Category: मनोरञ्जन

काठमाडौं । नजिकिएको नेपालीहरुको दोस्रो महान चाड तिहारमा फूलको माग स्वदेशी उत्पादनले थेग्न नसक्ने भएको छ । सोहीकारण तिहारका लागि यस वर्ष पनि ५० हजारभन्दा बढी सयपत्री फूलको माला आयात हुने भएको छ । राससका अनुसार फूलको माग बढे पनि स्वदेशी उत्पादनको मात्रा बढ्न नसक्दा उक्त परिणामको माला आयात गर्नुपरेको हो । बेमौसमी अविरल वर्षाका कारण टिप्ने बेलामा फूल नष्ट भएकाले भारतबाट फूलको माला आयात गर्ने तयारी छ । नेपालमा हरेक वर्ष १५ देखि २० प्रतिशतका दरले फूलको माग बढ्दै गएको तथ्याङ्क छ ।

उत्पादन क्षमता गुणात्मक वृद्धि भए अन्य देशको भर पर्नु नपर्ने व्यवसायी बताउँछन् । गत वर्षको तिहारमा भारतबाट दुई लाख सयपत्री माला ल्याइएको थियो । फ्लोरिकल्चर एसोसिएसन नेपालका अध्यक्ष मीनबहादुर तामाङका अनुसार फूल लगाउने समय फागुनदेखि साउनसम्म रहेको र उक्त समयमा कोरोना भाइरस सङ्क्रमण जोखिम कारण व्यवसायीले लगानी गर्न सकेका थिएनन्, जसको असर फूल उत्पादनमा पनि देखिएको छ ।

यस वर्षको तिहारमा १८ लाख ५० हजार मालाको माग छ । तीमध्ये १५ लाख ५० हजार सयपत्री र तीन लाख मखमली एवम् गोदावरी फूलको माला रहेका छन् । माग बढी र अन्यत्रबाट गत वर्षभन्दा बढी फूल आयात गर्नुपर्ने भएकाले यस वर्ष मूल्यमा वृद्धि हुने बताइएको छ । एक मिटर सयपत्री फूलको मालाको मूल्य ६० देखि ७० रुपैयाँसम्म पर्नेछ । यस वर्ष विगत दुई वर्षको तुलनामा १५ प्रतिशत फूलको माग बढी छ । भारतबाट ल्याइने फूल तिहार सुरु हुन तीन दिन बाँकी रहँदा नेपाल आइपुग्नेछ ।

काठमाडौं । दशैंको चौथो दिन आज कुष्माण्डा देवीको पूजा गरि मनाइदैछ । कुष्माण्डा देवीलाई शुभकर्म थालनी वा सृष्टिको प्रतीकका रुपमा मानिन्छ । देवीमा तातो रक्तसमूह भएका मानव, चराचरुङ्गी तथा चिसो रगत भएका माछा, सर्प लगायतका सारा प्राणीको सिर्जना गर्ने शक्ति रहेको शास्त्रमा उल्लेख छ । कुष्माण्डाको लौकिक अर्थ कुभिण्डो हो । उष्ण हावापानीको प्रकृतिमा हुर्किने तर भित्री गुण शीतल हुने फल कुभिण्डोलाई कुष्माण्डा देवीको प्रतीक मानेर दशैंमा यसको पूजाआजा गर्ने चलन छ ।

त्यसैले शक्तिपीठ तथा देवी मन्दिरहरुमा कुभिण्डोको विधिपूर्वक पूजा गरी त्यसैको बलिसमेत चढाउने गरिन्छ । कुष्माण्डाले ब्रह्माण्डको सृष्टि गरी पृथ्वी रचनाका लागि सूर्यलाई आफ्नो तापशक्ति दिएर प्रज्ज्वलित बनाएको र अन्य ग्रहको समेत रचना गरी पूरै सौरमण्डल सञ्चालन गरेको देवीभागवत् लगायतका ग्रन्थहरुमा उल्लेख छ ।

घटस्थापनाको दिनदेखि नवरात्रसम्म दूर्गादेवीका नौ रुपको पूजा गरिन्छ । पहिलो दिन शैलपुत्री, दोस्रो दिन ब्रह्मचारिणी, तेस्रो दिन चन्द्रघण्टा, चौथो दिन कुष्माण्डा, पाँचौं दिन स्कन्दमाता, छैटौं दिन कात्यायनी, सातौं दिन कालरात्रि, आठौं दिन महागौरी र नवौं दिन सिद्धिदात्रीको पूजाराधना गर्ने गरिन्छ । दुर्गाका यी नौ रुपलाई नवदूर्गा पनि भन्ने गरिन्छ । नवरात्रभर शक्तिपीठहरुमा पूजा गर्नेहरुको घुइँचो लाग्ने गर्दछ ।

काठमाडौं । बडा दशैंको आज दोस्रो दिन आज देशभर ब्रह्मचारिणी देवीको पूजा गरिँदै छ । शक्तिपीठ तथा दशैं घरहरुमा देवीको पूजा गरिन्छ । आश्विन शुक्ल प्रतिपदादेखि सुरु भएको दशैं पूर्णिमासम्म परम्पराअनुसार दुर्गा भवानीको पूजा आरधाना गरी हर्षोल्लासका साथ मनाउने प्रचलन रहेको छ । दशैंको पहिलो दिन घटस्थापनामा शैलपुत्री देवीको पूजापाठ गरिन्छ ।

राजधानीका तलेजु भवानी, गुह्वेरी, दक्षिणकाली, कालिकास्थान, मैतीदेवी, इन्द्रायणी, विजेश्वरी, शोभाभगवती, नक्साल भगवती र भद्रकालीमा दर्शनार्थीहरुको भिड लाग्छ । दाङको अम्बिकेश्वरी, सप्तरीको छिन्नमस्ता, धरानको दन्तकाली, पोखराको विन्धवासिनी, डोटीको शैलेश्वरी, बाग्लुङको कालिका, गोरखाको मनकामना लगायतका मन्दिरमा समेत पूजा गर्न हजारैं मानिस पुग्ने गर्छन् ।

काठमाडौं । सत्तारुढ दल नेपाली काँग्रेसले हरेक वर्ष दशैं, दीपावली र छठको अवसरमा कोजाग्रत पूर्णिमाका दिन आयोजना गर्दै आएको चियापान समारोह यस पटक पनि नगर्ने भएको छ । गत वर्ष समेत कोरोनाका कारण चियापान आयोजना भएको थिएन । बिहीबार काँग्रेसको केन्द्रीय कार्यालयका मुख्य सचिव कृष्णप्रसाद पौडेलद्धारा जारी एक विज्ञप्तिमा कोरोना महामारीबाट बच्न सबैले उच्च सतर्कता अप्नाउन आग्रह गरिएको छ ।

नेपाली कांग्रेसका सभापति शेरबहादुर देउवाको नेतृत्वमा रहेको सरकारले खोपको व्यापक प्रबन्ध गरे पश्चात महामारीको त्रास र आकार घट्दै गएपनि जोखिमलाई नजरअन्दाज गर्न नमिल्ने समेत विज्ञप्तीमा उल्लेख छ । खोप अभियान सफल बनाउन जुट्नु र जनताको जीवन रक्षामा समर्पित रहनु सबैको कर्तव्य भएको भन्दै महामारीमाथि विजय हासिल गर्न चांडै नै सफल हुने विश्वास समेत लिइएको विज्ञप्तीमा उल्लेख छ । ‘नेपाली कांग्रेस बडा दशै, तिहार, नेपाल सम्वत् र छठपर्वको हार्दिक मंगलमय शुभकामना व्यक्त गर्दछ ।’, काँग्रेसद्धारा जारी विज्ञप्तीमा उल्लेख छ ।

काठमाडौं । बलिउडका केही चर्चित कलाकारहरु यतिबेला काठमाडौंमा छन् । फिल्म ‘उँचाई’को छायांकनका दौरान बलिउडका चर्चित अनुहारहरु यतिबेला काठमाडौं आइपुगेका हुन् । अभिनेत्री परिणीति चोपडा, अभिनेता अनुपम खेर र बोमन इरानी काठमाडौं आएका छन् । उनीहरुमध्ये अनुपम खेर पशुपतिनाथ दर्शनमा पुगेका छन् । उनले यो भूमिमा आउँदा आफुले शान्ती प्राप्त गर्ने बताएका छन् । यो फिल्मलाई बलिउडका नाम चलेका निर्देशक सूरज बडजात्याले निर्देशन गरिरेहका छन् ।

‘मैने प्यार किया’, ‘हम आपके है कौन’, ‘विवाह’, ‘प्रेम रतन धन पायो’, ‘हम साथ साथ है’सहितका फिल्म उनले निर्देशन गरिसकेका छन् । नेपालबाट फिल्म ‘उंचाई’को छायांकन सुरु गरिँदै छ । फिल्म छायांकन ४० दिनमा सकाउने लक्ष्य छ । फिल्ममा अमिताभ बच्चन, बोमन ईरानी, अनुपम खेर र डेनी डेन्जोपाको प्रमुख भूमिका रहनेछ । फिल्मको छायांकन कुन कुन स्थानमा हुनेछ भन्ने चाँही खुलाइएको छैन ।

काठमाडौं । जारी आरोहण सिजनमा मनास्लु हिमालमा सर्वाधिक आरोही पुगेका छन् । करीव ५ सय आरोही विभिन्न क्याम्पमा रहेको समयमा शुक्रबार चुचुरोसम्म डोरी पुगेको छ । शुक्रबार विहान पाँच जना शेर्पा गाइडको टोलीले चुचुरोसम्म डोरी टाँगेर बाटो बनाएको हो । सेभेन समिट ट्रेकका अनुसार आरोही गाइड सोना शेर्पाको नेतृत्वमा निमाटासी शेर्पा, तेन्जिङ ग्याल्जेन शेर्पा, फुरा तेन्जिङ शेर्पा, पासाङ नुर्वु शेर्पा र टासी शेर्पाले बाटो निर्माण सम्पन्न गरी आधारशिविर फर्केको छ ।

मनास्लु आरोहणका लागि मात्र १७१ जना विदेशी आरोही आएका छन् । शनिबार बाट भने आरोाहण शुरु भएको छ । आज बिहानै दुई भारतीयले सफल आरोहण गरेको कम्पनीले जनाएको छ । आजबाट धमाधम थप आरोहण हुने समेत कम्पनीले जनाएको छ । शरद ऋतुमा सगरमाथा बाहेकका हिमालमा भिड लाग्छ । यो सिजन सगरमाथा आरोहण भने कठिन मानिन्छ । सामान्यतया सगरमाथाको आरोहणमा जाने तयारीमा रहेका आरोहीले यो सिजन अन्य हिमाल चढेर अनुभव लिने गर्छन् ।

काठमाडौं । हरेक वर्ष आश्विन सङ्क्रान्तिका दिन मनाइने विश्वकर्मा पूजा आज देशभर पूजा आराधनासहित मनाइँदैछ । विभिन्न कलकारखानामा विश्वकर्मा भगवानको बालुवाको मूर्ति वा तस्वीरमा विधिपूर्वक पूजा आराधना गर्ने प्रचलन रहेको छ । यो दिनमा घरमा रहेका हातहतियारको समेत पूजा गरिन्छ । कृषकले कृषि औजारको पूजा गर्छन् । कलकारखानालाई विशेषरूपमा सजाएर मजदुरलाई समेत सहभागी गराएर यो दिवस मनाउने गरिन्छ । बालुवा वा अन्य चीजबाट बनाइएको विश्वकर्माको मूर्ति विभिन्न नदीमा सेलाउने गरिन्छ ।

आज उपयोगमा आउने विभिन्न औजार, सवारी साधनको समेत पूजा गर्ने प्रचलन रहेको छ । द्वापरयुगमा भगवान् कृष्णलाई राक्षसले दुःख दिएपछि विश्वकर्माले समुद्रको बीचमा ‘भेद द्वारका’ बनाई लुकाएको धार्मिक विश्वास छ । एकै रातमा समुद्रको बीचमा ‘भेद द्वारका’ को निर्माण गरेकाले विश्वकर्मालाई सफल वास्तुविद्का रूपमा मानी त्यसै समयदेखि पूजाआजा गर्ने परम्परा बसेको मान्यता छ ।

प्राचीन भारत वर्षका चार दिशाका रक्षक देवतामध्ये द्वारकालाई पश्चिम दिशाको रक्षकका रूपमा समेत मानिन्छ । विश्वकर्माले निर्माण गरेको ‘भेद द्वारका’ अहिले पनि भारतको गुजरात राज्यमा समुद्रका बीचमा रहेको विश्वास गरिन्छ । विश्वकर्मालाई वास्तु विद्याका विशिष्ट ज्ञाताका रूपमा समेत मानिन्छ । विश्वकर्मा प्रकाश नामक वास्तु शास्त्रको ग्रन्थ उनले नै तयार पारेको विश्वास गरिन्छ ।

काठमाडौं । नेपालीको महत्वपूर्ण चाडबाड नजिकिएका छन् । यसले भिडभाड बढ्ने र कोरोना भाइरसको संक्रमण फैलने जोखिम रहेको छ । सरकारले यस परिस्थितिमा कोरोना संक्रमण कायमै रहेको भन्दै चाडपर्वमा स्वास्थ्य मापदण्ड पूर्ण रुपमा पालना गर्न भनेको छ । जिल्ला प्रशासन कार्यालयले बिहीबार एक आदेश जारी गरि चाडपर्वमा धेरै जना जम्मा नहुन र चाडपर्वलाई सांकेतिक रुपमा मात्रै मनाउन भनेको हो ।

प्रशासनले असोज एक गतेबाट लागू हुने गरी जारी गरेको निषेध आदेशमा सार्वजनिक स्थानमा भीडभाड नगर्न, सभा, जुलुस, जात्रा, महोत्सव, भोज आदि नगर्न, नगराउन आदेश दिएको छ । उपत्यकामा शैक्षिक संस्थाले भौतिकरुपमा पठनपाठन गर्न नपाउने भनिए पनि यदि गर्नै परेका खण्डमा नेपाल सरकारले जारी गरेको स्मार्ट लकडाउनको प्रावधान भित्र रही स्थानीय तहले जिल्ला कोभिड–१९ संकट व्यवस्थापन केन्द्र (डिसिसिएमसी) सँगको समन्वयमा सञ्चालनको निर्णय गर्नसक्ने आदेशमा उल्लेख छ । यसरी गर्दा सञ्चालनको विवरण र ढाँचा तयार पार्नुपर्ने भएको छ ।

स्वास्थ्य सुरक्षाका सबै मापदण्ड पूरा गरी आर्थिक गतिविधिलगायत क्रियाकलाप सञ्चालन गर्न सक्नेगरी यसअघि नै आदेश जारी गरिएको थियो । आदेशमा अनावश्यकरुपमा मानिस जम्मा हुन, भीडभाड गर्न, सभा, जुलुस गर्न, जात्रा महोत्सव तथा भोज आदि गर्नरगराउन नपाउने उल्लेख छ ।

आदेशानुसार स्थानीय ढुवानी बिहान ९ देखि ११ र बेलुका ४ देखि ७ सम्म सञ्चालन गर्न भने पाइने छैन । सार्वजनिक एवं निजी निर्माण कार्यका लागि ढुवानीका साधन बेलुका ९ बजेदेखि बिहान ५ बजेसम्म मात्र सञ्चालन गर्न पाइनेछ । सर्वसाधारण व्यक्ति, समूह तथा संस्थालगायत निकायबाट आर्थिक, सामाजिक एवं व्यावसायिक गतिविधि सञ्चालन गर्दा नेपाल सरकारले तोकेको स्वास्थ्य मापदण्ड पूर्णरुपमा पालना गर्नुपर्ने काठमाडौँ प्रशासनले जनाएको छ ।

स्वास्थ्य मापदण्ड र स्मार्ट लकडाउनका सबै प्रोटोकल पालना गरी भिडभाड नगरी सबै व्यवसाय सञ्चालन गर्न दिने निर्णय भएको यसअघिको आदेशलाई कायमै राखिएको छ । यस अवधिमा पर्ने चाडपर्वसमेत स्वास्थ्य मापदण्डको पूर्ण पालना गरी न्यूनतम सहभागितामा साङ्केतिकरुपमा मात्र मनाउन भनिएको छ । आदेशको नियमित अनुगमन हुने र मापदण्ड पालना नगरेको पाइएमा कारवाही गरिने चेतावनीसमेत दिइएको छ ।

पोखरा । पोखरामा सबै प्रकारका पर्यटकीय गतिविधि शुरु भएको छ । बैशाख तेस्रो सातादेखि पोखरामा जारी भएको लकडाउन अब पूर्ण रुपमा खुलेको हो । जिल्ला कोभिड– १९ व्यवस्थापन समितिको मंगलबार बसेको बैठकले असोज १ गतेदेखि लकडाउन खुलाउने निर्णय गरेको हो। यससँगै पोखराका स्कुल, होटल, रेष्टुरेण्ट, क्लब, दोहोरी साँझ, डान्सबारलगायत सबै गतिविधि खुलाउने निर्णय भएको हो । जेठ अन्तिम सातादेखि लकडाउन खुकुलो भएपनि स्कुल र रात्रिकालीन व्यवसाय खुलेका थिएनन्।

पछिल्ला दिनमा कोरोना भाइरसको संक्रमण र मृत्युदर घटेका कारण लकडाउन खुला गर्ने निर्णय गरिएको जिल्ला प्रशासन कार्यालयको भनाई छ । प्रमुख जिल्ला अधिकारी गौतमले बुधबार साँझ आदेश जारी गरि लकडाउन खुला गरिए पनि सरकारले जारी गरेको स्वास्थ्य तथा सुरक्षा मापदण्ड भने पूर्ण रुपमा पालना गर्न भनेका छन् ।

यसअघि साँझ ८ बजेसम्म मात्र खुला गरिएको बजार अब थप समयसम्म खोल्न पाइने भएको छ। बुधबार जारी गरेको आदेशमा पोखराका होटल तथा रेष्टुरेण्ट राति साढे ११ बजेसम्म खोल्न पाइने उल्लेख छ। डान्सबार, क्लब, दोहोरी साँझ जस्ता रात्रिकालीन व्यवसाय राति साढे १ बजेसम्म संचालन गर्न पाइने भएको छ ।

तनहुँ । टिकटक बनाउने क्रममा सेती नदीमा खसेर तनहुँमा एक युवति वेपत्ता भएकी छिन् । प्रहरीका अनुसार घटना मङ्गलवार भएको हो । जिल्लाको शुक्लागण्डकी नगरपालिका ८ लालिमकी १९ वर्षीया पवित्रा लम्साल बेपत्ता भएको इलाका प्रहरी कार्यालय बेल चौताराले जनाएको छ । शुक्लागण्डकी नगरपालिका ८ पुलचोकमा रहेको सेती नदी किनारमा रहेको रक गार्डेनमा टिकटक बनाउने क्रममा उनी खसेर बेपत्ता भएकी हुन् ।

आफ्ना दुई साथीसँग घुम्नका लागि पुलचोक गएकी लम्साल नदीमा खसेर बेपत्ता भएपछि स्थानीयवासी र नेपाल प्रहरी खोजीमा जुटेका थिए । घुम्ने क्रममा साथीहरूसँग टिकटक बनाउन नदी छेउमा रहेको ढुङ्गामा उभिएकी लम्साल अचानक चिप्लिएर नदीमा खसेको साथीहरुले बताएका छन् । त्यसपछि साथीहरुले प्रहरीलाई खबर गरेका थिए ।

काठमाडौं । आज भाद्र शुक्ल पञ्चमी, देशभर ऋषिपञ्चमी पर्व मनाइँदैछ । हिन्दु नारीले अरुन्धतीसहित सप्तऋषिको पूजा आराधना गरी यो पर्व मनाउँछन् । आजबाट तीज पर्व समेत समाप्त हुने छ । महिलाले आज बिहानै उठेर नित्य कर्म गरी नजिकको नदी, खोला, ताल, तलैया र पोखरीमा गई ३६५ वटा दत्तिवनले दाँत माझ्ने, गाईको गोबर, माटो एवं खरानी लगाई स्नान गर्ने प्रचलन रहेको छ ।

हरितालिका (तीज) को व्रत एवं पूजाआजा महिला पुरुष दुवैले गर्ने शास्त्रीय वचन रहे पनि ऋषिपञ्चमी भने महिलाका लागि मात्र गर्नुपर्ने शास्त्रीय वर्णन छ । रजस्वलाका समयमा छाईछुईलगायत कुनै त्रुटि भएको भए आज ऋषिपञ्चमीको दिन अरुन्धतीसहित सप्तऋषिको पूजा गर्नाले त्यसबाट मुक्ति पाइने धार्मिक विश्वास रहेको छ ।

स्नान गरेपछि अरुन्धतीसहित अत्रि, गौतम, भारद्वाज, जमदग्नि, वशिष्ठ, कश्यप र विश्वामित्रको पूजा गर्ने गरिन्छ । यसलाई ऋषिपञ्चमीको पूजा लगाउने भनिन्छ । सप्तऋषिको पूजा गर्ने पञ्चमी भएकैले आजको पञ्चमीलाई ऋषिपञ्चमी भन्ने गरिएको हो ।आज स्नान गरी पूजा आजा गरेपछि नरोपी उम्रेका अन्न सामा, कागुनो, कन्दमूल र कर्कला आदि खाई एक छाक हविष्य बस्नुपर्ने व्रतविधि छ । राससका अनुसार आज काठमाडौँको टेकु, मूलपानीलगायत मुलुकभरका ऋषेश्वर मन्दिरमा पूजाआजाका लागि श्रद्धालु महिला भक्तजनको भीड लाग्छ ।