Category: समाचार

काठमाडौं । मङ्गलबार बिहान राजधानी र उत्तर भारतमा बाक्लो कुहिरोका कारण दृश्यता कम भएपछि दिल्ली जाने १९ वटा रेलहरू निर्धारित समयभन्दा पछि हिँडेको रेलवे अधिकारीहरूले जानकारी दिएका छन् । खराब मौसमका कारण जम्मुतवी–दिल्ली एक्सप्रेस, हावडा–दिल्ली डोरोन्थो, हावडा–दिल्ली राजधानी एक्सप्रेस, भुवनेश्वर–दिल्ली राजधानी एक्सप्रेस, डिब्रूगढ–दिल्ली राजधानी एक्सप्रेस र पुरी–दिल्ली एक्सप्रेस ढिला भएका थिए ।

रेवा–आनन्द विहार टर्मिनल, भागलपुर–आनन्दविहार एक्सप्रेस, बनारस–दिल्ली एक्सप्रेस, चेन्नई–दिल्ली एक्सप्रेस, हैदराबाद–दिल्ली एक्सप्रेस र रानीकमलापति–हजरत निजामुद्दीन एक्सप्रेस पनि प्रभावित भएका छन् । नयाँ दिल्ली रेलवे स्टेसनमा रेलहरू निर्धारित समयभन्दा ढिलो चल्दा यात्रुहरू समस्यामा परेका थिए । यसैबिच, मङ्गलबार बिहान राजधानीमा घना कुहिरोका कारण दिल्ली विमानस्थलमा उडान पनि अवरुद्ध भएको छ ।

विमानस्थलले मङ्गलबार सूचना जारी गर्दै मापदण्ड पूरा नगर्ने उडानहरूले अवतरण र टेक–अफको समयमा अवरोधको सामना गर्न सक्ने बताएको छ । यात्रुहरूलाई उडानको स्थितिसम्बन्धी अद्यावधिक जानकारीका लागि एयरलाइन्सलाई सम्पर्क गर्न पनि आग्रह गरिएको छ । सोमबार पनि, कुहिरो तथा अधिक चिसोले राजधानीमा रेल तथा हवाई उडानलाई असर गर्दा रेल र उडानहरू ढिलाइ भएका थिए । भारतीय मौसम विज्ञान विभाग (आइएमडी) ले मङ्गलबार राजधानीका थप्रै भागहरूमा कुहिरो लाग्ने पूर्वानुमान गरेको थियो । राससएएनहाई

काठमाडौं । भारतीय जलसेनाले सोमालियानजिकै समुद्रमा समुद्री डाँकाहरूले अपहरण गरेका १९ पाकिस्तानी नाविकलाई मुक्त गराएका छन्। भारतीय सेनाको पानीजहाज ‘आईएनएस सुमित्रा’ले ३६ घण्टाको अवधिमा दोस्रो पटक कारबाही गर्दै उनीहरूको उद्धार गरेको हो। त्यसअघि समुद्री डाँकाहरूले अपहरण गरेको एउटा इरानी जहाजका १७ जनालाई मुक्त गराइएको भारतीय जलसेनाले जनाएको छ।

विगत केही सातामा विभिन्न पानीजहाज र नाविकहरूले उद्धार र सहयोगका लागि गरेको आग्रहअनुसार आफूले काम गरेको भारतीय जलसेनाले जनाएको छ। केही समययता सोमालियानजिकै समुद्रमा पानीजहाजमा भएका आक्रमणहरूले उक्त क्षेत्रमा लुटेराहरू पुनः सक्रिय हुन थालेका हुन् कि भन्ने चिन्ता बढेको छ।

आईएनएस सुमित्रा सोमालियाको पूर्वी तट र गल्फ अफ एडनमा सामुद्रिक सुरक्षा अभियानअन्तर्गत पारिचालित छ। भारतीय जलसेनाले जारी गरेको विज्ञप्तिअनुसार ज्यानुअरी २८ मा गुहार माग्दै पठाइएको एउटा सन्देश प्राप्त भएपछि आईएनएस सुमित्राले उद्धारको काम थालेको थियो। त्यस क्रममा इरानी झण्डा भएको एउटा जहाजलाई रोकिएको उसले जनाएको छ।

सामाजिक सञ्जालमा जलसेनाले जनाएअनुसार त्यसपछि जलसेनाका अधिकारीहरूले “समुद्री डाँकाहरूलाई जहाज र त्यसका कर्मचारीलाई मुक्त गर्न बाध्य पारेका थिए। जहाजका १७ कर्मचारी मुक्त भएपछि जहाजको सरसफाइ गरियो र त्यो आफ्नो यात्रा पुनः निस्कियो।

तर जलसेनाको विज्ञप्तिमा समुद्री डाँकाहरूको अवस्थाबारे केही उल्लेख गरिएको छैन। मङ्गलवार भारतीय जलसेनाले आईएनएस सुमित्राले फेरि अर्को इरानी झण्डावाहक जहाजको अवस्थिति पत्ता लगाएको र त्यसलाई रोकेको जनाएको छ। अल नईम नामक उक्त जहाज माछा मार्ने प्रयोजनमा प्रयोग हुन्छ।

आफ्ना जवानहरू सरसफाइ गर्न र चालकदलका सदस्यको अवस्था बुझ्न उक्त जहाजमा गएको पनि भारतीय जलसेनाले जनाएको छ। उक्त घटनामा पनि लुटेराहरूको अवस्थाबारे केही भनिएको छैन। तर एक्समा प्रेषित एउटा तस्बिरमा हात पछाडि लगेर बाँधिएका मानिसहरूनजिकै जलसेनाका जवान उभिएको देखिन्छ। शनिवार सेशेल्सको सुरक्षा फौजले श्रीलङ्काका छ माझीलाई उद्धार गरेको थियो। उनीहरूको जहाज अपहरणमा परेको थियो।

ब्लूमबर्गमा प्रकाशित एउटा विवरणका अनुसार रेड सीमा इरानबाट समर्थनप्राप्त हूथी लडाकु समूहले शृङ्खलाबद्ध आक्रमण गर्दा सामुद्रिक सुरक्षामा खलल पुगेको र परिणामस्वरूप सोमालियानजिकै समुद्रमा डकैतीको सङ्ख्या बढेको हो। ज्यानुअरी २६ मा भारतीय जलसेनाले मर्लिन लुआन्डा नामक ट्याङ्करबाट सहयोगको याचना गरिएपछि आफ्नो पानीजहाज आईएनएस विशाखापटनम गल्फ अफ एडनमा पठाइएको जनाएको थियो। हूथी विद्रोहीहरूले एउटा क्षेप्यास्त्र प्रहार गरेपछि यूकेसँग सम्बन्ध भएको उक्त ट्याङ्करमा घण्टौँ आगो लागेको थियो।

फ्रान्स र संयुक्त राज्य अमेरिकाका जलसेनाका जहाजले पनि त्यस क्रममा सहयोग गरेका थिए। ज्यानुअरी महिनाको सुरुतिर भारतीय जलसेनाका कमान्डोहरूले समुद्री लुटेराहरूले आक्रमण गरेको लाइबेरियाली झण्डावाहक एउटा जहाजबाट २१ जनालाई उद्धार गरेका थिए।
बीबीसी

काठमाडौं । पाकिस्तानको विशेष अदालतले पूर्वप्रधानमन्त्री इमरान खान र पूर्वविदेशमन्त्री शाह महमूद कुरैशीलाई साइफर केस अर्थात् राज्यको गोप्य सूचना चुहाएको आरोपमा १० वर्षको कैद सजाय सुनाएको छ । अदालतको यो फैसलाले इमरान खानलाई ठूलो झट्का लागेको छ । उनी आमचुनावमा प्रतिस्पर्धा गर्ने तयारीमा थिए । पाकिस्तानमा आउँदो फेब्रुअरी ८ मा आमचुनाव हुँदैछ ।

इमरान खानको पार्टी पाकिस्तान तेहरिक–ई–इन्साफ (पीटीआई) ले विशेष अदालतलको फैसलालाई लिएर उच्च अदालतमा अपिल गर्ने बताएको छ । इमरान खानले आफूविरुद्ध लगाइएको आरोप आफ्नो सरकारलाई ढाल्ने अमेरिकी षड्यन्त्र भएको दाबी गरेका छन् । विश्वासको मत पाउन नसकेपछि उनी सन् २०२२ मा पदबाट हट्नुपरेको थियो ।

काठमाडौं । मालदिभ्सको मुख्य विपक्षी दल मालदिभियन डेमोक्रेटिक पार्टी (एमडीपी)ले राष्ट्रपति मोहम्मद मुइज्जुविरुद्ध महाअभियोग प्रस्ताव ल्याउने तयारी गरिरहेको अन्तर्राष्ट्रिय सञ्चारमाध्यमले जनाएका छन् । स्थानीय मिडिया सन इन्टरनेशनलका अनुसार एमडीपीले महाअभियोग प्रस्तावमा पर्याप्त संख्यामा सांसदहरुको समर्थन पाएको छ । एमडीपीका एक सांसदले सन इन्टरनेशनललाई महाअभियोगको तयारीबारे जानकारी दिएका छन् । यद्यपि महाअभियोग प्रस्ताव दर्ता भने भइसकेको छैन । हालै मालदिभ्सको संसदमा महाअभियोग प्रस्ताव दर्ता गराउने नियमहरुलाई सहज बनाइएको बीबीसीले जनाएको छ ।

महाअभियोग प्रस्तावको पक्षमा एमडीपीसँगै डेमोक्रेट्स सांसदहरु पनि छन् । एमडीपीका ४३ र डेमोक्रेट्सका १३ गरी कूल ५६ सांसद छन् । संविधान अनुसार राष्ट्रपतिमाथि महाअभियोग प्रस्ताव पास गर्नका लागि ५६ भोट नै चाहिन्छ । संसदका सभामुख र उपसभामुख एमडीपीका हुन् । मुइज्जु नेतृत्वको सरकारमा चार सदस्य थप्ने विषयमा विवाद हुँदा मालदिभ्सको संसदमा सत्ता पक्ष र विपक्षी दलका सांसदहरुबीच कुटाकुट भएको थियो । लगत्तै राष्ट्रपति मुइज्जुविरुद्ध महाअभियोग लगाउने चर्चा सुरु भएको छ ।

मालदिभ्समा प्रोग्रेसिभ पार्टी अफ मालदिभ्स र पिपल्स नेशनल कांग्रेस (पीपीएम० र पीएनसीको गठबन्धन सरकार छ । ‘इण्डिया आउट’ नारा दिँदै चुनाव जितेका मोहम्मद मुइज्जु राष्ट्रपति छन् । अर्कोतर्फ मालदिभ्सको विपक्षी दल भारतसँग निकट छ । वर्तमान सरकारले भारतसँग सम्बन्ध बिगारेको भन्दै विपक्षी दलले सरकारको कडा आलोचना गर्दै आएको छ ।