Author: Vishwanews.com

काठमाडौं । नेपालमा थप १०९६ जनामा कोरोना संक्रमण पुष्टी भएको छ ।

स्वास्थ्य तथा जनसंख्या मन्त्रालयको अनुसार पछिल्लो २४ घण्टामा विभिन्न प्रयोगशालामा गरिएको ५ हजार ८४ जनाको पीसीआर परीक्षणबाट १ हजार १५ जना र ६ सय ९९ एन्टिजेन परीक्षणबाट ८१ जनाको रिपोर्ट पोजेटिभ हो ।

स्वास्थ्य मन्त्रालयका अनुसार काठमाडौँ उपत्यकामा सर्वाधिक ४३५ जनामा संक्रमण पुष्टि भएको छ । यसमध्ये ३२६ जना काठमाडौँमा, ६४ जना ललितपुर तथा ४५ जना भक्तपुरका रहेका छन् । पछिल्लो २४ घन्टामा २६२ जना संक्रमणमुक्त भएका छन्।

यससँगै हालसम्म संक्रमण पुष्टि हुनेको संख्या २ लाख ८४ हजार ६७३ जना पुगेको छ। स्वास्थ्य मन्त्रालयका अनुसार २६२ जना कोरोनालाई जितेर अस्पतालबाट डिस्चार्ज भएका छन् ।

यो सँगै नेपालमा निको हुनेको संख्या २ लाख ७५ हजार ३०० जना पुगेको मन्त्रालयले जनाएको छ ।

संक्रिय संक्रमितको संख्या ६ हजार २९० जना रहेको छ । पछिल्लो २४ घण्टामा मृत्यु हुनेको संख्या ८ रहेको छ । नेपालमा कोरोनाबाट मृत्यु हुनेको संख्या ३०८३ पुगेको छ ।

नवलपुर । शनिबार पूर्व–पश्चिम राजमार्गअन्तर्गत नवलपुरको विनयी त्रिवेणी गाउँपालिका–२ दाउन्नेमा भएको बस दुर्घटनामा परी घाइते मध्ये तीन जनाको उपचारका क्रममा मृत्यु भएको छ । प्रहरीका अनुसार दुई महिला र एक पुरुषको उपचारको क्रममा ज्यान गएको हो ।

दुर्घटनामा इलामका २५ वर्षीया धनु दर्लामी, मकवानपुर बकाया गाउँपालिका–५ का ५७ वर्षीया ज्यामो हिसे छमो ग्याल्मो र चितवन भरतपुर महानगरपालिका–२५ का ७२ वर्षीय हिमलाल न्यौपानेको मृत्यु भएको प्रहरीले जनाएको छ । दुर्घटनामा ३१ यात्रु घाइते भएका थिए ।

घाइतेहरुको भरतपुर तथा नवलपुरका विभिन्न अस्पतालमा उपचार जारी छ । बुटवलबाट नारायणगढका लागि छुटेको ना ५ ख ७००० नम्बरको बस शनिबार साँझ दाउन्नेमा दुर्घटनामा परेको हो ।

सुर्खेत । कर्णाली प्रदेशमा फ्लोर क्रस गरी माओवादी नेतृत्वको सरकार जोगाएका तीन जना एमालेका सांसदलाई मन्त्रीमा नियुक्त गरिएको छ । कर्णाली प्रदेशका मुख्यमन्त्री महेन्द्रबहादुर शाहीले शनिबार मन्त्रिपरिषद् पुनर्गठन गर्दै फ्लोर क्रस गरेका तीन जनालाई मन्त्री बनाएका हुन् ।

शाहीले नन्दसिंह बुढालाई भूमि व्यवस्था, कृषि तथा सहकारी, अमरबहादुर थापालाई भौतिक पूर्वाधार विकास र कुर्मराज शाहीलाई उद्योग, पर्यटन, वन तथा वातवरणमन्त्री नियुक्त गरेका हुन् ।

एमालेका प्रदेशसभा सदस्य बुढा, थापा र शाही तथा प्रकाश ज्वालाले फ्लोर क्रस गर्दै मुख्यमन्त्री शाहीलाई मत दिएका थिए । एमाले प्रदेश कमिटीले शनिबार फ्लोर क्रस गर्ने तीन प्रदेशसभा सदस्यलाई पार्टीबाट निस्कासन गर्ने निर्णय गरेको थियो । प्रकाश ज्वालालाई भने कारबाही गर्न केन्द्रमा सिफारिस गरेको थियो ।

काठमाडौं । प्रधानमन्त्री केपी शर्मा ओलीले आज सर्वदलीय बैठक बोलाएका छन् । विहान ११ बजे बालुवाटारमा सर्वदलीय बैठक बोलाएको उनका प्रेस सल्लाहकार सूर्य थापाले उल्लेख गरेका छन् । कोरोना भाइरसको महामारी र समसामयिक राजनीतिक विषयमा छलफल हुने बताइएको छ । सरकारले कोरोनाको बढ्दो महामारीका बीच विद्यालयसहितका क्षेत्र बन्द गर्न सकेको छैन ।

यसमा संचालकहरुले दवाव दिएका छन् । सम्भवतः उनी संवेदनशिल क्षेत्रहरुमा बन्द गर्न अन्य राजनीतिक दलबाट समर्थन खोजिरहेका छन् । संसदमा प्रतिनिधित्व गर्ने सबै दलका प्रतिनिधिलाई बैठकमा बोलाइएको छ । बैठकमा संसद अधिवेशनका विषयमा समेत प्रधानमन्त्रीले आफ्नो धारणा राख्ने भएका छन् ।