Category: स्वास्थ्य

काठमाडौं । नेपालमा शनिबार थप ८४१८ जनामा कोरोना भाइरसको संक्रमण पुष्टी भएको छ । स्वास्थ्य तथा जनसंख्या मन्त्रालयका अनुसार यो संक्रमण कुल १८३०४ जनामा गरिएको परीक्षणबाट पुष्टी भएको छ । यसआधारमा नेपालमा संक्रमण दर ४५ प्रतिशत भन्दा बढी देखिएको छ ।

अब नेपालमा कोरोनाबाट संक्रमित हुनेको कुल संख्या ३८५८९० जना पुगेको छ । शनिबार कुल ३३७० जनाले कोरोनालाई जित्न सफल भएका छन् । कोरोना जित्नेको कुल संख्या २ लाख ९८ हजार ७ य ५६ जना रहेको छ ।

कुल ७४.४ प्रतिशतले कोरोना जित्न सफल भएका छन् । अब नेपालमा सक्रिय संक्रमित ८३ हजार ४ सय ९३ रहेको तथ्यांकले देखाएको छ । नेपालमा अहिलेसम्म २६ लाख १५ हजार ७ सय २० वटा आरटी पीसीआर परीक्षण भएको छ ।

काठमाडौं । नेपालमा कोरोना भाइरसको संक्रमणबाट थप ५३ जनाको मृत्यु भएको छ । स्वास्थ्य तथा जनसंख्या मन्त्रालयले सार्वजनिक गरेको विवरण अनुसार शनिबार उक्त संख्यामा नेपालमा मानवीय क्षति भएको हो ।

अब नेपालमा कोरोनाबाट ज्यान गुमाउने मानिसको संख्या ३६३२ पुगेको छ । पछिल्लो समय काठमाडौं उपत्यका, नेपालगन्ज, बुटवल र वीरगन्जमा बढी मानिसहरुको ज्यान गएको छ । नेपालमा कुल संक्रमितको तुलनामा ज्यान गुमाउनेको संख्या ०.९४ प्रतिशत रहेको छ ।

काठमाडौं । प्रधानमन्त्री केपी शर्मा ओलीले सोमबार देशवासीका नाममा सम्बोधन गर्दै कोरोनाको पछिल्लो अपडेट गराइरहँदा जनताले भने खोपको सुनिश्चितता, अक्सिजनको उपलब्धता र अस्पतालमा बेडको संख्या बढेको खबर सुन्न आतूर थिए । तर, प्रधानमन्त्रीसँग सकारात्मक कामको सूची थिएन । केवल कोरोनाको क्षति र संक्रमणको सूचि मात्र थियो ।

पार्टी विभाजन, प्रदेशहरुमा सरकार र सत्ता टिकाउन अनेक प्रयासमा सफल देखिएका प्रधानमन्त्री कोरोना रोकथाममा जति निरिह देखिएका छन्, त्यति नै शक्तिशाली बन्दै गएको छ, कोरोना संक्रमण । सोमबार नेपालमा अहिलेसम्मकै बढी संक्रमण र अहिलेसम्म बढी मानिसले ज्यान गुमाएको डरलाग्दो आंकडा आएको छ ।

नेपालमा गत २४ घण्टामा थप ७,४४८ जनामा कोरोनाभाइरस सङ्क्रमण पुष्टि भएको स्वास्थ्य तथा जनसङ्ख्या मन्त्रालयको तथ्यांक छ । यो रेकर्ड हो । मन्त्रालयका अनुसार सो अवधिमा थप ३७ जनाको कोभिडका कारण ज्यान गएको छ । सोमवार पुष्टि भएका सङ्क्रमितहरू १६,६५८ पीसीआर र ५१८ एन्टिजन परीक्षण गर्दा पहिचान भएको मन्त्रालयले जनाएको छ । यो अवधिमा २,०२१ जनाले कोरोना जितेको तथ्यांक आएको छ ।

आइतवार समेत ७,२११ सङ्क्रमित थपिएका थिए । यसले हरेक दिन रेकर्ड बनेको छ । मानिसहरुले अकालमा ज्यान गुमाएका छन्, तर सरकारले महामारी नियन्त्रणमा गाम्भीर्यता भने देखाउन सकेको छैन । उता, प्रधानमन्त्रीले भने महामारीको दोस्रो लहरको रोकथाम र नियन्त्रणका लागि सरकारका सबै संयन्त्र परिचालित भएको दावि गरे । निषेधाज्ञा अझै कडा गर्ने चेतावनी समेत उनले दिए ।

जनकपुर । प्रदेश २ मा कोरोना महामारी न्यूनिकरणमा लडिरहेका जनशक्ति स्वयमः संक्रमित भएमा उनीहरुको खर्च सरकारले बेहोर्ने भएको छ । प्रदेश २ सरकारले कोभिड–१९ महामारीको नियन्त्रण, रोकथाम र उपचारमा खटिएका जनशक्ति सङ्क्रमित भएमा सम्पूर्ण उपचार खर्च व्यहोर्ने निर्णय गरेको हो । राससका अनुसार आइतबार बसेको प्रादेशिक कोरोना सङ्कट व्यवस्थापन समितिको बैठकले यस्तो निर्णय लिएको हो ।

उक्त बैठकले भविष्यमा बढ्न सक्ने सङ्क्रमितको चापलाई दृष्टिगत गरी प्रदेश भित्रका निजी अस्पताललाई नेपाल सरकारको मापदण्डबमोजिम सम्झौंता गरी सञ्चालनमा ल्याउन सामाजिक विकास मन्त्रालयका सचिवको नेतृत्वमा रहेको समितिलाई जिम्मेवारी दिने निर्णय गरेको हो। प्रदेशभित्र सञ्चालनमा रहेका सार्वजनिक तथा सामुदायिक अस्पतालको प्रयोगशालामा पिसिआर जाँच गर्न लगाउनसमेत निर्णय गरेको छ।

काठमाडौं । नेपाली कांग्रेसले संकटको बेलामा अस्पतालको शैया उपलब्ध गराउन नसकिने भन्दै सरकारले देखाएको लाचारीपनःको कडा आलोचना गरेको छ । सरकार गैरजिम्मेवारी रुपमा प्रस्तुत गरेको निष्कर्ष कांग्रेसको छ । शुक्रबार स्वास्थ्य मन्त्रालयले सूचना जारी गरी कोरोना महामारी थेग्न नसकिने अवस्थामा रहेको र शैया उपलब्ध गराउन नसकिने भन्दै जनतालाई जानकारी गराएको थियो ।

यसले जनतामा त्रास फैलिएको छ । कोरोना भएमा र त्यसले अवस्था जटिल भएमा आफूहरुले उपचार नपाउने चिन्ता जनतामा बढेको छ । कांग्रेस प्रवक्ता विश्वप्रकाश शर्माले शनिबार विज्ञप्ति जारी गरी संकटमा हतास र त्रास हैन, विश्वास प्रवाह गर्नु सरकारको कर्तव्य हुने उल्लेख गरेका छन् ।

पूरै वर्ष दिन सत्ता द्वन्द्वमा समय बिताउने, संसद विघटन गरेर मध्यमहामारीमा चुनाव घोषणा गर्ने सरकारले अहिले आएर बेड, भेन्टिलेटर, अक्सिजन पर्याप्त छैन भनी निरीहता प्रस्तुत गरेको कांग्रेसको छ । यो अभिव्यक्तिलाई कांग्रेसले इतिहासकै सबैभन्दा गैरजिम्मेवार अभिव्यक्ति र जनताको जीवनप्रति खेलवाडको व्यवहार भनेको छ ।

कांग्रेसले यस्ता लाचारी अभिव्यक्ति बन्द गरेर युद्धस्तरमा काम गर्न र कोरोनाविरूद्धको संघर्षमा राजयको क्षमता विस्तार गर्न सरकारलाई अपिल गरेको छ। बेड, भेन्टिलेटर, अक्सिजन प्लान्ट र सिलिण्डरमा सरकारको वास्तविक क्षमता कति हो र संक्रमणको विस्तार कुन हदसम्म हुन सक्छ भन्ने विज्ञको अनुमान र विश्लेषणका आधारमा प्रष्ट, पारदर्शी, योजनावद्ध र दृढ ढंगले प्रस्तुत हुन जरुरी रहेको कांग्रेसको भनाई छ ।

काठमाडौं । नेपालमा अहिले मानिसहरुले आफुलाई कोरोना भएको आंशकमा परीक्षण गरिरहेका छन् । विदेश जान पीसीआर अनिवार्य हुनेहरुले परीक्षण गरिरहेका छन् । अर्कोतर्फ अस्पतालमा अपरेशनको मिति कुरिरहेकाहरुले पीसीआर परिक्षण गरिरहेका छन् । तर, सरकारले कुनै एक जनामा कोरोना भएमा कोरोना संक्रमितको आसपासमा हुनेहरुको कन्ट्रयाक ट्रेसिंग गर्न छाडेको निकै भइसकेको छ ।

तर, संक्रमणको दर भने पहिलो चरणको हाराहारीमै पुगेको छ ।
स्वास्थ्य तथा जनसंख्या मन्त्रालयले शुक्रबार सार्वजनिक गरेको तथ्यांक अनुसार देशभर ५ हजार ७२७ जनामा कोरोना देखियो । यो अघिल्लो लहरकै हाराहारी हो । तर, अघिल्लो पटक कन्ट्याक्ट ट्रेसिङ पर्याप्त मात्रामा भएको थियो ।

शुक्रबार देशभर १५ हजार ३९१ जनाको पीसीआर परीक्षण भएको थियो । जसबाट ५६५७ जनामा कोरोना देखियो । ५२५ जनाको एन्टिजेन परीक्षण गर्दा ७० जनामा संक्रमण पुष्टि भएको मन्त्रालयले जनाएको छ । नेपालमा २०७६ माघ १० मा पहिलो केस देखिएको हो । २०७७, ५ कात्तिकमा २० हजार ७४२ नमुनाबाट ५ हजार ७४३ जनामा संक्रमण पुष्टि भएको थियो । त्यो सबैभन्दा उच्चतम विन्दु थियो ।

त्यसपछि भने हरेक दिन कम हुँदै गएको थियो । युके भेरियन्ट नेपालमा फैलिएसँगै यसको संक्रमण दरसमेत तिब्र बनेको छ । कोरोना संक्रमितलाई लक्षण देखिनुभन्दा एकदुई दिन अगाडि नै अरुलाई सार्नसक्ने भएकाले कन्ट्याक्ट ट्रेसिङलाई पनि त्यतिकै प्राथमिकता दिनुपर्ने विज्ञहरुले बताएका छन् ।

काठमाडौं । नेपालमा कोरोना भाइरसको संक्रमण फैलिएयता आज सबैभन्दा धेरै मानिसको ज्यान गएको छ । ​स्वास्थ्य तथा जनसङ्ख्या मन्त्रालयले बिहीवार कोसार्वजनिक गरेको तथ्यांक अनुसार २४ घण्टामा ३५जनाको मृत्यु भयो । यो पछिल्लो एक वर्षको अवधिमा कोरोनाबाट एक दिनमा भएको सर्वाधिक ठूलो संख्या हो ।

नेपालमा कोरोनाका कारण कार्तिक १९ मा ३० जनाको निधन भएको तथ्यांक छ । सो तथ्यांक अहिलेसम्मकै बढी थियो । उक्त रेकर्ड आज तोडिएको छ । अब नेपालमा कोरोनाभाइरसको सङ्क्रमणका कारण ज्यान गुमाउनेको सङ्ख्या ३,२४६ पुगेको छ। बिहीवार थप ४,८३१ जनामा कोरोनाभाइरस सङ्क्रमण पुष्टि भएको छ ।

कुल १२,५९७ जनाको पीसीआर र ९६३ जनाको एन्टिजन परीक्षण गर्दा उक्त संख्यामा कोरोना पुष्टि भएको हो। २४ घण्टामा ८८८ जनाले कोरोनालाई जितेका छन् । अब नेपालमा ३४,११७ जना सक्रिय सङ्क्रमित पुगेका छन् ।

काठमाडौं । सरकारले काठमाडौं उपत्यकामा निषेधाज्ञा घोषणा गरेको छ । यो निषेधाज्ञा कार्यान्वयन भने वैशाख १६ गते विहान ६ बजेदेखि शुरु हुनेछ । पहिलो चरणमा वैशाख २२ गते राति १२ बजेसम्म अत्यावश्यकबाहेकका सेवा र यातायात बन्द गरिएको हो ।

काठमाडौं, भक्तपुर र ललितपुर जिल्लाका प्रमुख जिल्ला अधिकारीहरुले सोमबार साँझ एक आदेश जारी गरी अत्यावश्यक सेवाबाहेकका सेवा बन्द गरेको जनाएका छन् । प्रमुख जिल्ला अधिकारीहरुले जारी गरेको आदेश अनुसार वैशाख १६ देखि एक हप्तासम्म खाद्य सामग्री औषधि तथा स्वास्थ्य सामग्रीका पसलबाहेक सबै पसल बन्द हुनेछन् ।

काठमाडौं उपत्यकामा सबै प्रकारका सभा सम्मेलन, गोष्ठी, सेमिनार, सिनेमा हल, पार्टी प्यालेस, स्वीमिङ पुल, सपिङ मल, मनोरञ्जनस्थल, सैलुन, ब्युटी पार्लर, जिमखाना, समूहमा खेलिने खेल, पुस्तकालय, संग्रहालय, चिडियाखाना बन्द गरिएको छ ।

अत्यावश्यक सेवा दिनेबाहेकका सार्वजनिक र निजी सवारी साधन वैशाख १६ गतेदेखि २२ गते राति १२ बजेसम्म बन्द हुनेछ । यस अवधिमा खाद्य सामग्रीको पसल बिहान १० बजेसम्म र बेलुका ५ देखि ७ बजेसम्म खुला हुनेछ । डिपार्टमेन्ट स्टोरको ग्रोसरी कक्ष बिहान १० देखि बेलुका ५ बजेसम्म सञ्चालन गर्न पाइनेछ ।

सरकारी कार्यालय, बैंक तथा वित्तीय संस्था र अरु अत्यावश्यक सेवा दिने कार्यालय सञ्चालन हुनेछ । सरकारी कर्मचारी, बैंक तथा वित्तीय संस्था र अरु अत्यावश्यक सेवामा कार्यरत कर्मचारीले परिचयपत्र देखाएर आवतजावत गर्न सक्नेछन् ।

विवाह ब्रतबन्धको हकमा भने स्वास्थ्य मापदण्ड पालना गर्ने गरी प्रशासन कार्यालयको अनुमति लिएर १५ जनासम्म सहभागी हुन पाइने छ । अत्यावश्यक सामग्री बोकेका ढुवानीका साधन, बिरामी तथा कुरुवा बोकेका एम्बुलेन्स, स्वास्थ्यकर्मी र सुरक्षा निकायले प्रयोग गर्ने सवारी साधन चल्न पाउनेछन् ।

एम्बुलेन्स, खानेपानी, स्वास्थ्य, खाद्यान्न, तरकारी, फलफूल, दूग्धजन्य पदार्थ, बैंक, वित्तीय संस्था दूरसञ्चार, इन्टरनेट, क्वारेन्टिन, आइसोलेसन, फोहोरमैला व्यवस्थापन लगायतका ढुवानीका साधन पनि चल्न पाउनेछन् ।

सरकारी कार्यालयका गाडी सम्बन्धित विभागबाट अनुमति लिएर सञ्चालन हुन पाउनेछन् । विकास निर्माण कार्यमा प्रयोग हुने जनशक्ति र सामग्री ढुवानीका गाडी चलाउने पास सम्बन्धित आयोजना वा कार्यालय प्रमुखको सिफारिसका आधारमा प्रमुख जिल्ला अधिकारीले दिनेछन् ।

अन्तर्राष्ट्रिय उडानबाट विदेश जाने यात्रुले हवाई टिकट, पासपोर्ट, भिसा देखाएमा एयरपोर्ट जाने गाडी चलाउन पाइनेछ ।