Category: फिचर

काठमाडौं । युक्रेनको विवादबारे टिप्पणी गरेका जर्मनीका नौसेना प्रमुखले राजीनामा गरेका छन्। के-खिम श्योनबाखले युक्रेनमाथि रुसले आक्रमण गर्न चाहेको भन्ने कुरा बकवास रहेको बताएका थिए। उनले रुसी राष्ट्रपति भ्लादिमीर पुटिनले मात्र सम्मान खोजेको समेत बताएका थिए । बीबीसीका अनुसार युक्रेनलाई अमेरिका र यूके सहितका अन्य केही राष्ट्रहरूले हातहतियार उपलब्ध गराएका छन्।

तर जर्मनीले भने हतियार उपलब्ध गराउन युक्रेनले गरेकोआग्रह अस्वीकार गरेको छ। पुटिनले पश्चिमा राष्ट्रहरूसमक्ष केही मागहरू अघि सारेका र यसमा रुसी सुरक्षा चासो समेटिएको उनले बताएका थिए । युक्रेनलाई सैन्य गठबन्धन उत्तर एटलान्टिक सन्धि सङ्गठन, नेटोको सदस्य बन्नबाट रोकिनुपर्ने रुसले माग गरेको छ। रुसमाथि प्रत्यक्ष सुरक्षा खतरा हुने भन्दै नेटोले पूर्वी युरोपमा सैन्य अभ्यास गर्न अनि हतियार पठाउन बन्द गर्नुपर्ने पुटिन चाहन्छन्।

शुक्रवार भारतमा एउटा थिङ्क ट्याङ्कले आयोजना गरेको छलफलमा आफ्नो विचार राख्ने क्रममा जर्मन नौसेना प्रमुखले त्यस्तो टिप्पणी गरेका थिए। भिडियोमा उनले पश्चिमा राष्ट्रहरूले पुटिनलाई समान रूपमा व्यवहार गर्न आवश्यक रहेको उल्लेख गरेका छन्। युक्रेनको विदेश मन्त्रालयले श्योनबाखको टिप्पणीलाई अस्वीकार्य भनेको थियो । शनिवार श्योनबाखले थप क्षति हुन नदिन आफ्नो पदबाट राजीनामा गरेको बताए ।

काबुल । अफगानिस्तानमा यात्रु चढेको एक मिनिबसमा विष्फोट हुँदा कम्तिमा सात जनाको मृत्यु भएको छ । घटना हेरात प्रान्तमा भएको हो । घटनामा नौ जना घाइते छन् । इन्धन ट्यांकीमा जडान गरिएको बम विष्फोट भएको प्रारम्भिक अनुमान गरिएको छ । घटनाको जिम्मा कसैले लिएको छैन । अलजजिराका अनुसार हेरात इरानसँग सीमा जोडिएको अफगानिस्तानको तेस्रो ठूलो शहर हो । अफगानिस्तानमा तालिवानले सत्ता सम्हालेपछि त्यहाँ मानवीय संकटको अवस्था सिर्जना भएको छ । पछिल्लो समय हिंसात्मक घटनामा समेत वृद्धि भएको छ ।

मुम्बई । भारतको मुम्बईमा २० तले भवनमा लागेको आगोका परि कम्तिमा ७ जना मारिएका छन् । मुम्बईको तारदेवस्थित भाटिया अस्पतालकाृे नजिकै रहेको यो भवनमा आगोलागेको हो । शनिबार बिहान १८ औं तलाबाट आगो शुरु भएको हो । घटनामा १५ जना घाइते छन् । उनीहरुलाई अस्पताल भर्ना गरिएको छ । तत्काल पुगेको दमकलले उद्धार गरेका कारण तुलनात्मक रुपमा कम मानिस मरेका हुन् । आगलागीको कारण भने खुलिसकेको छैन । घटनाबारे प्रहरीले अनुसन्धान गरिरहेको बताएको छ ।

काठमाडौं । यमनमा साउदी अरवले गरेको आक्रमणमा कम्तिमा ७० जना मारिएका छन् । यमनको डिटेक्सन सेन्टरमा साउदी नेतृत्वको सेनाले हवाई आक्रमण गरेको हो । यस घटनामा कम्तिमा ७० जनाको मृत्युको पुष्टी संयुक्त राष्ट्र संघले गरेको छ । राष्ट्र संघले घटनाको निन्दा समेत गरेको छ । शुक्रबार हमला भएको थियो । यो हुती विद्रोहीको गढ मानिन्छ ।

मृत्यु हुनेको संख्या अझ बढ्न सक्ने बताइएको छ । राष्ट्र संघका महासचिव एन्टिनो गुटरेजले यस प्रकारका हमला पूर्ण रुपमा रोकिनु पर्ने बताएका छन् । उनले हमलाको जाँच हुने समेत बताएका छन् । साउदी सेनाले हुती विद्रोही विरुद्ध सन् २०१५ यता लडिरहेका छन् । अहिलेसम्म बालबालिकासहित १० हजार भन्दा बढी मानिसको ज्यान गइसकेको छ ।

भियना । अस्ट्रिया यूरोप महादेशमै खोप कार्ड अनिवार्य गर्ने पहिलो मुलुक बनेको छ । त्यहाँको सरकारले ल्याएको अनिवार्य खोप लगाउनुपर्ने प्रस्तावलाई त्यहाँको तल्लो सदनले पारित गरेपछि उक्त युरोपेली देश ईयुकै त्यस्तो व्यवस्था गर्ने पहिलो राष्ट्र बनेको हो । बीबीसीका अनुसार यहाँ अहिलेसम्म ७२ प्रतिशतले पूर्ण मात्रा खोप लगाइसकेका छन् । अस्ट्रियामा नयाँ नियम फ्रेबुअरी १ देखि कार्यान्वयनमा आउनेछ। त्यस्तो विधयेक कानुन बन्न माथिल्लो सदनबाट पारित भएपछि राष्ट्रपतिबाट अनुमोदन हुनुपर्छ ।

नयाँ कानुनका अनुसार मध्य मार्चबाट कोभिडविरूद्ध खोप नलगाउनेहरूले ३ हजार ६ सय युरोसम्म जरिबाना तिर्नुपर्ने हुन्छ। खोपसम्बन्धी त्यस्तो आदेश सन् २०२४ को जनवरीसम्म लागु हुनेछ। सरकारले खोप नलगाएका मानिसहरू त्यसका लागि अगाडि आऊन् भनेर प्रोत्साहन गर्नका लागि १.४ अर्ब युरो लगानीको घोषणा समेत गर्दैछ ।

उक्त प्रस्तावलाई तल्लो सदनमा १३७ जनाले पारित गरेका थिए। विपक्षमा ३३ सांसद छन् । उग्र दक्षिणपन्थी फ्रिडम पार्टी अस्ट्रियामा खोपविरोधी अल्पसङ्ख्यक खेमामा नेतृत्व गरिरहेको छ । अधिकारीहरूले अनिवार्य खोपको उपाय ल्याउने बताएदेखि नै भियनामा त्यसविरूद्ध प्रदर्शन हुन थालेका थिए।