Category: फिचर

काठमाडौं । सरकारले बजेटको आकार घटाएको छ। अर्थमन्त्री जनार्दन शर्माले आव २०७८र७९ को बजेटको अर्धवार्षिक समीक्षा गर्दै बजेटको आकार संशोधन गरेका हुन् ।

खर्च हुन नसक्ने भएपछि शर्माले बिहीबार मन्त्रालयमा पत्रकार सम्मेलन गर्दै बजेट आकार ८६ अर्बले घटाएका हुन्। चालु बर्ष सरकराले १६ खर्ब ३२ अर्ब ८३ करोड रुपैयाँ बजेटको आकार तय गरेको थियो।

यसलाई १५ खर्ब ४६ अर्ब रुपैयाँमा झारिएको हो।

शर्माले भदौ अन्तिममा ल्याएको प्रतिस्थापन विधेयकमा १६ खर्ब ३२ अर्ब ८३ करोड रूपैयाँ विनियोजन गरेका थिए ।

त्यसअघि तत्कालीन अर्थमन्त्री विष्णुप्रसाद पौडेलले अध्यादेश बजेट ल्याउँदै चालु आवमा १६ खर्ब ४७ अर्ब ५७ करोड रूपैयाँ खर्च हुने अनुमान राखेका थिए ।

काठमाडौं । शेयर बजारको ओरालो यात्रा कायमै रहेको छ ।

साताको कारोबारको अन्तिम शेयर बजार मापक सूचक (नेप्से) ११.९६ अंकले घटेर २८०१.५६ विन्दुमा पुगेको छ । अघिल्लो दिन नेप्से २२ अंकले घटेको थियो ।

नेपाल स्टक एक्सचेन्जका अनुसार विहीवार २२३ कम्पनीको ३ अर्ब ८२ करोड ९५ लाख ३३ हजार ३४९ रुपैयाँ बराबरको ६९ लाख ५० हजार ८३८ कित्ता शेयर किनबेच भएका छन् ।

अघिल्लो दिनको तुलनामा कारोबार रकममा सुधार आएको छ । त्यसदिन ३ अर्ब ४७ करोड ११ लाख ९ हजार १८२ रुपैयाँ बराबरको कारोबार भएको थियो ।

आज कारोबारमा आएका १३ समूहको परिसूचक मध्ये १० राताम्मे भएको छ । भने ३ वटा समूह बढेको छ ।

नेप्सेका अनुसार कारोबार भएका कम्पनीहरु मध्ये नबिल इक्युटि फण्डको शेयरमूल्य भने बढेको छ ।

कारोबारको आधारमा आज सबैभन्दा बढी नेपाल दुरसञ्चार कम्पनीको भएको छ । यस कम्पनीको २५ करोड ४८ लाख भन्दा बढीको कारोबार भएको छ ।

नेशनल हाइड्रोपावरको २२ करोडको र आइएमई जनरल इन्सोरेन्सको १९ करोडको कारोबार भएको छ ।

त्यस्तै, मिथिला लघुवित्त वित्तीय संस्थाको शेयरमूल्यमा सर्वाधिक गिरावट आएको छ । यसको शेयरमूल्य ४ प्रतिशतले घटेको छ ।

काठमाडौं । नेपाल राष्ट्र बैंकले देशको वर्तमान आर्थिक तथा वित्तीय स्थिति सार्वजनिक गरेको छ ।

नेपाल राष्ट्र बैंकले बुधवार सार्वजनिक गरेको चालू आर्थिक वर्ष २०७८/०७९ को ६ महिनाको तथ्यांक अनुसार पुस महिनामा वार्षिक बिन्दुगत उपभोक्ता मुद्रास्फीति ५.६५ प्रतिशत रहेको छ ।

अघिल्लो वर्षको सोही महिनामा यस्तो मुद्रास्फीति ३.५६ प्रतिशत रहेको थियो ।

समीक्षा महिनामा खाद्य तथा पेय पदार्थ समूहको मुद्रास्फीति ४.९२ प्रतिशत र गैर–खाद्य तथा सेवा समूहको मुद्रास्फीति ६.२३ प्रतिशत रहेको छ ।

२०७७ पुसको तुलनामा २०७८ पुसमा घ्यू तथा तेल, यातायात, मदिराजन्य पेय पदार्थ, सुर्तीजन्य वस्तु र दाल तथा गेडागुडी उपसमूहको मूल्यवृद्धि क्रमशः २१.२२ प्रतिशत, १४.०७ प्रतिशत, ११.३७ प्रतिशत, १०.४८ प्रतिशत र ९.२२ प्रतिशत रहेको छ ।

समीक्षा महिनामा काठमाडौं उपत्यकामा ५.२८ प्रतिशत, तराईमा ६.१५ प्रतिशत, पहाडमा ५.३४ प्रतिशत र हिमालमा ५.२२ प्रतिशत मुद्रास्फीति रहेको छ ।

२०७७ पुसमा यी क्षेत्रहरुमा क्रमशः ३.५५ प्रतिशत, २.८७ प्रतिशत, ४.७२ प्रतिशत र ३.३८ प्रतिशत मुद्रास्फीति रहेको थियो । २०७८ पुसमा वार्षिक बिन्दुगत तलब तथा ज्यालादर सूचकाङ्क ५.७७ प्रतिशतले बढेको छ । अघिल्लो वर्षको सोही महिनामा उक्त सूचकाङ्क १.७२ प्रतिशतले बढेको थियो ।

समीक्षा महिनामा तलब सूचकाङ्क र ज्यालादर सूचकाङ्क क्रमशः ९.४४ प्रतिशत र ४.७३ प्रतिशतले बढेको छ ।

काठमाडौं । शेयर बजारको ओरालो यात्रा कायमै रहेको छ ।

साताको कारोबारको दोस्रो चौंथोदिन शेयर बजार मापक सूचक (नेप्से) २२.११ अंकले घटेर २८१३.४७ विन्दुमा पुगेको छ । अघिल्लो दिन नेप्से १६ अंकले घटेको थियो ।

नेपाल स्टक एक्सचेन्जका अनुसार बुधवार २२३ कम्पनीको ३ अर्ब ४७ करोड ११लाख ९ हजार १८२ रुपैयाँ बराबरको ६५ लाख २० हजार ६२८ कित्ता शेयर किनबेच भएका छन् ।

मंगलवार तुलनामा कारोबार रकममा भारी गिरावट आएको छ । त्यसदिन ६ अर्ब २८ करोड ७२ लाख १७ हजार ९८५ रुपैयाँ बराबरको कारोबार भएको थियो ।

आज कारोबारमा आएका १३ समूहको परिसूचक राताम्मे भएको छ । निर्जीवन बीमा समूह सबैभन्दा धेरै १.५४ प्रतिशतले घटेको छ । त्यस्तै, फाइनान्स, लगानी र व्यापार समूह पनि १ प्रतिशतले घटेको छ ।

दोहोरो अंकले घटेको बजारमा आज बुद्धभूमि हाइड्रोपावरको सेयर मूल्य सबैभन्दा धेरै ६.६४ प्रतिशतले घटेको छ ।

त्यसैगरी, नेपाल एसबीआई बैंकको डिबेञ्चर, नेपाल हाइड्रो डेभलपर, सप्तकोशी विकास बैंक र वीन नेपाल लघुवित्तको शेयर मूल्य ३ प्रतिशतभन्दा धेरैले घटेको छ ।

त्यस्तै, सामलिङ पावर, माउन्टेन इनर्जी, बुटवल पावर, गरुाँस लघुवित्त, छ्याङ्दी हाइड्रोपावर, स्वाभिमान लघुवित्त, जानकी फाइनान्ससहित डेढ दर्जन कम्पनीको शेयर मूलय २ प्रतिशतले घटेको छ ।

घट्दो बजारमा आज लिबर्टी इनर्जीको शेयर मूल्य सबैभन्दा धेरै ३.०४ प्रतिशतले बढेको छ ।

आज अरुण भ्याली हाइड्रोपावरको सर्वाधिक कारोबार भएको छ । यसको १८ करोड बढीको शेयर किनबेच भएको छ । त्यस्तै, नेपाल टेलिकम साढे १४ करोड र नेशनल हाइड्रो १४ करोड बढीको कारोबार हुँदै शीर्ष तीन कम्पनीमा रहे ।

काठमाडौं । पेट्रोलियम पदार्थमा भएको उच्च मूल्यवृद्धिबारे संसदीय समितिमा छानबिन हुने भएको छ । संसदको राज्यका निर्देशक सिद्धान्त, नीति र दायित्वको कार्यान्वयन, अनुगमन तथा मूल्यांकन समितिले पेट्रोलियम पदार्थको मूल्यवृद्धिबारे छानबिन गर्न सांसद दुर्गा पौडेलको संयोजकत्वमा उपसमिति गठन गरेको हो । सदस्यमा खेम लोहनी र लक्ष्मी परियार तोकिएका छन् ।

पेट्रोलियम पदार्थको मूल्यवृद्धि र त्यसको वैकल्पिक व्यवस्था गरेर जनतालाई राहत दिने गरी सरकारलाई आवश्यक सुझाव दिन उपसमिति गठन गरिएको समितिले जनाएको छ । समितिको मंगलबार बसेको बैठकमा सांसदहरुले आयातीत पेट्रोलियम पदार्थका कारण जनता मारमा परेको उल्लेख गर्दै त्यसबाट निकास दिन नेपालभित्र पेट्रोलियम पदार्थको अन्वेषणमा जोड दिए । सरकारले चर्को कर लिने भएकाले नेपालमा पेट्रोलियम पदार्थको मूल्य पनि बढी रहेको हो ।

काठमाडौं । नेपाल राष्ट्र बैंकले क्रिप्टोकरेन्सी तथा नेटवर्क मार्केटिङबाट हुने कारोबारका कारण राज्य र समग्र अर्थव्यवस्थामै चुनौती थपिएको बताएको छ । क्रिप्टोकरेन्सी तथा नेटवर्क मार्केटिङ सम्बन्धमा सर्वसाधारणलाई जानकारी दिन मंगलबार एक सामग्री सार्वजनिक गर्दै नेपाल राष्ट्र बैंकले यस्तो बताएको हो । खासगरि नेपालजस्ता सीमित पुँजी र स्वदेशी पुँजी विदेश लैजान बन्देज लगाइएका मुलुकमा क्रिप्टोकरेन्सीमार्फत पुँजी पलायन हुनबाट जोगाउनु मुख्य चुनौती रहेको राष्ट्र बैंकको निष्कर्ष छ ।

नेपालजस्तो वित्तीय साक्षरता कम भएका मुलुकमा वित्तीय सेवाका उपभोक्ताहरू असुरक्षित हुने बढी सम्भावना रहेको समेत केन्द्रिय बैंकले बताएको छ । नवीन प्रविधिको सहयोगमा क्रस बोर्डर रूपमा सञ्चालित नेटवर्क मार्केटिङ व्यवसायबाट अवैधानिक माध्यम वा हुण्डीमार्फत पैसा विदेसिने जोखिम रहेको समेत बताइएको छ । एकातिर स्वदेशबाटै पुँजी पलायन हुन सक्ने र अर्कोतिर विदेशमा रहेका नेपालीबाट नेपाल आउन सक्ने विप्रेषण विदेशमै लगानी हुन सक्ने भएकोले विदेशी मुद्राको सञ्चितिमा समेत नकारात्मक प्रभाव पर्न सक्ने राष्ट्र बैंकको भनाई छ ।

आईएमएफले २०२१ अक्टोबरमा जारी गरेको ग्लोबल फाइनान्सियल स्टाबिलिटी रिपोर्टमा समेत क्रिप्टोकरेन्सीलाई विश्वव्यापी वित्तीय स्थायित्वको तीन वटा प्रमुख चुनौतीमध्येको एक भनेर उल्लेख गरिएको राष्ट्र बैंकले स्मरण गराएको छ । राष्ट्र बैंकले क्रिप्टोकरेन्सी तथा यससँग सम्बन्धित कोषमा लगानी गर्ने तथा नेटवर्क मार्केटिङ आबद्ध हुने जस्ता क्रियाकलापमा युवा जनशक्ति आकर्षित हुन सक्ने भएकोले युवावस्थामै अवैधानिक आर्थिक क्रियाकलापमा संलग्न हुँदा व्यक्तिगत जीवन र मुलुकको आर्थिक सामाजिक व्यवस्थामा समेत नकारात्मक असर पर्ने भन्दै सचेत समेत गराएको छ ।