Category: स्वास्थ्य

काठमाडौं । कोरोना भाइरसका संक्रमित १० दिनसम्म अनिवार्य आइसोलेसनमा बस्नु पर्ने भएको छ । स्वास्थ्य तथा जनसङ्ख्या मन्त्रालयका अनुसार लक्षण भएका संक्रमित अस्पताल र नभएका बिरामी घरमा अनिवार्य आइसोलेसनमा बस्नु पर्नेछ । भारतमा अहिले बढ्दो संक्रमणलाई मध्यनजर गर्दै स्वास्थ्य तथा जनसंख्या मन्त्रलयले यस्तो सर्कुलर जारी गरेको हो ।

सरकारी संचारमाध्यम गोरखापत्रका अनुसार स्वास्थ्य तथा जनसङ्ख्या मन्त्रालय स्वास्थ्य आपत्कालीन तथा विपत् व्यवस्थापन एकाइले सातवटै मुख्य मन्त्री तथा मन्त्रिपरिषद् कार्यालयलाई यस्तो जानकारी गराएको छ ।

एकाइका प्रमुख डा. गुणराज लोहनीले अस्पताल र आइसोलेसन सेन्टरमा राखेबापत प्रतिदिन प्रतिबिरामी दुई हजार रुपियाँ सोधभर्ना स्वास्थ्य मन्त्रालयबाट लिन सकिने जानकारी गराएका छन् ।

अहिले नेपालमा पनि क्रमशः संक्रमितको संख्यामा वृद्धि भइरहेको छ । सोमबार १४१ जनामा संक्रमण पुष्टी भयो । नेपालमा कुल सङ्क्रमितको सङ्ख्या दुई लाख ७६ हजार ९८० पुगेको छ ।

बागलुङ । होली खेल्ने क्रममा बागलुङमा वेपत्ता भएको भनिएका युवा सम्पर्कमा आएका छन् । बागलुङ, प्युठान र गुल्मीको सिमानामा पर्ने बल्देधुरीमा दुई जनाको ज्यान जानेगरी आइतबार हिंसात्मक झडप भएको थियो । त्यस क्रममा १० जना भन्दा बढी युवा हराएका थिए ।

स्थानीय संचारमाध्यमहरुका अनुसार हराएका सबै युवा आइतबार राती सम्पर्कमा आएका छन् । आइतबार बल्देधुरीमा होली मनाउने क्रममा बागलुङको निसीखोला गाउँपालिका ७ राजकुत र बडीगाड गाउँपालिका १० दर्लिङका युवाबीच झडप भएको हो । झगडामा निसीखोला७ राजकुतका ३६ वर्षीय प्रकाश कुँवर र २९ वर्षीय दीपक दमाईको ज्यान गएको छ ।

निसीखोला गाउँपालिकाका अध्यक्ष तारानाथ पौडेलले संचारमाध्यमलाई बताए अनुसार दिउँसोको ग्याङ फाइटपछि सम्पर्कविहीन भएका युवा राती अबेर सम्पर्कमा आएका हुन् । उनीहरु सामान्य घाइते अवस्थामा थिए । प्रहरीले घटनाबारे अनुसन्धान थालेको बताइएको छ ।

काठमाडौं । कोरोना भाइरसको सङ्क्रमण रोकथाम गर्न सरकारले गरेको लकडाउनको आज ठ्याक्कै एक वर्ष पुगेको छ । सरकारले गत वर्ष चैत ११ गतेबाट लकडाउन थालेको थियो । यसबीचमा नेपालले पटकपटक गरी चार महिनाभन्दा बढी समय पूर्ण देशव्यापी लकडाउन गर्यो । तर, एक वर्षसम्म पनि स्वास्थ्य सुरक्षा सम्बन्धी चूनौति भने कायम नै रहेको छ ।

नेपालमा भदौबाट लकडाउन सहज हुन थालेको हो । लकडाउनको एक वर्षकै बीचमा विश्वभर कोरोना भाइरसको दोस्रो लहर शुरु भएको छ । यसको असर नेपालमा समेत देखिन थालेको छ । मङ्गलबार मात्र १८८ जना नयाँ सङ्क्रमित थपिए । यो पछिल्लो एक महिनायताकै बढी हो ।

खासगरी छिमेकी मुलुक भारतमा बढ्दो संख्याले नेपालमा पनि चूनौति थपिएको छ । मानिसहरुले कोरोनालाई सामान्य रुपमा लिएर सतर्कताका काम छाड्दा भने नेपालमा समेत जोखिम बढेको छ । अहिले सार्वजनिक यातायात र शहर बजारमा समेत मास्क लगाउने मानिसको संख्या घट्दो क्रममा रहेको छ ।

नेपालमा अहिलेसम्म कोरोना सङ्क्रमितको कुल सङ्ख्या दुई लाख ७६ हजार २४४ पुगेको छ ।निको हुनेको सङ्ख्या दुई लाख ७२ हजार ९७ पुगेको छ । देशभर सक्रिय सङ्क्रमित सङ्ख्या एक हजार १२८ छ । अहिले विभिन्न क्वारेन्टाइनमा ४८ जना रहेका छन् । कोरोना सङ्क्रमितबाट मृत्यु हुनेको सङ्ख्या तीन हजार १९ पुगेको छ ।

विराटनगर । हत्याको आरोपमा ४० वर्षसम्म भारको जेलमा बिताएका दुर्गाप्रसाद तिम्सिनाको उपचारमा प्रदेश १ सरकारले सहयोग गर्ने भएको छ । आरोप प्रमाणित नभए पनि उनी ४० वर्ष जेलमा बस्नु परेको हो । यसबारे भारतीय संचारमाध्यमसम्म खबर पुगेसँगै उनको रिहाईको बाटो खुलेको थियो । अदालतले तत्काल उनलाई जेलमुक्त गर्न आदेश दिएपछि तिम्सिना अहिले इलामस्थित घरमा आइपुगेका छन् ।

तर, उनको स्वास्थ्य अवस्था भने निकै कमजोर पाइएको छ । उनी भारतको कोलकातास्थित दमदम केन्द्रीय कारागारमा राखिएका थिए । प्रदेश १ मन आन्तरिक मामिला तथा कानुनमन्त्री हिक्मतकुमार कार्कीले उनको उपचार सरकारले गर्ने जानकारी गराएका हुन् । संचारमाध्यमहरुका अनुसार दुर्गाप्रसादको उपचारको सबै खर्च प्रदेश सरकारले बेहोर्ने भएको छ ।

यसका लागि परिवारसँग समन्वय गर्न प्रमुख जिल्ला अधिकारीलाई निर्देशन दिइएको उनले जानकारी दिएका छन् । मन्त्री कार्कीले भारतबाट दुर्गाप्रसादका लागि क्षतिपूर्ति दिलाउन समेत पहल गर्ने बताएका छन् । कोलकाताको उच्च अदालतले दुर्गाप्रसादको मुद्दामा फैसला गर्दै क्षतिपूर्ति दिन सरकारका नाममा आदेश दिइसकेको छ ।

काठमाडौं । सरकारले थप ५० लाख डोज कोरोना खोप किन्ने भएको छ । यसका लागि खरिद प्रक्रिया समेत शुरु भइसकेको स्वास्थ्य तथा जनसंख्या मन्त्रालयले जनाएको छ । मन्त्रालयका सचिव लक्ष्मण अर्यालले खोप किन्न अर्थ मन्त्रालयले स्रोत सुनिश्चितता गरिसकेको छ । संसदको शिक्षा तथा स्वास्थ्य समिति अन्तर्गतको उपसमितिमा उपस्थित भएका सचिव अर्यालले यस्तो जानकारी गराएका हुन् ।

नेपाललाई भारत सरकारले १० लाख डोज खोप अनुदानमा दिएको छ । चीन सरकारले ८ लाख डोज खोप दिने घोषणा गरेको छ । सरकारले भारतबाट यसअघि २० लाख डोज खोप किनिसकेको छ । त्यसमध्ये १० लाख डोज नेपाल आइसकेको छ ।

नेपालले भारतीय कम्पनी सेरम इन्स्टिच्युटबाट खोप किनेको छ । उता, कोभ्याक्समार्फत समेत पहिलो चरणमा नेपालमा २२ लाख डोप आउने छ । यसरी सबै खोप हेर्दा कुल १ करोड १० लाख डोज खोप उपलब्ध हुने भएको सचिव अर्यालले उल्लेख गरे ।

काठमाडौं । सरकारले कोरोना भाइरस (कोभिड १९) संक्रमणबाट मृत्यु भएका नागरिकको संख्या लुकाएको पुष्टी भएको छ । बुधबार एकै दिन ६१९ जना थप गर्दै स्वास्थ्य तथा जनसंख्या मन्त्रालयले मृतक संख्या सच्याएको छ । यसअघि सरकारमाथि मृतकको संख्या लुकाएको आरोप लागेको थियो । तर, सरकारले भने प्रतिक्रिया दिएको थिएन ।

कोभिड १९ महामारीको व्यवस्थापन गरिरहेका अन्य निकायहरुको तथ्यांकको आधारमा अद्यावधिक गर्दा स्वास्थ्य मन्त्रालयको तथ्यांकमा भन्दा थप ६१९ जना मानिसको मृत्यु भएको पुष्टि भएको मन्त्रालयले जानकारी गराएको हो । स्वास्थ्य तथा जनसंख्या मन्त्रालयका अनुसार अब नेपालमा कोरोना संक्रमणबाट ज्यान गुमाउनेको संख्या २ हजार ६८४ पुगेको छ ।

बुधबार ६१९ थप संख्या सार्वजनिक भए पनि यस दिन मृत्यु हुनेको संख्या भने मात्र एक थियो । मन्त्रालयका अनुसार बुधबार मात्र ९४ जनामा कोरोना भाइरसको पुष्टी भएको छ । यस दिन देशभर ३ हजार ६९२ जनाको नमुना परीक्षण भएको थियो । अब नेपालमा कुल संक्रमित २ लाख ७३ हजार ७६० जना पुगेको छ । यसमध्ये २ लाख ७० हजार १३९ जनाले कोरोनालाई जितिसकेका छन् ।

गोरखा । गोरखाको बारपाकमा एकै परिवारका तीन जना मृत अवस्थामा फेला परेका छन् । प्रहरीका अनुसार गोरखाको सुलिकोट गाउँपालिका–१ बारपाकमा ८४ वर्षिय वृद्धसहित तीन जना मृत फेला परेका हुन् । ८४ वर्षीय टिल बहादुर गुरुङ, उनकी २२ वर्षीया बुहारी आइत कुमारी गुरुङ र १३ वर्षीया नातिनी उषा गुरुङ सोमवार बिहान घरमा मृत फेला परेको प्रहरीको भनाई छ ।

बिहान अवेरसम्म घरको ढोका नखुलेपछि गाउँलेले ढोका खोलेका थिए । त्यसक्रममा उनीहरुलाई मृत अवस्थामा देखेपछि गाउँलेले प्रहरीलाई खबर गरेका थिए । मृतकहरुको मुखबाट फिज आएको प्रहरीले बताएको छ । विषालु च्याउका कारण ज्यान गएको हुन सक्ने अनुमान प्रहरील गरेको छ । यद्दपी पोष्टमार्टम रिर्पोटपछि मात्र विस्तृत जानकारी हुने प्रहरीले जनाएको छ ।

काठमाडौं । सरकारले चिकित्सकहरुले सरकारले तोकेको परामर्श शुल्क बाहेक अन्य शुल्क २०० प्रतिशतसम्म लिन पाउने व्यवस्था गरेको छ ।

स्वास्थ्य तथा जनसंख्या मन्त्रालयले ‘विस्तारित अस्पताल सेवा कार्यक्रम सञ्चालन सम्बन्धी कार्यविधि, २०७७’ जारी गरेर चिकित्सकीय परामर्श शुल्क सरकारले तोके बमोजिम र अन्य सेवा शुल्क अस्पतालको नियमित सेवा शुल्कमा बढीमा दुई सय प्रतिशतसम्म लिन पाउने व्यवस्था गरेको हो ।

उक्त कार्यविधिमा भनिएको छ, ‘प्रत्यक्ष खर्च खटाएर आम्दानीको २० प्रतिशत रकम अस्पताल विकास समितिमा छुट्याई बाँकी ८० प्रतिशतलाई १०० प्रतिशत मानी चिकित्सक र अन्य स्वास्थ्यकर्मीहरुलाई ९० प्रतिशत र लेखा, प्रशासन, स्टोर काउण्टर, मेडिकल रेकर्डर वायोमेडिकल, सरसफाईलगायतका कर्मचारीलाई १० प्रतिशत उपलब्ध गराउने ।’

मन्त्रालयले कार्यक्रमको काम कारबाहीलाई नियमित र व्यवस्थित गर्नका लागि एक समिति गठन गरेको छ । जसमा अस्पताल प्रमुख अध्यक्ष, अस्पताल प्रशासन प्रमुख, अस्पताल लेखा प्रमुख, अस्पतालको नर्सिङ प्रमुख सदस्य र स्वास्थ्यकर्मीहरुमध्येबाट अस्पताल प्रमुखद्वारा सिफारिस एक जना सदस्य सचिव रहने व्यवस्था गरिएको छ ।

यो कार्यक्रम संघीय सरकारी अस्पताल, प्रदेश तथा स्थानीय तहमा कार्यक्रम सञ्चालन गर्न सकिनेछ । त्यस्तै सामुदायिक र सहकारी अस्पतालहरुमा पनि यो कार्यक्रम लागू गर्न सकिनेछ ।

उक्त कार्यविधि जनस्वास्थ्य सेवा ऐन २०७५ को दफा ३१ को उपदफा (१) र (२) अनुसार सोही ऐनको दफा ६४ ले दिएको अधिकार प्रयोग गरी कार्यविधि जारी गरिएको मन्त्रालयले जनाएको छ ।