Category: फिचर

काठमाडौं । निर्वाचन आयोगले नागरिक उन्मुक्ति पार्टीका अध्यक्ष रेशम चौधरीलाई वैधानिकता दिन अस्वीकार गरेको छ ।

आयोगको बिहीबारको बैठकले चौधरीलाई अध्यक्ष चयन गरेको अधिवेशन नै अवैधानिक ठहर गर्दै गर्दै रञ्जीता श्रेष्ठ चौधरीलगायत पुरानै कार्यसमितिलाई मान्यता दिएको हो ।

टीकापुर घटनामा जन्मकैद सजाय पाई आममाफी पाएका चौधरीले आफू नेतृत्वको कमिटी अद्यावधिक गर्न माघको अन्तिम साता आयोगसमक्ष निवेदन दिएका थिए ।

गएको पुस २७ गते कैलालीको टीकापुरमा भएको पार्टीको पहिलो महाधिवेशनबाट चौधरी अध्यक्षमा निर्वाचित भएका थिए । त्यसअघि, पार्टी अध्यक्ष रेशमपत्नी रञ्जीता श्रेष्ठ थिइन् ।

काठमाडौं । नयाँ गठबन्धनको ‍आयुबारे शंका गरेका कांग्रेसका प्रमुख सचेतक रमेश लेखकलाई एमालेका उपाध्यक्ष विष्णु पौडेलले इतिहास सेलरोटी जस्तो नघुम्ने बताएका छन् ।

प्रतिनिधिसभाको बिहीबारको बैठकमा बोल्दै उनले इतिहास कहिल्यै पनि सेलरोटी जस्तो घुम्दैन। इतिहास स्प्रिङ जस्तो घुम्ने भन्दै जवाफ फर्काएका हुन् ।

उनले हिजो आफूहरूले जे गरेका थियौं, अब पनि त्यही गर्छौं भनेर आशा नगर्न लेखकलाई आग्रह गरे। ‘अहिले सुरु भएको नयाँ सहयात्रा, यसले प्रतिनिधि सभाको यो कार्यकाल पूरा गर्नेछ’, उनले भने, ‘यो स्वार्थको लेनदेनमा आधारित सहयात्रा होइन।’

नयाँ सत्ता समीकरणलाई सहज र स्वभाविक परिघटनाका रुपमा लिन कांग्रेसलाई आग्रह गरे । ‘यो तहको पीडा, छटपटी, आक्रोश व्यक्त गर्न आवश्यक थिएन। यसलाई सहज र स्वाभाविक रुपमा लिनका लागि, संवैधानिक पहलका रुपमा लिन आग्रह गर्न चाहन्छु,’ उनले भने।

‘कांग्रेसलाई कति गहिरो पीडा र घाउ लागेको रहेछ भन्ने कांग्रेस नेताले व्यक्त गर्नुभयो’, पौडेलले भने, ‘तर यो अहिलेको जुन सहयात्रा आरम्भ भएको छ। यो संवैधानिक प्रबन्धअन्तर्गत चालिएको काम हो। त्यसकारण यसलाई सहज, स्वभाविक कदमको रूपमा लिऔं। बेचैनीले कोही कसैलाई कहीँ पुर्‍याउँदैन।’

काठमाडौं । प्रमुख प्रतिपक्षी दल नेपाली कांग्रेसले नयाँ सत्ता समीकरण बनेसँगै मुलुक अस्थिरतातर्फ गएको बताएको छ।

प्रतिनिधिसभाको बिहीबारको बैठकमा सम्बोधन गर्दै नेपाली कांग्रेसका प्रमुख सचेतक रमेश लेखकले प्रचण्डले विश्वासघात गरेर जनमतको अपमान गरेको बताए।

‘गठबन्धन भत्काउने भनेको यो कांग्रेसमाथि होइन, यो जनमतको पनि घोर अपमान हो। गठबन्धनमा भएका प्रतिवद्धता एकातिर छ, गठबन्धनका तर्फ नै अविश्वास व्यक्त भएर गतिविधि अघि बढे,’ उनले भने। ‘मुलुकमा दिगो शान्ति, सुशासन,संविधानको रक्षा विकास र समृद्धि प्राप्त गर्ने राजनीतिकलाई स्थिरता साथ अगाडि बढाउने हाम्राबीच सहमति भएका थिए।

प्रचण्डजीले गठबन्धनको मूल्य र मान्यतालाई भत्काएर गठबन्धनमा भएका सहमतिलाई तोडेर एकतर्फीरुपले अविश्वासनीयरुपले गठबन्धन तोड्नुभयो। त्यो हाम्रो ठहर हो,’उनले भने,’ निर्वाचनका समयमा नेपाली जनताका बीचमा बोलेका बाचाहरू, प्रतिज्ञाहरूलाई वेवास्ता गर्दा नेपाली कांग्रेसप्रति मात्रै विश्वासघात होइन यो संविधान संघीय लोकतान्त्रिक गणतान्त्रिक व्यवस्थाका विरुद्ध कुठराघात हो। यो जनमतको पनि घोर अपमान हो।’

कांग्रेस नेता लेखकले गठबन्धनका नाममा प्रधानमन्त्री प्रचण्ड आफ्नो जिम्मेवारीबाट भाग्न खोजेको आरोप लगाए। उनले भने,’जनताको जनमतको अपमान गर्दै कपोकल्पित कथा बुनेर,सानातिना मुद्दा उठाएर आफ्नो जिम्मेवारीबाट भाग्ने, गठबन्धनलाई भत्काउने र अविश्वसनीय काम गरेकाले यसलाई हामीले भन्नैपर्छ राजनीतिक बेइमानी हो।’

काठमाडौं । प्रधानमन्त्री पुष्पकमल दाहाल ‘प्रचण्ड’ले आफ्नो लक्ष्य सत्ता हुने नभई देशमा सुशासन, सामाजिक न्याय र समृद्धि कायम गर्ने रहेको बताएका छन् ।

संसद्मा उठेका महत्वपूर्ण विषयमा आज जवाफ दिँदै प्रधानमन्त्री प्रचण्डले गठबन्धनका सबै घटकका तर्फबाट आफू सुशासन कायम गर्ने कार्यमा प्रतिबद्ध रहेको बताएका हुन् ।

‘मलाई विश्वास छ, हामीले एकै ठाउँमा उभिएर शासनका लक्ष्यहरू हासिल गर्नेछौँ,’ प्रधानमन्त्री प्रचण्डले भने, ‘गठबन्धनका सबै घटकका तर्फबाट म सङ्कल्प गर्दछु, हाम्रो लक्ष्य सत्ता हुने छैन, सुशासन, सामाजिक न्याय र समृद्धि हुनेछ ।’

काठमाडौं । नेपाली कांग्रेसले प्रधानमन्त्री पुष्पकमल दाहाल ‘प्रचण्ड’ले राजनीतिक बेइमानी गरेको बताएको छ।

बिहीबार संसद भवनस्थित ल्होत्से हलमा बसेको पार्टीको संसदीय दलको बैठकले प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले राजनीतिक बेइमानी गरेको ठहर गर्दै सरकारलाई दिएको समर्थन फिर्ता लिएको हो।

प्रमुख सचेतक रमेश लेखकले भने, ‘प्रधानमन्त्री पुष्पकमल दाहालले विश्वासघात गर्नुभयो र गठबन्धन भत्काउनुभयो। यसलाई हामीले राजनीतिक बेइमानीका रुपमा ठहर गरेका छौं।’

प्रधानमन्त्री दाहालले गठबन्धन भत्काएर देशलाई अस्थिरतातिर धकेलेको कांग्रेसको आरोप छ। ‘अविश्वसनीय ढंगले गठबन्धन भत्काउनुभयो। गठबन्धन भत्काएर मुलुकलाई अस्थिरता, अन्योल, अनिश्चितातर्फ लैजाने काम गर्नुभयो,’ लेखकले भने।

लेखकले नेपाली कांग्रेसले अब संघीय संसदमा प्रमुख विपक्षी दलका हैसियतले रचनात्मक प्रतिपक्षको भुमिका निर्वाह गर्ने बताए।

पार्टीले संघीय संसदमा रहेका नेपाली काँग्रेसका सम्पूर्ण सदस्यहरुलाई संसदमा देश र जनताका हीतमा प्रभावकारी रुपले प्रश्तुत हुन र रचनात्मक प्रतिपक्षको भुमिका निर्वाह गर्न निर्देशनसमेत दिएको छ ।

काठमाडौं । नेपाली कांग्रेसका सभापति शेरबहादुर देउवाले मधेश केन्द्रित तीन वटा दलका अध्यक्षहरूसँग बूढानिलकण्ठमा छलफल गरेका छन्।

देउवा निवास बुढानीलकण्ठमा लोसपा अध्यक्ष महन्थ ठाकुर, जनमत पार्टीका अध्यक्ष डा. सीके राउत र नागरिक उन्मुक्ति पार्टीका अध्यक्ष रेशम चौधरी लगायतका नेताहरु छलफलमा गरेका हुन् ।

छलफलमा कांग्रेस उपसभापति पूर्णबहादुर खड्का, महामन्त्री गगन थापा र नेता शेखर कोइराला पनि सहभागी छन्। सभापति देउवाले बुधबार बिहान कोटेश्वर पुगेर नेकपा एकीकृत समाजवादीका अध्यक्ष माधवकुमार नेपालसँग छलफल गरेका थिए।

काठमाडौं । राष्ट्रिय स्वतन्त्र पार्टीले चार मन्त्रालय पाउने टुंगिएसँगै सरकारमा सहभागी हुने मन्त्रीहरूको टुंगो लगाएको छ ।

रास्वपाबाट सभापति रवि लामिछानेले सरकारमा नेतृत्व गर्नेछन् । उनी गृहमन्त्री बन्ने भएका छन् । श्रममा उपसभापति डीपी अर्याल, युवा तथा खेलकुदमा विराजभक्त श्रेष्ठ र शिक्षामा सुमना श्रेष्ठलाई पठाउने निर्णय गरेको हो ।

काठमाडौं । लुम्बिनी प्रदेशका मुख्यमन्त्री डिल्लीबहादुर चौधरीले प्रदेश सरकारमा सहभागी माओवादी केन्द्रका दुई जना मन्त्रीलाई बर्खास्त गरेका छन् ।

मुख्यमन्त्री चौधरीले माओवादीबाट मन्त्री बनेका धनबहादुर मास्की र कृष्णा केसीलाई बर्खास्त गरेका हुन् । मास्कीले अर्थ तथा केसीले शहरी विकास मन्त्रालयको जिम्मेवारी सम्हाल्दै आएका थिए ।

केन्द्रमा सत्ता समीकरण फेरिएसँगै चौधरीले माओवादीका मन्त्रीहरूलाई बर्खास्त गरेका हुन् । मुख्यमन्त्रीले मन्त्रीहरूलाई बर्खास्त गरेसँगै माओवादी केन्द्रले प्रदेश सरकारलाई दिएको समर्थन फिर्ता लिएको छ ।