Category: समाचार

डोल्पा । धर्म परिवर्तन गराएको अभियोगमा डोल्पा जिल्ला अदालतले पास्चर केशवराज आचार्यलाई दुई वर्ष कैद सजाय सुनाएको छ। मंगलबार न्यायाधीश केशवराज चपाईको एकल इजलासले केशवराज आचार्यलाई दुई वर्ष कैद र २० हजार रुपैयाँ जरिवाना सुनाएको हो। डोल्पा त्रिपुरासुन्दरी नगरपालिका वडा नम्बर २ की एक महिलालाई जबर्जस्ती धर्म परिवर्तन गराएको ठहर गर्दै सो सजाय सुनाएको हो ।

पास्चर आचार्य गत वर्ष चैत ११ गते पोखराबाट पक्राउ परेका थिए। उनले आफ्नो चर्चमा भेला गरी अफवाह फैलाएको अभियोग लागेको थियो । यशुले कोरोना भाइरस निको पारिदिने भन्दै अफवाह फैलाएको विषय टिकटकमा भाइरल भएपछि उनी पक्राउ परेका थिए ।

सुर्खेत । कर्णाली प्रदेशसभाका मुख्यमन्त्री जीवन बहादुर शाहीले बुधबार विश्वासको मत लिने भएका छन् । शाहीले विश्वासको मत लिने प्रयोजनका लागि आज बोलाइएको बैठक मत विभाजनमा प्रवेश नगरी स्थगित भएको छ । मंगलबारको बैठकमा मुख्यमन्त्री शाहीले विश्वासको मतसम्बन्धी प्रस्ताव पेश गरेका छन् ।

बैठक सुरू भएलगत्तै सभामुख राजबहादुर शाहीले संसद आह्वानका लागि प्रदेश प्रमुखले पठाएको पत्र बाचन गरेर सुनाएका थिए । त्यसपछि सरकारमा मन्त्रालयको जिमेवारी हेरफेर सम्बन्धी पत्र सुनाएर मुख्यमन्त्रीलाई विश्वासको मत माग्ने समय दिएका थिए । मुख्यमन्त्रीले विश्वासको मतको लागि प्रस्ताव पेस गरेपछि बैठक स्थगित गरिएको हो । बैठक बुधबार दिउँसो १ बजे बस्नेछ ।

काठमाडौं । नेकपा एमालेको महाधिवेशन आगामी चार वर्षका लागि नयाँ नेतृत्व चयन गर्दैन सकिएको छ । केपी शर्मा ओलीको नेतृत्वमा १९ पदाधिकारी र ३०१ सदस्यीय केन्द्रीय कमिटी निर्वाचित गर्दै एमालेको दशौं राष्ट्रिय महाधिवेशन सम्पन्न भएको हो । अध्यक्षमा ओलिले भिम रावललाइ हराए । उपाध्यक्षमा ईश्वर पोखरेल निर्विरोध भए ।  महासचिव शंकर पोखरेल निर्विरोध निर्वाचित भए ।

६ उपाध्यक्षका लागि भएको निर्वाचनमा विष्णु पौडेल, सुवास नेम्वाङ, रामबहादुर थापा बादल, सुरेन्द्र पाण्डे, युवराज ज्ञवाली र अष्टलक्ष्मी शाक्यले निर्वाचन जिते । उपाध्यक्षमा घनश्याम भुसाल पराजित भए ।
उपमहासचिवमा प्रदीप ज्ञवाली, पृथ्वीसुब्बा गुरुङ र विष्णु रिमाल निर्विरोध निर्वाचित भए । ७ सचिवका लागि ९ जना उम्मेदवारबीच प्रतिस्पर्धा भएकोमा योेगेश भट्टराई, गोकर्ण विष्ट, पद्मा अर्याल, टोपबहादुर रायमाझी, छबिलाल विश्वकर्मा, लेखराज भट्ट र रघुवीर महासेठ निर्वाचित भए । टङ्क कार्की र भिम आचार्य पराजित भए ।

काठमाडौं । नेकपा एमालेमा पदाधिकारीमा सर्वसम्मत नभएपछि रातभर केन्द्रिय सदस्यका लागि प्रयास गरिएको थियो । तर, केन्द्रिय सदस्यमा समेत सहमत नजुटेपछि अन्ततः निर्वाचन शुरु भएको छ । दशौं राष्ट्रिय महाधिवशनमा अध्यक्षसहित केही पदाधिकारी र केन्द्रीय सदस्य चयनमा मतदान सुरु भएको हो । अहिले आधा भन्दाबढी भोट खसिसकेको छ । मंगलबार विहान करिव ४ बजेतिर सुरु भएको मतदानको सुरुमा अध्यक्षका उम्मेदवार केपी शर्मा ओली,भीम रावलले भोट खसालेका थिए ।

अध्यक्ष, उपाध्यक्ष र सचिवका साथै ७ वटा क्लस्टरका केन्द्रीय सदस्यमा मतदान जारी छ । अध्यक्षमा केपी शर्मा ओली र भीम रावल र ६ उपाध्यक्षका जागि अष्टलक्ष्मी शाक्य, घनश्याम भुसाल, युवराज ज्ञवाली, रामबहादुर थापा, विष्णु पौडेल, सुरेन्द्र पाण्डे र सुवास नेम्वाङ उम्मेदवार बनिरहेका छन् । सात सचिवका लागि गोकर्ण विष्ट, छविलाल विश्वकर्मा, टंक कार्की, टोपबहादुर रायमाझी, पद्मा अर्याल, भीम आचार्य, योगेश भट्टराई, रघुवीर महासेठ र लेखराज भट्ट चुनावमा छन् ।

चितवन । एमालेको १०औं महाधिवेशनको निर्वाचन प्रकिया राती ९ बजेबाट शुरु गर्ने भनिए पनि अझै शुरु हुन सकेको छैन । सकेसम्म केन्द्रिय सदस्यहरुमा सर्वसम्मत गराएर पदाधिकारीमा मात्र निर्वाचन गराउने रणनीतिका साथ नेताहरुलाई मनाउने क्रम जारी रहेको छ । सोहीकारण निर्वाचनको प्रक्रिया समेत पर धकेलिएको हो । निर्वाचन तालिका अनुसार राति ९ बजे उम्मेदवारको अन्तिम नामावाली प्रकाशन गर्ने कार्यसूचि थियो ।

भूगोलबाट प्रतिनिधित्व गर्ने विभिन्न समूहबाट उम्मेदवारी दिएकालाई सर्वसम्मत गराउने कोसिस शीर्ष नेताहरुले गरेका छन् । अहिलेसम्म खुला महिलातर्फ ५३ जना सर्वसम्मत निर्वाचित भएका छन् । भूगोलमा प्रदेश नम्बर २ र कर्णालीमा सर्वसम्मत भएको छ । १९ सदस्यीय पदाधिकारीमा १, १ वरिष्ठ उपाध्यक्ष र महासचिव, ३ उपमहासचिव पदमा सर्वसम्मत चयन भएको छ । यस्तै, १ अध्यक्ष, ५ उपाध्यक्ष, ७ जना सचिवका लागि मतदान हुने निश्चित भएको छ ।

काठमाडौं । नेपाली कांग्रेसको नयाँ कार्यसमितिका लागि मंसिर २७ गते निर्वाचन हुने भएको छ । केन्द्रीय निर्वाचन समितिले केन्द्रीय कार्यसमितिको निर्वाचन कार्यतालिका सार्वजनिक गरेको हो । शीर्ष नेताहरुसँग भएको परामर्शअनुसार महाधिवेशन उद्घाटन पूर्व नै उम्मेदवारी दर्ता गर्ने योजना भने स्थगित गरिएको छ । कांग्रेस महाधिवेशन २४ मंसिरदेखि शुरु हुँदैछ ।

कार्यतालिकाअनुसार अब २४ गते नै मतदाता नामावली प्रकाशित हुनेछ । उम्मेदवारी दर्ता २५ गते विहान १० बजेदेखि साँझ ५ बजेसम्म हुने छ । दावी विरोध लगायतका प्रक्रिया पूरा गरेर २६ गते साँझ ५ बजे उम्मेदवारहरुको अन्तिम नामावली प्रकाशित हुनेछ । २७ गते विहान ८ बजेबाट मतदान हुने गरि तालिका तय गरिएको छ ।

काठमाडौं । यतिबेला नेकपा एमालेको दशौं महाधिवेशन चितवनको सौराहामा चलिरहेको छ । निर्वाचन हुने भएसँगै उम्मेदवारीको दाबी विरोध चलिरहेको छ । राति ९ बजेदेखि मतदान हुँदैछ । अध्यक्षमा केपी शर्मा ओली र डा. भीमबहादुर रावल आमने सामने भएका छन् ।

तर ओलीका प्रियपात्र नेता लालबाबु पण्डित भने महाधिवेशनस्थल छोडेर काठमाडौं आइपुगेका छन् । पदाधिकारीका आकांक्षी पण्डितलाई ओलीले पदाधिकारी सूचीमा नअटाएपछि केन्द्रीय सदस्य नबन्ने घोषणा गर्दै काठमाडौं फर्किएका हुन् ।

‘मैले पहिला नै पदाधिकारीबाहेक अन्य पदमा बस्दिन भनेर घोषणा गरेको थिएँ, सोहीअनुसार केन्द्रीय सदस्य त्याग गरेको हुँ,’ पण्डितले भने, ‘बिहानको खाना खाएर म अहिले काठमाडौं फर्किसकेको छु ।’

उनका अनुसार निर्वाचन समितिले उम्मेदवार दिने अवसर दिए पनि कुनै पनि कार्यकारी पदमा उम्मेदवार रहन भने अनिच्छुक भएकाले काठमाडौं फर्किएका हुन् ।

काठमाडौं । नेकपा ‘एमाले’मा अन्तत निर्वाचन हुने भएको छ । अध्यक्षमा भीम रावलले उम्मेदवारी दिएपछि अध्यक्ष केपी शर्मा ओलीले पनि मनोनयन दर्ता गराएका छन् ।

बन्दसत्रमा उपाध्यक्षमा बस्न ओलीले गरेको आग्रह रावलले अस्वीकार गरेपछि अध्यक्षमा ओली–रावल भिडन्त हुने भएको हो

एमालेमा सर्वसम्मतबाटै नेतृत्व चयनको प्रयास गरिएको थियो । अध्यक्षमा भीम रावल र उपाध्यक्षमा घनश्याम भुसालले उम्मेदवारी दिएपछि ती पदमा चुनाव हुने भएको हो ।

अध्यक्ष ओलीले आइतबार राति आफ्नो नेतृत्वमा नयाँ पदाधिकारीको नाम घोषणा गरेका थिए । उक्त सूचीमा भीम रावल र भुसालको नाम थिएन ।

सचिवमा भीम आचार्य र टंक कार्कीको उम्मेदवारी परेको छ।

वरिष्ठ उपाध्यक्षमा ईश्वर पोखरेल र महासचिवमा शंकर पोखरेल सर्वसम्मत भएका छन् । पोखरेलद्वय अध्यक्ष केपी शर्मा ओलीको विश्वास पात्र हुन्।

उपमहासचिवमा प्रदीप ज्ञवाली, पृथ्वी सुब्बा गुरुङ र विष्णु रिमाल निर्विरोध निर्वाचित भएका छन् ।

काठमाडौं । नेपाली कांग्रेस काठमाडौं जिल्ला सभापतिमा सबुज बानियाँले जित हाँसिल गरेका छन् । उनले उपेन्द्र कार्कीलाई ८६८ मतको फराकिलो अन्तरले हराउँदै जिल्ला सभापति बनेका हुन् । बानियाँले १९५७ र कार्कीले १०८९ मत पाए । बानियाँलाई प्रकाशमान सिंह र गगन थापा पक्षले समर्थन गरेका थिए । कार्की भने शेरबहादुर देउवा र कृष्णप्रसाद सिटौला पक्षको समर्थनमा उठेका हुन् । प्यानलसहित प्रतिस्पर्धा गरेका उनीहरुमध्ये बानियाँको प्यानल नै विजयी भएको हो । कांग्रेस काठमाडौं जिल्ला उपसभापतिमा गोकर्ण केसी र राजकुमारी नकर्मी विजयी भए । सचिवमा इन्द्रबहादुर थापा र गोविन्द पुडासैनी तथा सहसचिवमा प्रा.डा. अमिता प्रधान र रोमलाल श्रेष्ठ विजयी भए ।

चितवन । नेकपा एमालेको भावी नेतृत्वका लागि केपी शर्मा ओली र भीम रावलबीच प्रतिस्पर्धा हुने भएको छ । एमालेका अध्यक्ष ओलीले रावललाई उपाध्यक्ष बस्न भन्दै पदाधिकारीको सूचिमा राखेका थिए । तर, यसअघि नै अध्यक्षमा उमेदवारी घोषणा गरेका रावलले ओलीको प्रस्ताव स्वीकार गरेनन् ।

चितवनको सौराहामा जारी दशौं महाधिवेशनको बन्दसत्रमा ओलील ३०१ जना केन्द्रीय सदस्य र १९ जना पदाधिकारीको नाम प्रस्ताव गरेका थिए । रावल भने ओलीको प्रस्तावमा सहमत भएनन् । बन्द सत्र हलमै ओलीको समर्थन र रावलको विरुद्धमा प्रतिनिधीले चर्को नाराबाज समेत गरेका थिए । एमालेको निर्वाचन आयोगले आज बिहान ९ देखि साढे ९ बजेसम्म उम्मेदवारी दर्ताको समय तोकेको छ ।

चितवन । नेकपा एमालेको दशौं महाधिवेशनको बन्दसत्र आइतबार रातीभर जारी रह्यो । यसै दौरान अध्यक्ष केपी शर्मा ओलीले पदाधिकारीको टिम सार्वजनिक गरे । उनको चाहना कुनै पनि हालतमा निर्वाचन नगराउने थियो । तर, पदाधिकारीको टीममा भीम रावल असन्तुष्ट रहे । फलस्वरुप आज अध्यक्ष पदका लागि भने निर्वाचन हुने । राति अबेर शुरु भएको बन्दसत्रमा ओलीले ३०१ जना केन्द्रीय सदस्य प्रस्ताव गरे ।

अध्यक्षमण्डलको तर्फबाट सहमतिका लागि भन्दै १९ सदस्यीय पदाधिकारी प्रस्ताव गरेका छन् । जसमा उनले आफूलाई अध्यक्ष घोषणा गरेका छन् । वरिष्ठ उपाध्यक्षमा ईश्वर पोखरेलको नाम छ । उपाध्यक्षमा युवराज ज्ञवाली, अष्टलक्ष्मी शाक्य, सुरेन्द्र पाण्डे, रामबहादुर थापा बादल, विष्णु पौडेल र सुवासचन्द्र नेम्वाङ छन् ।

महासचिवमा शंकर पोखरेलको नाम छ । उपमहासचिवमा प्रदीप ज्ञवाली, पृथ्वीसुब्बा गुरुङ र विष्णु रिमाल छन् । सात सचिवमा टोपबहादुर रायमाझी, छविलाल विश्वकर्मा, रघुवीर महासेठ, लेखराज भट्ट, योगेश भट्टराई, गोकर्ण विष्ट र पद्मा अर्याल छन् ।

चितवन । नेकपा एमालेको १० औं महाधिवेशनको बन्दसत्र तोकिएको समय भन्दा १२ घण्टा पछि सुरु भएको छ । महाधिवेशनको तेस्रो दिन बिहान १० बजेबाट कार्यक्रम थाल्ने कार्यतालिका थियो । अध्यक्ष केपी शर्मा ओली भर्खरै बन्दसत्र भएको हलमा छिरेका छन् । आज दिनभरको कसरतपछि एउटा खाका बनाएर आएका ओलीले पदाधिकारीको नाम पढ्ने भएका छन् । जसलाई ध्वनी मतका आधारमा टुंग्याउने तयारी छ । यो प्रक्रियामा भीम रावलसहितका नेता भने असन्तुष्ट छन् ।

काठमाडौं । पछिल्लो २४ घण्टामा देशभर १५८ जनामा कोरोना संक्रमण पुष्टी भएको छ ।

स्वास्थ्य तथा जनसंख्या मन्त्रालयका अनुसार ८ हजार ९१८ जनाको पीसीआर परीक्षण गर्दा १५४ जना र २३१४ जनाको एन्टिजेन परीक्षण गर्दा ४ गरी १५८ जनामा कोरोना भाइरसको संक्रमण देखिएको हो ।

योसँगै नेपालमा कोरोना संक्रमितको संख्या ८ लाख २० हजार ८७८ जना पुगेको छ ।

पछिल्लो २४ घण्टामा ३४२ जना संक्रमण मुक्त भएका छन् । यो सहित संक्रमण मुक्त हुनेको संख्या ८ लाख २ हजार ३८९ पुगेको छ । संक्रिय संक्रमितको संख्या ६ हजार ९६६ रहेको छ ।

पछिल्लो २४ घण्टामा २ जना संक्रमितको मृत्यु भएको छ । यो सहित नेपालमा कोरोना मृत्यु हुनेको संख्या ११ हजार ५२३ पुगेको छ ।

काठमाडौं । नेकपा एमालेले पार्टी भित्र भागबण्डा मिलाउन विभिन्न पद थप गरेको छ । शुक्रवार मध्यरात सौराहामा बसेको केन्द्रीय कमिटी बैठकले पदाधिकारीसहित अन्य पदमा संख्या थपेर सर्वसम्मत नेतृत्व चयन गर्न प्रयास गरेको छ । पार्टीको बिधान भन्दा फरक व्यवस्था गर्नु पर्ने भएकाले केन्द्रीय कमिटीले गरेको निर्णय बन्द सत्रमा प्रस्ताव लगेर अनुमोदन गर्ने तयारी रहेको एमाले बताएको छ । केन्द्रीय कमिटिले राती साढे १२ बजे बसेको बैठकले यस्तो निर्ण गरेको हो ।

एक अध्यक्षसहित सात उपाध्यक्ष जसमा वरिष्ठ उपाध्यक्ष एक छ उपाध्यक्ष हुने गरि विधान परिवर्तन गरिएको छ । एक महासचिव, ३ उपमहासचिव, सात सचिव, केन्द्रीय कमिटी ३०१, पोलिट्ब्युरो ९९, स्थायी कमिटी ४५, पदाधिकारी १९ पुर्‍याउने निर्णय समेत एमालेले गरेको छ । यद्दपी एमालले सर्वसम्मत नेतृत्वको प्रयास गरेपनि नेताहरुले धमाधम उमेदवारी घोषणा गर्ने क्रम भने जारी छ । एमालेको बन्दसत्र आजबाट शुरु हुँदैछ ।

काठमाडौं । सत्तारूढ नेकपा (माओवादी केन्द्र)को पालिका आज देशभर हुँदैछ । दिउँसो १ बजे माओवादी केन्द्रका अध्यक्ष पुष्पकमल दाहाल ुप्रचण्डु ले देशभरिका अधिवेशनमा भर्चुअल्ली सम्बोधन गर्ने कार्यक्रम रहेको प्रचण्डको सचिवालयले जनाएको छ । माओवादी केन्द्रले मंसिर ४ गते देशभरि वडा अधिवेशन गरेको थियो। माओवादी केन्द्रमा सबै स्थानमा सर्वसम्सत नेतृत्व आइरहेको छ ।

अन्तरिम विधान २०७८ मा पार्टीका विभिन्न तह र जनवर्गीय संगठनका केन्द्रीय निकायको निर्वाचन गर्न केन्द्रीय निर्वाचन आयोगको व्यवस्था छ। माओवादीले सदस्यता नवीकरण समेत टुंग्याइसकेको छ । माओवादीको २५ मंसिरमा सातै प्रदेशमा अधिवेशन हुने कार्यक्रम छ । पुस ११ देखि १३ मा माओवादी केन्द्रको राष्ट्रिय सम्मेलन आयोजना हुँदैछ ।