Category: अर्थतन्त्र

काठमाडौं । नेपाल एयरलाइन्सले विदेशमा गरिरहेको नियमित उडानको तालीका हेरफेर गरेको छ । कतिपय गन्तब्यको उडान कटौती भएको छ भने कतिपय गन्तब्यको उडान रद्द गरिएको छ ।

कम्पनीका अनुसार भारतको राजधानी नयाँ दिल्लीमा निर्धारित उडान कटौती भएको छ । दैनिक दुई उडान भइरहेको यस रुटमा अब आइतबारदेखि मात्र एक उडान दैनिक हुने नेपाल एयरलाइन्सले स्पष्ट पारेको छ ।

कोरोना भाइरसको संक्रमणका कारण यात्रुको संख्यामा कमी आएका कारण नेपाल एयरलाइन्सले विभिन्न रुटमा आफ्नो उडान तालीका परिवर्तन गरेको जनाएको छ ।

नेपाल एयरलाइन्सले बैंगलौरको नियमित उडान मार्च १९ र ३१ तारिखका लागि रद्द गरेको छ । मुम्वईका लागि हुने प्रत्येक शुक्रबारको उडान १५ मार्च देखि १५ अप्रिलसम्म स्थगित गरिएको छ ।

थाइल्याण्डको बैंककमा मार्च ११ र मार्च २५ को उडान रद्द गरिएको छ । हङकङको मार्च १९ र मार्च २६ को उडान पनि रद्द गरिएको कम्पनीले जनाएको छ ।

कम्पनीले काठमाडौं दोहा उडान फागुन २७ गते देखि अर्को सूचना नभएसम्मका लागि स्थगित गरेको थियो ।

उडानका टिकट खरीद गरेका यात्रुले टिकट फिर्ता गर्दा भुक्तानी गरेको रकम पुरै उपलब्ध हुने नीति ल्याएको छ ।

टिकट उडानको मिति १ पटक परिवर्तन गर्न समेत शुल्क नलाग्ने व्यवस्था गरिएको नेपाल एयरलाइन्सले शुक्रबार जानकारी गराएको हो ।

काठमाडौं । कोटेश्वर-कलंकी सडकमा अब डेडिकेटेड लेन तोकिने भएको छ । त्यसअनुसार अब यात्रुबाहक तथा मालबाहक सवारी साधनले छुट्टै लेनमा मात्र गुड्न पाउने छन् ।

८ लेन सडक रहेको यहाँ निजी र द्रुत गतिमा गुड्ने सवारी साधनले भने छुटटै लेनको प्रयोग गर्नुपर्ने भएको छ ।

यद्दपी यो नियम २ चैतबाट मात्र कार्यान्वयनमा आउने महानगरीय ट्राफिक प्रहरी महाशाखाले जानकारी दिएको छ । यस रुटमा अब यात्रुवाहक तथा मालवाहक गाडी बायाँ सर्भिस लेनबाट र निजी तथा साना सवारी साधन दाहिने मुख्य (द्रुत) लेनबाट मात्र चलाउन पाइने छ ।

यो रुटमा सबै सवारी साधन एकै लेनमा दौडिदा दूर्घटना बढेको छ । सडक लेन अनुशासित पालना गर्न, यातायात व्यवस्थित गर्न र सवारी आवागमनलाई सहज बनाउन यस्तो नियम ल्याउन लागिएको कार्यालयको भनाई छ ।

यसले ट्राफिक नियमको पालनामा समेत चालकहरुलाई सचेत गराउने छ । यो सडक खण्ड काठमाडौंमा तुलनात्मक रुपमा व्यबस्थित र सुविधायुक्त रहेको छ ।

यात्रुबाहक, मालबाहक र बिस्तारै गुड्ने गाडीहरु बाँया लेनबाट र साना हलुका र द्रुत गतिमा गुड्ने सवारी साधन दाहिने लेनबाट चल्ने अन्तर्राष्ट्रिय प्रचलन अनुसार यहाँ समेत सोही अपनाउन लागिएको हो । यो नियम अहिले जडिवुटी-सुर्यविनायक सडक खण्डमा कार्यान्वयनमा छ ।

काठमाडौं । नेपाली आन्तरिक वायुसेवा कम्पनीले कर्मचारीको सेवा सुविधा कटौती गर्ने भएका छन् । सेवा सुविधा कटौती गर्नुका साथै बेतलवी बिदामा बस्न समेत प्रोत्साहन गर्ने नीति कम्पनीले लिने भएका छन् ।

कोरोना भाइरसका कारण पर्यटक आगमन ८० प्रतिशतसम्म ओरालो लागेको छ ।

यस अवस्थामा व्यवसाय नचल्ने र खर्च धान्न मुस्किल पर्ने भन्दै व्यवसायीले कर्मचारीको सेवा सुविधा कटौतीको तयारी गरेका हुने । उनीहरुले सरकारसँग बैंकको ब्याजमा सहजिकरण गर्न समेत माग गरेका छन् ।

अब मागको तुलनामा आपूर्तिसमेत धेरै भएका कारण जहाजहरु ग्राउन्डेड समेत गरिने भएको छ । आवश्यक नभएको अवस्थामा सबै जहाज चलाउनुको साटो बन्द गर्न लागिएको वायुसेवा कम्पनीहरुको छाता संगठन वायुसेवा सचालक संघ (आयोन)ले जानकारी दिएको छ ।

वायुसेवा सञ्चालकहरुले कोरोना भाइरसका कारण अन्तर्राष्ट्रिय पर्यटक आगमन घटेका कारण आन्तरिक हवाई सेवा प्रभावित भएको बताएका हुन् । छिमेकी मुलुक चीनबाट फैलिएको कोरोना भाइरसले नेपालका मूख्य पर्यटकीय स्रोत बजार सबैभन्दा बढी प्रभावित भएका छन् ।

त्यसमा पनि संक्रमणले विश्वव्यापी रुप लिएसँगै संसारभर पर्यटन सेवा नराम्रोसँग प्रभावित भएको छ ।

यसले आन्तरिक वायुसेवा कम्पनीको व्यापार उल्लेख्य घटेको वायुसेवा सञ्चालकहरुको भनाई छ । नेपालको आन्तरिक उडानमा कोरोनाको प्रभावका कारण करीव ४ अर्ब रुपैयाँ बराबरको क्षतिको अनुमान वायुसेवा कम्पनीहरुले गरेका छन् ।

सन् २०२० को पहिलो दुई महिनामा आन्तरिक हवाई यात्रु ४० प्रतिशतले घटेको अनुमानका आधारमा यस्तो क्षतिको आंकलन गरिएको हो ।

नजिकिएको बसन्तु ऋतुको पर्यटक बुकिङ समेत धमाधम रद्द भइरहेको अवस्थामा आगामी दिनमा अझै नराम्रोसँग व्यवसाय प्रभावित हुने आंकलन कम्पनीहरुको रहेको छ ।

खासगरी नेपालको स्रोत बजार चीन, हङकङ, कोरिया, थाइल्याण्ड, भारत तथा मध्यपूर्वी मुलुकमा कोरोनाले प्रभाव देखाइसकेको छ ।

काठमाडौं । नेपालमा चीनबाट आउने पर्यटकको संख्या ओरालो लागेको छ । कोरोनाको प्रकोप फैलिएसँगै चीनबाट पर्यटक आवागमन करीव ठप्प प्राय छ ।

फेब्रुअरी महिनामा मात्र ३ हजार २ सय ८५ जना चिनियाँ पर्यटक नेपाल आएका छन् ।

सन् २०१९ को फेब्रुअरीमा चीनबाट करीव १४ हजार चिनियाँ पर्यटक नेपाल आएका थिए ।

यो वर्ष आएका चिनियाँमध्ये पनि अधिकांश कूटनीतिक नियोगमा कार्यरत कर्मचारी तथा विभिन्न आयोजनामा काम गर्ने कर्मचारी रहेको बताइएको छ । पर्यटक आगमन भने रोकिएको छ ।

चीनबाट साविकमा सातामा ६५ उडान हुने गरेकोमा अहिले खुम्चिएर सातामा ४ उडानमा सिमित भएको छ ।

चिनियाँ पर्यटकको आगमन घटेपछि समग्र पर्यटक आगमन समेत प्रभावित भएको छ ।

नेपाल भ्रमण वर्ष २०२० को दोस्रो महिनामा ०.९९ प्रतिशतले पर्यटक आगमन कम भएको हो ।

सन् २०१९ को दोस्रो महिनामा १ लाख २ हजार ४ सय २३ जना पर्यटक नेपाल आएका थिए ।

फेब्रुअरी २०२० मा कूल १ लाख १ हजार ४ सय जना पर्यटक नेपाल आएको तथ्यांक विभागले सार्वजनिक गरेको छ । फेब्रुअरीमा हवाई यात्राबाट ७७ हजार ६४ जना पर्यटक आएका छन् ।

गत वर्षभन्दा यो वर्ष हवाई यात्रु केही बढेका छन् ।

स्थलमार्गबाट भने २४ हजार ३ सय ३६ जना पर्यटक नेपाल आएको अध्यागमन विभागको तथ्यांकमा उल्लेख छ ।

समग्रमा पर्यटक आगमन खस्किएपनि म्यानमार, श्रीलंका र थाइल्याण्डबाट आउने पर्यटकमा भने ठूलो वृद्धि पाइएको छ ।

यी बौद्धमार्गी मुलुक हुन् । म्यानमार, श्रीलंका र थाइल्याण्डबाट अघिल्लो वर्षको यसै महिनाको तुलनामा क्रमशः ४५९५.६, ११२६.८ र ५६५.५ प्रतिशत बढी पर्यटक भित्रिएका छन् ।

काठमाडौं । नेपाल एयरलाइन्सले जापानको राजधानी टोकियो नजिकै रहेको नारिता विमानस्थलमा आजबाट उडान सेवा प्रारम्भ गर्दैछ ।

सोमबार बिहान १ बजेर २५ मिनेट जाँदा नेपाल एयरलाइन्सको जम्बो जहाज नारिताका लागि उड्दैछ । उक्त जहाजमा नेपालबाट २ सय ३७ जना यात्रु नारिताका लागि उड्दैछन् ।

जापानको नारिताबाट भने पुरै सीट भरेर यो जहाज नेपाल आउने भएको छ । यस जहाजमा २ सय ७४ जना यात्रु अट्न सक्ने क्षमता रहेको छ ।

नेपाल एयरलाइन्सले यसअघि जापानकै ओशाकामा उडान गरिरहेको थियो । तर, त्यहाबाट व्यापार राम्रो हुने सम्भावनासहित नारितामा उडान गर्न लागिएको हो ।

नेपाल एयरलाइन्सले एकतर्फी ३७ हजार रुपैयाँमा काठमाडौं जापान उडान गर्दैछ । यस रुटबाट कम्पनीले उच्च नाफा कमाउने लक्ष्य राखेको छ । नेपाल एयरलाइन्सको नारिता नवौं गन्तब्य हो ।

नेपाल एयरलाइन्ससँग अन्तराष्ट्रिय उडानका लागि अहिले कूल ४ वटा जहाज रहेका छन् ।

नेपाल सरकारले नेपाल एयरलाइन्सको जापान उडानका दौरान जापान र नेपाल कतै पनि औपचारिक कार्यक्रम भने नगर्ने भएको छ ।

काठमाडौं । नेपाल वायुसेवा निगमलाई अब कम्पनी मोडलमा संचालनको तयारी गरिएको छ ।

पूर्णसरकारी स्वामित्वको कम्पनी नेपाल एयरलाइन्सले नाफा कमाउन सकिरहेको छैन । करीव ४० अर्ब ऋण समेत रहेको छ ।

यस अवस्थामा कम्पनी नाफामा जान नसक्ने भन्दै यसलाई कम्पनीमा लैजाने निर्णय भएको हो ।

संचालक समितिले कम्पनी मोडलमा लैजाने प्रस्ताव गरी मन्त्रालयमा पठाउने निर्णय गरेको छ । अब अर्थ मन्त्रालयले स्वीकृति दिएमा यो प्रस्ताव मन्त्रीपरिषद् जानेछ ।

नेपाल एयरलाइन्सलाई निजीकरण गर्दा २५ प्रतिशत शेयर बिक्रि गरिनेछ । ७५ प्रतिशत शेयर सरकारकै नाममा रहेन छ ।

२५ प्रतिशतमध्ये ३ प्रतिशत कर्मचारी र २२ प्रतिशत सरकारी संस्थान तथा वित्तीय कम्पनीहरुबाट लगानी हुने गरी शेयर संरचनाको प्रस्ताव गरिएको छ ।

नेपाल एयरलाइन्सको सर्वसाधारणले समेत शेयर पाउने छन् । तर, त्यो शेयर भने ७५ प्रतिशत भित्रबाटै सरकारले सर्वसाधारणका लागि शेयर खोल्न सक्ने प्रस्ताव गरिएको छ ।

नेपाल एयरलाइन्ससँग पुरानो गौरव निकै उज्ज्वल रहेपछि वर्तमान कमजोर भएका कारण कम्पनी घाटामा गएको हो । पछिल्लो समय नयाँ जहाज आएपछि भने केही राम्रो संकेत देखाएको छ ।