Category: समाचार

काठमाडौं । कुवेतका अमिर शेख मिशल अल-अहमद अल-सबाहले संविधान र संसद दुबै भंग भएको घोषणा गरेका छन् । शुक्रबार टेलिभिजन मार्फत भाषण गर्दै संसद् भंग र संविधान निलम्बनको घोषणा भएको हो । अमिरले लोकतान्त्रिक प्रक्रियाका सबै पक्षहरूको अध्ययन गरी चार वर्षभन्दा बढी अवधिका लागि संविधानका केही धारा निलम्बन गरिएको जनाएका हुन् ।

अब राष्ट्रिय सभाको शक्ति अमिर र मन्त्रिपरिषद्ले ग्रहण गर्ने सरकारी टिभीले जनाएको छ । कुवेत, हालै केही कठिन समयबाट गुज्रिरहेको छ । ‘देश बचाउन र यसको उच्चतम हितहरू सुरक्षित गर्न कठिन निर्णय गर्न हिचकिचाहट वा ढिलाइको लागि कुनै ठाउँ छोडिन्न’, अमिरले भनेका छन् ।

उनले देश बचाउन कठोर निर्णय लिएको बताएका छन् । ‘हामीले असह्य कठिनाइ र अवरोधहरूको सामना गर्‍यौं। केहीले अमिरको शक्तिको मूल भागमा हस्तक्षेप गर्नसम्म पुगेका छन्,’ उनले सम्बोधनमा भनेका छन् ।

अमिरका लागि सुरक्षित रहेको युवराज छनोटमा समेत केहीले हस्तक्षेप गर्न चाहेको बताएका छन् । ‘विगतका वर्षहरूमा देशले अनुभव गरेको अस्वस्थ वातावरणले भ्रष्टाचार फैलाउन प्रोत्साहित गरेको छ । भ्रष्टाचार राज्यका अधिकांश क्षेत्रमा पुगेको छ, अमिरले भनेका छन् ।

काठमाडौं । भारतको दिल्लीका मुख्यमन्त्री अरविन्द केजरीवाललाई त्यहाँको सर्वोच्च अदालतले अन्तरिम जमानत दिएको छ। उक्त अदालतका दुई जना न्यायाधीशहरू सम्मिलित एक इजलासले उनलाई अन्तरिम जमानत दिने निर्णय गरेको हो। आगामी जुन २ तारिखसम्मका लागि केजरीवालले जमानत पाएका छन्। त्यस दिन उनले पुनः उपस्थित हुनुपर्ने छ। केजरीवाललाई गत मार्च २१ तारिखदेखि हिरासतमा राखिएको छ।

अदालतको निर्णय अनुसार अब उनले जुनसम्म लोकसभा चुनावका लागि प्रचारप्रसार गर्न पाउने छन्। अन्तरिम जमानत दिँदै अदालतले उनको गिरफ्तारीलाई चुनौती दिने खालका सबै मामिलाहरूको सुनुवाइ चाँडै सक्ने पनि जनाएको छ। अदालतको आदेशमा भनिएको छ, हामी चाँडै नै यो सुनुवाइ गरेर यो मामिला टुङ्ग्याउनेछौँ। हालसम्म उक्त आदेशको लिखित विवरण प्राप्त भएको छैन। उक्त विवरण प्राप्त भएपछि मात्र त्यसमा उल्लेख गरिएका सर्तहरूबारे थाहा हुनेछ।

अदालतले जमानतसम्बन्धी आदेश दिइएको पत्र जेल अधिकारीहरूलाई पठाउन भनेको छ। त्यसो गर्दा उनी चाँडै रिहा हुने सम्भावना रहन्छ। सन् २०२२ को अगस्टमा दर्ता गरिएको मामिलामा केजरीवाललाई डेढ वर्षपछि मात्र गिरफ्तार गरिएको अदालतले जनाएको थियो। न्यायाधीश सञ्जीव खन्नाले भने, गिरफ्तार पहिले नै वा (चुनाव) पछि पनि गर्न सकिन्थ्यो। एक्काइस दिनमै केही फरक पर्दैन थियो।

केजरीवालको पक्षमा मुद्दा लडिरहेका शादान फरासतले सञ्चारमाध्यमहरूसँग भने, अदालतले संक्षिप्त आदेश दिएको छ। हामीले अहिलेसम्म लिखित आदेश पाएका छैनौँ। उक्त आदेश वेबसाइटमा राखिन्छ भन्ने हामीलाई लागेको छ। अन्तरिम आदेशमार्फत् अदालतले अरविन्द केजरीवाललाई अन्तरिम राहत दिइरहेको छ भन्ने सङ्केत गरेको छ। उनका अनुसार यो आदेश जुन २ तारिखसम्म कायम रहनेछ। त्यो भनेको भारतमा संसदीय निर्वाचनको समय हो।

त्यस्तै अदालतले उनलाई चुनाव प्रचारप्रसार गर्न कुनै खालको रोक लगाएको छैन। आदेशमा उनले के गर्न पाउने वा नपाउने भन्ने कुनै विषयबारे उल्लेख नगरिएको पनि उनले बताए। अन्य विषयबारे आदेश पूरा हेरेपछि मात्र थप बताउन सकिने केजरीवालका वकिलको भनाइ छ।

BBC

काठमाडौं । भारत सरकारले मालदिभ्सबाट आफ्ना सैनिक फिर्ता गरेको छ । मालदिभ्सको राष्ट्रपतिमा मोहम्मद मुइज्जु निर्वाचित भएपछि उनले भारतीय सैनिकलाई फिर्ता हुन निर्देशन दिएका थिए । भारतीय सैनिकलाई स्वदेश फिर्ता हुन दिइएको अन्तिम समयसीमा सकिनुभन्दा एक दिन अगाडि मालदिभ्सका विदेशमन्त्री मुसा जमिर विहीबार भारत भ्रमणमा आएका छन् ।

यसै सन्दर्भमा भारतीय विदेश मन्त्रालयले विहीबार पत्रकार सम्मेलन गरी मालदिभ्सबाट भारतीय सैनिक फिर्ता भएको जानकारी गराएको हो । भारतको विदेश मन्त्रालयका प्रवक्ता रणधीर जयसवालले पत्रकार सम्मेलनमा दिएको जानकारी अनुसार ती सैनिकहरुको स्थानमा गैरसैनिकको प्राविधिक टोली खटाइसकिएको छ । भारतको सरकारी आँकडा अनुसार मालदिभ्समा ८८ जना सैनिक थिए । मालदिभ्समा तीन विमानस्थलमा भारतीय सैनिकहरु तैनाथ थिए । उनीहरुले हिन्द महासागरमा पनि निगरानी गर्दथे ।

‘इण्डिया आउट’ चुनावी नारा दिएर सत्तामा आएका मुइज्जुले भारतीय सैनिकहरुलाई फिर्ता हुन १० मार्चदेखि १० मेसम्मको समयसीमा दिएका थिए । मालदिभ्सको मिहारु पत्रिकाका अनुसार एड्डु विमानस्थलमा २५ भारतीय सैनिक तैनाथ थिए । उनीहरु १० मार्चभन्दा अघि नै भारत फिर्ता भइसकेका थिए ।
एड्डु विमानस्थलमा भारतका दुई हेलिकप्टर र एउटा हवाईजहाज छन् । तिनको सन्चालन अब गैरसैनिक कर्मचारीहरुले गर्ने छन् ।

काठमाडौं । युक्रेनका राष्ट्रपति भ्लोदोमिर जेलेन्स्कीको हत्या गर्ने षडयन्त्रलाई विफल पारेको युक्रेनी अधिकारीहरुले दावि गरेका छन् । जेलेन्सीको हत्या षडयन्त्रमा संलग्न भएको आरोपमा युक्रेनी सेनाका दुई जना कर्णेललाई पक्राउ गरिएको छ । उनीहरुमाथि राज्यद्रोह आतंकवादसम्बन्धी अभियोग लगाइएको छ । युक्रेनको सेक्युरिटी सर्भिस (एसबीयु)का अनुसार जेलेन्स्कीको हत्या गर्ने उद्देश्यले उनका अङ्गरक्षकहरुसम्म पुग्ने र प्रभावमा पार्ने कोसिसमा रुसको गुप्तचर निकाय (एफएसबी)को सन्जाल सक्रिय थियो । उक्त सन्जालको लागि जासुसी गरेको आरोप ती कर्णेहरुलाई लगाइएको छ ।

रुसले युक्रेनमाथि आक्रमण गरेदेखि नै जेलेन्स्कीको हत्याको षडयन्त्र भइरहेको समाचार सार्वजनिक हुने गरेका थिए । तर बहालवाला कर्णेल नै जेलेन्स्कीको हत्याको षडयन्त्रमा संलग्न भएको भन्ने आरोपसहितको समाचार बीबीसीले लेखेको छ । रुसले युक्रेनका सैनिक जासुसी निकाय प्रमुख किरिलो बुदानोभ र सेक्युरिटी सर्भिसका प्रमुख भासु म्यालुयकको पनि हत्या योजना बनाएको एसबीयुले जनाएको छ । बुदानोभको हत्या योजना इशाई धर्मावलम्बीहरुको पर्व ईस्टरको अघिल्लो दिन बनाइएको थियो ।

त्यसका लागि रुसले एन्टी ट्यांक मिसाइल समेत उपहारस्वरुप पठाएको थियो । उक्त हतियार बरामद गरिएको हत्या योजना विफल पारेको युक्रेनको सेक्युरिटी सर्भिस (एसबीयु)ले जनाएको छ ।