Category: स्वास्थ्य

काठमाडौं । नेपालमा कोरोना भाइरसको संक्रमण दरमा उच्च गतिमा गिरावट आएको छ । यसमा कोरोना परीक्षण घट्नु पनि एक कारण हो । तर, कोरोनाका कारण ज्यान गुमाउनेको संख्यामा समेत उच्च कमी आएका कारण समग्रमा कोरोना भाइरस नियन्त्रण उन्मुख देखिएको छ । अब देशभर मात्र १५३५ जना सक्रिय संक्रमित रहेको स्वास्थ्य तथा जनसंख्या मन्त्रालयको आंकडाले देखाएको छ ।

साढे ९८ प्रतिशत भन्दा धेरै कोरोना सङ्क्रमितले रोगलाई जित्न सफल भएका छन् । मन्त्रालयका अनुसार पछिल्लो २४ घण्टामा एक सय ३६ जना संक्रमित डिस्चार्ज भए र अब देशभर दुई लाख ६९ हजार सात सय ५५ जनाले कोरोना जित्न सफल भएका छन् ।

पछिल्लो २४ घण्टामा दुई हजार ४८ जनाको पीसीआर परीक्षण गर्दा ८८ जनामा मात्र कोरोना सङ्क्रमण पुष्टि भयो । कुल सङ्क्रमितको सङ्ख्या दुई लाख ७३ हजार तीन सय ५१ पुगेको छ । २४ घण्टा यता कोरोनाबाट मानवीय क्षति भने भएन ।

काठमाडौं । सरकारले आगामी २३ फागुनदेखि जेष्ठ नागरिकका लागि कोरोना खोप अभियान शुरु गर्ने भएको छ । प्राथमिकतामा परेका नागरिकलाई त्यस अगाडी नै खोप दिने र ६० वर्षमाथिका जेष्ठ नागरिकलाई खोप वितरणको तयारी भइरहेको स्वास्थ्य मन्त्रालयले जनाएको छ । बुधबार बसेको स्वास्थ्य मन्त्रालयको इन्सिडेन्ट कमाण्ड सिस्टमको बैठकले २३ फागुनदेखि ६० वर्षमाथिका जेष्ठ नागरिकलाई खोप दिने निर्णय गरेको बताइएको छ ।

यो उमेर समुहमा कुल २८ लाख जनसंख्या रहेको अनुमान सरकारको छ । निकट भविश्यमा २० लाख खोप सेरम इन्स्टिच्युट अफ इन्डियाबाट खरीद गरेको भित्राइदैछ । कोभ्याक्समार्फत समेत कोरोना खोप आउने भएकाले खोपको अभाव नहुने बताइएको छ ।

यसअघि मन्त्रालयले ५५ वर्षमाथिकालाई खोप दिने योजना अनुरूप आन्तरिक तयारी गरेको थियो। खोप व्यवस्थापनका लागि अहिले ६० वर्ष माथिका नागरिकलाई प्राथमिकतामा राखेको हो । यसपछि भने ५५ वर्ष र त्योभन्दा कम उमेर समूहका मानिसहरूले खोप पाउने भएका छन् ।

नेपालमा प्रारम्भमा चिकित्सक र फ्रन्टलाइनमा काम गर्ने, दोस्रो प्राथमिकतामा पत्रकार र तेस्रो प्राथमिकतामा सरकारी कर्मचारी तथा जनप्रतिनिधिलाई राखेर खोप दिइएको छ ।

काठमाडौं । कोभिड १९ विरुद्धको खोपको दोस्रो मात्रा ८ देखि १२ साताको बीचको अवधिमा लगाउन सकिने कोभिड १९ खोप प्राविधिक सल्लाहकार समितिले स्पष्ट पारेको छ । समितिले स्वास्थ्य तथा जनसङ्ख्या मन्त्रालयलाई यस्तो सुझाव दिएको हो । सल्लाहकार समितिको बैठकले दोस्रो मात्रा ८ देखि १२ हप्ताको अवधिमा दिन प्रस्ताव गर्ने निर्णय गरेको गरेको बताइएको छ ।

यो प्रस्ताव निर्णयका लागि स्वास्थ्य तथा जनसंख्या मन्त्रालयमा पेस गरिएको छ । मन्त्रालयले यसअघि खोपको पहिलो मात्रा लगाएको २८ दिनपछि दोस्रो मात्रा दिइने जानकारी गराएको थियो । तर, विश्व स्वास्थ्य संगठनको खोप सम्बन्धी विज्ञहरुको समिति (सेज)को सिफारिसका आधारमा नेपालमा समेत विज्ञ समुहको बैठकले यस्तो निर्णय लिएको हो ।

सेजका अनुसार पहिलो खोप लगाएको ८ देखि १२ हप्ताको अवधि दोस्रो मात्रा लगाउँदा प्रभावकारी हुने बताएको छ । खोपको दोस्रो मात्रा ढिला लगाउँदा शरीरमा एन्टिबडी प्रभावकारी हुने देखिएको हो । चिकित्सकहरुका अनुसार खोपको पहिलो मात्रा लगाउँदा शरीरमा देखिने प्रतिअसर दोस्रो मात्रा लगाउँदा भने कम मात्र देखिन्छन् । कोभिसिल्ड खोपले कोरोनाका कारण हुने मृत्युदर र जटिलता स्वास्थ्य समस्या समेत कम गर्ने बताईएको छ ।

काठमाडौं । नेपालमा आजबाट सरकारी कर्मचारी र जनप्रतिनिधिले कोरोना भाइरसको खोप लगाउन पाउने भएका छन् । यसअघि पहिलो चरणमा स्वास्थ्यकर्मी । दोस्रो चरणमा पत्रकारलाई खोप दिइएको थियो । आजबाट तेस्रो चरणको अभियान शुरु भएको हो ।

स्वास्थ्य तथा जनसंख्या मन्त्रालयका अनुसार फागुन २ गतेबाट ८ गतेसम्म जिल्लास्थित सबै सरकारी कार्यालयका कर्मचारी, सार्वजनिक संस्थान तथा बैंकका कर्मचारी, पत्रकार र स्थानीय तहका निर्वाचित जनप्रतिनिधिले खोप लगाउन सक्ने भएका छन् ।

स्वास्थ्य मन्त्रालयका प्रवक्ता डा. जागेश्वर गौतमका अनुसार पहिलो प्राथमिकतामा परेका तर लगाउन छुटेकाले समेत यो चरणमा खोप लगाउन सक्ने भएका छन् । सरकारले पहिलो प्राथमिकतामा स्वास्थ्यकर्मी, सुरक्षाकर्मी, स्वास्थ्य स्वयंसेवक, एम्बुलेन्स तथा शव बाहन चालक, सीमा सुरक्षामा खटिएकाहरुलाई खोप उपलब्ध गराएको हो ।

स्वास्थ्य मन्त्रालयका अनुसार काठमाडौंका १२ अस्पतालमा खोप केन्द्र तोकिएको छ ।

वीर अस्पताल, सिभिल अस्पताल मिनभवन, टेकु अस्पताल, त्रिवि शिक्षण अस्पताल महाराजगञ्ज, प्रसूति गृह थापाथली, राष्ट्रिय आयुर्वेद अनुसन्धान तथा तालिम केन्द्र कीर्तिपुर, सशस्त्र प्रहरी अस्पताल बलम्बु, वीरेन्द्र सैनिक अस्पताल छाउनी, नेपाल प्रहरी अस्पताल लाजिम्पाट, शहीद गंगालाल अस्पताल बाँसबारी, नेपाल मेडिकल कलेज अत्तरखेल जोरपाटी र काठमाडौं मेडिकल कलेज सिनामंगलमा खोप केन्द्र तोकिएको हो । खोप लगाउन जाँदा आफ्नो कार्यालयको परिचय पत्र साथमै लिएर जानुपर्छ ।

काठमाडौं । नेपालमा शनिबारबाट पहिलो चरणको खोप अभियान पुरा भएको छ । यस दौरान फ्रन्टलाइनमा खटिएका स्वास्थ्यकर्मी, सुरक्षाकर्मी र सफाईकर्मीले खोप लगाएका छन् । यसबाहेक वृद्धाश्रममा रहेका वृद्धवृद्धालाई समेत कोरोना खोप दिइएको छ ।

दोस्रो चरणको अभियान भने सोमबारबाट शुरु हुने भएको छ । सरकारले सोमबारबाट पत्रकार, कूटनीतिक नियोग र संयूक्त राष्ट्रसंघका कर्मचारीलाई कोरोना भाइरसविरुद्धको खोप दिने भएको हो ।

बढी जोखिममा रहेका सार्वजनिक सवारीसाधनका चालक, सहचालक, समुदायमा रहेका वृद्धवृद्धाले भने अर्को खेप खोप आएपछि मात्र लगाउन पाउने भएका छन् । स्वास्थ्य तथा जनसंख्या मन्त्रालयका अनुसार अहिले भारतबाट आएको खोपको संख्या कम भएका कारण कम संख्यामा प्राथमिकतामा रहेका समुदायलाई कोरोना खोप लगाउन लागिएको हो ।

यसमा करीव १३ हजार पत्रकारले खोप लगाउन सक्ने अनुमान गरिएको छ । पत्रकारले सूचना विभागको कार्डका आधारमा खोप लगाउन सक्ने छन् । पत्रकारले नयाँ बानेश्वरस्थित सिभिल अस्पतालबाट खोप प्राप्त गर्नेछन् । अहिलेसम्म पहिलो चरणमा एक लाख ८४ हजार ८५७ जनाले खोप लगाइसकेका छन्।

काठमाडौं । नेपालले कोभ्याक्स कार्यक्रमबाट पहिलो चरणमा २२ लाख ५६ हजार डोज कोरोना खोप प्राप्त गर्ने भएको छ । विश्व स्वास्थ्य सङ्गठनका अनुसार नेपालले पहिलो चरणमा २२ लाख ५६ हजार जोड खोप पाउने सम्भावना छ । यो खोपले नेपालको जनसंख्याको करिब ३.३ प्रतिशतलाई खोप लगाउन पुग्ने भएको छ ।

खोप सन् २०२१ को‌ पहिलो छ महिना भित्र प्राप्त हुने प्रक्षेपण गरिएको छ । सबै देशमा समानरूपमा कोरोना खोप उपलब्ध गराउने लक्ष्यसहित विश्व स्वास्थ्य सङ्गठन (डब्ल्यूएचओ) र खोपबारे पैरवी गर्ने अन्य समूहले सन् २०२० को अप्रिलमा कोभ्याक्स अभियान घोषणा गरेका हुन् ।

कोभ्याक्स अभियान अन्तर्गत सन् २०२१ को अन्तिमसम्ममा विश्वभर २ अर्ब डोज खोप आपूर्तिको लक्ष्य छ । नेपालले अनुदानमा पाउने मध्ये यो सबैभन्दा ठूलो संख्या हुनेछ । यसबाहेकको खोप भने मुलुक स्वयमःले खरीद गर्नुपर्छ ।

काठमाडौं । नेपालमा मंगलबारसम्म १ लाख २८ हजार जनाले कोरोना भाइरसविरुद्धको खोप लगाएका छन् । आज खोप अभियानको सातौं दिन हो । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार ७७ वटै जिल्लाका २०१ खोप केन्द्रबाट कुल १ लाख २८ हजार ६५० जना लक्षित वर्गले खोप लगाएका छन् ।

प्रदेश १ मा १७ हजार २८७, प्रदेश २ मा १६ हजार १७३, बागमती प्रदेशमा ४५ हजार ३४५, गण्डकी प्रदेशमा १६ हजार २७०, लुम्बिनी प्रदेशमा १७ हजार ९७९, कर्णाली प्रदेशमा ६ हजार ६६० र सुदूरपश्चिम प्रदेशमा ८ हजार ९३६ जनाले खोप लगाएको मन्त्रालयले उल्लेख गरेको छ । पहिलो चरणमा फ्रन्ट लाइनमा रहेर काम गर्नेहरुले खोप पाइरहेका छन् ।

काठमाडौं । नेपालमा शनिबार मात्र देशभर करीव १५ हजार मानिसले कोरोना भाइरसविरुद्धको खोप लगाएका छन् । देशभरका १ सय ४३ खोप केन्द्रबाट शनिबार १४ हजार ८ सय ९४ जनाले कोरोनाको खोप लगाएको स्वास्थ्य तथा जनसंख्या मन्त्रालयले जनाएको छ ।

आज प्रदेश १ मा १५ सय ४७, प्रदेश २ मा २१ सय १०, बागमती प्रदेशमा ५४ सय २, गण्डकीमा १८ सय ८७, लुम्बिनीमा २ हजार ६३, कर्णालीमा ९ सय ५५ र सुदूरपश्चिम प्रदेशमा ९ सय ३० व्यक्तिले खोप लगाएका छन् । आज नेपालमा खोप अभियानको चौथो दिन हो । यस दिनसम्म कुल खोप लगाउनेको संख्या भने ६४ हजार ४ सय २२ पुगेको छ।

काठमाडौं । नेपालमा बुधबारबाट कोरोना विरुद्धको खोप अभियान शुरु भएको हो । आज बिहीबार दोस्रो दिनसम्मको आंकडा अनुसार २८ हजार ७ सय ३२ जनाले कोरोना भाइरसविरूद्धको खोप लगाएको स्वास्थ्य तथा जनसंख्या मन्त्रालयले जनाएको छ । नेपालमा उत्साहजनक सहभागितासहित कोरोना खोप विरुद्धको अभियान चलिरहेको छ ।

आजसम्म प्रदेश नम्बर १ का ३ हजार ८ सय ४७, प्रदेश २ का २ हजार १ सय ७४, बागमतीका ११ हजार ४ सय ६१, गण्डकीमा ४ सय ८५३, लुम्बिनी २ हजार ३ सय ३, कर्णालीका १ हजार ६ सय ७७ र सुदूरपश्चिममा २ हजार ४ सय १६ जनाले खोप लगाएको मन्त्रालयको तथ्यांक छ ।

मन्त्रालयका अनुसार खोप लगाएका व्यक्ति कसैमा पनि स्वास्थ्य समस्या देखिएको रिर्पोट प्राप्त भएको छैन । पहिलो चरणमा अग्रपंक्तिमा खटिएका जनशक्तिले खोप पाइरहेका छन् । यसमा स्वास्थ्यकर्मी, फोहोरमैला व्यवस्थापनमा खटिने फोहोर संकलक तथा चालक, एम्बुलेन्स तथा शववाहन चालक तथा सहचालक, खोप केन्द्रमा खटीने सुरक्षाकर्मी तथा स्वयं सेवक रहेका छन् ।

यसैगरी शव व्यवस्थापनमा खटिने व्यक्ति, महिला स्वास्थ्य स्वयं सेवक, अन्तर्राष्ट्रिय प्रवेश विन्दुमा कार्यरत स्वास्थ्यकर्मी तथा कर्मचारी, वृद्धाश्रमका व्यक्ति, हेरचाह तथा व्यवस्थापनमा खटिने कर्मचारी र जेलमा रहेका कैदी तथा सुरक्षाकर्मीलाई प्राथमिकतामा राखिएको छ । प्रधानमन्त्री केपी शर्मा ओलीले आगामी तीन महिनामा सबै जनसंख्यालाई पुग्ने गरी खोप भित्राउने घोषणा बुधबार गरेका छन् ।

काठमाडौं । नेपालमा कोरोना भाइरसविरुद्धको खोप अभियान शुरु गरिएको छ। बिहान १० बजेबाट सुरु भएको खोप अभियान प्रधानमन्त्री केपी शर्मा ओलीले बालुवाटारबाटै भिडियो कन्फरेन्समार्फत खोप अभियानको उद्घाटन गरेका हुन् ।

कार्यक्रममा स्वास्थ्य तथा जनसङ्ख्यामन्त्री हृदयेश त्रिपाठीलगायत मन्त्री पनि सहभागी छन्। कोरोना खोप अभियानमा शुक्रराज ट्रपिकल तथा सरुवा रोग अस्पतालका निर्देशक डा. सागर राजभण्डारीले पहिलो खोप लगाएका छन् ।

त्यसपछि दोस्रो नम्बरमा प्रमुख कन्सल्टेन्ट डा. अनुप बास्तोलाले कोरोनाविरुद्धको खोप लगाएका छन् ।
उनीहरुले कोभिड–१९ विरुद्धको पहिलो खोप लगाएका हुन् । यस अस्पतालमा आज ४०० जनालाई खोप लगाइने जनाइएको छ ।

पहिलो चरणमा फोहर संकलक, चालक, एम्बुलेन्स चालक, शव वाहान चालक, प्रत्यक्ष खोप दिने स्वास्थ्य संस्थाका स्वाथ्यमर्की, स्वयमसेवक र सुरक्षाकर्मी, महिला स्वयम सेवक, अन्तर्राष्ट्रिय प्रवेश विन्दुमा खटिने कर्मचारी, वृद्धाश्रममा खटिने कर्मचारी, र जेलमा रहेका कैदीलाई खोप दिइने छ।

काठमाडौं । नेपालमा आजबाट कोरोना भाइरसविरुद्धको खोप अभियान प्रारम्भ हुँदैछ । प्रधानमन्त्री केपी शर्मा ओलीले बावुवाटारबाट भच्र्यूअल रुपमा अभियानको थालनी गर्नेछन् । तर, उनले खोप भने लगाउने छैनन् । संसारमा धेरैजसो मुलुकमा सरकार प्रमुखले खोप लगाएर अभियान थालेका थिए ।

यसले जनतामा आत्मविश्वास बढाउँछ । नेपालमा भने खोप लगाउनु अगाडी नै यसले गम्भीर असर गरेमा सरकार जिम्मेवार नहुने व्यहोराको शर्तनामामा हस्ताक्षर गर्नुपर्ने भएको छ । नेपालमा कोरोनाविरुद्धको अभियानमा अग्रपंक्तिमा खटिएका स्वास्थ्यकर्मी, सुरक्षाकर्मी, सफाइकर्मीलगायतलाई पहिलो चरणमा खोप दिइने भएको छ ।

काठमाडौंमा एक दर्जन अस्पतालमा खोप लगाइने भएको छ । शुक्रराज ट्रपिकल तथा सरुवा रोग अस्पताल टेकु, वीर अस्पताल, आयुर्वेद अनुसन्धान तथा तालिम केन्द्र अस्पताल कीर्तिपुर, पाटन अस्पताल, परोपकार प्रसूति तथा स्त्री रोग अस्पताल थापाथली, त्रिवि शिक्षण अस्पताल महाराजगञ्ज, भक्तपुर अस्पताल, शहीद धर्मभक्त अंग प्रत्यारोपण केन्द्र भक्तपुर, काठमाडौं मेडिकल कलेज जोरपाटी, सशस्त्र प्रहरी अस्पताल बलम्बु, शहीद गंगालाल अस्पताल बाँसबारीमा आज स्वास्थ्यकर्मीका लागि खोप दिइने भएको छ ।

भारत सरकारले अनुदानमा दिएको १० लाख डोज कोभिशिल्ड खोप नेपालमा लगाइनेछ । स्वास्थ्य तथा जनसंख्या मन्त्रालयका अनुसार कोरोनाविरुद्धको खोप लगाएपछि कुनै गम्भीर स्वास्थ्य समस्या भए, अंगभंग भए या मृत्यु भएमा खोप दिने निकाय वा संस्थाले क्षतिपूर्ति दिने छैन ।

खोप लगाएको ठाउँमा सुन्निने, दुख्ने, रिंगाटा लाग्ने, आलस्य हुने, टाउको दुख्ने, वाकवाक लाग्ने जस्ता साइडइफेक्ट हुन सक्ने भने बताइएको छ । यो खोप १८ वर्षमाथिका सबैले लगाउन मिल्छ ।

कोरोसँग मिल्दोजुल्दो लक्षण भएका, ज्वरो आएका, सुत्केरी, गर्भवतीले भने खोप लगाउनु हुँदैन । पहिलो डोज लगाउँदा स्वास्थ्यमा गम्भीर समस्या आएकाहरुलाई दोस्रो डोज दिइने छैन ।