाअनुसार विष्फोटक पदार्थले भरिएको कार पार्किङ क्षेत्रमा विष्फोट गराइएको हो । विष्फोटको जिम्मा तालिवानले लिएको छ । क्वेटा शहर बलुचिस्तान प्रान्तको राजधानी हो, जुन अफगानिस्तानको सीमा नजिक छ । बलुचिस्तान क्षेत्रमा पृथकतावादी समूह लामो समयदेखि सक्रिय छ ।

बलुचिस्तान क्षेत्रमा चीनले ठूलो परियोजनामा लगानी गरेको छ र त्यसको विरोध पृथकतावादी समूहले गर्दै आएको छ । त्यसैले यो आक्रमण पाकिस्तानका लागि चिनियाँ राजदूत लक्षित हुनसक्ने स्थानीय मिडियाका रिपोर्टरहरुले जनाएका छन् । यद्यपि चिनियाँ राजदूत नोङ्ग रोङ्ग त्यो होटलमा भने थिएनन् ।