काठमाडौं । जनता समाजवादी पार्टीका महन्थ ठाकुर र राजेन्द्र महतो पक्षका नेताहरु सरकारमा गएसँगै अब प्रदेश २ सरकारमा समेत व्यापक हेरफेर हुने भएको छ । आइतबार मुख्यमन्त्री लालबाबु राउतले आफ्नो मन्त्रिपरिषद्का चार मन्त्रीलाई बर्खास्त गरेका छन् ।
जसपा संसदीय दलको बहुमत सदस्यले दलको नेता उनलाई बनाएकै दिन राउतले महन्थ ठाकुर पक्षका एक मन्त्री र तीन राज्यमन्त्रीलाई हटाए । उनले भौतिक पूर्वाधार विकासमन्त्री जितेन्द्र सोनल, भौतिक पूर्वाधार विकास राज्यमन्त्री डिम्पलकुमारी झा, उद्योग पर्यटन, वन तथा वातावरण राज्यमन्त्री सुरेश मण्डल र सामाजिक विकास राज्यमन्त्री अभिराम शर्मालाई हटाएका छन् ।
उनीहरु सबै महन्थ ठाकुर पक्षका हुन् । महन्थ पक्षका नेता केन्द्र सरकारमा सामेल भएपछि प्रदेश सरकारमा समेत व्यवस्थापन गर्न जसपा अध्यक्ष उपेन्द्र यादवले भूमिका खेलेका थिए । यो प्रदेशमा जसपाका ५५ मध्ये ३६ जना सांसदले राउतलाई साथ दिएपछि उनको बहुमत पुगेको छ । प्रदेश २ सरकारमा नेपाली कांग्रेस र माओवादी केन्द्रलाई सहभागी गराएर मन्त्रिपरिषद् बिस्तारको तयारी गरिएको छ ।
काठमाडौं । नेकपा एमालेका अध्यक्ष केपी शर्मा ओलीले आफु विरुद्ध अदालतमा गएको हस्ताक्षर फिर्ता भएमा पार्टीमा कसैलाई कारवाही नगर्ने र २०७५ साल जेठ २ गते भन्दा अगाडीका कमिटीहरु सक्रिय गराउने घोषणाबारे एमाले माधव नेपाल पक्षका नेताहरुको मिश्रित प्रतिक्रिया आएको छ । पछिल्लो समय ओलीसँग नजिक बन्दै गएका योगेश भट्टराईले प्रस्ताव सकारात्मक भएको बताएका छन् ।
तर, नेतृ रामकुमारी झाँक्री भने यो प्रस्ताव छलकपटपूर्ण भएको बताएकी छिन् । आफूहरुले संसद विघटन गर्ने सरकारको असंवैधानिक कदमको विरोध गरेको भन्दै त्यसबारेमा कुनै प्रश्चाताप नगरेको यो प्रस्तावको कुनै अर्थ नभएको बताएकी छिन् । उता, ओलीको समर्थन गरेका योगेशले भने अदालतमा शेर बहादुर देउवालाई प्रधानमन्त्रीको प्रस्तावमा हस्ताक्षर गरेका छैनन् ।
सोहीकारण उनी पार्टीको कारवाहीमा पनि छैनन् । एमालले ११ जना नेतालाई मात्र कारवाही गरेको छ । जसमा माधव कुमार नेपाल, झलनाथ खनाल, रामकुमारी झाँक्रीसहितका नेता छन् । आज नेपाल समूहको संयुक्त बैठक बसेर यसबारे प्रतिक्रिया दिने तयारी रहेको छ ।
काठमाडौं । नेकपा एमालेका अध्यक्ष केपी शर्मा ओलीले पार्टी फूटको अन्तिम तयारीमा पुगेसँगै थप लचिलो हुने संकेत गरेका छन् । एमाले माधव नेपाल समुहले अब नयाँ पार्टी गठनको विकल्प नभएको निर्णय सार्वजनिक गरेकै दिन ओलीको यस्तो आह्वान सार्वजनिक भएको हो ।
उनले पार्टी एकताका लागि भन्दै ६ बुँदे प्रस्ताव अघि सारेका छन् । पार्टीलाई ३ जेठ २०७५ पूर्वको अवस्थाबाट अघि बढाउन आफु तयार रहेको उनको भनाई छ । आफूलाई हटाएर विपक्षी दलका नेतालाई प्रधानमन्त्री बनाउन हस्ताक्षर गरेका सांसदको हस्ताक्षर भने फिर्ता हुनुपर्ने उनको प्रस्ताव छ ।
शुक्रबार माधवकुमार नेपाल समूहको स्थायी कमिटी बैठकले एकता वार्तालाई अध्यक्ष ओलीले दाउपेचका रुपमा मात्र लिएको निष्कर्ष निकालेको समयमा ओलीको संयमित विज्ञप्ती सार्वजनिक भएको छ ।
यसले पुनः एकपटक ओली अफ्ठ्यारोमा परेको स्पष्ट भएको छ । उनी अफ्ठ्यारो अवस्था आउँदा निकै लचिलो देखिने र पछि अरुका विरुद्ध जाइलाग्ने प्रवृत्तिका कारण नेताहरु आश्वस्त भने हुन सकेका छैनन् ।
ओलीले एमालेलाई सुदृढ गरेर मात्र कम्युनिस्ट आन्दोलनलाई बलियो र एकतावद्ध बनाउन सकिने उल्लेख गरेका छन् । उनले पार्टी अध्यक्षको हैसियतमा आफूले एकताका निम्ति पहल पनि गरेको बताउँदै अगाडी लेखेका छन् ‘हाम्रो अनवरत प्रयासका बाबदुज जे नहुनुपर्ने, त्यही भइरहेको छ ।’
यस्तो छ ओलीको प्रस्ताव १. नेकपा एमालेलाई २०७५ साल जेठ ३ गते पूर्वको अवस्थाबाट अगाडि बढाइनेछ । नेपाल कम्युनिस्ट पार्टी (नेकपा)को केन्द्रीय कमिटीका सदस्यहरुमध्ये एकताको पक्षमा उभिनु भएका कमरेडहरुलाई आधार मानेर केन्द्रीय कमिटी र स्थायी कमिटीको संरचना गतिशील हुनेछन् ।
२. मातहतका पार्टी कमिटी र जनसंगठनहरु मुलभूत रुपमा २०७५ जेठ ३ पूर्वको अवस्थामा फर्केर क्रियाशील हुने छन् ।
३. संगठनात्मक क्षेत्रका यी निष्कर्षहरु कार्यान्वयन गर्ने क्रममा देखा पर्ने समस्या समाधानका लागि कार्यदलले काम गर्ने छ ।
४.आफ्नो पार्टीका अध्यक्षलाई प्रधानमन्त्री पदबाट हटाई विपक्षी दलका नेतालाई प्रधानमन्त्री बनाइयोस् भन्ने मागसहित सर्वोच्च अदालतमा प्रस्तुत रिट निवेदनमा प्रयोग भएको नेकपा एमालेका निवर्तमान सांसदहरुको हस्ताक्षर फिर्ता हुनेछ ।
५. यसबीचमा विभिन्न कमरेडहरुबाट भएका गल्ती तथा कमजोरीलाई लिएर कुनै कारबाही गरिने छैन, पूर्वाग्रह राखिने छैन, कुनै भेदभाव गरिने छैन ।
६. नेकपा एमालेलाई बैचारिक, संगठनात्मक र भावनात्मक रुपले एकतावद्ध अनुशासित र अझ सुदृढ बनाउन सबै कमरेडहरुले रचनात्मक योगदान गर्नु हुनेछ ।
काठमाडौं । नेपाल सरकारले डेनमार्क सरकारसँग खोप उपलब्ध गराउन आग्रह गरेको छ । डेनमार्क सरकारले कोरोना खोप उपलब्ध गराउन सकारात्मक देखिएसँगै स्वास्थ्य सेवा विभागले समेत पत्र लेखेको नेपाली संचारमाध्यमले लेखेका छन् । डेनिस सरकारसँग स्वास्थ्य सेवा विभागले एस्ट्राजेनेकाको खोप १४ लाख डोज उपलब्ध गराउन आग्रह गरेको हो ।
खोपको उपलब्ध गराउन सहजीकरणका लागि समेत सरकारले युनिसेफसँग आह्वान समेत गरेको छ । यो खोप कोभ्यासको अनुदान नभएको बताइएको छ । पछिल्लो समय अमेरिकाले नेपाललाई कोभ्याक्स कार्यक्रममार्फत खोप उपलब्ध गराउने घोषणा गरेको छ । यद्दपी यसको संख्या र मिति तय भएको छैन ।
नेपालमा पहिलो खोप लगाएका करीव १४ लाख जेष्ठ नागरिक खोपको पर्खाइमा छन् । दोस्रो खोप समयमा नआउँदा उनीहरुमा मानसिक तनाव बढेको छ । भारतले खोप निर्यात रोकेपछि नेपालले पैसा पठाएपनि खोप आउन सकेको छैन ।
काठमाडौं । आगामी आर्थिक वर्ष २०७८\७९ को बजेटमा निजी क्षेत्रसँग सम्बन्धित कार्यक्रम कार्यान्वयन गर्न अर्थ मन्त्रालयले कार्यदल गठन गरेको छ ।
आइतबार निजी क्षेत्रका प्रतिनिधिमूलक संघसंस्थासँग छलफलपछि मन्त्रालयले स्टार्टअप व्यवसाय र कार्यस्थलमा आधारित तालिम तथा रोजगारी कार्यक्रमसम्बन्धी गृहकार्य गर्न कार्यदल गठन गरेको हो । अर्थ मन्त्रालयका सहसचिव महेश भट्टराई संयोजक रहेको कार्यदलमा उद्योग वाणिज्य तथा आपूर्ति मन्त्रालय र राष्ट्रिय योजना आयोगका साथै नेपाल उद्योग वाणिज्य महासंघ र नेपाल उद्योग परिसंघका प्रतिनिधि रहेका छन् ।
संयोजक भट्टराईले कार्यदलले आर्थिक वर्ष २०७८\७९ सुरु भएसँगै कार्यक्रम कार्यान्वयन गर्ने गरी असार मसान्तभित्रै आवश्यक कार्यविधि र कार्ययोजना बनाउने बताए ।
आर्थिक वर्ष २०७८\७९ को बजेटमा युवा उद्यमीलाई स्टार्टअप व्यवसायमा संलग्न हुन उत्प्रेरित गर्ने उद्देश्यले परियोजना धितो राखी एक प्रतिशत ब्याजदरमा २५ लाख रुपैयाँसम्म बीउ पुँजीकर्जा उपलब्ध गराउने उल्लेख गरिएको छ । यसका लागि १ अर्ब रुपैयाँको च्यालेन्ज फण्ड स्थापना गर्ने पनि बजेटमा उल्लेख छ ।
बजेटमा स्वदेशी उद्योगको आवश्यकता अनुरुपको सीपयुक्त जनशक्तिको विकास गर्न निजी क्षेत्रको साझेदारीमा उत्पादन तथा सेवामुलुक उद्योगमा प्रशिक्षार्थी कामदारलाई तीन महिनाको न्यूनतम पारिश्रमिक बराबरको अनुदान उपलब्ध गराइ कार्यस्थलमा आधारित तालिम सञ्चालन गर्न १ अर्ब रुपैयाँ छुट्याएको छ ।
तालिम प्राप्त गर्ने प्रशिक्षार्थी कामदारलाई आधारभूत तालिम दिई सोही उद्योगमा न्यूनतम २ वर्षको रोजगारी सुनिश्चित गर्ने व्यवस्था मिलाइनेलगायत कार्यक्रम समेत बजेटमा राखिएको छ ।
काठमाड । पछिल्लो २४ घण्टामा देशभर ३४७९ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार देशभरका प्रयोगशालामास्वास्थ्य तथा जनसंख्या मन्त्रालयका अनुसार १०४७१ पीसीआर परीक्षणबाट ३०२४ र ३२६२ एन्टिजेन परीक्षणमा ४५५ जना गरी ३४७९ जनामा संक्रमण पुष्टि भएको हो ।
पछिल्लो २४ घण्टामा ६,६३६ जना संक्रमणमुक्त भएका छन् ।
काठमाडौं । सर्वोच्च अदालतले गण्डकी प्रदेश सभा सदस्यबाट राष्ट्रिय जनमोर्चाका सांसद कृष्ण थापालाई पुनर्वहाली गर्न अन्तरिम आदेश दिएको छ।
आइतबार कुमार चुडालको एकल इजलासले उक्त आदेश दिएको हो। राष्ट्रिय जनमोर्चाले उनलाई कारबाही गर्दै प्रदेश सभा सदस्य पदसमेत नरहेपछि उनी सर्वोच्च अदालत पुगेका थिए ।
अदालतले आदेशमा भनेको छ, “निजको सांसद पद नरहेमा निजको काम कर्तव्य र अधिकारमा तत्काल पुग्न सक्ने अपुरणीय क्षतिसमेतको दृष्टिकोणबाट प्रस्तुत निवेदनको अन्तिम टुंगो नलागेसम्म निजको गण्डकी प्रदेश सभा सदस्यको पद रिक्त गर्ने गरी भएका सम्पूर्ण निर्णयहरु तथा सो सम्बन्धी पत्राचार, सूचना, जानकारीसमेत कार्यान्वयन नगर्नु, नगराउनू, निज निवेदकलाई प्रदेश सभा बैठकमा नियमितरुपमा भाग लिन र सो हैसियतमा मतदान गर्ने, मत प्रकट गर्ने कार्यमा वञ्चित नगर्नु, नगराउनू ।”
काठमाडौं । प्रतिनिधिसभा विघटन सम्बन्धी दर्ता भएको रिटको सुनुवाईका लागि गठन भएको संवैधानिक इजलास फेरि विवादमा परेको छ ।
सरकारी पक्षका चार जना कानुन व्यवसायीले प्रतिनिधि सभा विघटनसम्बन्धी रिट ११ जना न्यायाधीशले हेर्न नमिल्ने जिकिरसहित निवेदन दर्ता गर्न खोजेपछि विवादमा परेको हो ।
प्रधानन्यायाधीश राणाले विवाद झिक्ने प्रधानमन्त्री पक्षका वकिललाई मानहानीको मुद्दा चलाउने चेतावनी दिएका छन् ।
प्रधानन्यायाधीश राणाले कडासँगै ‘कानुन व्यवसायीको रूपमा तपाईंहरूले इजलासको मर्यादा कायम राख्नुपर्छ’ भनी निवेदकहरूलाई जवाफ दिएका छन् ।
राणाले भने, ‘तपाईंहरूको निवेदनले यो मुद्दामा कुनै पनि न्यायाधीशले हेर्न नमिल्ने अवस्था आउन सक्छ । निवेदनका कारण तपाईंहरूलाई अवहेलना मुद्दा लगाउनु पर्ने हुन सक्छ । तपाईंको निवेदन दर्ता भएपछि आउने अवस्थाको भागेदार तपाईं नै हुनुपर्छ ।’
ओली पक्षका वकिल राजाराम घिमिरेले संसदीय सुनुवाइबाट आएका र कल्याण श्रेष्ठ र सुशीला कार्की प्रधानन्यायाधीश तथा न्यायपरिषद् अध्यक्ष हुँदा नियुक्त भएका न्यायाधीशलाई इजलासमा राख्न नमिल्ने भन्दै निवेदन पेश गरेका थिए ।
प्रधानन्यायाधीश राणाले आज प्रतिनिधिसभा विघटनसम्बन्धी रिटको सुनुवाईका लागि वरिष्ठताका आधारमा संवैधानिक इजलास पुर्नगठन गरेका थिए ।
इजलासमा प्रधानन्यायाधीश राणासहित न्याायधीशहरू दीपककुमार कार्की, मीरा खड्का, ईश्वरप्रसाद खतिवडा र आनन्दमोहन भट्टराई रहेका छन् ।
काठमाडौं । शेयर बजारले ऐतिहासिक रेकर्ड ताडेको छ । साताको पहिलोदिन नेप्सेले सर्वाधिक २९०६ विन्दु चुम्दै नयाँ कीर्तिमान बनाएको हो ।
नेप्सेले २९०० विन्दु नाघेकोको यो इतिहासमै पहिलोपटक हो । यसअघि गत विहिबार हालसम्मकै उच्च २८५६ विन्दु चुमेको थियो । कारोबार रकममा पनि नयाँ रेकर्ड बनाएको छ ।
एकैदिन १७ अर्ब २७ करोड बढीको कारोबार भएको छ । यो हालसम्मै उच्च कारोबार हो । यसअघि २०७८ जेठ १६ गते आइतबार १७ अर्ब २ करोड ८४ लाख बराबरको करोबार भएर नयाँ रेकर्ड कायम गरेको थियो ।
यसदिन नेप्से ५०.१४ अकले बढेर २९०६. ९१ विन्दुमा पुगेको छ । नेपाल स्टक एक्सचेन्जका अनुसार आइतबार २१८ कम्पनीको १७ अर्ब २७ करोड १७ लाख ८७ हजार ५२४ रुपैयाँ बराबरको ३ करोड ७४ लाख ५५ हजार १८९ कित्ता शेयर किनबेच भएका छन् ।
आज कारोबारमा आएका १३ वटा समूहमध्ये ९ समूहको परिसूचकमा हरियाली छाएको छ भने ४ समूहको परिसूचक राताम्मे भएका छन् ।
विकास बैंक समूहको परिसूचक सबैभन्दा धेरै १४५. १६ अंकले बढेको छ भने निर्जीवन बीमा समूह ११२.६८ अंकले घटेको छ ।
आज कारोबारमा आएका २१८ कम्पनीमध्ये ९९ कम्पनीको शेयर मूल्य बढेको छ भने ११३ कम्पनीको मूल्यमा गिरावट आएको छ । ६ कम्पनीको मूल्य स्थिर रहेको छ ।
आज नेपाल पुनर्बीमा कम्पनीको सर्वाधिक कारोबार भएको छ । यसको १ अर्ब २१ करोड रुपैयाँ बढीको कारोबार भएको छ । कारोबार रकमकै आधारमा नेपाल इन्फ्रास्ट्रक्चर बैंकको ८३ करोड र लुम्बिनी विकास बैंक ५४ करोडको कारोबार सहित शीर्ष तीन स्थानमा रहे ।
उच्च अंकले बढेको बजारमा आज ८ कम्पनीको शेयर मूल्य पोजेटिभ सर्किट लागेको छ । महिला लघुवित्तको सेयर मूल्य ठ्याक्कै १० प्रतिशत बढेको छ ।
गुडविल फाइनानस, लुम्बिनी विकास बैंक र रिडी हाइड्रोपावरका शेयरधनीले करिब १० प्रतिशत कमाएका छन् । यस्तै, नेपाल बंगलादेश बैंक ९ प्रतिशत, मेगा, मितेरी डेभलपमेन्ट, पोखरा फाइनान्स, निफ्रा र लक्ष्मी बैंकको सेयर मूल्य ८ प्रतिशतले बढेको छ ।
कतार । कतारमा मध्य दिउँसोको चर्को घाममा काममा लगाउन पाइदैंन । तर, सरकारको यो नियम अटेरी गरि काममा लगाएका ५४ कम्पनी कारवाहीमा परेका छन् । कतार सरकारले दिउँसोको चर्को घाममा काम लगाउने ५४ वटा कम्पनीलाई कारबाही गरेको हो ।
मजदुरलाई दिउँसोको चर्को घाममा काम लगाउने कम्पनीलाई कारबाही गरिएको त्यहाँको प्रशासनिक विकास, श्रम तथा सामाजिक सुरक्षा मामिला मन्त्रालयलाई उदृत गर्दै संचारमाध्यमले जनाएका छन् । कतारमा जुन १ देखि सेप्टेम्बर १५ सम्म बिहान १० देखि दिउँसो साढे ३ बजेसम्म घर बाहिर काम लगाउन पाइन्न । दिउँसो हुने उच्च तापक्रमबाट मजदुरलाई बचाउन यस्तो नियम बनाइएको हो ।
खाडीका बहराइन, कुवेत र ओमनले १ जुलाईदेखि ३१ अगस्टसम्म, साउदी अरब र यूएईले १५ जुनदेखि १५ सेप्टेम्बरसम्म दिउँसोको समयमा मदजुरलाई बाहिर काम लगाउन नपाइने नियम कार्यान्वयनमा ल्याइसकेका छन् ।
बहराइनमा मध्याह्न १२ देखि ४ बजेसम्म, कुवेतमा बिहान ११ देखि ४ बजेसम्म, ओमनमा मध्याह्न १२ः३० देखि ३ः३० सम्म, साउदीमा १२ देखि ३ बजेसम्म र यूएईमा १२ः३० देखि ३ बजेसम्म काममा लगाउन नपाइने नियम छ । यी मुलुक धेरै नेपाली नागरिक काममा पुगेको मुलुक हुन् ।
काठमाडौं । उपप्रधानमन्त्री तथा शहरी विकास मन्त्री राजेन्द्र महतो नेपालमा बहुल राष्ट्रिय राज्य हुनुपर्ने बताएपछि देशभर व्यापक विरोध भइरहेको छ । यसबारे प्रधानमन्त्री केपी शर्मा ओली मौन बसेको भन्दै उनको समेत आलोचना भइरहेको छ । यसै सन्दर्भमा महताले राष्ट्रिय एकता र अखण्डताप्रति आफू पूर्ण प्रतिवद्ध रहेको भन्दै आफ्नो बोली सच्याएका हुन् ।
मन्त्री भएपछि शुक्रबार राती सिंहदरबारमा कार्यभार सम्हाल्न पुगेका उनले बहुल राज्यको विषय बोलेसँगै आलोचना शुरु भएको हो । शनिबार राती मन्त्री महतोले एक प्रेस विज्ञप्ति निकालेका छन् ।
जसमा उनले आफ्नो भनाइ बङ्ग्याएर र गलत अर्थ लाग्ने गरी प्रचारप्रसार भएकोमा ध्यानाकर्षण भएको बताएका छन् । उनले बहुल राज्य नभएसम्म अधिकार र पहिचानको निम्ति आन्दोलन जारी राख्ने बताएका थिए । महतोले संविधानमा आफूहरूका असंतुष्टी रहेकोले संशोधनका लागि कार्यदलमा आफ्ना धारणा राख्ने उल्लेख गरेका छन् ।
काठमाडौं । सरकारको सिफारिसमा राष्ट्रपतिले गरेको प्रतिनिधिसभा विघटनको मुद्दामा आजबाट संवैधानिक इजलासमा सुनुवाइ शुरु हुँदैछ । प्रधानन्यायाधीश चोलेन्द्रशमशेर राणाले यस सम्बधी मुद्दाको सुनुवाइमा गर्न आइतबार नयाँ संवैधानिक इजलास गठन गर्ने योजना बनाएका हुन् ।
यसअघि प्रगठन गरेको संवैधानिक इजलासमा रिट निवेदकतर्फका वकिलले आपत्ति जनाएपछि विवाद भइरहेको छ । इजलासमा रहेका न्यायाधीशद्वय तेजबहादुर केसी र बमकुमार श्रेष्ठले यी मुद्दा हेर्न नमिल्ने वकिलहरुको प्रश्न छ ।
न्यायाधीश केसी र श्रेष्ठ चाँही इजलासै रहने अडानमा छन् । अन्य दुई न्यायाधीश आनन्दमोहन भट्टराई र दीपककुमार कार्की भने इजलासमा नबस्ने भन्दै अलग भएका छन् ।
सर्वोच्च बारका पदाधिकारीसँगको छलफल र सर्वोच्च अदालतका न्यायाधीशहरूको पूर्ण बैठकमा प्रधानन्यायाधीश राणाले अबको संवैधानिक इजलास रोष्टरमा रहेका न्यायाधीशमध्ये वरिष्ठताका आधारमा गठन गर्ने सहमति जनाएका कारण वरिष्ठताकै आधारमा संवैधानिक इजलास गठन हुने अपेक्षा गरिएको छ ।
काठमाडौं । सरकारले नेपालको पहाडबाट उत्खनन गरि गिट्टी बालुवा भारत निकासी गर्ने गरि लिएको नीति तत्काल खारेज गर्न विपक्षी गठबन्धनले माग गरेको छ । गिट्टी, बालुवा र ढुंगा निकासी खुला गर्ने र त्यसका माध्यमबाट व्यापार घाटा कम भन्दै सरकारले बजेटमा यो नीति राखेको हो ।
सत्ता टिकाउन भारतलाई रिझाउने गरि राष्ट्रहीत विरोधी कदम चालेको भन्दै विपक्षी गठबन्धनले संयुक्त रुपमा यो कदमको कडा विरोध गरेका हुन् । गठबन्धनका शीर्ष नेताहरुले शनिबार संयुक्त विज्ञप्ति जारी गर्दै ढुंगा, बालुवा र गिटीको निकासी गरेर व्यापार घाटा न्यूनिकरण गर्ने बजेटको घोषणा राष्ट्रघाती भएको बताएका हुन् ।
नेपाली कांग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड, एमाले नेता माधवकुमार नेपाल, जनता समाजवादी पार्टीका अध्यक्ष उपेन्द्र यादव र राष्ट्रिय जनमोर्चाकी उपाध्यक्ष दुर्गा पौडेलले नेपालको तराई क्षेत्रलाई मरुभूमिकरण गर्ने र त्यहाँका वासिन्दाहरुलाई बाढी, डुबान र पानीको श्रोत सुक्ने समस्यामा पार्दै जनजीवनलाई नै जोखिमयुक्त बनाउने राष्ट्रघाती र जनघाती घोषणाको संज्ञा दिएका छन् ।
‘वस्तुत यो सत्ता टिकाउनका लागि कसैलाई रिझाउने र राष्ट्रिय स्रोतलाई निहीत स्वार्थ साधनका लागि दुरुपयोग गर्ने राष्ट्रहित विरोधी निर्णय हो,’ विज्ञप्तीमा भनिएको छ । विपक्षी गठबन्धनले शुक्रबार भएको मन्त्रिपरिषद् पुनर्गठनको समेत विरोध गरेका छन् ।
सरकार काम चलाउ भइसकेको र संसद विघटनको मुद्दा सर्वोच्चमा विचाराधीन भएको बेला भएको मन्त्रिपरिषद् विस्तार संवैधानिक र लोकतान्त्रिक मूल्य र मान्यता कै उपहास भएको उनीहरुको भनाई छ । प्रधानमन्त्री कामचलाउ भएपनि उनले दूरगामी प्रभाव पार्ने निर्णय गरिरहेका छन् ।
काठमाडौं । सरकारले पेट्रोलियम पदार्थको भाउ फेरी वृद्धि गरेको छ । डिजेल, पेट्रोल, मट्टितेल र आन्तरिक हवाई इन्धनको मूल्यमा प्रतिलिटरमा दुई रुपैयाँ बढाइएको नेपाल आयल निगमले सूचना जारी गरि जानकारी गराएको छ । अब काठमाडौं उपत्यकामा पेट्रोलको मूल्य प्रतिलिटर १२५, डिजेल तथा मट्टितेलको १०८ र हवाई इन्धन आन्तरिकतर्फको मूल्य प्रतिलिटरमा ८० रुपैयाँ पुगेको छ । सरकारले निषेधाज्ञाकै समयमा दोस्रो पटक मूल्य बढाएको हो । यसअघि जेठ २ गते मूल्य बढेको थियो ।
भारतीय आयल कर्पोरेसनबाट बढेर प्राप्त भएको नयाँ मूल्यका कारण निगमको घाटा चुलिएका कारण मूल्य समायोजन गरिएको निगमको भनाई छ । बढेको मूल्य आजै राति १२ बजेबाट लागू हुनेछ । मूल्य समायोजन पछि पछि निगमलाई पेट्रोलमा ५ रुपैयाँ ३२ पैसा, डिजेल तथा मट्टितेलमा ३ रुपैयाँ १७ पैसा र खाना पकाउने ग्यासमा २५८ रुपैयाँ ४६ पैसा प्रतिसिलिण्डर घाटा रहेको निगमले जनाएको छ ।
काठमाडौं\एजेन्सी । बुर्किना फासोमा आतकंवादीको आक्रमणमा परी कम्तिमा एक सय जना मारिएको छन् । बीबीसीले समाचार एजेन्सी रोयटर्सलाई उदृत गर्दै जनाए अनुसार देशमो उत्तरी भागमा रहेको एउटा गाउँमा हतियारधारिहरूले आक्रमण गरेका छन् । यो घटना शुक्रबार रातीको हो । घटनामा कम्तिमा एक सय जना मारिएको राष्ट्रपति रोक कबोरेले जानकारी गराएका छन् ।
शुक्रवार राति सोल्हान गाउँमा छापा मारिएको र त्यहाँ घर तथा बजारमा आगजनी गरिएको उनको भनाई छ । हालसम्म आक्रमणको जिम्मा कसैले पनि लिएको छैन। तर पछिल्ला दिनहरूमा त्यहाँ इस्लामी समूहहरूको हमला बढेको छ । खासगरी नाइजेर र मालीसँग जोडिएका क्षेत्रमा त्यस्ता घटना बढेको समाचारमा उल्लेख छ ।
बुर्किना फासोले आफ्ना छिमेकी राष्ट्रहरूमा जस्तै गहिरिँदै गएको सुरक्षा सङ्कटको सामना गरिरहेको छ। उक्त क्षेत्रमा शस्त्र समूहहरूले छापा मार्ने र अपहरण गर्ने जस्ता गतिविधि गर्दै आएका छन्। फ्रान्सेली फौजले माली, चाड, मोरीटेनीया, नीजेर र बुर्कीना फासोका सैनिकलाई अतिवादीहरूसँग लड्न सहयोग गरिरहेको समेत बीबीसीले जनाएको छ ।
काठमाडौं । कोरोना भाइरसको संक्रमणबाट पछिल्लो २४ घण्टामा नेपालमा ६८ जनाको मृत्यु भएको छ । स्वास्थ्य तथा जनसंख्या मन्त्रालयले सार्वजनिक गरेको विवरण अनुसार यसअवधिमा उक्त संख्यामा मानवीय क्षति भएको हो । अब नेपालमा कोरोनाबाट ज्यान गुमाउनेको कुल संख्या ७७९९ पुगेको छ ।
नेपालमा कुल संक्रमितको १.६ प्रतिशत मानिसले ज्यान गुमाउनु परेको छ । पछिल्लो केही दिनयता मृत्युदर केही कम भएको देििखएको हो । यसो हुनुमा संक्रमण दर कम हुनु र अस्पतालहरुमा स्वास्थ्य उपकरणको उपलब्धता सहज हुनु हो ।
काठमाडौं । नेपालमा शनिबार ५ हजार मानिसमा कोरोना पुष्टी भएको छ । स्वास्थ्य तथा जनसंख्या मन्त्रालयले सार्वजनिक गरेको विवरण अनुसार पछिल्लो २४ घण्टामा ५०४२ जनामा कोरोना पुष्टी भएको हो । यस अवधिमा १६ हजार ८ सय १४ जनामा परीक्षण गरिएको थियो । पछिल्लो दिनमा परीक्षण कम भएसँगै संक्रमित समेत केही कम भएको देखिएको छ ।
अब नेपालमा कुल ५ लाख ८५ हजार १ सय मानिसमा कोरोना पुष्टी भइसकेको छ । सरकारले पछिल्ला दिनमा एन्टिनेज विधिबाट परीक्षण बढाएको छ । यस अवधिमा निको हुनेका संख्या भने ८२४३ जना रहेको छ । अब नेपालमा कुल ४ लाख ८४ हजार ३ सय ७३ जनाले कोरोना जितेका छन् ।
नयाँ दिल्ली र भारतको राजधानी नयाँ दिल्लीले कोरोना भाइरसको उच्च संक्रमण दरलाई नियन्त्रणमा लिन सफल भएको छ । यससँगै अब लकडाउन खुकुलो बनाउने तयारी दिल्ली सरकारले गरेको छ । भारतीय संचारमाध्यमहरुका अनुसार पछिल्लो साता सङ्क्रमण दर ०.६८ प्रतिशत मात्र देखिएको छ । दिल्लीमा शुक्रबार ५२३ व्यक्तिमा मात्र संक्रमण देखियो । दिल्ली २ करोड भन्दा बढी जनसंख्या भएको घना शहर हो ।
यहाँ शुक्रबार ५० सङ्क्रमितको मात्र मृत्यु भएको पुष्टि गरिएको छ। दिल्लीका मुख्यमन्त्री अरविन्द केजरीवालले दैनिक कोभिड–१९ सङ्क्रमण दरमा गिरावट आएपछि नयाँ दिल्ली र वरपरका क्षेत्रमा आउँदो हप्तादेखि लकडाउनलाई थप खुकुलो पार्ने घोषणाको तयारी गरिरहेका छन् ।
आगामी दिनमा कोभिड–१९ सङ्क्रमणका कारण बन्द बजारलाई केही खुकुलो पार्ने र कोरोनाभाइरसको तेस्रो लहरलाई सामना गर्न आवश्यक तयारीबारे पनि सरकारी संयन्त्र तथा नागरिकलाई निर्देशन दिने तयारी समेत उनले गरेका छन् । सरकारले जून ७ देखि बजार र अन्य गतिविधि संचालन गर्न दिने तयारी गरेको छ ।
सरकारले गत हप्ता उत्पादन तथा निर्माण क्षेत्रको प्रतिबन्धलाई अन्त्य गर्दै स्वास्थ्य सावधानीका साथ नियमित काममा फर्कन अनुमति दिएको थियो । दिल्लीमा अप्रिल १९ देखि लकडाउन जारी छ ।
काठमाडौं । ब्ल्याक फङ्गसको उपचारमा प्रयोग हुने औषधि एम्फोटेरिसिन नेपाल आएको छ । यसअघि यो औषधी नेपालमा थिएन । विश्व स्वास्थ्य सङ्गठन (डब्ल्यूएचओ)ले कालो ढुसीका नामबाट चिनिने ब्ल्याक फङ्गसको उपचारमा प्रयोग हुने औषधि एम्फोटेरिसिन बी नेपाललाई पठाएको हो ।
नेपालको आग्रहमा डब्ल्यूएचओले एक हजार भाइल एम्फोटेरिसिन बी नेपाल आएको बताइएको छ । नेपालमा कालो ढुसीको बिरामी देखिन थालेपछि सरकारले विश्व स्वास्थ्य सङ्गठनसँग जति सक्दो छिटो औषधिको सहयोग पठाउन आग्रह गरेको नेपाली संचारमाध्यमले जनाएका छन् ।
डब्ल्यूएचओले पठाएको यो औषधि भुसुनाको टोकाइका कारण लाग्ने कालाजार रोग विरुद्ध समेत प्रयोग हुन्छ । स्वास्थ्य सेवा विभागबाट थप १० हजार भाइल यो औषधिको खरिदको तयारी समेत भएको छ ।
भारतले कालो फङ्गसका कारण यसको निर्यातमा प्रतिबन्ध लगाएपछि नेपालमा औषधि अभाव भएको हो । नेपालमा अहिलेसम्म १० जनामा कालो ढुसी पुष्टि भइसकेको छ । कालो ढुसीका बिरामी नेपालगञ्ज, वीरगञ्ज र काठमाडौंमा पुष्टी भएको छ ।
काठमाडौं । नेपालका प्रधानमन्त्री केपी शर्मा ओलीले ब्रिटिश समकक्षी बोरिस जोनसनसँग नेपाललाई कोरोना विरुद्धको खोप दिन आह्वान गरेका छन् । ओलीले बीबीसीकी दक्षिण एशिया संवाददाता रजनी वैद्यनाथनसँग कुरा गर्दै दुई देशको ऐतिहासिक सम्बन्धका आधारमा त्यसो गर्नु ब्रिटेनको दायित्व हुने समेत बताए । ओलीले यूकेका लागि नेपाली गोर्खा सैनिकहरूले गरेको त्याग र सेवाका कारण कोभिड सहायतामा नेपाल उसको प्राथमिकतामा पर्नुपर्ने जिकिर समेत छन् ।
बीबीसीका अनुसार उनले छिमेकी भारतमा जस्तै नेपालले समेत अस्पतालका शय्या र अक्सिजनको आपूर्ति अभावसँग जुझिरहेको जानकारी गराए । राजधानी काठमाडौंसहित केही ठाउँमा अवस्था केही सामान्य भइरहे पनि यतिखेर भाइरस ग्रामीण क्षेत्रमा फैलिरहेको उनको भनाई छ । अब नेपाललाई विदेशबाट खोपको जरुरत रहेको बताए ।
झन्डै तीन करोड जनसङ्ख्या भएको नेपालका तीन प्रतिशतभन्दा कम मानिसले मात्र पूर्ण मात्रा खोप लगाएका छन्। ओलीले मानिसहरूलाई खोप दिन सकेमा मात्र कोभिड १९ नियन्त्रण गर्न सक्ने भन्दै नत्र कठिन हुने समेत बताएका छन् । भारतको सङ्कटबीच उसले वाचा गरेको खोप नदिँदा आस्ट्राजेनेकाको पहिलो मात्र खोप लिइसकेका ज्येष्ठ नागरिकले यतिखेर दोस्रो मात्रा लिन पाइरहेका छैनन्। यस्तो संख्या करीव १४ लाख हाराहारी छ ।
काठमाडौं । यो सिजनको हिमाल आरोहण अभियान पुरा भएको छ । अघिल्लो सातासम्म अन्तिम पटक सगरमाथा चुचुरोमा पुगेका आरोही समेत अब क्रमशः काठमाडौं फर्कने क्रममा रहेको पर्यटन विभागले जनाएको छ । यो पटक कति आरोहीले हिमालको चुचुरोमा सफल आरोहण गरे भन्ने तथ्यांक गणनाको काम भइरहेको विभागको भनाई छ । यो सिजन अहिलेसम्मकै बढी संख्यामा आरोहण अनुमति जारी भएका थिए ।
सगरमाथामा मात्र ४ सय ८ जनाले अनुमति लिएका थिए । यो इतिहासमै एक सिजनमा जारी भएको सर्वाधिक अनुमति हो । विभागका अनुसार यो सिजनमा कुल ४ जनाले ज्यान गुमाउनु परेको छ । यसरी ज्यान गुमाउनेमा २ जना आरोही र २ जना शेर्पा सहयोगी छन् । त्यसमध्ये एक जनाको दुर्घटनामा ज्यान गएको हो । ३ जनाको भने उचाई सम्बन्धी समस्याका कारण ज्यान गएको हो ।
यो सिजन सरकारले आरोहणबाट मात्र ४० करोड भन्दा बढी रोयल्टी संकलन गर्न सफल भएको छ । कोरोना महामारीका बीच भएको आरोहणले नेपालको पर्यटनमा भने सकारात्मक सन्देश प्रवाह गरेको छ । तर, अन्तर्राष्ट्रिय मिडियाले फैलाएको अफवाहबाट भने पर्वतारोहण यो सिजन सन्देहमा थियो । सगरमाथा आधार शिविरमा कोरोना फैलिएको भन्दै मिडियाले निरन्तर प्रचार गरेका थिए ।
तर, सरकारले भने ५६ सय मिटरको उचाईमा कोरोना लागेका व्यक्ति रहन नसक्ने र अझ चुचुरोतर्फ त जानै नसक्ने भन्दै यसरी आएका खबरको निरन्तर खण्डन गरेको थियो । कतिपय व्यक्तिमा स्वास्थ्य समस्या देखिएपछि काठमाडौं फर्किएर परीक्षण गर्दा कोरोना पुष्टी भएका घटनालाई आधार शिविरमा फैलिएको भन्न नमिल्ने तर्क सरकारको थियो ।
काठमाडौं । जनकपुरको चर्चित धार्मिक सम्पदा जानकी मन्दिरलाई विश्व सम्पदा सूचिमा राख्ने तयारी शुरु भएको छ । नवनियुक्त संस्कृति, पर्यटन तथा नागरिक उड्डयन मन्त्री उमाशंकर अरगरियाले जनकपुरधामस्थित जानकी मन्दिर क्षेत्रलाई विश्व सम्पदा सूचीमा समावेश गर्न अध्ययन गर्न समिति बनाएका छन् ।
मन्त्रीमा नियुक्त भएपछि पदबहाली ग्रहण गर्नेवित्तिकै पहिलो निर्णय गर्दै मन्त्री अरगरियाले जानकी मन्दिर क्षेत्रलाई विश्व सम्पदा सूचीमा समावेश गर्नका लागि अध्ययन गर्न पुरातत्व विभागका महानिर्देशक दामोदर गौतमको संयोजकत्वमा समिति गठन गरेका हुन् ।
समितिले अध्ययन गरी आवश्यक सिफारिससहित प्रतिवेदन पेश गर्नेछ । जानकी मन्दिर क्षेत्रलाई विश्व सम्पदा सूचीमा समावेश गरी मन्दिरको संरक्षण, सम्वद्र्धन र प्रवद्र्धन गर्नुपर्ने मन्त्री गरगरियाले बताए । प्रधानमन्त्री केपी शर्मा ओलीले शुक्रबार राती गरेको मन्त्रिपरिषद् बाँडफाँटमा उनी पर्यटन मन्त्री बनेका हुन् ।
काठमाडौं । पशुपति क्षेत्र विकास कोषले पशुपतिनाथ मन्दिर मन्दिर परिसरबाट घाट हटाउने तयारी गरेको छ । मन्दिरको ऐतिहासिक, धार्मिक, सांस्कृतिक र पुरातात्विक महत्वलाई कायम राख्न नजिक घाट नराखी अन्यत्र सार्ने गरी गुरुयोजनामा प्रस्तावको तयारी कोषले गरेको हो ।
राससका अनुसार यसअघि कोष सञ्चालक परिषद्ले पारित गरी स्वीकृतिका लागि मन्त्रिपरिषद्मा पेश गरेको गुरुयोजनालाई स्थानीयवासी एवं सरोकार भएका निकायसँग छलफल गरी अन्तिम रुप दिन संस्कृति, पर्यटन तथा नागरिक उड्ययन मन्त्रालयले राष्ट्रिय योजना आयोगका पूर्व सदस्य प्राडा चन्द्रमणि अधिकारीको संयोजकत्वमा समिति गठन गरी पुनरावलोकनका लागि पठाएको हो ।
पुनरावलोकन समितिमा मन्दिर नजिक घाट राख्दा मसानघाटको जस्तो वातावरण बनी धार्मिक स्थलजस्तो हुन नसकेकाले यस्तो प्रस्ताव गर्न लागिएको कोषका सदस्य सचिव डा प्रदीप ढकालले जानकारी दिएका छन् ।
पशुपतिनाथ मन्दिरमा धुप, दीप, बलेर त्यसको सुगन्धमा भक्तजन रमाउनुपर्नेमा कोरोना महामारीका बेला दैनिक कम्तीमा पनि १०० वटा शव आउन थालेकाले पशुपतिनाथ मन्दिरबाट घाट अन्यत्रै वाग्मती किनारमा सार्ने गरी प्रस्ताव गर्न लागिएको उनको भनाई छ ।
Photo Source : Sulav Shrestha/Xinhua
कोरोना महामारी फैलिएका बेला कुनै दिन २०० वटा त कोरोना भई निधन भएकाको शवदाह गरिएको अभिलेख कोषमा छ । पशुपति क्षेत्र कि घाट हो भनी ठम्याउन असहज हुने गरी धुवाँ आउन थालेपछि आर्यघाट पूर्णरुपमा बन्द गर्ने गुरुयोजना कोषले तयार पार्न लागेको हो । विद्युतीय शवदाह गृहलाई पनि अन्यत्र उपयुक्त स्थानमा सार्न प्रस्ताव गन लागिएको छ ।
भष्मेश्वरघाटका दुई वटा घाट राखी अरु हटाएर पशुपतिस्थित वाग्मती किनारलाई पूजा, आरधना, ध्यान, साधना केन्द्रका रुपमा विकास गर्ने गरी योजना बनाउने तयारी अन्तिम चरणमा पुगेको गुरुयोजना पुनरावलोकन समितिको समेत सदस्य सचिव रहेका ढकालले बताएका छन् ।
सरकारले आगामी आर्थिक वर्षमा पशुपति क्षेत्रको विस्तारित गुरुयोजना सम्पन्न गर्न रु ३५ करोड बजेट विनियोजन गरेको छ । आम्दानीका अरु धेरै स्रोत भएकाले शवदाह गरेको दृश्यकै आधारमा विदेशी पर्यटक आकर्षित गर्न सकिन्छ भन्ने तर्क उचित नहुने कोषको निष्कर्ष छ ।
आर्यतीर्थबाट घाट हटाएपनि ब्रह्मनालको व्यवस्था गरिने जनाइएको छ । काठमाडौं उपत्यकामा जनसङ्ख्यासमेत बढ्दै गएकाले घाटको विकल्प खोज्न कोषले सरोकार भएका निकायलाई अनुरोध गर्ने भएको छ । एक करोडसम्म जनसङ्ख्यालाई धान्ने गरी घाट व्यवस्था गरिनुपर्ने कोषको सुझाव छ ।
पशुपति क्षेत्रमा हाल आर्यघाटमा दुई, भष्मेश्वर घाटमा १० र विद्युतीय शवदाह गृहमा तीन गरी १५ घाट सञ्चालनमा छन् । पछिल्लो समय पशुपति क्षेत्रका यी सबै घाटमा २४ सै घण्टाजसो शवदाह हुन थालेको छ । पहिले वाग्मती किनारका गोकर्णेश्वर, हत्यामोचनघाट, शङ्खमूल क्षेत्र, कालमोचनघाटलगायत स्थानमा पनि शवदाह हुने गरेको थियो ।
पछिल्लो समय पशुपति क्षेत्रमा शवदाह सामग्री, क्रियापुत्री भवन, ब्राह्मणको सुविधा आदि कारणले सबै मानिस यहीँ आउँदा मसानघाटका रुपमा विकास हुन लागेको भन्दै कोषले वैकल्पिक व्यवस्था गर्ने प्रस्ताव गुरुयोजनामार्फत् गर्न लागेको हो ।
काठमाडौं । स्वास्थ्य तथा जनसङ्ख्या मन्त्रालयले नेपालमा कोरोनाको तेस्रो र चौथो लहर आउने भन्दै चेतावनी दिएको छ । सो बेला बालबालिका बढी संक्रमित हुने चेतावनी समेत सरकारले दिएको छ । सरकारले एक सूचना प्रकाशित गरि आफ्नो स्वीकृत शय्याको कम्तीमा २० प्रतिशत शय्या कोरोना सङ्क्रमित बालबालिकाका लागि छुट्याउन समेत अस्पतालहरूलाई भनेको छ ।
सबै सरकारी, निजी, सहकारी तथा सामुदायिक अस्पतालहरूलाई पत्र पठाएर मन्त्रालयले २० प्रतिशत शय्या कोरोना सङ्क्रमित बालबालिकाको उपचारका लागि प्रयोग गर्न सक्ने गरी तयारी अवस्थामा राख्न भनेको निर्देशन दिएको हो । पहिलो र दोस्रो लहरमा प्रौढ तथा युवा व्यक्तिहरू बढी सङ्क्रमित भएको र तेस्रो वा त्यसपछि आउने लहरहरूमा बालबालिका बढी प्रभावित हुन सक्ने सम्भावना रहेको चेतावनी मन्त्रालयको छ ।
काठमाडौं । संसद विघटन गरि काम चलाउ बनेको सरकारका प्रधानमन्त्री केपी शर्मा ओलीले मन्त्रिपरिषद्मा व्यापक हेरफेर गरेका छन् । जनता समाजवादी पार्टीबाट महन्थ ठाकुर पक्षको नेताहरुलाई १० मन्त्री बनाएका उनले १७ सदस्यीय मन्त्रिपरिषद् गठन गरेका हुन् । उनले यसअघिको मन्त्रिमण्डलमा रहेका एक उपप्रधानमन्त्री, ९ मन्त्री र तीन राज्य मन्त्रीलाई बिदा गरेका छन् ।
नयाँ मन्त्रिपरिषदमा तीन उपप्रधानमन्त्री बनेका छन् । अर्थमन्त्री विष्णु पौडेल अब उपप्रधानमन्त्री समेत बनेका छन् । नेकपा एमालेका रघुवीर महासेठ र जसपाका वरिष्ठ नेता राजेन्द्र महतोलाई समेत उपप्रधानमन्त्री बनाइएको छ । यसअघिका उपप्रधानमन्त्री इश्वर पोखरेल भने हटेका छन् । महासेठले परराष्ट्र र महतोले शहरी विकास मन्त्रालय सम्हाल्ने भएका छन् ।
नयाँ मन्त्रिमण्डलबाट जसपाबाट उपप्रधानमन्त्री महतोसहित ८ मन्त्री र दुई राज्यमन्त्री थपिए । प्रधानमन्त्री ओलीले शरदसिंह भण्डारीलाई उर्जा, जलस्रोत तथा सिचाई मन्त्री बनाएका छन् । अनिलकुमार झालाई खानेपानी र लक्ष्मणलाल कर्णलाई भूमि व्यवस्था, सहकारी तथा गरिबी निवारण मन्त्रालय जिम्मा लगाएका छन् ।
विमल श्रीवास्तव श्रम, रोजगार तथा सामाजिक सुरक्षा र उमाशंकर अरगरिया वन तथा वातावरण मन्त्री बन्दा चन्दा चौधरीलाई महिला, बालबालिका तथा जेष्ठ नागरिक र एकवाल मियालाई युवा तथा खेलकुद मन्त्री बनेका छन् । सत्तारुढ एमालेका शेरबहादुर तामाङ स्वास्थ्य तथा जनसंख्या मन्त्री बनेका छन् । जसपाका चन्द्रकान्त चौधरी उर्जा र रेनुका गुरुङ महिला बालबालिका राज्यमन्त्री बनेका छन् ।
ओलीले एमाले महासचिव ईश्वर पोखरेलसहित ९ मन्त्री र तीन राज्यमन्त्रीलाई बिदा गरेका छन् । उनले परराष्ट्रमन्त्री प्रदीप ज्ञवाली, स्वास्थ्य तथा जनसंख्यामन्त्री हृदयेश त्रिपाठी, संस्कृति पर्यटन तथा नागरिकमन्त्री भानुभक्त ढकाल, कृषि तथा पशुपक्षी विकासमन्त्री पद्माकुमारी अर्याल, सञ्चारमन्त्री र्पावत गुरुङ र भूमि व्यवस्था, सहकारी तथा गरिबी निवारणमन्त्री डा. शिवमाया तुम्बाहाम्फेलाई मन्त्रीबाट हटाएका हुन् ।
संघीय मामिला तथा सामान्य प्रशासनमन्त्री गणेश गठुन्ना, वन तथा वातावरणमन्त्री प्रेमबहादुर आले र महिला बालबालिका तथा ज्येष्ठ नागरिकमन्त्री जुलीकुमारी महतोलाई समेत हटाइएको छ । स्वास्थ्य राज्यमन्त्री नवराज राउत, सहरी विकास राज्यमन्त्री रामवीर मानन्धर र उद्योग राज्यमन्त्री विमला विकको समेत मन्त्री पद गएको छ ।
मौजुदा मन्त्रिपरिषद्का चार मन्त्रीलाई भने प्रधानमन्त्री ओलीले अटाएनन् । अर्थमन्त्री पौडेल, भौतिक पूर्वाधारमन्त्री वसन्त नेम्वाङ, शिक्षामन्त्री कृष्णगोपाल श्रेष्ठ र कानूनमन्त्री लीलानाथ श्रेष्ठको पद भने जोगिएको छ । गृह, रक्षा, सञ्चार, कृषि, उद्योग वाणिज्य र सामान्य प्रशासन मन्त्रालय भने प्रधानमन्त्री आफैले राखेका छन् ।
काठमाडौं । जनता समाजवादी पार्टी (जसपा)को महन्थ ठाकुर समूह सरकारमा सहभागी हुने भएको छ।
वरिष्ठ नेता राजेन्द्र महतोको नेतृत्वमा सरकारमा जान लागिएको स्रोतले बताएको छ ।
केपी शर्मा ओली सरकारले आफ्ना अधिकांश माग पूरा गरेको भन्दै ठाकुर समूह सरकारमा जान सहमत भएको हो।
महतोले सरकारमा जसपाको नेतृत्व गर्ने भएका छन्। उनले उपप्रधान सहित शहरी विकास मन्त्रीको सपथ लिने तय भएको छ।
शरद सिंह भण्डारी उर्जा, अनिल झा खानेपानी,लक्ष्मणलाल कर्ण भूमिसुधार, विमल श्रीवास्तव श्रम, उमाशंकर अरगरिया युवा तथा खेलकुद, चन्दा चौधरी महिला बालबालिका र एकबाल मिया वनमन्त्री बन्ने तयारी थालेको स्रोतले जनाएको छ ।
जसपाका नेताहरुका अनुसार बालुवाटारमा प्रधानमन्त्री केपी शर्मा ओली र जसपा अध्यक्ष ठाकुरबिच शुक्रवार दिउँसो भएको वार्ता पछि मन्त्रीहरुको नाम टुंगो लागेको हो।
काठमाडौं । पछिल्लो २४ घण्टामा देशभर ६६५३ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार देशभरका प्रयोगशालामा १४ हजार १८२ जनाको पिसिआर र ६ हजार ६३१ जनाको एन्टीजेन परीक्षण गर्दा पिसिआरमार्फत ४ हजार ६२४ जना र एन्टीजेटमार्फत २ हजार २९ जना संक्रमित पुष्टि भएका हुन्।
यो सहित नेपालमा कोरोना संक्रमण हुनेको संख्या ५ लाख ८१ हजार ५६० पुगेको छ । पछिल्लो २४ घण्टामा ८६६३ जना कोरोना मुक्त भएका छन् ।
यो सहित संक्रमण मुक्त हुनेको संख्या ४ लाख ७६ हजार १३० जना पुगेको छ । भने देशभर संक्रिय संक्रमितको संख्या ९७ हजार ६९९ जना रहेका छन् ।
काठमाडौं । अमेरिकी राष्ट्रपति जो बाइडेन र बेलायती महारानी एलिजाबेथ द्वितीयबीच भेटवार्ता हुने भएको छ । आगामी साता जो बेलायत जाँदैछन् । उनी जी सेभेन समिटमा भाग लिने सिलसिलामा त्यहाँ जान लागेका हुन् । सो अवसरमा जो र प्रथम महिला जिल बाइडेनसहित एलिजाबेथसँग भेटवार्ताको समय तय भएको बकिङ्हम प्यालेसलाई उदृत गर्दै समाचार एजेन्सीहरुले जनाएका छन् ।
विश्वमा सबैभन्दा ठूलो अर्थतन्त्र भएका राष्ट्रका नेताहरूबीच हुने जीसेभेन समिटमा भाग लिन जाने क्रममा जो जुन १३ मा विन्डसर महल पुग्ने कार्यक्रम छ । यससँगै बाइडेन महारानी एलिजाबेथलाई भेट्ने १२ औं अमेरिकी राष्ट्रपति बन्ने भएका छन् । एलिजाबेथलाई २०१९ मा पूर्व राष्ट्रपति डोनाल्ड ट्रम्पले भेटेका थिए । महारानी अहिले ९५ वर्षकी भइन् । उनले पहिलो पटक सन् १९५१मा अमेरिकी राष्ट्रपतिलाई भेटेयता सबै अमेरिकी राष्ट्रपतिसँग उनको भेट भएको छ । यो बाइडेनको राष्ट्रपतिका रुपमा पहिलो विदेश भ्रमण हो ।
काठमाडौं । काठमाडौं उपत्यकाका आजबाट निषेधाज्ञा हल्का खुकुलो हुँदैछ । एक हप्तासम्म खाद्यान्न पसल समेत बन्द भएको काठमाडौंमा अब केही खुकुलो बनाइएको हो । उपत्यकामा जेठभर निषेधाज्ञा भने जारी रहने छ । काठमाडौं उपत्यकामा वैशाख १६ गतेदेखि निषेधाज्ञा लागू भएको हो ।
आजदेखि खाद्यान्न, किराना, तरकारी तथा फलफूल पसल, दूध डेरी, मासु पसल, ग्यास पसल बिहान ९ बजेसम्म खोल्न सकिन्छ । निर्माण सामग्री ढुवानीका गाडी राति ९ बजेदेखि बिहान ४ बजेसम्म चलाउन पाइन्छ । गाडी मर्मत गर्ने वर्कसपहरु राति ९ बजेदेखि बिहान ९ बजेसम्म खोल्न पाइनेछ ।
शैक्षिक संस्था, सार्वजनिक निजी गाडी तथा भोज, सभा समारोहजस्ता धेरै मानिस जम्मा हुने स्थल भने बन्द नै रहनेछन् । सरकारले तोकेका मापदण्ड पालना गरी कृषिको काम गर्न सकिनेछ । अत्यावश्यकबाहेक सरकारी कार्यालय, सार्वजनिक संस्थान र बीमा कार्यालयहरु बन्द रहने छन् ।
वाणिज्य बैंकहरुले प्रधान कार्यालयबाहेक उपत्यकामा तीनवटा शाखा कार्यालयमात्र खोल्न पाउने नियम छ । औषधि तथा खाद्यान्नजस्ता अत्यावश्यक वस्तु र सेवा खरिदमा बाहेक जेठ ३१ गतेसम्म कुनै पनि व्यक्ति घरबाट बाहिर निस्कन भने पाइने छैन ।
