काठमाडौं । पछिल्लो २४ घण्टामा देशभर २७४५ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार देशभरका प्रयोगशालामा ७४४९ जनाको पीसीआर १६८१ जना ५८४१ जनाको एन्टीजेन परीक्षण गर्दा १०६४ जना गरि २७४५ जनामा संक्रमित पुष्टी, भएको हो ।
यो सहित नेपालमा कोरोना संक्रमितको संख्या ६ लाख १२ हजार २०२ पुगेको छ । पछिल्लो २४ घण्टामा ४१८७ जना संक्रमण मुक्त भएका छन् ।
यो सहित संक्रमण मुक्त हुनेको संख्या ५ लाख ४० हजार ४३९पुगेको छ । संक्रिय संक्रमितको संख्या ६३ हजार २५७ जना रहेको छ ।
काठमाडौं । नेपालमा कोरोना संक्रमणबाट थप ४१ जनाको मृत्यु भएको छ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा देशभरका विभिन्न अस्पतालमा उपचाररत ४१ जनाको मृत्यु भएको हो ।
यससँगै नेपालमा कोरोना संक्रमणबाट मृत्यु हुनेको संख्या ८५०६ पुगेको छ।
काठमाडौं । कर्णाली प्रदेशको नीति तथा कार्यक्रम बहुमतले पारित भएको छ ।
मंगलबार बसेको प्रदेशसभा बैठकमा मुख्यमन्त्री महेन्द्रबहादुर शाहीले आगामी आर्थिक वर्षको नीति तथा कार्यक्रम पास गरियोस भनेर प्रदेशसभामा प्रस्ताव राखेका थिए । सभामुख राजबहादुर शाहीले उक्त प्रस्ताव बहुमतले पारित भएको घोषणा गरेका थिए ।
नीति तथा कार्यक्रम पारित भएपछि आजै बजेट सार्वजनिक हुनेछ । दिउँसो ४ बजे आर्थिक मामिला तथा योजना मन्त्री गोपाल शर्माले बजेट सार्वजनिक गर्ने भएका हुन् ।
काठमाडौं । नेपाल स्टक एक्सचेञ्ज (नेप्से) परिसूचकमा सामान्य अंकले घटेको छ । मंगलबार शेयर बजार मापक सूचक नेप्से ३.७२ अंकले घटेर ३०२२.११ विन्दुमा आइपुगेको छ ।
नेपाल स्टक एक्सचेन्जका अनुसार मंगलबार २२६ कम्पनीको १६ अर्ब ५२ करोड ८७ लाख ४९ हजार ७३८ रुपैयाँ बराबरको ३ करोड ९ लाख ४८ हजार ७३८ कित्ता शेयर किनबेच भएका छन् ।
आज कारोबारमा आएका १३ वटा समूहमध्ये ५ समूहको परिसूचकमा हरियाली छाएको छ भने ८ समूहको परिसूचक राताम्मे भएका छन् । लगानी समूह सबैभन्दा धेरै २.०७ प्रतिशतले बढेको छ भने विकास बैंक समूह सबैभन्दा धेरै ४.४२ प्रतिशतले घटेको छ ।
आज तीन वटा कम्पनीको शेयरमूल्यमा उच्च बृद्धि भएको छ ।
शेयरमूल्य बढ्ने कम्पनीहरुमा सिईडीबी हाइड्रोपावर डेभलपमेन्ट कम्पनी, खानिखोला हाइड्रोपावर कम्पनी र युनियन हाइड्रोपावर रहेका छ । यी कम्पनीको शेयरमूल्य करिब १० प्रतिशतले बढेको छ ।
त्यस्तै, आज छ्याङदी हाइड्रोपावर र लिवर्टी इनर्जी कम्पनीका लगानीकर्ताले सर्वाधिक गुमाएका छन् । यस दिन छ्याङदी हाइड्रोपावरको शेयरमूल्य ७.६६ प्रतिशतले घटेको छ भने लिवर्टी इनर्जी कम्पनीको शेयरमूल्य ७.०२ प्रतिशतले घटेको छ ।
आज नेपाल पुनर्बीमा कम्पनीको सर्वाधिक कारोबार भएको छ । यसको ७६ करोड रुपैयाँ बढीको कारोबार भएको छ । कारोबार रकमकै आधारमा एचआइडीसीएल ५२ करोड र हिमालयन डिस्ट्रीलरी ४२ करोडको कारोबार सहित शीर्ष तीन स्थानमा रहे ।
काठमाडौं । काठमाडौँ उपत्यकामा आजबाट दुई महिना मेलम्चीको पानी आउने छैन । परीक्षणका रुपमा मात्र काठमाडौं ल्याइएको मेलम्चीको बाँकि काम गर्न अब पानी वितरण बन्द हुने भएको हो । काठमाडौंका धारामा अब दुई महिनासम्म २ देखि १२ दिन बिराएर पानी आउने छ । प्राविधिक परीक्षणका लागि मेलम्ची खानेपानी आयोजनाको सुरुङ खाली गर्नुपर्ने भएपछि पानी वितरण बन्द भएको हो ।
काठमाडौं उपत्यका खानेपानी लिमिटेडले पानी वितरणको नयाँ तालिका सार्वजनिक गर्दै अब २ देखि १२ दिनको बीचमा मात्र धारामा पानी आउने बताएको छ । यो बीचको समयमा उपभोक्ता आफैले पानीको जोहो गर्ने भएको हो । तर, वर्षायाम भएका कारण काठमाडौंका इनारमा अहिले पर्याप्त हुन्छ । अहिले काठमाडौँ उपत्यकामा दैनिक उपलब्ध भइरहेको १७ करोड लिडर पानी मेलम्ची बन्द भएपछि उपलब्ध हुँदैन । यसको असर उपभोक्तामा पर्नेछ ।
मेलम्ची नआएको समयमा खानेपानीको अभाव हुन नदिन केयुकेएलले उपत्यका भित्र भएका पानीको स्रोतबाट उपलब्ध हुने खानेपानी वितरण गर्नेछ । तालीका अनुसार काठमाडौँको महाँकालचौर, मिनभवन, अनामनगर, भक्तपुरको ठिमी, बोडे क्षेत्रमा ७ दिन बिराएर पानी आउने छ । बाँसबारी र पानीपोखरी क्षेत्रमा ५ दिन, बालाजु क्षेत्रमा ९ दिन, कीर्तिपुर क्षेत्रमा २ दिन, सैँबु र ललितपुर क्षेत्रमा १२ दिन, भक्तपुर क्षेत्रमा ४ दिन बिराएर पानी आउने केयुकेएलको सूचनामा उल्लेख छ ।
काठमाडौं । संघीय सरकारले बजेट ल्याएको १५ दिनपछि आज सात वटै प्रदेशमा आगामी आर्थिक वर्ष २०७८र७९ को बजेट ल्याउने छन् । असार १ गते प्रदेश सरकारको बजेट आएपछि १० असारमा स्थानीय सरकारहरुले बजेट ल्याउन सक्छन् । सात वटै प्रदेशमा बजेटको तयारी पुरा भएको छ ।
आज निर्धारित समयमै बजेट सम्बन्धित प्रदेशको प्रदेशसभामा प्रस्तुत हुनेछ । सबै प्रदेशले आगामी आवमा स्वास्थ्य क्षेत्रलाई प्राथमिकता दिएर बजेट ल्याउने तयारी गरेका छन् । शिक्षा, पूर्वाधार विकास र कोरोनाबाट प्रभावित अर्थतन्त्रको पुनरुत्थान समेत प्रदेशहरुको प्राथमिकतामा छ ।
गण्डकी र कर्णाली प्रदेश बाहेक सबै प्रदेशमा नीति तथा कार्यक्रम पारित भइसकेको छ । गण्डकी प्रदेशको नीति तथा कार्यक्रम आज पारित गरेर आजै चार बजे बजेट ल्याउने तयारी छ । प्रदेशहरुको कुल ३ खर्ब बराबरको बजेट आउने छ । यसमध्ये दुई खर्ब हाराहारी रकम केन्द्रबाट अनुदान तथा राजस्व बाँडफाँटबाट जाने रकम हो ।
काठमाडौं । आज मुलुकका विभिन्न भेगमा ठूलो वर्षाको सम्भावना छ । यसले नदीहरुमा बाढी आउने र नदी किनारमा असर गर्न सक्ने भन्दै जल तथा मौसम विज्ञान विभाग, बाढी पूर्वानुमान महाशाखाले सचेत गराएको छ । नेपालमा आइतबारबाट नै विभिन्न स्थानमा अविरल वर्षा जारी छ । लगातारको पानीले देशका विभिन्न नदी र खोलामा बाढी आएको महाशाखाले जनाएको छ ।
महाशाखाका अनुसार नारायणी नदीमा पानीको बहाव बढ्दा कास्कीको लुम्ले र चितवनको चर्खरेमा जोखिम बढेको छ । गण्डकी नदीमा पानीको बहाव बढ्दा म्याग्दीको घोरेपानी तथा नवलपरासीको अरुण नदी र आसपासका क्षेत्रमा जोखिम बढेको हो । कालीगण्डकी, तिनाउ, पश्चिम राप्ती, बबई, भेरी र यसका सहायक नदी जलाधार लगायत लुम्बिनी, कर्णाली र सुदूरपश्चिम प्रदेशको चुरे र तराई भइ बहने केही साना नदीमा पनि बहाव उल्लेख्य बढ्नसक्ने अनुमान महाशाखाको छ ।
यी नदीमा बिहीवारसम्म नै यी नदीका तटीय क्षेत्रमा विशेष सावधानी अपनाउन जल तथा मौसम विज्ञान विभागले आह्वान गरेको छ । यो साता मनसुन सक्रिय भइ देशभर पानी पर्ने हुँदा बाढी र पहिरोको जोखिम रहेको हो । मंगलबार देशका धेरै ठाउँहरुमा पानी पर्ने सम्भावना रहेको छ । प्रदेश २, वाग्मती, गण्डकी, लुम्बिनी तथा कर्णाली प्रदेशका केही ठाउँहरुमा ठूलो पानी पर्ने सम्भावना रहेको जनाइएको छ ।
काठमाडौं । काठमाडौं उपत्यकामा आजबाट आगामी एक साता निषेधाज्ञा लम्बिएको छ । केही प्रावधानहरु खुकुलो बनाउँदै आजबाट एक साताका लागि निषेधाज्ञा लम्बाइएको हो । बिहान वा साँझमा पैदल हिँड्नेहरुलाई प्रहरीले अब दुखः दिने छैन । काठमाडौं, ललितपुर र भक्तपुरका प्रमुख जिल्ला अधिकारीको बैठकले प्रावधान खुकुलो गरी असार ७ सम्म निषेधाज्ञा जारी राख्ने निर्णय गरेको हो ।
आजदेखि खाद्यान्न, तरकारी, किराना पसल, फलफूल र पुस्तक पसल बिहान ११ बजेसम्म खुलै रहने छन् । विकास निर्माणमा आवश्यक पर्ने पसल (हार्डवेयर) अपरान्ह ४ बजेदेखि खुल्ने छन् । होटलले ‘टेक अवे’ सेवा दिने छन् । अनलाइन डेलिभरीका लागि होटललाई बिहान ७ बजेदेखि काम गर्न दिइने छ । विकास निर्माणका काम सूचारु हुनेछन् ।
वर्कसपहरू बिहानदेखि बेलुकीसम्मै खोल्न पाउने भएक छन् । अत्यावश्यक सेवाका लागि यातायातका साधन आफ्नो कार्यालयद्वारा जारी परिचय पत्र वा प्रमुख जिल्ला अधिकारीले जारी गरेको पासका आधारमा सञ्चालन गर्न दिइने भएको छ । एम्बुलेन्स, शव बाहनलगायत स्वास्थ्य सेवामा खटिने साधनले परिचय पत्र समेत देखाउनु पर्ने छैन ।
बैंक तथा वित्तीय संस्थाका लागि कर्मचरीको आवतजावतमा समेत प्रहरीले अवरोध गर्ने छैन । कृषिजन्य कामका लागि मल ढुवानी र बीऊ बिजनका पसल खुल्ने छन् ।
कूटनीतिक निकायबाट जारी हुने भिसा, परीक्षा र अन्तर्वार्ताका लागि आउजाउ गर्ने मानिस समेत निर्वाध हिड्न सक्ने छन् ।
काठमाडौं । भारतीय सैनिक सेवामा अब नेपाली महिला समेत भर्ती हुन सक्ने भएका छन् । नेपालस्थित भारतीय राजदूतावासको कल्याणकारी शाखाले सोमबार एक सूचना जारी गर्दै यस्तो जानकारी गराएको हो । भारतीय सेनाले पहिलो पटक नेपाली महिला समेत भर्ती हुन सक्ने गरि नियम ल्याएको हो ।
सूचना अनुसार भारतीय सेनामा महिला सेना प्रहरी (सामान्य प्रहरी) भर्ना हुन पाउने जानकारी गराएको हो । १० कक्षा पास गरेका, १७ वर्ष ६ महिना देखि २१ वर्षसम्मका महिलाहरूले भर्ती हुन आदेवन दिन सक्ने दूतावासको सूचनामा उल्लेख छ । महिलाको उचाइ १५२ सेन्टिमिटर तोकिएको छ ।
यस सिजनका लागि आवेदन समेत खुलेको छ । अनलाइनमार्फत् जुन ६ देखि २० जुलाई सम्म फारम गर्न सकिने भएको छ । वीर नारीलाई ३० वर्षसम्मको उमेर छुट दिइएको छ। भूपू सैनिक, वीर नारी र विधवा सैनिकका छोरीहरूका लागि तौलमा २ किलो छुट हुने छ । उनीहरुको हकमा लिखित परीक्षामा २० अंक बोनस जोडिने छ ।
काठमाडौं । कोरोना महामारीका कारण नेपालबाट वैदेशिक रोजगारीमा जाने मानिसहरुको संख्यामा ८० प्रतिशतसम्मको गिरावट आएको छ । तर, विदेशमा रहेका नेपालीबाट भने निरन्तर रेमिट्यान्स भित्रिएको छ । महामारीकै बीचमा पनि विदेशबाट आउने रेमिट्यान्समा सुधार देखिएको हो ।
चालु आर्थिक वर्षको १० महिना (वैशाख मसान्त)सम्म ८ खर्ब ९ अर्ब ८९ करोड रुपैयाँ रेमिट्यान्स भित्रिएको नेपाल राष्ट्र बैंकले जनाएको छ । यो रकम गत आर्थिक वर्षको यसै अवधिको तुलनामा १९.२ प्रतिशत बढि हो ।
अघिल्लो वर्षको सोही अवधिमा विप्रेषण आप्रवाह ६.३ प्रतिशतले घटेको थियो । अमेरिकी डलरमा विप्रेषण आप्रवाह १६.१ प्रतिशतले वृद्धि भई ६ अर्ब ८७ करोड पुगेको छ । अघिल्लो वर्ष यस्तो आप्रवाह ७.६ प्रतिशतले घटेको तथ्यांक छ ।
मिजोरम । विश्वको सबभन्दा ठूलो परिवारका घरमुली मानिने ७६ वर्षीय पुरुषको निधन भएको छ । वर्तमान विश्वमा भारतका जिओना चाना विश्वकै धेरै सन्तानका मुखिया मानिन्थे ।
बीबीसीका अनुसार उनको भारतको मिजोरम राज्यमा निधन भएको हो । बहुपत्नी प्रथा भएको एउटा धार्मिक सम्प्रदायका प्रमुख रहेका चानाका ३८ श्रीमती, ८९ सन्तान र ३६ नातिनातिना रहेको पाइएको छ ।
मिजोरमका मुख्यमन्त्री जोरामथाङ्गाले ट्विटरमा उनको निधन भएको बारे लेखेका छन् । भारतीय संचारमाध्यमहरुका अनुसार चानामा मधुमेह र उच्च रक्तचापको समस्या थियो।
चिकित्सकहरूले पीटीआई समाचार संस्थालाई चानाको घरमै स्वास्थ्य बिग्रिएको र आइतवार साँझ मृत अवस्थामा अस्पताल ल्याइएको बताएका छन्। उनको परिवार विश्वकै दावि गरिएको छ । यसको आधिकारिक रेकर्ड भने छैन ।
चानाको परिवारको संख्या समेत यकिन गर्न सहज नभएको बीबीसीले लेखेको छ । एउटा विवरणमा उनका ३८ श्रीमती, ९४ सन्तान, ३३ नातिनातिना र एक पनाति रहेको पाइएको छ । स्थानीय सञ्चारमाध्यमहरूले सबैभन्दा ठूलो परिवारको विश्व कीर्तिमान भएको विवरण दिएका छन् ।
चानाको परिवारकै कारण भारतको उत्तरपूर्वी गाउँ पर्यटकीय आकर्षणको केन्द्र भने बनेको बताइएको छ । रोयटर्सका अनुसार चाना सन् १९४५ मा जन्मेका हुन् र उनले आफूभन्दा तीन वर्ष जेठी पहिलो श्रीमतीलाई १७ वर्षको उमेरमा भेटेका हुन्। सो परिवार २,००० जना अनुयायी रहेको इसाई धर्मको चाना पउल सम्प्रदायको रहेको छ।
टेक्सास । अमेरिकास्थित नेप्लिज अमेरिकन च्याम्बर अफ कमर्शले नेपालको कोभिड राहतमा झण्डै ९० हजार अमेरिकी डलर बराबरको सहयोग प्रदान गरेको छ । यसमा ५० हजार नगद र ४० हजार डलर मूल्य बराबरका ५ वटा भेन्टिलेटर छन्।
नेपालका विभिन्न अस्पतालहरुमा आवश्यक सहयोगका लागी नेप्लिज अमेरिकन च्याम्बर अफ कमर्शले शनिबार महाबीर पुन प्रमुख रहेको संस्था राष्ट्रिय आविष्कार केन्द्रलाई २० हजार अमेरिकी डलर नगद र करिब ४० हजार अमेरिकी डलर मूल्य पर्ने ५ भेन्टिलेटर हस्तान्तरण गरेको छ ।
सो अवसरमा च्याम्बर र आविष्कार केन्द्रबीच एक सम्झौता पत्रमा समेत हस्ताक्षर भएको छ । च्याम्बरका सभापति बाल जोशी र आविष्कार केन्द्रका प्रमुख पुनले उक्त सम्झौता पत्रमा हस्ताक्षर गरे । नेपालमा कोभिड महामारीको दोस्रो लहर सुरु भए पछि नेप्लिज अमेरिकन च्याम्बर अफ कमर्शले अमेरिकामा सहयोग संकलन अभियान सुरु गरेको थियो।
सहयोग संकलन अभियानका संयोजक सुरेस पोख्रेलका अनुसार च्याम्बरले मुख्यरुपमा नेपालमा झापाको बिर्तामोड, मेची अञ्चल अस्पताल, बाराको कलैया अस्पताल, गुल्मीको धुर्कोट स्वास्थ्य केन्द्र, बाँकेको भेरी अञ्चल अस्पताल, कैलालीको टिकापुर अस्पताल, सुर्खेतको पंचपुरी नगरपालिका तथा सालकोट स्वास्थ्य केन्द्र र अछाम जिल्लाका विभिन्न गाउपालिका स्थित स्वास्थ्य केन्द्रहरुमा सहयोग गरेको छ।
यसै गरि बाँकेको नेपालगन्ज नगरपालिकामा निर्माणाधीन ‘आइसोलेशन सेन्टर’ का लागी च्याम्बरले नेपाली समाज टेक्सासको सहयोगमा १० लाख नेपाली रुपैयाको सहयोग गरेको संयोजक पोख्रेलले जानकारी दिए ।
च्याम्बरले नेपाल स्थित बागेश्वरी असल शासन क्लब र भेरी अञ्चल अस्पतालसँगको समन्वयमा र टेक्सास नेपाली मेडिकल एसोसिएसनको सहयोगमा भेरी अञ्चल अस्पतालका कोभिड बिरामी र उनीहरूका परिवारलाई सहयोग गर्न एक सहायता कक्षको समेत स्थापना गरेको छ।
च्याम्बरले सुरु गरेको कोभिड राहतमा अमेरिका स्थित नेपाली र अन्य समुदायलगायत नेपाली समाज टेक्सास, टेक्सास नेपाली मेडिकल एसोसिएसन, एभन्ट फाउन्डेशन, पुण्य फाउन्डेशनलगायत संस्थाले आर्थिक सहयोग गरेका थिए । संस्था स्थापनाको छोटो अबधि भित्रै विभिन्न परिमाणमुखी काम गरेर समुदायमा आफ्नो परिचय र औचित्य स्थापना गर्न सफल रहेको यो संस्था अमेरिकामा सक्रिय छ ।
नेपाली ब्यबसायीहरुको संस्था नेप्लिज अमेरिकन च्याम्बर अफ कमर्शको अनुरोध स्वीकार गरि नेपालको कोभिड राहतका लागी सहयोग गर्ने सबै संघसंस्था तथा समस्त समुदायप्रति संस्थाकी कोषाध्यक्ष स्मृती कार्कीले कृतज्ञता व्यक्त गरेकी छिन् ।
काठमाडौं । पछिल्लो २४ घण्टामा देशभर २९१८ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार देशभरका प्रयोगशालामा ९४३८ जनाको पीसीआर २०४९ जनार ५३८१ जनाको एन्टीजेन परीक्षण गर्दा ८६९ जना गरि २९१८ जनामा संक्रमित पुष्टी, भएको हो ।
यो सहित नेपालमा कोरोना संक्रमितको संख्या ६ लाख १० हजार ५२१ पुगेको छ । पछिल्लो २४ घण्टामा ५१४७ जना संक्रमण मुक्त भएका छन् ।
यो सहित संक्रमण मुक्त हुनेको संख्या ५ लाख ३६ हजार २५२ पुगेको छ । संक्रिय संक्रमितको संख्या ६५ हजार ८०४ जना रहेको छ ।
काठमाडौं । नेपालमा कोरोना संक्रमणबाट थप ५३ जनाको मृत्यु भएको छ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा देशभरका विभिन्न अस्पतालमा उपचाररत ५३ जनाको मृत्यु भएको हो ।
यससँगै नेपालमा कोरोना संक्रमणबाट मृत्यु हुनेको संख्या ८४६८ पुगेको छ।
काठमाडौं । सर्वोच्च अदालतले राष्ट्रिय जनमोर्चाका गण्डकी प्रदेशका सांसद कृष्ण थापालाई पुनर्बहाली गर्न दिएको अन्तरिम आदेश खारेज गरेको छ।
न्यायाधीश विश्वभरप्रसाद श्रेष्ठ र कुमार रेग्मीको इजलासले यसअघि जारी गरेको अन्तरिम खारेज गरेको हो।
काठमाडौं । पछिल्लो समय लगातार दैनिक जस्तो नयाँ रेकर्ड बनाउँदै आएको शेयर बजारले आज फेरि नयाँ कीर्तिमान बनाएको छ ।
साताको दोस्रोदिन नेप्सेले ३०२५ विन्दु चुम्दै सर्वाधिक उच्च विन्दुको रेकर्ड बनाएको हो । नेप्से ३००० विन्दु पुगेको इतिहासमै पहिलो पटक हो । यसअघि जेठ ३० गते नेप्सेले सर्वाधिक २९८३ विन्दु चुमेको थियो ।
आज शेयर बजार मापक सूचक नेप्से ४२.७२ अंकले बढेर ३०२५.८३ विन्दुमा पुगेको छ । नेपाल स्टक एक्सचेन्जका अनुसार आज २२१ कम्पनीको १८ अर्ब ८८ करोड ४० लाख ३१ हजार ५१८ रुपैयाँ बराबरको ३ करोड ५० लाख २७ हजार ३६३ कित्ता शेयर किनबेच भएका छन् ।
आज कारोबारमा आएका १३ वटा समूहमध्ये ७ समूहको परिसूचकमा हरियाली छाएको छ भने ६ समूहको परिसूचक राताम्मे भएका छन् । होटल समूह सबैभन्दा धेरै ४.२५ प्रतिशत, इन्भेष्टमेन्ट समूह ३.३६ र बैंकिङ समूह २.७२ प्रतिशतले बढेको छ ।
उच्च अंकले बढेको बजारमा आज १ दर्जन बढी कम्पनीको शेयर मूल्य पोजेटिभ सर्किट लागेको छ । नेपाल इन्स्योरेन्स, खानीखोला, जोशी र घलेम्दी हाइड्रोपावरको शेयर मूल्य ठ्याक्कै १० प्रतिशतले बढेको छ ।
यसैगरी, ङादी ग्रुप, ओरेन्टल होटल, सीईडीबी हाइड्रोपावर, तारा गाउँ होटल, युनियन हाइड्रो, एचआइडीसीएल, सोल्टी होटल र हिमालयन डिस्ट्रीलरीका शेयर धनीले करिब १० प्रतिशत कमाएका छन् ।
अरुण भ्याली हाइड्रोपावरको सर्वाधिक कारोबार भएको छ । यसको ६२ करोड रुपैयाँ बढीको कारोबार भएको छ । कारोबार रकमकै आधारमा अपी पावर ५४ करोड र हिमालयन डिस्ट्रीलरी ५० करोडको कारोबार सहित शीर्ष तीन स्थानमा रहे ।
काठमाडौं । नेपालको उच्च शिक्षाको गुणस्तर सुधारमा विश्व बैंकले सवा ७ अर्ब ऋण दिने भएको छ । ७ अर्ब २० करोड ऋण सहायता उपलब्ध गराउने घोषणा विश्व बैंकले गरेको हो । बैंकको कार्यकारी निर्देशक बोर्डले उच्च शिक्षाको गुणस्तर सुधार, अनलाइन शिक्षाको स्तर वृद्धि तथा विपन्न एवं कमजोर विद्यार्थीका लागि शैक्षिक संस्थाहरूमा पहुँच विस्तार गर्न उक्त रकम उपलब्ध गराउने निर्णय गरेको नेपालस्थित विश्व बैंक कार्यालयद्धारा जारि विज्ञप्तीमा उल्लेख छ ।
बैकबाट प्राप्त हुने उक्त रकमबाट गुणस्तरीय उच्च शिक्षामा पहुँच सुधार र विद्यार्थीलाई श्रमबजारमा माग भएका सीपहरू प्राप्त गर्न सहयोग पुग्नेछ । माल्दिभ्स, नेपाल र श्रीलङ्काका लागि विश्व बैंकका देशीय निर्देशक फरिस हदद–जर्भोसले मानव पूँजी विकास तथा सबल पुनःनिर्माणलाई प्राथमिकतामा राख्नु कोभिड–१९ को महामारीका बेला अपरिहार्य भएको बताएका छन् । विश्व बैंक नेपालमा बढी सहयोग उपलब्ध गराउने द्धिपक्षी निकाय हो । विश्व बैंकले नेपालको पूर्वाधार र शिक्षामा बढी रकम सहायता उपलब्ध गराइरहेको छ ।
काठमाडौं\एजेन्सी । इजरायलमा सर्वाधिक समय सत्तामा रहेका नेता बेन्जामिन नेतान्याहुको सत्ता यात्रा पुरा भएको छ । त्यहाँको संसद्ले नयाँ नेता निर्वाचित गरेसँगै १२ वर्ष सत्तामा रहेका बेन्जामिन नेतान्याहुको पद गुमेको बीबीसीले लेखेको छ । दक्षिणपन्थी राष्ट्रवादी नाफ्ताली बेनेटले परिवर्तनको सरकार को नेतृत्व गर्दै शपथ ग्रहण गरेका छन्। ६०\५९ बहुमतका आधारमा अभूतपूर्व गठबन्धनको नेतृत्व गर्दै बेनेट संसद्बाट प्रधानमन्त्री चुनिएको समेत बीबीसीले जनाएको छ ।
सत्ता समीकरणसम्बन्धी सम्झौताका अनुसार उनी सन् २०२३ को सेप्टेम्बर महिनासम्म प्रधानमन्त्री रहने भएका हुन् । त्यसपछि उनले येश अटिड पार्टीका नेता याएर लापिडलाई अर्को दुई वर्षका लागि प्रधानमन्त्री पद हस्तान्तरण गर्नेछन्। नेतान्याहु इजरेलका हालसम्मकै सर्वाधिक लामो समय सत्तामा रहेका नेता हुन्। इजरेलको राजनीतिमा वर्षौंसम्म वर्चस्व कायम राखेका उनी दक्षिणपन्थी लिकुड पार्टीको प्रमुख तथा विपक्षी दलको नेता रहने छन्।
अमेरिकी राष्ट्रपति जो बाइडनले बेनेटलाई बधाई सन्देश पठाउँदै आफूले उनीसँग काम गर्न चाहेको उल्लेख गरेका छन् । नेतान्याहुले पाँचवटा कार्यकाल शासन गरेका छन्। सबैभन्दा सुरुमा सन् १९९६ देखि १९९९ सम्म सत्ता सम्हालेका उनी सन् २००९ देखि २०२१ सम्म निरन्तर शक्तिमा छन्। सन् २०१९ को एप्रिलमा उनले चुनाव घोषणा गरेका थिए।
काठमाडौं । काठमाडौं महानगरपालिकामा आज र भोली (सोमबार र मंगलबार) चिनियाँ भेरोसेल खोप लगाइने भएको छ । यसअघि २५ जेठबाट शुरु भएको खोप अभियानमा खोप नै सकिएपछि तोकिएको समय भन्दा अगाडी नै रोकिएको थियो । थप खोपको जोहो भएपछि आज र भोलि महानगरपालिका भित्र खोप लगाउने तयारी गरिएको हो ।
काठमाडौं महानगरपालिकाको शहरी स्वास्थ्य तथा खाद्य पदार्थ नियमनका विभागका अनुसार जिल्ला स्वास्थ्य कार्यालय काठमाडौंले भेरोसेल खोपको पहिलो मात्रा लगाउन छुटेका ६०–६१ वर्ष उमेर समूहका जेष्ठ नगारिकलाई खोप लगाइने भएको हो ।
काठमाडौंस्थित वीर अस्पताल, शिक्षण अस्पताल, विरेन्द्र सैनिक अस्पताल र निजामती कर्मचारी अस्पतालमा जेठ ३१ र असार १ गते खोप लगाइने छ ।
पहिलो डोज लगाउन छुटेका ६०–६१ वर्ष उमेर समूहका जेष्ठ नागरिक, यसअघि भेरोसेल खोपको पहिलो मात्रा लगाएका व्यक्ति, स्वास्थ्यकर्मी, कोभिड–१९ बिरामीको प्रत्यक्ष जाँच, उपचार र हेरचाहमा संलग्न चिकित्सक, नर्सिङ र प्यारामेडिक्स विद्यार्थी स्वास्थ्यकर्मीले खोप लगाउन सक्ने छन् ।
लण्डन । धनी राष्ट्रहरू गरिब मुलुकलाई १ अर्ब डोज कोरोना खोप अनुदानमा उपलब्ध गराउन सहमत भएका छन् । यससँगै विश्वभर कम आयस्रोत भएका मुलुकका ५० करोड मानिसले यस्तो खोप प्राप्त गर्नेछन् । धनी राष्ट्रहरुको समूह जी-सेभेनको बैठकपछि आयोजित पत्रकार सम्मेलनमा ब्रिटेनका प्रधानमन्त्री बोरिस जोनसनले नेताहरूले विपन्न राष्ट्रहरूलाई कोरोनाभाइरसविरुद्ध एक अर्ब मात्रा खोप दिने वाचा गरेको बताएको बीबीसीले लेखेको छ ।
ती खोप सीधै वा कोभ्याक्स सुविधामार्फत् दिन सकिने छ । उक्त परिमाणमा बेलायतले दिने भनेको १० करोड मात्रा पनि समावेश छ । ‘विश्वलाई खोप लगाउने यो अर्को महत्त्वपूर्ण कदम हो,’ जोनसनले भनेका छन् ।
उनले अक्सफर्ड आस्ट्राजेनेकाले विकास गरेको खोपको भूमिकाको प्रशंसा गर्दै यसलाई विश्वकै सबैभन्दा लोकप्रिय खोपको संज्ञा समेत दिएका छन् । बीबीसीका अनुसार लागत मूल्यमै विश्वमा बेचिएको हुँदा यो निकै लोकप्रिय रहेको उनको भनाई छ । उनले कोभ्याक्स सुविधाअन्तर्गत दिइएका खोपमध्ये ९६ प्रतिशत अक्सफर्ड आस्ट्राजेनेका रहेको जानकारी समेत गराएका छन् ।
काठमाडौं । जनता समाजवादी पार्टीमा एक पक्षले अर्को पक्षलाई गरेको कारबाहीलाई निर्वाचन आयोगले अमान्य घोषणा गरेको छ । आयोगको आइतबार बसेको बैठकले यस्तो निर्णय गरेको हो । प्रमुख निर्वाचन आयुक्त दिनेश कुमार थपलिया र आयुक्तहरू जानकी कुमारी तुलाधर, रामप्रसाद भण्डारी र ईश्वरी प्रसाद पौड्यालको बैठकले यस्तो निर्णय गरेको आयोगले जनाएको छ ।
निर्वाचन आयोगका अनुसार अध्यक्ष महन्थ ठाकुर र वरिष्ठ नेता राजेन्द्र महतो पक्ष र जसपा संघीय परिषद अध्यक्ष डा. बाबुराम भट्टराई र अध्यक्ष उपेन्द्र यादव दुबै पक्षले एक अर्कालाई गरेको कारबाही अमान्य भएको हो । राजीतिक दलसम्बन्धी ऐन अन्तर्गत यस्तो निर्णय आएको आयोगको भनाई छ । यो पार्टीको पदाधिकारीको विवरण साविक कै कायम रहने भएको छ । यसले जसपालाई बाध्यकारी रुपमा मिल्नु पर्ने देखिएको छ ।
जसपामा अहिले दुई पक्ष छन् । एउटा पक्ष सरकारमा गएको छ । अर्को पक्ष विपक्षी गठबन्धनमा रहेको छ । प्रतिपक्षमा रहेको भट्टराई–यादव पक्षले सरकारमा गएको ठाकुर र महतोसहित चार जनालाई पार्टीबाट निष्कासन गरेको थियो । आयोगमा यादव पक्षले बहुमत कार्यकारिणी सदस्यको हस्ताक्षर बुझाएको थियो। ठाकुर पक्षले पत्र काटेको थियो ।
काठमाडौं । काठमाडौं उपत्यकाभित्र जारी निषेधाज्ञा एक साता थप हुने भएको छ ।
जिल्ला प्रशासन कार्यालय काठमाडौंमा उपत्यकाभित्रका तीनवटै जिल्लाका प्रमुख जिल्ला अधिकारीहरुको बैठकले थप एक साता निषेधाज्ञा गर्ने निर्णय गरेको हो।
उपत्यकाका काठमाडौं, ललितपुर र भक्तपुर जिल्लामा गत वैशाख १६ गतेदेखि निषेधाज्ञा लागू भएको थियो। निषेधाज्ञा लागू भएको डेढ महिना पछि पनि कोरोना संक्रमणको जोखिम कम नभइसकेकाले निषेधाज्ञालाई निरन्तरता दिन लागिएको जनाइएको छ ।
तर, यसपटक भने केहि क्षेत्रलाई खुकुलो पारिएको छ। पुस्तक पसल, हार्डवेयर पसल, अनलाइन डेलिभरी र होटेल रेष्टुरेष्टहरुले टेकअवे सेवा गर्न दिने भएको छ। त्यस्तै खाद्यान्नका पसल पनि बिहान ११ बजेसम्म खोल्न पाइने छ।
काठमाडौं । पछिल्लो समय लगातार दैनिक जस्तो नयाँ रेकर्ड बनाउँदै आएको शेयर बजारले आज फेरि नयाँ कीर्तिमान बनाएको छ ।
एकैदिन सर्वाधिक किनबेच र ऐतिहासिक बिन्दुको रेकर्ड बनेको हो । साताको पहिलोदिन नेप्सेले सर्वाधिक २९८३ विन्दु चुम्दै नयाँ कीर्तिमान बनाएको हो ।
नेप्सेले २९८३ विन्दु नाघेकोको यो इतिहासमै पहिलोपटक हो । यसअघि जेठ २५ गते नेप्सेले सर्वाधिक २९६० विन्दु चुमेको थियो ।एकैदिन साढे अर्ब ५५ करोड बढीको कारोबार भएको छ ।
यो हालसम्मै उच्च कारोबार हो । यस अघि २०७८ जेठ २३ गते आइतबार नेप्सेमा १७ अर्ब २७ करोड १७ लाख बराबरको करोबार भएको थियो ।
यसदिन नेप्से ३८.३२ अकले बढेर २९८३.११ विन्दुमा पुगेको छ । नेपाल स्टक एक्सचेन्जका अनुसार आइतबार २१८ कम्पनीको १९ अर्ब ५५ करोड १ लाख ६६ हजार ६३६ रुपैयाँ बराबरको ३ करोड ७० लाख ७६ हजार ४३९ कित्ता शेयर किनबेच भएका छन् ।
१३ समूहको कारोबार भएकोमा ६ समूहको परिसूचक घट्दा बाँकी ७ समूहको परिसूचक बढेको छ । विकाश बैंक ८.२४ प्रतिशत, वित्त ७.१४ प्रतिशत जलविद्युत ६.१० प्रतिशत, होटल्स् तथा पर्यटन ४.७३ प्रतिशत र लगानी समूह २.३८ प्रतिशतले बढेको हो ।
बाँकि समूहको परिसूचक भने एक प्रतिशत भन्दा थोरैले घटबढ भएका छन् । आइतबारको समूहगत परिसूचकमध्य वित्त, विकाश बैंक र जलविद्युत समूहको परिसूचकमा उछाल देखिएको छ ।
उच्च अंकले बढेको बजारमा आज ४ दर्जन बढी कम्पनीको शेयर मूल्य पोजेटिभ सर्किट लेभलले बढेको छ । सर्किट लाग्नेमा अधिकांश फाइनान्स, होटलर हाइड्रोपार कम्पनी रहेका छन् ।
श्री इन्भेष्टमेन्ट, आइसीएफसी, समृद्धि फाइनान्स, कर्णाली विकास बैंक र सिन्धु विकास बैंकको शेयर मूल्य ठ्याक्कै १० प्रतिशतले बढेको छ ।
यसैगरी, रिलायन्स फाइनान्स, मितेरी डेभलपमेन्ट बैंक, हिमालयन पावर, पञ्चकन्या माइ, घलेम्दी, सीईडीबी, शिवश्री, नेशनल, जोशी हाइड्रोपावर, माउन्टेन इनर्जी, गुह्येश्वरी मर्चेन्ट, प्रोग्रेसिभ फाइनानस, तारागाउँ होटल, ओरेन्टल होटल, सोल्टी होटलका सेयरधनीले करिब १० प्रतिशत कमाएका छन् ।
यसैगरी, जानकी फाइनान्स, एचआइडीसीएल, ङादी ग्रुप, सेन्टर फाइनान्स, नेपाल फाइनान्स, बेस्ट फाइनान्स, पाँचथर पावर, आँखुखोला, छ्याङ्दी, युनियन, दिव्यश्वरी, रैराङ, लिबर्टी, हिमाल दोलखा हाइड्रोपावर, मल्टिप्रपोज फाइनान्स र ज्योति विकास बैंकको सेयर मूल्यमा पोजेटिभ सर्किट लागेको छ ।
यस्तै, आज नेपाल इन्स्योरेन्स कम्पनीका लगानीकर्ताले सर्वाधिक गुमाएका छन् । यस कम्पनीको शेयरमूल्य ४.१५ प्रतिशतले घटेर प्रतिकित्ता एक हजार ४० मा झरेको छ ।
त्यसैगरि, कारोबारको आधारमा आज सबैभन्दा बढी अरुण भ्याली हाइड्रोपावर डेभलपमेन्ट कम्पनीको कारोबार भएको छ । यस कम्पनीको ७२ करोड २९ लाख ७६ हजार २६७ रुपैयाँ बराबरको कारोबार भएको छ ।
काठमाडौं । गण्डकी प्रदेशका निवर्तमान मुख्यमन्त्री पृथ्वीसुब्बा गुरुङले सांसद राजीव गुरुङ (दीपक मनाङे) ले आफूलाई धोका दिएको बताएका छन्।
एमाले गण्डकी प्रदेश संसदीय दलका नेता पनि रहेका गुरुङले आइतबार आफ्नै निवासमा सञ्चाकर्मीसँग कुराकानी गर्नेक्रममा मनाङेले आफैंले सहयोग गरेर राजनीतिमा ल्याएको तर उनीबाट आफैंले धोका खानुपरेको बताएका हुन्।
मनाङेको टिप्पणी गर्ने क्रममा उनले सबै डाँकू वाल्मिकी नहुँदा रहेछन् भन्दै राजनीति र समाजसेवा गर्छु भनेपछि गुरुङलाई आफूले चुनाव जिताएको उल्लेख गरे। गुरुङले आफूलाई योभन्दा ठूलो धोका अरु नहुने बताए।
तर मनाङे रूपान्तरित नभएको बरु आफूलाई धोका दिएको उल्लेख गर्दै उनले भने, ‘धतुरोको बोट आँगनमा रोपेर अमृत फल्दैन भनेको यही हो ।’
निवर्तमान मुख्यमन्त्री गुरुङले मनाङेलाई युवा तथा खेलकुदमन्त्री बनाएका थिए। तर पछिल्लोपटक मनाङे विपक्षीतिर ढल्किँदा वैकल्पिक सरकार बनेको छ।
काठमाडौं । गण्डकी प्रदेशको मन्त्रिपरिषदको बैठकले पूर्वमुख्यमन्त्रीलाई सुविधा दिने निर्णय गरेको छ।
कृष्णचन्द्र नेपाली पोखरेलको नेतृत्वमा आइतबार बसेको नवगठित मन्त्रिपरिषदको पहिलो बैठकले सो निर्णय गरेको हो ।
यसैगरी प्रदेशको आगामी आर्थिक वर्षको लागि नीति तथा कार्यक्रम र बजेटबारेमा पनि सामान्य छलफल मन्त्रिपरिषद्ले गरेको छ ।
सरकारको प्रवक्तामा कुमार खड्कालाई तोक्ने निर्णय बैठकले गरेको हो ।
यसअघि, मुख्यमन्त्रीमा नियुक्ति लगत्तै शनिबार कृष्णचन्द्र नेपाली पोखरेलले स्तन तथा पाठेघर क्यान्सरका बिरामीको उपचार निःशुल्क गर्ने घोषणा गरेका छन् । शपथ तथा पदभार ग्रहणपछि नवनियुक्त मुख्यमन्त्री पोखरेलले सो निर्णय गरेका हुन्
यस्तै विपद् व्यवस्थापनका लागि विज्ञसहितको टोली बनाउने निर्णय पनि गरिएको छ ।
काठमाडौं । कोरोना महामारीपछि रोकिएको साउदी अरबको रोजगारीमा जाने नेपाली श्रमिकको मागपत्र प्रमाणीकरण पुनः सुरु हुने भएको छ । साउदीमा रहेको नेपाली दूतावासका अनुसार यो काम मंगलबार (जुन १५)बाट पुनः सूचारु हुनेछ । दूतावासका कर्मचारीमा कोरोना सङ्क्रमण पुष्टि भएपछि यो काम रोकिएको थियो ।
साउदीस्थित नेपाली दूतावासका अनुसार माग पत्र प्रमाणीकरण गर्न आउँदा रोजगारदाता कम्पनीको ‘यूजर अकाउन्ट’मा पठाइएको माग पत्र स्वीकृति भएको म्यासेजको प्रिन्ट अनिवार्य ल्याउनु पर्नेछ ।
दूतावासबाट प्रमाणीकरणको छाप लगाउँदा रोजगारदाता कम्पनीले अब अनलाइन प्रणालीमा अपलोड गरेकै कागजात दूतावासले नै प्रिन्ट गरी त्यसमा नै छाप लगाइदिने छ । कोरोना भाइरसको महाकारीका कारण वैदेशिक रोजगारीमा पुगेका नेपालीले निरन्तर सास्ती भोग्नु परेको छ ।
पोखरा । मनसुन सक्रिय भएसँगै अहिले देशभर वर्षा भइरहेको छ । कुनै स्थानमा मध्यम र कुनै स्थानमा भारी वर्षा भइरहेको जल तथा मौसम विज्ञान पूर्वानुमान महाशाखाले जनाएको छ । अविरल वर्षापछि राजमार्गहरुमा पहिरो जाने र अवरुद्ध हुने क्रम समेत बढेको छ । सोहीक्रममा स्याङ्जाको भालुपहाडमा गएको पहिरोले सिद्धार्थ राजमार्ग अवरुद्ध बनाएको छ । शनिबार रातिदेखि आएको अविरल वर्षा र राजमार्ग फराकिलो बनाउन खनिएको सडकको कारण पहिरो गएको स्थानीयवासीको भनाई छ ।
राति २ बजे ठूलो पहिरो गएकाले राजमार्गमा चल्ने अत्यावश्यक सवारी साधन सडकमा नै अलपत्र परेका छन्। सडक खुलाउन पोखराबाट डोजर बोलाइएको जिल्ला प्रहरी कार्यालय स्याङ्जाले जनाएको छ । सिद्धार्थ राजमार्गमा सिद्धबाबा पहिरो क्षेत्रबाटै जोखिम अत्यधिक रहेको छ ।
काठमाडौं\एजेन्सी । युरो २०२० अन्तर्गत शनिबार राति एक अप्रिय घटना हुनबाट बचेको छ । डेनमार्क र फिनल्यान्डबीचको खेलमा डेनमार्कका मिडफिल्डर क्रिस्टियन एरिक्सन एक्कासी मैदानमा ढले । उनीमाथि कुनै फाउल भने भएको थिएन । खेलको ४१ औं मिनेट चलिरहँदा घरेलु मैदानमा बेहोस भएका एरिक्सनको मैदानमा गरिएको १५ मिनेटसम्मको प्रयासमा होस खुल्न सकेन । त्यसपछि उनलाई अस्पताल लगियो । यो घटना शनिबार रातीको हो ।
उनी बेहोस भएर अस्पताल लैजानु परेपछि खेल रोकियो । दुबै टोली ड्रेसिंग रुम फर्किए र उनको स्वास्थ्य लाभको कामना गरे । जब अस्पतालबाट एक खुसीको खबर आयो, खबर अनुसार उनको होस आयो । त्यसपछि खेल पुनः सूचारु गर्ने निर्णय भयो । अस्पतालबाट उनले आफ्ना टीममेटसँग भिडियोमा कुरा गरे । त्यसपछि खेलाडीहरु पुनः मैदानमा फर्कन राजि भए ।
डेनमार्क फुटबल एसोसिएसनका अनुसार एरिक्सनको स्वास्थ्य स्थिर छ। उनी खतरामुक्त अवस्थामा छन् । साढे एक घन्टापछि सुचारु भएको खेलको पहिलो हाफमा बाँकी चार मिनेट खेलाइएको थियो। त्यसपछि ब्रेकको रुपमा पाँच मिनेट समय दिइयो । त्यसपछि दोस्रो हाफ सुरु गरियो ।
डेनमार्कमाथि फिनल्यान्डले १-० गोलको जित निकाल्यो । हतास मनोस्थितिमा पुगेको टीम साविकको जस्तो मनोवलमा खेल्न सकेन । जसले गर्दा फिनल्यान्डका लागि पोहान्पालोले ५९ मिनेटमा गरेको गोल निर्णायक बन्यो । डेनमार्कले ७४ मिनेटमा पेनाल्टी पाएपनि त्यो गोलमा परिणत हुन सकेन ।
डेनमार्कका इमिल होएबिएरले पेनाल्टीलाई गोल गर्न सकेनन् । एरिक्सनको संसारभरबाट फुटबलप्रेमीले स्वास्थ्यलाभको कामना गरेका छन् । किनकी यो दृष्य संसारमा करोडौं मानिसले टेलिभिजन सेटबाट प्रत्यक्ष हेरिरहेका थिए ।
काठमाडौं । नेपाली कांग्रेसको १४ औं महाधिवेशनको मिति सर्ने निश्चित भएको छ । शनिबार पार्टी सभापति शेरबहादुर देउवाको निवासमा सम्पन्न पदाधिकारी बैठकले महाधिवेशनको मिति दुई साता पर धकेल्ने प्रस्ताव गरेको छ । कोरोना महाकारीका कारण पूर्वनिर्धारित सबै प्रक्रियाहरु पर र्ने भएकाले महाधिवेशनको मिति समेत सार्नु परेको बैठकको निष्कर्ष रहेको छ ।
बैठकले भदौ १६ देखि १९ गतेसम्म १४ औं महाधिवेशन गर्ने प्रस्ताव गरेको हो । यो प्रस्तावको अनुमोदन भने केन्द्रिय समितिले गर्नुपर्छ । आजको बैठकमा सभापति शेर बहादुर देउवाले आफु कुनै पनि हालतमा महाधिवेशन गराउने पक्षमा रहेको बताएका थिए । यसअघि भदौ ७ देखि १० सम्म महाधिवेशन गर्ने निर्णय काङ्ग्रेसले गरेको थियो । पार्टीको महाधिवेशन भदौ भित्र जुनसुकै हालतमा गर्नुपर्ने संवैधानिक बाध्यता समेत रहेको छ ।
काठमाडौं । नेपालका पाँच जना पूर्वप्रधानमन्त्रीले नेपालमा लोकतन्त्र तथा संवैधानिक व्यवस्था, कानूनी राज्य र लोकतन्त्रका आधारभूत सिद्धान्त एवं मूल्यमाथि भइरहेको निरंकुश हमला विरुद्ध एक हुन आह्वान गरेका छन् । उनीहरुले यसमा ऐक्यवद्धता जनाउन नेपाली जनता, नागरिक समाज र सम्पूर्ण लोकतन्त्रवादी शक्तिसँग अपिल गरेका हुन् ।
शनिबार संयुक्त विज्ञप्ति जारी गर्दै उनीहरूले ढुंगा गिटी निकासी सम्बन्धी निर्णय तत्काल फिर्ता लिन जोडदार माग गरेका छन् । नेपालका सम्बन्धमा नेपालीबाटै निर्णय हुनुपर्ने र नेपालको आन्तरिक राजनीतिमा वाह्य शक्तिको प्रत्यक्ष वा परोक्ष हस्तक्षेप तथा चलखेल मान्य नहुने उनीहरुको भनाई छ ।
पूर्वप्रधानमन्त्री शेरबहादुर देउवा, पुष्पकमल दाहाल, माधवकुमार नेपाल, झलनाथ खनाल र बाबुराम भट्टराईले संयुक्त विज्ञप्ति जारी गरि यस्तो आह्वान गरेका हुन् ।
उनीहरुको आह्वानको पुरा रुप
मितिः २०७८ जेष्ठ २९
प्रेस वक्तव्य
प्रधानमन्त्री केपी ओलीबाट निरन्तर एकपछि अर्को गरी नेपालको संविधानमाथि प्रहार गर्ने कार्य भइरहेको छ। नेपाली जनताको लामो र कठोर संघर्ष तथा आन्दोलनबाट प्राप्त संघीय लोकतान्त्रिक गणतन्त्र तथा कानूनको शासनमाथि नै घात गरिएको छ।
गत पुष महिनामा प्रतिनिधि सभा विघटन गर्ने उहाँको कार्य असंवैधानिक भनी सर्वोच्च अदालतले ठहर गरेको अवस्थामा पुनः दोस्रो पटक प्रतिनिधि सभा विघटन गरी प्रधानमन्त्रीले आफ्नो निरंकुश, स्वेच्छाचारी र प्रतिगमनकारी चरित्र उदांग पार्नुभएको छ।
सर्वोच्च अदालतबाट २०७७ साल फागुन ११ गते भएको फैसलामा नेपालको संविधानको धारा ७६ का सम्पूर्ण प्रकृया पूरा गर्दा पनि वैकल्पिक सरकार गठन नहुने वा धारा ७६ को उपधारा ५ अन्तरगत गठित सरकारले विश्वासको मत प्राप्त नगर्ने अवस्थामा मात्र प्रतिनिधि सभा विघटन गरी निर्वाचनको मिति तोक्न सकिने संवैधानिक व्यवस्थाबारे स्पष्ट व्याख्या भएको छ।
यस्तो स्पष्ट फैसला समेतको उल्लंघन गर्दै प्रधानमन्त्री केपी ओलीले प्रतिनिधि सभा विघटन गरी उहाँ काम चलाउ सरकारको प्रधानमन्त्रीमा परिणत भइसकेको अवस्थामा अध्यादेशबाट बजेट घोषणा गर्ने, सरकारको नीति तथा कार्यक्रम झै प्रधानमन्त्रीले वाचन गरेर सार्वजनिक गर्ने,संविधान सभाबाट जारी नेपालको संविधान संशोधन गर्न भनि राष्ट्रिय सहमति नगरी अत्यन्त संवेदनशिल विषयमा स्वेच्छाचारी किसिमले कार्यदल गठन गर्ने, मन्त्रीपरिषद्को मनपरी किसिमले पटक–पटक विस्तार गर्ने, यसरी विस्तार गर्दा नेपालको राजनीतिक इतिहासमा कहिल्यै नभएको सत्तालिप्साको कुरुप स्वरुप प्रदर्शन गर्ने, सर्वोच्च अदालतलाई पार्टीको बैठकबाट मात्र होइन महान्यायाधिवक्तामार्फत धम्क्याउने जस्ता अलोकतान्त्रिक कार्यहरु प्रधानमन्त्री केपी ओलीबाट भएका छन्। हामी यस्ता कार्यहरुको भर्त्सना गर्दछौं।
देश कोरोना महामारीबाट आक्रान्त भइरहेको बेला राज्ययन्त्रलाई समग्ररुपमा महामारीबाट जनताको सुरक्षामा केन्द्रित गर्नुपर्नेमा प्रधानमन्त्रीबाट स्वार्थी सत्ता राजनीति, अन्योल, अनिश्चय र अस्थिरताको खेती गरिएको छ। सत्ता स्वार्थमा लिप्त भएर राज्ययन्त्र, सरकारी साधन र स्रोतको व्यापक दुरुपयोग गरिएको छ। भ्रष्टाचार र अनियमित कार्यलाई प्रधानमन्त्री र उहाँका निकटस्थहरुबाट संरक्षण र प्रश्रय दिइएको छ। कोरोना संक्रमणका विरुद्ध दिइने खोप प्राप्त गर्न राज्य प्रणालीको स्थापित पद्धति र मान्यता अनुरुप व्यवस्थित काम नगरी प्रचारमुखी मार्ग अवलम्बन गरिएको छ।
पहिलो खोप लगाएका मानिसहरुले समयमै दोस्रो खोप नपाएर पहिलो खोप निरर्थक हुनसक्ने स्थिति उत्पन्न भएको छ। यस्तो अवस्थाप्रति गम्भीर हुँदै खोपको समुचित व्यवस्था गर्न, बन्द र बन्देजको अवस्थामा विपन्न, श्रमजीवी र कमजोर वर्ग एवम् समुदायलाई परिरहेको मर्का र कठिनाईप्रति संवेदनशील भई तिनीहरुको रोग र भोकको समस्याको सम्बोधन गर्न आवश्यक कार्ययोजना सहित अग्रसर हुन नेपाल सरकारसंग माग गर्दछौं।
प्रधानमन्त्रीका गलत क्रियाकलापका कारण देशले अस्थिर र अन्योल ग्रस्त राजनीतिक स्थितिको सामना गरिरहेको बेला काम चलाउ सरकारले घाटा बजेट पूर्ति गर्ने निहँुमा देशका विभिन्न भागबाट ढुँगा, वालुवा र गिटी उत्खनन् गरी विदेशमा निकासी गर्ने राष्ट्रहित र जनविरोधी निर्णय गरेको छ।
यस्तो गलत निर्णयबाट अत्यन्त संवेदनशील अवस्थामा रहेको नेपालको भूबनौटमा असर पर्नगई गम्भीर पर्यावरणीय समस्या सिर्जना हुनेछ। विशेषतः चुरे र महाभारत श्रुंखलामा हुने त्यस्तो उत्खनन्बाट जंगल विनाश हुने र पानीका मुहानहरु सुक्ने तथा तराई क्षेत्र मरुभूमिकरण हुने स्थिति उत्पन्न हुने वातावरणविद्हरुको भनाईरहेको छ।
आफ्नो घरमा आगो लगाएर अरुको हितका लागि खरानी बेच्ने जस्तो सरकारको उक्त निर्णयको तीब्र विरोध गर्दै तत्काल त्यस्तो निर्णय खारेज गर्न माग गर्दछौं। काम चलाउ स्थितिमा रहेको सरकारबाट देश र जनतालाई असर पार्ने गरी दीर्घकालीन प्रकृतिका काम नगर्न र नगराउन चेतावनी दिदै यसप्रकारमा गलत काममा संलग्न नहुन प्रशासन र सुरक्षा निकाय लगायत राज्यका अन्य निकायहरुलाई समेत आग्रह गर्दछौं।
नेपालमा संवैधानिक व्यवस्था, कानूनी राज्य र लोकतन्त्रका आधारभूत सिद्धान्त एवं मूल्यहरुमाथि भइरहेको उपर्युक्त प्रकारको निरंकुश हमलाका विरुद्ध ऐक्यवद्धता जनाउन हामी नेपाल जनता, नागरिक समाज र सम्पूर्ण लोकतन्त्रवादी शक्तिहरुसँग समेत हार्दिक अपिल गर्दछौं। नेपालको बारेमा हामी नेपालीले नै निर्णय गर्नुपर्छ र नेपालको आन्तरिक राजनीतिमा वाह्य शक्तिको प्रत्यक्ष वा परोक्ष हस्तक्षेप एवम् चलखेल हुन नपाओस् भन्ने कुरामा सजगताका लागि सवैको ध्यान आकर्षित गर्न चाहन्छौं।