Category: फिचर

काठमाडौं । प्रधानमन्त्री पुष्पकमल दाहाल प्रचण्डले दुई महिनामै दोस्रो पटक विश्वासको मत पाएका छन् । २७५ सांसद रहेका प्रतिनिधि सभामा सहभागी २६२ प्रधानमन्त्रीको पक्षमा १७२ मत पाएका हुन् । विपक्षमा ८९ मत परेको छ । नेमकिपा तटस्थ बस्यो।

नेकपा एमालेसहित राप्रपाले सरकारलाई दिएको आफ्नो समर्थन फिर्ता लिएसँगै विश्वासको मत लिएका थिए ।

प्रधानमन्त्रीलाई माओवादीसहित कांग्रेस, राष्ट्रिय स्वतन्त्र पार्टी, जनता समाजवादी पार्टी, (जसपा), नेकपा एकीकृत समाजवादी, जनमत, नागरिक उन्मुक्ति, लोकतान्त्रिक समाजवादी पार्टी (लोसपा), राष्ट्रिय जनमोर्चा, आम जनता पार्टीले विश्वासको मत दिएका हुन्।

कुल २७५ सदस्यीय संसद्बाट विश्वास पाउन प्रधानमन्त्रीलाई १३८ मत चाहिन्छ ।

गएको पुस १० गते प्रधानमन्त्री बनेका प्रचण्डले पुस २६ गते २६८ सांसदबाट विश्वासको मत पाएका थिए ।

काठमाडौं । प्रधानमन्त्री पुष्पकमल दाहाल प्रचण्डले दुई महिनामै दोस्रो पटक विश्वासको मत माग्दा केही असहज महसुस भएको बताएका छन् ।

प्रतिनिधिसभामा विश्वासको मत मागेपछि उठेको प्रश्नको जवाफ दिँदै उनले भने, ‘केही न केही सहज महसुस भएको छैन ।

छलफलमा उनले भने ‘म अलिअलि सोझो सोझो छु क्या,’ प्रधानमन्त्री प्रचण्डले भने,’मैले संसद् विघटन गरेको ठिक छ भनेर केपीजीले भनेपछि म त्यही दिन अब भंग हुने भयो भन्ने अवस्थामा पुगेको थिएँ । त्यसपछि कांग्रेससँग मेरो लभ परिहाल्यो, प्रधानमन्त्री भन्दा पनि एजेन्डाको लागि ।’

काठमाडौं । राष्ट्रपति तथा उपराष्ट्रपति निर्वाचनपछि रिक्त भएको तनहुँ- १ र बारा – २ मा पनि आगामी वैशाख १० गते नै उपनिर्वाचन हुने भएको छ ।

वैशाख १० गते बिहान ७ बजेदेखि साँझ ५ बजेसम्म मतदान हुने गरी समय समेत निर्धारण गरिएको निर्वाचन आयोगका सहायक प्रवक्ता सूर्यप्रसाद अर्यालले जनाएका छन् ।

४ मंसिरमा भएको प्रतिनिधिसभाको निर्वाचनमा तनहुँ १ बाट रामचन्द्र पौडेल र बारा २ बाट निर्वाचित जसपाका रामसहायप्रसाद यादव प्रतिनिधिसभा सदस्यमा निर्वाचित भएका थिए । तर, फागुन २५ मा तनहुँ १ बाट निर्वाचित सांसद पौडेल राष्ट्रपति र बारा २ बाट निर्वाचित सांसद यादव उपराष्ट्रपतिमा निर्वाचित भएपछि यी दुई क्षेत्रमा उपनिर्वाचन हुन लागेको हो ।

नेपालको संविधानको धारा ६२ को उपधारा (६) र धारा ६७ को उपधारा (३) मा निर्वाचन, मनोनयन वा नियुक्ति हुने राजनीतिक पदमा बहाल रहको व्यक्ति राष्ट्रपति वा उपराष्ट्रपति पदमा निर्वाचित भएमा निजको त्यस्तो पद स्वतः रिक्त हुने व्यवस्थाबमोजिम उपनिर्वाचन हुन लागेको हो ।

२०७९ चैत १६ गते उपनिर्वाचन प्रयोजनको निम्ति आयोगबाट स्वीकृत अन्तिम मतदाता नामावली प्रकाशन, चैत १८ गते निर्वाचन अधिकृतको कार्यालय स्थापना, चैत २० गते उम्मेदवारको मनोनयन दर्ता र चैत २३ गते उम्मेदवारको अन्तिम नामावली प्रकाशन गरी निर्वाचन चिह्न प्रदान गरिने आयोगले जनाएको छ ।

काठमाडौं । जनमत पार्टीका अध्यक्ष डा. चन्द्रकान्त (सीके) राउतले आफ्नो पार्टीले प्रधानमन्त्री पुष्पकमल दाहाल ‘प्रचण्ड’लाई विश्वासको मत दिने बताएका छन् ।

प्रधानमन्त्री प्रचण्डले विश्वासको मत लिनेसम्बन्धी प्रस्तावमाथिको छलफलमा सोमवार भाग लिँदै राउतले दाहालबाट लोकतन्त्र, संघीयता र गणतन्त्रलाई रक्षा हुने आशा गर्दै विश्वासको मत दिएको बताए ।

‘हामीले उहाँलाई विश्वासको मत दिने निर्णय गरेका छौं । केही असन्तुष्टिहरू हामीसँग छन्, तर त्यसलाई समाधान गर्न सकिन्छ । सानो कुरामा विश्वासको मत फिर्ता लिनुपर्छ भन्ने छैन,’ राउतले भने ।

नेपालमा बाइसे चौबीसे राज्य भनेको संघीयता नै रहेको तर्क गर्दै राउतले पछिल्लो समय यसलाई पुनः स्थापित गर्न प्रधानमन्त्री प्रचण्डले महत्त्वपूर्ण भूमिका खेलेको बताए । उनले यसलाई बचाउन पनि प्रचण्डको भूमिका महत्त्वपूर्ण हुने बताए ।

‘आफैंले जन्माएको सन्तानको माया धेरै हुन्छ । त्यसैले दाहालसँग संघीयता लोकतन्त्र र गणतन्त्र रक्षा गर्ने अभिभारा छ,’ राउतले भने, ‘गणतन्त्र र संघीयताका लागि उहाँले त्याग र बलिदानी दिनुभएको छ । यसको रक्षा पनि उहाँले गर्नुहुनेछ ।’

काठमाडौं । नेकपा एकीकृत समाजवादीका अध्यक्ष माधवकुमार नेपालले एमाले अध्यक्ष केपी शर्मा ओलीप्रति लक्षित गर्दै किन कसैसँग सहकार्य गर्न सकेको भन्दै प्रश्न गरेका छन् ।

प्रधानमन्त्री पुष्पकमल दाहाल ‘प्रचण्ड’ले मागेको विश्वासको मतमाथिको छलफलमा भाग लिँदै नेता नेपालले आफ्नो कमजोरी सुधार नगर्ने नेताको कार्यशैलीका कारण अहिलेको राजनीतिक परिस्थिति उत्पन्न भएको बताए ।

‘प्रत्येक नेताले आफ्ना काम, व्यवहार र अभिव्यक्तिको समीक्षा गर्नुपर्छ, किन कसैसँगको सहकार्य हुन सकेको छैन ?’, नेपालले भने, ‘अहिलेको परिवेश उत्पन्न हुने कुरा पहिलो दोस्रो दिनमै आकलन गरेको थिएँ । राजनीतिको नाडी छामेरै यहाँसम्म आएका छौं ।’

काठमाडौं । राप्रपाले प्रधानमन्त्री पुष्पकमल दाहाल प्रचण्डलाई विश्वासको मत नदिने बताएको छ। प्रतिनिधि सभाको आजको बैठकमा अध्यक्ष राजेन्द्र लिङ्देनले गाउँका ड्राइभरसँग तुलना गरे ।

गाडी फेरिरहने गाउँका चालकसँग दाँज्दै लिङ्देनले प्रधानमन्त्रीलाई भाग्यमानीसमेत रहेको बताए।’जुहारी चलाउने धेरै मन छैन। भाग्यमानी प्रधानमन्त्री हुनुहुन्छ।

‘गाउँघरमा कहिलेकही यस्तो ड्राइभर भेटिन्छ कहिले कसको गाडी चलाइरहेको हुन्छ कहिले कसको। गाडी फेरिरहन्छ टिकाउ नै छैन के भन्छन् गाडी फेरिरहने ड्राइभरलाई नयाँ गाडी दिन योग्य हुन्छ कि हुँदैन?’

काठमाडौं । नेकपा एमालेका उपाध्यक्ष विष्णु पौडेलले प्रधानमन्त्री पुष्पकमल दाहाल प्रचण्डलाई विश्वासको मत नदिन सदनसमक्ष आग्रह गरेका छन्।

सोमबार प्रतिनिधि सभामा प्रधानमन्त्री प्रचण्डले विश्वासको मत लिने प्रस्ताव प्रस्तुत गरेपछि जारी छलफलमा बोल्दै एमाले उपाध्यक्ष विष्णु पौडेलले उक्त आग्रह गरेका हुन् ।

‘प्रस्तावको विपक्षमा नेकपा एमाले छ। जस्तो परिस्थितिमा उहाँ पुगेर विश्वासको मत माग्नु भयो, उहाँलाई विश्वासको मत दिने आधार छैन। एमालेमात्र होइन सबै सदस्यलाई प्रस्तावको विपक्षमा उभिन आग्रह गर्छु।’

आजको बैठकमा एमाले अध्यक्ष केपी शर्मा ओली पनि उपस्थित थिए।

पुस २६ मा पनि प्रधानमन्त्री प्रचण्डले विश्वासको मत लिएका थिए। त्यतबेला मतदानमा सहभागी २७० सांसदमध्ये प्रचण्डले २६८ मत पाएका थिए। विपक्षमा २ मत खसेको थियो।

काठमाडौं । नेपाली कांग्रेसका सभापति शेरबहादुर देउवाले गठबन्धनको संस्कृतिको विकल्प नभएको बताएका छन् ।

सोमबार प्रतिनिधिसभा बैठकमा प्रधानमन्त्रीको विश्वासको मतको प्रस्तावमाथि बोल्दै उनले संविधानको वर्तमान निर्वाचन प्रणालीले प्रतिनिधिसभामा एउटा मात्रै राजनीतिक दलको बहुमत आउने अवस्था नरहेकाले गठबन्धनको अभ्यास गर्नुपर्ने बताए ।

मुलुकको राजनीतिक सुनिश्चिता नै आवश्यक भएकाले कांग्रेसले यसअघि पनि विश्वासको मत दिएको बताए।

उनले भने, ‘हामी संसदमा प्रमुख प्रतिपक्षको रुपमा रहेर पनि प्रधानमन्त्रीको प्रस्तावको पक्षमा मतदान गरेका थियौं। त्यो राजनीतिक स्थिरताको लागि थियोस। मैले सुरुमै भनेको थिए संसदको सुरुमा नै संसदमा अस्थिरताको आवाज उठ्न थालेका छन्।

संसद अन्योलता र देश अनिश्चितातर्फ जाने सम्भावना बढेको छ। हामीले संसदको पुर्ण कार्यकालको सुनिश्चिताको लागि प्रधानमन्त्रीको प्रस्तावमा मतदान गरेका थियौं।’

सरकारले अब आरोप-प्रत्यारोपमा मात्रै नलागेर शान्ति प्रक्रियाका बाँकी काम टुंगोमा पुर्‍याउने, विकास निर्माण र सुशासनका काम गर्नुपर्ने देउवाको भनाइ छ । कांग्रेसले प्रधानमन्त्री दाहाललाई विश्वासको मत दिएर सरकारमा सहभागी हुनेसमेत बताए ।

काठमाडौं । प्रधानमन्त्री पुष्पकमल दाहालले फेरी विश्वासको मतका लागि यति छिटै आउन पर्ला जस्तो नलागेको बताएका छन्।

उनले सोमबार प्रतिनिधिसभाको रोष्टमा उभिएर विश्वासको मत माग्ने क्रममा यस्तो बताएका हुन्। सरकार अर्थतन्त्रको सुधार, सेवा प्रवाहमा सवलीकरणमा क्रियाशिल रहेको अवस्थामा फेरि मत लिनुपर्ने अवस्था आएको बताए ।

“फेरि यति छिट्टै विश्वासको मतका लागि संसद्सँग अनुरोध गर्ने अवस्था आउला भन्ने सोचेको थिइन् । राष्ट्रिय सहमतिको सरकार बनाएका थियौं,” उनले भने ।

‘प्रधानमन्त्री र उपप्रधानमन्त्रीहरुबीच मतभेद थिएन। क्याबिनेटका बैठकहरु पनि सौहार्दपूर्ण वातावरणमा भइरहेका थिए। सबैसँगको व्यक्ति सम्बन्ध पनि सौहार्दपूर्ण थियो। तर मैले राष्ट्रिय सहमतीमा राष्ट्रपति चयनका लागि मेरो प्रस्ताव पछि राप्रपा र एमालेका मन्त्रीहरुले राजिनामा दिनुभयो। र, विश्वासको मत पनि फिर्ता लिनुभयो’, उनले भने।

प्रधानमन्त्री दाहालले पहिलो पटक ११ पुस २०७९ मा विश्वासको मत लिएका थिए।

काठमाडौं । नवनिर्वाचित उपराष्ट्रपति रामसहायप्रसाद यादवले पद तथा गोपनीयताको शपथ लिएका छन् ।

सोमबार बिहान राष्ट्रपति भवन शीतल निवासमा विशेष कार्यक्रमकाबीच यादवले राष्ट्रपति रामचन्द्र पौडेलबाट शपथ खाएका हुन् ।

उनी जनता समाजवादी पार्टी (जसपा)बाट उम्मेदवार बनेका थिए । यादव चैत ३ गते उपराष्ट्रपति पदमा निर्वाचित भएका थिए ।

काठमाडौं । एमाले संसदीय दलको बैठकमा नेकपा एमाले अध्यक्ष केपी शर्मा ओलीले प्रधानमन्त्री पुष्पकमल दाहाल प्रचण्डलाई विश्वासको बताएका छन् ।

सोमबार नयाँ बानेश्वरमा बसेको संसदीय दलको बैठकले प्रचण्डलाई विश्वासको मत नदिने निर्णय गरेको हो। प्रचण्डले आज प्रतिनिधिसभामा विश्वासको मत लिँदैछन्।

काठमाडौं । प्रतिनिधिसभाको आजको बैठकमा प्रधानमन्त्री पुष्पकमल दाहाल प्रचण्डले सोमबार विश्वासको मत लिनेबारेमा जानकारी गराइएको छ ।

आइतबार बसेको प्रतिनिधिसभाको बैठकमा सभामुख देवराज घिमिरेले प्रधानमन्त्रीले विश्वासको मत लिनेबारेमा जानकारी गराएका हुन् ।

अहिले सम्म दलहरुको समर्थन हेर्दा उनले विश्वासको मत पाउने देखिन्छ । प्रचण्डले विश्वासको मत पाएपछि मात्र सरकारलाई पूर्णता दिने काम अघि बढाउने भनेका छन् ।

सत्ता साझेदार नेकपा एमालेले प्रचण्ड सरकारलाई दिएको समर्थन फिर्ता लिएपछि प्रधानमन्त्री प्रचण्डले दोस्रोपटक संसदबाट विश्वासको मत लिनुपर्ने भएको हो । गठबन्धन सरकारको साझेदार दलले समर्थन फिर्ता लिए सो गठबन्धन सरकारका प्रधानमन्त्रीले संसदबाट विश्वासको मत लिनुपर्ने संवैधानिक व्यवस्था छ ।

काठमाडौं । राहदानी विवादमा राष्ट्रिय स्वतन्त्र पार्टीका सभापति रवि लामिछानेविरूद्ध मुद्दा नचलाउने निर्णय सरकारी वकिलको कार्यालय काठमाडौंले गरेको छ।

जिल्ला प्रहरी परिसर काठमाडौंले दोहोरो राहदानीमा अनुसन्धान सकेर जिल्ला सरकारी वकिल कार्यालयमा मुद्दा चलाउनु नपर्ने रायसहितको प्रतिवेदन पठाएको थियो। प्रहरीको रायमा सहमति जनाउँदै जिल्ला सरकारी वकिलको कार्यालय काठमाडौंले फाइल उच्च सरकारी वकिल कार्यालयमा पठाइएको हो।

लामिछानेले सन् २०१५ मा लिएको ०८८३४८३८ नम्बरको राहदानी दुरूपयोग गरेको अध्यागमन विभागको रेकर्डबाट पनि नदेखिएको कुरालाई पहिलो आधार मानेको छ। दोस्रो आधार अमेरिकी नागरिक हुनुअघि उनी वंशजको आधारमा नेपाली नागरिक रहेको र विदेशी नभई गैरआवासीय व्यक्तिसरह रहेको मानेको छ।

काठमाडौं । एकीकृत समाजवादीको आइतबार बसेको केन्द्रीय सचिवालयको बैठकले महासचिवमा घनश्याम भूसाललाई मनोनित गरेको छ ।

हालसम्म महासचिव रहेका बेदुराम भूसाललाई भने उपाध्यक्ष मनोनित गरिएको छ । नेता भुसाल पुस २९ गते एकीकृत समाजवादीमा प्रवेश गरेका थिए। उनले प्रतिनिधि सभाको चुनावअघि नेकपा (एमाले) छोडेको घोषणा गरेका थिए।

काठमाडौं । राष्ट्रिय स्वतन्त्र पार्टीले पुष्पकमल दाहाल प्रचण्ड नेतृत्वको सरकारलाई विश्वासको मत दिने निर्णय गरेको छ ।

आज बसेको पार्टी संसदीय दल र केन्द्रीय समितिको संयुक्त बैठकले सो निर्णय लिएको हो । पार्टी सरकारमा सहभागी हुने विषयमा पनि लचक देखिएको छ ।

प्रधानमन्त्री प्रचण्डले सोमबार प्रतिनिधि सभामा विश्वासको मत लिँदै छन्।

रास्वपाले यसअघि पुस २६ गते प्रधानमन्त्री प्रचण्डलाई विश्वासको मत दिएको थियो। माघ २२ गते प्रचण्ड सरकारबाट बाहिरिएको रास्वपाले प्रधानमन्त्रीलाई दिएको विश्वासको मत भने कायम राखेको थियो।

प्रतिनिधि सभामा अहिले रास्वपाका १९ सांसद छन्। पुस १० गते बनेको तत्कालीन ७ दलीय गठबन्धन फागुन १२ गते भत्किएर नयाँ गठबन्धन बनेको थियो। ‍औपचारिक रूपमा रास्वपा नयाँ गठबन्धनमा सहभागी छैन।

प्रधानमन्त्री प्रचण्डलाई विश्वासको मत दिने निर्णय गरेसँगै रास्वपा फेरि सरकारमा सहभागी हुने सम्भावना छ।

काठमाडौं । नेपाली कांग्रेसको केन्द्रीय कार्यसम्पादन समितिको बैठकले संसदमा आजबाटै प्रतिपक्षी बेन्च नेकपा एमालेलाई छाड्ने निर्णय गरेको हो । सरकारमा जाने निर्णयसँगै प्रतिपक्षी छोड्न लागेको बैठकपछि प्रवक्ता प्रकाशशरण महतले बताए । । सोमबार प्रधानमन्त्री प्रचण्डले विश्वासको मत लिइसकेपछि सरकार विस्तारको प्रक्रिया अघि बढ्ने बताए । गठबन्धन दलका बीच हुने निर्णयका आधारमा पार्टीले मन्त्रीहरू पठाउने महतले बताए । ‘भोलि विश्वासको मत लिइसकेपछि तत्काल प्रक्रिया अघि बढ्छ । गठबन्धन दलबीच कुरा भइरहेको छ । मोटामोटी आकारबारे नेतृत्व तहले गृहकार्य गरिरहेको छ’, उनले पत्रकारहरूसँग भने ।

काठमाडौं । नेपाली कांग्रेसले पुष्पकमल दाहाल प्रचण्ड नेतृत्वको सरकारमा सहभागी हुने निर्णय गरेको छ ।

आइतबार आइतबार संसदभवनस्थित ल्होत्से हलमा बसेको कार्यसम्पादन समितिको बैठकले प्रधानमन्त्री पुष्पकमल दाहाल प्रचण्डलाई विश्वासको मत दिने र सरकारमा जाने निर्णय गरेको छ ।

बैठकमा पार्टी सभापति एवं संसदीय दलका नेता शेरबहादुर देउवा, उपसभापति पूर्णबहादुर खड्का, महामन्त्री गगनकुमार थपा, नेताहरू डा. शशांक कोइराला, रमेश लेखक, जीवन परियार, डा। नारायण खड्कालगायतका नेता उपस्थित रहेका थिए ।

काठमाडौं । नेपाली कांग्रेसको केन्द्रीय कार्यसम्पादन समिति र संसदीय दलको बैठक आज बस्दैछन् । नयाँ बानेश्वरस्थित संघीय संसद भवनको शंकर हलमा बिहान १०स्३० बजे केन्द्रीय कार्यसम्पादन समिति बैठक बस्नेछ। केन्द्रीय समिति बैठक तत्काल बोलाउन सम्भव नभएका बेला कांग्रेसले केन्द्रीय कार्यसम्पादन समिति बैठकबाट पनि महत्वपूर्ण निर्णय गर्दै आएको छ। कार्यसम्पादनमा पदाधिकारी, पूर्वपदाधिकारीलगायत सदस्य छन्।

यो बैठकमा पार्टी अहिलेसम्म प्रमुख प्रतिपक्षमा रहेकोले अबदेखि सरकारमा जाने निर्णय गर्ने बताइएको छ । संसदमा कांग्रेस प्रमुख प्रतिपक्षी रहिआएको र नेकपा एमालेले सरकार छाडेपछि प्रमुख प्रतिपक्षी भूमिका आफूहरूको भएको बताइरहेकोले सिट व्यवस्थापनमा समस्या भइरहेको थियो।

यही कारण संसद बैठक यसअघि स्थगितसमेत भएको थियो। कांग्रेसले प्रधानमन्त्री पुष्पकमल दाहाललाई विश्वासको मत दिने र सरकारमा जाने निर्णय गर्ने तयारी गरेको छ। गत पुस २६ मा प्रधानमन्त्री प्रचण्डलाई विश्वासको मत दिए पनि कांग्रेस प्रतिपक्षमै बसेको थियो।

यस्तै आज मध्याह्न १२ बजे बस्ने संसदीय दलको बैठकमा कांग्रेसले सरकारलाई विश्वासको मत दिने र प्रतिनिधि सभामा सांसदहरूले खेल्ने भूमिकाबारे छलफल गर्नेछ। प्रतिनिधि सभाको आज दिउँसो १ बजे बस्ने बैठकमा संक्रमणकालीन न्यायसँग सम्बन्धित विधेयक पेश गर्ने तयारी छ।

यसअघि शनिबार बालुवाटारमा बसेको १० दलीय बैठकले सत्य निरूपण तथा मेलमिलाप आयोग, बेपत्ता छानबिन आयोगसम्बन्धी ऐन संशोधन गर्न विधेयक प्रतिनिधि सभामा लैजानेबारे छलफल गरेको थियो। यी विधेयक संशोधनमाथि राप्रपालगायत दलहरूले फरक मत राख्दै आएका छन्। यसैबीच प्रधानमन्त्री दाहालले सोमबार प्रतिनिधि सभाबाट विश्वासको मत लिने तयारी गरेका छन्।