Category: स्वास्थ्य

काठमाडौं । नेपालमा कोरोना भाइरसको संक्रमणबाट बुधबार सर्वाधिक संख्यामा मानवीय क्षति भएको छ । कोरोना सङ्क्रमणबाट पछिल्लो २४ घण्टामा १० जनाको मृत्यु भएको पुष्टि भएको हो । सोमबार जनकपुरको रामजानकी अस्पतालमा उपचारका क्रममा मृत्यु भएका महोत्तरीको मटिहानी नगरपालिका ६ का ५२ वर्षीय पुरुष र मङ्गलबार दिउँसो वीरगञ्ज महानगरपालिका १६ को सडकमा मृत भेटिएका बाराको विश्रामपुर ५ का ३८ वर्षीय पुरुषमा कोरोना पुष्टि भएको छ ।

यससँगै अब २४ घण्टामा मृत्यु हुनेको सङ्ख्या १० पुगेको छ । अब नेपालमा कोरोना भाइरसको संक्रमण भई ज्यान गुमाउने मानिसको संख्या ९२ पुगेको छ । पछिल्लो एक सातायता नेपालमा कोरोनाबाट मृत्युदर ह्वात्तै बढेको हो । पछिल्लो २४ घण्टा भित्र काठमार्डाैंको किस्ट अस्पतालमा उपचारार्थ काठमाडौं टेकुकी ७८ वर्षीया महिला र बाराको कलैयाका ७५ वर्षीय पुरुषको ज्यान गएको थियो ।

पाटन स्वास्थ्य विज्ञान प्रतिष्ठानमा धनुषाको जनकपुरकी ३८ वर्षीया महिला र मेडिसिटी अस्पतालमा जनकपुरकै ७२ वर्षीय पुरुषको पनि उपचारको क्रममा मृत्यु भएको हो । धादिङको नीलकण्ठ नगरपालिका १४ को धुँवाकोटका ३२ वर्षीय पुरुषको ह्याम्स अस्पतालमा मृत्यु भएको छ ।

यस्तै कोरोना विशेष अस्पताल बुटवलमा उपचारको क्रममा कपिलवस्तु नगरपालिका २ को तौलिहवाका ४२ वर्षीय पुरुष र वीपी कोइराला स्वास्थ्य विज्ञान प्रतिष्ठान धरानमा उपचारका क्रममा मोरङको बूढीगङ्गा गाउँपालिका २ का ५५ वर्षीय पुरुषको पनि मृत्यु भएको स्वास्थ्य तथा जनसंख्या मन्त्रालयको विवरणमा उल्लेख छ ।

उता, सप्तरीको डाक्नेश्वरी–८ घर भइ राजविराज ६ मा बस्ने ७२ वर्षीय पुरुषको आइसोलेशनमा लैजाने क्रममा एम्बुलेन्समै मृत्यु भएको थियो । उनमा समेत कोरोना पुष्टी भएको छ । काठमाडौंमा मृत्यु भएकाहरुको विद्यूतीय शवदाह गृहमा अन्तिम संस्कार गरिएको छ । शव व्यवस्थापनमा नेपाली सेनाको टोली खटिएको छ ।

बुटवल । बुटवलस्थित कोरोना विषेश अस्थायी अस्पतालमा गतराती दुई जनाको मृत्यु भएको छ । अस्पतालका अनुसार उनीहरुमध्ये एक जनामा कोरोना भाइरसको संक्रमण पुष्टी भएको छ । एक जनाको भने स्वाव संकलन पछि परीक्षण भइरहेको छ । उनको रिर्पोट आउन बाँकि रहेको छ । एकै पटक दुई जनाको ज्यान गएपछि बुटवलमा समेत त्रास बढेको छ ।

उपचारका लागि आइसोलेसनमा भर्ना भएका कपिलवस्तु नगरपालिका वडा नंं २ तौलिहवाका ४२ वर्षीय पुरुष र कपिलवस्तुको कृष्णनगरका २५ वर्षीय प्रदीप तेलीको ज्यान गएको अस्पतालले जनाएको छ । उनीहरु क्रमशः साउन २५ र साउन २७ मा अस्पताल भर्ना भएका हुन् । ४२ वर्षिय पुरुरुषमा कोरोना भाइरसको संक्रमण पुष्टि भएको छ ।

अर्को युवाको परीक्षण रिर्पोट आइसकेको छैन । २५ वर्षीय युवा भारतको मुम्बईबाट हालै नेपाल आएको बताइएको छ । अस्पतालमा कोरोना भाइरसको संक्रमणबाट मृत्यु भएको यो पहिलो घटना हो ।

वीरगन्ज । बार र पर्साका विभिन्न स्थानमा कोरोना भाइरसका थप ७० जना बिरामी भेटिएका छन् । सोमबार राती आएको रिर्पोटमा कोरोना पुष्टी हुनेहरुमा चिकित्सक, स्वास्थ्यकर्मी, सुरक्षाकर्मीसहित सर्वसाधारण रहेका छन् । वीरगञ्जस्थित नारायणी अस्पतालको प्रयोगशालामा गरिएको परीक्षणमा २१ जना महिलासहित ७० जनामा कोरोना पुष्टि भएको हो छ । पर्साका ६५ जना र बाराका ५ जनामा कोरोना देखिएको हो । सोमबार बिहान पर्साका २२ जनामा कोरोना संक्रमण देखिएको थियो ।

अहिले पर्सा नेपालको इपिसेन्टर बनेको छ । यो जिल्लामा मृत्युदर समेत उच्च रहेको छ । प्रयोगशालाका अनुसार नारायणी अस्पतालको ओपीडीमा कार्यरत वीरगञ्ज–३ प्रगतिनगरका ३३ वर्षीय र बारा नकटुवाका ४५ वर्षीय पुरुष, अस्पतालकै पेड्रियाट्रिक वार्डमा कार्यरत बारा पथलैयाका २३ वर्षीय पुरुष र अस्पतालकै क्वाटरमा बस्दै आएकी ३५ वर्षीया महिलामा कोरोना देखिएको छ ।

अस्पतालका कर्मचारीको कन्ट्याक्ट ट्रेसिङमा परेका ५ वर्षीया बालिका, ३३ वर्षीया महिला र ५६ वर्षीय पुरुषमा पनि संक्रमण पुष्टी भएको छ । सोमबार थप हुनेमा ६ जना प्रहरी कर्मचारी रहेका छन् । वडा प्रहरी कार्यालय विर्तामा कार्यरत ५ जना र जिल्ला प्रहरी कार्यलय पर्सामा कार्यरत १ जना प्रहरीमा कोरोना देखिएको हो । अहिलेसम्म पर्सा जिल्लामा मात्र ३२ जना प्रहरीमा कोरोना संक्रमण पुष्टि भइसकेको छ ।

पोखरा । पोखरामा कोरोना संक्रमण पुष्टी भएका एक जनाका उपचारका क्रममा ज्यान गएको छ । यससँगै अब नेपालमा कोरोना भाइरसका कारण ज्यान गुमाउनेको संख्या ७४ पुगेको छ ।

पोखरा स्वास्थ्य विज्ञान प्रतिष्ठानअन्तर्गत कोभिड–१९ उपचार केन्द्रमा पोखरा महानगरपालिका–१९ निवासी ६२ वर्षीय पुरुष ज्यान गएको हो उनी साउन १७ मा अस्पताल भर्ना भएका थिए । गत राती उनको ज्यान गएको हो ।

डायबिटिज रोगबाट उनी ग्रसित थिए । पोखरा स्वास्थ्य विज्ञान प्रतिष्ठानमा मात्र अहिलेसम्म तीन जना कोरोना संक्रमितको मृत्यु भइसकेको छ ।

काठमाडौं । नेपालमा पछिल्लो २४ घण्टामा कोरोना भाइरसको संक्रमणबाट ज्यान गुमाउने व्यक्तिको संख्या तीन पुगेको छ । शनिबार थपिएका तीनसँगै अब देशभर मानवीय क्षति ७३ जना पुगेको छ । स्वास्थ्य तथा जनसंख्या मन्त्रालयका अनुसार पर्सा छप्कैयाका एक पुरुष, मोरङ विराटनगरका ५८ वर्षीय पुरुष र काठमाडौं टोका ६ की ४१ वर्षीया महिलाको यस अवधिमा ज्यान गएको हो ।

शुक्रबार एकैदिन पाँच जनाको मृत्यु भएको थियो । पछिल्ला दिनमा समुदायस्तरमा फैलिएको कोरोनाले मानवीय क्षति समेत उत्तिकै बढाएको छ । शुक्रबार भने पर्सा जिल्ला वीरगन्ज महानगरपालिका ९ माइस्थान बस्ने ४५ वर्षीय पुरुष, पर्सा जिल्ला वीरगन्ज महानगरपालिका ११ श्रीपुर बस्ने ७९ वर्षीय पुरुष, सिरहा गोलबजार नगरपालिका १२ बस्ने २५ वर्षीय एक पुरुष, सर्लाही बसन्तपुरका ४५ वर्षीय पुरुष र पर्साको वीरगन्ज महानगरपालिका ११ श्रीपुर बस्ने ५७ वर्षीय पुरुषको कोरोनाले मृत्यु पुष्टि भएको थियो । बिहीबारसमेत नेपालमा ५ जनाको ज्यान गएको थियो ।

काठमाडौं । नेपालमा कोरोना भाइरसको संक्रमणबाट थप एक जनाको मृत्यु भएको छ । सप्तरीमा मृत्यु भएका तीन जनामा कोरोना आंशका गरिएको थियो । त्यसमध्ये एक जनामा कोरोना पुष्टि भएको छ । दुई जनाको भने रिपोर्ट नेगेटिभ आएको छ । सप्तरीको रुपनी गाउँपालिका ५ गढियाका ४५ बर्षीय पुरुषमा कोरोना संक्रमण पुष्टि भएको हो । उनी करिब डेढ महिनाअघि मलेसियाबाट फर्किएका थिए ।

होम क्वारेन्टिनमै बसेका उनलाई मंगलबार साँझ अधिक ज्वरो आएपछि गजेन्द्रनारायण सिंह अस्पताल राजविराजमा भर्ना गरिएको थियो । त्यसपछि थप उपचार गर्न वीपी कोइराला स्वास्थ्य विज्ञान प्रतिष्ठान, धरान पठाइएको थियो । सो क्रममा उनको बाटोमै मृत्यु भएको हो । मृत्युपछि स्वाब संकलन गरी जाँच गर्दा रिपोर्ट पोजेटिभ आएको हो ।

उता, सप्तरीकै डाक्नेश्वरी नगरपालिका ९ का ७४ बर्षीय र राजगढ गाउँपालिकाका ७१ बर्षीय बृद्धमा भने कोरोना नेगेटिभ आएको हो । अब कोरोना संक्रमणबाट सप्तरीमा मृत्यु हुनेको संख्या २ पुगेको छ । देशभर मृत्यु हुनेको संख्या ६४ पुगेको छ । यसअघि बुधबार मात्र ५ जनाको कोरोना भाइरसको संक्रमणकै कारण ज्यान गएको थियो ।

काठमाडौं । आज नेपालमा कोरोना भाइरसको संक्रमणबाट एकै दिन सर्वाधिक संख्यामा मानवीय क्षति भएको छ । आज मात्र ५ जनाको कोरोना भाइरसका कारण ज्यान गएको पुष्टी भएको हो । अब नेपालमा कोरोनाले ज्यान गुमाउनेको संख्या ६३ पुगेको छ । बुधबार पर्सा र मोरङमा दुई–दुई जना तथा काठमाडौंमा एक जनाको कोरोना भाइरसका कारण ज्यान गएको हो । कोरोना संक्रमणबाट पर्सामा वीरगञ्ज–१५ भिश्वाका ४६ बर्षीय पुरुष र पोखरिया नगरपालिका–८ कि १८ बर्षीया युवतीको ज्यान गएको पुष्टी भएको छ ।

वीरगञ्ज हेल्थकेयर कोभिड अस्पतालमा उपचारका क्रममा ४६ बर्षीय पुरुषको मृत्यु भएको हो । उनी मधुमेहका बिरामी थिए । उनले साउन १८ मा स्वयमले पैसा तिरेर कोरोना संक्रमण परीक्षण गराएका थिए । उता, साउन १९ मा मृत्यु भएकी पोखरिया नगरपालिका–९ कि १८ वर्षीया युवतीमा कोरोना संक्रमाण पुष्टि भएको हो । उनमा झाडावान्ताको समस्या भएपछि सोमबार नेशनल मेडिकल कलेज लगिएको थियो । तर अस्पतालमा लैजानैसाथ मृत घोषणा गरिएको थियो ।

यता, मोरङमा कोशी अस्पताल, विराटनगरको आइसोलेसन कक्षमा मृत्यु भएका विराटनगरका पुरुष र अस्पताल ल्याउने क्रममा बाटोमै ज्यान गुमाएका रंगेली नगरपालिकाका पुरुषमा कोरोना संक्रमण पुष्टि भएको छ । उनीहरु दुबै जनाको बुधबार दिउँसो रिपोर्ट पोजेटिभ आएको छ । यता काठमाडौंमा उपचाररत एक महिलाको समेत कोरोना भाइरसका कारण ज्यान गएको छ ।

बलम्बुस्थित सशस्त्र प्रहरीको अस्पतालमा उपचाररत कोभिड–१९ को संक्रमितको ज्यान गएको हो । सर्लाही–६ मलंगवाकी ६५ वर्षीया महिलाको उपचारका क्रममा मृत्यु भएको हो । उनमा निमोनियाको समस्या रहेको पाइएको छ । पछिल्लो समय नेपालमा समुदायमा स्तरमा कोरोना फैलिएपछि मृत्युदरसमेत उकालो लागेको छ ।

वीरगन्ज । नेपालमा कोरोना भाइरसको संक्रमणबाट थप एक जनाको ज्यान गएको छ । गत सोमबार निधन भएकी पर्साकी एक युवतीमा कोरोना भाइरसको संक्रमण भएको पुष्टी भएको हो । पर्साको पोखरिया नगरपालिका–९ मा बस्दै आएकी १८ वर्षीया युवतीमा कोरोनाको संक्रमण देखिएको हो । उनी पखालाबाट ग्रसित थिइन् ।

उपचार गर्न लागि सोमबार नेशनल मेडिकल कलेज लैजाँदै गर्दा उनको बाटोमै मृत्यु भएको थियो । मेडिकल कलेजमा स्वाब संकलन गरी नारायणी अस्पतालको प्रयोगशालामा परीक्षण गर्दा मंगलबार राति उनको रिपोर्ट पोजेटिभ आएको अस्पतालले जानकारी दिएको छ । उनको मृत्युबारे मन्त्रालयबाट घोषणा हुन भने बाँकि छ ।

अब नेपालमा कोरोना भाइरसको संक्रमणबाट निधन हुनेको संख्या ५८ पुगेको छ । पर्सामा मात्र १३ जना पुगेका छन् । पछिल्लो समय पर्सा कोरोनाबाट बढी मानवीय क्षति हुने जिल्ला बनेको छ ।

विराटनगर । नेपालमा कोरोना भाइरसको संक्रमणबाट थप एक जनाको ज्यान गएको छ । विराटनगरको कोशी अस्पतालमा कोरोना संक्रमणबाट एक वृद्धको ज्यान गएको हो । ज्वरो र स्वासप्रश्वासको समस्याबाट पिडित उनी सोमबार विहान ९ बजे अस्पताल भर्ना भएका थिए । विराटनगर महानगरपालिका– ५ का ७७ वर्षिय उनको आज नै स्वाव नमुना संकलन गरिएको थियो ।

दिउँसो ज्यान गएको उनको सोमबार साँझ आएको कोरोना नतिजा पोजेटिभ पाइएको छ । उनलाई आइसोलेसनमा राखेर उपचार थालिएको थियो । उनी मधुमेहको समस्याबाट ग्रसित रहेको र पछिल्ला दिनमा ज्वरो र श्वासप्रश्वासमा समस्या देखिएको अस्पतालको भनाई छ । उनमा कसरी कोरोना सरेको हो भन्ने स्रोत भने नखुलेको अस्पतालको भनाई छ ।

यससँगै अब नेपालमा कोरोना भाइरसको संक्रमणबाट ज्यान गुमाउनेको संख्या ५८ पुगेको छ । मोरङमा मात्र २ जनाको मृत्यु भएको छ । उनको मृत्युलाई स्वास्थ्य मन्त्रालयले घोषणा गर्न भने बाँकि रहेको छ ।

काठमाडौं । नेपालमा लकडाउन खुलेपछि कोरोना ग्राफ उकालो लागेको छ । त्यसमाथि कोरोना भाइरसको लक्षण नै देखिने र त्यसले मृत्युसमेत निम्त्याउन थालेसँगै सरकारले पुनः रणनीतिक फेरबदल गर्ने तयारी थालेको छ । सरकारले अहिले नै कडा लकडाउन तथा अन्य उपायबारे सार्वजनिक गरेको छैन । तर, नागरिकस्तरमा सकेसम्म भीडभाड नगर्न र सचेतना अपनाउन आह्वान गरिएको सोही क्रममा स्वास्थ्य तथा जनसंख्या मन्त्रालयले आइतबार वृद्धवृद्धा र बालबालिकालाई सकेसम्म घर बाहिर ननिस्कन आह्वान गरेको छ ।

मन्त्रालयका प्रवक्ता डा. जागेश्वर गौतमले ६० वर्षभन्दा माथि र साना बालबालिकामा कोरोना भाइरसको उच्च जोखिम रहने भन्दै सकेसम्म घर बाहिर नजाने आग्रह गरे । कोरोना सामाजिक दूरी कायम गरेमा संक्रमणबाट बच्न सकिने रोग हो । नेपालमा शहरी इलाकामा कोरोना भाइरसको संक्रमणले भयाभह अवस्था सिर्जना गर्न सक्ने जोखिम देखिएको छ । भित्रभित्रै भुसको आगो सरह फैलिएको कोरोना छिट्टै विष्फोटनको अवस्था आउन सक्ने भन्दै विज्ञहरुले सरकारलाई भने पुनः कडा लकडाउनमा जान सुझाव दिइरहेका छन् ।

सरकारले भने पहिलो चरणमा जोरविजोर प्रणाीलाई पुनः ब्यूताएर भीड नियन्त्रणबारे योजना बनाइरहेको छ । अवस्था जटिल बन्दै जाँदा लकडाउनसम्मको तयारी सरकारले गरेको हो । पछिल्लो समय नेपालमा कोरोना संक्रमणको जोखिम बढेको भन्दै सरकारले थप सतर्कता अपनाउन आग्रह गरेको छ। आइतबारमात्र काठमाडौंमा ३१ जनामा कोरोना भाइरस परीक्षण देखिएको छ । देशभर भने पछिल्लो २४ घण्टामा २ सय ४६ जना कोरोनाका नयाँ संक्रमित थपिएका छन्। अब देशभर कोरोना संक्रमितको कुल संख्या २० हजार ३३२ पुगेको छ।

अहिले देशभर सक्रिय संक्रमितको संख्या पाँच हजार ६७२ छ। पछिल्लो २४ घण्टामा ८ हजार ८ सय ६१ जनाको पिसिआर परीक्षण गरिएको छ। आइतबार एक सय ११ जना डिस्चार्ज भएका छन्। हालसम्म निको हुनेको संख्या १४ हजार ६ सय ३ रहेको छ । ५७ जनाको भने मृत्यु भएको छ ।

वीरगन्ज । नेपालमा कोरोना भाइरस संक्रमण र मृत्युको इपिसेन्टर बनेको पर्सामा आइतबार थप ४५ नयाँ संक्रमित देखिएका छन् । नारायणी अस्पतालको पीसीआर प्रयोगशालामा भएको परीक्षणबाट १४ महिलासहित ४५ जनामा कोरोना पुष्टि भएको हो । उनीको शनिबार संकलन गरिएको परीक्षणमा कोरोना संक्रमण पुष्टि भएको हो । पर्सामा सम्भावित स्थानमा मास टेष्टिङ शुरु भएको छ । सोही क्रममा एकसाथ ठूलो संख्यामा संक्रमित देखिएका छन् । पर्सामा समुदाय स्तरमा कोरोना भाइरसको संक्रमण पैलिसकेको छ ।

डाक्टरहरुका अनुसार कोरोना पुष्टी भएका व्यक्तिले ढाँट्ने, समुदायमा निस्कने, बजार पसलमा पुग्ने प्रवृत्तिका कारण समेत यहाँ कोरोनाले जटिल रुप लिने अवस्था आएको छ । पर्सामा मात्र पछिल्लो ११ दिनमा १० जनाको मृत्यु कोरोनाका कारण भइसकेको छ । पछिल्लो रिपोर्टअनुसार संक्रमितमध्ये ४३ जना वीरगञ्जका हुन् । त्यसबाहेक सखुवा प्रसौनी गाउँपालिका र निर्मलबस्तीका एक–एक जनामा कोरोना संक्रमण देखिएको हो

। यस परीक्षणमा वीरगञ्ज महानगरपालिकाका नगर प्रमुख विजय सरावगीको परिवारका दुई सदस्यसहित ६ जनामा रिपोर्ट पोजेटिभ आएको छ । उनले भेटेका मानिसहरुको अहिले कन्ट्याक्ट ट्रेसिंगको काम शुरु भएको छ ।

वीरगञ्ज । नेपालमा कोरोनाबाट थप एक जनाको निधन भएको छ । वीरगञ्जमा कोरोना भाइरसको संक्रमणबाट ५० वर्षिय महिलाको ज्यान गएको हो । पछिल्लो १० दिनमा पर्सा जिल्लामा मात्र १० जनाको कोरोना भाइरसको संक्रमणबाट ज्यान गएको छ । यसले पर्सा जिल्लालाई सबैभन्दा संवेदनसिल अवस्थामा पुर्याएको हो । नारायणी वयोधा अस्पतालमा उनको ज्यान गएको हो ।

उनी वीरगञ्ज १६ नगवाकी ५० वर्षीया महिला रहेको अस्पतालले जनाएको छ । उनी बयोधा अस्पतालमा साउन १४ गते बुधबार भर्ना भएकी थिइन् । उनको शुक्रबार स्वाबको नमुना संकलन गरीएको थियो । पीसीआर परीक्षणको रिपोर्ट नआउँदै उनको ज्यान गएको थियो । शुक्रबार अबेर मात्र रिपोर्ट पोजेटिभ आएको हो । उनमा चिनिरोगको समस्या रहेको बताइएको छ । नेपालमा २० हजारमा कोरोना भाइरसको संक्रमण पुग्दा ५७ जनाको ज्यान गएको छ ।

वीरगन्ज । संघीय सांसद प्रदीप यादवलाई कोरोना भाइरसको संक्तमण पुष्टी भएको छ । उनीसहित पर्सामा थप ६१ जनाका कोरोना संक्रमण पुष्टि भएको हो । संक्रमित हुनेमा एक डाक्टर, एक पारामेडिक्स समेत रहेको बताइएको छ । यादव पर्सा क्षेत्र नम्बर १ का सांसद हुन् ।

शनिबार थपिएका संक्रमितमा बाराका एक र रौतहटका दुई जना रहेका छन् । यसरी वीरगन्जमा भएको परीक्षणमा शनिबार कुल ६४ जनामा संक्रमण पुष्टी भएको हो । नारायणी अस्पतालका अनुसार संक्रमित १५ देखि ६८ वर्ष समूहका छन् । त्यसमा तीनजना महिला रहेका छन् । पर्साका संक्रमित वीरगञ्ज महानगरपालिका वडा नम्बर १, ३, ६, ७, १०, १२, १६, २३ २५ का हुन् । नारायणी अस्पतालको विशेष कोभिड अस्पताल गण्डकका अनुसार केही संक्रमितमा भने कोरोनाका लक्षण नै देखिएको छ ।

कोरोनाको लक्षण देखिएका बिरामी बढी जोखिममा रहेका छन्। कोभिड अस्पतालको आइसोलेसन भने अहिले फुल भइसकेको छ । पछिल्ला दिनमा पर्सामा अत्यधिक कोरोना संक्रमित देखिएका छन् । यहाँ मृत्युदरसमेत उच्च रहेको छ । लक्षण नदेखिएका संक्रमितलाई होम आइसोलेसनमा राखिने भएको छ । होम आइसोलेसनमा राखिएका संक्रमित घरबाहिर जान पाउने छैनन् ।

काठमाडौं । सरकारले कोरोना भाइरसको संक्रमणका कारण मृत्यु भएका व्यक्तिको शव व्यवस्थापन सम्बन्धमा निर्देशिक बनाएको छ । सोहीअनुसार हुने शव व्यवस्थापनमा स्थानीयबाट हुने अवरोध र प्रशासनले स्थानीयलाई आश्वस्त पार्न नसक्दा शव व्यवस्थापनमा हरेक पटक किचलो उत्पन्न हुने गरेको छ । यो देशभर देखिएको समस्या हो ।

पछिल्लो समय पर्सामा कोरोना संक्रमितको शव व्यवस्थापनमा स्थानीय अवरोध गरेका छन् । सो क्रममा स्थानीय र प्रहरीबीच झडपसमेत भएको छ । स्थानीयको अवरोध हुँदाहुँदै पनि प्रशासनले संक्रमितको शव भने व्यवस्थापन गरेको छ । वीरगञ्ज महानगरपालिका–३१ मिलनचोकमा स्थानीय र प्रहरीबीच झडप भएको हो । झडपका क्रममा प्रहरीले आधा दर्जन सेल अश्रु ग्यास प्रहार गरेको छ ।

शव व्यवस्थापन गाउँ नजिकैको जगंलमा गर्न नदिने भन्दै मिलन चोक, नौकाटोल र पसरामपुरका बासिन्दा प्रदर्शनमा उत्रिएका हुन् । प्रदर्शनकारीले प्रहार गरेको ढुंगा जिल्ला प्रहरी कार्यालय पर्साका प्रमुख प्रहरी उपरीक्षक गंगा पन्तलाई समेत लागेको हो । ७ जना प्रहरी सामान्य घाइते रहेको पर्सा प्रहरीले जनाएको छ । शव व्यवस्थापनका लागि जंगल क्षेत्रमा जाने क्रममा नेपाल प्रहरी र नेपाली सेनाको टोलीलाई मिलन चोकमा स्थानीयले ढुंगा प्रहार गरेका थिए ।

त्यसपछि अवस्था तनावग्रस्त बनेको हो । भिड नियन्त्रण गर्न प्रहरीले अश्रु ग्यास हानेको थियो । गाउँ नजिकै जंगलमा शव गाड्दा आफूहरुलाई हानी गर्न सक्ने डरले स्थानीयले विरोध गरेको स्थानीयको भनाई छ । १५ साउनमा वीरगञ्जमा कोरोना भाइरसका कारण तीन जनाको ज्यान गएको थियो । उनीहरु सबैको शव शुक्रबार राती व्यवस्थापन गरिएको हो ।

वीरगन्ज । नेपालमा वीरगन्जमा कोरोनाले ठूलो मानवीय क्षति गरिरहेको छ । यसैक्रममा बिहीबार थप दुई जनाको कोरोना भाइरसको संक्रमणबाट मृत्यु भएको छ । वीरगन्जमा ३५ र ६५ बर्षीय पुरुषको बिहीबार ज्यान गएको हो । अब नेपालमा कोरोना संक्रमणबाट ज्यान गुमाउने बिरामीको संख्या ५४ पुगेको छ । यी मध्ये ८ जनाको ज्यान पर्सामा मात्र भएको छ ।

उनीहरु सबैको साउनमा ज्यान गएको छ । यसअघि वीरगन्जमा बाराका २ जना र रौतहटका एक जनाको मृत्यु भएको थियो । वीरगन्जमा समुदाय स्तरमा कोरोना फैलिएको छ । सोहीकारण दीर्घरोग लागेका धेरैलाई कोरोना भाइरसले क्षति पुर्याएको छ । अहिले वीरगन्ज महानगरपालिकामा निषेधाज्ञा जारी गरिएको छ ।

विहीबार वीरगञ्ज–१६ नगवाका ३५ बर्षीय पुरुषको गण्डक कोरोना अस्पतालमा उपचारका क्रममा निधन भएको हो । ज्वरो आउने, श्वासप्रस्वासमा समस्या लिएर उनी मंगलबार अस्पताल आएका थिए । उनको उपचारका क्रममा बिहीबार बेलुकी मुत्यु भएको अस्पतालले जनाएको छ । उता, वीरगञ्जमा बिहान घरमै मृत्यु भएका थप एक जनामा समेत कोरोना देखियो ।

वीरगञ्ज–२ छपकैयाका ६५ बर्षिय पुरुषमा कोरोना संक्रमण पुष्टि भएको हो । उनको घरमा ज्यान गएको जानकारी आएपछि नारायणी अस्पतालको टोलीले गएर स्वाब संकलन गरेको थियो । बेलुका उनको पीसीआर परीक्षण रिपोर्ट पोजेटिभ आएको छ ।

वीरगन्ज । नेपालमा कोरोना भाइरसका कारण ज्यान गुमाउने मानिसको संख्या बढ्न थालेको छ । सरकारले मृत्युदर कम भएको भन्दै गौरव गरिरहेका बेला हरेक मृत्यु हुने मानिसको संख्या बढ्न थालेको हो । बुधबार मात्र कोरोना भाइरसको संक्रमणबाट नेपालमा थप तीन जनाको मृत्यु भएको छ । यससँगै नेपालमा कोरोना संक्रमणबाट मृत्यु हुनेको संख्या ५२ पुगेको छ ।

बुधबार पर्सामा थप दुई जनाको ज्यान गएको हो । अब यो जिल्लामा मात्र कोरोना संक्रमणका कारण ज्यान गुमाउने मानिसको संख्या ७ पुगेको छ । बुधबार विहान ६८ वर्षीय पुरुषको कोरोना विशेष गण्डक अस्पतालमा र दिउँसो ७१ वर्षीय पुरुषको नेशनल मेडिकल कलेजमा मृत्यु भएको अस्पतालले जनाएका छन् । निधन भएका पुरुषहरुमा दीर्घरोग रहेको बताइएको छ ।

७१ वर्षका पुरुष पखाला लागेर उपचार गर्न नेशनल मेडिकल कलेजमा पुगेका थिए । उनी मिर्गौलाको समस्याबाट पिडित रहेको बताइएको छ । उनको आइतबार पिसिआर परीक्षण गरिएको थियो । ६८ बर्षीय पुरुष समेत मुटु र निमोनियाका बिरामी रहेको अस्पतालले जनाएको छ ।

उता, धरानमा थप एकजना कोरोना संक्रमितको मृत्यु भएको छ । बुधबार दिउँसो विराटनगरबाट रेफर गरिएका कोरोना संक्रमितको उपचारका क्रममा साँझ ज्यान गएको हो । वीपी कोइराला स्वास्थ्य विज्ञान प्रतिष्ठान धरानका अनुसार एक ४५ वर्षीय पुरुषको कोरोनाका कारण ज्यान गएको छ ।

काठमाडौं । मंगलबार नेपालमा पछिल्लो दुई साता यताकै सर्वाधिक कोरोना संक्रमित बिरामी भेटिए । यस दिन २४ घण्टाको अवधिमा कुल ३ सय ११ जनामा कोरोनाका बिरामी थपिए । यसमध्ये काठमाडौंमा ४८ सहित उपत्यकामा मात्र ५३ जनाका कोरोना भाइरसको संक्रमण भेटिएको छ । यसले मुलुकका अन्य भेगमा भन्दा अब कोरोनाको ज्वरो काठमाडौं उपत्यका भित्र चर्कने संकेत गरेको छ ।

खासगरी लकडाउन खुकुलो भएपछि काठमाडौं उपत्यकामा छिर्ने मानिसको अधिक भीड छ । तर, उनीहरुलाई काठमाडौं आइसकेपछि उचित सुरक्षा प्रवन्धसहित व्यवस्थापनको तयारी भने छैन । महानगरपालिका र सरकारले भवितब्यबारे कुनै योजना बनाएको पाइदैन । पछिल्लो केही दिनयता बाढी पहिरोका कारण सडक अवरुद्ध भएपछि काठमाडौं आउने कम भएका छन् । तर, उपत्यकामा संक्रमणको ग्राफ भने उकालो लागिसक्यो ।

यसले केही दिन भित्रै भयाभहको अवस्था सिर्जना गर्ने चेतावनी विज्ञहरुले दिएका छन् । त्यस अवस्थामा काठमाडौं उपत्यकाको संकट टार्न निकै मुस्किल हुने निश्चित छ । सरकारले काठमाडौं महानगरभित्र भारत तथा तेस्रो मुलुकबाट आएका मानिसलाई समेत १४ दिन क्‍वारेन्टाइनमा राख्‍न सकेको छैन । त्यसका लागि क्‍वारेन्टाइन नै छैनन् ।

त्यसमाथि उपत्यका छिर्ने अन्य जिल्लाका मानिसलाई क्वारेन्टाइनमा राख्न सक्ने त कल्पना बाहिरको विषय भयो । यसले काठमाडौंलाई अब कोरोनाको इपिसेन्टर बनाउने जोखिम बढेको छ । अहिले काठमाडौं आउने मानिुलाई स्थानीय निकाय वा जिल्ला प्रशासनले सहजै सिफारिस दिन्छन् । यसले काठमाडौं आउने मानिसको चाप ह्वात्तै बढेको छ ।

वीरगन्ज । नेपालमा कोरोना भाइरसको संक्रमणका कारण मृत्यु हुनेको संख्या ४७ पुगेको छ । आइतबार थप दुई जनामा कोरोनाका कारण ज्यान गएको पुष्टी भएको हो । वीरगञ्जस्थित कोरोना विशेष अस्पतालमा आइतबार बिहान मृत्यु भएका ६५ वर्षीय वृद्धमा कोरोना संक्रमण पुष्टि भएको हो ।

नारायणी अस्पतालको प्रयोगशालामा गरिएको परीक्षणमा मृतकको रिपोर्ट पोजेटिभ आएको अस्पतालले जनाएको छ । उनी मधुमेह र मुटुका रोगी भएको बताईएको छ । शनिबार राति वीरगञ्ज हेल्थकेयरबाट गण्डक अस्पतालमा भर्ना गरिएको उनको आइतबार बिहान ज्यान गएको हो । उता, धनुषाको प्रादेशिक अस्पतालबाट धरान रेफर गरिएपछि लैजादै गर्दा बाटोमै मृत्यु भएका युवकमा समेत कोरोना संक्रमण पुष्टि भएको छ ।

ज्वरो र रुघाखोकी लागेर जनकपुरधामस्थित प्रादेशिक अस्पताल भर्ना भएका धनुषाको शहीदनगर नगरपालिका ८ डुमरियाका ३८ बर्षीय युवकको थप उपचारका लागि धरान लैजाने क्रममा आइतबार बाटोमै मृत्यु भएको थियो । उनको आइतबार साँझ कोरोना परीक्षणको रिपोर्ट आएको हो ।

रिपोर्टबाट उनमा कोरोना पोजेटिभ देखिएको छ । यससँगै अब नेपालमा कोरोनाका कारण मृत्यु हुनेको संख्या ४७ पुगेको छ । यद्दपी यसको घोषणा मन्त्रालयबाट हुन भने बाँकि रहेको छ ।