Category: कला / साहित्य

काठमाडौं । काठमाडौं महानगरपालिकाका नवनिर्वाचित मेयर बालेन्द्र साहले काठमाडौंलाई विश्वकै सुन्दर र उत्कृष्ट शहर बनाउने प्रतिवद्धता व्यक्त गरेका छन् । शुक्रबार बिहान निर्वाचन कार्यालयले आयोजना गरेको निर्वाचित घोषणा तथा बधाई कार्यक्रममा संक्षिअप्त प्रतिक्रिया दिएका बालेनले यस्तो बताएका हुन् । अबको पाँच वर्ष कार्ययोजना पुरा गर्ने भन्दै यसुमा सबै नगरबासीको सहयोग चाहिने बताए । उनले काठमाडौं बासी सबै एकै परिवार भएको भन्दै सुन्दर काठमाडौं बनाउन सबैको साथ चाहिने समेत बताए ।

काठमाडौं । र्‍यापर बालेन्द्र साह काठमाडौं महानगरपालिकाको मेयर बनेका छन्  । स्वतन्त्र उठेका साहले कांग्रेसकी सिर्जना सिंह र एमालेका केशव स्थापितलाई पराजित गर्दै इतिहास रचेका हुन ।
साहले ६१ हजार ७६७ मत ल्याएका हुन् । उनका निकटतम प्रतिद्वन्द्वी कांग्रेसकी सिंहले ३८ हजार ३४१ मत ल्याइन् । स्थापितले ३८ हजार ११७ मत ल्याए । साहले सिंहको भन्दा २३ हजार ४२६ मत बढी पाएका छन् ।

उपमेयरमा एमालेकी सुनिता डंगोल निर्वाचित भइन् । उनले नेकपा एसका रामेश्वर श्रेष्ठलाई फराकिलो मत अन्तरमा पराजित गर्दै उपमेयरमा विजयी भएकी हुन् । डंगोलले ६८ हजार ६१२ मत ल्याइन् । श्रेष्ठले २३ हजार ८०६ मत ल्याएको निर्वाचन आयोगले जनाएको छ 

काठमाडौं । नेकपा (एमाले) का अध्यक्ष केपी शर्मा ओलीले स्थानीय तह निर्वाचनमा पार्टी पराजित हुनुको कारण आफ्नै पार्टी भित्रको अन्तर्घात भएको बताएका छन् । बुधबार बानेश्वरस्थित संसद भवनमा एमाले संसदीय दलको बैठकमा ओलीले कांग्रेस र माओवादीमा यस्तो नभएको बताए । साथै पार्टी अन्य दलका कारण नभई एमालेकै कारण चुनावमा हारेको समेत अध्यक्ष ओलीको भनाई छ । यस विषयमा गम्भीर समिक्षा हुने ओलीको भनाई उदृत गर्दै सांसदहरुले बताएका छन् ।

चार महानगरमा उपमेयर जित्दा मेयर जित्न नसक्नुलाई उनले अन्तर्घातको परिणाम भनेका हुन् । ओलीले माधव नेपालको पार्टीमा समेत यस्तो अन्तर्घात नभएको बताए। उनले राज्यसत्ताको चरम दुरूपयोग भएको आरोप समेत लगाए । एक्लाएक्लै आधारमा हेर्दा एमाले पहिलो पार्टी भएको दाबी गर्दै उनले सीट मात्र कम आएको बताए । एमाले यस चुनावबाट दोस्रो दलमा झरेको छ । २०७४ को चुनावमा २९४ पालिका जितेको एमाले यसपालि २०३ पालिकामा मात्रै प्रमुख पद जितेको छ ।

काठमाडौं । स्थानीय तह निर्वाचन २०७९ मा एकै पटक ७५३ स्थानीय तहको निर्वाचन भएको थियो । सोमबार बिहानसम्म ७२६ स्थानीय तहको अन्तिम मतपरिणाम आउँदा २७ स्थानीय तहमा भने मतगणनोका काम जारी छ । यसमा दुई उपमहानगरपालिका र पाँच महानगरपालिका रहेका छन् । निर्वाचन आयोगका अनुसार १ महानगर, ९ वटा उपमहानगरसहित ७२६ स्थानीय तहको अन्तिम मत परिणाम सार्वजनिक भएको हो । कुल २७ मध्ये २ वटामा मतगणना सुरू नै भएको छैन।

अहिलेसम्म प्राप्त तथ्यांक अनुसार नेपाली कांग्रेसले पालिका प्रमुखदेखि सदस्यसम्म सबैभन्दा बढी पालिकामा जित हात पारि पहिलो स्थानमा छ । दोस्रोमा नेकपा एमाले र तेस्रोमा नेकपा माओवादी केन्द्र छ। प्रदेश १ बाट उदयपुरका दुई वटा पालिका, मधेश प्रदेशबाट रौतहटका ६, सिराहा, धनुषा, बारा र पर्साबाट १, १ पालिकाको अन्तिम नतिजा आउन बाँकी छ। बागमती प्रदेशबाट काठमाडौं महानगरपालिका, ललितपुर महानगरपालिका र भरतपुर महानगरपालिका बाँकी छन्।

गण्डकीबाट पोखरा महानगरपालिका बाँकी हुँदा लुम्बिनीबाट रूपन्देहीका ३ पालिका तिलोत्तमा, लुम्बिनी सांस्कृतिक र कोटहीमाई गाउँपालिकाको अन्तिम मत परिणाम आउन बाँकी छ। कपिलबस्तुबाट महाराजगन्ज नगरपालिका र दाङबाट तुलसीपुर उपमहानगरपालिकामा अन्तिम परिणाम आउन बाँकी छ। सुदूर पश्चिम प्रदेशबाट बाजुराको बुढी गंगा, अछामको साफेबगर नगरपालिकामा अन्तिम परिणाम आइसकेको छैन ।

काठमाडौं । स्थानीय तह निर्वाचनमा शुक्रबार बिहानसम्म ६ सय १९ वटा पालिकाको अन्तिम मत परिणाम सार्वजनिक भएको छ । निर्वाचन आयोगका अनुसार २ सय नगरपालिका र ४ सय १९ गाउँपालिका गरी ६ सय १९ वटा पालिकाको अन्तिम नतिजा सार्वजनिक भएको हो ।

अहिलेसम्म नेपाली कांग्रेस २ सय ७५ पालिका जितेर पहिलो स्थानमा छ । कांग्रेसले ९९ वटा नगरपालिकाको मेयर र १ सय ७६ वटा गाउँपालिकाको अध्यक्ष जितेको छ । कांग्रेसले ७४ वटा नगरपालिकाको उपमेयर र १ सय ७७ वटा गाउँपालिकाको उपाध्यक्ष जितेको छ । कांग्रेसले अहिलेसम्म २ सय ५१ पालिकामा उपमेयर तथा उपाध्यक्ष जितेको हो । नेपाली कांग्रेस २ हजार ३ सय ५० वटा वडाअध्यक्ष पदमा विजयी भएको छ ।

एमाले दोस्रो स्थानमा छ । एमालेले अहिलेसम्म ५७ वटा नगरपालिकाको मेयर र १ सय १३ वटा गाउँपालिकाको अध्यक्ष गरी १ सय ७० वटा पालिकाको प्रमुख पद जितेको छ । एमालेले ७५ वटा नगरपालिकाको उपमेयर, १ सय १६ वटा गाउँपालिकाको उपाध्यक्ष जितेको छ । एमालेले अहिलेसम्म १ सय ९१ वटामा उपमेयर तथा उपाध्यक्ष जितेको छ । एमाले १ हजार ८ सय ८१ वटा वडाअध्यक्ष पदमा निर्वाचित भएको छ ।

नेकपा माओवादी केन्द्रले २० नगरपालिकाको मेयर र ९२ गाउँपालिकाको अध्यक्ष गरी १ सय १२ वटा पालिकाको प्रमुख पद जितेको छ । माओवादी केन्द्रले २८ वटा नगरपालिकाको उपमेयर, ८९ वटा गाउँपालिकाको उपाध्यक्ष गरी १ सय १७ वटा उपमेयर तथा उपाध्यक्ष जितेको छ । माओवादी केन्द्रबाट ९ सय ८२ वटा वडाअध्यक्ष पदमा निर्वाचित भएका छन् ।

नेकपा एकीकृत समाजवादीले ६ वटा नगरपालिकाको मेयर र ८ वटा गाउँपालिकाको अध्यक्षमा गरी जम्मा १४ वटा प्रमुखमा जितेको छ । समाजवादीले ८ वटामा उपमेयर जितेको छ । जनता समाजवादी पार्टी (जसपा) ले अहिलेसम्म १५ वटा पालिकामा अध्यक्ष जितेको छ ।

जसपाले १३ वटामा उपाध्यक्ष र २ सय २८ वटामा वडाअध्यक्ष जितेको छ । स्वतन्त्र र अन्य दलले गरी ३३ वटा पालिकामा मेयर तथा अध्यक्ष जितेका छन् । स्वतन्त्र र अन्य दलहरुले ३९ वटा पालिकामा उपमेयर तथा उपाध्यक्ष जितेका निर्वाचन आयोगले जनाएको छ।

भरतपुर । भरतपुर महानगरपालिकाको मेयरमा माओवादी केन्द्रकी रेनु दाहालले २० हजार मत कटाउँदा अग्रता ३ हजार भन्दा माथि पुगेको छ । पछिल्लो मतपरिणाम अनुसार कुल ५४०४२ मत गणना भएको छ । जसमा रेनुले २०४९२ मत पाएकी छन् । नेकपा एमालेका विजय सुवेदीले १७१८२ मत ल्याएका छन्।

स्वतन्त्र उम्मेदवार जगन्नाथ पौडेलले ७८८२ मत प्राप्त गरेका छन्। स्वतन्त्र उम्मेदवार पौडेलले एमालेको मत काट्दा रेनुलाई फाइदा पुगेको विश्लेषण गरिएको छ । उपमेयरमा कांग्रेसका चित्रसेन अधिकारीले २२९५२ मत पाएका छन्। राप्रपाकी हिमला गुरुङले १३६४६ मत पाएकी छन्।

काठमाडौं । काठमाडौं महानगरपालिकामा स्वतन्त्र उम्मेदवार बालेनको मत १० हजार कटेको छ । मंगलबार बिहान ८ : ३० सम्मको अपडेट अनुसार बालेनले १० हजार २४१ मत ल्याएका छन् । उनको निकटतम प्रतिद्धन्द्धी एमालेका केशव स्थापित हुन् । उनले बालेन भन्दा आधा कम अर्थातः ५ हजार ४५३ मतसहित पच्छ्याइरहेका छन् ।

कांग्रेसकी सिर्जना सिंह तेस्रो स्थानमा छिन् । उनलाई ४ हजार ७४२ मत आएको छ । उता उपमेयरमा युवा उम्मेदवार एमालेकी सुनिता डंगोलले विपक्षी भन्दा तेब्बर मत पाइसकेकी छिन् । उनले ९ हजार ४१९ मत ल्याउँदा समाजवादीका रामेश्वर श्रेष्ठले २५७५ मत पाएका छन् ।

काठमाडौं । काठमाडौं महानगरपालिकामा स्वतन्त्र उम्मेदवार बालेन्द्र साहले सानदार अग्रता लिइरहेका छन् । उनले ठूला पार्टी एमाले र कांग्रेसको प्रक्षेपण विपरित भोट ल्याएसँगै ठूला पार्टीका नेताहरु समेत हरेस खान थालेका छन् । आइतबार १, २, ३, ४ र ३२ को मतगणना हुँदा अग्रता लिएका उनले सोमबार थप वडाहरुको गणना हुँदा पनि अग्रता फराकिलो पारे । महानगरको वडा नम्बर १ र २ को मतगणना सकिएको छ ।

वडा नं १ मा बालेनले ७८३ मत ल्याए । जहाँ नेकपा एमालेका उम्मेदवार केशव स्थापितले ३६५ र नेपाली कांग्रेसकी उम्मेदवार सिर्जना सिंहले ४५१ मत पाए । वडा नं २ मा बालेनले एक हजार २२०, स्थापितले ७२८ र सिंहले ४९७ मत पाए । यी दुबै वडाको अध्यक्षमा एमालेका उम्मेदवार विजयी भए ।

वडा नम्बर १ का अध्यक्षमा निर्वाचित भरतलाल श्रेष्ठले ६२२ मत पाए, जुन स्थापितले पाएको भन्दा २५७ मत बढी हो । नेकपा माओवादी केन्द्र, एकीकृत समाजवादी र जनता समाजवादी पार्टीको समेत समर्थन पाएकी कांग्रेस उम्मेदवार सिंहले पनि आफ्नो पार्टीका वडाध्यक्षको उम्मेदवारले भन्दा कम मत पाइरहेकी छिन् । उनलाई जाने भोट समेत बालेनले पाएको पाइएको छ ।

वडा नं १ मा कांग्रेसका वडाध्यक्षको उम्मेदवार किरण श्रेष्ठले ५९८, नेकपा माओवादी केन्द्रका अर्जुन महर्जनले ३८, एकीकृत समाजवादीका पुष्पकाजी श्रेष्ठले ३६ मत पाए । सोमबार मतगणना भइरहेको वडा नं ३, ४, ५, ६, ३१ र ३२ मा नेकपा एमालेले राम्रो मत आउने अनुमान गरेको थियो । एमालेको अनुमान अनुसार वडाध्यक्षका उम्मेदवारले अग्रता लिइरहेका छन्, तर मेयरका उम्मेदवार स्थापितले त्यस अनुसार मत पाउन सकेका छैनन् ।

काठमाडौं । मुलुकको सबैभन्दा ठूलो (जनसंंख्याका आधारमा) काठमाडौं महानगरपालिकामा ५२ प्रतिशत मात्र भोट खसेको छ । धेरै मतदाता भएका स्थानमा अपेक्षाअनुसार मतदान नभएका कारण मुलुकभर त्यसको असर देखिएको छ । देशभर ७५३ पालिकामा शुक्रबार एकसाथ मतदान भएको थियो । आयोगको प्रारम्भिक अनुसार समग्रमा कम्तीमा ६४ प्रतिशत मत खसेको छ । धेरै मतदाता भएका स्थानमा अपेक्षाअनुसार कम मत खसेकाले यस्तो भएको प्रमुख निर्वाचन आयुक्त दिनेश थपलियाले बताए ।

धेरै मतदाता भएका ठाउँमा विकसित कम मतदान हुनेवित्तिकै थोरै मतदाता भएको धेरै मतदान भएपनि वेटेजमा कम अंक पाउने हुँदा घट्न जाने उनले बताए । उनका अनुसार काठमाडौं महानगरपालिकाको शान्तिपूर्ण अवस्था, मतदान केन्द्रमा प्रष्ट पहुँच र सबै सुविधा हुँदाहुँदै पनि प्रारम्भिक अनुमान अनुसार करिव ५२ प्रतिशत हाराहारीमा मतदान भएको मतदातमा उत्साह भने नदेखिएको हो ।

काठमाडौं । स्थानीय तह निर्वाचनका लागि देशभर एकै पटक मतदान शुरु भएको छ । हरेक ५÷५ वर्षमा स्थानीय तहको सरकार संचालनका लागि आफ्नो जनप्रतिनिधि चुन्न जनताले आज मतदान गर्नेछन् । प्रमुख निर्वाचन आयुक्त दिनेश थपलिया मतदानका लागि बिहान ६ः५५ मा मध्यपुर ठिमीको वडा नं १ लोकन्थली उपस्वास्थ्य चौकीमा बनाइएको मतदान केन्द्रमा पुगेका छन् ।

निर्वाचन आयोगका अनुसार आयुक्तहरुसमेत आफ्नो मतदाता नामावली रहेको क्षेत्रमा पुगेर मतदान गर्दैछन् । मतदान साँझ ५ बजेसम्म चल्ने छ । देशभर सुरक्षा प्रवन्ध चुस्त बनाइएका कारण निर्धक्क भएर मतदान गर्न आयोगले आह्वान गरेको छ ।

काठमाडौं । स्थानीय तहको ऐतिहासिक दोस्रो निर्वाचन आज देशभर एकै चरणमा हुँदैछ । निर्वाचन आयोगका अनुसार बिहान ७ बजे शुरु भएको निर्वाचनमा मतदान गर्ने काम साँझ ७ बजे सम्पन्न हुने छ । त्यसपछि मतपत्र संकलनको काम शुरु गरिने छ । कतिपय स्थानमा शुक्रबार साँझबाटै मतगणना शुरु हुने भएको छ । निर्वाचनलाई स्वच्छ, स्वतन्त्र, निष्पक्ष र भयमुक्त वातावरणमा सम्पन्न गराउन आयोगले आवश्यक तयारी गरेको र निर्धक्कसँग निर्वाचनमा भाग लिन आह्वान गरेको छ ।

निर्वाचनमा विभिन्न राजनीतिक दलका ३५५ जना विभिन्न पदाधिकारी निर्विरोध निर्वाचित भइसकेका छन् । वडाध्यक्षसहित ३५ जना स्वतन्त्र सदस्य निर्विरोध निर्वाचित भएका छन्। निर्वाचनमा १० हजार ७५६ मतदानस्थलका २१ हजार ९५५ मतदान केन्द्रबाट एक करोड ७७ लाख ३३ हजार ७२३ मतदाताले जम्मा ३५ हजार २२१ जनामध्ये निर्विरोध निर्वाचित भएकाबाहेकका पदमा प्रतिनिधि छनोट गर्ने भएका छन् ।

मतदान केन्द्रमा आवश्यक हुने निर्वाचन सामग्रीसहित एक लाख नौ हजार ८८ जना कर्मचारी र ६५ हजार ८६५ जना स्वयंसेवक खटिएका छन् । स्थानीय तह निर्वाचनमा भाग लिने भनी दर्ता भएका ७९ वटा राजनीतिक दलमध्ये जम्मा ६५ वटा राजनीतिक दल चुनावी प्रतिस्पर्धामा छन्। पचपन्न हजार ६९८ जना महिला र ८९ हजार ३१३ जना पुरुष गरी विभिन्न राजनीतिक दल र स्वतन्त्र उम्मेदवारसमेत जम्मा एक लाख ४५ हजार ११ जना चुनावी प्रतिस्पर्धामा छन्।

धनगढी । प्रधानमन्त्री शेरबहादुर देउवाले बालिग मताधिकार संवैधानिक अधिकार भएको भन्दै निर्धक्कसँग निर्वाचनमा सहभागी हुने आम मतदातासँग आह्वान गरेका छन् । शुक्रबार हुन गइरहेको स्थानीय तह निर्वाचनमा निर्धक्कसँग मतदान गरी आफ्नो मताधिकारको प्रयोग गर्न उनले देशबासीमा अपील गरेका हुन् । प्रधानमन्त्री देउवा मतदानका लागि डडेलधुरामा जानेछन् । उनले बिहीबार धनगढीमा सञ्चारकर्मीहरुसँग बोल्दै यस्तो आह्वान गरेका हुन् ।

निर्वाचन लोकतन्त्रको आधारस्तम्भ भएको भन्दै उनले निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न सरकारले सम्पूर्ण व्यवस्थापनलाई चुस्त दुरुस्त बनाएको समेत बताए । स्थानीय तहदेखि नै लोकतान्त्रिक अभ्यासमा सहभागी भई लोकतान्त्रिक शासन पद्धतीको संस्थागत विकासमा योगदान पुर्याउन प्रधानमन्त्री देउवाले सबैमा आह्वान गरेका छन् ।

काठमाडौं । राष्ट्रपति विद्यादेवी भण्डारीले निर्वाचन लोकतन्त्रको सबैभन्दा ठूलो उत्सव भएको बताएकी छिन् । स्थानीय तह निर्वाचनको पूर्वसन्ध्यामा भिडियो सन्देश जारी गर्दै राष्ट्रपतिबाट यस्तो आह्वान गरिएको हो । उनले निर्धक्क भएर मताधिकारको प्रयोग गर्न सबै मतदातामा आह्वान समेत गरेकी छिन् । शुक्रवार हुन गइरहेको पालिका चुनावका सम्बन्धमा राष्ट्रपतिले स्वतन्त्र, निष्पक्ष र भयरहित वातावरणको निर्माण गर्नु सबैको दायित्व भएको उल्लेख गरेकी छिन् ।

काठमाडौं । मतदान परिचय पत्र लिन बाँकी मतदाताले मतदान स्थलमा पुगेर आज र भोली मतदान परिचय पत्र लिन सक्ने भएका छन् । निर्वाचन आयोगले सबै मतदान स्थलबाट मतदाता परिचय पत्र वितरण गर्ने जनाएको छ । आज र भोलि मतदाता परिचय पत्र वितरण गरिने आयोगको भनाई छ । मतदान केन्द्रका लागि खटिएका मतदान टोलीहरूबाट मतदाता परिचय पत्र वितरणका काम हुनेछन्।

पहिलो पटक मतदाता नामावलीमा नाम दर्ता गराएका नयाँ मतदाता र परिचय पत्र हराएको भन्दै सम्बन्धित जिल्ला निर्वाचन कार्यालयमा निवेदन दिएका मतदातालाई वैशाख २८ र २९ मा मतदान स्थलहरूबाट मतदाता परिचय पत्र दिन लागिएको छ । यस अवधिमा आयोगले मतदाता शिक्षा कार्यक्रम चलाउँदैछ । जहाँ नमुना मतदान हुनेछन् ।

काठमाडौं । स्थानीय तह निर्वाचन २०७९ लाई लक्षित गरि मौन अवधि लागु भएको छ । मौन अवधि मतदान नसकिएसम्म जारी रहने छ । यस पटक ३० वैशाखमा निर्वाचन हुँदैछ । मौन अवधिमा उम्मेदवार र उनीहरुको पक्षमा प्रचारप्रचार र अरु क्रियाकलाप गर्न पाइँदैन । निर्वाचन आयोगले जारी गरेको आचारसंहिता अनुसार मौन अवधिमा राजनीतिक दलहरुले प्रचारप्रसारका काम गर्न पाउँदैनन् । दलहरुलाई छलफल, अन्तरक्रिया, सभा, सम्मेलन, कार्यशाला गोष्ठी लगायत कुनै पनि क्रियाकलाप गर्न रोक लगाइएको हुन्छ ।

तर, यस अवधिमा मतदाता परिचयपत्र लिन जान पाउने छन् । मतदाता शिक्षाको कार्यक्रम समेत यस अवधिमा हुने छ । कसरी मतदान गर्ने, स्वस्तिक कसरी लगाउने र मतपत्र कसरी पट्याउने भनेर यस अवधिमा सिकाइन्छ । मतदानको समयमा प्रतिस्पर्धीहरुबीच विवाद वा झडप नहोस् र कुनै अप्रिय घटनाले मतदाता आतंकित नहोउन् भनेर मौन अवधि सुरु गर्ने अन्तर्राष्ट्रिय प्रचलन छ । शान्त वातावरणमा निर्वाचन गर्न, अनि उम्मेदवारबीच स्वच्छ प्रतिस्पर्धात्मक वातावरण बनाउन मौन अवधिको व्यवस्था गर्ने प्रचलन छ ।

मौन अवधि सुरु भएपछि निर्वाचन अधिकृतको कार्यालयले सम्बन्धित दल वा उम्मेदवारहरुलाई मतदान केन्द्रको ३ सय मिटर वरपर राखिएका प्रचारप्रसार सामग्री हटाउन लगाउँछ । निर्वाचन आचारसंहितामा भनिएको छ, ‘दल वा उम्मेदवारका प्रचारप्रसारका सामग्री हटाउनुपर्ने, कुनै पनि विधि, प्रकृया वा माध्यमबाट मत माग्न वा निर्वाचन प्रचारप्रसार गर्न नहुने ।’

निर्वाचन आयोगले सामाजिक सञ्जाल, सञ्चारमाध्यम लगायत अन्य उपायबाट राजनीतिक दल, उम्मेदवारको पक्ष–विपक्षमा सन्देश, सूचना र प्रचारप्रसार सामग्री राख्न र सेयर गर्न समेत रोक लगाएको छ । आचारसंहिता पालना र मौन अवधिमा पालनाको अनुगमन गर्न आयोगले १९ जिल्लामा सहसचिवको नेतृत्वमा टोली पठाएको छ ।

काठमाडौं । सत्तारुढ दलहरुले ३० वैशाखमा हुने स्थानीय तह निर्वाचनको मौन अवधि सुरु हुनै लाग्दा अपिल सार्वजनिक गरेका छन् । उनीहरुले गठबन्धनका उम्मेदवारको पक्षमा मत मागेका छन् । मंगलबार राति १२ बजेदेखि मौन अवधि सुरु हुनेछ । मंगलबार साँझ जारी गरिएको अपिलमा सत्तारुढ गठबन्धनका दल जनताको सुख, दुःखमा एकसाथ रहने प्रतिवद्धता जाहेर गरिएको छ ।

‘स्थानीय निर्वाचनले लोकतन्त्रको रक्षा गर्ने छ,’ अपिलमा भनिएको छ, ‘अर्को अर्थमा स्थानीय तह नै लोकतन्त्रको प्राणवायु हो । गठबन्धनको बलमा मुलुकको विकास, समृद्धि र लोकतन्त्रको जगेर्ना सम्भव छ । यसर्थ गठबन्धनको पक्षमा मतदानका लागि यहाँहरुले विवेकको प्रयोग गर्नुहुने विश्वास लिएका छौं । यस क्षणमा हामी सदैव जनताको सुख, दुःखमा एकसाथ रहने प्रतिबद्धता जाहेर गर्दछौं ।’

गठबन्धन दलका अध्यक्षहरुले जारी गरेको अपिलमा कतिपय पालिकामा ‘मैत्रीपूर्ण प्रतिस्पर्धा’ गर्ने सहमति भन्दै गठबन्धनकै जित्ने उम्मेदवारलाई मतदान गर्न आग्रह गरिएको छ ।

‘गठबन्धनमा रहेका दलहरुबीच तालमेलको अधिक प्रयत्नका बावजुद कतिपय पालिकामा ‘मैत्रीपूर्ण प्रतिस्पर्धा’ गर्ने सहमति भएको विदितै छ,’ भनिएको छ, ‘मतदानको सन्निकट आइपुग्दै गर्दा ‘मैत्रीपूर्ण प्रतिस्पर्धा’ मा उत्रेका विभिन्न पालिकाका विभिन्न पदका आफ्ना पार्टीका उम्मेदवारको अवस्था आकंलन गरी विजयको नजिक रहेका गठबन्धन दलका उम्मेदवारलाई मतदान गर्न पार्टी तहमा आह्वान गर्दछौं ।’

काठमाडौं । स्थानीय तह निर्वाचनका लागि आज राती १२ बजेबाट मौन अवधि शुरु हुने भएको छ । १२ बजेदेखि मतदानको दिन वैशाख ३० गते १२ बजेसम्म मौन अवधि मानिनेछ । यस अवधिमा निर्वाचनलाई प्रभावित पार्ने कुनै पनि कार्यमा संलग्न नहुन नपाइने निर्वाचन आयोगको भनाई छ । मौन अवधि सुरु भएपछि कुनै पनि दल, उम्मेदवार भएका व्यक्ति, नागरिक समाज, मतदाता तथा सञ्चार माध्यमहरुले समेत चुनाव प्रचार–प्रसार गर्न पाउँदैनन् । निर्वाचन आयोगले एसएमएस, फेसबुक, भाइबरजस्ता विद्युत्तीय माध्यम प्रयोग गरेर मत माग्न र निर्वाचन प्रचार गर्न समेत रोक लगाएको छ ।

सामाजिक सन्जालहरुबाट गरिएका प्रचार सामग्री हटाउन पनि राजनीतिक दलहरुलाई निर्देशन दिइएको छ । निर्वाचन सामग्री हटाए, नहटाएको तथा नयाँ प्रचार सामग्री राखे, नराखेको सम्बन्धमा निगरानी गर्ने जिम्मेवारी प्रहरी र सेनाको साइबर व्यूरोलाई दिइएको छ । आयोगले उम्मेदवार वा राजनीतिक दलको निर्वाचन चिह्न अंकित पहिरन टोपी, स्टिकर, लोगो, झोलाजस्ता सांकेतिक सामग्रीको प्रयोग गर्न वा प्रदर्शन गर्न पनि रोक लगाएको छ ।

निर्वाचन आयोगका अनुसार मौन अवधि सुरु हुनुभन्दा अगाडि मतदान केन्द्रको ३ सय मिटर वरपर राखिएका आ–आफ्ना निर्वाचन चिह्न तथा प्रचारप्रसारका सामग्री हटाउनु पर्नेछ । मौन अवधिमा सञ्चारमाध्यमहरुले पनि उम्मेदवार वा राजनीतिक दलको प्रचारप्रसार हुने गरी कुनै समाचार वा सूचना प्रकाशन प्रसारण गर्न नपाउने आयोगले जनाएको छ ।

भरतपुर । नेकपा एमालेले आइतबारचितवनको भरतपुर र रुपन्देहीको बुटवलमा चुनावी सभा गर्ने भएको छ । दुबै सभामा पार्टी अध्यक्ष केपी शर्मा ओलीलगायतका नेताहरुले सम्बोधन गर्नेछन् । चितवनमा क्याम्पाचौरमा दिउँसो १२ बजे सभा आयोजना गरिएको छ । सो सभालाई ओलीसहित एमाले उपाध्यक्ष सुरेन्द्र पाण्डे, रामबहादुर थापा ‘बादल’, राप्रपा उपाध्यक्ष विक्रम पाण्डेलगायतका नेताहरुले सम्बोधन गर्ने कार्यक्रम छ । भरतपुर महानगरपालिकामा एमाले र राप्रपाले तालमेल गरेका छन् । भरतपुरको मेयरमा एमालेका विजय सुवेदी र उपमेयरमा राप्रपाकी हिमला गुरुङको उमेदवारी छ ।

यसअघि पाँच दलीय गठबन्धनले वैशाख २२ गते भरतपुरमा चुनावी सभा आयोजना गरेको थियो । गठबन्धनले भरतपुरको मेयरमा माओवादी केन्द्रकी रेनु दाहाललाई र उपमेयरमा कांग्रेसका चित्रसेन अधिकारीलाई उम्मेदवार बनाएको छ । भरतपुरमा ओलीले कांग्रेस सभापति शेर बहादुर देउवा र माओवादी केन्द्रका अध्यक्ष प्रचण्डलाई जवाफ दिनेछन् । बुटवलमा हुने चुनावी सभालाई अध्यक्ष ओलीसँगै उपाध्यक्ष विष्णु पौडेल, सचिव छविलाल विश्वकर्मा लगायतका नेताहरुले सम्बोधन गर्नेछन् । बुटवलमा एमालेले बाबुराम भट्टराईलाई र सत्ता गठबन्धनले कांग्रेसका खेलराज पाण्डेलाई मेयर पदको उम्मेदवार बनाएका छन्

काठमाडौं । ३० वैशाखमा तोकिएको स्थानीय तह निर्वाचनमा मतदान अधिकृतले सिसाकलमले मतपत्रमा हस्ताक्षर गर्न नपाउने भएका छन् । मतपत्रमा मतदान अधिकृतले हस्ताक्षर गर्दा सिसाकलमबाहेक कालो, रातो, नीलो वा हरियोमध्ये कुनै पनि मसी भएको कलम वा डटपेन प्रयोग गर्न पाउने निर्वाचन आयोगले जनाएको छ। साकलमले हस्ताक्षर गर्दा छिट्टै मेटिन सक्ने खतरा रहेकाले सिसाकलमको प्रयोग नगर्न भनिएको हो ।

आयोगले सिसाकलमबाहेक कालो, रातो, नीलो वा हरियोमध्ये कुनै मसी भएको कलम–डटपेनले हस्ताक्षर गर्ने व्यवस्था मिलाउन सबै मुख्य निर्वाचन अधिकृत तथा निर्वाचन अधिकृतलाई निर्देशन पनि दिएको छ । सरकारले चुनावमा हरेक मतदान केन्द्रमा एक स्वास्थ्यकर्मी खटाउने समेत जनाएको छ । मतदानस्थलमा हुने भिडभाडका कारण कोभिड सङ्क्रमण बढ्ने जोखिम रहेकाले स्वास्थ्य मापदण्ड पालना गराउन स्वास्थ्यकर्मी परिचालन गर्न लागिएको हो ।

काठमाडौं । स्थानीय तहको निर्वाचनमा उम्मेदवारले आफ्नो बाहेक अन्य दलको झण्डा र चुनाव चिन्ह प्रयोग गरि प्रचार प्रसार गरेमा कारवाही हुने र्भएको छ । निर्वाचन आयोगले स्थानीय तह निर्वाचन प्रचारप्रसारको क्रममा आफ्नो बाहेक अन्य दलको झन्डा र चुनाव चिह्न प्रयोग गरेको पाइए कानुनी कारबाही हुने चेतावनी दिएको हो । स्थानीय तहका उम्मेदवारहरूले आफूसँग सम्बन्ध नभएको राजनीतिक दलको झन्डा र चुनाव चिह्न प्रचारका क्रममा प्रयोग गरेको उजुरी परेपछि आयोगका प्रवक्ता शालिग्राम शर्मा पौडेलले विज्ञप्ति जारी गर्दै यस्तो चेतावनी दिएका हुन् ।

निर्वाचन प्रचार प्रसारको क्रममा निर्वाचन आचारसंहितामा उल्लेख भएभन्दा फरक ढंगले झन्डा र चिह्न प्रयोग गरिएमा वा मतदातालाई भ्रम सिर्जना गर्ने गरी आफू उम्मेदवार भएको दलबाहेक अन्य दलको झन्डा तथा चिह्न प्रयोग गरिएमा निर्वाचन आचारसंहिता उल्लंघन गरेको मानी कानुनबमोजिम कारबाही तथा सजाय हुने आयोगले जनाएको छ । निर्वाचन आचारसंहिता विपरीतका कार्य नगर्न, नगराउन समेत आयोगले भनेको छ । अन्य दलको झन्डा र चुनाव चिह्न प्रयोग गर्नु निर्वाचन आचारसंहिता विपरीतको कार्य हुने पनि आयोगले स्मरण गराएको छ ।

काठमाडौं । निर्वाचन आयोगले आचारसंहिता उल्लङ्घन गरेकोमा तीन दलसहित नेताहरू र गण्डकी प्रदेश सभामुखलाई सचेत गराउने निर्णय गरेको छ। आयोगले नेकपा माओवादी केन्द्र, नेकपा एकीकृत समाजवादी र राप्रपालाई सचेत गराउने निर्णय गरेको हो। आचारसंहिता उल्लङ्घनबारे आयोगमा १० उजुरी परेको थियो। ती उजुरीबारे शुक्रबारको आयोग बैठकमा छलफल भएको थियो। आयोगले आचारसंहिता प्रतिकूल हुने काम नगर्न ती दलहरूलाई सचेत गराउने निर्णय गरेको छ।

एकीकृत समाजवादीले भृकुटीमण्डपमा गरेको सभामा बालबालिका प्रयोग गरेको, माओवादी केन्द्रले चुनावी प्रचारमा कुलमान घिसिङको तस्बिर प्रयोग गरेको र राप्रपाले हेटौंडा सभामा आचारसंहिता उलङ्घन गरेको उजुरी परेको थियो। निर्वाचन खर्चबारे अभिव्यक्ति दिएका नेपाली कांग्रेसका पूर्वमहामन्त्री शशांक कोइरालालाई पनि आयोगले सचेत गराउने भएको छ।

०७४ मा नवलपुरबाट प्रतिनिधि सभा सांसद भएका कोइरालाले हालै आफूले चुनावमा छ करोड खर्च गरेको अभिव्यक्ति दिएका थिए। कोइरालाले उक्त चुनावमा २१ लाख ७५ हजार खर्च गरेको विवरण आयोगमा पेश गरेको पाइएको थियो।गण्डकी प्रदेश सभामुख नेत्रनाथ अधिकारीलाई पनि आयोगले सचेत गराउने भएको छ। उनले पनि निर्वाचन खर्चबारे अभिव्यक्ति दिएका थिए।