Category: रोचक खवर

काठमाडौं । भारतमा कोरोना भाइरसको बढ्दो संक्रमण र नेपालमा हुन सक्ने अनाधिकृत प्रवेश रोक्न सीमा नाकामा सुरक्षा बल थप हुने भएको छ ।

गृहमन्त्री रामबहादुर थापा ‘बादल’ ले भीआईपीको सुरक्षामा अनावश्यक रहेका सुरक्षाकर्मीलाई फिर्ता बोलाएर सीमामा बल खटाउन प्रहरी प्रशासनलाई निर्देशन दिएका छन् ।

नेपाल प्रहरी र सशस्त्र प्रहरी बलबाट विशिष्ट व्यक्तिको सुरक्षामा खटाइएका उनीहरुलाई फिर्ता बोलाएर सीमाको सुरक्षामा खटाउन गृहमन्त्रीले निर्देशन दिएका हुन् ।

गृह मन्त्रालय स्रोतका अनुसार सोमबार प्रहरी महानिरीक्षक ठाकुरप्रसाद ज्ञवाली र सशस्त्र प्रहरी महानिरीक्षक शैलेन्द्र खनालसँगको भेटमा गृहमन्त्री बादलले भीआइपीका नाममा अनावश्यक रुपमा खटाइएका सुरक्षाकर्मीलाई तत्काल फिर्ता बोलाउन निर्देशन दिएका हुन् ।

दुबै संगठनले गृहमन्त्रीको निर्देशन अनुसार विशिष्ट सुरक्षा कार्यविधि विपरित खटिएका सुरक्षाकर्मीको तथ्यांक संकलन गरिरहेका छन् ।

यसअघि सशस्त्र प्रहरीले करीव २ हजार अतिरिक्त फौजलाई सीमा नाकामा तैनाथ गरिसकेको छ ।

अहिले कम्तिमा दुई हजार सुरक्षाकर्मी विशिष्ट व्यक्तिको सुरक्षामा खटिएको अनुमान छ ।

पहाडी भेगमा कम सुरक्षा थ्रेट भएका स्थानमा रहेका पोष्टबाट पनि सुरक्षाबललाई अब तराईमा झारिने भएको छ ।

काठमाडौं । बिहीबार अपरान्ह सरकारले एक निर्णय गर्यो । निर्णय अनुसार काठमाडौंबाट उपत्यका छाड्ने चाहनेका लागि शुक्रबार र शनिबार सार्वजनिक यातायात खुला गर्ने ।

काठमाडौं लकडाउनका कारण अलपत्र परेकाहरुलाई उपत्यका बाहिर जान दिने निर्णय कोभिड १९ सम्बन्धी उच्चस्तरीय संयन्त्रबाट भयो ।

तर, यो निर्णय करीव डेढ घण्टा मात्र टिक्यो । सरकारको यो निर्णयलाई प्रदेश सरकारहरुले विरोध गरे ।

यातायात व्यवसायीले पनि सरकारको यस निर्णयमा साथ नदिने बताए । त्यसपछि संघीय सरकार आफ्नो निर्णयबाट फिर्ता भयो । त्यति सम्म त ठिकै छ ।

निर्णय फिर्ता भएसँगै उपप्रधानमन्त्री इश्वर पोखरेलको नाममा एक विज्ञप्ती सार्वजनिक गरियो ।

जहाँ संचारमाध्यमले हुँदै नभएको निर्णयलाई अफवाह फिजाएको उल्लेख छ । तर, प्रधानमन्त्री तथा मन्त्रीपरिषद् कार्यालयले सामाजिक संजालबाट यथार्थ सार्वजनिक गरेको छ ।

जसअनुसार सरकारले यातायात खुलाउने निर्णय गरेको थियो । तर, प्रदेश सरकारहरुको विरोध पछि निर्णय फिर्ता लिइएको अपडेट गरिएको छ ।

तर, इश्वर पोखरेलले निर्णय गरेर पनि होइन भन्दै गरेको प्रचारको भने आलोचना भइरहेको छ ।

कोरोना भाइरस (कोभिड १९) को सक्रमण फैलिन नदिन सरकारले ११ चैतदेखि लकडाउन गरेको छ ।

लकडाउन वैशाख ३ सम्म लम्बिएपछि मानिसहरु हिँडेर समेत घर जान थालेका थिए । सोहीकारण संघीय सरकारले दुई दिन यातायात खुलाउने तयारी गरेको थियो ।

काठमाडौं । अवैतनिक वाणिज्यदूतले कुटनीतिक सुविधाअन्तर्गत सवारीमा नीलो नम्बर प्लेट लगाउन पाउने सुविधा खोसिएको छ ।

यसअघि सुलभ अग्रवालले कालोबजारीको काममा कुटनीतिक सुविधाको सवारी साधन प्रयोग गरेका थिए । उनी पक्राउ परेका छन् ।

यस काण्डपछि परराष्ट्र मन्त्रालयले बुधबार यस्तो निर्णय गरेको हो । मन्त्रालयका अनुसार कुनै पनि अवैतनिक वाणिज्यदूतहरुले आफ्नो सवारीमा निलो नम्बर प्लेट र अफिसियल झण्डा प्रयोग गर्न पाउने छैनन् ।

सरकारले अर्को सूचना नआउँदासम्मका लागि ती सुविधा खोस्ने निर्णण गरेको हो ।

ब्यापारी शंकर समूहका उपाध्यक्ष सुलभ अग्रवाल नेपालका लागि किर्गिस्तानका अवैतनिक वाणिज्य दूत हुन् । चीनमा निर्मित थर्मल गनको कालोबजारी गरेको आरोपमा प्रहरीले उनलाई मंगलबार पक्राउ गरेको हो ।

काठमाडौं । प्रमुख प्रतिपक्षी नेपाली कांग्रेसका सांसद गगन थापाले प्रधानमन्त्री केपी शर्मा ओलीलाई सोधेका करीव एक दर्जन प्रश्न सामाजिक संजालबाट सार्वजनिक गरेका छन् ।

संसद स्थगित भएको अवस्थामा प्रधानमन्त्रीलाई सोध्नु पर्ने प्रश्नहरु आफुले सामाजिक संजालबाटै सोधेको उनको भनाई छ । प्रधानमन्त्रीलाई सम्बोधन गर्दै लेखेको पत्रमा उनले कूल ११ प्रश्न सोधेका छन् ।

प्रधानमन्त्री ओलीले मंगलबार राष्ट्रका नाममा सम्बोधन गरेका थिए । प्रधानमन्त्रीकै सम्बोधनको सेरोफेरोमा रहेर सांसद थापाले बुधबार यी प्रश्न सार्वजनिक गरेका हुन् ।

संसद स्थगित भएको अवस्थामा आफूले प्रधानमन्त्रीलाई पत्रबाट नै प्रश्न राख्नुपरेको उनको भनाई रहेको छ । उनले कोरोनाभाइरस संक्रमण जोखिमसँग जुध्न सरकारको तयारी फितलो रहेको प्रतिक्रिया समेत दिएका छन् ।

परीक्षण किट गुणस्तरहीन भएको भन्दै उनले परीक्षणका लागि आवश्यक जनशक्ति, तालिम र सुरक्षाको तयारी के छ भनेर सोधेका छन् ।

दार्चुलापारि धार्चुलास्थित भारतीय भूमिमा नेपाली असुरक्षित रहेको भन्दै थापाले उनीहरुलाई नेपाल ल्याएर अनिवार्य क्वारेन्टाइनमा राख्नुपर्ने उल्लेख गरेका छन् ।

प्रधानमन्त्रीले सम्बोधनका क्रममा के सोचेर जीवन या वैयक्तिक स्वतन्त्रतामध्ये एक रोज्न आग्रह गरेको हो भन्नेबारे पनि थापाले प्रश्न गरेका छन्।

‘के वैयक्तिक स्वतन्त्रताविनाको जीवन कल्पना गर्न सकिएला ?,’ थापाको प्रश्न रहेको छ ।

थापाले विदेशमा रहेका नेपालीको अवस्थाबारे के भइरहेको छ भन्नेबारे पनि प्रश्न राखेका छ । कृषिको काममा भएका व्यवस्था, सुरक्षाकर्मीको सुरक्षाजस्ता विषयलाई समेत सांसद थापाले चासो दिएका छन् ।

काठमाडौं । शुक्रबार अपरान्ह एक समाचार भाइरल बन्यो । समाचार अनुसार पोखरामा एक कोरोना संक्रमित भेटिएको पुष्टी भएको थियो ।

उक्त समाचारलाई स्वास्थ्य तथा जनसंख्या मन्त्रालयले दिउसो नियमित प्रेस ब्रिफिंगका दौरान खारेज गरिदियो ।

स्वयम स्वास्थ्य मन्त्री र गण्डकी प्रदेशका प्रदेशस्तरीय कोरोना रोकथाम समितिका संयोजक मन्त्री किरण गुरुङले एकजनामा पोजेटिभ रिपोर्टको खबर संचारमाध्यमलाई टिपाएका थिए ।

तर, वास्तविकता खोतल्दै जाँदा प्रदेशमा स्थापना भएको ल्यावले पोजेटिभ देखाएको एक नमूनाका आधारमा समाचार बाहिरिएको थियो ।

त्यो रिपार्ट काठमाडौंको ल्यावले भने नेगेटिभ देखाएको छ । यसले प्रदेशस्तरमा बिस्तार गरिएका ल्यावको समेत विश्वसनीयता घटेको छ ।

पोखरामा भर्खरै स्थापना गरिएको प्रयोगशालाको मेसिनको बैधता र प्रक्रियाको कुरामा प्रवक्ता देवकोटाको समेत स्वीकारोक्ति थियो ।

कुनै केस शंकास्पद भयो भने त्यहाँ फेरि दोहोर्‍याएर हेर्ने गरिएको स्पष्टिकरण उनले दिए ।

प्रदेशमा ल्याब विस्तार गरेपनि त्यसले दिने विश्वसनीयता भने पुनः पुष्टी गर्नुपर्ने उनको भनाई छ ।

उता, गण्डकी प्रदेश मुख्यमन्त्री कार्यालयको आधिकारिक बेवसाइटमै कुल संक्रमितको संख्या ७ भनेर अपडेट गरिएको थियो । तर, केन्द्र सरकारले नेगेटिभ रिपोर्ट देखाएपछि उक्त अपडेट पनि सच्याइएको छ ।

काठमाडौं । प्रमुख प्रतिपक्षी दल नेपाली कांग्रेसले संकटको समयमा हुन सक्ने सम्भावित अनियमितताका काममा सतर्क रहन सचेत गराएको छ ।

कांग्रेस प्रवक्ता विश्‍वप्रकाश शर्माले मंगलबार अख्तियारका नाममा टुइटरमार्फत एक स्मृति पत्र लेखेका छन् । छोटो यस पत्रमा उनले संकटको बेलामा सहयोग गर्नु सबै दलको दायित्व भएको बताएका छन्।

तर, संकटका नाममा भ्रष्टाचारले भने उन्मुक्ति पाउन नहुने उनको भनाई छ । कोरोना रोकथाम गर्न चीनबाट ल्याएको स्वास्थ्य सामग्री खरिदमा अनियमितताको आरोप सरकारमाथि लागेको छ ।

यसै सन्दर्भमा कांग्रेसले यस्तो सचेत गराएको हो ।

यस्तो छ कांग्रेसको पत्र :

‘अख्तियारलाई स्मृति पत्र, संकटमा सरकारलाई साथ दिनु दल र नागरिकको दायित्वु,  तर साथ दिइरहँदा अनियमितता नोटिसमा लिन अख्तियारको दायित्व ध्यानाकर्षण। अहोरात्र जारी मेहनतलाई प्रोत्साहित गरौं, तर संकटको नाममा भ्रष्टाचारले उन्मुक्ति पाउनुहुन्‍न’

सरकारले भने यस खरीदमा अनियमितता नभएको स्पष्ट पारेको छ ।

काठमाडौं । लकडाउन तोडेर मानिसहरुले आवतजावत बढाएपछि प्रहरीले कडा कारवाहीको तयारी गरेको छ । आजबाट लकडाउन तोडेमा अब दुई घण्टा सडकमै उभिनु पर्ने भएको छ ।

दुई घण्टा सडकमा उभ्याएर प्रहरीले सडकमै कक्षा संचालन गर्ने भएको छ । भारतमा लकडाउन तोडेर निस्कनेमाथि प्रहरीले भाडा बर्साउने गरेको छ । तर, नेपालमा भने प्रहरीलाई सार्वजनिक स्थानमा भाटा हान्ने अधिकार छैन ।

सोहीकारण प्रहरीले सम्झाउने र कक्षा दिने गरिरहेको थियो । सोहीकारण लकडाउनलाई मानिसले सामान्य रुपमा लिएर निस्कने गरेका थिए ।

शनिबारबाट पक्राउ गर्न थालेको प्रहरील अब भने सडकमा उभ्याउने भएको छ । कोरोना भाइरसको जोखिम बढेपछि अत्यावश्यक कामबाहेक बाहिर ननिस्किन आह्वान गर्दै सरकारले लकडाउन घोषणा गरेको छ ।

आइतबार मात्र लकडाउन उल्लघंन गर्ने ६ सय भन्दा बढी व्यक्ति प्रहरीको फन्दामा परेका छन् । उनीहरुलाई दुई घण्टा सडकमा ‘होल्ड’ गरेर सचेतना कक्षा लिइएको प्रहरीले जनाएको छ ।

पक्राउ गरेर राख्दा जोखिम देखिएपछि प्रहरीले लकडाउन उलंघन गर्नेलाई जहाँ भेटिन्छ त्यहाँ उभ्याउने नीति लिएको हो । आइतबार बिहान ७ः३० बजेसम्म ५ सय १२ पुरुष र १ सय ५ महिला सडकमा निस्किएपछि समाएर सडकमै रोकिएको छ ।

यसअवधिमा १ सय सवारी साधन कारवाहीमा परेका छन् । यो नीति काठमाडौंका तीन जिल्लामा लागु भएको छ ।

काठमाडौं । सरकारले घोषणा गरेको लकडाउन उल्लंघन गर्नेहरु विरुद्ध प्रहरीले कडाई थालेको छ ।

कोरोना रोकथाम र नियन्त्रण गर्न सरकारले लागू गरेको लकडाउन उल्लंघन गर्नेविरुद्ध प्रहरीले कडाई थालेको हो । शनिबार एकाबिहानै प्रहरीले उपत्यकाबाट करीव १ सय ५० जनालाई पक्राउ गरेको छ ।

उनीहरु लकडाउन उल्लंघन गर्दै सडकमा हिँडिरहेका थिए । प्रहरीले अति आवश्यक काम नपरेसम्म सडकमा ननिस्कन आग्रह गरेको छ ।

तर, सर्वसाधारण भने अझै पनि अटेरी गरिरहेका छन् । शुक्रबार नेपालमा कोरोनाको चौथो संक्रमित फेला परिसकेका छन् ।

संक्रमण फैन नदिन सरकारले मानिसलाई घर भित्रै बस्न आग्रह गरेको छ । मंगलबारदेखि नेपालमा लकडाउन शुरु भएको हो । आज लकडाउनको पाँचौ दिन हो ।

काठमाडौं । प्रधानमन्त्री केपी शर्मा ओली मृगौला प्रत्यारोपण पछि घरमा आराम गरिरहेका छन् । कोरोना भाइरसको संक्रमणविरुद्ध उपप्रधानमन्त्री तथा रक्षामन्त्री इश्वर पोखरेल निकै सक्रिय छन् । उनले कुशलतापूर्वक जिम्मेवारी समेत बहन गरिरहेका छन् ।

जसले गर्दा प्रधानमन्त्रीलाई तुलनात्मक रुपमा बढी आराम गर्ने मौका मिलेको छ । बुधबार प्रधानमन्त्रीले ट्वीटमा आफ्नो उपस्थिति देखाए ।

सामाजिक सञ्जाल ट्विटरमार्फत प्रधानमन्त्री ओलीले नागरिकहरुलाई अर्को सूचना नआएसम्म घरमै सुरक्षित भएर बस्न आग्रह गरेका छन् ।

‘म पनि घरमै बसेर सरकार सञ्चालन गरिरहेको छु । तपाईँहरु पनि घरमै बस्नुहोस्,’ उनले भनेका छन् ।

सरकारले कोरोना भाइरस भाइरसविरुद्ध सतर्कतास्वरु मङ्गलबारबाट देशभर लकडाउन घोषणा गरेको छ ।

देशका विभिन्न स्थानमा लकडाउन तोडेको खबर आइरहँदा प्रधानमन्त्रीको सचेतनामुलक ट्वीट आएको हो ।

काठमाडौं । नेपालमा एक जनामा कोरोनाको पुष्टी भएसँगै देशभर आवागमन ठप्प बनाइने भएको छ । सरकारले सोमबारबाट लामो दूरीका सवारी साधन चलाउन नपाउने गरी रोक लगाएर कार्यान्वयनमा ल्याएको छ ।

यससँगै स्थानीय प्रशासनले पनि स्थानीय तहमा जिल्लाहरुमा आवागमन रोक्ने तयारी थालिसकेका छन् । नेपालका अधिकांश जिल्लाले मंगलबार बिहान १२ बजेबाट लागु हुने गरी जिल्लाहरुलाई लकडाउन घोषणा गरेका छन् ।

काठमाडौं उपत्यका बाट बाहिरिने र भित्रने सबै सबै सवारी साधनलाई रोक्ने तयारी गरिएको छ । राजधानीमा समेत मानिसको आवागमन बन्द गर्ने तयारी गरिएको छ ।

सोमबार नेपालमा थप एक जनामा कोरोनाको पुष्टी भएसँगै सरकारले आवागमन रोक्ने तयारी गरेको हो ।

स्थानीय तहहरुले भने पहाड र तराईमा आवागमन रोक्ने गरी धमाधम निर्णय गरिसकेका छन् । यसले कम्तिमा एक साता मुलुक ठप्प हुने देखिएको छ ।

यता, नेपाली सेनाले समेत आवश्यक परे लकडाउनको तयारीमा उत्रनु पर्ने भन्दै त्यसका लागि तयार रहन सबै निकायलाई सचेत गराइसकेको छ । लकडाउन कार्यान्वयनमा सेना समेत परिचालन हुन सक्छ ।

काठमाडौं । आजबाट नेपाल अन्तराष्ट्रिय समूदायसँगको सम्पर्कबाट  अलग भएको छ । आजबाट सरकारले हवाई र स्थल दुबै माध्यमबाट नेपाल प्रवेशमा पूर्णतया रोक लगाइएको छ ।

राती १२ बजेबाट हवाईजहाजहरु नेपाल आउन रोकिए । अब आकस्मिक उडानका जहाज बाहेक अन्य सबै जहाज नेपाल आउन पाउने छैनन् ।

स्थलमार्गमा समेत नेपालले प्रतिवन्ध लगाएको छ । खासगरी भारतमा कोरोनाको संक्रमण बढ्दै गएपछि सरकारले स्थलमार्गको प्रवेश समेत रोक्ने निर्णय गरेको हो ।

यसले कम्तिमा १० दिन अब नेपालमा कुनै पनि मुलुकबाट सबै नागरिकको प्रवेश बन्द हुने भएको हो । यस बीचमा नेपाली नागरिकसमेत नेपाल आउन पाउने छैनन् ।

विश्वव्यापी महामारीका रुपमा फैलिएको यस रोगको संक्रमणका कारण संसारभर १० हजार भन्दा बढी मानिसको ज्यान गएको छ ।

यसले ३ लाख भन्दा बढी मानिस प्रभावित बनेका छन् । यद्दपी कोरोनाको संक्रमण नेपालमा भने भित्रिसकेको छैन ।

एक जिल्लादेखि अर्को जिल्लासम्म जाने सवारी साधन रोकिए पनि एउटै शहर भित्रको आवतजावत भने रोकिएको छैन ।