Category: डायस्पोरा

काठमाडौं । अमेरिकाको विदेश मन्त्रालयमा बाघ संरक्षणमा नेपालले गरेका कामबारे चर्चा भएको छ । वन तथा वातावरण मन्त्रालयबाट भएको सचिवस्तरीय भ्रमणमा नेपालले बाघ संरक्षणमा गरेका अन्तर्राष्ट्रिय प्रतिबद्धता र कामको बारेमा छलफल भएको सचिव प्रेमनारायण कँडेललाई उदृत गदै स्थानीय संचारमाध्यमले जनाएका छन् ।

सचिव कँडेल, राष्ट्रिय निकुञ्ज तथा वन्यजन्तु संरक्षण विभागका महानिर्देशक रामचन्द्र कँडेल र राष्ट्रिय प्रकृति संरक्षण कोषका सदस्यसचिव शरद अधिकारीसहितको टोलीसँग बिहीबार उपसहायक विदेशमन्त्री केली केईडेर्लिङ र कार्यकारी सहायक विदेशमन्त्री जोन ई थम्पसनले बाघ संरक्षणको बारेमा नेपालले गरिरहेको कामको प्रशंसा गरेका थिए ।

भेटमा नेपाली प्रतिनिमण्डल टोलीले प्रतिबद्धता अनुसार नेपालले बाघको संख्या दोब्बर बनाउने उद्देश्य नजिक रहेको बताएको थियो । उक्त भेटमा अमेरिकी अधिकारीहरुले एमसीसीको बारेमा समेत चर्चा गरेका थिए । एमसीसी वन क्षेत्र, जैविक विविधता, जलवायु परिवर्तन, वातावरणसँग पनि सम्बन्धित भएको उल्लेख गरेका थिए । एमसीसी परियोजनाले नेपालको ऊर्जा तथा क्लिन इनर्जीको क्षेत्रमा पनि सहयोग गर्ने अमेरिकी अधिकारीहरुले बताएको एनटीएनसीका सदस्य सचिव शरद अधिकारीले बताए ।

जलवायु परिवर्तन र जैविक विविधता सम्बन्धी विविध सहयोग नेपाललाई आवश्यक पर्ने भन्दै अमेरिकी अधिकारीहरु सकरात्मक भएको सचिव कँडेलको भनाइ थियो । भेटमा अन्तर्राष्ट्रिय स्तरमा नेपालले जलवायु परिवर्तनको विषयमा गरेका प्रतिबद्धताको बारेमा प्रशंसा गरेका थिए । नेपाली प्रतिनिधिमण्डल टोलीले जोन ई थम्पसनलाई बाघको प्रतिमा दिँदै संरक्षण गर्न आग्रह गरेको थियो ।

काठमाडौं । गैरआवासीय नेपाली संघ (एनआरएनए) का नवनिर्वाचित पदाधिकारी बधाई ग्रहण गर्न मंगलबार नेकपा माओवादी केन्द्रका अध्यक्ष पुष्पकमल दाहाल प्रचण्ड निवास पुगेका छन् । प्रचण्ड निवास खुमलटार पुगेका नवनिर्वाचित पदाधिकारीलाई उनले बधाइ तथा कार्यकालको शुभकामना व्यक्त गरे । प्रचण्डको निजी सचिवालयका अनुसार प्रचण्डले आफ्नो निवासमा आएका समूहतर्फ नै बहुमत संस्थापक भएकाले आधिकारिकता पाउने समेत दावी गरे ।अप्ठयारोमा पनि नेतृत्व क्षमता देखाएको भन्दै प्रचण्डले उनीहरुको प्रसंसा गरेका छन् ।

‘यो एनआएनएको होइन, यो नेपाली जनताको एकतालाई तपाईहरुले दिएको सन्देश हो,’ उनले भने, ‘अप्ठ्यारोको बीचबाट पनि नेपालीहरुले बाटो पहिल्याउन सक्छन् भन्ने एकता र क्षमताको सन्देश छ यसमा । नेपालीहरुले अप्ठ्यारोको बीचमा पनि नेतृत्व क्षमता राख्छन् भन्ने सन्देश यसमा छ ।’ भेटका अवसरमा चैतको १२ र १३ गते सम्पन्न विश्व सम्मलेलनले लिएका प्रतिवद्धताबारे पनि छलफल भएको प्रचण्डको सचिवालयले उल्लेख गरेको छ ।

काठमाडौं । बहुक्षेत्रीय प्राविधिक तथा आर्थिक सहयोगका लागि बंगालको प्रयास (बिमस्टेक)को सम्मेलनमा सहभागी हुन परराष्ट्र मन्त्री नारायण खड्का श्रीलंकाको राजधानी कोलोम्बो पुगेका छन्। मन्त्री खड्का मंगलबार हुने बिमस्टेकका परराष्ट्र मन्त्रीस्तरीय बैठकमा सहभागी हुने कार्यक्रम रहेको मन्त्रालयले जनाएको छ । बैठकमा श्रीलंकासहित बंगलादेश, भारत, भुटान, नेपाल र थाइल्यान्डका मन्त्रीहरू सहभागी छन् । म्यानमारका विदेश मन्त्री भर्चुअल रूपमा सहभागी हुने बताइएको छ । सोमबार कोलोम्बोमा बिमस्टेक उच्च अधिकारीहरूको बैठक भएको थियो।

उक्त बैठकमा नेपाली टोलीको नेतृत्व परराष्ट्र मन्त्रालयका सहसचिव घनश्याम भण्डारीले गरे । श्रीलंकामा बुधबार बिमस्टेकको पाँचौं शिखर सम्मेलन हुँदैछ। राष्ट्रपति गोटवाया राजापाक्षेले अध्यक्षता गर्ने शिखर सम्मेलनमा सदस्य राष्ट्रका सरकार र राष्ट्रप्रमुख भर्चुअल्ली सहभागी हुने भएका छन् । नेपालका प्रधानमन्त्री शेरबहादुर देउवाले पनि शिखर सम्मेलनमा भिडियोका माध्यमबाट सम्बोधन गर्ने कार्यक्रम छ।

काठमाडौं (रासस) । नेपालको बाह्य सम्बन्ध १७५ देशमा विस्तार भएको छ । नेपाल र गणतन्त्र दक्षिण सुडानबीच कूटनीतिक सम्बन्ध स्थापना भएसँगै नेपालसँग द्विपक्षीय कूटनीतिक सम्बन्ध कायम भएका देशको संख्या १७५ पुगेको हो । द्विपक्षीय कूटनीतिक सम्बन्ध स्थापना गर्नेसम्बन्धी संयुक्त विज्ञप्तिमा संयुक्त राष्ट्रसंघका लागि नेपालका राजदूत अमृतबहादुर राई र उक्त विश्व संस्थाका लागि गणतन्त्र दक्षिण सुडानका राजदूत अकुएई बोना मालवालले न्यूयोर्कस्थित संयुक्त राष्ट्रसंघका लागि नेपालको स्थायी नियोगमा सोमबार आयोजित संक्षिप्त समारोहमा हस्ताक्षर गरे ।

दुवै राजदूतले संयुक्त राष्ट्रसंघका महासचिव एन्टोनियो गुटेरेसलाई दुई देशबीचको कूटनीतिक सम्बन्ध स्थापनाबारे जानकारी गराउने संयुक्त पत्रमा पनि हस्ताक्षर गरेको न्यूयोर्कस्थित संयुक्त राष्ट्रसंघका लागि नेपालको स्थायी नियोगले जनाएको छ ।

त्यस अवसरमा दुवै राजदूतले राष्ट्रिय तथा बहुपक्षीय परिवेशमा विशेषगरी संयुक्त राष्ट्रसंघका मञ्चहरूमा दुई देशको आपसी हितका लागि द्विपक्षीय सहयोगलाई सुदृढ पार्न साझा हितका विभिन्न विषयमा विचार आदान–प्रदान गरेका थिए । उनीहरूले दक्षिण सुडानको चलिरहेको शान्ति प्रक्रियाको सन्दर्भमा द्वन्द्वबाट शान्तितर्फको सङ्क्रमणकाललाई कसरी सफल बनाउन सकिन्छ भन्नेबारे पनि छलफल गरेका थिए ।

राजदूत राईले दक्षिण सुडानमा शान्ति स्थापना गर्न स्वदेशमा भएको शान्ति प्रक्रियामा आफ्नो अनुभव साझा गर्न नेपाल इच्छुक रहेको बताएका थिए । नेपालले दक्षिण सुडानमा संयुक्त राष्ट्रसंघीय शान्ति कार्यका लागि एक हजार ८०० नेपाली शान्ति सैनिक तैनाथ गरी दक्षिण सुडानको शान्ति र स्थायित्वका लागि योगदान पुर्याउँदै आएको छ ।

पूर्वी–मध्य अफ्रिकामा अवस्थित दक्षिण सुडान ९ जुलाई २०११ मा सुडानबाट स्वतन्त्र भएको हो । नेपाल र दक्षिण सुडान दुवै अल्पविकसित देशहरूको समूह, भूपरिवेष्टित विकासशील देशहरूका साथै समूह ७७ र चीनका सदस्य हुन् । दक्षिण सुडान १४ जुलाई २०११ मा संयुक्त राष्ट्रसंघको १९३औं सदस्यका रूपमा सामेल भएको उक्त विश्व संगठनको कान्छो सदस्य देश हो ।

काठमाडौं । नेपालको तीन दिने औपचारिक भ्रमणमा आउन लागेका चिनियाँ विदेश मन्त्री वाङ यी अहिले पाकिस्तान पुगेका छन् । भारतीय संचारमाध्यमहरुका अनुसार पाकिस्तानमा प्रधानमन्त्री इमरान खानको सरकारविरुद्ध अविश्वासको प्रस्ताव आएको समयमा उनी पाकिस्तान पुगेका छन् । उनी बिहीबार भारत जाने कार्यक्रम रहेको छ । त्यहाँबाट उनी शुक्रबार नेपाल आउने छन् । परराष्ट्र मन्त्रालयका अनुसार भ्रमणका क्रममा यीले द्वीपक्षीय औपचारिक वार्तासँगै महत्वपूर्ण राजनीतिक भेटघाट गर्ने कार्यक्रम रहेको छ ।

यो भ्रमणबारे भारतीय सरकारको तर्फबाट भने कुनै पनि खबर नबाहिरिएको त्यहाँका संचारमाध्यमले बताएका छन् । नयाँदिल्लीमा वाङले भारतीय समकक्षी एस जयशंकरसँग भेट्नेछन् । विदेश मन्त्री वाङ सोमबार पाकिस्तान पुगेका हुन् । विदेश मन्त्री वाङ यी शुक्रबार साँझ काठमाडौं आउने छन् । उनी शनिबार दिनभर व्यस्त रहने छन् । आइतबार स्वदेश फर्कने छन् ।

काठमाडौं । नेपाल र कतारबीच श्रम सम्झौता नवीकरण गर्ने सहमति जुटेको छ । दुई देशबीच कार्यदलस्तरमा छलफल गरी तयार परिने मस्यौदालाई छिट्टै अन्तिम रूप दिने र नेपालमा हस्ताक्षर समारोह आयोजना गर्ने विषयमा दुवै देशका श्रममन्त्रीबीच सहमति भएको हो । कतार भ्रमणमा रहेका श्रम, रोजगार तथा सामाजिक सुरक्षामन्त्री कृष्णकुमार श्रेष्ठ र कतारका श्रममन्त्री डा. अल विन समिख अल मारीबीच सो सहमति भएको हो ।

भेटमा श्रममन्त्री श्रेष्ठले नेपाल र कतारबीच श्रम सम्झौता नवीकरणका लागि नेपाल सरकारले पठाएको मस्यौदाबारे डा. मारीलाई जानकारी गराएका थिए । श्रेष्ठले डा. मारीलाई हस्ताक्षर समारोहमा उपस्थितिका लागि नेपाल आउन निमन्त्रणा समेत गरेका छन् । गत मङ्सिरमा काठमाडौँमा भएको नेपाल–कतार संयुक्त समितिको चौथो बैठकमा भएका निर्णय कार्यान्वयनबारे पनि सो अवसरमा छलफल भएको थियो ।

नेपाल–कतार संयुक्त समितिको चौथो बैठकमा सन् २००५ मा भएको श्रम सम्झौता पुनरवलोकन गर्ने सहमति भएको थियो । कतारमा काम गरेर फर्केका नेपालीको आर्थिक सामाजिक पुनः एकीकरणमा सघाउन नेपालले प्रस्ताव गरेको छ । नेपालबाट लैजाने श्रमिकको दक्षता वृद्धिका लागि कतार सरकारले नेपालका सातवटै प्रदेशमा तालिम केन्द्र स्थापना गर्न सहयोग गर्ने जनाएको थियो ।

भेटवार्तामा श्रमिकको सामाजिक सुरक्षाको प्रत्याभूति गर्ने, कार्यस्थलमा सुरक्षा, स्वास्थ्य र बीमाको व्यवस्था, सामाजिक सुरक्षामा सहभागितालगायतका विषयमा पनि छलफल भएको जनाइएको छ । मन्त्री मारीले कतारमा आयोजना हुने विश्वकपमा नेपाली श्रमिक ल्याउन इच्छुक रहेको बताए ।

काठमाडौं । गैरआवासीय नेपाली सङ्घ (एनआरएनए) को चैत १० र ११ गते गर्ने भनिएको चुनावसम्बन्धी काम तत्काल नगर्न उच्च अदालत पाटनले अल्पकालीन अन्तरिम आदेश दिएको छ । न्यायाधीश दुर्गाबहादुर विश्वकर्माको इजलासले सोमवार नेपालको संविधानअनुसार स्वच्छ प्रतिस्पर्धात्मकरूपमा चुनावमा भाग लिन पाउने अधिकारबाट वञ्चित हुने आशङ्का देखिएको उल्लेख गर्दै यस्तो आदेश गरेको छ ।

अदालतले चैत ९ गते दुवै पक्षलाई बोलाएर छलफल गर्ने तय गरेको छ । यो आदेशसँगै सङ्घको यही चैत १० र ११ गते गर्ने भनिएको चुनाव अदालतको अर्को आदेश नआएसम्मका लागि स्थगित भएको हो । सङ्घको संस्थापन पक्षले एकपक्षीयरूफमा चुनाव गराउन लागको भन्दै चिन्तामणि सापकोटा र उमेशकुमार पुडासैनीले अदालतमा रिट निवेदन दायर गरेका थिए ।

काठमाडौं । परराष्ट्र मन्त्री नारायण खड्का १६ चैतमा श्रीलङ्का भ्रमणमा जाने भएका छन् । पाँचौं बिमस्टेक शिखर सम्मेलनमा भाग लिन परराष्ट्रमन्त्री खड्का श्रीलङ्का जान ल ागेका हुन् । आइतबार बसेको मन्त्रिपरिषद् बैठकको निर्णय सार्वजनिक गर्दै सरकारका प्रवक्ता एवं सञ्चारमन्त्री ज्ञानेन्द्रबहादुर कार्कीले परराष्ट्रमन्त्री खड्का र परराष्ट्र मन्त्रालयका सचिव भरतराज पौड्यालसहित नेपाली प्रतिनिधिमण्डल श्रीलङ्का जाने जानकारी गराएका हुन् ।

मन्त्रिपरिषद् बैठकले श्रीलंका जाने प्रतिनिधिमण्डल गठन गर्ने निर्णय गरेको छ । बिमस्टेक वडापत्रलगायत दस्तावेजमा नेपालका तर्फबाट हस्ताक्षर गर्न स्वीकृत दिने निर्णय गरेको सरकारका प्रवक्ता कार्कीले जानकारी गराए । प्रवक्ता कार्कीका अनुसार बिमस्टेक बैठकमा प्रधानमन्त्री शेरबहादुर देउवाले भर्चुअल रुपमा सम्बोधन गर्ने कार्यक्रम छ ।

काठमाडौं । नेकपा एमालेका चार जना नेताहरु आज चीनको बेइजिङ जाँदैछन् । एमाले नेताहरुका अनुसार उपाध्यक्ष विष्णु पौडेलसहित चार जना नेता आज चीनको बेइजिङ जान लागेका हुन् । पौडेलको साथमा नेताहरू काशीनाथ अधिकारी, पुष्प कँडेल, मीना रखाल समेत टोलीमा समावेश छन् । चिनियाँ कम्युनिष्ट पार्टीको विदेश विभागको निमन्त्रणामा पौडेलसहित नेताहरू चीन जान लागेका हुन्।

उनीहरूले चिनियाँ विदेश विभागका प्रमुखसँग भेटवार्ता गर्ने भएका छन् । पौडेलसहित नेताहरू पाँच दिन चीनमा रहने भएका छन् । नेपालमा चिनियाँ विदेशमन्त्री वाङ यीको भ्रमणको पूर्वसन्ध्यामा हुन लागेको यो भ्रमणलाई चासोका साथ हेरिएको छ । कोरोना भाइरसको महामारीपछि नेपाल र चीन दुबैतर्फबाट उच्चस्तरीय भ्रमण हुन सकेको छैन ।

काठमाडौं । राष्ट्रपति विद्यादेवी भण्डारीले डा. शंकरप्रसाद शर्मालाई भारतका लागि नेपाली राजदूतमा नियुक्त गरेकी छिन् । संविधानको धारा २८२ बमोजिम राष्ट्रपति भण्डारीले शर्मालाई भारतका लागि आवासीय राजदूत नियुक्त गरेको राष्ट्रपतिको कार्यालयले उल्लेख गरेको छ । सरकारले गत कात्तिक ११ मा सिफारिस गरेका शर्माको संसदीय सुनुवाइ मंसिर २२ मा गरिएको थियो ।

संसदीय सुनुवाइ समितिले नाम अनुमोदन गरेपछि मंसिर २४ मा परराष्ट्र मन्त्रालयले भारतलाई सहमतिका लागि पत्र पठाएको हो । भारतले तीन महिनापछि सहमति (एग्रिमो) पठाएपछि शर्माको नियुक्ति ढिलो भएको हो । डा. शर्मासँगै सिफारिस भएका ज्ञानचन्द्र आचार्य बेलायत र श्रीधर खत्री अमेरिकाका लागि यसअघि नै राजदूतमा नियुक्त भई कार्यस्थलमा खटिएका छन् ।

यूएई । श्रम, रोजगार तथा सामाजिक सुरक्षामन्त्री कृष्णकुमार श्रेष्ठ विभिन्न तीन मुलुकको भ्रमणका क्रममा संयुक्त अरब इमिरेट्स यूएई पुगेका छन् । सो मुलुकमा मंगलबार नेपाल र संयुक्त अरब इमिरेट्स यूएईको संयुक्त समिति बैठक बस्दैछ । आबुधाबीमा बस्ने बैठकको उद्घाटन सत्रलाई मन्त्री श्रेष्ठले सम्बोधन गर्ने मन्त्रालयले जनाएको छ । कार्यक्रममा यूएईका मानव संसाधन मन्त्री डा. अब्दुलरहमान अब्दुलमानन अल अवारले समेत सम्बोधन गर्नेछन् । उद्घाटन सत्रपछि सुरु हुने प्राविधिक समूहको बैठकमा नेपाली प्रतिनिधिमण्डलको नेतृत्व मन्त्रालयका सहसचिव राजीव पोखरेलले गर्ने कार्यक्रम छ ।

बैठकमा नेपाल र संयुक्त अरब इमिरेट्सबीच सन् २०१९ मा भएको श्रम सम्झौता कार्यान्वयनबारे समीक्षा हुनेछ । बैठकमा वैदेशिक रोजगारीका लागि यूएई जाने नेपाली श्रमिकको सामाजिक सुरक्षा, कार्यस्थल सुरक्षा, स्वास्थ्य र बीमाको व्यवस्था, सिप विकास, पारिश्रमिक वृद्धि लगायतका विषयमा पनि छलफल हुने मन्त्रालयले जनाएको छ । पर्यटन भिसामा आएर अलपत्र परेका नेपालीको समस्या समाधानबारे पनि छलफल हुने बताइएको छ । मन्त्री श्रेष्ठ नेतृत्वको टोली सोमबार यूएईको राजधानी आबुधाबी पुगेको हो । श्रममन्त्री श्रेष्ठ र यूएईका समकक्षी डा अब्दुलरहमान अब्दुलमानन अल अवारबीच भेटवार्ताको समेत कार्यक्रम छ ।