Category: स्वास्थ्य

पोखरा । नेपालमा कोरोना भाइरसको संक्रमणबाट थप एक जनाको ज्यान गएको छ । पोखरा स्वास्थ्य विज्ञान प्रतिष्ठान, पश्चिमान्चल क्षेत्रीय अस्पतालको आईसीयूमा उपचार गराइरहेका एक जनाको कोरोना संक्रमणका कारण ज्यान गएको हो । स्याङ्जा सिरुवारी निवासी ५५ वर्षीय पुरुषको गतरात ११ः३५ मा निधन भएको अस्पतालले जनाएको छ ।

अब नेपालमा कोरोना भाइरसको संक्रमणबाट मृत्यु हुने व्यक्तिको संख्या २५ पुगेको छ । उनी असार ८ मा अस्पतालमा भर्ना भएका थिए । स्वास्थ्य बिग्रिँदै गएपछि उनलाई भेन्टिलेटरमा राखिएको थियो । उनी डायबिटिजका बिरामी रहेको समेत अस्पतालले जानकारी दिएको छ ।

पश्चिमान्चल क्षेत्रीय अस्पताल पोखरामा उपचार गर्दागर्दै कोरोना संक्रमितको मृत्यु भएका स्याङ्जाका यी पुरुष दोस्रो व्यक्ति हुन् । यसअघि सोही अस्पतालमा स्याङ्जाकै ५८ वर्षीय कोरोना संक्रमित पुरुषको मृत्यु भएको थियो ।

उता गण्डकी प्रदेशमै बिहीबार थप ११ जनामा कोरोना संक्रमण पुष्टि भएको छ । स्याङ्जा, म्याग्दी, बाग्लुङ र नवलपुरमा नयाँ संक्रमित पुष्टि भएको गण्डकी स्वास्थ्य निर्देशनालयले उल्लेख गरेको छ । संक्रमण पुष्टि हुनेमा स्याङ्जाका एक जना, बागलुङका २ जना छन् ।

त्यस्तै, म्याग्दीका २० देखि ३२ वर्ष उमेर समूहका ६ जना पुरुष छन् । नवलपुरमा संक्रमण पुष्टि हुने २ जना छन् । गण्डकी प्रदेशभर बिहीबारसम्म ७ सय ५३ जनामा कोरोना पुष्टि भएको छ ।

काठमाडौं । नेपालमा लकडाउन खुकुलो भएपनि कोरोना महामारीको जोखिम भने कम नभएको विश्व स्वास्थ्य संगठनले बताएको छ । संगठनको नेपालस्थित कार्यालयले कोभिड १९ को महामारी कायमै रहेको भन्दै सतर्क सहत आम नागरिक र सरकारलाई सचेत समेत गराएको छ ।

संगठनका नेपाल प्रमुख जोस भ्यान्डेलरले नेपाल सरकारले लकडाउन खुकुलो पारे पनि कोरोना महामारी नटरेको उल्लेख गरे । लकडाउन खुकुलो भएपछि शहर बजारमा सर्वसाधारणको क्रियाकलाप बढेको छ । कार्यालय सञ्चालनमा आएका छन् । यस अवस्थामा सबै जना चनाखो र सुरक्षित हुनुपर्ने उनको भनाई छ ।

भ्यान्डेलरले सकेसम्म भिडभाडबाट टाढा रहन, जानै परे दूरी कायम गर्न, मास्क लगाउन र साबुन पानीले हात धुने सुझाव समेत दिएका छन् ।

लकडाउन सबैका लागि मुस्किलको समय रहेको भन्दै तर महामारी भने अझै पनि रहेको र थप संक्रमणको डर रहेको समेत उनको भनाई छ । ज्वरो, खोकी वा कुनै शंकास्पद लक्षण देखिएमा तुरुन्त स्वास्थ्यकर्मीलाई देखाउन उनले आह्वान गरेका छन् ।

पोखरा । गण्डकी प्रदेशमा शनिबार बिहानै ५८ जना कोरोना संक्रमित फेला परेका छन् । प्रदेशका ७ जिल्लामा ५८ जना कोरोना संक्रमित पुष्टी भएको हो । शनिबार तनहुँमा २५, नवलपुरमा १६, बाग्लुङमा ८, गोरखामा ५, कास्कीमा २ तथा म्याग्दी र स्याङ्जामा १–१ जनामा कोरोना संक्रमण पुष्टि भएको छ । अब गण्डकी प्रदेशमा कोरोना संक्रमण पुष्टि हुने व्यक्तिको संख्या संख्या ४३८ पुगेको छ । देशभर भने करीव ९ हजार मानिसमा संक्रमण पुष्टी भइसकेको छ ।

गण्डकी प्रदेश कोरोना नियन्त्रण तथा रोकथाम कार्यक्रमका निर्देशक डा. विनोद विन्दु शर्माका अनुसार नयाँ संक्रमितहरुमध्ये तनहुँको ऋषिङ गाउँपालिकाबाट मात्र २१ जना भेटिएका छन् । उनीहरु १ वर्षका बालकदेखि ३७ वर्ष उमेर समूहका युवा छन् ।

तनहुकै ब्यास नगरपालिकामा २४ र २८ वर्षका दुई जना पुरुष तथा शुक्लागण्डकी नगरपालिकाका ३५ र २२ वर्षका दुई जना पुरुषमा कोरोना भेटिएको छ । नवलपुर जिल्लाका १६ संक्रमितहरुमध्ये बुलिङटार गाउँपालिकाका मात्रै ११ जना छन् । उनीहरु १७ वर्षदेखि ३७ वर्ष उमेर समूहका पुरुषहरु हुन् । यस्तै मध्यविन्दु नगरपालिकाका २५ र ४५ वर्ष उमेर समूहका दुई जना पुरुषमा पनि कोरोना पुष्टि भएको छ ।

नवलपुरकै बौदीकाली गाउँपालिकाका ४७ वर्षीय पुरुष, विनयत्रिवेणी गाउँपालिका २१ वर्षीय पुरुष र देवचुली नगरपालिकाका १९ वर्षीय पुरुषमा पनि कोरोना संक्रमण पाइएको छ ।
बाग्लुङको काठेगाखोला गाउँपालिकामा ७ जना पुरुष र एक जना महिला गरी ८ जना नयाँ संक्रमित फेला परेका छन् । उनीहरु २२ देखि ३९ वर्ष उमेर समूहका छन् ।

स्वास्थ्य निर्देशनालय पोखराले शनिबार बिहान जारी गरेको सूचनाअनुसार गोरखाको भिमसेन नगरपालिकामा ३६, ३३, २२, ३५ र २८ वर्षका पाँच जना पुरुषमा कोरोना संक्रमण पुष्टि भएको छ ।

कास्कीको मादी गाउँपालिका ४१ वर्षीय पुरुष र १९ वर्षीया महिलामा कोरोना पुष्टि भएको छ ।

यसैगरी म्याग्दीको मालिका गाउँपालिकामा ३० वर्षीय पुरुष र स्याङ्जाको पालिका नखुलेको २९ वर्षीय पुरुषमा पनि कोरोना संक्रमण देखिएको स्वास्थ्य निर्देशनालय गण्डकी प्रदेशले उल्लेख गरेको छ ।

कोरोना महामारीका कारण लाखौंको मृत्‍यु र संक्रमित भै सकेको अवस्थामा कतिपय दुखाई कम गराउने औषधीले भने कोरोना संक्रमितलाई मृत्‍यु सैय्यासम्म पुर्याउने खतरा गरेको एक अध्ययनले देखाएको छ । दक्षिण कोरियास्थित अध्ययनकर्ताहरुले कोभिड -१९ का कारण हुने शारिरिक कठिनाई र मृत्‍युको बिषयमा गरिएको अनुसन्धान पछि उनिहरुले सामान्य पेन किलर (दुखाई कम गर्ने) औषधीले कोरोना संक्रमितको मृत्‍यु सम्भावना ६५ प्रतिशतले बृद्धि हुने बताएका छन् ।

अझै मोर्टिन, एड्भिल, नाप्रोक्सिन जस्ता नन-स्ट्रोडियल एण्टी ईन्फ्लामेटारी (एन एस ए आई डि) औषधीले कोरोना संक्रमितको मृगौला नष्ट गर्न र मुटु रोग लाग्ने सम्भावना करिब ८५ प्रतिशतले बृद्धि हुने अध्ययनले बताएको छ । यस्ता औषधीहरु सामान्य अवस्थामा टाउको शरिरको मांसपेसी दुख्ने ज्वरो आउने हुँदा प्रयोग गरिने प्रचलन छ ।  अनुसन्धानकर्ताहरुले भनेका कोरोना भाईरसका बिरामीले एण्टी ईन्फ्लामेटरी औषधी प्रयोग गर्दा निकै होस् पुर्‍याउनु पर्ने हुन्छ । एण्टी ईन्फ्लामेटरी औषधीहरु कोरोनाका बिरामीको लागि घातक हुने कुराको अनुसन्धान यो मात्र पहिलो भने होईन । यस अगाडि पनि दर्जन अनुसन्धानले यस्ता औषधीहरुले घात पुर्याउने निस्कर्ष निकाली सकेका भने पनि बेलायतस्थित एनएचएस (नेशनल हेल्थ सर्भिस) ले भने घात गर्छ भन्ने कुराको कुनै प्रष्ट प्रमाण नभएको बताउँदै आएको छ ।

सियोलस्थित सुङक्योनक्वान युनिभर्सिटीका बैज्ञाननिकले कोरियामा अस्पताल भर्ना भएका १८२४ कोभिड -१९ का बिरामी माथि अनुसन्धान गरेका थिए । ती बिरामी मध्ये एन एस ए आई डि औषधी प्रयोग गर्ने अधिकांशको मृत्‍यु भएको अनुसन्धान पछि बताईएको छ ।  

एजेन्सी

काठमाडौं  । नेपालमा कोरोना संक्रमणबाट थप दुई जनाको मृत्यु भएको छ । स्वास्थ्य तथा जनसंख्या मन्त्रालयका प्रवक्ता डा.जागेश्‍वर गौतमको अनुसार मृत्यु हुनेमा सुदूरपश्‍चमका दुई जना रहेका छन् । जसमध्ये गोदावरी नगरपालिका-४ का ४६ वर्षीय पुरुष र लम्कीचुहा नगरपालिका- २की ४३ वर्षीया महिला रहेका छन् ।

उनलाई जेठ ३१ गते कोरोना पुष्टि भएको थियो ।

गोदावरी नगरपालिकाका पुरुषको सेती अस्पतालमा उपचारका क्रममा असार ३ गते साँझ मृत्यु भएको स्वास्थ्य तथा जनसंख्या मन्त्रालयले पुष्टि गरेको छ ।

त्यसैगरी लक्कीचुहाकी महिलालाई टाउकोमा चोट लागेपछि उपचारका लागि नेपालगन्ज ल्याइएको थियो । उनको असार २ गते कोरोना परीक्षण गरिएको नतिजा असार ३ गते पोजेटिभ देखिएको थियो ।

उनको असार २ गते नै निधन भएको जनाइएको छ ।

बुटवल । अर्घाखाँचीको शितगंगा नगरपालिकाको क्वारेन्टिनमा मृत अवस्थामा भेटिएका ४४ वर्षिय पुरुषमा समेत कोरोना संक्रमण पुष्टि भएको छ । आरडीटी रिपोर्ट पोजेटिभ आए आएपछि शिततगंगा–५ का देबबहादुर विक मंगलबार राति रुखमा झुण्डिएको अवस्थामा मृत भेटिएका थिए । विकको जेठ २४ गते आरडीटी परीक्षण प्रतिवेदन पोजेटिभ आएको थियो ।

त्यसपछि जेठ २५ गते पीसीआर परीक्षणका गर्न उनको स्वाबको नमूना संकलन गरी प्रादेशिक प्रयोगशाला भैरहवा पठाइएको थियो । ल्याबमा पठाएको ११ दिनपछि रिपोर्ट पोजेटिभ आएको छ । पीसीआर रिपोर्ट नआउन्जेल उनको शव कसैले पनि चलाएन ।

उनको शव बुधबारसम्म रुखमा झुण्डिएकै अवस्थामा रहेको प्रहरीले जनाएको छ । उनी भारतको पञ्जाबबाट आएर क्वारेन्टिनमा बसेका व्यक्ति हुन् । पीसीआर रिपोर्ट आएपछि बुधबार साँझ भने नेपाली सेनाले विकको शव वडा नम्बर ५ कै जंगलमा लगेर व्यवस्थापन गरेको छ ।

सर्खेत । सुर्खेतमा मृत भेटिएकी युवतीमा कोरोना भाइरस संक्रमण भएको पाइएको छ । झुण्डिएको अवस्थामा मृत भेटिएकी युवतीमा कोरोना संक्रमण पुष्टि भएको हो । भारतबाट फर्केर १४ दिन क्वारेन्टिनमा बसेकी उनी घर फर्केपछि घर नजिकै झुण्डिएको अवस्थामा फेला परेकी थिइन् । सुर्खेतको सिम्ता गाउँपालिका ८ कि २५ वर्षीय ती युवतीको पोष्टमार्टम गर्नु अगाडी नै कोरोना परिक्षण गरिएको थियो ।

उनले १ असारमा आत्महत्या गरेकी थिइन् । उनको नमुना परिक्षणको नतिजा बुधबार आएको छ । नतिजा अनुसार उनमा कोरोना पोजेटिभ देखिएको कर्णाली सामाजिक विकास मन्त्रालयले जनाएको छ । युवती १२ जेठमा श्रीमान र छोरीसहित भारतबाट आएकी हुन् ।

क्वारेन्टिनबाट घर पठाउने क्रममा उनीहरु सबैको आरडीटी विधिबाट कोरोना एन्टीबडी जाँच गरिएको थियो । त्यसबेला उनको रिपोर्ट नेगेटिभ थियो । यससँगै नेपालका कोरोनाबाट मृत्यु हुनेको संख्या २१ पुगेको छ । तर, यसलाई संघीय स्वास्थ्य मन्त्रालयले घोषणा गर्न भने बाँकि रहेको छ ।

नेपालगन्ज । नेपालमा कोरोना भाइरसको संक्रमणका कारण थप एक जनाको ज्यान गएको छ । बाँकेमा सोमबार साँझ ज्यान गएकी एक महिलाको कोरोना परिक्षणको रिपोर्ट पोजेटिभ आएको हो । बाँकको बैजनाथ गाउँपालिका ६ की ४६ वर्षीया महिलाको नेपालगन्ज मेडिकल कलेज तथा शिक्षण अस्पताल कोहलपुरको आईसीयुमा सोमबार निधन भएको थियो ।

महिलाको मंगलबार साँझ कोरोना रिपोर्ट पोजेटिभ आएको हो । स्थानीय प्रशासनले उनी निमोनियाको बिरामी भएको जानकारी दिएको छ । उनलाई ३० जेठमा अस्पताल भर्ना गरिएको थियो ।

यससँगै नेपालमा कोरानाबाट मृत्यु हुनेको संख्या २० पुगेको छ । बाँकेमा भने कोरोना भाइरसबाट मृत्यु हुने उनी दोस्रो व्यक्ति हुन् । यसअघि ४ जेठमा बाँकेको नरैनापुर गाउँपालिका–५ का २५ वर्षीय युवकको कोरोना संक्रमणका कारण ज्यान गएको थियो ।

काठमाडौं । गण्डकी प्रदेशमा सोमबार १८ जना कोरोना भाइरसका नयाँ संक्रमित पुष्टी भएको छ । गोरखामा १०, स्याङ्जामा ४, पूर्वी नवलपरासीमा २ तथा कास्की र बाग्लुङमा एक–एक जना कोरोना संक्रमित देखिएका हुन् । अब यो प्रदेशमा कुल संक्रमित २२३ पुगेको छ ।

गण्डकी प्रदेश कोरोना नियन्त्रण तथा रोकथाम कार्यक्रमले दिएको जानकाी अनुसार गोरखा नगरपालिकाका २१ देखि ५३ वर्ष उमेर समूहका ७ पुरुष र एक महिलामा कोरोना संक्रमण पुष्टि भएको छ । उता, गोरखाकै बारपाक सुलिकोट गाउँपालिकाका ५३ र २५ वर्षका दुई जना पुरुषमा पनि कोरोना देखिएको छ ।

स्याङ्जाको चापाकोट नगरपालिकाका १८, ३५, ३९ र १८ वर्षका चार जना पुरुषमा कोरोना संक्रमण पाइएको छ । पूर्वी नवलपरासीको विनयत्रिवेणी गाउँपालिका र मध्यविन्दु नगरपालिकाका एक–एक जनामा कोरोना भाइरस संक्रमण पुष्टि भएको छ ।

कास्कीको पोखरा महानगरपालिकाका २१ वर्षीय पुरुष र बाग्लुङको ताराखोला गाउँपालिकाको ३४ वर्षीय पुरुषमा पनि कोरोना संक्रमण पुष्टि भएको छ । संक्रमित सबै भारतबाट आएका नेपाली हुन् ।

उनीहरु क्वारेन्टिनमा रहेको बताइएको छ । नेपालभर पछिल्लो समय तिब्र गतिमा संक्रमण बढिरहेको छ । देशभर ६३ सय बिरामी पुगिसकेका छन् । त्यसमध्ये १ हजारले रोगलाई जित्न सफल भएका छन् ।

कैलाली । कैलालीमा एक जना स्वास्थ्यकर्मीसहित तीन जना पक्राउ परेका छन् । उनीहरुमाथि क्वारेन्टिनमा बसेकी एक महिलाई बलात्कार गरेको आरोप लागेको छ । कैलालीको लम्कीचुहामा क्वरेन्टिनमा बसेकी एक महिलाले स्वास्थ्यकर्मीबाट आफूमाथि बलात्कार भएको आरोप लगाएकी हुन् ।

लम्कीचुहा नगरपालिका १ पूर्वलम्कीस्थित शहिद स्मृति माध्यमिक विद्यालयकोक्वारेन्टिनमा एक स्वास्थ्यकर्मी र उनका दुई सहयोगीले आफूमाथि बलात्कार गरेको महिलाको आरोप छ । महिला जेठ २०मा गौरीफन्टा नाका हुँदै नेपाल आएर क्वरेन्टिनमा बसेकी थिइन् ।

गतरात उक्त क्वारेन्टिनमा खटिएका एक स्वास्थ्यकर्मी र दुई जना सहयोगीले सवा १२ बजेतिर सामुहिक बलात्कार गरेको उनको आरोप छ । आरोपित तीनै जनालाई इलाका प्रहरी कार्यालय लम्कीले नियन्त्रणमा लिई अनुसन्धान थालेको छ ।

घटनाको थप अनुसन्धान भइरहेको प्रहरीको भनाई छ । घटनामा दोषीमाथि कारबाहीको माग गर्दै स्थानीयले आइतबार लम्की बजारमा विरोध प्रदर्शन समेत गरेका छन् ।

काठमाडौं । नेपालमा कोरोना सङ्क्रमित थप एक जनाको ज्यान गएको छ । गुल्मी धुर्कोट गाउपालिकाका ३६ वर्षका युवाको उपचारका क्रममा ज्यान गएको हो । यससङ्गै अब नेपालमा कोरोनाबाट ज्यान गुमाउने मानिसको सङ्ख्या १९ पुगेको छ ।

उपचारको क्रममा गुल्मीको धुर्कोट गाउँपालिका जैसीथोकका ३६ वर्षीय युवकको कोरोना संक्रमणका कारण गए राति मृत्यु भएको हो।

उनमा जेठ १२ कोरोना संक्रमण पुष्टि भएसँगै रेसुंगा नगरपालिकाको आइसोलेशनमा राखेर उपचार गरिएको थियो। उनी २ वर्षदेखि क्यान्सर रोगले पीडित थिए। केही दिनदेखि उनको स्वास्थ्य अबस्था गम्भीर थियो । उनी आइसोलेशनको बेडमा जान र झर्न नसक्ने भएपछि उनको भुँइमै राखेर उपचार गरिएको थियो।

स्वास्थ्य मन्त्रालयले यसको आधिकारिक पुष्टि गर्न भने बाँकी छ। तीन साता अघि गुल्मीकै मदाने गाउँपालिका–६ का ४१ वर्षीय पुरुषको रुपन्देहीको मणिग्रामस्थित क्रिमसन अस्पतालमा उपचारको क्रममा मृत्यु भएको थियो।

काठमाडौं । नेपालमा कोरोना भाइरसबाट थप दुई जनाले ज्यान गुमाएका छन् । यससँगै अब नेपालमा कोरोनाका कारण ज्यान गुमाउने मानिसको संख्या १८ पुगेको छ । स्वास्थ्य तथा जनसंख्या मन्त्रालयका प्रवक्ता डा. जागेश्‍वर गौतमले दुई जनाको मृत्यु भएको पुष्टी गरे ।

उनका अनुसार नारायणी अस्पतालमा गरिएको स्वाब परीक्षणमा वीरगञ्जको घन्टाघरमा मृत फेला परेका एक ब्यक्ति र वीरगञ्ज हेल्थ केयर उपचारका क्रममा मृत्यु भएका बाराका पाँच वर्षीय बालकमा संक्रमण पुष्टि भएको छ ।

वीरगञ्जको घण्टाघर स्थित खाली जग्गामा रहेको पार्किङस्थलमा मृत भेटिएका व्यक्तिको परीक्षण गर्दा संक्रमण पुष्टि भएको नारायणी हो । उनी अन्दाजी २५ वर्षका पुरुष छन् । बेवारिसे अवस्थामा शव फेला परेपछि उनको कोरोना परीक्षण गरिएको थियो । उनको पहिचान खुलेको छैन ।

उता, वीरगञ्ज–१४ बहुअरीस्थित वीरगंज हेल्थ केयर अस्पतालमा शुक्रबार ज्यान गुमाएका पाँच वर्षीय बालकमा पनि कोरोना संक्रमण पुष्टि भएको हो ।

काठमाडौं । सरकारले २ सयभन्दा बढी कोरोना भाइरसका एक्टिभ संक्रमित भएको जिल्लालाई पुनः लकडाउन गर्न सक्ने भएको छ । करीव तीन महिना लामो लकडाउन केही खुकुलो भएकै दिन स्वास्थ्य मन्त्रालयले कोभिड–१९ सम्बन्धी नयाँ मापदण्ड जारी गरेको छ । जसअनुसार एक जिल्लामा २ सय बढी एक्टिभ संक्रमित रहेको अवस्थामा जिल्लालाई सिल गर्न सकिने भएको छ ।

जुन पहिलाको जस्तै पूर्ण लकडाउनको अवस्था हो । लकडाउन खुकुलो भएसँगै संक्तमण रोग तिब्र गतिमा बढ्न सक्ने सम्भावना रहन्छ । सोहीकारण मन्त्रालयले गर्न हुने र नहुने मापदण्ड तोकेको हो । अब सबै किसिमको जमघट र भेटघाटमा कम्तिमा ६ फिट अर्थातः २ मिटरको दूरी कम्तिमा कायम गर्नु पर्नेछ । बाहिर हिड्दा अनिवार्य मास्कको प्रयोग गर्नुपर्नेछ ।

साबुन पानीले अनिवार्य हात धुन समेत मन्त्रालयले सुझाव दिएको छ । कुनै पनि स्वास्थ्य समस्या देखिएमा तत्काल जाँच गर्नुपर्ने समेत मापदण्डमा उल्लेख गरिएको छ । उच्च जोखिमयुक्त ठाउँमा रहेका होटल र क्यान्टिनले खाना प्याकिङ गरेर मात्र लैजान सक्नेछन् । ग्राहकलाई सेवा प्रदान गर्दा भौतिक दूरी कायम गर्नुपर्ने भएको छ । मापदण्ड उल्लंघन गरेमा भने कारवाही हुने मन्त्रालयले जनाएको छ ।

शुक्रबारबाट काठमाडौंसहित जिल्ला सदरमुकाममा निजी यातायात सेवा संचालनमा आएको छ । बजार पसल खुलेका छन् । कार्यालयहरु संचलनमा आएका छन् । निर्माण कार्य सूचारु भएको छ ।