Category: समाचार

काठमाडौं । भारतको महाराष्ट्रस्थित मुम्बई–नागपुर द्रुतमार्गमा गुड्दै गरेको एक निजी बस शनिवार बिहान दुर्घटना हुँदा २५ जनाको मृत्यु भएको प्रहरीले जनाएको छ। नागपुरबाट समृद्धि राजमार्ग हुँदै पुणेतर्फ आइरहेको ३३ जना सवार बसको टायर फुटेर चालकको नियन्त्रण बाहिर गएको बताइएको छ। अनियन्त्रित बस एउटा खम्बामा ठोकिएको थियो।

ठक्करका कारण बसको डिजेल ट्याङ्की विस्फोट भएपछि बसमा आगो लागेको थियो। आगलागीका कारण अधिकांशको जलेर मृत्यु भएको छ। दुर्घटनामा बाँचेका केही यात्रु सिसा फोरेर बाहिर निस्कन सफल भएको प्रहरी अधिकारीले बताएका छन्। घाइते यात्रुहरूलाई उपचारका लागि स्थानीय बुलढाना अस्पताल लगिएको छ। मृतकहरुको अझै सनाखत हुन सकेको छैन। विज्ञहरूले दुर्घटनाको अनुसन्धान गरिरहेका छन्।

दुर्घटनाको जानकारी प्राप्त हुनासाथ प्रहरी कार्यालयका अधिकारी घटनास्थलमा पुगेका थिए। दमकलले गाडीले आगो निभाउँदासम्म जलन र चोटका कारण केहीको घटनास्थलमै मृत्यु भएको विवरण आएका छन्। दुर्घटनामा बाँचेका यात्रुहरूबाट प्रहरीले घटनाबारे जानकारी लिएको थियो। “म ओर्लने ठाउँ आउन एक घण्टा जति बाँकी थियो। ओर्लने तयारी गर्दागर्दै बस पल्टियो अनि मेरो साथी र म लड्यौँ,’ उनले भने।

हामी अगाडिको यात्रु सिसा फुटाएर निस्कँदै गरेको देख्यौँ र हामी पनि उनको पछि लाग्यौँ। हामी बसबाट हाम फाल्न सफल भयौँ। उनका अनुसार पल्टिने बित्तिकै बसमा आगो लागेको थियो र आगो बिस्तारै बढ्दै गयो। “हामीले यात्रुहरूको चिच्याहट सुन्यौँ, तर हामीले केही गर्न सकेनौँ।” बुलढाना बस दुर्घटनाबारे बसका मालिक वीरेन्द्र दर्नाले टायर फुटेका कारण बस डिभाइडरमा ठोक्किएर आगो लागेको बताएका छन्।

समाचार एजेन्सी एएनआईसँगको कुराकानीमा उनले बस पूर्णतया नयाँ भएको र यसका कागजपत्रहरू पनि व्यवस्थित रहेको दाबी गरे। उनका अनुसार बस चालक अनुभवी थिए। टायर फुटेका कारण बस डिभाइडरमा चढेको र त्यसपछि अत्यधिक प्रज्वलनशील पदार्थमा आगो लागेको चालकले बताएका छन्। महाराष्ट्रका ग्रामीण विकास तथा पञ्चायती राज विभागका मन्त्री गिरीश महाजनले दुर्घटनापछि चालक र सहचालकलाई नियन्त्रणमा लिइएको बताएका छन्।

उक्त दुर्घटनापछि चालक र सहचालक त्यहाँबाट भागेका थिए। घटनाप्रति दुःख व्यक्त गर्दै महाराष्ट्रका मुख्यमन्त्री एकनाथ शिन्देले मृतकका परिवारलाई प्रतिव्यक्ति पाँच लाख रुपैयाँ क्षतिपूर्ति दिनुका साथै दुर्घटनाको छानबिन गर्ने पनि घोषणा गरेका छन्। भारतीय प्रधानमन्त्री नरेन्द्र मोदीले पनि घटनाबारे दुख व्यक्ति गर्दै मृतकका परिवारलाई प्रधानमन्त्री राहत कोषबाट दुई लाख सहयोगको घोषणा गरेका छन्।

काठमाडौं । पेरिस नजिकै भएको ट्राफिक जाँचको क्रममा मङ्गलवार एक किशोरको गोली लागि मृत्यु भएपछि अहिले फ्रान्सभरि भीषण दङ्गा मच्चिएको छ र प्रदर्शनहरू व्यापक बन्दै गएका छन्। सत्र वर्षीय किशोर नाहेल एममाथि एक जना प्रहरी अधिकारीले गोली प्रहार गरेको भिडिओ सामाजिक सञ्जालमार्फत सार्वजनिक भएपछि घटनाले उग्र रूप लिएको हो।

घटनामा संलग्न अधिकारीले पीडितको परिवारसँग माफी मागेका छन्। यद्यपि उनीविरुद्ध गैरकानुनी हत्याको आरोप लागेको छ र अहिले उनी हिरासतमा छन्। मृतकलाई उनी गाडीबाट निस्किँदै गर्दा ‘पोइन्ट-ब्ल्याङ्क रेन्ज’ अर्थात् निकै नजिकबाट निशाना बनाई गोली हानिएको सार्वजनिक विवरणहरूमा उल्लेख गरिएको छ।

मृतक अल्जेरिअन मूलका हुन् र उनको मृत्युले फ्रान्सेली उपनगरहरूमा प्रहरीले जातीय समुदायलाई लक्षित गरी गर्ने आक्रमणबारेका गुनासोलाई पुनर्जीवित गरेको छ। यसै विषयमा आक्रोशित मानिसहरूका कारण देशभर हिंसा फैलिएको छ। बिहीवार दिउँसो ती युवककी आमाको नेतृत्वमा निस्किएको र्‍यालीमा पनि झडप भएको थियो।

बीबीसीका यूरोप डिजिटल सम्पादक पल किर्बीका अनुसार मृतक आमाले हुर्काएका एक्लो सन्तान हुन्। उनी ‘टेकअवे खाना’ पुर्‍याउने गाडी चलाउँथे र रग्बी लिगका खेलाडी समेत थिए। उनको शैक्षिक पृष्ठभूमि व्यवस्थित थिएन। उनी आफू बस्ने ठाउँबाट नजिकै एक कलेजमा इलेक्ट्रीशियन बन्ने तालिमका लागि भर्ना भएका थिए तर निकै कम उपस्थित हुन्थे।

नाहेललाई चिन्ने मानिसहरूले उनी मायालु स्वभावको भएको बताए। उनी आफ्नी आमा मोनियासँगै बस्थे र आफ्नो बुबासँग सम्पर्कमा थिएनन्। प्रहरीले उनको कुनै आपराधिक घटनामा संलग्नता नदेखिएको जनाएको छ। उनले घटना भएको दिन काममा निस्कनुअघि चुम्बन दिँदै भनेका थिए, आई लभ यू मम , म तिमीलाई माया गर्छु आमा।
दङ्गा नियन्त्रणका लागि शुक्रवार साँझसम्ममा ४५,००० प्रहरी अधिकारीहरूलाई तैनाथ गरिएको थियो। सरकारले क्षेत्रीय अधिकारीहरूलाई रातभर सार्वजनिक सवारी सेवाहरू बन्द गर्न आह्वान गरेको थियो। त्यस्तै अभिभावकहरूलाई आफ्ना छोराछोरीलाई प्रदर्शनहरूबाट जोगाउन भनिएको छ। फ्रान्सका आन्तरिक मामिला मन्त्री डार्मानिनका अनुसार दङ्गाको चौथो रातमा अशान्तिका कारण आर्थिक तथा अन्य गतिविधिमा असर परेको छ।

बिहीवार राति ९१७ जना पक्राउ परेका थिए भने शुक्रवार राति उक्त सङ्ख्या ४७१ मा सीमित छ। तर, थुप्रै फ्रान्सेली सहरहरूबाट थप हिंसाका विवरणहरू आएका छन्। ती स्थानहरूमा सवारी साधनमा आगो लगाइएको भिडिओहरू सार्वजनिक भएका छन्।
विशेषगरी मार्सेलीबाट ८७ जनालाई गिरफ्तार गरिएको छ। यस्ता आन्दोलनहरूबाट १३ वर्षसम्मका किशोरहरूलाई समेत हिरासतमा लिइएको छ। पक्राउ परेकाहरूको औसत उमेर १७ वर्ष रहेको मन्त्री डार्मानिनले बताए। फ्रान्सेली फुटबल स्टार किलियान एम्बाप्पेले भनेका छन्, हिंसाले कुनै पनि समस्या समाधान गर्दैन। उनले यस स्थितिलाई शोक, संवाद र पुनर्स्थापनाूको बाटोबाट सुधार्न आग्रह गरेका छन्।

फ्रान्सेली राष्ट्रपति एमानुएल माक्रोँले प्रदर्शनकारीहरूले घटनाको फाइदा लिइरहेको आरोप लगाएका छन्। उनले हिंसाको निन्दा गर्दै नाहेलको मृत्युपछिको अवस्थालाई हिंसात्मक गतिविधि गर्न प्रदर्शनकारीहरूले प्रयोग गरेको आशङ्का गरेका छन्। उनले हिंसा नियन्त्रणका लागि थप अधिकारीहरू खटाइने बताए पनि देशमा आपत्कालीन अवस्था घोषणा गरिएको छैन।

माक्रोँले दङ्गामा सहभागी किशोरकिशोरीलाई घरमै राख्न सम्बन्धित अभिभावकलाई आग्रह गरेका छन्। उनले भने,”उनीहरूलाई घरमै राख्नु आमाबुबाको जिम्मेवारी हो।” उनले सामाजिक सञ्जाल सेवा प्रदायकहरूलाई केही सामग्रीहरू हटाउन समेत आह्वान गरेका छन्।

उनले संवेदनशील प्रकारका सामग्रीहरू हटाउन र हिंसाजनक प्रदर्शन आयोजना गर्न त्यस्ता सञ्जाल प्रयोग गर्ने व्यक्तिहरूको नाम अधिकारीहरूलाई उपलब्ध गराउन आग्रह गरेका छन्। स्न्यापच्याटका एक जना प्रवक्ताले उक्त एपले हिंसा र घृणालाई बढवा दिने सामग्रीप्रति शून्य सहनशीलताूको नीति अपनाउने र स्थितिलाई नजिकबाट अनुगमन गरिरहने बताएका छन्।

सार्वजनिक सडकमा ३ हजार ८८० भन्दा बढी आगजनीका घटना भएको त्यहाँको आन्तरिक मन्त्रालयको आँकडा छ।विभिन्न ठाउँमा प्रदर्शनकारी र दङ्गा नियन्त्रणमा खटेका प्रहरीबीच झडप भएको छ। कतिपय स्थानमा कर्फ्यु लगाइएको छ।
बीबीसीको सहयोगमा

काठमाडौं । मुग्लिन-नारायणगढ सडकखण्डमा पहिरो खस्ने क्रम जारी छ । त्यसैले आज बिहान पनि पहिरो पन्छाउने काम सुरु हुन सकेको छैन । मुग्लिनबाट करिब दुई किलोमिटर पर नारायणगढतर्फ पर्ने तीन नम्बर पुलनेर खसेको पहिरोका कारण बिहीबार दिउँसो साढे १ बजेबाट सडक पूर्णरुपमा अवरुद्ध छ ।

मुग्लिन प्रहरीका इन्सपेक्टर विशाल तामाङले पहिरो खस्ने क्रम जारी रहेकाले आज बिहान पनि पहिरो पन्छाउन नसकिएको बताए । ‘पानी परेको छैन, तर पहिरो खसिरहेको छ,’ उनले भने, ‘त्यसैले पहिरो हटाउन सकिएको छैन ।’ पहिरो झर्ने क्रम जारी रहेकाले जोखिमका कारण मेसिन चलाउन नसकिएको उनको भनाइ छ । हिजोदेखि नै जाममा परेका सवारी साधनको लामो लाइन लागेको उनले बताए ।

बिहीबार बिहान पनि झरेको पहिरो पन्छाएर सडक सञ्चालनमा ल्याइए पनि दिउँसो साढे १ बजे पुनः पहिरो खसेपछि सडक दुईतर्फी अवरुद्ध भएको छ ।
काठमाडौंबाट भरतपुरतर्फ गएका ठूला सवारीसाधन मुग्लिन र कुरिनटार क्षेत्रमा तथा नारायणगढबाट काठमाडौं, पोखरातर्फ जाँदै गरेका सवारीसाधन जलबीरे, जुगेडी क्षेत्रमा रोकिएका छन् । बर्खा लागेसँगै नारायणगढ–मुग्लिन सडक खण्डमा पटक–पटक पहिरो जाने र बाटो बन्द हुँदा यात्रुहरुले सास्ती व्यहोर्दै आएका छन् ।

काठमाडौं\बीबीसी । आन्ध्र महासागरमा घातक दुर्घटनामा परेको टाइटन पनडुब्बीका टुक्राहरूमा मानव शरीरका अवशेषहरू फेला परेको ठानिएको यूएस कोस्ट गार्डले जनाएको छ। पर्यटकहरू लिएर टाइटानिक पानीजहाजको भग्नावशेष भएको स्थानतिर गएको उक्त पनडुब्बीमा अन्तःस्फोटन भएको अनुमान गरिएको छ।

उक्त पनडुब्बीका टुक्राहरू समुद्रको पीँधबाट सङ्कलन गरेर बुधवार क्यानडाको सेन्ट जोन्समा ल्याइएको छ। अधिकारीहरूका अनुसार फेला परेका सामग्रीमध्ये उक्त पनडुब्बीको ुल्यान्डिङ फ्रेमु र पछाडिको भागको ढक्कन पनि छन्। मानव अवशेष भन्ठानिएका वस्तुको संयुक्त राज्य अमेरिकाका विज्ञहरूले परीक्षण तथा विश्लेषण गर्ने यूएस कोस्ट गार्डले एउटा विज्ञप्तिमा जनाएको छ।

यूएस कोस्ट गार्डले टाइटन पनडुब्बी दुर्घटनाको कारण पत्ता लगाउन अनुसन्धान थालिसकेको छ। उक्त अनुसन्धान अहिले प्रारम्भिक चरणमा छ। कोस्ट गार्डको मरीन बोर्ड अफ इन्भेस्टिगेशन (एमबीआई) ले अहिले सङ्कलित प्रमाणहरू थप परीक्षण र विश्लेषणका लागि सेन्ट जोन्सबाट अमेरिकाको कुनै बन्दरगाहमा लैजाने छ।

एउटा विज्ञप्तिमा एमबीआई प्रमुख क्याप्टेन जेसन नोयबाउअरले ‘उक्त विनाशकारी दुर्घटना के कारणले भयो भन्ने बुझ्न तथा भविष्यमा त्यस्तो घटना नदोहोरिने सुनिश्चित गर्न अझै प्रशस्त काम गर्न बाँकी छ’ भनेका छन्। गहिरो समुद्रमा निकै विकट स्थानबाट ती प्रमाणहरू खोज्न तथा सङ्कलन गर्न पाएको सहयोगप्रति उनले कृतज्ञता व्यक्त गरेका छन्। गत जुन १८ मा भएको दुर्घटनामा टाइटन पनडुब्बीमा सवार सबै पाँच जनाको मृत्यु भएको थियो।

पानीको माथिल्लो सतहबाट उत्तर आन्ध्र महासागरमा गोता लगाएको झन्डै डेढ घण्टामा झन्डै ३,८०० मिटरको गहिराइमा उक्त दुर्घटना भएको थियो। उक्त यात्रामा त्यसको प्रबन्ध मिलाउने तथा पनडुब्बीको स्वामित्व भएको ओशनगेट कम्पनीका प्रमुख स्टक्टन रश ्(६१), ब्रिटिश अन्वेषक हमिश हार्डिङ (५८), पाकिस्तानी मूलका ब्रिटिश अर्बपति शाहजादा दाउद (४८) र उनका १९ वर्षे छोरा सुलेमान दाउद तथा फ्रान्सेली गोताखोर पोल(अन्री नार्गोले (७७) थिए।
सुरुमा अधिकारीहरू मृतकहरूको अवशेष फेला पर्नेमा विश्वस्त थिएनन्।

ूत्यहाँ तल समुद्रको पीँधमा निकै कठोर पर्यावरण छ, पनडुब्बी दुर्घटनामा परेको पुष्टि भएपछि कोस्ट गार्डका एड्मिरल जोन माउगरले भनेका थिए। टाइटानिक पानीजहाजको एउटा भग्नावशेष भएको ठाउँनजिकै टाइटनका पाँचबाट मुख्य टुक्रा फेला परेका छन्।

मुख्य अनुसन्धानकर्ता क्याप्टेन जेसन नोयबाउअरले पनडुब्बीको भग्नावशेष सङ्कलन गर्नु अनुसन्धानको प्राथमिकता भएको बताएका थिए। उनले मानव अवशेष भेटिए विशेष सावधानी अपनाइनेू बताएका थिए। उनका अनुसार अमेरिका, क्यानडा, यूके र फ्रान्सका निकायहरूले संयुक्त रूपमा अनुसन्धान गर्ने छन्।

बुधवार बाहिर निकालिएका टुक्राहरूमा कम्तीमा एउटा टिटेनिअमबाट निर्मित ुएन्ड क्यापु, झ्याल हराएको स्थितिको पोर्टहोल र एउटा टिटेनिअम रिङ, ल्यान्डिङ फ्रेम र एन्ड इक्विप्मन्ट बे भएको बीबीसीका विज्ञान संवाददाता जोनाथन एमसले जानकारी दिएका छन्। क्यानडाको पानीजहाज होराइजन आर्क्टिकले ती वस्तु सङ्कलन गर्ने अभियानको नेतृत्व गरेको थियो। उक्त पानीजहाजले पल्याजिक रिसर्च सर्भिसेजको स्वामित्वमा रहेको टाढाबाट सञ्चालन गर्न मिल्ने उपकरण (आरओभी) लगेको थियो।

सो कम्पनीले आफ्नो काम सकिएको र आफ्नो उपकरण शिविरमा फर्काउन लागिएको जानकारी बुधवार दिएको थियो। यूएस कोस्ट गार्डको एउटा जहाजले क्यानडाको सेन्ट जोन्समा टाइटन पनडुब्बीका भग्नावशेष लगेको थियो । यूएस कोस्ट गार्डको एउटा जहाजले क्यानडाको सेन्ट जोन्समा टाइटन पनडुब्बीका भग्नावशेषहरू लगेको थियो पनडुब्बी सञ्चालनमा पर्याप्त सुरक्षा व्यवस्था नमिलाएको भन्दै ओशनगेटको चर्को आलोचना भएको छ।

उक्त कम्पनीका पूर्वकर्मचारीहरूले पहिले पनि टाइटन पनडुब्बीबारे चिन्ता व्यक्त गरेको खुलेको छ। उक्त पनडुब्बी कुनै निकायको नियमनमा पनि नपरेको देखिन्छ। बीबीसीले पढेको एउटा इमेलमा रशले टाइटनको सुरक्षाबारे एक विज्ञले व्यक्त गरेको चिन्ताको खण्डन गरेका थिए। इमेलमा नवप्रवर्तनलाई रोक्न सुरक्षासम्बन्धी तर्क गर्नेहरूसँग आफू दिक्क भएको आशय व्यक्त गरेका थिए। जहाजबाट निकालेर ट्रकहरूमा सार्न क्रेनको सहयोग लिइएको थियो