काठमाडौं । नेपालमा कोरोना संक्रमणबाट थप ३० जनाको मृत्यु भएको छ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा देशभरका विभिन्न अस्पतालमा उपचाररत ३० जनाको मृत्यु भएको हो ।
यससँगै नेपालमा कोरोना संक्रमणबाट मृत्यु हुनेको संख्या ९ हजार ६३७ पुगेको छ।
काठमाडौं । नेपाली कांग्रेसका नेता गगन थापाले विदेशमा गरिएको उपचार खर्च व्यहोर्न नमिल्ने भन्दै प्रधानमन्त्री शेरबहादुर देउवाको ध्यानाकर्षण गराएका छन् ।
नेता थापाले नेकपा एमालेका वरिष्ठ नेता तथा पूर्वप्रधानमन्त्री झलनाथ खनालको उपचार खर्च सरकारले व्यहोर्ने समाचार सार्वजनिक भएपछि नेता थापाले सरकारको निर्णय गैरकानुनी भएको भन्दै सामाजिक सञ्जालमार्फत प्रधानमन्त्री देउवाको ध्यानाकर्षण गराएका हुन् ।
‘२०७४ सालमा बनेको जनस्वास्थ्य ऐनमा हाम्रै पहल र संशोधनमा ‘प्रचलित कानुनमा जुनसुकै कुरा लेखिएको भए तापनि कुनै व्यक्तिलाई विदेशमा उपचार गर्नु परेमा सोको लागि लाग्ने खर्च नेपाल सरकारबाट उपलब्ध गराइने छैन’ भन्ने व्यवस्था छ र उक्त कान्न २०७५/६/२ गतेदेखि लागु भइसकेको छ,’ थापाले सामाजिक सञ्जालमार्फत भनेका छन् ।
उनले लेखेका छन्, ‘यो कानुन कार्यान्वयनमा आइसकेको अहिलेको अवस्थामा नेपालको बहालवाला राष्ट्रपति, प्रधानमन्त्रीदेखि अन्य कसैको पनि विदेशमा भएको उपचारको खर्च नेपाल सरकारले व्यहोर्न पाउँदैन । कानुनको यो व्यवस्थाको सम्बन्धमा सम्मानीय प्रधानमन्त्री प्रष्ट हुनुहुन्छ भन्ने मलाई विश्वास छ ।’
उनले अहिले खनालको स्वास्थ्योपचारको चर्चा भइरहेको र त्यसमा उनको पार्टीले पहल गरिरहेको भन्दै अप्ठेरो अवस्था भए सबैले सहयोग गर्नुपर्ने बताएका छन् ।
‘जहाँसम्म पूर्वप्रधानमन्त्री झलनाथ खनालको उपचारको सन्दर्भ छ, हामी सबै उहाँको शीघ्र स्वास्थ्यलाभको कामना गरिरहेका छौँ । नेपालको लोकतान्त्रिक आन्दोलनमा अभूतपूर्व योगदान पुर्याउनुभएका झलनाथ खनालले पछिल्लोपटक निजी नाफा–घाटाको हिसाब नगरी संविधान र लोकतन्त्रको पक्षमा आफूलाई जसरी उभ्याउनुभएको छ, यसले उहाँको कद अझ बढेको छ,’ उनले भनेका छन्, ‘झलनाथ खनालसमेतको अडान र नेतृत्वदायी भूमिकाका कारणले जोगिएको संसद्मा सँगै काम गर्न हामी प्रतीक्षारत छौँ । मलाई विश्वास छ, हाम्रो चाहना छिटै पूरा हुनेछ ।’
उनले खनालको उपचारको लागि परिवार, स्वजन, पार्टीपंक्ति लागिरहेको बताएका छन् । ‘उहाँलाई उपचार खर्च जुटाउनुपर्ने अवस्था नै आएमा त्यसको लागि देश–विदेशमा रहेका हामी सबै नेपाली हरदम तयार छौँ र रहन्छौँ नै,’ थापाले भनेका छन्, ‘यस्तो बेलामा उहाँको विदेशमा गरेको उपचारको खर्च सरकारले व्यहोर्ने भन्ने विषय उठाई उहाँको बारेमा अनावश्यक टीकाटिप्पणी गर्ने वातावरण बनाएर उहाँ र उहाँको परिवारलाई दुःखी नबनाऊँ ।’
थापाले खनालको उपचारका विषयमा अनावश्यक चर्चाले उनको कद घटाउने पनि बताएका छन् । ‘कुनै पनि व्यक्तिले विदेशमा गरेको उपचार खर्च राज्यले व्यहोर्ने विषय गैरकानुनी हो र अघिल्लो सरकारले कानु्नविपरीत गरेको निर्णयको भारी यो सरकारले बोक्ने छैन भन्ने कुरामा तपाईं सचेत हुनुहुन्छ र तपाईंको भनाइ उद्धृत गर्दै आएका समाचार गलत हुन् भन्ने विश्वास छ,’ थापाले भनेका छन् ।
ओरेगन । अमेरिकी राज्य ओरेगनको जंगलमा लागेको आगोको फैलावटसँगै यहाँ स्थिति भयावह हुने चेतावनी जारी भएको छ । अमेरिकी संचारमाध्यमहरुका अनुसार अहिलेसम्म आगोको चपेटामा तीन लाख एकड जमीन आइसकेको छ । भयानक आगोलागीसँगै आसपासका मानिसलाई सुरक्षित स्थानमा सारिएको छ । करीव दुई हजार भन्दा बढी फायरफाइटर्स आगो नियन्त्रणमा खटिएका छन् । सो राज्यमा इतिहासकै सबैभन्दा भयानक आगोलागी भएको संचारमाध्यमको भनाई छ । आगो ६ जुलाईबाट फैलन थालेको हो ।
अहिले अमेरिकाका १३ अलग अलग क्षेत्रको ८० भन्दा बढी स्थानमा आगोलागी भएको छ । उच्च तापमानका कारण आगोको फैलावट तिब्र बनेको छ भने नियन्त्रणमा कठिनाई उत्पन्न भएको छ । आगोलागीका कारण ग्रामिण भेग नराम्रोसँग प्रभावित भएको अधिकारीहरुले जनाएका छन् । अहिलेसम्म १६० वटा घर आगोमा जलेका छन् । २ हजार मानिसको उद्धार भएको छ । फायर एसिस्टेण्ड कमान्डर जो हेसेल ले सोमवार एक बयान जारी गरि आगो नियन्त्रणमा दिनरात टोली खटिएको जनाएका छन् । पोर्टल्याण्डको दक्षिण पूर्वमा समेत आगोलागी फैलिएको छ ।
बाग्लुङ । विषाक्त रक्सी पिउँदा बाग्लुङमा चार जनाको मृत्यु भएको छ । बाग्लुङ प्रहरीका अनुसार सोमवार बेलुकी विषाक्त रक्सी पिएका ६ मध्ये चार जनाको ज्यान गएको हो । ज्यान गुमाउनेमा गलकोट नगरपालिका ७ मल्ममा रहेको खानेपानी आयोजनामा काम गर्ने २१ वर्षीय दीपेन्द्र पुन, ३९ वर्षीय दूधबहादुर राना, ५१ वर्षी रेखबहादुर राना र ३० वर्षीय प्रवीन घर्ती छन् । उनीहरूको उपचारका क्रममा ज्यान गएको हो । उनीहरूसँगै रक्सी पिएका ३८ वर्षीय खेमराज घर्ती र २६ वर्षीय रवीन्द्र पुनको अवस्था गम्भीर छ ।
उनीहरुको धौलागिरि अस्पतालमा प्राथमिक उपचारपछि गण्डकी अस्पताल पोखरा पठाइएको छ । प्रहरीले यो घटनाबारे छानविन गर्न समिति गठन गरेको छ । घटनाको छानबिन गर्न प्रहरी नायब उपरीक्षक (डीएसपी) इकवाल हवारीको नेतृत्वमा अनुसन्धान समिति गठन भएको हो । बाग्लुङमा पहिलो पटक यस प्रकारको घटना भएपछि प्रहरी गम्भीर बनेको छ । प्रहरीले अहिलेसम्म दुई जनालाई पक्राउ गरेको र मजदुरले खाएका चाउचाउ, दालमोठ र मदिराका भाँडासमेत बरामद भएको बताइएको छ ।
काठमाडौं। नेपालमा कोरोना संक्रमणबाट थप २५ जनाको मृत्यु भएको छ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा देशभरका विभिन्न अस्पतालमा उपचाररत २५ जनाको मृत्यु भएको हो ।
यससँगै नेपालमा कोरोना संक्रमणबाट मृत्यु हुनेको संख्या ९ हजार ६०७ पुगेको छ।
काठमाडौं । पछिल्लो २४ घण्टामा देशभर ३१०८ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार देशभरका प्रयोगशालामा ८८३६ पीसीआर परीक्षणमा २२०२ र ४२९९जनाको एन्टिजेन परीक्षणमा ९०६ जना गरी ३१०८ जनामा संक्रमण पुष्टी भएको हो ।
यो सहित नेपालमा कोरोना संक्रमितको संख्या ६ लाख ७० हजार ९५३ पुगेको छ । पछिल्लो २४ घण्टामा १५९५ जना संक्रमण मुक्त भएका छन् ।
यो सहित संक्रमण मुक्त हुनेको संख्या ६ लाख ३४ हजार ९२७ जना पुगेको छ । संक्रिय संक्रमितको संख्या २६ हजार ४१९ रहेको छ ।
पछिल्लो २४ घण्टामा २५ जना संक्रमितको मृत्यु भएको छ । यो सहित नेपालमा कोरोना मृत्यु हुनेको संख्या ९ हजार ६०७ पुगेको छ ।
काठमाडौं । प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ यसअघिको केपी शर्मा ओली सरकारले गरेका नियुक्तिहरु खारेज गर्ने सहमतिमा पुग्नु भएको छ ।
मंगलबार नेकपा एमालेका वरिष्ठ नेता माधव कुमार नेपालसँग भेटवार्तापछि बालुवाटार पुगेका प्रचण्ड र प्रधानमन्त्री देउवाबीच ओली सरकारले गरेका नियुक्ति खारेज गर्ने सहमति भएको हो ।
जेठ ७ गते मध्यरातमा तत्कालीन प्रधानमन्त्री ओलीको सिफारिसमा राष्ट्रपति विद्यादेवी भण्डारीले प्रतिनिधि सभा विघटन गर्नुभएको थियो । तर त्यसलाई सर्वोच्च अदालतले बदर ठहर गर्दै देउवालाई प्रधानमन्त्रीमा नियुक्त गर्न परमादेश जारी गरेको थियो ।
काठमाडौं । संविधानको रक्षार्थ प्रधानमन्त्री शेर बहादुर देउवालाई विश्वासको मत दिएका नेकपा एमालेका नेतालाई कारवाहीको तयारी गरिएको छ । सोमबार बसेको केन्द्रीय कमिटी बैठकले उनीहरुलाई २४ घण्टे स्पष्टिकरण सोधेको थियो । तर, अदालतले ह्वीप नलाग्ने भनेका कारण २२ सांसदले स्पष्टिकरण नबुझाउने भएका छन् । उनीहरुमाथि तत्काल कारवाहीको माग उठेको थियो । तर, एमाले भित्रै नराम्रो सन्देश जाने भन्दै आजसम्मका लागि समय दिइएको थियो ।
एमालेको केन्द्रीय कमिटी बैठक आजसमेत तुलसीलाल प्रतिष्ठान भवन च्यासलमा बोलाइएको छ । अपरान्ह ३ बजे बैठक बस्नेछ । अध्यक्ष केपी शर्मा ओली पक्षका ८ जनासहित कुल २२ जनाले प्रधानमन्त्रीमा देउवालाई विश्वासको मत दिएका थिए। माधव पक्षका १० नेता भने अनुपस्थित भए । भीम रावलले भने राजिनामा घोषणा गरेका छन् । अनुपस्थित भएका नेतालाई भने एमालेले कारवाही नगर्ने भएको छ । अब माधव कुमार नेपाल बीनै एमाले एकता प्रक्रिया अगाडी बढाउने तयारी ओली पक्षीय नेताले गरेका हुन् । यसमा भीम रावल, गोकर्ण विष्ट, योगेश भट्टराईलगायतका नेतासमेत सहमत हुने संकेत देखिएको छ ।
काठमाडौं । सामान्यतया २ देखि ८ डिग्री सेल्सियस तापक्रम कायम गरि निश्चित समय भित्र लगाइसक्नु पर्ने चिनियाँ खोप भेरोसिलको काठमाडौं उपत्यकामा असुरक्षित तरिकाले चुवावट हुने गरेको फेला परेको छ । काठमाडौंमा भेरोसिल खोप पत्रिकाले बेरेर प्लास्टिकको झोला भित्र केही टुक्रा आईसभित्र राखेर लगाउन हिँडेको विश्व न्युजले फेला पारेको छ । काठमाडौंको जिल्लाका एक प्राबिधिकले आफु खोप लगाउनु पर्ने प्राथमिकतामा रहेको भन्दै स्वास्थ्य मन्त्रालयबाटै खोप ल्याएको स्वीकार गरे । नाम नबताउने शर्तमा उनले यो तथ्यको खुलासा गरेका हुन् ।
उनी जस्तै धेरै प्राबिधिक तथा औषधी व्यवसायीले यसैगरि खोप चुवाहट गरेको उनी स्वीकार गर्छन् ।आफुले यसैगरी ५० जना जतिलाई खोप लगाएको उनले जानकारी दिए । यसरी खोप लगाउनेमा आफ्नो चिनजानका रहेको उनको भनाई छ । यसरी चुहावट भएको खोप कतिपय औषधी व्यवसायीले समेत लगाउने गरेको आफ्नो जानकारीमा रहेको उनले बताए ।
अहिले नेपालमा खोप अभियान चलिरहेको छ । चीनबाट आएको भेरोसेल र अमेरिकाबाट आएको जोन्सन एण्ड जोन्सनको खोप लगाइएको छ । चीनबाट सरकारले खरीद गरि ल्याएको पछिल्लो खोप काठमाडौं उपत्यकामा केही दिनमै सकिएको भन्दै अभियान बन्द गरिएको थियो । तर, औषधी पसलेहरु र प्राबिधिकहरुले भने स्वास्थ्य मन्त्रालयबाटै र कती पय खोप केन्द्रबाट ल्याएर सामान्य मापदण्ड समेत पुरा नगरी लगाउने गरेको खुलेको हो ।
पालो कुर्दा सकिएको खोप झोलामा कसरी ?
काठमाडौं उपत्यकासहित देशभर सबै नागरिकले खोप सजिलै पाउने भन्दै स्वास्थ्य तथा जनसंख्या मन्त्रालयले केही दिन अगाडी एक विज्ञप्ती निकालेको थियो । मन्त्रालयले उपत्यकामा छुट्याइएको कोटा सकिएको भन्दै छिट्टै थप खोप आउने बताएको थियो । तर, विश्व न्यूजले सोमबार नै खोप वितरण गरिरहेको अवस्थामा फेला पारेको छ । यस स्वास्थ्य तथा जनसंख्या मन्त्रालयसँग प्रतिक्रिया माग्दा भने मन्त्रालयका अधिकारीले अनविज्ञता प्रकट गरेका छन् ।
स्वास्थ्य मन्त्रालयका सहप्रवक्ता डा. समीर कुमार अधिकारीले कुनै पनि पसलमा खोप बेचविखन गर्न नपाइने बताउँछन् । उनी भन्छन्, हल्लाहरु धेरै आएपछि स्वास्थ्य तथा जनसंख्या मन्त्रालयले यसबारेमा सचेतना जगाउने गरी भिडियो नै बनाएको छ । त्यस्तो पाइएमा तत्काल स्वास्थ्य मन्त्रालय वा नजिकको प्रहरी कार्यालयमा सम्पर्क गर्न भनेका छौँ । मन्त्रालयको फेसबुकपेजमा पनि अवैधरुपमा बेचबिचन भएमा कारबाही हुने र लुकाइछिपाई गरेर बजारमा बेच्न राखेका खोप नक्कली हुनसक्ने सन्देश राखिएको छ । कोरोनाविरुद्धको खोप सरकारले निःशुल्क उपलब्ध गराउने मन्त्रालयले जनाएको छ ।
कहाँ पुग्यो नेपालमा खोप अभियान ?
नेपाल आफै खोप उत्पादक मुलुक होइन । सोहीकारण उसले अन्य मुलुकसँग खोपमा भर पर्नु परेको छ । नेपाललाई भारतले पहिलो पटक १० लाख डोज कोभिसिल्ड अनुदानमा दिएको थियो । भारतबाट नेपाली सेनाका लागि थप एक लाख डोज खोप समेत अनुदानमा आएको थियो । त्यसपछि नेपाल सरकारले २० लाख डोज खरीद गर्न भारतलाई रकम दियो । भारतबाट खरीद गरेको १० लाख डोज खोप डेलिभरी भएपछि भारतबाट थप खोप आएन । त्यसबीचमा कोभ्याक्स कार्यक्रममार्फत ३ लाख डोज खोप नेपाल आएको थियो ।
यो खोप करीव २१ लाख मानिसलाई पहिलो डोज लगाइएको थियो । त्यसमध्ये करीव १४ लाख जेष्ठ नागरिकले कोभिशिल्डको दोस्रो डोज लगाउनबाट बन्चित छन् । भारतबाट खोप आउन नपाएपछि सरकारले चीनतर्फ पहल थाल्यो शुरुमा १० लाख डोज खोप अनुदानमा दिएको चीनले ४० लाख डोज खोप बिक्रि गरेको छ । ४० लाखमध्ये पहिलो चरणमा ८ लाख डोज आएपछि सरकारले खोप अभियान चलाएको हो ।
पछिल्लो समय अमेरिकाबाट १५ लाख ४० हजार डोज खोप नेपाल आएको छ । सो खोप लगाउने कार्य सोमबारबाट शुरु भएको छ । चीनले थप १८ लाख डोज खोप अनुदान दिने घोषणा गरेको छ । नेपाललाई जापानले समेत १६ लाख डोज खोप दिने बताएको छ । सोमबार भारतीय प्रधानमन्त्री नरेन्द्र मोदीले समेत नेपाल पठाउन बाँकि रहेको खोप पठाउने आश्वासन दिएका छन् ।
खोप केन्द्रमा थामिनक्सनु भिड
सरकारले प्राथमिकतामा वितरण थालेको खोप प्राथमिकता भन्दा बाहिरका मानिसले पाउँदा वितरण अव्यवस्थित बनेको छ । सरकारले उमेर र पेशा अनुसार कोरोना बिरुद्धको भ्याक्सिन लगाउने बुथहरु तोके पनि अधिकांश बुथमा टोकन लिएर भ्याक्सिन लगाउन लाईन लाग्दा लाग्दै खोप सकिएको भन्दै फर्काउने गरिएको छ । उमेरको हद बन्दी तोकेर जेष्ठ नागरिकलाई खोप लगाउन तोकिएका बुथमा युवाहरु लाइनमा देखिएका छन् । खोप वितरणको अव्यवस्थित अवस्थाबारे धेरै गुनासो आएपछि सोमबार स्वयमः प्रधानमन्त्री शेर बहादुर देउवा खोप केन्द्रको अवलोकनमा निस्किए ।
काठमाडौं । काठमाडौं महानगरपालिकाले आजदेखि शुरु गरेको ‘जोन्सन एण्ड जोन्सन’ खोपका लागि २८ अस्पतालमा केन्द्र तोकेको छ । आज (साउन ४ गते) देखि यही साउन ६ गतेसम्म ५० देखि ५४ वर्ष उमेर समूहका व्यक्ति, पूर्ण र अति अशक्त अपाङ्गता भएर ‘क’ र ‘ख’ वर्गको कार्ड प्राप्त गरेका व्यक्ति, नेपालमा बसोबास गरिरहेका शरणार्थी र यसअघि छुटेका स्वास्थ्यकर्मी तथा सफाइकर्मीलाई उक्त खोप दिइने व्यवस्था गरिएको छ ।
कामपाले यसपटक करीब ७६ हजार मात्रा खोप माग गरेको छ । सरकारले खोपका लागि तोकेका समूहको सङ्ख्यालाई २०६८ को जनगणना र जनसङ्ख्या वृद्धि दरका आधारमा विश्लेषण गरेर यो सङ्ख्यामा खोप मागेको जनस्वास्थ्य विभागका प्रमुख हरिबहादुर कुँवरको भनाइ छ ।
जोन्सन एण्ड जोन्सन खोप अमेरिकी सरकारबाट सहयोगस्वरुप प्राप्त भएको हो । खोप केन्द्र वीर अस्पताल, त्रिवि शिक्षण अस्पताल, महाराजगञ्ज, निजामती कर्मचारी अस्पताल, बानेश्वर, शुक्रराज ट्रपिकल तथा सरुवा रोग अस्पताल टेकु, परोपकार स्त्री तथा प्रसूति रोग अस्पताल, काठमाडौं मेडिकल कलेज, नेपाल प्रहरी अस्पताल पानीपोखरी, वीरेन्द्र सैनिक अस्पताल छाउनी, पिपल्स डेण्टल तथा जनरल अस्पताल सोह्रखुट्टे, हिमाल अस्पताल ज्ञानेश्वर, सामुदायिक स्वास्थ्यसेवा परिषद डल्लु, छत्रपाटी निःशुल्क चिकित्सालय छत्रपाटी र जनमैत्री अस्पताल बालाजुमा तोकिएको छ ।
त्यसैगरी मनमोहन अस्पताल स्वयम्भू, काठमाडौं मोडल अस्पताल प्रदर्शनी मार्ग, ह्याम्स हस्पिटल एण्ड रिसर्च सेन्टर धुम्बाराही, शहीद गङ्गालाल राष्ट्रिय हृदय केन्द्र बाँसबारी, नेशनल हस्पिटल कलङ्की, रामघाट प्राथमिक स्वास्थ्य केन्द्र गौशाला, कान्तिपुर अस्पताल तीनकुने, राधास्वामी आइसोलेशन सेन्टर बसुन्धरा र जनकल्याण माध्यमिक विद्यालयमा केन्द्र तोकिएको छ ।
नरदेवी आयुर्वेद अस्पताल नरदेवी, महेन्द्रनारायणनिधि अस्पताल बसुन्धरा, नेपाल भारत मैत्री अस्पताल चावहिल, मेट्रो अस्पताल नारायण गोपाल चोक, इरा इन्टरनेशनल अस्पताल सोह्रखुट्टे र हेल्पिङ् ह्याण्ड्स अस्पताल चावहिलमा केन्द्र रहेको छ । कामपाले हालसम्म सात प्रतिशत नागरिकलाई कोरोनाविरुद्धको पूर्ण खोप लगाएको छ भने १६ प्रतिशत नागरिकले एक मात्रा मात्र खोप लगाएका छन् ।
काठमाडौं । पछिल्लो २४ घण्टामा देशभर २४४५ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार देशभरका प्रयोगशालामा ७८३३ पीसीआर परीक्षणमा १६४२ र ३८३१ जनाको एन्टिजेन परीक्षणमा ८०३ जना गरी २४४५ जनामा संक्रमण पुष्टी भएको हो ।
यो सहित नेपालमा कोरोना संक्रमितको संख्या ६ लाख ६८ हजार ७५१ पुगेको छ । पछिल्लो २४ घण्टामा १२५८ जना संक्रमण मुक्त भएका छन् ।
यो सहित संक्रमण मुक्त हुनेको संख्या ६ लाख ३३ हजार ३३२ जना पुगेको छ । संक्रिय संक्रमितको संख्या २५ हजार ८३७ रहेको छ ।
पछिल्लो २४ घण्टामा ३२ जना संक्रमितको मृत्यु भएको छ । यो सहित नेपालमा कोरोना मृत्यु हुनेको संख्या ९ हजार ५८२ पुगेको छ ।
काठमाडौं । नेकपा एमालेले प्रधानमन्त्री शेरबहादुर देउवालाई विश्वासको मत दिने २२ सांसदलाई २४ घण्टे स्पष्टिकरण सोधेको छ ।
ललितपुरको बालकुमारीस्थित तुलसीलाल स्मृति प्रतिष्ठानको कार्यालयमा बसेको केन्द्रीय कमिटीको बैठकले विश्वासको मत दिने २२ सांसदलाई २४ घण्टाभित्र स्पष्टिकरण सोध्ने निर्णय गरेको हो ।
बैठकमा पार्टी अध्यक्ष केपी शर्मा अोलीले सांसदलाई स्पष्टिकरण सोध्ने प्रस्ताव ल्याएका हुन् । बैठकमा सहभागी अन्य केन्द्रीय सदस्यहरुले पार्टीलाई धोका दिनेलाई तत्काल कारबाही गर्नुपर्ने माग गरेका थिए ।
देउवालाई मत दिनेमा माधवकुमार नेपाल, विरोध खतिवडा, जीवनराम श्रेष्ठ, कल्याणी खड्का, मेटमणि चौधरी, भवानी खापुङ, मुकुन्द न्यौपाने, पार्वती विशुंखे, हिरा केसी, कृष्णकुमार श्रेष्ठ किसान, गोपाल बम, प्रेमबहादुर आले, धनबहादुर बुढा, विना बुढाथोकी, सरला यादव, पुष्पाकुमारी कर्ण, लक्ष्मी चौधरी, निरादेवी जैरु, रामकुमारी झाँक्री, कलिला खातुन, सविना हुसेन र कृष्णलाल महर्जन रहेका छन् ।
त्यसैगरी वरिष्ठ नेता माधवकुमार नेपाल पक्ष भने अनुपस्थित रहेको बैठकले स्थायी कमिटीले अनुमोदन गरेको कार्यदलको गरेको १० बुँदे सहमतिलाई पनि अनुमोदन गरेको छ ।
अमृता के सी ( रोनी )
काठमाडौँ,साउन ४। प्रधानमन्त्री शेरबहादुर देउवाले जोरपाटी स्थित खगेन्द्र नवजीवन केन्द्रमा स्वास्थ्यकर्मीलाई जोन्सन खोप हस्तान्तरण गरेर खोपको शुभारम्भ गरेका छन् ।
प्रधानमन्त्री देउवाले अमेरिकाबाट अनुदान प्राप्त कोरोनाविरुद्धको जोन्सनको खोप लगाउने कार्यको नवजीवन केन्द्रबाट शुभारम्भ गरेका हुन्। उक्त कार्यक्रममा नेपालका लागि अमेरिकी राजदूत र्याण्डी बेरी पनि सहभागी भएका थिए।
अमेरिकाले जोन्सन एण्ड जोन्सन कम्पनीको १५ लाख ३४ हजार ८५० डोज खोप नेपाललाई उपहार स्वरुप दिएको थियो। यो खोप एक डोजमात्र लगाए पुग्छ।उक्त खोप आजबाट ५० देखि ५४ वर्ष उमेर समूहका व्यक्ति, अपांगताको क र ख वर्गको परिचयपत्र पाएका व्यक्ति, नेपालमा बसोबास गरिरहेका शरणार्थी, सफाइकर्मी लगायतलाई दिन सुरु गरिएको स्वास्थ्य मन्त्रालयले जनाएको छ।
काठमाडौं । प्रधानमन्त्री शेरबहादुर देउवालाई विश्वासको मत दिएसँगै नेकपा एमालेका वरिष्ठ नेता माधवकुमार नेपाल सैद्धान्तिक रुपमा विजयी भएका छन् । दोस्रो तहका नेताबाट निरन्तर आएको दवावका वावजुत उनले आफ्नो समूहलाई डगमग हुन दिएनन । यसको प्रतिक्रिया उनले विश्वासको मतपछि दिए । उनले यो दिन निरंकुश प्रवृत्तिको पराजय र जनताको जित भएको प्रतिक्रिया दिए ।
नेता नेपालसहित २२ एमाले सांसदले प्रधानमन्त्री देउवालाई विश्वासको मत दिए । यद्दपी उनको मत नपाए पनि देउवाको पक्षमा बहुमत जुटेको थियो । एमालेका कुल ३१ सांसदले फ्लोर क्रस गरे । भोट नहालेका सांसद अनुपस्थित भए । देउवाको पक्षमा १६५ मत परेको छ । यो झण्डै दुई तिहाई नजिक हो ।
संसदमा एमालेका १२१ सांसदमध्ये विपक्षमा ८३ मत मात्र परेको छ । एक जना तटस्थ बसे । नेता नेपालले संसदको यो निर्णयले पटकपटक भएको प्रतिनिधिसभा विघटन गलत भएको पुष्टि भएको बताए ।
उता, आवेगमा निर्णय गर्दा भीम रावलको भने सांसद पद गुमेको छ । संसदमा घिनलाग्दो खेल भएको भन्दै आइतबार दिउँसो राजिनामाको घोषणा गरे । सांसदहरुले रोक्न खोज्दा खोज्दै पनि आवेगमा आउँदा उनले दिएको राजिनामा भने करीव औचित्यहिन भएको छ ।
न्यू ह्यामसर
गुरुङ ‘तमु’ समाज न्यू ह्यामसरमा हितमान गुरुङको अध्यक्षतामा नयाँ नेतृत्व चयन भएको छ । अघिल्लो साता सम्पन्न साधारणसभाबाट दुई बर्षे कार्यकालका लागि सर्वसम्मन नयाँ नेतृत्व चयन भएको हो ।
नयाँ कार्यसमितिको उपाध्यक्षमा माधव गुरुङ, महासचिव विकास गुरुङ, कोषाध्यक्ष लक्ष्मी गुरुङ, सचिव वविता गुरुङ एवं सह कोषाध्यक्षमा निरा गुरुङ चुनिएका छन् । त्यस्तै कार्यसमिति सदस्यहरुमा पुष्पा गुरुङ घले, प्रकाश गुरुङ, इन्द्र गुरुङ, गंगा घले गुरुङ, दिनेश गुरुङ, सोनाम ग्याम्त्सो, गोविन्द गुरुङ, उषा गुरुङ, दिल गुरुङ, नरेन गुरुङ र सुमन गुरुङ चयन भएका छन् ।
शुक्रबार राज्यको म्यानचेष्टर सिटीमा आयोजित समारोहमा नयाँ कार्यसमितिलाई निर्वाचन समिति संयोजक सोम गुरुङ, निर्वतमान अध्यक्ष छत्रकुमारी गुरुङ एवं सल्लाहकारहरु तोप गुरुङ, शेखर गुरुङ लगायतले बधाई एवं शुभकामना दिएका थिए ।
कार्यक्रममा नव निर्वाचित अध्यक्ष हितमान गुरुङले राज्यमा बसोबास गर्ने गुरुङ तमुहरुको साझा संस्थाको रुपमा रहेको समाजले आफ्नो रिती थिती संरक्षण गर्दै नयाँ पुस्तालाई संस्कार र संस्कृति सिकाउने अभियानलाई निरन्तरता दिने बताए । समाजले राज्यमा बसोबास गर्ने बिभिन्न समुदायलाई समेटेर तमू ल्होछार, बुद्ध जयन्ती जस्ता पर्वहरु सार्वजनिक रुपले मनाउँदै आएको छ ।
काठमाडौं । प्रधानमन्त्री शेर बहादुर देउवाले विश्वासको मत लिन चाहेपछि आज ५ बजेपछि प्रतिनिधिसभाको दोस्रो बैठक बस्यो । त्यसपछि सभामुख अग्नी सापकोटाले प्रधानमन्त्री शेरबहादुर देउवालाई सम्बोधनसहित विश्वासको मत माग्न समय दिए । सो क्रममा देउवाले आफु महामारी नियन्त्रणमा केन्द्रित हुने र जनताको जिउज्यान जोगाउन लाग्ने बताए ।
आफ्नो नियुक्ति संविधान बमोजिम भएको भन्दै यसको रक्षामा लाग्ने उनको प्रतिवद्धता थियो । उनले विश्वासको मत मागेपछि सभामुखले एमाले नेता प्रदीप ज्ञवालीलाई बोल्न समय दिए । त्यतिन्जेल संसदमा पूर्वप्रधानमन्त्री केपी शर्मा ओली उपस्थित भएका थिएनन् ।
सम्बोधनमा ज्ञवालीले ओलीको भरपुर प्रसंशा गरे । त्यसक्रममा उनले न्यायाधिशहरुलाई श्रीमान ५ हरुले गलत व्याख्या गरि आदेश गरेको सम्म आरोप लगाए । उनले आफुहरु युद्धमा हारेर बाध्यभई सम्झौता गर्न नआएको भन्दै कटाक्ष गरे । त्यसक्रममा उनले केपी सरकारले सगरमाथाको उचाई बढाउने देखि चुच्चे नक्सा ल्याएर ऐतिहासिक काम गरेको बताए ।
त्यसपछि सभामुखले माओवादी केन्द्रका अध्यक्ष प्रचण्डलाई रोष्ट्रमको जिम्मा दिए । उनले निकै परिपक्क भाषण गरे । संविधान जोगाउन गरेको प्रयासदेखि प्रदीप ज्ञवालीले गरेका कुतर्कहरुको उनले एक एक जवाफ दिए । युद्धको सन्दर्भमा अलि आक्रामक बनेका उनले आगोलाई नचलाउन र यसलाई विकासको काममा लगाउन सुझाव दिए ।
विगतमा सबै पार्टीको पृष्ठभूमि युद्ध भएपनि सबैले त्यसलाई बिर्सिएर माओवादीको थाप्लोमा मात्र युद्धको पगरी गुथाउने गरेकोमा उनको आपत्ति थियो । माओवादी युद्ध नभएको भए वर्तमान राजनीतिक परिवर्तन असम्भव रहेको भन्दै अहिलेको संविधानलाई राजा महाराजासहितको २०४७ सालको संविधान जस्तै नठान्न समेत आह्वान गरे । उनको ओझिलो र तर्कपूर्ण भाषणले ज्ञवालीका तर्कहरु काटेको थियो ।
त्यसपछि सभामुखले जसपाका अध्यक्ष महन्त ठाकुरसहित अन्य सत्तारुढ दलका नेतालाई बोल्न दिएसँगै बहस सकिएको थियो ।
काठमाडौं । प्रधानमन्त्री शेरबहादुर देउवालाई प्रतिनिधिसभामा २२ जना एमाले सांसदबाट विश्वासको मत प्राप्त भएको छ । यसमध्ये कतिपय ओली खेमाका सांसद समेत छन् । तर, एमालेको एकता कार्यदलमा रहेका योगेश भट्टराई, गोकर्ण विष्ट, सुरेन्द्र पाण्डे, धनश्याम भुसालसहितका नेता भने मतदानमा उपस्थित भएनन् ।
देउवाले प्रतिनिधिसभामा १६५ मत पाएका छन् ।
यसमा कांग्रेस, माओवादी केन्द्र र जसपाको पुरै मत आएको छ । नेकपा एमालेले भने २२ सांसदको मत आएको छ । देउवालाई मत दिनेमा माधवकुमार नेपाल, विरोध खतिवडा, जीवनराम श्रेष्ठ, कल्याणी खड्का, मेटमणि चौधरी, भवानी खापुङ, मुकुन्द न्यौपाने, पार्वती विशुंखे, हिरा केसी, कृष्णकुमार श्रेष्ठ किसान छन् ।
गोपाल बम, प्रेमबहादुर आले, धनबहादुर बुढा, विना बुढाथोकी, सरला यादव, पुष्पाकुमारी कर्ण, लक्ष्मी चौधरी, निरादेवी जैरु, रामकुमारी झाँक्री, कलिला खातुन, सविना हुसेन र कृष्णलाल महर्जनको भोट समेत देउवाले पाएका छन् ।
काठमाडौं । प्रधानमन्त्री शेर बहादुर देउवाले प्रतिनिधिसभाबाट विश्वासको मत पाएका छन् । यससँगै उनले वर्तमान संसदको पुरा कार्यकाल सत्ता चलाउन सक्ने भएका छन् । आज कुल २४९ जना सांसद उपस्थित थिए । त्यसमध्ये १६५ मत उनको पक्षमा पर्यो । उनको विपक्षमा ८३ र तटस्थमा एक मत मात्र परेको छ । अब डेढ वर्ष देशको जिम्मेवारी उनको काँधमा आएको हो ।
कांग्रेस, माओवादी, जसपाको पुरै टीम र एमालेका केही सांसदले उनको पक्षमा मतदान गरे । यससँगै उनको पक्षमा बहुमत जुटेको हो । सर्वोच्च अदालतबाट प्रतिनिधिसभा पुनस्र्थापना भएपछि उनले आजै विश्वासको मत लिएका हुन् । बैठक आज राष्ट्रपतिबाट आह्वान भएको थियो । बैठकमा प्रधानमन्त्रीले आफुलाई विश्वासको मत मागेका थिए ।
उनले जनतालाई कोरोनाबाट बचाउँदै विकास निर्माणका कामलाई तिब्रता दिने आश्वासन दिएका छन् । उनी संविधानको धारा ७६ को उपधारा ५ अनुसार प्रधानमन्त्रीमा नियुक्त भएका हुन् । यो उपधारा अनुसार दलिय ह्वीप नलाग्ने आदेश सर्वोच्चबाट भएसँगै एमालेका सांसदलाई पक्षमा मत हाल्न बाटो खुलेको हो । देउवालाई केपी शर्मा ओली खेमाका प्रेम आले समेतका सांसदको भोट देउवाको पक्षमा आएको छ ।
काठमाडौं । नेपाली कांग्रेसका सभापति एवं प्रधानमन्त्री शेरबहादुर देउवालाई जनता समाजवादी पार्टीको महन्थ ठाकुर पक्षले पनि विश्वासको मत दिने भएको छ।
देउवासँगको छलफलपछि ठाकुर पक्षले पनि उनलाई विश्वासको मत दिने निर्णय गरेको हो ।
जसपाको उपेन्द्र यादव समूहका तर्फबाट देउवालाई विश्वासको मत दिन १९ जना तयार रहेका बेला ठाकुर समूहका बाँकी १३ जना सांसद पनि तयार भएका हुन्। प्रधानमन्त्री देउवाले ठाकुरलाई पत्र नै पठाएर विश्वासको मत दिन आग्रह गरेका थिए ।
पत्र पठाएपछि काँग्रेस र जसपा ठाकुर पक्षबीच संघीय संसद् भवनमा छलफल भएको थियो ।
ठाकुर समूहका एक सांसदका अनुसार मधेसका माग सम्बोधनको प्रतिबद्धतापछि सत्ता गठबन्धनसँग विश्वासको मत दिनेबारे मौखिक सहमति भएको छ।
काठमाडौं । पछिल्लो २४ घण्टामा देशभर १८०१ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार देशभरका प्रयोगशालामा ९६२८ पीसीआर परीक्षणमा १२२३ र ३ हजार जनाको एन्टिजेन परीक्षणमा ५७८ जना गरी १८०१ जनामा संक्रमण पुष्टी भएको हो ।
यो सहित नेपालमा कोरोना संक्रमितको संख्या ६ लाख ६७ हजार १०९ पुगेको छ । पछिल्लो २४ घण्टामा १६६७ जना संक्रमण मुक्त भएका छन् ।
यो सहित संक्रमण मुक्त हुनेको संख्या ६ लाख ३२ हजार ७४ जना पुगेको छ । संक्रिय संक्रमितको संख्या २५ हजार ४८५ रहेको छ ।
पछिल्लो २४ घण्टामा २३ जना संक्रमितको मृत्यु भएको छ । यो सहित नेपालमा कोरोना मृत्यु हुनेको संख्या ९ हजार ५५० पुगेको छ ।
काठमाडौं । नेकपा एमालेका उपाध्यक्ष भीम रावलले प्रतिनिधि सभा सदस्यबाट राजीनामा दिएका छन्। अछाम क्षेत्र नम्बर १ बाट प्रत्यक्ष निर्वाचित रावलले अनैतिक राजनीतिको खेलबाट अलग हुने भन्दै आइतबार राजीनामा दिएका हुन्।
सांसद पदमा प्रत्यक्ष निर्वाचित भएका रावलले अनैतिक राजनीतिक खेलमा सहभागि नहुने बताए ।
काठमाडौं । राष्ट्रपति विद्यादेवी भण्डारीले संवैधानिक परिषद्सम्बन्धी अध्यादेश खारेज गरेकी छन्।
शनिबारको मन्त्रिपरिषद्को निर्णय एवम् सिफारिसमा भण्डारीले केपी शर्मा ओली नेतृत्वको सरकारले ल्याएको अध्यादेश खारेज गरेकी हुन्।
नेपालको संविधानको धारा ११४ को उपधारा (२) को खण्ड (ख) बमोजिम संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) अध्यादेश, २०७८ खारेज गरिएको राष्ट्रपतिको कार्यालयले जनाएको छ।
दल विभाजन सम्बन्धि र संवैधानिक परिषद सम्बन्धि ऐन संशोधनको अध्यादेशलाई लिएर बिपक्षी दल तथा नागरिक तहमा मात्रै नभई तत्कालिन नेकपा भित्रै पनि ठूलो हलचल पैदा भएको थियो ।
एएफपी । विश्वभर ३ अर्ब ६० करोड १८ लाख ५६ हजार २९५ डोज कोरोनाविरुद्ध खोप लगाइएको छ ।
कोरोनाविरुद्ध खोप लगाएका दश देशको तथ्याङ्हरु यस प्रकार रहेका छन् । चीनमा १ अर्ब ४३ करोड ७६ लाख २३ हजार डोज कोरोनाविरुद्ध खोप लगाइएको छ । भारतमा ४० करोड ४९ लाख ३१ हजार ७१५ डोज कोरोनाविरुद्ध खोप लगाइएको छ ।
अमेरिकामा ३३ करोड ६० लाख ७१ हजार ६४० डोज कोरोनाविरुद्ध खोप लगाइएको छ । ब्राजिलमा ११ करोड ६४ लाख ८१ हजार ५२ डोज कोरोना भाइरसविरुद्ध लगाइएको छ ।
जर्मनी ८ करोड ५६ लाख १५ हजार ४३० डोज कोरोनाविरुद्ध खोप लगाइएको छ । बेलायतमा ८ करोड २६ लाख ४९ हजार ३३१ डोज कोरोना भाइरसविरुद्ध खोप लगाइएको छ ।
जापान ६ करोड ६७ लाख १४ हजार ५२८ डोज कोरोनाविरुद्ध खोप लगाइएको छ । फ्रान्समा ६ करोड ३३ लाख १९ हजार ८०५ डोज कोरोना भाइरसविरुद्ध खोप लगाइएको छ ।
टर्कीमा ६ करोड २९ लाख ६४ हजार २४१ डोज कोरोना भाइरसविरुद्ध खोप लगाइएको छ । इटाली ६ करोड ११ लाख २ हजार ९८७ डोज कोरोनाविरुद्ध खोप लगाइएको छ ।
काठमाडौं । नेकपा एमालेले प्रधानमन्त्री शेरबहादुर देउवा नेतृत्वको सरकारको विपक्षमा मतदान गर्ने निर्णय गरेको छ ।
आइतबार बसेको एमाले स्थायी कमिटी बैठकले देउवा नेतृत्वको सरकारको विपक्षमा मतदान गर्ने निर्णय गरेको हो । आज अपराह्न ४ बजे बस्ने प्रतिनिधिसभाको बैठकमा प्रधानमन्त्री देउवाले विश्वासको मत लिँदैछन् ।
माधव नेपाल पक्षका सांसदले भने विश्वासको पक्षमा मतदान गर्ने निर्णय गरेको छ । प्रवक्ता प्रदीप ज्ञवालीले देउवालाई विश्वासको मत दिने सांसदका विषयमा भोली बस्ने केन्द्रीय कमिटीको बैठकले निर्णय गर्ने जानकारी दिए ।
‘हामी प्रतिपक्षमा बस्छौं । प्रधानमन्त्री देउवालाई विश्वासको मत दिँदैनौं,’ नेता ज्ञवालीले भने, ‘आफ्नै पार्टीको सरकार ढाल्ने अनि विपक्षी दलको नेतालाई प्रधानमन्त्री बनाएर विश्वासको मत दिने साथीहरू एमालेमा रहनुहुन्न ।’
उनले माधव नेपालले एक्लै भएपनि विश्वासको मत दिने बताएको जानकारी दिए । प्रवक्ता ज्ञवालीले आज बिहान भएको भेटवार्तामा देउवाको प्रस्तावका पक्षमा एक्लै भएपनि मत हाल्ने कुरा गरेको बताए ।
काठमाडौं । प्रधानमन्त्री शेरबहादुर देउवाले आजै विश्वासको मत लिने तयारी गरिएको छ । नेपाली संचारमाध्यमले प्रधानमन्त्री निकट स्रोतलाइ उदृत गर्दै यसको पुष्टि गरेका छन् । सर्वोच्च अदालतले २८ असारमा पुनस्र्थापना गरेको संसदको बैठक आज अपरान्ह ४ बजेका लागि बोलाइएको छ । प्रधानमन्त्रीले आजकै बैठकमा विश्वासको मत लिने गरि तयारी थाल्न भनेका छन् । जसपाका चार साम्सद उपेन्द्र यादव खेमामा आएको र एमाले विवाद नसेलाएको समयमै विश्वासको मत लिइहाल्ने मुडमा प्रधानमन्त्री पुगेका छन् ।
काठमाडौं । विवेकशील साझाका पूर्वअध्यक्ष उज्वल थापाको उपचार गर्न सर्वसाधारणबाट रकम आह्वान गरिएको थियो । यसरी उठेको रकमबाट उनको उपचारमा खर्च गरि बचेको पैसा भने विभिन्न सात वटा संस्थालाई वितरण गरिएको छ। शनिबार उनको निजी आवासमा परिवार सदस्यले सो रकम हस्तान्तरण गरे । विवेकसिल साझा पार्टीक अनुसार उनको उपचारका लागि संसारभरबाट २,८०० मानिसले सहयोग गरेका छन् । त्यसमध्ये सबैभन्दा कम १० रुपैयाँ प्राप्त भएको थियो ।
ती व्यक्तिहरूबाट रु ६७ लाख ८३ हजार ४ सय ८५ उठेको छ । उठेको रकमबाट २४ लाख २० हजार ३ सय ४९ रूपैयाँ थापाको उपचारमा खर्च भएको छ । बैंक तथा रकम स्थानान्तरण गर्न कुल १ लाख १० हजार ९ सय ३४ रूपैयाँ पैसा खर्च भएको छ । उपचार गरी बाँकी ४२ लाख ५२ हजार २ सय रूपैयाँ सात संस्थालाई बाँडिएको पार्टीले जनाएको छ । कोभिडको महामारीमा चिकित्सकीय तथा जीविकोपार्जन समस्या भोगिरहेकाहरूलाई सहयोग गरिरहेका संस्थाहरूलाई उक्त रकम प्रदान गरिएको बताइएको छ ।
यो रकम पाउने संस्थामा भोरे नेपाल, सर्लाही रु. २,५०,०००, हार्टबिट, काठमाडौं रु २,००,०००, मधेश ह्युमन राइट्स होम, कपिलवस्तु रु। २,०२,२०१.७२, नेपाल क्रिटिकल केयर डेभलपमेन्ट फाउन्डेसन, काठमाडौँ रु. ५,००,०००, राष्ट्रिय आविष्कार केन्द्र, काठमाडौँ रु। १५,००,०००, ओडा फाउन्डेसन, कालिकोट रु. १०,००,००० र सानो पाइला, वीरगन्ज रु. ६,००,००० छन । यो रकम खर्च भएसँगै यसको प्रतिवेदन समेत सार्वजनिक बताइएको छ । थापाको उपचारका क्रममा १८ जेठमा निधन भएको छ ।
काठमाडौं । पूर्वप्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले दोस्रो पटक विघटन गरेपछि सर्वोच्च अदालतबाट पुनर्स्थापित भएको प्रतिनिधिसभाको बैठक आज बस्दै छ । आठौं अधिवेशनको पहिलो बैठक अपराह्न चार बजे बस्ने गरि बोलाइएको छ । यो बैठकमा अब नेकपा एमाले प्रमुख प्रतिपक्षी र अन्य दल सत्तापक्षका रुपमा रहँदैछन् ।
ओलीको सिफारिशमा राष्ट्रपति विद्यादेवी भण्डारीले विघटन गरेको प्रतिनिधिसभालाई पुनर्स्थापित गर्न सर्वोच्च अदालतको संवैधानिक इजलासबाट असार २८ मा परमादेश आएको थियो । परमादेशबाट ओलीको पदसमेत गुमेको छ । संघीय संसद सचिवालयका अनुसार आजको सम्भावित कार्यसूचीमा अघिल्लो सरकारले ल्याएका केही विधेयकहरुलाई प्रक्रियामा लैजाने कार्यक्रम छ । ओली नेतृत्वको सरकारले १६ वटा अध्यादेश ल्याएको थियो ।
बजेट अध्यादेशसमेत यसमा समावेश छन् । यो अधिवेशनमा प्रधानमन्त्री शेरबहादुर देउवाले विश्वासको मत लिनुपर्नेछ । संविधानतः उनले नियुक्त भएका एक महिना भित्र संसदबाट विश्वासको मत लिनुपर्ने प्रावधान रहेको छ । यहाँ उनले विश्वासको मत नपाएमा भने संसद विघटन गर्न सक्ने अधिकार सरकारसँग हुन्छ । यो अवस्थामा मुुलुक निर्वाचनमा जान सक्छ ।
काठमाडौं । आइतबार प्रतिनिधिसभाको बैठक बस्दैछ । केपी शर्मा ओलीले दोस्रो पटक विघटन गरेको प्रतिनिधिसभा सर्वोच्च अदालतबाट पुनस्र्थापित भएसँगै राष्ट्रपति विद्यादेवि भण्डारीले आइतबारका लागि बैठक बोलाएकी छिन् । उक्त बैठक नयाँ बानेश्वरस्थित संसद भवनमा बस्नेछ । संसद बैठक अगाडी नेकपा माओवादी केन्द्र र नेपाली कांग्रेसले संसदीय दलको बैठक बोलाएका छन् ।
माओवादी केन्द्रले आइतबार बिहान ११ बजे बस्ने गरी बैठक बोलाएको छ । संसद अधिवेशनको सन्दर्भमा बैठक डाकिएको पार्टीले जनाएको छ । कांग्रेस संसदीय दलको बैठक भने आइतबार दिउँसो २ बजे बस्ने छ । संघीय संसद भवन, बानेश्वरस्थित ल्होत्से हलमा बैठक डाकिएको छ । संसद बैठक ४ बजे बोलाइएको छ ।
काठमाडौं । जनता समाजवादी पार्टी (जसपा)का चार सांसदले महन्त ठाकुर र राजेन्द्र महतो गुट छाडेका छन् । उनीहरु अब अध्यक्ष उपेन्द्र यादव तथा बाबुराम भट्टराई पक्षमा समावेश भएका छन् । अदालतले संसद विघटनलाई असंवैधानिक भनेसँगै यसअघि ठाकुर र महतो पक्षमा लागेका चार सांसदले कित्ता परिवर्तन गरेका हुन् ।
शनिबार पार्टी कार्यालय, बालकुमारीमा बसेको संसदीय दलको बैठकमा सांसदहरु प्रमोद साह, अमृता अग्रहरी, रानी मण्डल र नरमाया ढकाल सहभागी भएका छन् । ठाकुर पक्षका यी नेता शुक्रबार पार्टी कार्यालयमा भएको छलफलमा भने अनुपस्थित भए । अब ३२ सदस्यीय संसदीय दलमा दुवै पक्षको १६, १६ सांसद भएको छ । ठाकुर पक्षका थप केही सांसद यादव पक्षमा आउने दावि नेताहरुले गरेका छन् ।
यसले शेरबहादुर देउवा नेतृत्वको सरकारलाई विश्वासको मत प्राप्त गर्न अझ सहज हुने छ । महतो र ठाकुर पक्ष भने ओलीको कदमको समर्थन गर्दै सरकारमा सहभागी भएको थियो । तर, उनीहरुको मन्त्री पदलाई अदालतले असंवैधानिक मानेसँगै मन्त्रीपद गुमेको थियो ।
काठमाडौं । नेपालमा कोरोना भाइरसको संक्रमणबाट थप २१ जनाको मृत्यु भएको छ । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा सो संख्यामा मानिसहरुको ज्यान गएको हो । अब नेपालमा कोरोनाबाट ज्यान गुमाउनेको संख्या ९५२७ पुगेको छ । नेपालमा कुल संक्रमितको १.५ प्रतिशत मानिसको ज्यान गएको छ । नेपालमा कुल कोरोना संक्रमितको संख्या ६ लाख ६५ हजार ८८६ पुगेको छ । ६ लाख ३० हजार ४०७ जनाले कोरोना जितेका छन् । अब देशभर सक्रिय संक्रमितको संख्या २५ हजार ९५२ रहेको छ ।